ஏகத்துவத்தின் முதன்மையானவரின் தியாகங்களை நினைவூட்டுவோம்... 2

அல்லாஹ்வின் திருப்பெயரால்...

இஸ்லாமிய மாதங்களில், வருடம் இரண்டு நாட்களை நாம் சங்கை பொருந்திய பெருநாட்களாக கொண்டாடி வருகிறோம். ஷவ்வால் மாதத்தின் முதல் பிறையை நோன்புப் பெருநாளாகவும், துல்ஹஜ் மாதத்தின் பத்தாவது பிறையை ஹஜ்ஜுப் பெருநாளாகவும் நாம் கொண்டாடி மகிழ்கிறோம்.

ஹஜ்ஜுப் பெருநாள் என்றதுமே நமக்கு இரண்டு நபிமார்களைப் பற்றி நினைவிற்கு வரும். அல்லாஹ்வின் உற்ற தோழர் என்ற கருத்தில் அழைக்கப்படும் "கலீலுல்லாஹ்" என்ற பெயருக்கு சொந்தக்காரரான நபி இபுறாஹீம் (அலை) அவர்களும், அவர்களின் அருமை மகனார் நபி இஸ்மாயீல் (அலை) அவர்களும். நம் நினைவில் நிற்கும் அந்த இரண்டு நபிமார்களாவர். அல்லாஹ்வின் அருள்மறையாம் திருகுர்ஆனை கருத்தூன்றி ஆராயும்போது நபி இபுறாஹீம் (அலை) அவர்களுடைய தியாக வாழ்வு பொன்னெழுத்துக்களால் பொறிக்கப்பட வேண்டிய அற்புத வரலாறாகும். நபி இபுறாஹீம் (அலை) அவர்களுடைய வாழ்க்கையில் ஏற்பட்ட சோதனைகளையும் வேதனைகளையும், துயரங்களையெல்லாம் அவர்கள் பொறுமையுடன் சகித்திருந்து இறைவனிடம் பிரார்த்தித்து வெற்றி பெற்ற வரலாற்றையும் நாம் தெரிந்து கொள்ள வேண்டியது கட்டாய கடமையாகும். நபி இபுறாஹீம் (அலை) அவர்களுடைய வாழ்க்கையில் ஏற்பட்ட சோதனைகளைச் சுருக்கமாக பார்ப்போம்.

எல்லாம் அறிந்த இன்றைய காலகட்டத்தில் ஏகத்துவம் ஏகத்துவவாதி என்று சொன்னால் ஒரு ஏளனமாக பார்க்கும்போது, 5,000 ஆண்டுகளுக்கு முன்பு ஏகத்துவத்தை உறக்க சொன்ன உத்தமர் நபி இபுறாஹீம் (அலை) அவர்கள். ஆகவே தான் நாம் ஏகத்துவத்தின் தந்தை என்று நபி இப்றாஹீம் (அலை) அவர்களை அழைக்கிறோம்.

ஏகத்துவத்தை எடுத்துச் சொல்லும் போது ஊரில் உள்ள ஜமாத்து எதிர்த்தால், தெருவில் உள்ள சங்கம் எதிர்த்தால், சொந்தங்கள் எதிர்த்தால், நாம் பொறுத்துக் கொள்வோம், சகித்துக் கொள்வோம். ஆனால் நரகத்துக்கு செல்லாமல் இருக்க நம்முடைய தாய் தந்தையருக்கு ஏகத்துவத்தை எடுத்துச் சொல்லி அவர்கள் அதனை ஏற்காவிட்டால் நாம் எத்தகைய வேதனைப் படுவோம். அது போல் அருமை நபி இப்றாஹீம் (அலை) அவர்கள் தன் தந்தைக்கு ஏகத்துவத்தை எடுத்துரைக்கிறார்கள் வேதனையடைகிறார்கள்.

"என் அருமைத் தந்தையே! மெய்யாகவே உங்களிடம் வந்திராத கல்வி ஞானம் நிச்சயமாக எனக்கு வந்திருக்கிறது ஆகவே, நீங்கள் என்னைப் பின்பற்றுங்கள்; நான் உங்களைச் செம்மையான நேர்வழியில் நடத்துகிறேன். "என் அருமைத் தந்தையே! நீங்கள் ஷைத்தானை வணங்காதீர்கள்; நிச்சயமாக ஷைத்தான், அர்ரஹ்மானுக்கு (அருள் மிக்க நாயனுக்கு) மாறு செய்பவன். "என் அருமைத் தந்தையே! நிச்சயமாக அர்ரஹ்மானிடமிருந்துள்ள வேதனைவந்து உங்களைத் தொட்டு, நீங்கள் ஷைத்தானின் கூட்டாளியாகி விடுவதைப் பற்றி நான் அஞ்சுகிறேன்" (என்றார்). (அதற்கு அவர்) "இப்றாஹீமே! நீர் என் தெய்வங்களை புறக்கணிக்கிறீரா? நீர் (இதை விட்டும்) விலகிக் கொள்ளாவிட்டால் உம்மைக் கல்லெறிந்து கொல்வேன்; இனி நீர் என்னைவிட்டு நெடுங்காலத்திற்கு விலகிப் போய்விடும்" என்றார். (அதற்கு இப்ராஹீம்) "உம்மீது ஸலாம் உண்டாவதாக! மேலும் என் இறைவனிடம் உமக்காகப் பிழை பொறுக்கத் தேடுவேன்; நிச்சயமாக அவன் என் மீது கிருபையுடையவனாகவே இருக்கின்றான்" என்று கூறினார். நான் உங்களை விட்டும், அல்லாஹ்வையன்றி நீங்கள் பிரார்த்திப்பவற்றை விட்டும் விலகிக் கொள்கிறேன்; மேலும் நான் என் இறைவனை பிரார்த்தித்துக் கொண்டே இருப்பேன்; என் இறைவனைப் பிரார்த்திப்பது கொண்டு நான் நிர்ப்பாக்கியவானாகாமல் இருக்கப் போதும்" (என்றார்).  (குர்ஆன் 19:43 – 19:48)

ஏகத்துவத்தை தன் தந்தைக்கு எடுத்து வைத்த இபுறாஹீம் (அலை) அவர்கள் உங்களுக்கு முன்மாதிரி என்று அல்லாஹ் குர் ஆனில் கூறுகிறான். 

“இப்றாஹீமிடமும், அவரோடு இருந்தவர்களிடமும், நிச்சயமாக உங்களுக்கு ஓர் அழகிய முன்மாதிரி இருக்கிறது, தம் சமூகத்தாரிடம் அவர்கள், "உங்களை விட்டும், இன்னும் அல்லாஹ்வையன்றி நீங்கள் வணங்குகிறவற்றைவிட்டும், நாங்கள் நிச்சயமாக நீங்கிக் கொண்டோம்; உங்களையும் நாங்கள் நிராகரித்து விட்டோம், அன்றியும் ஏகனான அல்லாஹ் ஒருவன் மீதே நீங்கள் நம்பிக்கை கொள்ளும் வரை, நமக்கும் உங்களுக்குமிடையில் பகைமையும், வெறுப்பும் நிரந்தரமாக ஏற்பட்டு விட்டன" என்றார்கள். ஆனால் இப்றாஹீம் தம் தந்தையை நோக்கி, "அல்லாஹ்விடத்தில் உங்களுக்காக (அவனுடைய வேதனையிலிருந்து) எதையும் தடுக்க எனக்குச் சக்தி கிடையாது, ஆயினும் உங்களுக்காக நான் அவனிடத்தில் நிச்சயமாக மன்னிப்புத் தேடுவேன்" எனக் கூறியதைத் தவிர (மற்ற எல்லாவற்றிலும் முன் மாதிரியிருக்கிறது, அன்றியும், அவர் கூறினார்); "எங்கள் இறைவா! உன்னையே முற்றிலும் சார்ந்திருக்கிறோம்; (எதற்கும்) நாங்கள் உன்னையே நோக்குகிறோம் மேலும், உன்னிடமே எங்கள் மீளுதலும் இருக்கிறது," (குர் ஆன் 60:4)

(நபியே!) பின்னர் "நேர்மையாளரான இப்றாஹீமின் சன்மார்க்கத்தை நீர் பின்பற்ற வேண்டும்" என்று நாம் உமக்கு வஹீ அறிவித்தோம்; அவர் முஷ்ரிக்குகளில் (இணை வைப்போரில்) ஒருவராக இருந்ததில்லை.(குர் ஆன் 16:123)

நபி(ஸல்) அவர்களுக்கு முன்னால் நம்முடைய தலைசிறந்த மூதாதையர்களில் முன்னணியில் இருப்பவர்கள் தான் நம் அருமை நபி இபுறாஹீம்(அலை) அவர்கள். நமது உயிரினும் இனிய நபி முஹம்மது (ஸல்) அவர்களை நபி இபுறாஹீமின் மார்க்கத்தையே பின்பற்றுங்கள் என்று அல்லாஹ் கட்டளையிடுகிறான். (மேலும் பார்க்க அல்குர் ஆன் 3:95)

நபி இபுறாஹீம் (அலை) அவர்களின் மனைவி அன்னை ஹாஜரா(அலை) அவர்களின் வயது முதிர்ந்த பருவத்தில் அந்த தம்பதியர் அவர்கள் இருவருக்கும் இஸ்மாயில்(அலை) என்னும் அழகிய குழந்தை பிறக்கிறது. (மேலும் பார்க்க அல்குர்ஆன் 14:39) தவமிருந்து கிடைத்த பொக்கிஷமாக நபி இஸ்மாயில்(அலை), இவர்களின் வழித்தோன்றலில் வந்தவர்கள் தான் நம்முடைய ரஹ்மத்துலில் ஆலமீன் அண்ணல் நபி முஹம்மது (ஸல்) அவர்கள். நபி இபுறாஹீம் (அலை) அவர்களின் வழியைப் பின்பற்றுமாறு அல்லாஹ் நபி(ஸல்) அவர்களுக்குக் கட்டளையிடுகிறான் (மேலும் பார்க்க அல்குர்ஆன் 3:95)

நபி இபுறாஹீம் (அலை) அவர்களுக்கு அல்லாஹ்வின் கட்டளை வருகிறது, அன்னை ஹாஜரா (அலை) அவர்களையும், பால்குடி பச்சிளம் குழந்தை நபி இஸ்மாயில் (அலை) அவர்களையும் மக்காவின் மானுட புழக்கம் இல்லாத அந்த வெட்டவெளி பாலைவனத்தில் விட்டுச் செல்லும்படி அல்லாஹ் கட்டளையிடுகிறான். நபி (இபுறாஹீம் அலை) அல்லாஹ்வின் கட்டளைக்கு அடிபணிந்தவர்களாக எவ்வித மறுதலிப்பின்றி அன்றைய மக்கா பிரதேசத்தை விட்டுச் செல்ல ஆரம்பித்து விடுகிறார்கள். அன்னை ஹாஜரா (அலை) அவர்கள் நபி இபுராஹீம் (அலை) அவர்களிடம் கேட்கிறார்கள் “பச்சை பயிர்கள் அற்ற இந்த வரண்ட பூமியில் என்னை விட்டு விட்டு எங்கே செல்கிறீர்கள்” இபுறாஹீம் அலை) அவர்களிடமிருந்து எந்த ஒரு பதிலும் வரவில்லை. அன்னை ஹாஜரா (அலை) மீண்டும் “அல்லாஹ் கட்டளையிட்டானா?” என்றும் கேட்கிறார்கள், அதற்கு இபுறாஹீம் (அலை) அவர்கள் “ஆம் அல்லாஹ் தான் இப்படி விட்டு விட்டுப் போகச் சொன்னான்” என்று பதிலுரைத்தார்கள்.

உடனே அந்த ஈமானியத் தாயிடமிருந்து வெளிப்பட்ட வார்த்தைகள் இஸ்லாமிய வரலாற்றில் என்றும் நினைவில் கொள்ள வேண்டியவை. “அப்படியானால் அல்லாஹ் எங்களைக் கை விடமாட்டான்” என்று தன்னுடைய ஈமானின் உறுதியை கியாம நாள் வரை மக்களும் சொல்லும் விதமாக அந்த தியாகப் பெண்மணி அன்னை ஹாஜரா (அலை) அவர்கள் சொன்னார்கள். பின்னர், அல்லாஹ்வே அன்னை ஹாஜராவுக்கும், நபி இஸ்மாயீலுக்கும் (அலை) உணவளித்தான். ஸஃபா-மர்வா மலைக் குன்றுகளுக்கு இடையே அன்னை ஹாஜரா அவர்கள் தண்ணீருக்காக அங்குமிங்கும் ஓடினார்கள், அல்லாஹ் ஜம்-ஜம் என்ற நீரூற்றை வரவைத்து, இவ்வுலக இறுதி நாள் வரை அன்னை ஹாஜராவின் ஈமானை ஞாபகப்படுத்தும் விதமாக செய்துள்ளான். (மேலும் பார்க்க புகாரி:3364 Volume :4 Book :60)

அன்னை ஹாஜரா (அலை) அவர்கள் அல்லாஹ்வின் மேல் வைத்திருந்த நம்பிக்கை, அவர்களின் ஈமானிய உறுதியில் சிறிதளவேனும் நம்மிடம் ஈமானிய உறுதி அல்லாஹ் மேல் முழு நம்பிக்கையாக இருக்கிறதா என்பதை சிந்திக்க வேண்டும். 

அல்லாஹ்வின் தீனை எத்திவைக்க இஸ்லாமிய பிரச்சாரத்திற்காக ஒரு ஆண் வேறு ஊருக்கு செல்ல நினைத்தால், நம் தாய் தந்தையர்கள், மனைவிமார்களிடம் அன்னை ஹாஜரா ஈமானிய உறுதியுடன் சொன்னது போன்ற வார்த்தையை எதிர்ப்பார்க்க முடியுமா? நபி(ஸல்) அவர்களின் அருமை மனைவி அன்னை ஹதீஜா (ரலி) அவர்கள் சொன்ன ஆறுதல் வார்த்தைகளைப் போன்று நாம் செவியுற முடியுமா?

பொருளாதாரத்தில் இலட்சங்கள் செலவு செய்து கடமையான ஹஜ்ஜுக்கும், உம்ராவுக்கு செல்கிறோம், அங்கே ஜம்-ஜம் நீரையும் பருகுகிறோம் அதனை ஊரில் இருக்கும் சொந்தங்களோடு பகிர்ந்து கொள்ளவும் எடுத்து வருகிறோம், அந்த தருணத்தில் ஈமானிய தாய் அன்னை ஹாஜரா அவர்கள் செய்த தியாகத்தை எண்ணி அவர்கள் பட்ட கஷ்டத்திற்காக என்றைக்காவது நாம் கண்ணீர் சிந்தியிருப்போமா? தன்னுடைய ஈமானின் உறுதியோடு தன் மகனின் உயிரைக் காப்பாற்ற போராடிய போராட்டத்தால் கண்டெடுத்த ஜம்-ஜம் தண்ணீரை ஒரு புனித நீராக மட்டுமே காண்கிறோமே, அதை அல்லாஹ்வுக்காக செய்த தியாகத்தின் ஒரு அத்தாட்சியாக நாம் கண்டு அன்னை ஹாஜரா (அலை) அவர்களின் ஈமானிய உறுதியை நினைவு கூர்ந்து நம்முடைய ஈமானை  வலுப்படுத்த முயற்சித்திருப்போமா?

ஈமானைச் சோதனை செய்து பார்க்க நம்முடைய முன்னோடி இப்றாஹீம் (அலை) அவர்களுக்கு மீண்டும் அல்லாஹ்வின் கட்டளை வருகிறது, தன்னுடைய மகனை அல்லாஹ்வுக்காக அறுத்து பலியிட வேண்டும் என்ற கட்டளை வருகிறது.

வயது முதிர்ந்த பருவத்தில் கிடைத்த பொக்கிஷம், நீண்ட காலம் தன் மனைவியையும், மகனையும் பிரிந்திருந்தார்கள் அல்லாஹ்வின் தூதர் இப்ராஹீம் (அலை) அவர்கள். தன்னுடைய மகனை அறுத்து பலியிட தயாராகிறார்கள் தந்தை இப்றாஹீம் (அலை) அவர்கள், தன் அருமை மகன் இஸ்மாயிலிடம் கேட்கிறார்கள், “அல்லாஹ் உன்னை அறுத்து பலியிட கட்டையிட்டுள்ளான் என் அருமை மகனே உன்னுடைய நிலை என்ன?” அதற்கு இஸ்மாயீல் (அலை) அவர்கள் “எனதருமை தந்தையே அல்லாஹ் ஏவியதை நீங்கள் செய்யுங்கள், என்னை பொறுமைசாலியாக காண்பீர்கள்” என்று தன்னுடைய ஈமானின் உறுதியை உலகுக்கு காட்டிய முன்மாதிரி தியாகத்தின் சுடராகத் திகழ்ந்தார்கள் இஸ்மாயீல் (அலை) அவர்கள்.

நம்முடைய பிள்ளைகள் மார்க்கச் சூழல் கல்வியோடு உலக கல்வி படிக்க அரபு மதர்ஸாவோடு ஒன்றிணைந்த பள்ளிக் கூடத்திலோ அல்லது வெளியூரிலோ அல்லது வெளிநாட்டிலோ படிக்க வைக்க வேண்டும், குறைந்தபட்சம் இந்த தியாகத்தை செய்ய நாம் பல முறை யோசிக்கிறோம், மார்க்க கல்வியை கற்கப்போகும் அந்த பிள்ளையின் எதிர்காலம் என்னவாகும் என்கிற ஒருவித குழப்பத்தோடு தள்ளாடுகிறோம். ஆனால், யூத கிருஸ்தவர்களின் கட்டுப்பாட்டில் உள்ள கல்வித் திட்டமான இந்த அற்ப உலக கல்விக்காக கண்டம் விட்டு கண்டம் தாண்டி படிக்க வைக்க உடனே முடிவு செய்து தன் பிள்ளையின் எதிர்காலம் நன்றாக இருக்கும் என்று நம்பி அனுப்பி வைக்கிறோமே, மார்க்க கல்வியோடு உலக கல்வி பயிலப்போகும் நம் பிள்ளையின் எதிர்காலத்தை அல்லாஹ் சிறப்பாக்கி வைப்பான் என்ற நம்பிக்கை ஏன் நம்மிடன் உறுதியாக வர மறுக்கிறது?

