அதிரை பள்ளிக்கூடத்தில் இசை நிகழ்ச்சி !!?? 20

அதிரையில் நேற்று ஒரு தனியார் பள்ளியில் ஆண்டு விழா நடைபெற்றது. அந்த நிகழ்ச்சிகளின் காணொளியை இணையத்தில் கண்டபோது அதிர்ச்சி ஏற்பட்டது. காரணம்  சினிமா பாடல்களும், இசை நடன நிகழ்ச்சிகளும், அழகி போட்டிகளும் நடத்தப்பட்டுள்ளது.

இஸ்லாமியர்களால் நடத்தப்படும் பள்ளியில் சீரழிவின் சிகரம் சினிமாவின் ஆதிக்கத்தையும், கேடுகெட்ட நடன காட்சிகளையும், ஆபசத்தை மட்டுமே மையமாகக் கொண்ட அழகி போட்டியையும் ஆதரித்து இளம் பிஞ்சுகளிடம் வக்கிர எண்ணத்தை விளைவிக்கும் இந்த அறியாமை போக்கை வன்மையாக கண்டிக்கிறோம்.

இது போன்ற விழாக்களில் இனிவரும் காலங்களில் இவ்வாறெல்லாம் நடைபெறாமல் இருக்க சம்பத்தப்பட்ட பள்ளி நிர்வாகம் கவனம் செலுத்துவார்கள் என்று நம்புகிறோம் அதனையே வழியுறுத்துகிறோம். வளர்ந்து வரும் இந்த மழலையர் பள்ளிக்கூடத்தின் நலனில் அக்கறை கருதியே இந்த பதிவு.

மீண்டும் நினைவூட்டலுக்காக நான் முன்பு இசை பற்றிய பதிவிலிருந்து முக்கிய பகுதியை மீண்டும் பதிவு செய்கிறேன்.

இசை, பாடல் இவைகள் இரண்டற கலந்த அம்சமாகும். சில இடங்களிலேயே அவை தனித்து நிற்கின்றன. பாடல் இசையின்றிப் பாடப்படுகின்ற பொழுது அனுமதிக்கின்ற இஸ்லாம், அவை இணைகின்றபோது இரண்டையும் வன்மையாகத் தடை செய்வதை அல்குர்ஆன், அஸ்ஸுன்னாவைக் கொண்டு தெளிவு படுத்துகிறது

நபிமொழி அறிவிப்புகள் பலவற்றின் மூலமும் இதனை வன்மையான வார்த்தைகளால் தடை செய்யப்பட்டுள்ளது.  அவற்றுள் சிலவற்றைப் பார்ப்போம்:

 “விபச்சாரம், பட்டாடை, மது, இசைக் கருவிகள் ஆகியவற்றை ஹலாலாகக் கருதக்கூடிய சில கூட்டத்தினர் எனது சமுதாயத்திலே தோன்றுவார்கள்…” என்று நபியவர்கள் கூறினார்கள். (அறிவிப்பவர்: அபூ மாலிக், ஆதாரம்: புகாரி – 5590)

விபச்சாரம், மது போன்றவை ஹராம் என்று தெள்ளத் தெளிவாக தெரிந்த நாம், இவைகளை ஹலாலாகக் கருதுவோருடன் இசையைக் ஹலாலாகக் கருதுபவர்களையும் நபியவர்கள் இணைத்துக் கூறுவதிலிருந்து இசையை அவர்கள் எவ்வளவு மோசமான ஒன்றாகக் கருதியுள்ளார்கள் என்பதைப் புரிந்துகொள்ள முடிகின்றது.  

 “இரண்டு ஓசைகள் சபிக்கப்பட்டவையாகும். சந்தோசத்தின் போது கேட்கும் குழல் ஓசை, சோதனையின் போது கேட்கும் ஓலம்.” என்று நபியவர்கள் கூறினார்கள். (அறிவிப்பவர்: அனஸ் இப்னு மாலிக் (ரழி) ஆதாரம்: பஸ்ஸார் – 1:377-795 பார்க்க: தஹ்ரீமு ஆலாத்தித் தர்ப் – 52)

நபி (ஸல்) அவர்கள் மதீனாவுக்கு ஹிஜ்ரத் வந்த காலம் முதல் மரணிக்கும் காலம் வரை அவர்களோடே இருந்த அனஸ்(ரழி) அவர்களின் மூலம் அறிவிக்கப்படும் இந்தச் செய்தி நமக்குச் சொல்லுவது என்னவென்றால், சந்தோசத்தின் போதுகூட நபியவர்கள் குழல்கள் மூலம் எழுப்பப்படும் ஓசையைத் தடை செய்தது மட்டுமல்லாமல், ஓலமிடும் ஓசையையும் தடை செய்துள்ளார்கள்.  இந்த நபிமொழியின் மூலம் நாம் அறியும் விசயம் என்னவென்றால்,  Wind pipe (குழல்) வகை சார்ந்த அனைத்து இசைக் கருவிகளையும் தடை செய்கிறார்கள். பொதுவாக இசைக் கருவிகளைத் தடை செய்தது மாத்திரமின்றி, ஒரு சில கருவிகளின் பெயர்களைக் குறிப்பிட்டும் தடைசெய்தது, நபியவர்கள் இசையை எவ்வளவு வெறுக்கிறார்கள் என்பதை எமக்குத் தெளிவாக்குகிறது.

 “மது, சூதாட்டம், மேளக் கருவிகளை அல்லாஹ் எனக்குத் தடை செய்துவிட்டான். போதை ஏற்படுத்தும் அனைத்தும் ஹராமாகும்.” என்று நபியவர்கள் கூறினார்கள். (அறிவிப்பவர்: இப்னு அப்பாஸ் (ரழி), ஆதாரம்: அபூதாவூத்-3696, பைஹகீ-10-221)

பொதுவாக இசைக் கருவிகளைத் தடை செய்தது போன்று, இந்த அறிவிப்பில்  மேளம் போன்ற அனைத்துக் கருவிகளையும் அல்லாஹ் தன்மீது ஹராமாக்கியதாகக் கூறுகிறார்கள். அல்லாஹ் எனக்குத் தடை செய்துள்ளான் என்று சொல்லுமளவுக்கு, இசைக் கருவிகளின் தரம் இஸ்லாத்தின் பார்வையில் தாழ்ந்துள்ளது என்பது தெள்ளத் தெளிவாக அறிவைத் தேடும் மக்களுக்கு நிச்சயம் புரியும்.

நாஃபிஉ (ரஹ்) அவர்கள் கூறுகிறார்கள்: ஒரு ஆட்டிடையனின் குழலோசை இப்னு உமர் (ரலி) அவர்களின் காதில் விழுந்தது. அப்போது அவர்கள் தம் இரு காதுகளிலும் விரலை வைத்துக் கொண்டு, அந்தப் பாதையை விட்டுவிட்டு (வேறொரு பாதையின் பக்கம்) வாகனத்தைத் திருப்பினார்கள். அவர்கள், ”(அந்தச் சப்தம்) உனக்குக் கேட்கிறதா?” என்று வினவினார்கள். அதற்கு நான், ”ஆம்” என்றேன். அவர்கள் (சிறிது தூரம்) சென்ற பிறகு, ”எனக்குக் கேட்கவில்லை” என்று நான் கூறினேன். கைகளை (காதிலிருந்து) எடுத்து விட்டு மறுபடியும் அதே பாதைக்கு வாகனத்தைத் திருப்பினார்கள். ”அல்லாஹ்வின் தூதர் (ஸல்) அவர்கள் ஒரு ஆட்டிடையனின் குழலோசையைக் கேட்டபோது, அவர்கள் இதைப் போன்று செய்ததை நான் பார்த்தேன்” என்றும் கூறினார்கள். (நூல்: அஹ்மத் – 4307)

குழலோசையை அல்லாஹ்வின் தூதர் (ஸல்) அவர்கள் வெறுத்துள்ளார்கள் என்பதை இந்த ஹதீஸிலிருந்து புரிந்து கொள்ளலாம்.

ஆயிஷா (ரலி) அவர்கள் கூறுகிறார்கள்: ’புஆஸ்’ எனும் போரின் போது அன்சாரிகள் ஒருவரை ஒருவர் நோக்கிப் பாடிய பாடல்களை இரு அன்சாரிச் சிறுமிகள் என்னருகில் பாடிக்கொண்டிருந்தனர். அப்போது (என் தந்தை) அபூபக்ர் (ரலி) அவர்கள் என்னிடம் வந்தார்கள். (உண்மையில்) அவ்விரு சிறுமியரும் பாடகியர் அல்லர். உடனே அபூபக்ர் (ரலி) அவர்கள், ”இறைத் தூதரின் இல்லத்திலேயே ஷைத்தானின் இசைக் கருவிகளா?” என்று (கடிந்து) பேசினார்கள். இது நடந்தது ஒரு பெருநாள் அன்றாகும். அப்போது அல்லாஹ்வின் தூதர் (ஸல்) அவர்கள், ”(அவ்விருவரையும் விட்டுவிடுங்கள்) அபூபக்ரே! ஒவ்வொரு சமுதாயத்தாருக்கும் பண்டிகை நாள் ஒன்று உண்டு. இது நமது பண்டிகை நாள்” என்று கூறினார்கள். (நூல்: முஸ்லிம் – 1619)

மேற்கண்ட ஹதீஸ் ஆயிஷா (ரலி) அவர்களிடமிருந்தே மேலும் இரு அறிவிப்பாளர் தொடர்கள் வழியாகவும் வந்துள்ளது. அதில் அந்தச் சிறுமியர் கஞ்சிராக்களை அடித்து விளையாடிக் கொண்டிருந்தனர் என வந்துள்ளது.

