உணவே உடல் உறுதிக்கு ! 11

அஸ்ஸலாமு அலைக்கும்..

இதற்கு முன்னர் சிறிய கட்டுரையாக என்னுடைய முதல் பதிப்பை பளிச்சிட வைத்து அதற்கு அருமையான கவி வரிகளால் அலகங்கரித்தது அதிரைநிருபர். அதுவே, தேனாக உங்களின் மனதில் இனித்தது தீனோடு. இந்த முறை என்னுடைய அடுத்த முயற்சியாக பதியும் பதிப்பில் ஏழு வகையான சத்துணவுகளை பற்றி மட்டும் குறிப்பிடுகிறேன். 

முதலாவதாக விட்டமின் C :

இந்த வகையான விட்டமின்கள் தோல் , எலும்பு , நரம்பு , எலும்பு பிடிப்புள்ள தசை ஆகியவைகளை வளர்க்கும். வலுவாக்கும். இந்த சத்து தக்காளி, எலுமிச்சை, ஆரஞ்சு, உருளைக்கிழங்கு, மிளகு, இலை வகையில் உள்ள தாவர வகைகளில் அதிகமாக உள்ளது. 

இரண்டாவதாக விட்டமின் B 12:

உடல் உறுதிக்கு தேவையான ஜீவ அணுக்கள் (செல்ஸ்) வளர்ச்சிக்கு தேவையான சத்தாகும். இந்த சத்து எல்லா வகையான இறைச்சிகளிலும் உண்டு. குறிப்பாக ஈரலில் அதிகம் உள்ளது.

மூன்றாவதாக பயோட்டின் :

இந்த சத்து உழைப்பில் சோர்வு ஏற்படாமல் இருக்க உதவுகின்ற புரதச் சத்து. இறைச்சி, காய்கறி, வேர்க்கடலை, பால், வாழைப்பழம், திராட்சை ஆகியவற்றில் நிறைய உள்ளது. 

நான்காவதாக விட்டமின் D :

இது எலும்புகளை வலுவாக்குவதற்கு உதவுகிறது. இந்த சத்து மீன் கொழுப்பிலும், பால், முட்டை ஆகியவைகளில் இருக்கிறது..

ஐந்தாவதாக போலோசின் 

இது இரத்தத்தில் ஏற்படும் கோளாறுகளை சீர் செய்து, உடம்பைச் செம்மைப்படுத்தும். இந்த சத்து ஈரல், இலைவகை தாவர உணவு, பொதுவாக காய்கறிகள், முட்டை, வாழைப்பழம், ஆரஞ்சு ஆகியவைகளில் உண்டு. குறிப்பாக கர்ப்பிணி பெண்கள் இது மாதிரியான உணவுகளை அதிகம் சேர்த்து கொள்வது சிறந்தது .

ஆறாவதாக விட்டமின் K :

இது இரத்த ஓட்டத்தை கட்டுக்கோப்பாக வைத்து கொள்கிறது (Blood Stabilizer) இந்த சத்து கீரைகள், பழங்கள், முட்டை, சோளம், கம்பு, கேப்பை, காலிபிளவர் ஆகியவைகளில் உண்டு. 

நிறைவாக நியாஸின்

இது உண்ணும் உணவை சக்தியாக மாற்றும். இது ஈரல், இறைச்சியில் மிருதுவான பகுதிகள், மீன், மற்றும் சிறு தானியங்களில் உள்ளது..  

- M.Y. முஹம்மத்

தேனே உன் பலன் ! 15

தேனின் பலன்

** உடல்நலம் சிறக்க தேன் **

** உளநலம் சிறக்க தீன் **

பஞ்சாப் லூதியானா பண்ணை பல்கலைக் கழகத்தின் ஓர் ஆய்வாக 1987 ம் வெளிவந்த தகவல்களை இனிக்கும் வரிகளில் இதோ:- 

1. தேனை உடலில் உள்ள கட்டியின் மீது பூசி வந்தால் கட்டி உடைந்து குணமாகும். 

** கட்டி உடைய தேனைப்பூசு **

** வட்டி அழிய தீனைப்பேசு **

2. சிறு காயங்கள், தீக் காயங்கள் மீதும் தேனை தடவலாம். 

** காயங்கள் ஆற தேனைத்தடவு **

** மாயங்கள் தீர தீனைத்தழுவு **

3. நாள்தோறும் தேனை பருகிவந்தால் இதயம் வலுப்படும். கல்லீரல் சம்பந்தமான நோய்கள் குணமாகும். வாய்வுத் தொல்லை நீங்கும். 

** தேனைக் குடித்தால் இதயம் வலுப்படும் **

** தீனைப் படித்தால் இஃக்லாஸ் பலப்படும் **

4. களைப்பு, உடல் சோர்வுகளுக்கும், தொண்டை கரகரப்பு, சளித் தொல்லை ஆகியவைகளுக்கும் தேன் சிறந்த மருந்து. 

** உள்ளச் சோர்வுக்கு தேனை அருந்து **

** நல்ல தீர்வுக்கு தீனே மருந்து **

5. கண்ணில் ஒரு சொட்டு தேன் விட்டால் கண் வலி, எரிச்சல் நீங்கும். 

** தேன் துளி இட்டால் துலங்கும் பார்வை **

** தீன் ஒளி பட்டால் தழைக்கும் வாழ்க்கை **

தேனைப் பற்றி திருக்குர் ஆன் கூறுவது , 

‘‘மலைகளிலும்> மரங்களிலும்> மனிதர்கள் கட்டுபவற்றிலும் கூடுகளை நீ அமைத்துக் கொள்! பின்னர் ஒவ்வொரு கனிகளிலிருந்தும் சாப்பிடு! உனது இறைவனின் பாதைகளில் எளிதாகச் செல்!’’ என்று உமது இறைவன் தேனீக்களுக்கு அறிவித்தான். அதன் வயிறுகளிலிருந்து மாறுபட்ட நிறங்களையுடைய பானம் வெளிப்படுகிறது. அதில் மனிதர்களுக்கு நோய் நிவாரணம் உள்ளது. சிந்திக்கின்ற சமுதாயத்திற்கு இதில் சான்று உள்ளது. (அல்குர்ஆன்: 16: 68,69)

இதை நமதூர் மக்கள் நலன் கருதி எழுதி உள்ளேன் . ஏனென்றால் நமதூரில் அதிகமான விருந்துகள் நடைபெறுகிறது. உணவு அதிகரிப்பதால் உடல் நலம் குறையும். இருந்தாலும் நான் எழுதியிருக்கும் இந்த தகவல் நமதூர் மக்களில் சிலருக்கு உதவலாம். . .

** தேனைப் பருகு **

** தீனில் உருகு! **

- M.Y. முஹம்மத்

சகோதரர் M.Y.முஹம்மத் அவர்கள் எழுதிய இவ்வாக்கத்துடன் நட்சத்திர குறியீடுட்ட இரண்டு அடுக்கு வரிகளில் தேனோடு தீனையும் வைத்தால் இனிக்கும்தானே அதனைத்தான் செய்திருக்கிறோம் !

- அதிரைநிருபர் குழு