எத்தனை ஆடுகள், மாடுகள் உணவுக்காவும், உலுஹியாவுக்காகவும் அறுத்திருப்போம்? எத்தனை விதமான பொட்டலங்களாக அந்த கறியினை பங்கு வைத்திருப்போம்? அவன் இத்தனை ஆடு / மாடு அறுத்திருக்கிறான், நாம் அதைவிட இரண்டு கூடுதலாக அறுக்க வேண்டும், அவன் மாடு கொடுக்கிறான், நான் ஒட்டகம் கொடுக்க வேண்டும் என்று மனிதர்களுக்காக போட்டி போடுகிறோமே, என்றைக்காவது அந்த தியாகங்கள் செய்த தாய் தந்தையரான இபுறாஹீம் (அலை) ஹாஜரா (அலை) அவர்களின் அருமை மகனார் இஸ்மாயீல் (அலை) ஆகியோரின் ஈமானிய உறுதியையும் அவர்கள் அல்லாஹ் மேல் வைத்திருந்த முழு நம்பிக்கையையும் ஞாபகப்படுத்திக் கொண்டு ஆடு / மாடு / ஒட்டகம் அறுத்து பங்கிட்டு வைத்திருக்கிறோமா? அதன் மூலம் நம்முடைய ஈமானை உறுதிப்படுத்த முயற்சி செய்திருப்போமா? பங்கு வைத்த கறியில் பற்றாக்குறை என்பதற்காக கடையில் கறி வாங்கி உலுஹிய்யா என்று அல்லாஹ்வை ஏமாற்றி மனிதர்களை திருப்திபடுத்தும் நிலையில் அல்லவா நம்முடைய ஈமான் பலவீனமாக உள்ளது என்பதை என்றைக்காவது சிந்தித்திருப்போமா?

அல்லாஹ்வின் கட்டளையை நம்பி ஈமானிய உறுதிமிக்க அன்னை ஹாஜரா (அலை) அவர்கள் போன்றவர்கள் வளர்ப்பில் தான் ஈமானில் உறுதிமிக்க பொறுமைசாலியான இஸ்மாயீல் (அலை) அவர்களை அல்லாஹ்வின் உதவியால் வளர்த்தெடுக்க முடிந்தது. அல்லாஹ்வின் கட்டளைப்படி நடக்கும் ஈமானில் உறுதிமிக்க தாய் தந்தையின் துஆ மற்றும் அவர்களின் வளர்ப்பால் வளர்ந்த பிள்ளைகள் பொறுமைசாலியாக இருந்து இஸ்லாத்திற்காக தியாகம் செய்யும் பிள்ளையாக அல்லாஹ்வின் உதவியால் வாழ முடியும், இதுவே நாம் பெறும் படிப்பினை.

அல்லாஹ்வின் அடியார்களான இபுறாஹீம் (அலை), அன்னை ஹாஜரா (அலை), இஸ்மாயில்(அலை) போன்றோர் தந்தை, தாய், மகன் ஆகியோரின் ஈமானில் நிலைத்த உறுதிக்கு முன்மாதிரியான இப்றாஹீம் (அலை), அன்னை ஹாஜரா (அலை) இஸ்மாயீல் (அலை) ஆகியோரின் வாழ்விலிருந்து படிப்பினை பெற்று நம்முடைய ஈமானை உறுதி படுத்த முயற்சி செய்வோம். நம் சந்ததியரை ஈமானிய உறுதியுடன் இறுதிநாள் வரை நிலைத்திருக்க பக்குவப்படுத்துவோம். அல்லாஹ் நம் எல்லோரையும் ஈமானில் உறுதி மிக்கவர்களாக ஆக்கி அருள்புரிவானாக.

நபி இபுறாஹீம் (அலை) அவர்களது வாழ்வில் ஆரம்பம் முதல் முடிவு வரை ஏற்பட்ட துன்பங்களுக்கும் சோதனைகளுக்கும் நமக்கு ஒரு மகத்தான படிப்பினை இருக்கிறது. அதுதான் எத்தகைய கடும் சோதனை ஏற்பட்டாலும் அல்லாஹ்வை பிரார்த்தித்து பொறுமையுடன் ஐவேளை தொழுகையையும் மேற்கொண்டால் நிச்சயமாக வெற்றி பெறலாம் என்பதே அந்த படிப்பினையாகும்.

ஹஜ்ஜுப்பெருநாள் அன்று பெருநாள் தொழுகை முடித்ததும் கடமை முடிந்தது என்று நினைக்காமல் ஹஜ்ஜுப் பெருநாள் சிந்தனைகளை குறிப்பாக, நபி இபுறாஹீம் (அலை) அவர்களுடைய வாழ்க்கை பாதையினை நெஞ்சில் நிறுத்தி உறவினர், நண்பர்களிடையே ஒருவருக்கொருவர் உபதேசம் செய்ய வேண்டும். 

அல்லாஹ்வின் அடியார்களான இபுறாஹீம்(அலை), அன்னை ஹாஜரா(அலை), இஸ்மாயில்(அலை) போன்றோர் தந்தை, தாய், மகன் ஆகியோரின் ஈமானில் நிலைத்த உறுதிக்கு முன்மாதிரியான இப்றாஹீம் (அலை), அன்னை ஹாஜரா (அலை) இஸ்மாயீல் (அலை) ஆகியோரின் வாழ்விலிருந்து படிப்பினை பெற்று நம்முடைய ஈமானை உறுதி படுத்த முயற்சி செய்வோம்.

لًبّيْكَ اَللّهُمَّ لَبَّيْكَ ، لَبَّيْكَ لا شَرِيْكَ لَكَ لَبَّيْكَ، اِنَّ الْحَمْدَ وَالنِّعْمَةَ لَكَ  وَالْمُلْكَ  لاشَرِيْكَ  لَك

லப்பைக் அல்லாஹும்ம லப்பைக், லப்பைக் லாஷரீ கலக லப்பைக், இன்னல் ஹம்த வன்னிஃ மத லக்க வல் முல்க் லாஷரீக்க லக்.

பொருள்: இறைவா உன் அழைப்பிற்கிணங்கி இதோ வந்தேன், வந்தேன் இறைவா. உனக்கிணை ஏதுமில்லை வந்தேன் இறைவா!! நிச்சயமாக சர்வ புகழும் எல்லா அருட்கொடையும் ஆட்சியும் உனக்கே உரியன. உனக்கேதும் இணையில்லை.

இறைவா! முஹம்மது நபி (ஸல்) அவர்கள் மீதும் அவர்களது கிளையார்கள் மீதும் நல்லருள் புரிவாயாக. நீ இபுறாஹீம் நபி மீதும் அவர்களது கிளையார் மீதும் நல்லருள் புரிந்தவாறு. முஹம்மது நபி (ஸல்) அவர்கள் மீதும்  அவர்கள் கிளையார்கள்மீதும் அபிவிருத்தி செய்வாயாக, நிச்சயம் புகழுக்குரியவனும் தலைமையுடையவனுமாக இருக்கின்றாய். 

நேரம் கிடைத்தால் ஏகத்துவத்தின் தந்தை நபி இப்றாஹீம் (அலை) அவர்களுக்கு அல்லாஹ் கொடுத்த நிஃமத் பற்றிய இந்த மார்க்க சொற்பொழிவை கேளுங்கள்.

M தாஜுதீன்

இது ஒரு மீள்பதிவு

தொகுப்புக்கு உதவிய தளங்களுக்கு ஜஸக்கல்லாஹ் ஹைரா

http://www.readislam.net/labbaik.html 

http://www.youtube.com/watch?v=uaFT4r7eQLk 

http://www.islamkalvi.com/portal/?p=4463 

http://www.adirainirubar.blogspot.com/2013/07/4.html 

சூரத்துல் ஃபாத்திஹாவை மனனம் செய்து பொருளுணர்ந்து ஓதுகிறோமா? [காணொளி] 0

அல்லாஹ்வின் திருப்பெயரால்....

"அல்லாஹ்வுக்கே புகழ் அனைத்தும்! 

உலக மாந்தர்க்கெல்லாம் முன்மாதிரி நம் அருமை இறைத்தூதர் அண்ணல் நபி(ஸல்) என்பதில் எவருக்கும் மாற்றுக் கருத்தில்லை, ஏன் பிற மதத்தவர்கள் பலருக்கும் தெரியும் நபி முஹம்மது (ஸல்) அவர்கள் மட்டும் தான் இந்த மனித இனத்திற்கு முன்மாதிரிகளில் முதன்மையானவர் என்று. ஆனால், முன் மாதிரி, என்று வெறும் பேச்சளவில் மட்டுமே நாம் சொல்லுகிறோமே தவிர அவர்கள் நமக்காக அல்லாஹ்விடமிருந்து கொண்டு வந்த வஹியான திருக்குர்ஆனின் கட்டளைகள், அல்லாஹ்வின் கட்டளைப்படி மார்க்கமாக்கப்பட்ட முஹம்மது (ஸல்) அவர்களின் சொல் செயல் அங்கீகாரம் இவைகளை நம் வாழ்வில் கடைப்பிடித்து இறை மார்க்கமான “இஸ்லாத்திற்காக துளியளவு அற்பணித்திருக்கிறோமா?” என்ற வினாவோடு இந்த பதிவு தொடர்கிறது.

சூரத்துல் ஃபாத்திஹாவை பொருள் மனனம் செய்து உணர்ந்து ஓதுகிறோமா?

திருக்குர்ஆனில்  முக்கிய அத்தியாயம் ‘சூரத்துல் ஃபாத்திஹா‘ எனப்படும் அத்தியாயமாகும். ஏராளமான சிறப்புகளைக் கொண்ட அந்த அத்தியாயத்தை அறியாத – மனனம் செய்யாத முஸ்லிம்கள் யாரும் உலகில் இருக்க முடியாது. ஆனாலும் அதன் மகத்துவத்தை அவர்கள் பெரும்பாலும் அறிவதில்லை. இதன் சிறப்பு குறித்து வந்துள்ள நபிமொழிகளை தமிழறியும் முஸ்லிம்கள் அறிந்து கொள்ள வேண்டும், இதன் சிறப்புகளை பிறருக்கு எடுத்துச் சொல்ல வேண்டும்.

நம்மில் எத்தனை பேர் சூரத்துல் ஃபாத்திஹாவை பொருள் உணர்ந்து ஓதியிருக்கிறோம்? 

சூரத்துல் ஃபாத்திஹாவின் முழுமையான அர்த்தத்தை மனனம் செய்திருக்கிறோமா? 

நாம் ஒவ்வொரு தொழுகையின் ரக்காத்துகளில் ஓதும் சூரத்துல் ஃபாத்திஹா சூராவை அழகிய உச்சரிப்புடனும் பிழையின்றியும் ஒதுகிறோமா? இதோ இந்த காணொளியை பாருங்கள்.

காணொளியை கேட்ட உச்சரிப்புகளுடனும் பிழையின்றியும் நாம் ஓதும் சூரத்துல் ஃபாத்திஹா உள்ளதா? என்பதை  நாம் சிந்திக்க வேண்டும். இதன் அர்த்தத்தை முழுமையாக மனனம் செய்து, அதன் பொருள் உணர்ந்து இவ்வுலகை விட்டு மரணிக்கும் வரை அதனை மறக்காமல் இருக்க வல்லமை நிறைந்தன அல்லாஹ் நம் அனைவருக்கும் அருள் புரிவானாக.

யா அல்லாஹ்! எங்கள் அனைவரையும், சத்திய சஹாபாக்கள் எவ்வாறு குர்ஆன் மற்றும் நபி(ஸல்) அவர்களின் சொல் செயல் ஆகியவற்றின் அங்கீகாரத்தின் அடிப்படையில் வாழ்ந்தார்களோ அதுபோல் எங்கள் அனைவரையும் வாழ அருள் புரிவாயாக.

M.தாஜுதீன்

-- மீள் பதிவு

இறைவனிடம் கையேந்துவோம்.. அவன் இல்லையென்று சொல்லுவதில்லை.. 0

ஆம்... உண்மை சம்பவம்..

மனது மிகவும் இறுக்கமாக இருந்தது யாருக்காவது இன்று உதவ வேண்டும் என்று எண்ணிக்கொண்டிருந்தேன்..

நேற்று லுஹர் தொழுகை ஜமாத்துடன் தொழ இயலவில்லை. தனியாக தொழ நான் வசிக்கும் பள்ளிவாசலுக்கு சென்றேன். பொருளாதார தேவையுடைய நபர் ஒருவரை தொழும் முன் கண்டேன். தொழுதபின் அவருக்கு ஏதாவது பண உதவி செய்ய வேண்டும் என்று ஒரு தொகையும் மனதில் எண்ணினேன்.

தொழுத பின் பார்த்தேன், அந்த தேவையுடைய நபர் இல்லை.  அவரை அடிக்கடி நான் வசிக்கும் பகுதியில் கண்டிருக்கிறேன், ஆனால் அவரின் அலைபேசி எண் எனக்கு தெரியாது. எனக்கு மிகவும் வேதனையாக இருந்தது. நம்முடைய எண்ணம் நிறைவேறவில்லை என்று..

இருப்பினும் உடனே.. அல்லாஹ்விடம் கையேந்தினேன், "நான் நிய்யத் செய்த உதவி தொகையை தேவையுடைய யாரையாவது எனக்கு அடையாளம் காட்டு யா.. ரப்பே.. " என்று பிரார்த்தனை செய்து மீண்டும் பள்ளிவாசல் உள்ளே சென்றேன்..

அங்கு.. 

நான் ஒரு வருடத்திற்கு மேல் கண்டு வரும் முதியவர். ஒரே ஒரு ஆடையில் மட்டுமே அவரை கண்டிருக்கிறேன்.. பார்க்கும்போதெல்லாம் அல்குர்ஆன் ஓதியவராக இருப்பார். 5 வேலை தொழுபவர், யாரிடமும் யாசகம் கேட்க மாட்டார், வீண் பேச்சு பேசமாட்டார், புன்னகை தழும்பும் முகம், இரு சக்கர மிதி வண்டி ஓட்டுவார், தொழில் 

ஏதும் செய்யாதவர், அவர் சிரியா நாட்டை சேர்ந்த அகதி. இவரை கானும்போது சிரியாவின் நம் மக்கள் கஷ்டங்கள் வந்து கண்கலங்க செய்யும்.

உதவும் முன் நிய்யத் செய்யவேண்டும், இந்த உதவி தேவையுடையவருக்கு சென்றடைய வேண்டும் என்ற படிப்பினையை உணர்த்திய அல்லாஹ்வுக்கே எல்லா புகழும்..

குறிப்பு: நான் பெற்ற படிப்பினையை உங்களுக்கு பகிர்வதற்காக மட்டுமே இந்த பதிவு.

Thajudeen

லகும் தீனுக்கும் வலியதீன்... 21

அல்லாஹ்வின் திருப்பெயரால்....

தலைப்பைப் பார்த்தவுடன் இது வித்தியாசமான தலைப்பாக இருக்கிறதே என்று யாரும் எண்ண வேண்டாம். இந்த பதிவின் சாயல் தனி நபரையோ அல்லது இயக்கத்தையோ சாடுவதாக தயைகூர்ந்து எண்ண வேண்டாம் என்று முன்னுரைக்கிறேன் !

அல்குர்ஆனில் உள்ள 109 வது அத்தியாயம் சூரத்துல் காஃபிரூன், 6 வசனங்களுடன் ஆழ்ந்த அர்த்தங்கள் கொண்ட அல்லாஹ் ரப்புல் ஆலமீனின் அற்புத வார்த்தைகள். இந்த அத்தியாயத்தில் வரும் 6 வது அரபு வசனமே லகும் தீனுக்கும் வலியதீன் (لَـكُمْ دِيْنُكُمْ وَلِىَ دِيْنِ), இதன் அர்த்தம் உங்களுக்கு உங்களுடைய மார்க்கம்; எனக்கு என்னுடைய மார்க்கம்.”

சமூக நல்லிணக்கம் பேணுகிறோம் என்ற எண்ணத்தில் மேல் சொன்ன இறை வசனத்தைச் சுட்டிக்காட்டி. நமக்கு பிரச்சினை வேண்டாம், எங்கள் மார்க்கம் சொல்லிவிட்டது “லகும் தீனுக்கும் வலியதீன்” (உங்களுக்கு உங்களுடைய மார்க்கம், எனக்கு என்னுடைய மார்க்கம்). நீங்கள் உங்கள் மதத்தின்படி உங்கள் வணக்கத்தைச் செய்யுங்கள், நான் என் மார்க்கப்படி என்னுடைய வணக்கத்தைச் செய்கிறேன் என்று அவ்வப்போது பொதுவாக முஸ்லீம்களால் பொது தளங்களிலும், பொது மேடைகளிலும் சொல்லப்பட்டு வருவதை அறிவோம்.

முதலில் இந்த இறைவசனம் எங்கு? எப்போது? எந்த சூழலில் இறங்கியது இந்த வசனத்தின் பின்னணி என்ன? என்பதை நாம் கட்டாயம் அறிந்து கொள்ள வேண்டும். எந்த ஒரு அல்குர்ஆன் வசனத்தையும் நாம் எங்கு? எதற்குப் பயன்படுத்துகிறோம் என்பதில் கவனம் செலுத்த வேண்டும். தவறாக இறைவசனங்களை சம்பந்தமில்லாத சூழலில் பயன்படுத்தி அல்லாஹ்வின் கோபத்திற்கு ஆளாகக்கூடாது என்பதில் நாம் அனைவரும் மிக எச்சரிக்கையாக இருக்க வேண்டும்.

சூரத்துல் காஃபிரூன் அத்தியாயம் மாக்காவில் அல்லாஹ்வின் தூதர், நம் உயிரினும் மேலான உத்தம நபி முஹம்மது ஸல்லல்லாஹு அலைஹிவஸல்லம் அவர்களுக்கு வானவர் ஜிப்ரயீல் மூலம் அருளப்பட்டது.

குரைஷி கோத்திரத்தின் வாரிசு, அல் அமீன் என்று எல்லோராலும் அழைக்கப்பட்ட முஹம்மது நபி ஸல் அவர்கள் தங்களின் ஏகத்துவ அழைப்புப்பணியைத் தங்கள் குரைஷி கோத்திர மக்களிடம் எடுத்துவைத்த காலத்தில், நபி ஸல் அவர்களுக்கு பலவிதமான பொருளாதார மற்றும் திருமண ஆசைகள் காட்டி, நபி(ஸல்) அவர்களை ஏகத்துவப் பணியை முடக்கத் திட்டம் தீட்டிப் பார்த்தார்கள் அந்த குரைஷித் தலைவர்கள். 

இதோ முதல் திட்டம் “உங்களை இந்த மக்கா மாநகரின் முதல் தர செல்வந்தராக ஆக்குகிறோம், நீங்கள் விரும்பும் பெண்களை திருமணம் செய்துக்கொள்ளுங்கள், நீங்கள் சொல்லும் அனைத்தையும் கேட்கிறோம், என்று இது போன்ற ஆசை வார்த்தைகள் சொல்லி ஆனால் எங்கள் தெய்வங்களை (லாத்து, உஸ்ஸா போன்றவைகளை) மட்டும் தவறாக சொல்ல வேண்டாம்”.  என்று இறைத்தூதர் முஹம்மது நபி ஸல் அவர்களை மடக்கி பேரம் பேசினார்கள் ஏகத்துவ வாடையை வெறுத்த அன்றைய குரைஷி கோமாளிகள்.”