”ஷைத்தானின் இசைக் கருவிகளா?” என்று அபூபக்ர் (ரலி) அவர்கள் கூறிய போது நபிகள் நாயகம் (ஸல்) அவர்கள் அக்கருத்தை மறுக்கவில்லை. மாறாக, இன்றைக்குப் பெருநாளாக இருப்பதால், இன்றைக்கு மட்டும் விட்டுவிடுங்கள் என விதிவிலக்குத் தருகிறார்கள். இசைக் கருவிகள் ஷைத்தானுடையன என்று அபூபக்ர் (ரலி) அவர்கள் கூறியது தவறு என்றிருந்தால், ”நீர் சொல்வது தவறு; இசைக் கருவிகள் அனுமதியளிக்கப்பட்டவை தாம்” என்று நபிகள் நாயகம் (ஸல்) அவர்கள் அபூபக்ர் (ரலி) அவர்களிடம் கூறியிருப்பார்கள்.

இன்றைக்கு மட்டும் விட்டுவிடு என்று அவர்கள் கூறுவதிலிருந்து மற்ற நாட்களில் இசைப்பது கூடாது என்பதைப் புரிந்து கொள்ளலாம். எனவே இந்த ஹதீஸும் இசையைக் கேட்பது கூடாது என்பதற்கு ஆதாரமாக உள்ளது.

அல்லாஹ்வின் தூதர் (ஸல்) அவர்கள் கூறினார்கள்: ”அல்லாஹ் உங்களுக்கு மதுவையும் சூதாட்டத்தையும் மத்தளத்தையும் தடை செய்துள்ளான். போதையூட்டக்கூடிய அனைத்தும் தடை செய்யப்பட்டவையாகும்.” (அறிவிப்பாளர்: இப்னு அப்பாஸ் (ரழி), ஆதாரம்: அஹ்மத்: 2494)

இப்னு அப்பாஸ் (ரழி) அவர்களின் இந்த ஹதீஸில், இசைக் கருவிகளுள் ஒன்றான மத்தளத்தையும் தடை செய்துவிட்டு, போதையூட்டக்கூடிய அனைத்தும் தடை செய்யப்பட்டுள்ளன என்று, இசைகருவியைப் போதையூட்டும் பொருளாகச் சொல்லப்பட்டுள்ளதை அறிய முடிகிறது. இப்படி இசைக்குத் தடை விதிக்கப்பட்ட ஏராளமான ஹதீஸ்களை ஆதாரமாகக் காட்டிக்கொண்டே போகலாம். அறிவிப்பாளர் வரிசையில் குறைபாடுள்ள ஹதீஸ்களைக் கணக்கில் எடுத்தால், இசைக்கு எதிராக 80க்கும் மேற்பட்ட ஹதீஸ்கள் உள்ளன என்பதைத்  தகவலுக்காக இங்குப் பதிவு செய்கிறேன்.

மேற்கூறப்பட்ட அனைத்து ஆதாரங்களும் இசைக் கருவிகளை முழுமையான வடிவிலே தடை செய்வதை அறிவுள்ளவர்கள் உணர்ந்து கொள்வார்கள்.

நபிகளாருடைய காலத்தில் காணப்பட்ட எத்தனையோ கருவிகள் இன்று பல வடிவம் பெற்று வளர்ச்சி அடைந்து, ஒரு கலையம்சமாக மாறிவிட்டன. ஹதீஸ்களிலே இடம்பெறும் வார்த்தைகள்  நபிகளாருடைய காலத்திலே காணப்பட்ட கருவிகளைக் குறித்துப் பேசினாலும், அதே இசையை ஏற்படுத்தக் கூடிய ஏராளமான கருவிகள் இன்று உபயோகத்தில் உள்ளன. அதே நேரம், இசைக் கருவிகள் என்றுள்ள எல்லாமே அடங்கும் வண்ணம் இடம்பெற்றுள்ள வார்த்தை இவையனைத்தையும் முழுமையாகத் தடை செய்கின்றது என்பதை மேல் சொன்ன ஹதீஸ்களின் அரபி மூல வார்த்தைகளை வைத்துப் புரிந்துகொள்ளலாம். பின் வருபவை அவ்வார்த்தைகள்:

01-معازف அனைத்து இசைக் கருவிகளையும் இது குறிக்கும்.

02-الكوبة-الطبل பறை, பேரிகை, மத்தளம், தவுல், தப்பட்டை போன்ற (Drum) வகைகளை இது குறிக்கும்.

03-ارمزم புல்லாங்குழல் போன்ற காற்று வாத்தியங்கள் (Wind Pipe) வகை சார்ந்த அனைத்தையும் இது குறிக்கும்.

04-القنين வீணை போன்ற நரம்பு வாத்தியங்கள் (Daff) அனைத்தையும் இது குறிக்கிறது.

மேல் சொன்ன குர்ஆன் வசனத்தின் மூலமும் பின் சுட்டிக்காட்டப்பட்ட ஹதீஸ்களில் குறிப்பிட்டுள்ள இசைக் கருவிகளின் பெயர்களை வைத்து அனைத்து விதமான இசைக் கருவிகளும் எல்லா நாட்களிலும் வெறுக்கப்பட வேண்டியவையே என்பதையே அறிவுள்ள அனைவரும் புரிந்துகொள்வார்கள். 

நாம் மேலே குறிப்பிட்டுள்ள ஹதீஸை (முஸ்லிம் – 1619) இசைக்கு ஆதாரமாக ஒரு சிலர் எடுத்துக்காட்டுவார்கள். சிறுமிகள் பெண்கள் பாடிக்கொண்டு தப்ஸ் அடித்துகொண்டிருந்தார்கள்; அபூபக்ர் மட்டுமே அதற்கு எதிர்ப்புத் தெரிவித்தார்; நபிகளார் அதனைத் தடுக்கவில்லை; மாறாக, ”அவர்களை விட்டுவிடுங்கள்” என்று கூறினார்கள்;  இங்கு அபூபக்ருடையை செயலை நாம் எடுப்பதா? நபிகளாருடைய செயலை எடுப்பதா? என்ற நியாமான கேள்வியை வைத்து, இசையை நபிகளார் தடை செய்யவில்லை என்று வாதிடுபவர்களின் வாதத்தின் அடிப்படையில் பார்த்தால், பெருநாள் தினத்தில் மட்டும் சிறுமியர் அல்லது பெண்கள் மட்டுமே அத்துஃப் (الدف) என அழைக்கப்படும் ஒரு பக்கம் தோலால் மூடப்பட்ட கருவியை உபயோகிக்க அனுமதிக்கப்பட்டுள்ளது என்று புரிந்துகொள்வதுதானே அறிவுடமை. இதுவல்லாமல் ஒவ்வொரு நாளும் இசைக் கருவிகளின் தாக்கமுடைய பாடல் ஓசையைக் கேட்பதற்கோ இசைப்பதற்கோ இஸ்லாத்தில் அனுமதியில்லை என்பதை அறிவுள்ள முஸ்லிம்  ஒவ்வொருவருக்கும் புரிந்திருக்கும்.

ஹிஜ்ரி 4ம் நூற்றாண்டில் வாழ்ந்த இமாம் இப்னு ஹஸ்ம் (லாஹிரிய்யா மத்ஹப்வாதி), இமாம் கஸ்ஸாலீ, தற்காலத்தில் வாழும் அறிஞர் யூசுஃப் கர்ளாவீ,  இன்னும் சிலர் இசையைக் கேட்பது மார்க்கத்தில் அனுமதிக்கப்பட்ட காரியம்தான் என்று தங்களுடை புத்தகங்களில் எழுதிவைத்ததன் மூலம், இவற்றைப் படித்தவர்கள், மற்றும் இவர்களைப் பின்பற்றுபவர்கள் இஸ்லாத்தில் இசைக்குத் தடையில்லை என்று ஒரு சில வாதங்களை எடுத்துவைக்கிறார்கள். இது போன்ற மார்க்க அறிஞர்களையும் சூஃபியாக்களையும் பின்பற்றும் கூட்டமே இசைக் கருவிகளை ஹலாலாக்கி வழிகேட்டின் உச்ச நிலைக்குச் சென்றுள்ளார்கள்.

இஸ்லாமியப் புத்தகங்கள் எழுதுபவர்கள் எல்லாம் முஸ்லிம் மார்க்க அறிஞர்கள் என்று சொல்லுவது அறிவுடைமையாகாது, இஸ்லாமியப் பார்வையில் உண்மையான அறிஞர் தன்னுடைய மனோ இச்சைக்கு இடமளிக்காமல், குர்ஆன் மற்றும் நபிகளாரின் சொல், செயல், அங்கீகாரம் இவைகளில் ஆதரப் பூர்வமானவைகளின் அடிப்படையில் ஆய்வு செய்து, இறைவனுக்கும் இறைத்தூதருக்கும் மாறு செய்யாத கருத்துகளைத் தெரிவித்தால் மட்டுமே அவர்களை அறிஞர்கள் என்று ஏற்றுக்கொள்ள முடியுமே தவிர, சொந்தக் கருத்துகளை மார்க்கம் என்று சொல்லும் வேறு எவனையும் மார்க்க அறிஞராக எந்த ஒரு அறிவுடைய முஸ்லிமும் ஏற்றுக்கொள்ள மாட்டான் என்பதுதான் எதார்த்தமான உண்மை. 

ஒரே ஒரு தகவலைச் சொல்லிக்கொள்ள விரும்புகிறோன். தியாகங்கள் பல செய்து வளர்ந்த நம்முடைய மார்க்கத்திற்காக நாம் என்ன செய்கிறோம் என்று சித்தித்துப் பார்க்க வேண்டும். கடந்த 30 வருடங்களுக்கு முன்புவரை நம்முடைய பல சொந்தங்கள் திருக்குர்ஆனின் அர்த்தங்கள் தெரியாமலே இவ்வுலகைவிட்டுப் பிரிந்துவிட்டார்கள். நாம் இருக்கும் இக்காலம் அறிவுப் பொக்கிஷங்கள் நிறைந்த காலம். இக்காலத்தில் நம்முடைய அறிவைப் பயன்படுத்தி, தியாகத்தால் வளர்ந்த இந்த மார்க்கத்தைப் பாதுகாப்பதோடு, இதைப் பிற சமூகத்திற்கு எத்திவைக்கும் வேலை செய்யத் தவறுகிறோம் என்பதைச் சிந்தித்துப் பார்க்க்க் கடமைப் பட்டிருக்கிறோம். இறைவன் நமக்குத் தந்துள்ள இந்தப் பொன்னான நேரத்தை நபிகளார் வெறுத்த அனைத்து இசைக் கருவிகளின் ஓசையிலிருந்தும் விடுபட்டு, நம்முடைய அறிவைக் கொண்டு இந்த்த் தூய மார்க்கத்தை அறியாத மக்களுக்கு எத்திவைக்க ஒவ்வொருவரும் இன்று முதல் முயற்சிக்கலாமே.

