இஸ்லாமியப் பொருளாதாரச் சிந்தனைகள்.... தொடர் - 1 28

தொடர் - ஒன்று.

எல்லாம் வல்ல இறைவனின் பெயரால் தொடங்குகிறேன்....

‘ திரை கடலோடியும் திரவியம் தேடு ‘ என்பது தொடக்கப் பள்ளிகளில் நாம் படிக்கத் தொடங்கிய பழமொழி. நமது வாழ்வின் ஒவ்வொரு செயலும் செல்வத்தை உண்டாக்கும் வழிகளைத்  தேடுவதும், செல்வத்தை உண்டாக்குவதும், அந்த செல்வம் கொண்டு துய்ப்பதும், அந்த செல்வத்தை சேமிப்பதும், அந்த செல்வத்தை வேண்டுவோருக்கு தானமாகவோ,கடனாகவோ கொடுப்பதும் சார்ந்த செயல்களாகவே இருக்கின்றன. ஆதி மனிதன் வாழ்வாதரங்களைத் தேடி ஆற்றுப் படுகையை நோக்கி நகரத்தொடங்கிய காலத்திலிருந்து இன்று வரை இந்தத் தேடலுக்கு முடிவு இல்லை.

'பொருளில்லார்க்கு இவ்வுலகம் இல்லை'  என்று திருவள்ளுவர் சுட்டிக்காட்டினார். ‘ பணம் பந்தியிலே’ என்று  பாமரனும் பாட்டுப் பாடினான். ஒரு கவிஞர் ஒருபடி மேலே சென்று “ இல்லானை இல்லாளும் வேண்டாள்; ஈன்றெடுத்த தாயும் வேண்டாள் “ என்று கூறினார். கருப்பு எது, வெள்ளை எது என்று கண்டு பிடிக்க முடியாத மன நோயாளிகள் கூட அவர்கள் கையில் பத்து ரூபாய்த் தாளைக் கொடுத்தால் பல்லிளிக்கக் கண்டு இருக்கிறோம். ‘ பணம் என்றால் பிணமும் வாய் திறக்கும்’ என்றெல்லாம் சொலவடை உண்டு. இடைக்காட்டுச் சித்தர் என்பவர் பாடியுள்ள இந்தப் பாடல் பணத்தின் தேடலை இப்படிப் பறை சாற்றும்  ,

“ஆரியக்கூத்தாடினாலும் தாண்டவக்கோனே! – காசு

காரியத்தில் கண்வையடா தாண்டவக்கோனே!

உள்ளே பகை வையடா தாண்டவக்கோனே! – காசுக்கு

உதட்டில் உறவாடடா தாண்டவக்கோனே!

முட்டாப் பயலை எல்லாம் தாண்டவக்கோனே! – காசு

முதலாளியாக்குதடா தாண்டவக்கோனே!

கட்டி அழும்போதும் தாண்டவக்கோனே! – பிணத்தைக்

கட்டி அழும்போதும் தாண்டவக்கோனே! – பணப்

பெட்டி மேலே கண் வையடா தாண்டவக்கோனே! “

பொருள்தேடல் என்பது மனித இயல்பாகிவிட்டதால்தான் நாடு விட்டு நாடு கடந்து ,  மக்கள், மனை, சுற்றம் துறந்து பல ஆண்டுகள் கூட பல்வேறு நாடுகளில் தொடர்ந்து தங்கி இருந்து பொருள் ஈட்டுகிறோம். பகலுணவு இல்லாமல் கூட பல நேரங்களில் பசி மறந்து உழைக்கிறோம். உறக்கமின்றி விழித்து உழைக்கிறோம். நமது வாழ்வின் பெரும்பாலான நேரங்களை ஆக்கிரமிப்பதும் அள்ளி விழுங்குவதும்  பொருளாதாரச் சிந்தனைகளே. நமது சிந்தனைகள் அதிகம் சிதறிக் கிடப்பது பொருளை ஈட்டுவது, செலவிடுவது, சேமிப்பது, வாரிசுகளுக்கு விட்டுச்செல்வது ஆகிய காரியங்களிலேயே.