முதல் திட்டம் வேண்டாம் என்றால், இதோ இரண்டாவது சமாதானத் திட்டம். “முஹம்மதே நீர் ஒராண்டு எங்கள் தெய்வங்களான லாத்து உஸ்ஸாவை வணங்கும், அது போன்று நாங்களும் அடுத்த வருடம் நீர் அந்த ஓரிறை கொள்கையை நாங்கள் வணங்குகிறோம் என்ன சம்மதமா?” என்ற வடிகட்டிய இணை வைப்பு சமாதானத் திட்டத்தை எடுத்து வைத்தனர். ஏகத்துவக் கொள்கையில் ஒரு துளிகூட சமரசம் செய்யாத நம் மூன்னோடி நபி இபுறாஹீம் (அலை) அவர்களின் வம்சத்தில் வந்தவர்கள் அல்லவா நம் தங்கத் தலைவர் முஹம்மது நபி (ஸல்) அவர்கள். மக்காவில் ஏகத்துவப் பிரச்சாரத்தை எடுத்துச்சொன்ன ஒரே காரணத்திற்காக வாழ்வா? சாவா? என்ற போராட்டத்துக்கு மத்தியில் பல இன்னல்களைச் சந்தித்துக் கொண்டிருந்த அந்த இக்கட்டான காலகட்டத்தில் நபி (ஸல்) அவர்கள் “குரைஷி உறவுகளே கொஞ்சம் பொறுங்கள் என்னுடைய இறைவன் இதற்கு என்ன சொல்லுகிறான் என்ற பிறகு என் முடிவை சொல்லுகிறேன்” என்றார்கள்.

குரைஷி தலைவர்கள் முஹம்மது ஸல் அவர்களை தங்களின் சூழ்ச்சி வலைக்குள் சிக்க வைக்க முயற்சித்த இந்த வேளையில் தான் சூரத்துல் காஃபிரூன் முழு அத்தியாயமும் மற்றும் சூரத்துல் ஜுமர் அத்தியாயத்தின் 64-வது வசனம் என்ற இறைவசனம் இறங்கியது.

சூரத்துல் காஃபிரூன் அத்தியாத்தில்  அல்லாஹ் கூறுகிறான்.

“(நபியே!) நீர் சொல்வீராக: காஃபிர்களே!

நீங்கள் வணங்குபவற்றை நான் வணங்கமாட்டேன்.

இன்னும், நான் வணங்குகிறவனை நீங்கள் வணங்குகிறவர்களல்லர்.

அன்றியும், நீங்கள் வணங்குபவற்றை நான் வணங்குபவனல்லன்.

மேலும், நான் வணங்குபவனை நீங்கள் வணங்குபவர்கள் அல்லர்.

உங்களுக்கு உங்களுடைய மார்க்கம்; எனக்கு என்னுடைய மார்க்கம்.” 

(அல்குர்ஆன் 109: 1-6)

மேலும் சூரத்துல் ஜுமார் அத்தியாத்தின் 64 வசனத்தில் அல்லாஹ் கூறுகிறான்.

“அறிவிலிகளே! நான் அல்லாஹ் அல்லாதவற்றை வணங்க வேண்டுமென்று என்னை நீங்கள் ஏவுகிறீர்களா?” என்று (நபியே!) நீர் கூறுவீராக.” 

(அல்குர்ஆன் 39:64)

இந்த வசனங்கள் இறங்கிய பின்பு, குரைஷி தலைவர்களைப் பார்த்து முஹம்மது நபி ஸல் அவர்கள் “என் இறைவனின் கட்டளை வந்துவிட்ட பின்பு நான் உங்களோடு சமாதானம் செய்ய முடியாது” என்று சொல்லிய பின்பும்கூட, அவமானப்பட்டு, கேவலப்பட்ட குரைஷிகள் மேலும் ஒரு சமாதான திட்டத்தை வைக்கிறார்கள். “முஹம்மதே, எங்கள் தெய்வங்களின் சிலையை மட்டும் முத்தமிடும் அது போதும், நாங்கள் நீர் சொல்லும் இறைவனை வணங்குகிறோம்” என்று புதிய திட்டத்தை திணிக்கப் பார்த்தார்கள். இந்த தருணத்தில் தான் அல்லாஹ் சூரத்துல் ஜுமார் அத்தியாயம் முழுவதையும் இறைத்தூதருக்கு இறக்கி எச்சரிக்கையும் கொடுக்கிறான். 

அல்லாஹ் கூறுகிறான் அன்றியும், உமக்கும், உமக்கு முன் இருந்தவர்களுக்கும், வஹீ மூலம் நிச்சயமாக அறிவிக்கப்பட்டது என்னவென்றால், “நீவிர் (இறைவனுக்கு) இணை வைத்தால், உம் நன்மைகள் (யாவும்) அழிந்து, நஷ்டமடைபவர்களாகி விடுவீர்கள்” (என்பதுவேயாகும்). (அல் குர் ஆன் 39:65)

கருத்துச் சுதந்திரமில்லாத ஒரு காலகட்டம், ஆதிக்க வர்க்கத்தின் அடக்குமுறை, பரம்பரை பரம்பரையாக சண்டைக்காரர்களாக வாழ்ந்த சமூகத்துக்கு மத்தியில் நபி(ஸல்) அவர்களின் குணநலங்களை ஏற்ற சமூகம் நம் தங்கத்தலைவர் முஹம்மது நபி (ஸல்) அவர்களிடம் கொடுக்கள் வாங்கள் பிரச்சினை இல்லை, பங்காளி பிரச்சினை இல்லை, மாமன் மச்சான் பிரச்சினை இல்லை, சொத்துப் பாங்கீட்டு பிரச்சினை இல்லை, நில அபகரிப்புப் பிரச்சினை இல்லை ஆனால் அல்லாஹ் ஒருவனே அவனை மட்டுமே நீங்கள் வணங்க வேண்டும், அல்லாஹ்வுக்கு இணை துணை ஏதும் இல்லை என்று பிரச்சாரம் செய்ததை பொறுக்காத குரைஷி காபிர்கள். தங்களால் முடிந்த அனைத்து இணைவைப்பு சமாதான முயற்சிகளையும் கையாண்டார்கள். ஆனால் அல்லாஹ் தன் வஹியின் மூலம் நபி முஹம்மது ஸல் அவர்களுக்கு அறிவுரையும், ஆலோசனையும், எச்சரிக்கையும் செய்து இறை நிராகரிப்பாளர்களோடு ஓரிறை கொள்கை விசயத்தில் எந்த ஒரு சமாதானமும் செய்யக்கூடாது என்று கட்டளையிட்டான். அல்லாஹ்வின் கட்டளைக்கு எந்த கட்டத்திலும் மாறு செய்யாத உத்தம நபி (ஸல்) அவர்கள். அன்றிலிருந்து தான் மரணிக்கும் வரை இறை நிராகரிப்பாளர்களுடன் ஓரிறைக் கொள்கை விசயத்தில் எந்த ஒரு சமாதானமும் செய்யவில்லை.

சூரத்துல் காஃபிரூன் இறங்கிய வரலாற்றில் நமக்கு நிறைய படிப்பினை உள்ளது.

• அல்லாஹ்வுக்கு இணை வைக்கும் காரியங்களில் ஓரிறை கொள்கையை அடகுவைத்து எந்த ஒரு சமரசம் செய்வது கூடாது. இது தர்கா வழிபாடாக இருந்தாலும் சரி, பிறமத வழிபாடுகளாக இருந்தாலும் சரி.

• சுற்றுலா என்ற பெயரில் இறைவனுக்கு இணைவைக்கும் இடங்களுக்கு, குறிப்பாக தர்கா, கோவில், சர்ச் போன்றவைகளுக்கு செல்வதைத் தவிர்க்க வேண்டும். அவ்விடங்களுக்கு செல்வதன் மூலம் அவைகளை நாம் அங்கீகரித்த நிலைக்கு செல்ல நேரிடும்.

• பிறமதத்தவர் அவர்கள் போலிக்கடவுள் நம்புகிறவர்களுக்கு பூஜை செய்யும் விழாக்களை தவிர்க்க வேண்டும்.

• எம்மதமும் சம்மதம் என்ற பெயரில் அல்லாஹ்வுக்கு இணையான போலிக்கடவுள்களை புகழும் விழாக்களை தவிர்க்க வேண்டும்.

• பிறமத நண்பர்களின் திருமணங்களில் இணைவைப்பை மையப்படுத்தி நடைபெறும் பூஜைகள் போன்ற நிகழ்வுகளில் அல்லாஹ்வுக்கு அஞ்சியவர்களாக கலந்து கொள்வதை தவிர்க்க வேண்டும்.

• மனிதாபிமானம் என்ற பெயரில், மழை வெள்ளத்தால் பாதிக்கப்பட்ட சிலைகள், விக்கிரகங்களைக் கொண்ட இணை வைப்பு வழிபாட்டுத் தளங்களை சுத்தம் செய்வது போன்ற காரியங்கள், மக்களின் திருப்தியை பெற்றுத்தருமே தவிர, நம்மை படைத்த ரப்புல் ஆலமீனிடம் திருப்தியை பெற்றுத்தருமா? என்ற பாரதூர கேள்விக்கு நம்மிடம் பதில் உள்ளதா என்பதை நாம் சித்திக்க வேண்டும்.

அல்லாஹ்வுக்கு இணை வைக்கும் நிகழ்வுகளுக்கு அங்கீகாரம் வேண்டி நேரடியாகவோ அல்லது மறைமுகமாகவோ நம்மீது திணிக்கப்படும்போது, அவைகள் தவறு என்று நாம் சுட்டிக்காட்ட வேண்டும், நமக்கு அது சாத்தியமில்லை, இணைவைப்பு காரியங்கள் நம்மீது திணிக்கப்படுகிறது என்ற நிலை வேறு வழியே இல்லை என்று வரும் போது, நம் ஈமானை பாதுகாத்துக் கொள்ள வேண்டும் என்பதற்காக “லக்கும் தீனுக்கும் வலியதீன்” என்ற நிலைக்கு நாம் வந்தால் மட்டுமே சூரத்துல் காஃபிரூன் வசனத்தை நாம் உணர்ந்தவர்களாக முடியும். 

இதல்லாமல், மார்க்க விசயத்தில் நம் சகோதரர்களுக்கு இடையில் ஏற்படும் கருத்துரையாடலிலும், அறியாமல் தவறுகள் செய்யும் நம் முஸ்லீம்களிடமும் சகோதரர்களிடமும் சும்மா சகட்டு மேனிக்கு தன்னுடைய புரிதல் மட்டும் தான் சரி என்ற தோரணையில் “லக்கும் தீனுக்கு வலியதீன்” என்று சொல்லுவது வாடிக்கையாக உள்ளது. இது தவறு என்பதை சூரத்துல் காஃபிரூன் இறங்கிய வரலாற்றை வாசித்தால் விளங்கும். உலக மக்களுக்கு முன்னுதாரணமான உத்தம நபி முஹம்மது (ஸல்) அவர்கள் எந்த ஒரு சந்தர்ப்பத்திலும், “லகும் தீனுக்கும் வலியதீன்” என்று சொல்லி தவறிழைத்தவர்கள் அல்லர், அநியாக்காரர்களிடம் சொல்லி நழுவவில்லை. கண்ணியத்தோடு தவறுகளைச் சுட்டிக்காட்டினார்களே தவிர, அவர்களிடம் ஓரிறைக் கொள்கை விசயத்தில் எந்த ஒரு சமரசமும் செய்யவில்லை.

நம்முடைய ஓரிறைக் கொள்கைக்கு வேட்டு வைக்கும் விதமாக நம்மீது திணித்து, இணை வைப்பிற்கு ஒத்துப்போக வைக்கும் நிலை வரும் போது. பல கட்ட முயற்சிகளுக்கு பிறகு “லக்கும் தீனுக்கும் வலியதீன்” என்ற வார்த்தையை சொல்லி ஒதுங்கிக்கொள்ளலாமே தவிர. சும்மா சகட்டு மேனிக்கு “லக்கும் தீனுக்கு வலியத்தீன்” என்று சொல்லி நழுவிக் கொள்வது சரியான அனுகுமுறையாகாது. அல்லாஹ் மிக்க அறிந்தவன்.

“விநாயகர் ஊர்வலம் அமைதியாக நிறைவுற்றது”

“கந்தூரி திருவிழா படுவிமர்சியாக நடைபெற்றது”

“ஹிந்துக்கள் சார்பில் வைகாசி திருவிழா!”

என்று தலைப்பிட்டு செய்திகளாக சமூக வலைத்தளங்களில் பதிவிடும் முஸ்லீம் ஊடகவியளாளர்கள் என்று சொல்லிக் கொள்பவர்களின் அறியாமை பற்றியும், நீ காஃபிர், நீ முஷ்ரிக், நான் ஒரிஜினல் முஸ்லீம், அவன் பெயர் தாங்கி முஸ்லீம் என்று ஆன்லைன் ஃபத்வா கொடுக்கும் வழிகேட்டுக் கொள்கையாளர்கள் பற்றியும் “லக்கும் தீனுக்கும் வலியதீன்” என்ற தலைப்பில் எதிர்வரும் பதிவுகளில் மேலும் நிறைய அலசலாம். இன்ஷா அல்லாஹ். 

தாஜுதீன்

tjdn77@gmail.com

அவர்கள் வாழ்வு - இமாம் புகாரீ (ரஹ்) 0

அல்லாஹ்வின் திருப்பெயரால்..

நாம் நிறைய நபிமார்களின் வரலாறுகள் அறிந்திருப்போம், நபி(ஸல்) அவர்களின் வாழ்வின் ஏராளமான நிகழ்வுகள் நிறைய அறிந்திருப்போம், நிறைய நபித்தோழர்களின் வரலாறுகள் அறிந்திருப்போம். ஒரு முஸ்லீமாக இருந்து கொண்டு இவைகளை நாம் அறிந்திருப்பது எவ்வளவு அவசியமோ, இதுபோல் நபிமொழிகளைகளை தொகுத்தளித்த கண்ணியமிக்க மார்க்க மேதைகளான இமாம்களின் வாழ்க்கை வரலாறுகளை பற்றி அறிய வேண்டும். அவர்களின் வாழ்வின் நடைபெற்ற நிகழ்வுகளிலிருந்து நமக்கு நிறைய படிப்பினைகள் உள்ளன என்பது மறுக்க முடியாத உண்மை. 

இந்த தூய இஸ்லாத்தை நிலைநாட்ட தங்களின் உடலாலும், அறிவாலும், தியாகத்தாலும் அரும்பணிச் செய்த கண்ணியமிக்க இமாம் புகாரீ (ரஹ்) அவர்கள் வாழ்வு பற்றிய ஒரு சிறிய தொகுப்பு. இவைகளில் இருந்து நமக்கு என்ன படிப்பினை உள்ளது என்பதை பார்க்கலாம்.

இமாம் புகாரி (ரஹ்) அரபு நாடுகளில் பிறக்கவில்லை, அசல் அரபியும் அல்ல, அரபிகளில் வழித்தோன்றல்களில் வந்தவர்களும் அல்ல, அரபு அவர்களின் தாய்மொழியும் அல்ல. அவர்களின் பெயர் முஹம்மது பின் இஸ்மாயில் இப்னு இபுறாஹீம், இன்றைய உஸ்பகிஸ்தான் நாட்டில் உள்ள ஒரு நகரான புகாரா என்ற பிரதேசத்தில் ஹிஜ்ரி 194ல் பிறந்தவர் என்பதால், இவர்களுக்கு புகாரி (புகாராவை சேர்ந்தவர்) என்று அழைக்கப்பட்டார்கள். அல்லாஹ் ரப்புல் ஆலமீன் இஸ்லாத்தை பாதுகப்பதற்காக. ஒரு சில நல்ல மக்களை ஒவ்வொரு காலகட்டத்திலும் உருவாக்கிக் கொண்டுதான் இருப்பான். 

அப்படிப்பட்டவர்களில் நபி(ஸல்) அவர்களுடைய அருமைத்தோழர்களுக்கு பிறகு அதீத ஞாபக சக்தியுள்ள, நல்ல அறிவாற்றல் உள்ள, இஸ்லாமிய விமர்சகர்களுக்கு தக்க பதில் அளிக்கக்கூடிய இமாம் புகாரி போன்ற மாமேதைகளை அல்லாஹ் ரப்புல் ஆலமீன் உருவாக்கி இந்த தீனை நமக்கு பரிபூரணமாக கிடைக்க உதவி உள்ளான் என்று தான் சொல்ல வேண்டும்.

இமார் புகாரி அவர்களுக்கு இருந்த ஞாபகசக்தி போன்று இன்று ஒரு மனிதரைக்கூட காண இயலாது. இது அல்லாஹ் அவர்களுக்கு வழங்கி இருந்த மிகப்பெரும் கிருபை. அன்றைய காலம் கம்பூட்டர் காலமல்ல, இமாம் புகாரி இமாம் அவர்களின் மூளையும் உள்ளமும் கணினி மயமாக்கப்பட்டிருந்தது என்று தற்கால சந்ததிகளுக்கு புரியும்படி சொல்லுவதும் தவறில்லை என்று கருதுகிறேன். லட்சக்கணக்கான ஹதீஸ்களை மனனம் செய்திருந்தார்கள் இமாம் புகாரி அவர்கள். அவர்களில் தரம் பிரித்து, அறிவிப்பாளர் வரிசைகளில் குறைபாடுகள் இல்லாத, நம்பகமான 7,000ம் ஹதீஸ்களை நமக்கு மிகுந்த கவனத்துடன் தொகுத்து தந்துள்ளார்கள். இன்று திருக்குர்ஆனுக்கு அடுத்த நிலையில் இமாம் புகாரி அவர்கள் தொகுத்துத் தந்துள்ள புகாரி கிரந்தம் நமக்கு உள்ளது.

இமாம் புகாரி சிறுவயதில் இஸ்லாமிய அறிவாற்றல் மிக்கவராக இருந்துள்ளார்கள். பள்ளி பருவத்தில் ஆதாவது 10 வயதில் திருக்குர்ஆனும், பல நூறு ஹதீஸ்களையும் மனனம் செய்து விட்டார்கள். 16 வயதில் அப்துல்லாஹ் இப்னு முபாரக்(ரஹ்) ஹிஜ்ரி 180களில் வாழ்ந்த மார்க்க அறிஞர் அவர்களின் புத்தகங்கள், இமாம் ஷாஃபி (ரஹ்) அவர்கள் ஆசிரியர் வகீஹ் பின் ஜர்ரா(ரஹ்) அவர்களின் புத்தகங்கள் அனைத்தையும் மனனம் செய்துவிட்டார்கள். பகுத்தறிவு ரீதியாக குர்ஆன் வசனங்களையும், ஹதீஸ்களையும் ஒதுக்கிய முஹ்தஸிலாக்களின் புரட்டு வாதங்களையும் அறிந்து வைத்து அவர்களுக்கு தக்க பதில் கொடுக்கும் சிறப்பான அறிவாற்றல் உடையவர்களாக திகழ்ந்துள்ளார்கள் இமாம் புகாரி.  தந்தையை சிறுவயதில் இழந்த காரணத்தால், புகாரி இமாம் அவர்களின் தாயார் அவர்களை இஸ்லாமிய கட்டமைப்பில் வளர்த்துள்ளார்கள். 