சைத்தானின் சூழ்ச்சியால் வந்த இசை என்ற ஒன்றுக்கு இன்று ஒவ்வொரு மனிதனும் அடிமையாகியுள்ளான் என்பதை நான் இங்கு சொல்லித் தெரியவேண்டியதில்லை. இசைக் கருவிகளை நாம் வெறுத்தால், தொடர்ந்து சினிமாப் பாடல்கள், நம் மொழி சினிமா, பிற மொழி சினிமா, சின்னத்திரை, நாடகங்கள் என்று  வீணானவற்றிலிருந்து விடுபடுவோம்; நேர்வழி பெறுவோம். இன்ஷா அல்லாஹ். 

எனவே அல்லாஹ்வுடையவும் அவன் தூதருடையவும் எச்சரிக்கைகளைத் தெளிவாக அறிந்த பின், இஸ்லாத்தை அதன் தூய்மையான வடிவில் அறிந்து பின்பற்ற விரும்பும் ஒவ்வொருவரும் இசை கலந்த அனைத்து அம்சங்களையும் வெறுத்துத் தவிர்த்து, அல்லாஹ்விடத்திலே கூலியைப் பெற்றவர்களாக மாறுவோமாக.

இசைக் கருவிகளும் அதனைச் சார்ந்துள்ள பாடல்களும் வெறுக்கப்பட வேண்டுமா? இல்லையா? என்பதை இதைப் படிக்கும் அன்பு நேசங்களான நீங்களே முடிவு செய்துகொள்ளுங்கள். 

சின்னஞ் சிறுசுகள் தானே என்று சினிமா பாடல்கள் மற்றும் நடன நிகழ்ச்சியை ஆதரிக்க முடியாது. இது போன்ற நிகழ்வுகளை நம் சமுதாயத்தின் அங்கமாக இருக்கும் அதிரை ஊடகங்கள் அவசியம் தவிர்க்க வேண்டும்.

எவ்வளவோ அறிவு சார்ந்த போட்டிகள் அந்த பள்ளி ஆண்டு விழாவில் நடந்திருக்கலாம், ஆனால் இறைதூதரால் தடை விதிக்கப்பட்ட இசைக்கு, முஸ்லீமகளால் நடத்தப்படும் பள்ளிகளில் முக்கியத்துவம் கொடுப்பதை எவ்வகையில் அனுமதிக்க முடியாது.

இது போன்ற தவறை மற்ற பள்ளிகளும் செய்வதை தடுக்கவே இந்த பதிவு.

M.தாஜுதீன்

தொடர்புடைய பதிவுகள்: http://adirainirubar.blogspot.in/2012/07/blog-post.html

2013- 2014 ஆண்டுக்கான மத்திய அரசின் நிதி நிலை அறிக்கை ஒரு –அலசல்! 20

ஏழைக்கும்  எட்டுமா எட்டாவது பட்ஜெட்?

மத்திய நிதியமைச்சர் - வேட்டி கட்டிய தமிழர் பழனியப்பன் சிதம்பரம் அவர்கள் வரும் நிதி ஆண்டுக்கான நிதிநிலை அறிக்கையை பாராளு  மன்றத்தில் சமர்ப்பிக்கும் சடங்கு நிறைவேறியுள்ளது.  இப்போது திரு. சிதம்பரம் அவர்கள் சமர்ப்பித்த பட்ஜெட் அவர் சமர்ப்பிக்கும் எட்டாவது பட்ஜெட் ஆகும் . இதற்குமுன் மொரார்ஜி தேசாய் அவர்கள்தான் எட்டுமுறை பட்ஜெட்டை சமர்ப்பித்து இருந்தார். எட்டாவது பட்ஜெட் என்பதால் “அஷ்டமத்தில் சனி” என்று ஆருடம் சொன்னவர்கள் அனேகம் பேர்.   எட்டு            பட்ஜெட் டுகளை தாக்கல் செய்த மொரார்ஜிக்கு அதுவே கடைசியாக இருந்தது.  அதேபோல் சிதம்பரத்துக்கும் இதுவே கடைசி  பட்ஜெட் ஆக இருக்கவேண்டும் என்றும் ஆசைப்படுபவர்களும் பலர் இருக்கவே செய்கிறார்கள். 

கடைசியாக 2008ல் அவர் பட்ஜெட் தாக்கல் செய்தார். அதன் பிறகு, 5 ஆண்டு இடைவெளிக்குப் பிறகு இப்போதுதான் பட்ஜெட் தாக்கல் செய்துள்ளார். இந்த பட்ஜெட்டை வாசித்து முடிக்கும் நிலையில், 

‘கலங்காது கண்ட வினைக்கன் துலங்கத்து தூக்காங்கடிந்துசெயல்’ என்ற திருக்குறளைக்  கூறினார். ‘மனம் தெளிந்து செய்யத் துணிந்த செயலை தடுமாறாமல், தாமதிக்காமல் செய்க’ என்பது  இதன் பொருள்.  அதோடு இந்த முறை, ‘எல்லா பலமும், நீங்கள் விரும்பும் படையும் உங்களுக்குள்தான் இருக்கின்றன. அதை வைத்து உங்கள் எதிர்காலத்தை உருவாக்கிக்  கொள்ளுங்கள்’ என்ற துறவி  விவேகானந்தாவின் கருத்தையும் சிதம்பரம் சுட்டிக்காட்டினார். ( இப்போது விவேகாந்தர் சீசன்).

பட்ஜெட்டை அலசுகிறேன் என்று சொல்லிவிட்டு ஏதோ உபன்யாசம் செய்கிறேன் என்று படிப்பவர்கள் எண்ணிவிடக்கூடாது. மிகவும் புகழ்ந்து கூறும்படியோ அல்லது மிகவும் தாக்கி அல்லது வருத்தப் பட்டு எழுதும்படியோ இந்த பட்ஜெட்டில் சிறப்பாக எதுவுமில்லை என்பதே பெரும்பான்மையானவர்களின் கருத்து. அதனால்தான் இந்த விமர்சனமும் ஒரு உபன்யாசம் போல் தோன்றுகிறது. ஆயினும் சில சொல்ல வேண்டியவைகள் , நம்ப வேண்டியவைகள், கவனப்படுத்த வேண்டியவைகள் இருப்பதால் எழுதியாக வேண்டி இருக்கிறது. 

விமர்சனத்துக்குள்ளே நுழையும் முன்பாக இன்றைய இந்தியப் பொருளாதாரத்தைப் பிடித்திருக்கிற மூன்று முக்கிய வியாதிகளைப் பற்றி கோடிட்டுக் காட்ட விரும்புகிறேன். அவை நிதிப் பற்றாகுறை, நடப்புக் கணக்குப் பற்றாக்குறை மற்றும் பணவீக்கம் ஆகிய மூன்று வியாதிகளாகும். இவற்றை முறையே ஆங்கிலத்தில் Fiscal Deficit, Current  Account Deficit & Inflation என்று கூறலாம்.  இத்தகைய வியாதிகள் பொருளாதார முன்னேற்றத்தின் தடைக்கற்களாக இருப்பவை. இந்த சூழ்நிலையில் இந்த பட்ஜெட் போடப்பட்டிருப்பது ஒரு கம்பி மேல நடக்கும் வித்தைதான். அதில் விழுந்துவிடாமல்  சிதம்பரம் நடந்து காட்டி இருக்கிறார் என்றுதான் சொல்ல வேண்டும். ஆனாலும் பட்ஜெட்டுக்குப் பிறகு பல அறிவிப்புகள் வரக்கூடும் என்று சூசகமாக சொல்லி இருப்பது இனியும் இவர் விழுவாரா அல்லது எழுவாரா என்பதை மெய்ப்பிக்கும். 

பற்றாக்குறை பட்ஜெட்டுக்கு முக்கிய காரணமாக இருப்பது அரசு தரும் மான்யங்கள். பட்ஜெட்டுக்கு முன்பான பொருளாதார ஆய்வு அறிக்கையில் மான்யங்களின் அளவைக் குறைக்க வேண்டுமென்ற ஒரு கருத்து புல்லின் நுனி போல் தலை  காட்டியது. ஆனால் முழு பட்ஜெட் போடப்படும்போது இந்த முளை விட்ட புல்லின் நுனியை எந்த ஆடோ மேய்ந்துவிட்டது.   

ஏழைகளை மற்றும் நடுத்தர மக்களை பாதிக்கும் புதிய வரிகள் இல்லை என்பது ஒரு சிறப்பான அம்சம் ஆனாலும் இதன் பின் வரவிருக்கும் பாராளுமன்றத் தேர்தலை  மனதில் வைத்து இப்படி செய்து இருக்கலாம். தேர்தலில் வென்ற பிறகு முதுகில் ஏறி சவாரி செய்ய முடியும் என்பதே ஒரு வசதியான வழி முறை. இதுவரை வறுமைக் கோட்டுக்குக் கீழே உள்ளவர்கள் மட்டுமே பயன் அடைந்துவந்த “பீமா யோஜனா” இன்சூரன்ஸ் திட்டத்தை கை மற்றும் ஆட்டோ ரிக்க்ஷா ஓட்டுபவர்கள் மற்றும் தெருக்களில் ஒரு சாக்கைத்தோளில் மாட்டிக்கொண்டு பின்னால் நான்கு நாய்கள் குலைத்துக்கொண்டே வாழ்த்துப்பா பாடி வர காகிதம் பிளாஸ்டிக் ஆகியவற்றைப் பொறுக்குவார்களே அவர்களுக்கும் விரிவு படுத்தி இருப்பது  சற்று கவனத்தைக் கவருகிறது. அவர்களுக்கும் ஓட்டு உண்டு. 