மனிதன் படைக்கப்பட்ட காலத்திலிருந்து இந்தத்  தேடல் இருந்ததால்தான் விவசாயம் முதலிய தொழில்கள் உண்டாயின. பொருட்கள் உற்பத்தி செய்யப்பட்டன. புதிய கண்டுபிடிப்புகள் தோன்றின; அறிவியல் வளர்ந்தது; ஆலைகள் இயங்கின; போட்டிகள் தோன்றின; வணிக எல்லைகள் வளர்ச்சி கண்டன; நாடுகள் கண்டு பிடிக்கப்பட்டன; அரசியல் சதிராட்டங்கள் முதல் அடிமை முறை வரை என்று பொருளாதார வளர்ச்சியின் வரலாற்றை சொல்லிக்கொண்டே போகலாம்.

காலப்போக்கில் நாடுகள் உருவாகி அரசியல் எல்லையின் அமைப்பில் நாடுகள் செயல்படத் தொடங்கியபோது அந்தந்த நாடுகளுக்கேற்ப பொருளாதார சட்டங்களும் திட்டங்களும் கோட்பாடுகளும் உருவாயின. புதிது புதிதாக உருவான கோட்பாடுகளுக்குள் இருந்த  அடிப்படை வேறுபாடுகளால் கருத்து வேறுபாடுகளும் தோன்றின. எங்கள் கொள்கைகளே சிறந்தவை மற்றவை கவைக்குதவாதவை என்கிற வாதப் பிரதிவாதங்கள் , அதை முன்னிட்டு அரசியல் ஆக்கிரமிப்புகள் படையெடுப்புகள் என்று வரலாறு மிகவும் ‘பிசி’யாகப் போனது.

இந்த சிறு முன்னுரையோடு நான் இந்தத் தொடரில் எழுத வந்த  இஸ்லாமியப்  பொருளாதாரச்  சிந்தனைகள் என்கிற இந்தத் தொடரை தொடங்க நினைக்கிறேன். அவ்வளவாக மார்க்கக் கல்வி பெற்றிராத  நான்,  இந்த ஒரு சுமையைத் தூக்க நினைத்துத் தொடங்கி இருக்கிறேன். இதை நல்ல விதமாக எழுதி முடிக்க உங்கள் அனைவரின் து ஆவும் வேண்டுகிறேன். நான் எடுத்து இருக்கிற குறிப்புகள் மற்றும் சம்பவங்கள் எழுத்துரு பெறும்போது பொருளாதாரம் படிக்கிற மாணவர்களுக்குப் பயனுள்ளவைகளில் ஒன்றாகவும் பொருளாதாரம் பற்றிப் பொதுவாக தெரிந்துகொள்ள நினைப்பவர்களுக்கு ஒரு அறிமுகத் தகவல்கள் தரத் தகுதி படைத்ததாகவும்   அமைய வழி காட்டவேண்டுமென்று  இறைவனிடம் விண்ணப்பித்துக் கொண்டேன்.  சற்று கடினமான பாதைதான் ஆனால் இறையருளும், உங்கள் அனைவரின் துஆவும் என்றும் போல் என்னுடன்  இருக்குமென்று எண்ணித் தொடங்கிவிட்டேன். இந்தத் தொடர் நிறைவுற்று இதுவும் ஒரு நூலாக வெளியிடப்படவேண்டுமென்று ஆசைப்படுகிறேன். அதற்குரிய தகுதிகளோடு இந்தத் தொடரைத் தொடர்ந்து தர முயற்சி செய்வேன் என்று உறுதி அளிக்க விழைகிறேன். 

இனி இஸ்லாமியப் பொருளாதாரச் சிந்தனைகள்.