இமாம் புகாரி (ரஹ்) அவர்களுக்கு 16 வயது இருக்கும்போது தன் தாயார் மற்றும் தன் சகோதரனுடன் சேர்ந்து புனித ஹஜ் பயணம் மேற்கொள்கிறார்கள். மக்கா, மதீனா, பக்தாத் போன்ற நகரில் இருக்கும் மார்க்க அறிஞர்களிடம் மார்க்க அறிவு பெற்று தன் பிள்ளை மேலும் மார்க்க ஞானமுடையவராக வரவேண்டும் என்பதற்காக இமாம் புகாரி (ரஹ்) அவர்களை ஹஜ் முடிந்தவுடன், அவர்களின் தாயார் மக்காவில் விட்டுவிட்டு சொந்த நாட்டிற்கு தன்னுடைய மற்றொரு மகனாருடன் திரும்புகிறார்கள். 

சுப்ஹானல்லாஹ் தொலைதூர பிரதேசம் உஸ்பகிஸ்தானிலிருந்து ஹஜ் பயணம் வந்து மக்காவில் தன்னுடைய மகனை மார்க்க கல்வி கற்க விட்டுவிட்டு சென்றுள்ள அந்த தாயாரின் தியாகத்தை நினைத்தால் உண்மையில் மனம் உருகுகிறது. தன்னுடைய மகன் தீனுக்காக உழைக்க வேண்டும் என்று அந்த தாய் நினைக்கப் போய் இன்று எமக்கு இந்த இஸ்லாம் தூய வடிவில் கிடைப்பதற்கு ஷஹீஹான ஹதீஸ் தொகுப்பான புகாரி கிரந்தமும் ஓர் காரணம் தானே.

இமாம் புகாரி தன்னுடைய தாய் மக்காவில் விட்டுச்சென்ற பின்பு 16 வருடங்களாக நாடு நாடாக சுற்றி மார்க்க கல்வி கற்று ஹதீஸ்களை தொகுக்க ஆரம்பித்தார்கள். மக்கா, மதீனா, சிரியா, எகிப்த் ஜொர்டான், பாலஸ்தீன், லெபனான், கூஃபா பஸரா, பாக்தாத் என்று பல்வேறு பகுதிகளுக்கு சென்று மிகப்பெரும் மார்க்க மாமேதைகளிடம் ஹதீஸ்கள் கற்றுக் கொண்டு. அவைகளை தொகுக்க ஆரம்பித்தார்கள். குறிப்பாக அன்றைய காலகட்டத்தில் மிகப்பெரிய இஸ்லாமிய அறிஞராக பாக்தாதில் இருந்த இமாம் அஹ்மது(ரஹ்) அவர்களிடம் ஹதீஸ்கள் கற்க கிட்டத்தட்ட ஏழு முறை வந்துச் சென்றுள்ளார்கள் இமாம் புகாரி அவர்கள்.

ஹிஜ்ரி 3ம் நூற்றாண்டில் இஸ்லாம் வளர்ந்த காலகட்டத்தில், ஹதீஸ்களை முழுமையாக தொகுக்கப்படாத அந்த காலகட்டத்தில், மக்கள் சிறு சிறு குழுக்களாக கொள்கை ரீதியாக பிளவுபட்டு பிறிந்து  இருந்தார்கள். குர்ஆன் சுன்னாவை முழுமையாக பின் பற்றும் கொள்கையில் உள்ளவர்களிடம் மட்டுமே இமாம் புகாரி அவர்கள் ஹதீஸ்களை கேட்டு தொகுத்துள்ளார்கள். கிட்டத்தட்ட 1080 பேர்களிடம் ஹதீஸ்கள் கேட்டுள்ளார்கள். அவர்கள் அனைவரும் அஹ்லுஸ் ஸுன்னத்துவல் ஜமாத் கொள்கையில் உள்ளவர்கள் என்று இமாம் புகாரி அவர்களே கூறியுள்ளது வரலாற்று ஏடுகளில் பதியப்பட்டுள்ளது. ஹதீஸ்களை தொகுத்த இமாம் புகாரி அவர்கள் கொள்கை ரீதியாக மாறுபட்டவர்களுக்கு மறுப்பு சொல்லும் விதமாக தன்னுடைய ஹதீஸ்களை வரிசைபடுத்தி தொகுத்துதந்துள்ளார்கள். 

உதாரணமாக ஷியாக்கள், முஹ்தசிலாக்கள், ஹாரிஜியாக்கள் போன்றவர்களின் வழிகேட்டுக் கொள்கைக்கு மறுப்பு சொல்லும் விதமாக ஒவ்வொரு தலைப்பிட்டு ஹதீஸ்களை தொகுத்துள்ளார்கள் என்பதை புகாரி கிரந்தத்திலிருந்து நாமும் அறிந்து கொள்ளலாம். நீண்ட தூர பயணம், தூக்கமின்மை, வெயில், மழை, குளிர் போன்றவைகளால் ஏற்பட்ட சிரமங்களை சகித்துக் கொண்டு எண்ணற்ற தியாகங்கள் செய்து தான் இமாம் புகாரி அவர்கள் ஷஹீஹான ஹதீஸ்களை நமக்கு தொகுத்து தந்துள்ளார்கள்.

இமாம் புகாரி அவர்கள் புகாரி (ரஹ்) கிரந்தம் மட்டும் எழுதவில்லை, மேலும் பல புத்தகங்கள் எழுதியுள்ளார்கள். இதில் மிகவும் குறிப்பிட்டு சொல்லப்பட வேண்டிய நூல் தான் தஹ்ரீஹ் என்ற புத்தகம். இதில் நிறைய ஹதீஸ் அறிவிப்பாளர்கள் பற்றிய சகல தகவல்களையும் பதிவு செய்கிறார்கள். இந்த தஹ்ரீஹ் என்ற நூலிருந்து தான் அநேக அறிவிப்பாளர்களின் நம்பகத்தன்மை அறியப்படுகிறது. 16 லட்சம் ஹதீஸ்களை சேகரித்துள்ளார்கள், அவைகளில் 7275 ஷஹீஹான ஹதீஸ்களை நமக்கு தொகுத்துத் தந்துள்ளார்கள். இவைகளை மூன்று முறை சரி பார்த்துள்ளார்கள். 

புகாரி கிரந்தத்தை தொகுத்த பின்னர், இமாம் புகாரி (ரஹ்) அவர்கள் தன்னுடைய ஆசான்களான இமாம் அஹ்மது இப்னு ஹம்பல் (ரஹ்), அலி இப்னு மதீனி(ரஹ்), இஸ்ஹாக் இப்னு ராஹவியா(ரஹ்) போன்ற ஹதீஸ் துறையில் நிபுனத்துவம் வாய்ந்தவர்களிடம் புகாரி கிரந்தந்ததை காட்டி, அதில் உள்ளவைகள் அனைத்தும் சரி என்பதை உறுதிபடுத்திக் கொண்டுள்ளார்கள். ஒவ்வொரு ஹதிஸையும் பதிவு செய்யும்போது ஒளு செய்துவிட்டு இமாம் புகாரி அவர்கள் இரண்டு ரக்காத் தொழுத பிறகே ஒவ்வொறு ஹதீஸையும் எழுதியுள்ளார்கள்.

இந்த மாமனிதர் எவ்வளவு சிரமத்துக்கு மத்தியில் தீனுக்காக எவ்வளவு தியாகங்கள் செய்துள்ளார்கள் என்பதை அறியும் போது உண்மையில் உள்ளம் பூரிப்பு அடைகிறது. இமாம் தம்முடைய இறுதி காலகட்டத்தில் தன்னுடைய சொந்த நாட்டிற்கு புகாராவுக்கு திம்பினார்கள். ஆனால் சேதனைகள் அவர்களுக்கு காத்திருந்த்து, ஒரு மார்க்க சட்டம் தொடர்பாக புகாராவின் ஆட்சியாளர் (அமீர்) அவர்களுடன் கருத்து முரண்பாடு ஏற்படுகிறது, அவர்களை புகாராவை விட்டு வேறு பிரதேசத்திற்கு செல்லுமாறு அமீரவர்களை உத்தரவிடுக்கிறார்கள். இதன் அடிப்படையில் பொறுமையுடன் ஹரம்தக் என்ற பிரதேசத்தில் குடியேறினார்கள். 

நல்லவர்களுக்கு சோதனை வரும் என்பதை இமாம் புகாரி அவர்கள் தெளிவாக அறிந்திருந்தார்கள். அந்த சோதனைகளை அல்லாஹ்விடமே விட்டு விட்டார்கள். ஹிஜ்ரி 256ஆம் ஆண்டு ஹரம்தக் என்ற இடத்தில் ஈதுல் ஃபித்ர் இரவு இஷா தொழுகைக்கு பிறகு இவ்வுலகை விட்டு பிரிந்து மரணம் மடைந்தார்கள். இன்னா லில்லாஹி வ இன்னா இலைஹி ராஜிவூன்.

நபி(ஸல்) அவர்களின் பொன்மொழிகளில் மிகவும் பிரபலமான நபிமொழி “ஒரு மனித மரணித்துவிட்டால், 3 விசயங்கள் மட்டுமே அவனுக்கு நன்மை தேடித்தரும், அதில் ஒன்று பிரயோஜனமான கல்வி” இந்த பணியை தான் இமாம் புகாரி(ரஹ்) அவர்கள் செய்து விட்டு சென்றுள்ளார்கள். திருக்குர் ஆனுக்கு பிறகு நம் அனைவருக்கும் நபிமொழிகளின் மூலம் வழிகாட்டுகிறது ஷஹீஹுல் புகாரி. இவைகளிலிருந்து நாம் பெறும் நன்மைகளில் இமாம் புகாரி அவர்களுக்கு நிச்சயம் பங்கு உண்டு என்பதில் நம் யாருக்கும் சந்தேகமில்லை.

இமாம் புகாரி (ரஹ்) போன்ற அறிஞர்களைப் பற்றி நாம் ஏன் தெரிந்துக் கொள்ள வேண்டும்? இமாம் புகாரி (ரஹ்) அவர்கள்,  இஸ்லாத்திற்கு ஆற்றிய பங்களிப்பு என்ன? நமக்கு அவர்கள் விட்டுச் சென்றிருக்கிற முன்மாதிரிகள் என்ன? அவர்களின் தியாகங்கள் போன்ற‌வற்றை நாம் பெரும்பாலும் அறிந்து வைத்திருப்பதில்லை.

இஸ்லாமிய வரலாற்றில் சரியான ஹதீஸ் எது? பலஹீனமான ஹதீஸ் எது? இட்டுக்கட்டப்பட்ட ஹதீஸ் எது? அறிவிப்பாளர்களின் தரம் என்ன? போன்றவற்றையெல்லாம் ஆய்வு செய்து, ஸஹீஹான ஹதீஸ்களை கடுமையான உழைப்பிற்குப் பின் இந்த சமூகத்திற்கு விட்டுச் சென்ற இமாம் புகாரி போன்றவர்களின் வாழ்வு பற்றி நாம் அறிந்து வைத்திருப்பதும், இதனை நம்முடைய வருங்கால சந்ததிகளுக்கு எடுத்துரைப்பதும், ஞாபகமூட்டுவதும் நம்முடைய ஈமானிற்கு வலு சேர்க்கும் என்பது நிச்சயம் சந்தேகமில்லை. காரணம் இன்று ஒரு சிடி இரண்டு சிடி மார்க்க சொற்பொழிவு கேட்டவனெல்லாம் மார்க்கம் பேசி தர்க்கம் செய்யும் நிலைக்கு தள்ளப்பட்டுள்ளான். 

தூய இஸ்லாத்திற்காக அரும்பாடுபட்ட இமாம் புகாரி போன்றவர்களை எல்லாம் பெரிய அறிவாற்றல் உள்ளவரல்ல என்று தன் புத்திக்கு எட்டாத ஒரு சில விசயங்களை வைத்து தரம் தாழ்த்தி பேசுகிறான் இரண்டு சிடி கேட்டவன். இமாம் புகாரி போன்றவர்களின் வரலாறுகளை பற்றி அறியாமல் இருந்தால், இரண்டு சீடியில் பயான் கேட்பவர்கள் இமாம்களை தரக்குறைவாக பேசுவதை உண்மை என்று நம்பும் நிலை வருங்காலத்தில் எழலாம். அல்லாஹ் பாதுகாப்பானாக.

இமாம் புகாரி 10 வயதில் ஹாஃபிலானார்கள், ஆனால் இன்று 15 வயதில் திருக்குர்ஆனை முழுமையாக மனனம் செய்துள்ள பிள்ளைகளை காண்பது மிக மிக அறிதாகி வருகிறது. நம் பிள்ளை ஒரு சினிமா பாடல் படித்து விட்டால் நாம் ரொம்ப ஆர்வதுடன் அதனை கேட்டு, கவுரவத்துடன் சந்தோசப்படும் அளவுக்கு, நம் பிள்ளை ஒரு பெரிய குர்ஆன் வசனத்தை மனம் செய்து ஓதிவிட்டானே என்று என்றைக்காவது சந்தோசப்பட்டிருப்போமா?

சிறந்த அறிவாற்றல், ஞாபகசத்தியுள்ள தன்னுடைய பிள்ளையை தீனுக்காக சேவை செய்யும் நோக்கில் மார்க்க கல்வி படிப்பதற்காக அனுப்ப எத்தனை பெற்றோர்களுக்கு மனம் வரும்?

இப்படி கேள்விகளை நாம் அடுக்கிக் கொண்டே செல்லலாம்.

யா அல்லாஹ்! அனைவரையும், சத்திய சஹாபாக்கள் எவ்வாறு குர்ஆன் மற்றும் நபி(ஸல்) அவர்களின் சொல் செயல் ஆகியவற்றின் அங்கீகாரத்தின் அடிப்படையில் வாழ்ந்தார்களோ அதுபோல் எங்கள் அனைவரையும் வாழ அருள் புரிவாயாக.

M.தாஜுதீன்

அவர்கள் வாழ்வு - ஜைனப் (ரலி) அவர்கள் ! 2

அல்லாஹ்வின் திருப்பெயரால்...!

அகிலத்தின் அருட்கொடை இறைத்தூதர் அண்ணல் நபி(ஸல்) அவர்களின் அருமை மகளார் ஜைனப்(ரலி) அவர்களின் தியாகம் பற்றி நாம் அறிந்திடாத வரலாற்றுச் செய்திகளையும், அதன் மூலம் நமக்கிருக்கும் படிப்பினைகளையும் பற்றி இந்த மீள்பதிவின் மூலம் அறிந்துக்கொள்ளலாம். இன்ஷா அல்லாஹ் !.

உயிரினும் மேலான உத்தம இறைத்தூதர் நபி(ஸல்) அவர்களுடைய நான்கு மகள்களில் மூத்த மகள்தான் ஜைனப்(ரலி) அவர்கள். உம்மு குல்தும்(ரலி), ருகைய்யா (ரலி) பாத்திமா(ரலி) ஆகியோர் மற்ற மூன்று பெண்மக்கள். இவர்கள் நால்வரும் அன்னை ஹதீஜா(ரலி) அவர்களுக்கு பிறந்தவர்கள்.

அண்ணல் நபி(ஸல்) அவர்கள் ஏகத்துவப் பிரச்சாரம் செய்வதற்கு முன்பே தம் மூத்த மகள் ஜைனப்(ரலி) அவர்களை அபுல் ஆஸ் என்பவருக்கு திருமணம் முடித்துக் கொடுத்திருந்தார்கள். அபுல் ஆஸ் அவர்கள் அன்னை ஹதீஜா(ரலி) அவர்களின் சகோதரியின் மகனாவார். ஜைனப்(ரலி) அவர்களின் கணவர் பண்பானவர், நல்லொழுக்கமானவர் என்று வரலாற்றில் அறியப்பட்டவர். இஸ்லாத்தில் ஒருவர் எவ்விதமான துன்பங்களையும் சகித்துக் கொண்டு பொறுமையுடன் வாழ்ந்து அந்த துன்பங்களிலுருந்து மீண்டு, தான் தழுவிய தூய இஸ்லாம் தன்னுடைய சொந்தத்திற்கும், கணவன், மனைவி, பிள்ளைகள், சகோதரர்கள், சகோதரிகள் அனைவருக்கும் கிடைக்க வேண்டும் என்ற ஏக்கம் உள்ளவர்களுக்கு அண்ணலாரின் அருமை மகளார் ஜைனப் (ரலி) அவர்களின் வாழ்வில் நிகழ்ந்த பின் வரும் உருக்கமான சம்பவங்கள் நல்லதொரு படிப்பினை.

தன் மகள் ஜைனப்(ரலி) அவர்களுக்கும் அபுல் ஆஸுக்கும் திருமணம் முடிந்த சில வருடங்களில் நபி(ஸல்) அவர்களுக்கு நபித்துவம் அருளப்படுகிறது. அந்த சந்தர்ப்பத்தில் அபுல் ஆஸ் அவர்கள் வியாபார நிமித்தமாக வெளியூர் சென்றிருந்தார். நபி(ஸல்) அவர்கள் தனக்கு அருளப்பட்ட இஸ்லாத்தை எத்தி வைக்கிறார்கள், முதலில் மனைவி ஹதீஜா(ரலி), பின்னர் மகள்கள் ஜைனப்(ரலி), உம்மு குல்தும்(ரலி) ருகைய்யா(ரலி) ஃபாத்திமா(ரலி) ஆகியோர் இஸ்லாத்தை ஏற்கிறார்கள். இதில் இஸ்லாத்தை ஏற்ற ஒரே காரணத்திற்காக உம்மு குல்தும்(ரலி) ருக்கையா(ரலி) ஆகியோரை அவர்களின் கணவன்மார்கள் விவாகரத்து செய்தனர். அது ஒரு மிக உருக்கமான வரலாற்றுச் சம்பவம். இந்த தருணத்தில் நபி(ஸல்) அவர்களின் மூத்த மகள் ஜைனப்(ரலி) அவர்கள் வெளியூர் சென்றிருந்த தன் கணவனின் வருகைக்காக காத்திருந்தார்.