மகளிர் மேம்பாட்டுக்காக இதுவரை இல்லாத வகையில் நூறு கோடி ரூபாய் மூலதனத்தில் பொதுத்துறையில் ஒரு தனி வங்கி அமைப்பு ஏற்படுத்தப் படும் என்ற அறிவிப்பு மட்டும்  மகிழத்தக்கதும் பாராட்டத்தக்கதும் ஆகும். அதே போல் மகளிர் பாதுகாப்புக்காக , உரிமைகளுக்காக  “ நிர்பயா நிதி “ என்ற ஆயிரம் கோடி ஒதுக்கீட்டில்  ஒரு புது நிதி ஒதுக்கீடு. இதன்மூலம், பெண்களுக்கு நிதியுதவி உள்ளிட்ட அனைத்து உதவிகளும் செய்யப்படும். இது பெண்களால் வரவேற்கப்படும்  அதே நேரம் பெண்களின் வாக்கு வங்கியை மனதில் வைத்தே உள்நோக்கத்தோடு  இவை ஏற்படுத்தப் பட்டிருக்கலாமென்ற சந்தேகத்தை தள்ளிவிட இயலாது.    அண்மையில் தேர்தல் வராவிட்டால் இந்த அறிவிப்புகள் கூட வந்திருக்குமா என்பது சந்தேகம்தான். 

வெளிநாட்டிலிருந்து வரும்போது கொண்டுவரப்படும் தங்கத்திற்கு ஆண்களுக்கு ரூ. 50,000 மதிப்பு வரையும், பெண்களுக்கு ரூ.1 லட்சம் மதிப்பு வரையும் சுங்கத் தீர்வை கிடையாது என்பதும் கூட, வாக்கு வங்கியை மனதில் கொண்ட அறிவிப்புதான். ஆனால் இந்த அறிவிப்பு இன்றைய தங்கத்தின் விலைவாசி நிலவரத்தில் யானைப் பசிக்கு சோளப்பொறி கொடுத்த மாதிரிதான். வெளி நாட்டில் வசிக்கும் இந்தியர்களால் இந்த நாட்டுக்கு பலவகையில் பொருளாதார உதவிகள் கிடைக்கின்றன. இங்கிருந்து எதையும் அவர்கள் எதிர்பார்க்கவில்லை. பதிலாக தாங்கள் பல தியாகங்கள் செய்து தேடிய பொருள்களை முதலீடுகளாக இந்த நாட்டுக்குள் கொண்டுவர அரசிடமிருந்து சில  சலுகைகளை மட்டுமே எதிர் நோக்குகிறார்கள். விடுமுறையில் வரும்போது மட்டுமே இங்கு விளையும் உணவுப் பொருள்களையும் குடிநீரையும் பயன்படுத்துகிறார்கள். இப்போது ஏதோ பெரிய சலுகை செய்கிறேன் என்று ரூபாய் ஐம்பதாயிரம் மதிப்புள்ள தங்கம்  கொண்டுவரலாமென்று அறிவித்து இருப்பது நிதியமைச்சருக்கே தங்கம் ஒரு பவுன்  என்ன விலை விற்கிறது – ஒரு நெக்லஸ் செய்வதாக இருந்தால் கூட எவ்வளவு தங்கம் தேவைப்படும் என்கிற அடிப்படைத்  தகவல் கூட தெரியவில்லையோ என்கிற சந்தேகத்தை ஏற்படுத்துகிறது. நிதி அமைச்சரின் குடும்பத்தைப் போல் ஒரு பவுன் ஆறாணாவுக்கு விற்றபோது தங்கம் வாங்கி வருபவர்களல்ல இன்றைய என். ஆர். ஐக்கள். தயவு செய்து தங்கத்தின் இன்றைய சந்தை விலையை நிதியமைச்சருக்கு கடகடகட வென்ற கட்டுத்தந்திகள் மூலம் தெரிவித்தால் நலமாக இருக்கும். 

அருகாமையில் இருக்கும் இந்தியாவை விட ஏழை நாடுகள் கூட தங்களது நாட்டின் தேசிய விமான சேவையை (National Carrier) பயன்படுத்துவோருக்குப் போதிய கட்டண சலுகைகள்  தருகிறார்கள். ஆனால் கட்டணமுன் அதிகம், சுரண்டலும் அதிகம், நம்பி பயணம் செய்தால் நடுவழியில் நிற்க நேரிடும் என்கிற நிலை  இந்திய விமான நிறுவனங்களுக்கு ஆண்டாண்டுகளாக சொந்தமாகிப் போன சுரணையற்ற நிலை. இதனால் வெளிநாடு வாழ் இந்தியர்கள் படும் வேதனைகள் நீங்க இந்த பட்ஜெட்டில் எந்த வழியும் சொல்லப்படவில்லை. கோரிக்கைகள் செவிடன் காதில் ஊதப்பட்ட சங்காகவே இருக்கின்றன.  

வருமானவரியின் உச்சவரம்பு உயர்த்தப்படுமென்று கிரெடிட் கார்டு மற்றும் செல்போன் வைத்து பிச்சை எடுப்பவர்கள் கூட எதிர்பார்த்து இருந்தார்கள். ஆனால் அவர்களுக்கு ஒரு பட்டை நாமம் சாத்தி ஒரு கோவிந்தா  போட்டுவிட்டார் நிதியமைச்சர்.  இதனால் சம்பளம் பெறும் இடத்திலேயே வருமானவரி பிடித்தம் செய்யப்படும் ( Deduction at Source)  பல அரசு ஊழியர்கள் பாதிக்கப் படுவார்கள். இன்றைய விலைவாசியின் உயர்வில் மிச்சப் படும் வருமானம் என்பது மிகவும் குறைவாக இருக்கும். இந்த நிலையில் வருமானவரியின் உச்சவரம்பை அதிகரிக்காமல் இருப்பது அதிர்ச்சியான செய்தி. ஆனாலும் கசப்பு மருந்தை தேன் கலந்து ஊட்டுவதுபோல் இரண்டு லட்சத்திலிருந்து ஐந்து லட்சம்வரை வரி கட்டுவோருக்கு Rs. 2000/=  ரூபாய் வரிச்சலுகை அதுகூட வரியை வரவில் வைப்பது என்கிற முறையில் ( Tax Credit ) அளிக்கப்படும் என்பது தேள் கடித்த இடத்தில் விஷத்தை இறக்க ஊசி போடாமல் சுண்ணாம்பு தடவுவது போன்றது. 

ஒரு கோடி ரூபாய்க்கும் அதிகமாக சம்பாதிக்கும் பெரும் பணக்காரர்கள் (Super Rich ), ரூ.10 கோடிக்கு அதிகமாக வருவாய் பெறும் நிறுவனங்களுக்கு 10% கூடுதல் வரி (Surcharge ) விதிப்பதன் மூலமும், உயர்குடியினர் பயன்பாட்டுப் பொருள்களுக்கு வரி உயர்வும் பெரிய அளவில் வருவாய் ஈட்டித் தருவதாக இருக்குமா என்பது சந்தேகம்தான். பத்து லட்சம் சம்பாதிப்பவனுக்கும், பத்து கோடி சம்பாதிப்பவனுக்கும் வரிவிகிதம் ஒன்றுபோல தோன்றுவது ஒரு முரணாகத் தெரிகிறது. 

ஒருவருடைய பரம்பரை சொத்துக்களை தானமாக வழங்கினால் அதற்கு வரியில்லை என்று அறிவித்து இருப்பது ஒரு சிறப்பம்சமாகவே தென்படுகிறது. ஆனாலும் யாருக்கு தானமாக வழங்க வேண்டுமென்ற வழிகாட்டுதல் வேண்டும். இதனால் பினாமிகள் உருவாக வாய்ப்பு இருக்கிறது. 50 லட்சத்திற்கு மேல், எந்த ஒரு அசையாச் சொத்தை ஒருவர் விற்பனை செய்தாலும், இனி, 1 சதவீத வரி செலுத்த வேண்டும். இந்த வரி விதிப்பில், விவசாயம் சார்ந்த விளை நிலங்களுக்கு மட்டும், விதி விலக்கு உண்டு.  இது ஒன்றே விவசாயத்துக்காக மத்திய அரசு செய்த கடப்பாடு. 

தூத்துக்குடி வெளிப்புற துறைமுகம் ரூ.7,500 கோடியில் அமைக்கப்படும் என்ற அறிவிப்பு தமிழ்நாட்டு மக்களுக்கு குறிப்பாக சேது சமுத்திரத் திட்டத்தை சூழ்ச்சியால் இழந்து நிற்கும் மக்களுக்கு  மகிழ்ச்சி தந்தாலும், இதனை அரசு - தனியார் பங்கேற்பு (பிபிபி) மூலம் நிறைவேறும் திட்டம் என்கிற அறிவிப்பையும் பார்க்கிற போது ஏனோ கட்டுச்சோற்றுக்குள் எலியையும் கூடவே வைத்துக் கட்டும் கதை நினைவுக்கு வருகிறது.   தனியார்  நிர்ணயிக்கப்போகும் மிகையான கட்டணமும், பயன்பெறப்போகும் "பினாமி'களும் கண்முன்னே தோன்றி அந்த மகிழ்ச்சியில் திகிலை கலக்கிறது. நமதூர் மொழியில் சொன்னால் ஈரக்குலை நடுங்குகிறது. 