இஸ்லாமியப் பொருளாதாரச் சிந்தனைகளின் தனித்தன்மையை எடுத்துரைக்கும் முன்பு  சில அடிப்படைச் செய்திகளை விளங்கிக் கொள்ள வேண்டும். அவற்றை சுருக்கமாகத் தருகிறேன். இவற்றைப் புரிந்து கொண்டால் தனித்தன்மை வாய்ந்த – உயர்வுடைய இஸ்லாமிய பொருளாதார மேம்பாட்டினை நாம் விளங்குவதில் சிக்கல் இருக்காது. 

உலகின் பல்வேறு நாடுகளிலும் அவரவர் சூழ்நிலை, கலாச்சாரம், பண்பாடு, தேவை ஆகியவற்றை அனுசரித்து பல்வேறு பொருளாதாரக் கோட்பாடுகள் உருவாகின; பின்பற்றப்பட்டன. சில காலகட்டங்களில் எதிர்பாராமல் ஏற்படுகின்ற சூழ்நிலைகளுக்கு ஏற்றபடியும் பொருளாதாரக் கொள்கைகள் நிரந்தரமாகவோ, தற்காலிகமாகவோ வகுக்கப்பட்டன. உதரணமாக போர்க்காலங்களில் அல்லது உபரியாக அல்லது பற்றாக்குறையாக விவசாய உற்பத்திகள் கூடக் குறைய இருக்கும்போது என்று எடுத்துக் கொள்ளலாம். சில நோக்கங்களை வைத்து கடைப்பிடிக்கப் படுகின்ற கோட்பாடுகள் அந்த நோக்கங்கள் நிறைவேறிய பிறகு அந்தக் கோட்பாடுகளும் பயனும் செயலும்  இழந்து போகும். ஒரு நாட்டிற்குப் பயனளித்த கோட்பாடு மறு நாட்டுக்கு ஒத்துவராது. பல சமயங்களில் தீங்கும் இழைத்திடக் கூடும். உதாரணமாக, இங்கிலாந்து நாட்டிற்கு வாழ்வளித்த ஆடம்ஸ்மித் என்கிற வல்லுனரின் கோட்பாடுகள் ஜெர்மன் நாட்டிற்கு பேரிழப்பாக அமைந்தது என்பது வரலாறு. மனிதர்கள் தாங்கள் வாழ்கின்ற சூழ்நிலைக்கு ஏற்ப பொருளாதார திட்டத்தை சுய சிந்தனை மூலம் உருவாக்கி வாழ்கின்றபோது நாட்டிற்கு நாடு அது மாறுபடுகின்றது. அதனால் பிரிவு உண்டாகிறது சுயநலம் தோன்றி உலக மக்கள் சண்டையிட்டுக் கொள்ள நேரிடுகிறது. மனித வளர்ச்சி பாதிக்கப்படுகிறது.

மனிதர்களால் உருவாக்கப்படுகின்ற பொருளாதார திட்டம் எந்த அளவிற்கு அகில உலக மக்களுக்கும்  வழிகாட்டியாய் இருந்திட  முடியும் என்பதும் மிக முக்கியமான நாமே கேட்டுப் பார்த்துக் கொள்ளவேண்டிய கேள்வி. அடுத்து,  மனிதர்களுடைய  சிந்திக்கும் திறனுக்கு ஓர் எல்லையுண்டு. எதிர்காலத்தில் மாறும் தேவைகளுக்கு ஏற்ப எவராலும் நீண்ட, நிலைத்த பொருளாதார கொள்கையை உருவாக்கிட இயலாது. இதனை கடந்த கால வரலாறு தெளிவாக மெய்பித்து இருக்கிறது.