வியாபாரத்தை முடித்து விட்டு வீடு திரும்புகிறார் அபுல் ஆஸ். வீட்டில் தன் மனைவி இஸ்லாத்தை ஏற்ற செய்தியை அறிந்து கொள்கிறார். ஜைனப்(ரலி) அவர்கள் தன் கணவனைப் பார்த்து “என்னுடைய தந்தை இறைத்தூதராகி விட்டார்கள், அல்லாஹ்விடமிருந்து வஹி அருளப்பட்டது, என்னுடைய தந்தையின் மூலம் நான் இஸ்லாத்தை ஏற்றுக் கொண்டேன், நீங்களும் இஸ்லாத்தை ஏற்றுக் கொள்ளுங்கள்” என்று அன்பாக ஒரு கோரிக்கையை வைத்தார். அதற்கு அபுல் ஆஸ் “ஒரு பெண்ணுடைய பேச்சைக் கேட்டு நான் இஸ்லாத்தை ஏற்றால் என்னை என் சமூகம் கேவலமாக பேசும் என்பதற்காக நான் அஞ்சுகிறேன், நான் இஸ்லாத்தை ஏற்க மாட்டேன், அதே நேரம் உங்கள் தந்தை உண்மையாளர்” என்று சொன்னார். தன் கணவர் இஸ்லாத்தை ஏற்பார் என்று மிக ஆவலுடன் எதிர்ப்பாத்திருந்த  அண்ணல் நபி(ஸல்) அவர்களின் பாசம் நிறைந்த அருமை மூத்த மகள் ஜைனப்(ரலி) அவர்களுக்கு மிகுந்த வேதனையளித்தது. இவர்கள் இருவரின் வாழ்வும் சிறிது காலம் மக்காவில் சென்றது. பின்னர் தான் காஃபிர்களோடு திருமண உறவு இல்லை என்ற சட்டம் மதினாவில் இறங்கியது.

மக்காவில் மார்க்க பிரச்சாரம் செய்ய பல இன்னல்கள் துன்பங்களைச் சகித்துக் கொண்டிருந்த அந்த காலகட்டத்தில் அல்லாஹ்வின் கட்டளைப்படி நபி(ஸல்) அவர்கள் மக்காவை விட்டு மதினாவுக்கு ஹிஜ்ரத் செய்கிறார்கள். அப்போது நபி(ஸல்) அவர்கள் தம் குடும்பத்தோடு மதீனாவுக்கு செல்லத் தயாராகிறார்கள், நபி(ஸல்) அவர்களின் மூத்த மகள் ஜைனப் (ரலி) அவர்கள் “என் அருமைத் தந்தையே நான் என்ன செய்ய, நானும் உங்களோடு வருகிறேனே” என்று மிகுந்த ஏக்கத்துடன் சொந்தங்களுடன் ஒன்றாக இருக்க வேண்டும் என்று மிகுந்த ஆவலுடன் தந்தையோடு செல்வதா? கணவனோடு இருப்பதா? என்ற குழப்ப எண்ணத்துடன் தன் தந்தையிடம் வினவினார். அபுல் ஆஸ் நல்லவர் என்பதாலோ என்னவோ நபி(ஸல்) தன் அருமை மகளிடம் “நீ உன் கணவனோடு இருந்துவிடு மகளே” என்று கட்டளையிட்டார்கள். தன் தந்தையின் கட்டளையைப் பொறுமையோடு ஏற்றுக் கொண்டார்கள் ஜைனப்(ரலி). தாயில்லாத ஜைனப்(ரலி) அவர்களுக்கு தாய்க்கு தாயாக பாசம் காட்டி கொண்டிருந்த தந்தையான இறைத்தூதர், உடன் பிறந்த சகோதரிகள், இன்னும் பிற சொந்தங்கள் தன்னை விட்டுவிட்டு ஹிஜ்ரத் செய்கிறார்களே என்ற பரிதவிப்பு, பிரிவின் துயரம் தியாகத் திருமகள் ஜைனப்(ரலி) அவர்களுக்கு நிச்சயம் இருந்திருக்கும். ஆனால் இஸ்லாத்தை ஏற்ற ஒரே கரணத்திற்காகவும், தன் தந்தை நபி(ஸல்) அவர்கள் தனக்கு ஒன்று சொன்னால் அது நிச்சயம் தனக்கு நன்மை தருவதாகத்தான் இருக்கும் என்ற நம்பிக்கையில் மக்காவில் தன் கணவனோடு வாழ்ந்து வந்தார்கள்.

பின்னர் சில காலம் கழித்து பத்ரு யுத்தம் நடைபெறுகிறது. அதில் காஃபிர்களுடைய அணியில் ஜைனப்(ரலி) அவர்களின் கணவர் அபுல் ஆஸ் உள்ளார். பத்ருப் போரின் வெற்றியின் போது அபுல் ஆஸ் கைது செய்யப்படுகிறார். அபுல் ஆஸ் கைது செய்யப்படுள்ளார் என்ற செய்தி நபி(ஸல்) அவர்களுக்கும், ஜைனப்(ரலி) அவர்களுக்கும் வந்தடைகிறது. ஒரு இக்கட்டான சூழ்நிலை நபி(ஸல்) அவர்களுக்கு ஏற்படுகிறது. தன்னுடைய மகளின் கணவர் தன்னை எதிர்த்து போரிட வந்து கைது செய்யப்பட்டுள்ளார் என்று. இது போல் ஜைனப்(ரலி) அவர்களுக்கும் ஓர் தர்ம சங்கடமான நிலை, இறைத்தூதர் தன் தந்தை நபி(ஸல்) அவர்களை எதிர்த்து போரிட தன் கணவர் சென்று கைது செய்யப்பட்டுள்ளார்களே என்ற வேதனை. போரில் கைது செய்யப்பட்டவர்களை நபி(ஸல்) அவர்கள் பரிகாரம் பெற்று விடுதலைச் செய்கிறார்கள் என்ற செய்தி ஜைனப்(ரலி) அவர்களுக்கு வருகிறது. உடனே தன் தாய் அன்னை ஹதீஜா(ரலி) அவர்கள் தனக்காக விட்டுச் சென்ற அழகிய மணிமாலையை கழுத்தில் இருந்து கழட்டி, அபுல் ஆஸ் அவர்கள் சகோதரர் ஒருவரிடம் கொடுத்து, “இதை பரிகாரமாக என் தந்தை நபி(ஸல்) அவர்களிடம் கொடுத்து என் கணவரை மீட்டு வாருங்கள்” என்று கூறி அனுப்பி வைத்தார்கள்.

அபுல் ஆஸ் அவர்களின் சகோதரர் சகீக் இப்னு ரபிஹ் என்பவர் நபி(ஸல்) அவர்களிடம் சென்று அந்த மணிமாலையைக் கொடுத்து ஜைனப்(ரலி) இதை கொடுத்து அவரின் கணவர் அபுல் ஆஸை விடுதலை செய்ய கோரினார் என்று சொன்னார். அந்த மணிமாலையைப் பார்த்த அண்ணல் நபி(ஸல்) அவர்கள் அழ ஆரம்பித்து விட்டார்கள், “இது என் அருமை மகள் ஜைனப்(ரலி) அவர்களுக்கு என் மனைவி ஹதீஜா(ரலி) கொடுத்த மாலை” என்று சொல்லி கண்ணீர் விட்டு அழுதார்கள். என்ன தான் மிகப்பெரிய தலைவராக இருந்தாலும், நபி(ஸல்) அவர்கள் தன்னுடைய அதிகாரத்தைப் பயன்படுத்தி தன் மகளின் கணவரை உடனே விடுதலை செய்யவில்லை. 

தன் தோழர்களிடம் அபுல் ஆஸின் விடுதலை தொடர்பாக கேட்கிறார்கள், “நாம் ஒரு சிலரை பரிகாரம் இல்லாமல் விடுதலை செய்கிறோம், இந்த அபுல் ஆஸை அது போல் விடுதலை செய்யலாமா?” என்று கேட்டார்கள். அதற்கு நபி தோழர்கள் சம்மதித்தார்கள். நபி(ஸல்) அவர்கள் அபுல் ஆஸை வரவழைத்து “இந்த மாலை ஹதீஜா(ரலி) அவர்களுடையது, என் அருமை மகள் ஜைனப்(ரலி) அவர்களிடம் இருக்க வேண்டியது, எனக்கு என் மகளைத் திருப்பி அனுப்புங்கள்” என்று கூறி அபுல் ஆஸை விடுதலை செய்தார்கள்.

தன் தந்தையின் கட்டளை தன் கணவனை விட்டு விட்டு வர வேண்டும் என்று. மிகுந்த மன பாரத்துடன் மக்காவைவிட்டு தன்னுடைய பெண் குழந்தை உமாமா(ரலி) அவர்களைச் சுமந்து கொண்டு மதீனா வந்தடைந்தார்கள். சில காலம் சென்றதும், நபி(ஸல்) அவர்களிடம் ஜைனப்(ரலி) அவர்களைத் திருமணம் செய்ய ஒரு சில நபித் தோழர்கள் விருப்பம் தெரிவித்தனர், ஆனால் ஜைனப்(ரலி) அவர்கள் விரும்பவில்லை. காஃபிராக உள்ள தன் கணவர் இஸ்லாத்திற்கு வரவேண்டும் என்பதில் முழு நம்பிக்கையுடன் இருந்தார்கள். ஒரு நாள் ஒரு காஃபிர் வியாபாரக் கூட்டம் மதினாவை கடந்து செல்கிறது, அவர்கள் இஸ்லாமிய எதிரிகள் என்பதால், அப்போது பொருட்களுடன் அவர்களைச் சிறைப்பிடிக்கிறார்கள் நபித்தோழர்கள், அவர்கள் அனைவரும் கைது செய்து மதீனா அழைத்து வருகிறார்கள். அல்லாஹ்வின் நாட்டம் அவர்களிடமிருந்து தப்பியோடிய அபுல் ஆஸ் அவர்கள் ஜைனப்(ரலி) அவர்களிடம் அடைக்கலம் தேடுகிறார். “மக்காவில் உள்ள நிறைய மக்களுடைய சொத்துக்கள் அதில் உள்ளது, எப்படியாவது என்னுடைய பொருளாதாரத்தை காப்பாற்றித் தந்து விடுங்கள்” என்று அபுல் ஆஸ் அவர்கள் ஜைனப்(ரலி) அவர்களிடம் கோரிக்கை வைத்தார்கள். 

உடனே தன் பாசம் நிறைந்த தந்தை நபி(ஸல்) அவர்களிடம் “என் கணவரின் சொத்தை நீங்கள் திருப்பி கொடுக்க முடியுமா” என்று தயக்கத்துடன் கேட்டார்கள். அதற்கு நபி(ஸல்) அவர்கள் “ அந்த விவகாரத்தில் முடிவு செய்ய எனக்கு உரிமை இல்லை என்று சொல்லிவிட்டு” நபித் தோழர்களிடம் கேட்கிறார்கள் “ஜைனப்(ரலி) தன் கணவரின் சொத்தைத் திருப்பிக் கேட்கிறார்கள் நீங்கள் என்ன சொல்லுகிறீர்கள்” என்று கேட்டார்கள். அதற்கு நபித்தோழர்கள் “ ஜைனப்(ரலி) அவர்கள் யாருக்கு பாதுகாப்பு கொடுத்தார்களோ அவர்களுக்கு நாமும் பாதுபாப்புக் கொடுப்போம்” என்று நபித்தோழர்கள் பதில் சொல்ல, அபுல் ஆஸை விடுதலை செய்து சொத்துக்கள் அனைத்தையும் அவரிடம் ஒப்படைத்தார்கள் நபி(ஸல்) அவர்கள். இந்த சந்தர்ப்பத்தில் ஜைனப்(ரலி) அவர்கள் அபுல் ஆஸை அழைத்து “இன்னும் நீங்கள் இஸ்லாத்திற்கு வர மாட்டீர்களா?” என்று மிகுந்த ஏக்கத்துடன் கேட்டார்கள். “இல்லை” என்ற பதில் மட்டும் சொல்லிவிட்டு அவ்விடத்தை விட்டுச் சென்று விட்டார் அபுல் ஆஸ். தன் கணவர் இஸ்லாத்தை ஏற்பார் என்று எதிர்ப்பார்த்துக் காத்திருந்தார் ஜைனப்(ரலி) அவர்களுக்கு பெருத்த ஏமாற்றமும் மன வருத்தமும் ஏற்பட்டது.

மக்காவில் உள்ளவர்களின் பொருட்களையும் சொத்துக்களையும் ஒப்படைத்து விட்டு, சில நாட்களுக்கு பிறகு அபுல் ஆஸ் அவர்கள் மதீனா திரும்பி வந்து, “வணக்கத்திற்குறியவன் அல்லாஹ்வை தவிர வேறு யாருமில்லை, நபி முஹம்மது அல்லாஹ்வின் இறைத்தூதர் என்று சாட்சி கூறுகிறேன்” என்று கலிமா சொல்லி இஸ்லாத்தை ஏற்றார். இதனை வாசிக்கும் நம் கண்கள் கலங்குகிறதே, ஆனால் காஃபிராக இருந்த கணவர் இஸ்லாத்தை ஏற்ற அந்த தருணத்தில், பல வருடங்கள் அந்த சந்தர்பத்திற்காக காத்திருந்த அந்த பொருமைசாலி ஜைனப்(ரலி) அவர்களின் மகிழ்ச்சி நிச்சயம் எல்லையற்ற மகிழ்ச்சியாக இருந்திருந்தது. சில மாதங்கள் இருவரும் சந்தோசமாக வாழ்ந்தார்கள், அபுல் ஆஸ்(ரலி) அவர்கள் இஸ்லாத்தை ஏற்ற ஒரு வருடத்திற்குள் ஜைனப்(ரலி) அவர்கள் இவ்வுலகைவிட்டு பிரிந்தார்கள். இன்னா லில்லாஹி வ இன்னா இலைஹி ராஜிஊன்.

இங்கு நாம் கவனத்தில் கொள்ள வேண்டிய விசயம் என்னவென்றால். இறைத்தூதரின் மகளாக இருந்து, இஸ்லாத்தை ஏற்று, பல இன்னல்களை சந்தித்து, தன் தந்தை படும் கஷ்டங்களை சகித்துக் கொண்டு,  இறைத்தூதரான தன் தந்தைக்கு தன் கணவனால் சங்கடங்கள் ஏற்பட்டுள்ள சூழலிலும், தன்னோடு வாழ்ந்து வரும் கணவரும் இஸ்லாத்தை ஏற்க வேண்டுமே என்ற ஏக்கத்தோடு, நம்பிக்கையோடு இருந்தார்களே அந்த பொருமைசாலி ஜைனப்(ரலி) அவர்கள். அவர்களிடம் இருந்ததைப் போன்று நம் குடும்பத்தவர், தாய், தந்தை, கணவன், மனைவி, பிள்ளைகள், சகோதர சகோதரிகள், நண்பர்கள், சொந்தங்கள் ஆகியோர் ‘இணைவைப்பு’, ‘பித்அத்’தான (இஸ்லாத்தில் இல்லாத புதிய) காரியங்களிலிருந்து விடுபட்டு நேர் வழிக்கு வர வேண்டும் என்று என்றைக்காவது அல்லாஹ்விடம் பிரார்த்தனை செய்திருப்போமா? அதற்கான கவலை ஏக்கம், நம்மிடம் உள்ளதா?

மார்க்க விசயத்தில் சிறிய தவறிழைக்கும் நம் சொந்தங்களிடம் நம்மில் பலர் எடுத்தேன் கவிழ்த்தேன் என்ற தோனியில், மார்க்க மாமேதைகள் போல் பொருமை இழந்து வார்த்தைகளை விட்டு, பத்வாக்கள் (மார்க்க தீர்ப்பு) கொடுத்து நம் சொந்தங்களிடம் வெருப்புணர்வை அல்லவா தூண்டுகிறோம், நிதானத்தை எப்போது கையாளாக போகிறோம்? சிந்திக்க வேண்டாமா?

தன் கணவர் தொழுகை இன்னும் ஏனைய இபாத்துக்கள் ஏதும் இல்லாதவராக உள்ளாரே என்று கவலைப்படாத மனைவிமார்கள், ஜைனப்(ரலி) அவர்களின் இந்த சம்பவங்களை நிச்சயம் அறிய வேண்டும். தன் கணவர் எப்படி வேண்டுமானாலும் இருக்கட்டும், எனக்கு தேவை பொருளாதாரம், அவர் சம்பாத்தியம் ஹலாலோ ஹராமோ, அது எனக்கு தேவையில்லை, என்றில்லாமல், அப்படிப்பட்டவர்கள் தொழுகை மற்றும் இபாதத்துக்களை பேணுபவராக இருக்க வேண்டும், அவருடைய சம்பாத்தியம் ஹலாலாகமட்டுமே இருக்க வேண்டும் என்று து ஆ செய்யும் மனைவிமார்கள் எத்தனைப் பேர் நம்மிடையா இருக்கின்றனர் என்பதை சீர்தூக்கிப் பார்க்க வேண்டும்.

யா அல்லாஹ்! அனைவரையும், சத்திய சஹாபாக்கள் எவ்வாறு நபி(ஸல்) அவர்களின் சொல் செயல் ஆகியவற்றின் அங்கீகாரத்தின் அடிப்படையில் விளங்கி வாழ்ந்தார்களோ அதுபோல் எங்கள் அனைவரையும் வாழ அருள் புரிவாயாக.

M தாஜுதீன்

இது ஒரு மீள்பதிவு

உங்கள் வீட்டுத் திருமணத்தில் இது இருக்கா? 12

அன்மைக் காலங்களில் திருமணம் என்பது கோடிகளைக் கொட்டி விளையாடும் கோலாகல விழாவாக ஆகிவிட்டது. இதில் எந்த சமூகமும் விதிவிலக்கல்ல என்று சொல்லும் அளவுக்கு அன்றாட திருமண நிகழ்வுகளின் செய்திகளே சாட்சி. இன்றைய அரசியல்வாதிகள் தொடங்கி சினிமாக்காரர்கள், விளையாட்டு வீரர்கள் உட்பட அனைத்து பண முதலைகளும் மக்கள் முகம் சுளிக்கும் அளவுக்கு காசை கரியாக்கி வெகு விமரிசையாக திருமணத்தை நடத்துவதைப் பார்க்க முடிகின்றது. ஒரு காலத்தில் எளிமையான திருமணத்தை நடத்தி மக்களில் நாங்களும் சமமானவர்கள் என்று கூறும் அளவுக்கு மிகச் சொற்பமான செல்வச் சீமான்களும் உண்டு என்பதையும் யாரும் மறுக்க முடியாது. இருப்பினும்  பணம் படைத்த பல பணக்கார முதலைகள் தங்கள் செல்வாக்கினை நிலை நிறுத்த திருமணம் என்ற போர்வையில் வீண் வீரயங்கள் நடத்துவதையும் பார்க்க முடிகின்றது. திருமண விருந்து  என்ற பெயரில் இன்றைய விருந்துகளில்  எத்தனை ஆடம்பரங்கள் ஒன்றல்ல இரண்டல்ல.

இஸ்லாமிய திருமணம் எவ்வாறு இருக்க வேண்டும் என்று நம்மில் பெரும்பாலனவர்களுக்கு ஒரு காலத்தில் தெரியாமல் இருந்தது. கடந்த 30 வருட கால ஏகத்துவ எழுச்சியின் காரணத்தினாலும், ஒரு சில உள்ளூர் உலமாக்களின் கடின பிரச்சாரத்தினாலும். எளிமையான திருமணமே நபிவழி திருமணம் என்பதை கேட்டு மட்டும் வைத்துள்ளோம். ஆனால் நபிவழி திருமண முறைகளை நடைமுறைப்படுத்துவதை பெரும்பாலான நம்மவர்கள் தவற விடுகிறோம் என்பது எதார்த்தம்.