கல்விக்கு ஒதுக்கப்படும் ரூ.65,867 கோடியில்  அனைவருக்கும் கல்வித் திட்டத்துக்காக ரூ.27,258 கோடியும், தொடர்கல்வித் திட்டத்துக்காக ரூ.3,983 கோடியும் ஒதுக்கப்படுகிறது. இப்படி ஒதுக்கப்படுகிறது என்கிற பட்ஜெட்டின் வார்த்தைகளுக்கு உண்மையில் வேறு அர்த்தம் இருக்குமென்று ஆணித்தரமாக நம்பலாம். கல்விக்கான சேவை வரி 3% இன்னும் ஓராண்டுக்கு மட்டும் தொடரும் என்கிற அறிவிப்பு கல்வி வணிகக் கொள்ளையர் வயிற்றிலேயே பால் வார்க்கும். பெற்றோர்களுக்கு இதனால் பெரும்பயன் வரப்போவது இல்லை. இளைஞர்களுக்காக, 1,000 கோடி ரூபாயில், திட்டம் தீட்டப்பட்டுள்ளது. திறமைகளை மேம்படுத்தும் வகையில், 10 லட்சம் இளைஞர்களுக்கு பயிற்சிகள் அளிக்கப்பட்டு, முடிவில், தலா, 10 ஆயிரம் ரூபாய் வரை வழங்கப்படும் என்கிற அறிவிப்பு நலம் பயக்குமென்று நம்ப வேண்டிய அறிவிப்பு. செயல்படுவதைப் பொறுத்து இதை விமர்சிக்கலாம். 

பொதுமருத்துவத்தின் முக்கியத்துவம் கருதி, ரூ.37,300 கோடி (24.3% அதிகம்) ஒதுக்கினாலும், இதில் மருத்துவக் கல்வி, பயிற்சிக்காக ரூ.4,727 கோடி மட்டுமே ஒதுக்கப்படுகிறது. மருத்துவர்களை அதிகம் உருவாக்க வேண்டிய நிலையில், அதற்குக் குறைவாக நிதிஒதுக்கி இருக்கிறாரே, என்று நாம் கவலைப்பட வேண்டியதில்லை. செட்டிநாடு மெடிகல் மிஷின், எஸ். ஆர்.எம். மீனாட்சி, அப்பல்லோ, மலர் , எஸ்கார்ட் நிறுவனங்கள் எல்லாம் கோடிக்கணக்கில் முதல் போட்டு கொள்ளையடிக்க வேறு என்னதான் வழி ?

புதிதாக நெல் உற்பத்தி செய்வதன்  மூலம்   அசாம், பிகார், சத்தீஸ்கர், மேற்கு வங்கம் ஆகிய மாநிலங்களில் அரிசி உற்பத்தி மேம்பாட்டுக்காக ரூ.1,000 கோடி ஒதுக்கப்பட்டு இருக்கிறது. தற்போது  அரிசி விளைவித்துக் கொண்டிருக்கிற , ஆனால் தண்ணீர் முதலிய காரணங்களால்    உற்பத்தி பாதிக்கப்பட்டு இருக்கிற  தமிழகம் உட்பட்ட மாநிலங்களில்  ("ஒரிஜினல் கிரீன் ரெவல்யூஷன் ஸ்டேட்') விவசாயிகள் மாற்றுப்பயிர் சாகுபடிக்காக ரூ.500 கோடி ஒதுக்கி இருக்கிறார். அதாவது காவிரி டெல்டாவில் இருக்கும் விவசாயிகளை காவிரி நீரை எதிர்பார்க்காமல் மாற்றுப் பயிருக்கு மாறிவிடுங்கள் என்று மறைமுகமாக சொல்வதாகவே இது அமைகிறது. அதாவது அரிசி விளைவிக்க புதிய மாநிலங்கள் எற்கனவே அரிசி விளைவிக்கும் மாநிலங்களுக்கு மாற்றுப் பயிர் கோஷம். இனி நமது  விவசாயிகள் நெல்லுக்கு பதிலாக  கஞ்சா செடி பயிரிடலாமா ? என்றுதான் கேட்கவேண்டும். ‘மாடுகட்டிப் போரடித்தால் மாளாது என்று யானை கட்டிப் போரடித்த நாடு’ என்றும், ‘சோழ நாடு சோறுடைத்து’ என்றும் பேசிய பெருமைகள் இனி பழங்கதையாகிவிடும். நெல் விளைவித்த பெருமை மிக்க மாநிலங்களுக்கு தண்ணீரைப் பெற்றுத்தர அரசியல் நந்திகளுக்கு விவசாயத்தை பலி கொடுக்கச் சொல்லும்  அரசை என்ன சொல்ல?

அதே நேரம் விவியாசாயிகளின் கடன்  வசதிகளை மேம்படுத்த ரூ.  7000 கோடிகளை ஒதுக்கி இருப்பது ஒரு நல்ல அம்சம்தான். ஒதுக்கீடு மட்டுமல்ல பங்கீடும்  நாம் முக்கியம் கவனம் செலுத்த வேண்டியதாகும். இடைத்தரகர்களை ஒழித்து நெல்லுக்கு இறைத்த நீர் புல்லுக்கும் பொசியாமல் பார்ப்பது அரசு நிர்வாகங்களின் தலையாயப்   பணி.  விவசாய நாட்டில் விவசாயிகள் தற்கொலை! விபரம் தெரிந்தவர்கள் இதைப் பார்க்கிறார்கள் வேடிக்கை! 

நாட்டுடைமையாக்கப் பட்ட வங்கிகளுக்கு இன்னும் அதிக நிதி கொடுத்து அவைகளை ஊக்கப்படுத்தும் முறையும் அறிவிக்கப் பட்டு இருக்கிறது. இதை வரவேற்கிற நேரத்தில் வங்கிப் பணிகள் செயல்பட முடியாத குக்கிராமங்களில் அஞ்சல் அலுவலகங்களை ஓரளவுக்கேனும் வங்கிகளின் சேவைகளை செய்யும் வண்ணம் மாற்றி அமைப்பது கிராமியப் பொருளாதாரம் வளர உதவும் என்பது சில வல்லுனர்களின் கருத்து.  இதற்காக ஒரு சிந்தனையும் கொஞ்சம்  நிதியும் ஒதுக்கி இருந்தால் நலமாக இருந்து இருக்கும். நாட்டின் அனைத்து வங்கிகளிலும் ATM வசதிகள் கட்டாயமாக செய்து தரப்படுமென்று சொல்லப்பட்டிருக்கிறது. இந்த வசதியை சில குறிப்பிட்ட ஊர்களில் அல்லது பகுதிகளில் பெண்களுக்கு மட்டும் என்றும்  அமைத்துக் கொடுத்தால் சிறப்பாக இருக்கும்.   

இராணுவத்துக்கு வழக்கம் போல் கூடுதலாக நிதி ஒதுக்கி இருக்கிறார்கள். இரண்டு லட்சம் கோடி ரூபாய் என்பது கடந்த ஆண்டை விட 14% அதிகம். ஹெலிகாப்டர்கள் எல்லாம் இத்தாலியில் இருந்து வாங்கிய விவகாரத்தில் பாதுகாப்புத்துறை  சிக்கி இருக்கும்போது ஒரு வருடம் இராணுவத்துக்குரிய நிதி  ஒதுக்கீட்டை குறைத்துக் கொண்டு நதிகளை  இணைப்பதற்கு அந்தப் பணத்தில் ஒரு பகுதியை ஒதுக்கினால் தலை போய்விடாது. இராணுவத்துக்கு ஒதுக்கும் பணத்தில் பெரும்பகுதி பல புதிய பணக்காரர்களை உருவாக்குகிறது என்பது தலை நகரில் ஊர் அறிந்த ரகசியம். 

அன்னிய நிறுவன முதலீடு (எப்.ஐ.ஐ.) அன்னிய நேரடி முதலீடு (எப்.டி.ஐ.) என்றால் என்ன என்பதற்கு இந்த பட்ஜெட் வரையறை செய்திருக்கிறது. பத்து விழுக்காட்டுக்கும் அதிகமான முதலீடு இருந்தால் அதை அன்னிய நேரடி முதலீடு என்று சொல்ல வேண்டும் என்கிறார் திரு. சிதம்பரம். ஆனால்,  இந்த வரையறை, இவர்கள் இடும் முதலீட்டுக்குத்தான். பெரும்  சலுகைகளை இந்த அறிவிப்பு  இன்னும்  வரையறுக்கவில்லை.  இதைப் பற்றி எந்த திட்டமும் கட்டுப்பாடும் சொல்லப்படவில்லை. ஒருவேளை, தட்டச்சு செய்யும்போது விட்டுப் போய்விட்டதோ?

புதிய முதலீடுகளை ஊக்குவிக்க வரிச்சலுகைகள் , அந்நிய முதலீடுகளைப் பெறுவதற்கு SEBI  என்கிற பங்குச் சந்தை சட்டங்கள் திருத்தப்படும் என்பவை அந்நிய  முதலீட்டை ஈர்ப்பதற்காக எடுக்கப்பட்டுள்ள நடவடிக்கைகள். உண்மையில் அந்நியப் பணம் வந்தால் மகிழ்ச்சியே. அதற்கு மாறாக ஊழலில் திரட்டிய பணம் முதலீட்டு முகமூடி போட்டு நாட்டின் உள்ளே வந்தால் பரி நரியான கதையாகிவிடும்.  

மேலும் சிறு குறு  தொழில்களுக்கு மூன்று ஆண்டுகளுக்கு சிறப்பு சலுகைகள் வழங்கப் படுமென்றும் இவைகளுக்கு மூன்று ஆண்டுகளுக்கு சிறப்பான வரிச்சலுகைகள் வழங்கப் படுமென்றும் சிதம்பரம் சொல்லி இருக்கிறார். தொழில்கள் செய்வதற்குத் தேவையான மின்சாரம் பற்றி வாய் திறக்கவில்லை. தொழிற்சாலை என்று போர்டு மாட்டி மின்சாரம் இல்லாவிட்டால் இவர்கள் தரும் சிறப்புச் சலுகைகளை மட்டும் வைத்துக் கொண்டு என்ன செய்ய முடியும்? 