ஏறத்தாழ 80 ஆண்டுகள் உலகை தனது கைப்பிடியில் வைத்திருந்த கம்யூனிசக் கொள்கை இன்று அழிந்து விட்டது. மேலும் எந்த ஒரு பொருளாதாரக் கொள்கையும் பெரும் மாறுதலுக்கு உள்ளாகாமல் இருந்ததில்லை. இதனால் காலத்திற்கு ஏற்ப பொருளியல் தத்துவங்கள், கொள்கைகள், நடைமுறைகள், நிறைவு பெறாமலேயே இருந்து வருகின்றன. புதுப்புது கொள்கைகள் மனித சமுதாயத்தின் மீது ஒவ்வொரு காலகட்டத்திலும் சோதித்துப் பார்க்கப்படுகின்றன.

உலகின் ஆட்சி அதிகாரத்தில் உள்ளவர்கள் தங்களின் விருப்பத்திற்கு உள்நோக்கத்திற்கு வசதியாக பிற மக்களின் மீது தங்களின் பொருளாதாரத் கருத்துக்களைத் திணித்து வருகின்றனர் என்பதே முற்றிலும் உண்மை. புதிதாக ஒரு கருத்து உருவாகும் போது அது எல்லோருக்கும் நன்மையளிக்கக்கூடியது என்று விளம்பரம் செய்யப்படுகிறது. உதாரணமாக இந்தியாவில் நேரடி அந்நிய முதலீடு சம்பந்தமாக வாதப்பிரதிவாதங்கள் தொடர்கின்றன; பாராளுமன்றம் கூச்சல் குழப்பங்களால் செயலிழந்து போகின்றது. புதிய புதிய கொள்கைகளால் மோசமான பாதிப்பு ஏற்படுகின்ற போது அக்கருத்தை உபதேசித்தவர்கள் ,  நடைமுறை படுத்தியவர்கள் ஒன்று உயிருடன் இருப்பதில்லை அல்லது அவர்கள் அதைப்பற்றி கவலைப்படுவதில்லை. பாதிப்புக்கு உள்ளான மனிதர்களுக்கு ஏற்பட்ட  துன்பம் எவ்வகையிலும் துடைக்கப்படுவதும்  இல்லை. எத்தகைய இழப்பீடும் கொடுக்கப்படுவதும்  இல்லை. பல நேரங்களில் மனிதர்களால் உருவாக்கப்படும் பொருளாதாரக் கொள்கைகள் அவற்றை  உருவாக்குபவர்களின் சொந்த சுய சுரண்டல் மற்றும் இலாப நோக்கங்களுக்காகவே உருவாக்கப்பட்டு செயல்படுத்தப் படுகின்றன.  உதாரணமாக ஒரு குறிப்பிட்ட பகுதியில் நிறைய நிலங்கள் வைத்திருக்கும் ஆளும் அரசியல்வாதி தனது நிலங்களுக்கு அருகில் அரசின் தொழிற் பேட்டைகளை அமைப்பது.

தனிமனிதனின் எண்ணத்தில் உதித்த பொருளாதாரக் கொள்கைகள் இவ்வாறெல்லாம் குறையுடையவைகளாக அளவிடப்படும்போது    யார்தான்  மனிதர்களின் பொருளியல் வாழ்க்கைக்குத் தேவையான கோட்பாடுகளை அறிவிக்கக்கூடும் என்ற கேள்வி இயல்பாக எழுகிறது.

எந்த வல்ல இறைவனால் இந்த உலகம் படைக்கப்பட்டதோ , யார்  இவ்வுலகில் ஓர் இயற்கைத் தன்மையை ஏற்படுத்தி ஒழுங்குபடுத்தியிருக்கின்றானோ யாரின்  அறிவுரை உலகம் தழுவிய ஒட்டு மொத்த மனித சமுதாயத்துக்கும்  நன்மையளிக்கக் கூடியதாக இருக்குமோ, அந்த இறைவனும் அவனது திருத்தூதர் மொழிந்த மொழிகளும்தான் பொருளாதார வாழ்க்கைக்கு வழிகாட்டக் கூடியவைகளாக இருக்க முடியும்.  இக்கருத்தை இங்கிலாந்து நாட்டு பொருளியல் நிபுணர் ஆடம்ஸ்மித் தமது நூலில் வலியுறுத்தியிருக்கிறார். எனவே, இறைவன் உருவாக்கிய இஸ்லாமிய பொருளாதாரக் கோட்பாடுகளைப் பற்றி நாம் அறிய வேண்டியது நமது அறிவை விசாலப்படுத்த அவசியமாகிறது.