வரதட்சனை வாங்கக்கூடாது, வீண் விரையம் கூடாது, அல்லிப் பைனஹுமா துஆ கூடாது, ஆடல் பாடல் கூடாது என்று என்னதான் நபிவழி திருமணம், எளிமையான திருமணம் என்று மேடைகள் போட்டு பிரச்சாரம் செய்தாலும், இன்னும் திருமண என்ற பெயரில் பின் வரும் சில நிகழ்வுகள் பல குடும்பங்களில் கடைபிடிக்கப்பட்டே வருகிறது.

பெண் நிச்சயம் செய்யப்பட்ட பின்பு, மாப்பிள்ளை வீட்டார் கேட்காவிட்டாலும் மணப்பெண் வீட்டார் சீர் என்ற பெயரில் ஹல்வா, முர்தபா கோழிக்கறி என்று சீர் அனுப்புவது.

ஆடம்பர திருமண அழைப்பிதழ்.

திருமணத்திற்கு முன்பே அலைபேசியில் பேசி முடிவான ஆணையும் பெண்ணியும் பேசிக்கொள்ள்ள வைக்கும் பழக்கம்.

வரதட்சனை வாங்காத மாப்பிள்ளையாக இருந்தாலும், சீர் பணம் ரூபாய் ஒரு லட்சம், திருமணத்திற்கு முன்பு மணமகனை பெற்றவளிடம் வழங்குதல். (இதற்கு எப்படித்தான் இன்னும் சில ஏஜெண்டுகள் வயதான கலத்திலும் கலப்பணியாற்றுகிறார்கள் என்பது வேதனையான செய்தி)

மணப்பெண்ணுக்கு முகம் துடைப்பு மற்றும் கொட்ட பாக்கு, வெற்றிலையுடன் ஆடம்பர அழகு சாதணப் பொருட்களைக் கொண்டு சொப்பு அனுப்புதல்.

மணமகன் மற்றும் மணமகளுக்கு மலர் மாலை சுட்டுவது. ( இந்த லட்சணத்தில் மல்லிகைப் பூமாலை தான் ஹராம், பிளாஸ்டிக் பூமாலை ஹலால் என்று வியாக்கியானம் வேற)

மாப்பிள்ளை ஊர்வலம், பைத், தப்ஸ். (அன்மையில் தலை எடுத்துள்ளது)

இன்னும் அல்லிப்ஃ பைனஹுமா என்று தொடங்கும் ஆதாரம் இல்லாத துஆவை நிக்காஹ் முடிந்தவுடன் ஓதுவது. (வருடக்கணக்கில் அர்த்தம் மற்றும் அதில் குறிப்பிடப்படுபவர்களின் வரலாறு தெரியாமல் ஓதப்படும் ஒரே துஆ இது மட்டுமாகத்தான் இருக்கும்)

திருமணம் முடிந்ததும் மாப்பிள்ளையைக் கட்டியணைத்து வாழ்த்துதல்.

ஆண்களும் பெண்களுமாக மணமக்களைக் கேலி செய்தல்

மணமகன் பெண் வீட்டிற்கு அழைத்து வந்த பின்பு நபி (ஸல்) காட்டித்தராத  துஆக்கள், பாத்தியாக்கள் ஓதுதல்!

மணப்பெண்ணை மணமகன் கைப்பிடித்த பின்பு, மணமக்களுக்கு பாக்கு வெற்றிலை கொடுப்பது.

தாலி கட்டுதல் - கருகமணி கட்டுதல்

திருமணம் முடிந்தவுடன், பெண்வீட்டில் குலவையிடுதல்.

திருமணம் முடிந்தவுடன் வெடி வெடித்தல் (தற்போது தலையெடுத்துள்ளது)

பெண் விட்டு பசியார சீர் என்று மணமகன் வீட்டார் கேட்டு வாங்கும் குறைந்த்து 50 சஹன் காலை அல்லது இரவு உணவு.

பெண் அழைப்பு என்ற பெயரில் தொடரும் குடும்பத்தவர்களின் தடாப்புடால் விருந்துகள்.

இருவீட்டாரும் மணமக்களை புகைப்படம் எடுத்து, whatsup groupகளின் வெட்கமில்லாமல் பகிர்வது.

பெண் வீட்டாரிடம் திருமணத்திற்குப் பின் பல சந்தர்ப்பங்களில் சீர் வரிசை என்ற பெயரில் கேட்டு வாங்குவது.

திருமணத்தில் கலந்துக்கொள்ளாத சொந்தக்காரன் யாராவது வெளிநாட்டிலிருந்து பல மாதம் கழித்து வந்தாலும், அவர்களுக்கு ஒரு சடங்கிற்காக திருமண விருந்து என்று கொடுப்பது.

பல்வேறு காரணங்களை காட்டி பல்வேறு சந்தர்ப்பங்களில் பெண் வீட்டாரிடம் விருந்துகளைக் கேட்பது.

பெண் வீட்டார், சம்மந்திவீட்டிற்கு, ரமழான் மாதத்தில் 200 வாடா, 200 சமூசா, ஆட்டுத்தலை நோன்புக்கஞ்சி கொடுப்பது.

தலைப்பிரசவச் செலவை பெண் வீட்டார் தலையில் சுமத்துவது.

முதல் குழந்தைக்கு நகை செய்து போடுமாறு பெண் வீட்டாரைக் கட்டாயப்படுத்துதல்.

என்று திருமண நிச்சயத்தில் ஆரம்பித்த்து கபுருக்குள் போய் வைக்கும் வரை தொடருகிறது அனாச்சாரம் என்ற பிற மத கலாச்சாரம்.

மேல் சொன்னவைகள் எதற்காவது நபி(ஸல்) அவர்கள் காட்டித்தந்ததன் அடிப்படையில் ஏதாவது ஆதாரம் இருக்கா? நபிவழி திருமணம் என்று சொல்லும் பலர் வீட்டில் மேலே சொன்னவைகளில் குறைந்தபட்சம் ஒரு 5 நிகழ்வாவது நடக்கும் என்பது உண்மை. வியாக்கியானம் சொல்லி யாரும் மறுக்க இயலாது. நாம் அனைவரும் அல்லாஹ்விற்கு அஞ்சிக் கொள்வோம்.

யார் பிற சமயக் கலாச்சாரத்தை பின்பற்றி நடக்கின்றாரோ அவரும் அவர்களைச் சேர்ந்தவர் என்று நபி(ஸல்) அவர்கள் கூறியுள்ளார்கள் (ஆதாரம்: அபூதாவூத் 3512)

"உண்ணுங்கள் பருகுங்கள்! வீண் விரையம் செய்யாதீர்கள்! வீண் விரையம் செய்வோரை அவன் விரும்ப மாட்டான்" (அல் குர்ஆன் 7:31)

"அல்லாஹ்வையும், இறுதி நாளையும் நம்பாது மக்கள் மெச்சுவதற்காக தமது செல்வத்தை செலவிடுவோர் (ஷைத்தானின் நண்பர்கள்) யாருக்கு ஷைத்தான் நண்பனாக ஆகிவிட்டானோ அவனே கெட்ட நண்பன். (அல் குர்ஆன் 4:38)

“குறைந்த செலவில் நடத்தப் படும் திருமணமே அதிகம் பரக்கத் நிறைந்ததாகும்" என்று நபிகள் நாயகம் (ஸல்) அவர்கள் கூறினார்கள்”. அறிவிப்பவர் : ஆயிஷா (ரலி) நூல் : அஹ்மத் : 23388

இன்று நம் மத்தியில் நடக்கும் திருமணங்கள் நம் சமுதாயம் மீண்டும்  அறியாமை காலத்திற்கு செல்கிறதோ என்ற எண்ணம் தோன்றுகிறது. பிற மத கலாச்சாரம் கலந்துள்ள நம்முடைய சமுதாய திருமண நிகழ்வுகளுக்கு யார் காரணம்? சிந்தித்துப் பார்த்த்துண்டா?  

‘குறைந்த செலவில் குறைந்த சிரமத்துடன் செய்யப்படும் திருமண நிகழ்ச்சியே சிறந்ததாகும்.’ என்ற நபிமொழியைக் காலத்துக்கு ஒவ்வாதது என்று ஒதுக்கி விட்டோமா?

நபிகள் நாயகம் (ஸல்) பரக்கத் என்று சொல்லுகிறார்களே! அதிக செலவில் செய்யப்படும் திருமணத்தில் பரக்கத்து இருக்கிறது என்று மனசாட்சியுள்ள எந்த ஓரு முஸ்லீமாலும் சொல்ல இயலாது. சிந்தித்துப் பார்க்க வேண்டாமா?.

எத்தனை திருமணங்கள் அல்லாஹ்வின் திருப்பொருத்த்தோடு ஆரம்பிக்கப்படுகின்றன? அழகை மட்டும் குறிகோளாக வைத்து நடந்த திருமணங்கள் திருப்தியோடு நீண்ட காலம் நிலைத்திருக்கின்றனவா?

ஊரையே அழைத்து விருந்து படைத்த எத்தனை குடும்பங்கள் கடன் நீங்கி நிமிர்ந்துள்ளன?

நம் மத்தியில் எத்தனை திருமணங்கள் இஸ்லாமிய குடும்பத்தை உருவாக்கி பூரணப்படுத்தப் போகின்றன ?

நாம் நம்மை மாற்றிகொள்ள வேண்டும். மகத்துவமிக்க இஸ்லாமிய கொள்கைகள் நம்மிடம் இருந்தும் மாற்றான் தோட்டத்து மல்லிகைக்கு ஆசைப்படும் ஒரு மரத்துப் போன சமுதாயமாக நாம் இருக்கக் கூடாது .

அந்நிய கலாச்சாரத்தின் தாக்கங்கள் நம் ஒவ்வொருவரின் வீட்டு கதவுகளையும் நிமிடம் தவறாமல் தட்டிக்கொண்டுதான் இருக்கின்றன. வேண்டாத விருந்தாளியை தவிர்த்துக்கொள்வது என்பதில் குடும்பத்தில்  உள்ள ஒவ்வொருவரும் மிகக் கவனமாக இருக்க வேண்டும். எதிர்வரும் சமுதாயத்திற்கு முன்மாதிரியாக நமது வாழ்க்கையை அமைத்து, இஸ்லாம் வளர நாமும் ஒரு காரணமாக இருக்கவேண்டும்.

எளிமையான திருமணம் தான் பரக்கத் (அபிவிருத்தி) நிறைந்ததாகும். மேலும் திருமணம் என்பது எளிமையானது, ஆடம்பரம் இல்லாதது அது எல்லோருக்கும் இலகுவாக அடையும் விதத்தில் இருப்பதை தான் இஸ்லாம் விரும்புகின்றது. ஆனால் இன்றைய முஸ்லிம்கள் நாங்கள் எவருக்கும் சளைத்தவர்கள் அல்ல என்று திருமணத்தில் போட்டி போட்டு ஆடம்பரமாக நடத்துபவர்கள் அல்லாஹ்வை அஞ்சிக்கொள்ளட்டும்.

மற்றொரு பதிவில் சந்திக்கலாம்.

தாஜுதீன்

tjdn77@gmail.com

இந்த பதிவை தொகுக்க உதவிய சுட்டிகள்.

http://www.readislam.net/portal/archives/6440

http://imamhabeeb.blogspot.ae/2012/04/blog-post_7854.html

http://nazeerudeen.blogspot.ae/2009/12/731.html

http://annajaath.com/archives/7079

http://www.islamiyapenmani.com/2013/01/blog-post.html

பட்டோலை.. 8

குற்றப்பத்திரிக்கை, பதிவேடு, குறிப்பேடு, கையேடு என்று பலஏடுகள் என்று நாம் கேள்விபட்டிருக்கிறோம். இவைகளெல்லாம் மனிதர்களால் இவ்வுலகில் எழுத்தபடுபவைகள்.

வகையான

பதிவேடு - தகவல்கள் மற்றும் விடயங்களைப் பற்றிய விவரமான குறிப்புகள் எழுதப்பட்டிருக்கும் ஏடுகள் / புத்தகங்கள். இதில் பல வகைகள் உள்ளன. உதாரணமாக, தேசிய மக்கள் தொகை பதிவேடு, நில உரிமைப் பதிவேடு, நிலப் பதிவேடு, மருத்துவமனையில் பதிவேடு, பற்று வரவு கணக்குப் பதிவேடு என்று பல வகையான ஏடுகள் அதன் துறை சார்ந்து ஏகப்பட்டது உள்ளன.

கையேடு – ஒரு பொருள் அல்லது ஒரு துறையின் செயல்முறைகளை விளக்கும் நூல். உதராணமாக – வாகனக் கையேடு, அலைபேசி கையேடு, கல்லூரி கையேடு, அரசு கையேடு.

குறிப்பேடு - குறிப்புகளை எழுதுவதற்கென உள்ள வெற்றுப் பக்கங்களை கொண்ட புத்தகம்.

குற்றப்பத்திரிகை – குற்றம் செய்தவர்களை பற்றி காவல்துறை தயாரிக்கும் ஒரு ஆவணம், குற்ற பத்திரிக்கையில் புகார் மனுதார், மற்றும் நடந்த சம்பவத்தை விவரிக்கும் சாட்சிகள் ஆகியோரின் வாக்கு மூலங்கள் இருக்கும். விசாரணை அதிகாரி, முதல் தகவல் அறிக்கை தாக்கல் செய்த அதிகாரி அனைவரது வாக்கு மூலம் இருக்கும். இந்த ஆவணம் நீதிமன்றத்தில் சமர்பிக்கப்படும்.

இப்படி நிறைய பெயர் கொண்ட ஏடுகளை பற்றி நாம் அறிந்திருக்கிறோம். இவைகள் எல்லாம் இவ்வுலகில் நாம் காணுபவைகளே.

ஆனால் இங்கு உங்களிடம் பகிரப்போகும் ஏடு பற்றிய தகவல்கள், நாளை மறுமையில் நீதி விசாரனையின் போது நம்மை படைத்த அல்லாஹ் ரப்புல் ஆலமீன் முன்பு நம்மீது கொடுக்கப்படும் பட்டோலை புத்தகம் பற்றியதே.

அல்லாஹ் தன் அருள்மறை அல்குர்ஆனில் கூறுகிறான்.

“இன்னும் (பட்டோலையாகிய) புத்தகம் (அவர்கள் முன்) வைக்கப்படும்; அதிலுள்ளதைக் கண்டு குற்றவாளிகள் மிக்க அச்சத்துடன் இருப்பதைக் காண்பீர்; மேலும் அவர்கள், “எங்கள் கேடே! இந்த ஏட்டிற்கு என்ன (நேர்ந்தது)? சிறியவையோ பெரியவையோ எதையும் வரையறுக்காது இது விட்டுவைக்கவில்லையே!” என்று கூறுவார்கள்; இன்னும், அவர்கள்செய்த யாவும் அவர்கள் முன் வைக்கப்படுவதைக் காண்பார்கள்; ஆனால் உம்முடைய இறைவன் ஒருவருக்கும் அநியாயம் செய்யமாட்டான்.”   (18:49)

இந்த அல்குர்ஆன் வசனத்திற்கான விளக்க உரையை கேட்க நேரிட்டது. உண்மையில் மெய் சிலிர்த்து போய்விட்டேன். நாளை மறுமையில் நம்முடைய பட்டோலையில் என்னவல்லாம் வரப்போகிறதோ என்ற பயத்தோடு என் தேடலை ஆரம்பித்தேன்..

அல்லாஹ் தன் அருள்மறை அல்குர்ஆனில் மேலும் கூறுகிறான்.

ஆகவே, நிச்சயமாக தீயோர்களின் பதிவேடு ஸிஜ்ஜீனில் இருக்கிறது (83:7)

நிச்சயமாக நல்லோர்களின் பதிவேடும் “இல்லிய்யீ”னில் இருக்கிறது. (83:18)

நம்முடையை பெயர் `இல்லிய்யீன்` பதிவேட்டிலா? அல்லது `ஸிஜ்ஜீன்` பதிவேட்டிலா? என்ற கவலை நமக்கு இந்த அல்குர்ஆன் வசனங்களை வாசித்த பின்பு எழாமல் இருக்காது..

நாளை மறுமையில் மனிதர்களின் நன்மை தீமைகள் எடைபோடப்படுவது மட்டுமின்றி அவர்களின் நன்மை தீமைகள் பற்றிய விரிவான விபரங்கள் உள்ளடக்கிய பதிவேடுகளும் அவர்களின் கைகளில் வழங்கப்படும். இதை அல்குர்ஆன் பல்வேறு இடங்களில் விரிவாகக் குறிப்பிடுகின்றது.

(நபியே! அந்நாளில்) ஒவ்வொரு சமுதாயமும் முழந்தாளிட்டிருப்பதைக் காண்பீர். ஒவ்வொரு சமுதாயத்தவரும் தத்தமது பதிவேட்டின் பால் அழைக்கப்படுவர். 'நீங்கள் செய்ததற்குரிய கூலி இன்று வழங்கப்படும். இது உங்களைப் பற்றிய நன்மைகளைக் கூறும் பதிவேடாகும். நிச்சயமாக நீங்கள் செய்து கொண்டிருந்ததை நாங்கள் பதிவு செய்து கொண்டிருந்தோம்' (எனக் கூறப்படும்) (அல்குர்ஆன் 45:28-29)

பதிவேடுகள் வழங்கப்படாத எந்தச் சமுதாயமும், எந்த மனிதனும் இருக்க மாட்டார்கள் என்பதை இவ்வசனம் நமக்கு மிகத்தெளிவாக எடுத்துரைக்கிறது. 

இருப்பினும், அர்ஷின் அதிபதியான அல்லாஹ் இது போன்ற பதிவேடுகளை காட்டாமல் யாரையும் தண்டிக்கலாம். அல்லாஹ் மட்டுமே நீதியாளன், யாருக்கும் அநீதி இழைக்காதவன் என்பதை மனிதர்கள் சந்தேகத்துக்கிடமின்றி புரிந்து கொள்ளவே பதிவேடுகள் மனிதர்களிடம் காட்டப்பட்டு பின் விசாரனை செய்யப்படுகிறது என்பதை பின் வரும் இறை வசனம் நமக்கு எடுத்துக்காட்டுகிறது.