நாடெங்கும் 294 பேரூர்களில் பண்பலை வானொலி நிலையங்கள்( FM Radio Stations) அமைப்பதற்கு தனியார் துறைக்கு அனுமதி அளிக்கப் படுமென்ற அறிவிப்பு வந்துள்ளது. இதனால் என்ன பெரும் பயன்  வந்துவிடப் போகிறது என்று புரியவில்லை. ஊடகவழி தில்லுமுல்லுகள்,  இருப்பதை இல்லை என்பது , ஒன்றுமில்லாததை ஊதிப் பெரிதாக்கும் ஊடக போதையையே இது அதிகரிக்கும் வாய்ப்பு இருக்கிறது. பண்பலை நிலையங்கள் அமைப்பதற்கு பதிலாக பண்பாட்டு அலை பரவும் முயற்சியில் நாடெங்கும்  ஓட்டு மொத்தமாக மதுக்கடைகளை ஒழித்தால் உண்மையிலேயே பண்பாட்டுக்கு உதவியதாக இருந்து இருக்கும்.   

உள் கட்டமைப்பு வசதிகள் மேம்பாட்டுக்காக 55 லட்சம் கோடி ரூபாய் ஒதுக்கி இருக்கிறார். இது வரவேற்கத்தக்கது. தவிரவும் தனியார் முதலீடுகளை உள்கட்டமைப்பு வசதிக்காக  47% வரை பெறவும் திட்டமிட்டு இருப்பதாக அறிவித்து இருக்கிறார். இது வளர்ச்சிப் பாதைக்கு வழி வகுக்கும். அதே நேரம் உள் கட்டமைப்பு வசதிகள் என்பதை முதலில் ஆரம்ப சுகாதார வசதிகளை ஏற்படுத்துவதில் ஆரம்பிக்க வேண்டும். மக்கள் அதிகம் நடமாடும் புகைவண்டி நிலையங்கள், பேருந்து நிலையங்களில் மாற்றுத் திறனாளிகளும் பயன் படுத்தும் வகையில் முதலில் கழிப்பபிடங்களைக் கட்டுவதற்கு செயல் திட்டம் வேண்டும்.  எத்தனை பட்ஜெட் போட்டாலும் எத்தனை கோடிகளைக் கொட்டினாலும் பட்டுக்கோட்டை போன்ற பெருநகர பேருந்து நிலையங்களில்  பேருந்துகள் நிற்கும் இடத்துக்கு அருகில் திறந்த வெளியில் வரிசையாக நின்று கொண்டே சிறு நீர் கழிக்கும் முறைக்கு ஒரு சீர் திருத்தம் வராமல் கட்டமைப்பு வசதிகள்- தனியார் முதலீடு – கோடிகள் ஒதுக்கீடு என்பதெல்லாம் சொரிந்தால் கிடைக்கக் கூடிய சுகம். சொரியச்சொரிய புண் ஆகிப் போகும் ரணம்.  

இவை எல்லாம் போக, புகையிலைப் பொருட்கள், கார்களின் உற்பத்தி வரி உயர்வு, செல் போன்களில் ரூபாய் 2000/= க்கு மேல் விலை உள்ளவைகளின் உற்பத்திவரி ஏற்றம் ஆகியவை அவற்றின்  விலைகளை உயர்த்தும். குளிர் பதனம் செய்யப்பட்டுள்ள உணவகங்களில் ஆறு சதவீதம் சேவை வரி இனி புதிதாக விதிக்கப்படும். இத்தகைய உணவகங்களில் ஏற்கனவே இரண்டு இட்லி ரூபாய் 25/= க்கு விற்கப்படுகிறது. இத்துடன் இந்த சேவை வரியும் சேர்ந்தால் இந்த உணவகங்களில் இட்லி சாப்பிடுபவன் சட்னியாகிவிடுவான். 

பட்ஜெட் என்பது ஒரு வருடத்தின் வரவுக்கும் செலவுக்கும் உள்ள கணக்கு மட்டுமே. இந்தக் கணக்கில் அரசும் நிதியமைச்சரும் மூல வளங்களை எப்படி பங்குவைத்து எவற்றிற்கு முக்கியத்துவம் கொடுத்து நிர்வாகிக்கப் போகிறார்கள் என்ற அறிவுப்புகளின் தொகுப்பே . அந்த வகையில் இந்த பட்ஜெட்டில் சில வானவேடிக்கைகள் காட்டப் பட்டு இருக்கின்றன. தேர்தலை மனதில் வைத்து சில பட்டாசுகளையும்   ப.சிதம்பரம் வெடித்து இருக்கிறார். ஆனால் பணவீக்கம், விலைவாசி உயர்வு, எண்ணை விலையில் எதிர்பாராத நள்ளிரவு உயர்வுகள், வேலை  வாய்ப்பு, புதிய முதலீடுகள், நாட்டின் சொத்துக்களின் சூறையாடலை ஒழிக்கும் திட்டங்கள், விவசாயத்தின் மறுமலர்ச்சி, தொழில்களை ஊக்கப்படுத்துதல் ஆகியவற்றிற்கு உருப்படியான திட்டங்கள் எதுவுமில்லை. பட்ஜெட் டை பார்த்த உடன் மக்கள் மனம் மகிழும்படியான அல்லது நிமிர்ந்து உட்கார்ந்து சபாஷ் ! பேஷ்! பேஷ் ! ரெம்ப நன்னா இருக்கு என்று சொல்லும்படியாகவோ ஒன்றுமில்லை. 

இந்த பட்ஜெட்டில் நதிநீர் இணைப்புக்கு ஒதுக்கீடு இருந்திருந்தால், மின்சாரத்திட்டங்களுக்கு ஒதுக்கீடு இருந்திருந்தால், ரியல் எஸ்டேட்டில் வளைத்துப் போடப்பட்ட விதவை நிலங்களுக்கு வாழ்வளித்து இருந்தால், மேம்படுத்தப் பட்ட  சுகாதார வசதிகளுக்கான அறிவிப்புகள் இருந்திருந்தால்,     வேலை வாய்ப்புக்களுக்கு வழிவகைகள் செய்யப்பட்டிருந்தால், அரசு கடன் வாங்கும் அளவுக்குப் போகாமல்  கையாண்டிருந்தால், வெளிநாடு வாழ் இந்தியர்கள் நாடு திரும்பும்போது அவர்களுக்கு உதவ ஒரு நல்ல திட்டம் அறிவித்து இருந்தால், அந்நிய செலாவணியின் கையிருப்பை அதிகப்படுத்த ஒரு திட்டம் தந்து இருந்தால்  நிச்சயமற்ற எண்ணெய் விலையை  நிலை நிறுத்தும் திட்டமொன்றை முன்னுரிமை கொடுத்து அறிவித்து இருந்தால் என்ன இருந்தாலும் செட்டியார் வீட்டுப் பிள்ளை அதிலும் படிச்ச பிள்ளை என்று பாராட்டி இருக்கலாம். துரதிஷ்டவசமாக அப்படி ஒன்றும் இல்லை. இது வேதனை. இந்த நாட்டுக்கு இன்னும் தொடரும் சோதனை.    சடங்கு முடிந்தது. ஆனால் சவால்கள் முடியவில்லை. 

இபுராஹீம் அன்சாரி

கன்னிப்பொழுது...! 9

பெரு வெடிப்பின்  சீற்றம்
குறைந்து  அமைதி தவழ்ந்த
அந்த புதிய பொழுதுகளின்  போது
தன்  ஆளுமையை  அழுத்தமாக
அனைத்திலும் பதித்தது சூரியன்...!
ஆனால்  ஒன்றை  தவிர...
அன்றுதான்  அதற்கும்
சூரியனுக்கும்  முதல் பரிச்சியம் !
அது ?....

கோபம்  தனந்த  சூரியன்
உக்கிரமாக  உதித்தது
அது மட்டும்
பணியவில்லை ! திமிறியது !
 சூரியனின் உக்கிரம் உச்சத்தை  தொட
 அது  கருகியதே  அன்றி   தன்
இயல்பை  தொலைக்கவில்லை !

சூரியன்  மேகத்தை
தூதிற்கு  அழைத்தது
மேகத்தினூடே  மெலிதாய்
நுழைந்து  தன்  ஜாலத்தை
அதனிடம்  காட்டியது !
அந்தோ ! பரிதாபம்  அதற்கும்
மயங்கவில்லை ! அதன்
இயல்பை தொலைக்கவில்லை  !

தளராத சூரியன்
துணைக்கு  மரம்
செடிகளின் இலைகளை
 இணைத்துக்கொண்டு
அதன் மீது
மென்மையாய்  படர்ந்தது !
ஆவலாய்  சூரியன்  காத்திருக்க
அதுவோ
அன்புடன்  நிராகரித்தது !

மனம் வெதும்பி  சூரியன்
நகர  ஆரம்பிக்க
உடன் பிறப்பான
நிலா   சோகத்தின்  காரணம்   விசாரித்தது !
சூரியன்  தன்  முயற்சியை
எடுத்துரைக்க   ஆவலாய்
நிலா  கேட்டது !

நிலா  சூரியனிடம்  சொன்னது
நீ சென்று வா
நான்  உன் அன்பை அதனிடம்
சேர்கிறேன்  என  கூறி
சூரியனின்  ஒளி  எனும்
அன்பை பெற்று
புதிதாய்  ஒரு
வெண்கலப்  பொழுதை
பாய்ச்சியது
அட்டகாசமாய்
மொட்டு  வெடித்து
சிதறி  இதழ்களை
விரித்து  சிரித்தது
தாமரை !!!!!!!

-Harmys

சிரியா போராளி - அப்துல் காதர் (ஹாஜி மர்ரா) - காணொளி செய்தி 6

2011 மார்ச் மாதம் முதல் அலவி இனத்தின் வம்சாவழி சிரியாவின் அதிபர் பஸ்ஸார் அல் அசாதுக்கு எதிராக சிரியா மக்கள் அமைதி வழியில் போராட்டம் நடத்தினார்கள், பிறகு அந்த போராட்டம் ஆயுத போராட்டமாக மாறியது.

சிரியாவில் ஓரு சாமான்ய குடிமகன் ஆயுதம் எடுக்க காரணம் என்ன? இதோ சிரியா போராளிகளின் ஓர் தலைவர் பற்றிய காணொளி செய்தி தொகுப்பு.