அப்படிப் பட்ட பொருளாதாரக் கோட்பாடுகள், வழிகாட்டுதல்கள் இஸ்லாமிய கொள்கைகளில் விரவிக்கிடப்பதை திரட்டி, வகுத்து,  தொகுத்து , தருவதே இந்த ஆக்கத்தின் நோக்கம். எல்லாம் வல்ல இறைவன் படைத்தவன் மட்டுமல்ல; பாதுகாப்பவன் மட்டுமல்ல; உபதேசிப்பவன் மட்டுமல்ல; தண்டிப்பவன் மட்டுமல்ல; உரிய முறையில்  நேர்வழி காட்டுபவனும் அவன்தான்.

இததகைய இறைவனின் வழிகாட்டுதல்களில் இறைவனும் அவனது திருத்தூதர் நவின்ற நன்மொழிகளின் அடிப்படையில் அமைவுற்ற   இஸ்லாமியப்  பொருளாதாரக்  கோட்பாடுகள் உலகப் பொருளாதாரத்தில் ஏற்படுத்திய தாக்கங்கள்  பல அரிய சாதனைகளை அவைகளை பின்பற்றப்பட்ட பிரதேசங்களில்  நிகழ்த்தியிருக்கின்றன; நிகழ்த்திக்கொண்டு இருக்கின்றன.  

• வறுமை ஒழிப்புத்திட்டத்தை மேற்கொண்டு ஜகாத் மூலம் ஏழைகளுக்கு முறையாக விநியோகித்து அது வெற்றியும் பெற்றுள்ளது.
• வாணிப நெறிமுறைகள் சீரிய முறையில் கையாளப்பட்டுத் தடையில்லா வர்த்தகம் நடைபெற உதவியுள்ளது.
• வட்டியினை முழுமையாக ஒழித்துப் பொருளாதாரத் துறை தடையில்லாமல் எளிதாகச் செயல்பட ஏற்பாடு செய்தது.
• சில சீர்திருத்தச் சட்டங்கள் செம்மையாகவும், இயற்கையாகவும் அமல் செய்ததன் மூலம் விவசாய உற்பத்தி பெருகி விவசாயிகள் தங்கள் பொருள்களுக்கு நல்ல விலை கிடைக்கச் செய்தது.
• கடன், கொடுக்கல், வாங்கல் சீர்திருத்தம் செய்யப்பட்டது.
• முதன்முதலாக பெண்களுக்கு சொத்துரிமை வழங்கப்பட்டதன் மூலம் பெண்களின் சமூக பொருளாதார முன்னேற்றம் ஏற்பட வழிவகுத்தது.
• நியாய விலை, நியாயமான கூலி, பொருளாதார நீதி போன்றவை முதன்முதலாகச் செயல் வடிவம் கொடுக்கப்பட்டன.
• எடையில் , அளவில் நிகழ்த்தப்பட்ட மோசடிகள் தடுத்து நிறுத்தப்பட்டன. 

மேற்கூறிய அனைத்திலும் உலக வரலாற்றில் முதன்முதலாகச் செயல்வடிவம் கொடுக்கப்பட்டது எதுவோ, அதுதான் இஸ்லாமிய பொருளாதாரத்  திட்டங்களாகும். இவைகளின் அடிப்படைகளாக இருந்தவைகளாக இஸ்லாமியப் பொருளாதார வல்லுனர்கள் சுட்டிக்காட்டுவது 

1. திருமறையின் ஷரியத்

2. சுன்னாஹ் எனப்படும் நபி முஹம்மத் (ஸல்) அவர்களின் வழிகாட்டல்கள்

ஆகியவைகளாகும்.