'மேலும் உண்மையைப் பேசும் பதிவுப்புத்தகம் நம்மிடம் உள்ளது. அவர்களுக்கு அநியாயம் செய்யப்பட மாட்டாது' (அல்குர்ஆன் 23:62)

இவ்வுலகில் காவல்துறை விசாரனைக்கு பின்பே குற்றப்பத்திரிக்கை நீதிமன்றத்தில் தாக்கல் செய்யப்பட்டு தண்டனைகள் வழங்கப்படுகிறது. ஆயிரம் குற்றவாளிகள் தப்பித்தாலும் ஒரு நிரபராதி தண்டிக்கப்படக் கூடாது என்று மனிதன் எழுதிய சட்டத்தின் சாரமாக உள்ளது. ஆனால் விசாரனை என்ற பெயரில் அடியும், உதையும், துன்புறுத்தலும் கொடுத்து, பொய் சாட்சியங்கள் தயாரித்து அப்பாவிகளின் மேல் குற்றப்பத்திரிக்கை தாக்கல் செய்து, அதன் அடிப்படையில் அந்த அப்பாவிக்கு அநியாயம் இழைக்கப்படுகிறது. ஆனால் நாளை மறுமையில், மனிதன் தான் செய்தவைகளைக் கொண்ட பதிவேட்டை காட்டி அந்த மனிதனிடம் அவைகளை வாசிக்க அவகாசம் கொடுத்த பிறகே அல்லாஹ்வின்  விசாரனை தொடங்கும். இதுவே ஏக இறைவன் எந்த மனிதனுக்கும் அநியாயம் செய்யமாட்டான் என்பதற்கு மிகப்பெரிய சான்று.

இந்தப் பதிவேடு வழங்கப்பட்டு அதன் பின்னர் விசாரிக்கப்பட்டு பின்னர் தீர்ப்பு வழங்கப்படும் என்றாலும் அந்தப் பதிவேடு வழங்கப்படும் முறையிலிருந்து ஒவ்வொருவனும் தனக்குரிய தீர்ப்பு இப்படித்தான் இருக்கும் என்பதை விளங்கிக் கொள்வான்.

வலது கையில் பதிவேடு வழங்கப்பட்டால் விசாரணை எளிதாக இருக்கும். இடது கையில் பதிவேடு வழங்கப்பட்டால் அவரது நிலை மிக மோசமாக இருக்கும். வலது கையில் வழங்கப்பட்டவர்கள் தமது பதிவேடுகளைப் படிப்பார்கள். தமக்குத் தெரிந்தவர்களையெல்லாம் அழைத்துப் படித்துப் பார்க்கச் சொல்வார்கள். இடது கையில் வழங்கப்பட்டவர்கள், தமது பதிவேட்டைப் படிக்கவும் தயங்குவார்கள். இதற்கான ஆதாரங்கள் வருமாறு:

எவருடைய பதிவேடு அவருடைய வலது கையில் கொடுக்கப்படுமோ அவர் (மகிழ்வுடன்) 'வாருங்கள்! எனது பதிவேட்டைப் படியுங்கள், நிச்சயமாக நான் என்னுடைய கேள்வி கணக்கை திட்டமாகச் சந்திப்பேன் என்று எண்ணியே இருந்தேன்' என்று கூறுவார். ஆகவே அவர் திருப்தியான வாழ்க்கையில் உயர்ந்த சொர்க்கத்தில் இருப்பார். (அல்குர்ஆன் 69:19-22)

ஆனால் எவருடைய பதிவேடு இடக்கையில் கொடுக்கப்பட்டதோ அவன் 'எனது பதிவேடு எனக்குக் கொடுக்கப்படாமல் இருந்திருக்கலாமே! எனது கேள்விகணக்கு எதுவென்பதை நான் அறியவில்லையே! (நான் இறந்த போதே) இது முற்றிலும் முடிந்திருக்கக் கூடாதா? என் செல்வம் எனக்குப் பயன்படவில்லையே! என் செல்வாக்கும் அதிகாரமும் என்னை விட்டு அழிந்து விட்டதே என்று கூறுவான். (அல்குர்ஆன் 69:25-29)

அந்தப் பதிவேட்டில் சிறிய விஷயம் பெரிய விஷயம் என்ற பேதமில்லாமல் அனைத்து விஷயங்களும் பதிவு செய்யப்பட்டிருக்கும்.  இதோ தெளிவான அல்குர்ஆன் வசனம்.

பதிவேடு வைக்கப்படும். அதிலுள்ளதைக் கண்டு குற்றவாளிகள் மிக்க அச்சத்துடன் இருப்பதைக் காண்பீர். மேலும் அவர்கள் 'எங்கள் கேடே! இந்த ஏட்டுக்கு என்ன நேர்ந்தது? சிறியவையோ, பெரியவையோ எதையும் வரையறுக்காமல் இந்த ஏடு விட்டுவைக்க வில்லையே' என்று கூறுவார்கள். இன்னும் அவர்கள் செய்த யாவும் அவர்கள் முன் வைக்கப்படுவதைக் காண்பீர்கள். ஆனால் உம்முடைய இறைவன் ஒருவருக்கும் அநியாயம் செய்ய மாட்டான். (அல்குர்ஆன் 18:49)

அந்தப் பதிவேட்டில் குறிப்பிடப்பட்டவை ஏதோ திடீரென பொய் சாட்சிகள் வைத்து தயாரிக்கப் பட்டவையல்ல. மாறாக மனிதன் இவ்வுலகில் வாழும் போதே அவனுடைய ஒவ்வொரு சொல்லும் செயலும் உடனுக்குடன் பதிவு செய்யப்பட்வைகள். அதுதான் மனிதனிடம் வழங்கப்படும். இதோ அல்லாஹ் கூறுகிறான்.

நிச்சயமாக நாம் மனிதனைப் படைத்தோம். அவனது உள்ளம் அவனிடம் என்ன பேசுகிறது என்பதையும் நாம் அறிவோம். அன்றியும் பிடரி நரம்பைவிட நாம் அவனுக்குச் சமீபமாகவே இருக்கின்றோம். வலப்புறத்திலும், இடப்புறத்திலும் அமர்ந்து எடுத்தெழுதும் இருவர் எழுதிக் கொண்டிருப்பார்கள். கண்காணித்து எழுதக் கூடியவர் அவனிடம் இல்லாமல் எந்தச் செயலையும் அவன் மொழிவதில்லை. (அல்குர்ஆன் 50:17-18)

மனிதனின் ஒவ்வொரு அசைவுகளும், சிறிய செயல்களும், பேசிய சொற்களும், கண் சிமிட்டல்களும், காதில் கேட்டவைகளும், மனதில் தோன்றியவைகளும் என்று ஏகப்பட்டவைகளை பதிவு செய்யப்பட வேண்டுமானால் ஏடுகள் எவ்வளவு பிரமாண்டமானதாக இருக்க வேண்டும். அது எப்படி வலது கையால் பார்க்குமளவுக்கு இருக்க முடியும் என்று விதண்டாவாதம் புரிவோர் கேட்கக் கூடும். ஆனால் ஒரு கிடங்கு (warehouse) நிறையை உள்ள ஆவணங்களை  சின்ன ஞாபகப் தொகுப்பு தகடில் (mini memory card) சேமித்து வைக்க முடியும் என்றால், இவ்வுலகை படைத்து, நியாயதீர்ப்பு நாளின் அதிபதி, ரப்புல் ஆலமீனான அல்லாஹ்வால் அதை விட மேலும் எளிய வழியில் நிச்சயமாக வைத்திருக்க இயலும். இதுவே நம்முடைய ஈமான். 

நாளை மறுமையின் விசாரனை முதன் விசாரனை அவனுடைய தொழுகை பற்றியே இருக்கும் என்று நபி(ஸல்) அவர்கள் கூறினார்கள் என்று பின் வரும் ஹதீஸ் நமக்கு எடுத்துக்காட்டுகிறது.

அடியான் முதன் முதலில் தொழுகை பற்றியே விசாரிக்கப்படுவான். அது சரியாக இருந்தால் வெற்றியடைந்து விட்டான். அது சரியாக இல்லாவிட்டால் அவன் நஷ்டமடைந்து விட்டான். கடமையான தொழுகைகளில் ஏதும் குறைவு இருந்தால், என் அடியானிடம் உபரியான தொழுகை ஏதுமுள்ளதா? என்று கவனியுங்கள் என்று இறைவன் கூறுவான். அந்த உபரியான தொழுகை மூலம் கடமையான தொழுகையில் ஏற்பட்ட குறை நிவர்த்திக்கப்படும். ஏனைய நல்லறங்களும் இவ்வாறே என்று நபி (ஸல்) கூறினார்கள். (அறிவிப்பவர்: அபூஹுரைரா (ரலி), நூல்கள்: திர்மிதி, நஸயி)

இன்னும் நூற்றுக்கணக்கான ஹதீஸ்கள், அல்குர்ஆன் வசனங்கள் மறுமை விசாரனை பற்றி உள்ளன. சிலவற்றையே இங்கு எடுத்துக்காட்டியுள்ளேன். இந்த பதிவில் தவறுகள் இருந்தால் உரிமையோடு சுட்டிக்காட்டுங்கள்.

நாம் என்னவெல்லாம் பேசுகிறோம், வாசிக்கிறோம், யோசிக்கிறோம், எழுதுகிறோம் ஆனால், நாளை மறுமையில் நம்முடைய ஏடு வலது கரத்தில் இருக்க வேண்டும் என்ற ஆசை மட்டும் நமக்கு எழ வேண்டும். கையேடு, குறிப்பேடு என்று ஏகப்பட்ட ஏடுகளை நாம் இவ்வுலகில் பார்க்கிறோம். நாம் செய்யும் எல்லா செயல்களும் நம்முடைய ஏட்டில் உடனுக்குடன் எழுத்தப்பட்டுக் கொண்டே உள்ளது என்பதை நாம் நினைவூட்டிக்கொண்டே இருக்க வேண்டும்.

நாளை மறுமையில்,

• நம் தொழுகை. 

• இறைக்கட்டளையை மறந்து வாழ்ந்தது.

• மனிதர்களுக்கு அநீதி இழைக்கப்பட்டது.

• பிறருடைய மானத்தில் விளையாடியது.

• பெற்றோரை துன்புறுத்தியது.

• சொந்தங்களை பேணாதது.

• வட்டி வாங்கியது, கொடுத்தது.

• சொத்து அபகரிப்பு.

• தொழிளாளர்களுக்கு முதலாளி செய்த அநீதம், 

• முதலாளிக்கு தொழிளாளி செய்த அநீதம் 

என்று நம் ஏட்டில் பதியப்பட்டவைகளில் அனைத்து செயல்களைப் பற்றியும் அல்லாஹ்வின் விசாரனையில் நிச்சயம் உண்டு. 

இவ்வுலகில் ஓர் சிறிய குற்றம் செய்தவன்கூட பலகட்ட விசாரனை, நீதிமன்ற வாயிதா என்று, தான் செய்த தவறை ஒப்புக்கொண்டு தண்டனை பெற்று நீதிமன்றத்தை விட்டு வெளியில் வரும் போது, தன் முகத்தை மூடிக்கொண்டே செல்லுகிறான். நாளை மறுமையில் நம்முடைய மனதில் தோன்றிய கேடுகெட்ட தவறான சிந்தனைகள் பற்றியெல்லாம் நம்மிடம் கொடுக்கப்படும் அந்த ஏட்டில் பதியப்பட்டு, நாளை மறுமையில் விசாரிக்கப்பட்டால், தலைக்குனிவு ஏற்பட்டு முகத்தை மூடிக்கொள்ள ஒரு துணிகூட அந்த மறுமை நாளில் நமக்கு கிடைக்காது. அல்லாஹ் நம் எல்லோரையும் பாதுகாப்பானாக.

நம்முடைய பிறந்த தேதியை நாம் அறிந்திருக்கிறோம். நம்முடைய இறப்பு நாளை யாராலும் அறிய முடியாது. நமக்கு  மரணம் எந்த நிலையிலும் வரும். அந்த மரணம் நம்மை வந்தடைவதற்கு முன், அல்லாஹ்விடம் பாவ மன்னிப்புக் கோருவோமாக. நாளை மறுமையில் நம்முடைய அந்த ஏடு நம் வலது கரத்தில் கிடைக்கபெற்று, நபிமார்கள், நல்லோர்கள், சாலிஹீன்களோடு சொர்க்கத்தில் பிரவேசிக்கும் பாக்கியத்தை வல்லவன் ரஹ்மான் நம் அனைவருக்கும் தந்தருள்வானாக.

மீண்டும் மற்றொரு பதிலில் சந்திக்கலாம்.

தாஜுதீன்

tjdn77@gmail.com

ஏகத்துவத்தின் முதன்மையானவரின் தியாகங்களை நினைவூட்டுவோம்... 1

அல்லாஹ்வின் திருப்பெயரால்...

இஸ்லாமிய மாதங்களில், வருடம் இரண்டு நாட்களை நாம் சங்கை பொருந்திய பெருநாட்களாக கொண்டாடி வருகிறோம். ஷவ்வால் மாதத்தின் முதல் பிறையை நோன்புப் பெருநாளாகவும், துல்ஹஜ் மாதத்தின் பத்தாவது பிறையை ஹஜ்ஜுப் பெருநாளாகவும் நாம் கொண்டாடி மகிழ்கிறோம்.

ஹஜ்ஜுப் பெருநாள் என்றதுமே நமக்கு இரண்டு நபிமார்களைப் பற்றி நினைவிற்கு வரும். அல்லாஹ்வின் உற்ற தோழர் என்ற கருத்தில் அழைக்கப்படும் "கலீலுல்லாஹ்" என்ற பெயருக்கு சொந்தக்காரரான நபி இபுறாஹீம் (அலை) அவர்களும், அவர்களின் அருமை மகனார் நபி இஸ்மாயீல் (அலை) அவர்களும். நம் நினைவில் நிற்கும் அந்த இரண்டு நபிமார்களாவர். அல்லாஹ்வின் அருள்மறையாம் திருகுர்ஆனை கருத்தூன்றி ஆராயும்போது நபி இபுறாஹீம் (அலை) அவர்களுடைய தியாக வாழ்வு பொன்னெழுத்துக்களால் பொறிக்கப்பட வேண்டிய அற்புத வரலாறாகும். நபி இபுறாஹீம் (அலை) அவர்களுடைய வாழ்க்கையில் ஏற்பட்ட சோதனைகளையும் வேதனைகளையும், துயரங்களையெல்லாம் அவர்கள் பொறுமையுடன் சகித்திருந்து இறைவனிடம் பிரார்த்தித்து வெற்றி பெற்ற வரலாற்றையும் நாம் தெரிந்து கொள்ள வேண்டியது கட்டாய கடமையாகும். நபி இபுறாஹீம் (அலை) அவர்களுடைய வாழ்க்கையில் ஏற்பட்ட சோதனைகளைச் சுருக்கமாக பார்ப்போம்.

எல்லாம் அறிந்த இன்றைய காலகட்டத்தில் ஏகத்துவம் ஏகத்துவவாதி என்று சொன்னால் ஒரு ஏளனமாக பார்க்கும்போது, 5,000 ஆண்டுகளுக்கு முன்பு ஏகத்துவத்தை உறக்க சொன்ன உத்தமர் நபி இபுறாஹீம் (அலை) அவர்கள். ஆகவே தான் நாம் ஏகத்துவத்தின் தந்தை என்று நபி இப்றாஹீம் (அலை) அவர்களை அழைக்கிறோம்.

ஏகத்துவத்தை எடுத்துச் சொல்லும் போது ஊரில் உள்ள ஜமாத்து எதிர்த்தால், தெருவில் உள்ள சங்கம் எதிர்த்தால், சொந்தங்கள் எதிர்த்தால், நாம் பொறுத்துக் கொள்வோம், சகித்துக் கொள்வோம். ஆனால் நரகத்துக்கு செல்லாமல் இருக்க நம்முடைய தாய் தந்தையருக்கு ஏகத்துவத்தை எடுத்துச் சொல்லி அவர்கள் அதனை ஏற்காவிட்டால் நாம் எத்தகைய வேதனைப் படுவோம். அது போல் அருமை நபி இப்றாஹீம் (அலை) அவர்கள் தன் தந்தைக்கு ஏகத்துவத்தை எடுத்துரைக்கிறார்கள் வேதனையடைகிறார்கள்.

"என் அருமைத் தந்தையே! மெய்யாகவே உங்களிடம் வந்திராத கல்வி ஞானம் நிச்சயமாக எனக்கு வந்திருக்கிறது ஆகவே, நீங்கள் என்னைப் பின்பற்றுங்கள்; நான் உங்களைச் செம்மையான நேர்வழியில் நடத்துகிறேன். "என் அருமைத் தந்தையே! நீங்கள் ஷைத்தானை வணங்காதீர்கள்; நிச்சயமாக ஷைத்தான், அர்ரஹ்மானுக்கு (அருள் மிக்க நாயனுக்கு) மாறு செய்பவன். "என் அருமைத் தந்தையே! நிச்சயமாக அர்ரஹ்மானிடமிருந்துள்ள வேதனைவந்து உங்களைத் தொட்டு, நீங்கள் ஷைத்தானின் கூட்டாளியாகி விடுவதைப் பற்றி நான் அஞ்சுகிறேன்" (என்றார்). (அதற்கு அவர்) "இப்றாஹீமே! நீர் என் தெய்வங்களை புறக்கணிக்கிறீரா? நீர் (இதை விட்டும்) விலகிக் கொள்ளாவிட்டால் உம்மைக் கல்லெறிந்து கொல்வேன்; இனி நீர் என்னைவிட்டு நெடுங்காலத்திற்கு விலகிப் போய்விடும்" என்றார். (அதற்கு இப்ராஹீம்) "உம்மீது ஸலாம் உண்டாவதாக! மேலும் என் இறைவனிடம் உமக்காகப் பிழை பொறுக்கத் தேடுவேன்; நிச்சயமாக அவன் என் மீது கிருபையுடையவனாகவே இருக்கின்றான்" என்று கூறினார். நான் உங்களை விட்டும், அல்லாஹ்வையன்றி நீங்கள் பிரார்த்திப்பவற்றை விட்டும் விலகிக் கொள்கிறேன்; மேலும் நான் என் இறைவனை பிரார்த்தித்துக் கொண்டே இருப்பேன்; என் இறைவனைப் பிரார்த்திப்பது கொண்டு நான் நிர்ப்பாக்கியவானாகாமல் இருக்கப் போதும்" (என்றார்).  (குர்ஆன் 19:43 – 19:48)

ஏகத்துவத்தை தன் தந்தைக்கு எடுத்து வைத்த இபுறாஹீம் (அலை) அவர்கள் உங்களுக்கு முன்மாதிரி என்று அல்லாஹ் குர் ஆனில் கூறுகிறான். 