ஊடகத்துறையில் நம்மவர்களின் பங்களிப்பை அதிகப்படுத்தவே இதுபோன்ற காணொளி செய்திகளை எங்களால் முடிந்த முயற்சிகள் செய்து வெளியிடுகிறோம். நம்முடைய இந்த முயற்சி ஊடகத்துறையில் ஆர்வமுள்ள பிறரை ஊக்கப்படுத்தும் என்று நம்புகிறோம்.

யா அல்லாஹ்! சிரியா முஸ்லீம் மக்களுக்கு பொறுமையை வழங்குவாயாக…

யா அல்லாஹ்! பெற்ற தாய் தந்தையர்கள், பிள்ளைகள் இழந்து வாடும் சிரியா மக்களுக்கு மன நிம்மதியை அளித்தருள்வாயாக..!

யா அல்லாஹ்! அவர்களுக்கு நல்லருள் புரிவாயாக..!

யா அல்லாஹ்! இந்த அசாத் பஷாரை தண்டிப்பாயாக…! உன்னுடைய சாபத்தை அவன்மீது உண்டாக்குவாயாக…!

யா அல்லாஹ்! சிரியாவில் குர்ஆன் சுன்னாவை நிலைநாட்ட அஹ்லுல் சுன்னத்துவல் ஜமாத்து உம்மத்திற்கு வெற்றியை தந்தருள்வாயாக...!

அதிரைநிருபர் பதிப்பகம்

இஸ்லாமியப் பொருளாதாரச் சிந்தனைகள்... தொடர் - 8 12

தொடர் : எட்டு

இசங்களும்  பொருளாதார இயலும்

இந்தத் தொடரில் உலக மதங்களின் பொருளியல் கோட்பாடுகள் பற்றி ஓரளவு விவாதித்தற்கு அடுத்து  உலகின் பல பகுதிகளில் பல தலைவர்களால் போதிக்கப் பட்ட அல்லது புகுத்தப்பட்ட கொள்கைத் தத்துவங்கள் அல்லது இசங்கள் என்பவற்றுள் தலையாய சிலவற்றையும் இனி தொடர்ந்து விவாதிக்கலாம். 

இத்தொடரின் ஆறாம் பகுதியை நிறைவு செய்த போது கீழ்க்கண்டவாறு குறிப்பிட்டிருந்தோம். அவை:-

“இதற்கு மாற்றுப் பொருளாதார  வழிகள்  என்ன? காந்தியப் பொருளாதாரமா? சோசலிஸமா? பாசிசமா? கம்யூநிசமா? கலப்புப் பொருளாதாரமா? சுதந்திர வாதமா? முதலாளித்துவமா? இஸ்லாமா?”  

என்று குறிப்பிட்டிருந்தோம். அந்த வரிசைப் படி இதோ :- 

காந்தியப் பொருளாதாரம்:-

இந்திய தேசத்தின் தந்தை என போற்றி வர்ணிக்கப்படும் மகாத்மா காந்தியடிகள் தனது பொருளாதாரக் கொள்கைகளாக வலியுறுத்தியவை தொகுப்பாக காந்திஸம் அல்லது காந்தியப் பொருளாதாரம் என்று அழைக்கப்படுகிறது. காந்தியப் பொருளாதாரக் கோட்பாட்டின்  அடிப்படை  கிராமங்களை ஆதாரமாகக் கொண்டவை. தற்சார்பு, தன்னிறைவு, கூட்டு செயற்பாடு, பொது நலம், சமத்துவம் ஆகியவற்றை காந்தியப் பொருளாதாரம் அதிகம் வலியுறுத்திப் பேசி எடுத்துரைக்கும். சுற்றுச்  சூழல் சார்ந்த குடிசைத்தொழில் மற்றும் கைத்தொழில்களின் மேம்பாடு சார்ந்த பொருளாதார அமைப்பை காந்தி வலியுறுத்தினார்.  நாடு தனக்கு தேவைப்படுபவைகளை தானே உற்பத்தி செய்துகொள்ள வேண்டுமென்பதும், தன்னிடம் உற்பத்தியானவைகளை வைத்தே தனது தேவைகளை நிறைவேற்றிக் கொள்ள வேண்டுமென்பதுமே தன்னிறைவு, தற்சார்பு என்று அழைக்கப்படுகின்றன.  

ஆங்கிலேயரை எதிர்த்து இந்தியா சுதந்திரத்துக்காகப் போராடிய பலருக்கு தலைமைப்பொறுப்பேற்ற காந்தியடிகள் தனது சுதந்திரப் போராட்டத் திட்டத்தில் சுதேசி இயக்கம், ஒத்துழையாமை இயக்கம், அன்னியத்துணி எரிப்பு ஆகியவற்றை மேற்கொண்டார். இவற்றை அவர் வலியுறுத்தக் காரணம் இந்த நாடு விவசாய கிராமங்களைக் கொண்ட நாடு என்பதாலும், இந்நாட்டின் பெரும்பகுதி மக்கள் விவசாயிகள் என்பதாலும் தாங்கள் தேவைக்கு ஏற்ப உற்பத்தி செய்து யாரையும் சார்ந்திராமல் வாழப் பழகிக்கொள்ள வேண்டுமென்ற கொள்கையை சுதந்திரப் போராட்டத்தின் வழி நெடுக பரப்புரை செய்தார். இந்தியாவை அந்நிய நாட்டார் தங்களுக்கு சந்தையாக பயன்படுத்துவதை எதிர்த்தே போராடிய காந்தி அந்நிய பொருள்களை சாராத வாழ்வு வாழ தனது நாட்டு மக்கள் பழகிக் கொள்ளவேண்டுமென்று உபதேசித்தார். 

தவிரவும் பணத்தைத் தேடுவதைவிட ஆத்மீக மேன்மை("spiritualizing economics") அடைய மக்களைத் தூண்டினார். அரசின் எந்தத் திட்டமும் மக்களை மேம்படுத்துவதற்காக இருக்க வேண்டுமென்ற கொள்கை உடையவர் காந்தி.   

காந்திய பொருளாதார முறை தொழில் நுட்பத்துக்கு எதிரானது என்ற ஒரு விமர்சனம் உண்டு. எல்லா மனிதரையும் ஒருங்கே உயர்த்திச் செல்லும், சுற்றுச் சூழலியல் விளைவுகளை இயன்றவரை புரிந்து செயற்படும் எளிய தொழில்நுட்பங்களுக்கு காந்திய பொருளாதாரம் எதிரானது அல்ல என்பதே காந்திய சிந்தனையின் சரியான புரிதலாக இருக்கும் . ஒவ்வொரு கிராமமும் அங்கு வாழும் மக்களுக்குத் தேவையான பொருள்களை அங்கேயே கைத்தொழில் முறையில் உற்பத்தி செய்ய வேண்டும். ஒவ்வொரு கிராமமும் தன்னிறைவு பெற்ற கிராமமாக மாறுவது மொத்தத்தில் நாட்டைத் தன்னிறைவு பெற்ற நாடாக மாற்றிவிடும் எனக் கருதினார். 

காந்தியப் பொருளாதாரம் பற்றிப் பேசுகிறபோது காந்தி நடைமுறைப் படுத்த விரும்பிய தர்மகர்த்தா (trusteeship) முறையைப் பற்றியும் குறிப்பிட்டாக வேண்டும்.  இந்த முறைப்படி சொத்துக்கள் அனைத்தையும் கடவுளின் பெயரால் அர்ப்பணித்து விட வேண்டும். பிறகு அவரவர்களின் இன்றியமையாத  தேவைகளின் அளவுக்கு மட்டும் பெற்றுக் கொள்ள வேண்டும்.  (everything must be surrendered to God and then out of it one may use only that which is necessary for the service of God's creation, according to one's strict needs.) 

காந்தியின் கருத்துப்படி அவரவர்களின் அன்றாடத்தேவைகளுக்கு மட்டுமே வழங்கப் பட வேண்டுமென்பதால் பதுக்கல், சுரண்டல், யூக வணிகம் ஆகியவை மறைந்துவிடுமென்றும் , உலகத்துக்கே இக் கொள்கையை பரிசாக அளிக்க வேண்டுமென்றும் காந்தி விரும்பினார். (Harijan, 23 February 1947).

பெரும் நிலச்சுவான்தார்களையும், ஜமீந்தார்களையும் தங்களின் சொத்துக்களை இந்த தர்மகர்த்தா முறைக்கு வழங்கிவிட்டு தங்களுக்கு வேண்டியதை மட்டும் பெற்றுக் கொள்ள வேண்டுமென்று வற்புறுத்தினார். இந்த முறைப்படி தேவையற்ற அல்லது தேவைக்கு மீறிய உற்பத்தி செய்து கொட்டிக் குவிக்க முடியாது. தனி  நபர்களின் தொழில் முனைப்பு , தனி நபர்களின் சொத்துடைமை ஆகியவை மறைந்துவிடும் என்பதெல்லாம் இந்த பொருளாதாரக் கோட்பாட்டின் முக்கிய அம்சங்கள். (K. G. Mashurwala, Gandhi and Marx, Navajivan Trust, Ahmedabad, 1951, p. 79). 