இந்த ஆய்வில் நாம் விவாதிக்கவும் விவரிக்கவும்   இருப்பது முக்கியமாக கீழ்க்கண்ட அம்சங்களாகும். இவைகளைப் பற்றிய  நோக்கங்களை வரையறுத்துக் கொண்டால் நமது பாதைகள் எவை என்று நமக்கு விளங்கிவிடும். அவை:

1. பொருளாதாரக் கோட்பாடுகளை பொதுவான மதங்களுடனும் – சிறப்பாக இஸ்லாத்துடனும் மாறுபட்ட கோணங்களில் ஒப்பிட்டுப் பொருத்திப் பார்ப்பதும்.
2. இன்றைய தலைமுறையின் வாழ்வின் அம்சங்களில் இஸ்லாமிய பொருளாதாரக் கோட்பாடுகளின் தாக்கம் யாவை என்பதையும்,
3. இஸ்லாமியப் பொருளாதாரக் கோட்பாடுகள் எவ்வாறு பொதுவான மனித சமுதாயத்துக்கும் தனி மனிதனுக்கும் தொடர்புடையதாகிறது என்பதும் சிறப்பாக இஸ்லாமிய நாடுகளிலும் சமுதாயங்களிலும் எவ்விதங்களில் தாக்கத்தை ஏற்படுத்துகிறது என்பதை ஆய்வதும்,
4. இஸ்லாமிய பொருளாதாரம் என்பதன் விரிவான விளக்கத்தை அறிவதும்,
5. இஸ்லாமியப் பொருளாதாரத்தை அரசியல் ரீதியாக நடைமுறையில் கொண்டு வருவது பற்றிய வழி முறைகளை எடுத்து இயம்புவதும்,
6. இஸ்லாமியப் பொருளாதாரக் கோட்பாடுகள், மனித வாழ்வில் ஆதிக்கம் செலுத்தும் சமூக அறிவியல், வரலாறு, அறிவியல், கலைகள் தொடர்புடைய பிற கல்விகளோடு எத்தகைய  உறவு கொண்டிருக்கும் என்பதுடன் இத்தகையக் கோட்பாடுகள் கடைப்பிடிக்கப் படாமல் அலட்சியப் படுத்தப்படும்போதோ முன்னர் அலட்சியப்படுத்தப் பட்டபோதோ  உலகம் படித்துக் கொண்ட பாடங்களையும் பட்டியலிட்டு எச்சரிப்பதும்  இந்த ஆக்கத்தின் அடிப்படை நோக்கங்களாக அமையும். இன்ஷா அல்லாஹ்.

தமிழ் மொழியில் இப்படிப்பட்ட ஆக்கங்கள் குறைவாகவே காணப்படுகின்றன.  இயன்றவரை சுவை கூட்டி இதைப் பரிமாற நினைக்கிறேன்.  சுவைப்பவர்களுக்கு சலிப்புத்தட்டும்போது  தொட்டுக்கொள்ள ஊறுகாய்த் துண்டுகளும் தரப்படும். கேட்டும் பெற்றுக்கொள்ளலாம். தொடரின் இடையில் படிப்பவர்கள் எழுப்பும்  கேள்விகள் மற்றும் விவாதங்களே இந்ததொடருக்கு மேலும் சுவை கூட்டுவதாக அமையும் .  அவற்றை அன்புடன் வரவேற்கிறேன்.

இவைகளைப் பற்றி இனித்  தொடர்ந்து விவாதிக்கலாம். இன்ஷா அல்லாஹ்.

இது வளரும் பொருளாதாரம்.....

இபுராஹீம் அன்சாரி