“இப்றாஹீமிடமும், அவரோடு இருந்தவர்களிடமும், நிச்சயமாக உங்களுக்கு ஓர் அழகிய முன்மாதிரி இருக்கிறது, தம் சமூகத்தாரிடம் அவர்கள், "உங்களை விட்டும், இன்னும் அல்லாஹ்வையன்றி நீங்கள் வணங்குகிறவற்றைவிட்டும், நாங்கள் நிச்சயமாக நீங்கிக் கொண்டோம்; உங்களையும் நாங்கள் நிராகரித்து விட்டோம், அன்றியும் ஏகனான அல்லாஹ் ஒருவன் மீதே நீங்கள் நம்பிக்கை கொள்ளும் வரை, நமக்கும் உங்களுக்குமிடையில் பகைமையும், வெறுப்பும் நிரந்தரமாக ஏற்பட்டு விட்டன" என்றார்கள். ஆனால் இப்றாஹீம் தம் தந்தையை நோக்கி, "அல்லாஹ்விடத்தில் உங்களுக்காக (அவனுடைய வேதனையிலிருந்து) எதையும் தடுக்க எனக்குச் சக்தி கிடையாது, ஆயினும் உங்களுக்காக நான் அவனிடத்தில் நிச்சயமாக மன்னிப்புத் தேடுவேன்" எனக் கூறியதைத் தவிர (மற்ற எல்லாவற்றிலும் முன் மாதிரியிருக்கிறது, அன்றியும், அவர் கூறினார்); "எங்கள் இறைவா! உன்னையே முற்றிலும் சார்ந்திருக்கிறோம்; (எதற்கும்) நாங்கள் உன்னையே நோக்குகிறோம் மேலும், உன்னிடமே எங்கள் மீளுதலும் இருக்கிறது," (குர் ஆன் 60:4)

(நபியே!) பின்னர் "நேர்மையாளரான இப்றாஹீமின் சன்மார்க்கத்தை நீர் பின்பற்ற வேண்டும்" என்று நாம் உமக்கு வஹீ அறிவித்தோம்; அவர் முஷ்ரிக்குகளில் (இணை வைப்போரில்) ஒருவராக இருந்ததில்லை.(குர் ஆன் 16:123)

நபி(ஸல்) அவர்களுக்கு முன்னால் நம்முடைய தலைசிறந்த மூதாதையர்களில் முன்னணியில் இருப்பவர்கள் தான் நம் அருமை நபி இபுறாஹீம்(அலை) அவர்கள். நமது உயிரினும் இனிய நபி முஹம்மது (ஸல்) அவர்களை நபி இபுறாஹீமின் மார்க்கத்தையே பின்பற்றுங்கள் என்று அல்லாஹ் கட்டளையிடுகிறான். (மேலும் பார்க்க அல்குர் ஆன் 3:95)

நபி இபுறாஹீம் (அலை) அவர்களின் மனைவி அன்னை ஹாஜரா(அலை) அவர்களின் வயது முதிர்ந்த பருவத்தில் அந்த தம்பதியர் அவர்கள் இருவருக்கும் இஸ்மாயில்(அலை) என்னும் அழகிய குழந்தை பிறக்கிறது. (மேலும் பார்க்க அல்குர்ஆன் 14:39) தவமிருந்து கிடைத்த பொக்கிஷமாக நபி இஸ்மாயில்(அலை), இவர்களின் வழித்தோன்றலில் வந்தவர்கள் தான் நம்முடைய ரஹ்மத்துலில் ஆலமீன் அண்ணல் நபி முஹம்மது (ஸல்) அவர்கள். நபி இபுறாஹீம் (அலை) அவர்களின் வழியைப் பின்பற்றுமாறு அல்லாஹ் நபி(ஸல்) அவர்களுக்குக் கட்டளையிடுகிறான் (மேலும் பார்க்க அல்குர்ஆன் 3:95)

நபி இபுறாஹீம் (அலை) அவர்களுக்கு அல்லாஹ்வின் கட்டளை வருகிறது, அன்னை ஹாஜரா (அலை) அவர்களையும், பால்குடி பச்சிளம் குழந்தை நபி இஸ்மாயில் (அலை) அவர்களையும் மக்காவின் மானுட புழக்கம் இல்லாத அந்த வெட்டவெளி பாலைவனத்தில் விட்டுச் செல்லும்படி அல்லாஹ் கட்டளையிடுகிறான். நபி (இபுறாஹீம் அலை) அல்லாஹ்வின் கட்டளைக்கு அடிபணிந்தவர்களாக எவ்வித மறுதலிப்பின்றி அன்றைய மக்கா பிரதேசத்தை விட்டுச் செல்ல ஆரம்பித்து விடுகிறார்கள். அன்னை ஹாஜரா (அலை) அவர்கள் நபி இபுராஹீம் (அலை) அவர்களிடம் கேட்கிறார்கள் “பச்சை பயிர்கள் அற்ற இந்த வரண்ட பூமியில் என்னை விட்டு விட்டு எங்கே செல்கிறீர்கள்” இபுறாஹீம் அலை) அவர்களிடமிருந்து எந்த ஒரு பதிலும் வரவில்லை. அன்னை ஹாஜரா (அலை) மீண்டும் “அல்லாஹ் கட்டளையிட்டானா?” என்றும் கேட்கிறார்கள், அதற்கு இபுறாஹீம் (அலை) அவர்கள் “ஆம் அல்லாஹ் தான் இப்படி விட்டு விட்டுப் போகச் சொன்னான்” என்று பதிலுரைத்தார்கள்.

உடனே அந்த ஈமானியத் தாயிடமிருந்து வெளிப்பட்ட வார்த்தைகள் இஸ்லாமிய வரலாற்றில் என்றும் நினைவில் கொள்ள வேண்டியவை. “அப்படியானால் அல்லாஹ் எங்களைக் கை விடமாட்டான்” என்று தன்னுடைய ஈமானின் உறுதியை கியாம நாள் வரை மக்களும் சொல்லும் விதமாக அந்த தியாகப் பெண்மணி அன்னை ஹாஜரா (அலை) அவர்கள் சொன்னார்கள். பின்னர், அல்லாஹ்வே அன்னை ஹாஜராவுக்கும், நபி இஸ்மாயீலுக்கும் (அலை) உணவளித்தான். ஸஃபா-மர்வா மலைக் குன்றுகளுக்கு இடையே அன்னை ஹாஜரா அவர்கள் தண்ணீருக்காக அங்குமிங்கும் ஓடினார்கள், அல்லாஹ் ஜம்-ஜம் என்ற நீரூற்றை வரவைத்து, இவ்வுலக இறுதி நாள் வரை அன்னை ஹாஜராவின் ஈமானை ஞாபகப்படுத்தும் விதமாக செய்துள்ளான். (மேலும் பார்க்க புகாரி:3364 Volume :4 Book :60)

அன்னை ஹாஜரா (அலை) அவர்கள் அல்லாஹ்வின் மேல் வைத்திருந்த நம்பிக்கை, அவர்களின் ஈமானிய உறுதியில் சிறிதளவேனும் நம்மிடம் ஈமானிய உறுதி அல்லாஹ் மேல் முழு நம்பிக்கையாக இருக்கிறதா என்பதை சிந்திக்க வேண்டும். 

அல்லாஹ்வின் தீனை எத்திவைக்க இஸ்லாமிய பிரச்சாரத்திற்காக ஒரு ஆண் வேறு ஊருக்கு செல்ல நினைத்தால், நம் தாய் தந்தையர்கள், மனைவிமார்களிடம் அன்னை ஹாஜரா ஈமானிய உறுதியுடன் சொன்னது போன்ற வார்த்தையை எதிர்ப்பார்க்க முடியுமா? நபி(ஸல்) அவர்களின் அருமை மனைவி அன்னை ஹதீஜா (ரலி) அவர்கள் சொன்ன ஆறுதல் வார்த்தைகளைப் போன்று நாம் செவியுற முடியுமா?

பொருளாதாரத்தில் இலட்சங்கள் செலவு செய்து கடமையான ஹஜ்ஜுக்கும், உம்ராவுக்கு செல்கிறோம், அங்கே ஜம்-ஜம் நீரையும் பருகுகிறோம் அதனை ஊரில் இருக்கும் சொந்தங்களோடு பகிர்ந்து கொள்ளவும் எடுத்து வருகிறோம், அந்த தருணத்தில் ஈமானிய தாய் அன்னை ஹாஜரா அவர்கள் செய்த தியாகத்தை எண்ணி அவர்கள் பட்ட கஷ்டத்திற்காக என்றைக்காவது நாம் கண்ணீர் சிந்தியிருப்போமா? தன்னுடைய ஈமானின் உறுதியோடு தன் மகனின் உயிரைக் காப்பாற்ற போராடிய போராட்டத்தால் கண்டெடுத்த ஜம்-ஜம் தண்ணீரை ஒரு புனித நீராக மட்டுமே காண்கிறோமே, அதை அல்லாஹ்வுக்காக செய்த தியாகத்தின் ஒரு அத்தாட்சியாக நாம் கண்டு அன்னை ஹாஜரா (அலை) அவர்களின் ஈமானிய உறுதியை நினைவு கூர்ந்து நம்முடைய ஈமானை  வலுப்படுத்த முயற்சித்திருப்போமா?

ஈமானைச் சோதனை செய்து பார்க்க நம்முடைய முன்னோடி இப்றாஹீம் (அலை) அவர்களுக்கு மீண்டும் அல்லாஹ்வின் கட்டளை வருகிறது, தன்னுடைய மகனை அல்லாஹ்வுக்காக அறுத்து பலியிட வேண்டும் என்ற கட்டளை வருகிறது.

வயது முதிர்ந்த பருவத்தில் கிடைத்த பொக்கிஷம், நீண்ட காலம் தன் மனைவியையும், மகனையும் பிரிந்திருந்தார்கள் அல்லாஹ்வின் தூதர் இப்ராஹீம் (அலை) அவர்கள். தன்னுடைய மகனை அறுத்து பலியிட தயாராகிறார்கள் தந்தை இப்றாஹீம் (அலை) அவர்கள், தன் அருமை மகன் இஸ்மாயிலிடம் கேட்கிறார்கள், “அல்லாஹ் உன்னை அறுத்து பலியிட கட்டையிட்டுள்ளான் என் அருமை மகனே உன்னுடைய நிலை என்ன?” அதற்கு இஸ்மாயீல் (அலை) அவர்கள் “எனதருமை தந்தையே அல்லாஹ் ஏவியதை நீங்கள் செய்யுங்கள், என்னை பொறுமைசாலியாக காண்பீர்கள்” என்று தன்னுடைய ஈமானின் உறுதியை உலகுக்கு காட்டிய முன்மாதிரி தியாகத்தின் சுடராகத் திகழ்ந்தார்கள் இஸ்மாயீல் (அலை) அவர்கள்.

நம்முடைய பிள்ளைகள் மார்க்கச் சூழல் கல்வியோடு உலக கல்வி படிக்க அரபு மதர்ஸாவோடு ஒன்றிணைந்த பள்ளிக் கூடத்திலோ அல்லது வெளியூரிலோ அல்லது வெளிநாட்டிலோ படிக்க வைக்க வேண்டும், குறைந்தபட்சம் இந்த தியாகத்தை செய்ய நாம் பல முறை யோசிக்கிறோம், மார்க்க கல்வியை கற்கப்போகும் அந்த பிள்ளையின் எதிர்காலம் என்னவாகும் என்கிற ஒருவித குழப்பத்தோடு தள்ளாடுகிறோம். ஆனால், யூத கிருஸ்தவர்களின் கட்டுப்பாட்டில் உள்ள கல்வித் திட்டமான இந்த அற்ப உலக கல்விக்காக கண்டம் விட்டு கண்டம் தாண்டி படிக்க வைக்க உடனே முடிவு செய்து தன் பிள்ளையின் எதிர்காலம் நன்றாக இருக்கும் என்று நம்பி அனுப்பி வைக்கிறோமே, மார்க்க கல்வியோடு உலக கல்வி பயிலப்போகும் நம் பிள்ளையின் எதிர்காலத்தை அல்லாஹ் சிறப்பாக்கி வைப்பான் என்ற நம்பிக்கை ஏன் நம்மிடன் உறுதியாக வர மறுக்கிறது?

எத்தனை ஆடுகள், மாடுகள் உணவுக்காவும், உலுஹியாவுக்காகவும் அறுத்திருப்போம்? எத்தனை விதமான பொட்டலங்களாக அந்த கறியினை பங்கு வைத்திருப்போம்? அவன் இத்தனை ஆடு / மாடு அறுத்திருக்கிறான், நாம் அதைவிட இரண்டு கூடுதலாக அறுக்க வேண்டும், அவன் மாடு கொடுக்கிறான், நான் ஒட்டகம் கொடுக்க வேண்டும் என்று மனிதர்களுக்காக போட்டி போடுகிறோமே, என்றைக்காவது அந்த தியாகங்கள் செய்த தாய் தந்தையரான இபுறாஹீம் (அலை) ஹாஜரா (அலை) அவர்களின் அருமை மகனார் இஸ்மாயீல் (அலை) ஆகியோரின் ஈமானிய உறுதியையும் அவர்கள் அல்லாஹ் மேல் வைத்திருந்த முழு நம்பிக்கையையும் ஞாபகப்படுத்திக் கொண்டு ஆடு / மாடு / ஒட்டகம் அறுத்து பங்கிட்டு வைத்திருக்கிறோமா? அதன் மூலம் நம்முடைய ஈமானை உறுதிப்படுத்த முயற்சி செய்திருப்போமா? பங்கு வைத்த கறியில் பற்றாக்குறை என்பதற்காக கடையில் கறி வாங்கி உலுஹிய்யா என்று அல்லாஹ்வை ஏமாற்றி மனிதர்களை திருப்திபடுத்தும் நிலையில் அல்லவா நம்முடைய ஈமான் பலவீனமாக உள்ளது என்பதை என்றைக்காவது சிந்தித்திருப்போமா?

அல்லாஹ்வின் கட்டளையை நம்பி ஈமானிய உறுதிமிக்க அன்னை ஹாஜரா (அலை) அவர்கள் போன்றவர்கள் வளர்ப்பில் தான் ஈமானில் உறுதிமிக்க பொறுமைசாலியான இஸ்மாயீல் (அலை) அவர்களை அல்லாஹ்வின் உதவியால் வளர்த்தெடுக்க முடிந்தது. அல்லாஹ்வின் கட்டளைப்படி நடக்கும் ஈமானில் உறுதிமிக்க தாய் தந்தையின் துஆ மற்றும் அவர்களின் வளர்ப்பால் வளர்ந்த பிள்ளைகள் பொறுமைசாலியாக இருந்து இஸ்லாத்திற்காக தியாகம் செய்யும் பிள்ளையாக அல்லாஹ்வின் உதவியால் வாழ முடியும், இதுவே நாம் பெறும் படிப்பினை.

அல்லாஹ்வின் அடியார்களான இபுறாஹீம் (அலை), அன்னை ஹாஜரா (அலை), இஸ்மாயில்(அலை) போன்றோர் தந்தை, தாய், மகன் ஆகியோரின் ஈமானில் நிலைத்த உறுதிக்கு முன்மாதிரியான இப்றாஹீம் (அலை), அன்னை ஹாஜரா (அலை) இஸ்மாயீல் (அலை) ஆகியோரின் வாழ்விலிருந்து படிப்பினை பெற்று நம்முடைய ஈமானை உறுதி படுத்த முயற்சி செய்வோம். நம் சந்ததியரை ஈமானிய உறுதியுடன் இறுதிநாள் வரை நிலைத்திருக்க பக்குவப்படுத்துவோம். அல்லாஹ் நம் எல்லோரையும் ஈமானில் உறுதி மிக்கவர்களாக ஆக்கி அருள்புரிவானாக.

நபி இபுறாஹீம் (அலை) அவர்களது வாழ்வில் ஆரம்பம் முதல் முடிவு வரை ஏற்பட்ட துன்பங்களுக்கும் சோதனைகளுக்கும் நமக்கு ஒரு மகத்தான படிப்பினை இருக்கிறது. அதுதான் எத்தகைய கடும் சோதனை ஏற்பட்டாலும் அல்லாஹ்வை பிரார்த்தித்து பொறுமையுடன் ஐவேளை தொழுகையையும் மேற்கொண்டால் நிச்சயமாக வெற்றி பெறலாம் என்பதே அந்த படிப்பினையாகும்.

ஹஜ்ஜுப்பெருநாள் அன்று பெருநாள் தொழுகை முடித்ததும் கடமை முடிந்தது என்று நினைக்காமல் ஹஜ்ஜுப் பெருநாள் சிந்தனைகளை குறிப்பாக, நபி இபுறாஹீம் (அலை) அவர்களுடைய வாழ்க்கை பாதையினை நெஞ்சில் நிறுத்தி உறவினர், நண்பர்களிடையே ஒருவருக்கொருவர் உபதேசம் செய்ய வேண்டும். 

அல்லாஹ்வின் அடியார்களான இபுறாஹீம்(அலை), அன்னை ஹாஜரா(அலை), இஸ்மாயில்(அலை) போன்றோர் தந்தை, தாய், மகன் ஆகியோரின் ஈமானில் நிலைத்த உறுதிக்கு முன்மாதிரியான இப்றாஹீம் (அலை), அன்னை ஹாஜரா (அலை) இஸ்மாயீல் (அலை) ஆகியோரின் வாழ்விலிருந்து படிப்பினை பெற்று நம்முடைய ஈமானை உறுதி படுத்த முயற்சி செய்வோம்.

لًبّيْكَ اَللّهُمَّ لَبَّيْكَ ، لَبَّيْكَ لا شَرِيْكَ لَكَ لَبَّيْكَ، اِنَّ الْحَمْدَ وَالنِّعْمَةَ لَكَ  وَالْمُلْكَ  لاشَرِيْكَ  لَك

லப்பைக் அல்லாஹும்ம லப்பைக், லப்பைக் லாஷரீ கலக லப்பைக், இன்னல் ஹம்த வன்னிஃ மத லக்க வல் முல்க் லாஷரீக்க லக்.

பொருள்: இறைவா உன் அழைப்பிற்கிணங்கி இதோ வந்தேன், வந்தேன் இறைவா. உனக்கிணை ஏதுமில்லை வந்தேன் இறைவா!! நிச்சயமாக சர்வ புகழும் எல்லா அருட்கொடையும் ஆட்சியும் உனக்கே உரியன. உனக்கேதும் இணையில்லை.

இறைவா! முஹம்மது நபி (ஸல்) அவர்கள் மீதும் அவர்களது கிளையார்கள் மீதும் நல்லருள் புரிவாயாக. நீ இபுறாஹீம் நபி மீதும் அவர்களது கிளையார் மீதும் நல்லருள் புரிந்தவாறு. முஹம்மது நபி (ஸல்) அவர்கள் மீதும்  அவர்கள் கிளையார்கள்மீதும் அபிவிருத்தி செய்வாயாக, நிச்சயம் புகழுக்குரியவனும் தலைமையுடையவனுமாக இருக்கின்றாய். 

நேரம் கிடைத்தால் ஏகத்துவத்தின் தந்தை நபி இப்றாஹீம் (அலை) அவர்களுக்கு அல்லாஹ் கொடுத்த நிஃமத் பற்றிய இந்த மார்க்க சொற்பொழிவை கேளுங்கள்.

M தாஜுதீன்

இது ஒரு மீள்பதிவு

தொகுப்புக்கு உதவிய தளங்களுக்கு ஜஸக்கல்லாஹ் ஹைரா

http://www.readislam.net/labbaik.html 

http://www.youtube.com/watch?v=uaFT4r7eQLk 

http://www.islamkalvi.com/portal/?p=4463 

http://www.adirainirubar.blogspot.com/2013/07/4.html