இதயத்தைக் கனக்கவைத்த இறப்புச் செய்தி !

Adirai Educational Trust (AET) என்ற அதிரை கல்வி அறக்கட்டளை உருவாக்கப்பட்டு,

அதன் முதலாவது ‘கல்வி விழிப்புணர்வு மாநாடு’ 2011 ஜனவரியில் நடத்தத் தீர்மானம் நிறைவேற்றியபோது, அந்த வரலாற்றுச் சிறப்பு நிகழ்ச்சியை நடத்த முனைந்து, அந்த மாநாடு யாருடைய தலைமையில் நடத்துவது என்ற கேள்வியை நம் சகோதரர்கள் எழுப்பினர், ‘அதிரை அறிஞர்’ புலவர் அஹ்மது பஷீர் அவர்களைப் பற்றி நான் முன்மொழிந்தேன். ‘யார் அவர்?’ என்று அப்போது அந்தக் கலந்தாய்வில் பங்கு பற்றிய பலரின் புருவங்கள் உயர்ந்தன !  அந்த அளவுக்கு அதிரை மக்களால் அறியப்படாத ‘அதிரை அறிஞர்’ ! சென்னைவாசி;  ஆனால், நம்மூர்க்காரர் ! 

                                  

‘தமிழ்மாமணி’ புலவர் பஷீர் அவர்களின் தலைமையுரை தொடங்கிச் சரளமாக, ஆழமாக,  அடைமழை போன்று அள்ளிச் சொரிந்து நிகந்தபோது, மாநாட்டு அமர்வில் கலந்து கொண்டோரின் புருவங்கள் உயர்ந்தன !  

அதனைத் தொடர்ந்து, இன்னும் சில உள்ளூர் நிகழ்ச்சிகளுக்கும் அழைத்து, அந்த அறிஞரின் அறிவாற்றலைப் பயன்படுத்திக் கொண்டோம்.  இவ்வறிஞர் தமது அறிவுப் பெட்டகத்திலிருந்து அள்ளித் தெளித்த அறிவு முத்துகள், அவர்களை அதுவரை  அறியாதிருந்த – பயன்படுத்திக் கொள்ளாதிருந்த அதிரை மக்களுக்கு அப்போது வியப்பும் கைசேதமும் !

கடந்த 2011 செப்டம்பர் அன்று அந்த அறிவுச் சுடர் அணைந்தது !  ‘அதிரை நிருபர்’ தளத்திலும் அந்த அறிவிப்புச் செய்தி வெளியாயிற்று.

அந்தத் தந்தையாருக்கு ஒரே மகனாகப் பிறந்தவர், ‘அஃப்சலுல் உலமா’ அஹ்மது ஆரிஃப், M.Com., M. Phil. அவர்கள்.  பல ஆண்டுகளாக Arabic Institute of Commerce என்ற on- line Arabic Teaching நிறுவனத்தினை உருவாக்கி, உலகின் பல நாடுகளில் வாழும் அரபி ஆர்வலர்களுக்கு அரபி மொழியைக் கற்பித்துவந்தார்.  அறிவு, அடக்கம், அர்ப்பணிப்பு ஆகியவற்றின் எடுத்துக்காட்டாகத் திகழ்ந்த சகோதரர் அஹ்மது ஆரிஃப் அவர்களின் இறப்புச் செய்தி, நேற்றிரவு (12-04-2014) பேரிடியாக எனக்கு வந்து சேர்ந்தது !   தம்பி ஆரிஃபின் மகளார், நான் மதுரையிலிருந்து பேருந்தில் வந்து கொண்டிருந்தபோது, அன்புத் தந்தையின் இறப்புச் செய்தியை அழுதழுது எனக்கு அறிவித்தார்.

இன்னா லில்லாஹி வஇன்னா இலைஹி ராஜிஊன்! 

அன்புச் சகோதரர் ஆரிஃப் அவர்களின் இறப்பு, மர்ஹூம், ‘தமிழ் மாமணி’, ‘அதிரை அறிஞர்’ அவர்களின் குடும்பத்துக்கு மாபெரும் இழப்பாகும்.  

மறுமை வாழ்க்கையே தமது இலட்சியமாகக் கொண்டு வாழ்ந்த இளவல் ஆரிஃப் அவர்களுக்கு, அல்லாஹ் மறுமையின் நற்பேறுகள் அனைத்தையும் வழங்கி, அவர்களைத் தன் நல்லடியார்களின் கூட்டத்தில் சேர்த்தருள்வானாக !  

அன்னாரின் இறப்புத் தொழுகையும் உடலடக்கமும் சென்னையில் இன்று காலை பத்து மணிக்கு நடைபெறும் என்று அறிவிக்கப்பட்டுள்ளது.

அதிரை அஹ்மத் 


‘தமிழ்மாமணி’ புலவர் பஷீர் அவர்கள்

தொடர்புடைய சுட்டிகள்:

அதிரை அறிஞர்

நீத்தார் பெருமையும் மூத்தோர் அருமையும்

அதிரை கல்வி மாநாட்டுப் புகைப்படங்கள் - 15.01.2011

மறைந்த அதிரை அறிஞர் பஷீர் ஹாஜியார் அவர்கள் நிகழ்த்திய சொற்பொழிவு