நாடு சுதந்திரம் பெற்றதும் பெருமளவில் தொழில்கள் செய்து செல்வத்தை கொட்டிக் குவிக்கலாமென்று திட்டமிட்டிருந்த அன்றைய செல்வந்தர்களின் ஆதரவு இல்லாமல் இந்த தர்மகர்த்தா முறை தோல்வியே அடைந்தது.  ஆனாலும் ஓரளவு கூட்டுறவு சங்கங்களின் தோற்றம் மற்றும் வளர்ச்சி இக் கொள்கையை ஒத்தே உருவாக்கப்பட்டன. இதே அடிப்படையில்தான் காந்தியின் சீடரான வினோபா பாவே  பூமிதான இயக்கத்தைத் தொடங்கி , நாடு முழுதும் சுற்றி நிலங்களை தானமாகப் பெற்று நிலமில்லாதவர்களுக்கு வழங்கினார். மேலும் காந்தியின் மற்றொரு  சீடரான ஜெயப்பிரகாஷ் நாராயணன் சர்வோதயா இயக்கத்தைத் தொடங்கினார். இன்று நாடு முழுதும் சிறிய ஊர்களில் கூட சர்வோதய இயக்கத்தின் கடைகள் ஏதாவது ஒரு மூலையில் இருக்கின்றன. அந்தக் கடைகளில் அப்பளம், முறுக்கு, வத்தல், வடாகம் கொலு பொம்மைகள் , பாய்கள் என்று குடிசைத்தொழில்களில் தயாரிக்கப் பட்டவை விற்பனைக்கு வைக்கப்பட்டிருப்பதைக் காணலாம். கைத்தறியையும் கதராடையையும் வற்புறுத்தும் கோட்பாடுகள், ஆடம்பர வாழ்வை நாடிப்போன சமுதாயத்தின்  நவீனம் நாடிய போக்குக்குமுன் மண்டியிட்டன.   

போரோடு மேயத்துடிக்கும் இந்தியப் பொருளாதாரத்துக்கு பிடுங்கிப் போட்டால் கட்டுப்படியாகுமா? ஆகவே இந்த காந்தியப் பொருளாதாரம் செல்லாத செலாவணியாகிவிட்டது. காந்தியப் பொருளாதார முறைகளின் தோல்வியை காந்தியே கண்ணால் கண்டுவிட்டே மறைந்தார். காரணம் சுதந்திரப் போராட்டத்தில் காந்தியுடன் இணைந்து போராடிய ஜவஹர்லால் போன்ற தலைவர்கள் நாட்டை ஆளும் பொறுப்புக்கும் பதவிக்கும்  வந்த பிறகு காந்தியின் கோட்பாடுகளை முழுதாக அல்லது முழுமனதுடன் நிறைவேற்றுவதில் காந்தி உயிருடன்  இருக்கும் போதே  ஆர்வம்  காட்டவில்லை. 

கலப்புப் பொருளாதாரம் :-

கலப்புப் பொருளாதாரம் என்பது ஒன்றுக்கு மேற்பட்ட பொருளாதார முறைகளின் அம்சங்களை உள்ளடக்கிய ஒரு பொருளாதார முறை ஆகும். பொதுவாக  தனியுடைமை மற்றும் அரசுடைமை நிறுவனங்கள் இரண்டையும் கொண்ட அல்லது முதலாளித்துவம், சோசலிசம் ஆகிய இரண்டின் அம்சங்களைக் கூட்டாக்கிக்கொண்ட அல்லது சந்தைப் பொருளாதாரம், திட்டமிட்ட பொருளாதாரம் ஆகிய இரண்டின்  கலப்பாக அமைந்த ஒரு பொருளாதாரம் ஆகும்.

கலப்புப் பொருளாதாரம் என்பதற்கு தீர்மானமான ஒரு  வரைவிலக்கணம் கூறமுடியாது. ஆனால் கலப்புப் பொருளாதாரத்தோடு தொடர்புடைய அம்சங்களாகப் பின்வருவனவற்றைக் குறிப்பிட முடியும்.  அரசால் மையப்படுத்தப்பட்ட பொருளாதாரத் திட்டமிடலுடன் கூடிய ஓரளவு தனியார் முதலீட்டுடனும்  கூடிய பொருளியல் சுதந்திரம். இவ்வகைப் பொருளாதாரக் கோட்பாட்டில்   திட்டமிடல்,  சூழலியம், தேவைப்படும்போது சமுதாய நலம் தொடர்பான அரசின் தலையீடு மற்றும் கட்டுப்படுத்தல்  , சில உற்பத்திச் சாதனங்களை அரசே தன்  உடைமையாக வைத்திருத்தல் என்பவற்றை உள்ளடக்கலாம். குறிப்பிட்ட சில துறைகளை தனியார் இடம் விட்டு அரசும் தன்னிடம் சில துறைகளை வைத்திருப்பதுடன் தனியார் இடம் விடப்பட்ட துறைகளின் மேல் அரசின் ஆதிக்கத்தையும் செலுத்துவது என்றும் இதனை விவரிக்கலாம். சில ஊர்களுக்குப் போனால் மீன் குழம்பில் வெண்டைக்காய் அல்லது கத்தரிக்காயும் போட்டு சமைத்து இருப்பார்கள். அது போல்தான் MIXED ECONOMY என்று அழைக்கப்படும் இந்த கலப்புப் பொருளாதாரமாகும். இந்தியா போன்ற நாடுகள் இதைத் தான் பின்பற்றி வருகின்றன.   இதனால்தான் நாம் சாப்பிட்டது மீன் குழம்பா அல்லது புளிக்குழம்பா என்று சொல்லத்தெரியாமல் குழம்பிப் போய் கிடக்கிறோம்.  குழம்பை அள்ளிப் பரிமாறும்போது சிலருக்குப் பெரிய மீன் துண்டுகளும் பலருக்கு வெண்டைக்காய் மட்டுமே உண்ணக கிடைக்கின்றன. 

முதலாளித்துவம் :-

முதலாளித்துவம் என்பது, உற்பத்திச் சாதனங்கள் மற்றும் விநியோகம் ஆகியவை பெரும்பாலும் தனிப்பட்டவர்களின் கட்டுப்பாட்டுக்குள் இருக்கும் ஒரு பொருளியல் முறைமையாகும். அத்துடன் இம் முறையில், முதலீடு, விநியோகம், வருமானம், உற்பத்தி, பொருள்களின் விலை குறித்தல், சேவைகள் என்பன சந்தைப் பொருளாதாரத்தினால் தீர்மானிக்கப்படுகின்றன. இதில், மூலதனப் பொருட்கள், கூலி, நிலம் மற்றும் பணம் ஆகியவற்றில் வணிகத்தில் ஈடுபடுவதற்கான       தனிப்பட்டவர்களாலும்  சட்ட அடிப்படையில் நபர்களாகச் செயற்படும் தனிப்பட்டவர்களைக் கொண்ட குழுக்களினாளும் , உரிமைகள் தொடர்புபடுகின்றன.

முதலாளித்துவச் செயற்பாடுகள், 16 ஆம் நூற்றாண்டுக்கும், 19 ஆம் நூற்றாண்டுக்கும் இடையில் ஐரோப்பாவில் அறிமுகப்படுத்தப் பட்டது.   வணிக முதலாளித்துவத்தின் தொடக்க வடிவங்கள் மத்திய காலத்தில் சிறப்புற்று விளங்கின. நிலப்பிரபுத்துவத்தின் முடிவுக்குப் பின்னர், முதலாளித்துவம் மேலை நாடுகளில் முதன்மை பெற்று விளங்கியது. குறிப்பாக ஐரோப்பாவிலிருந்து சிறப்பாக இங்கிலாந்தில் இருந்து படிப்படியாக அரசியல் மற்றும் பண்பாட்டு எல்லைகளைக் கடந்து உலகின் பிற இடங்களுக்கும் பரவியது. அல்லது பரப்பப்பட்டது . 19 ஆம், 20 ஆம் நூற்றாண்டுகளில் முதலாளித்துவம், உலகம் முழுவதிலும்தொழில் மயமாக்கத்துக்கான முக்கிய காரணியாக விளங்கியது.

முதலாளித்துவம் ஆதாயம் இல்லாமல் ஆற்றைக் கட்டி இறைக்காது. முதலாளித்துவ சோதிடனின் குடுமி சும்மா ஆடாது.  இலாபமே நோக்கமாக செயல்படும் அமைப்பு. “மக்கள் நலம் மக்கள் நலம் என்றே கூறுவார் தன் மக்கள் நலம் ஒன்றேதான் மனதில் நாடுவார்”.   வகையற்ற செயல்களை செய்தாவது வருட இலாபத்தை உயர்த்திக் காட்டும் நோக்கோடும் தொழிலாளர் வர்க்கத்தை சுரண்டும் நோக்கோடுமே முதலாளித்துவம் செயல்படும்.  முதலாளித்துவத்தின் சுரண்டல் போக்கு உலகின் சில பகுதிகளில் மக்களின் எழுச்சிக்குக் காரணமாகி முதலாளித்துவத்தை மட்டுமல்ல முதலாளிகளையும் உயிரோடு வெட்டிக் குழிதேண்டிப் புதைத்தது.  

பாசிசம் (fascism) :- 

பாசிசம் (fascism) என்பது ஒரு சமுதாயத்தின் அதிகார வர்க்கத்தால் சர்வாதிகார முறையில் பொருளாதார மற்றும் மற்றைய ஆளுமை தொடர்புடையவை  தீர்மானிக்கப்படுவதையே குறிக்கும். முதலாளிகளும்  இவ்வதிகார வர்க்கத்திற்குள் அடங்குவர். ஒட்டு மொத்த எளிய மக்களின் நலனை மேம்படுத்துகிறோம் என்றே இந்தக் கோட்பாடு ஆரம்பித்து சர்வாதிகாரத்தில் முடிந்தவைதான் வரலாறு. ஆரம்ப கட்டங்களிலே அடிமட்ட மக்களின் ஆதரவும் இவ்வதிகார வர்க்கத்திற்கு கிடைக்கும். இத்தாலியின் முசோலினியும் ஜெர்மனியின் ஹிட்லரும்  பாசிசத்திற்கு எடுத்துக்காட்டுகள்.

நான் ஆணையிட்டால் அது நடந்துவிட்டால் இங்கு ஏழைகள் வேதனைப் படமாட்டார் என்றுதான் பாசிசம் ஆரம்பிக்கும். பின்னர் இந்த பாசிசவாதிகள் இம்சை அரசன் இரண்டாம்  புலிகேசியாக மாறிவிடுவார்கள். 

தனிமனித உரிமைகளை நாட்டு நலனுக்காக, வல்லமைக்காக எனக் கூறி மதிக்காமல் அரசுக்கு எதிராகக் கேள்வி கேட்பவர்களை அடக்குமுறைகள் மற்றும் வன்முறை மூலம் நசுக்குகின்ற அரசியல் நடைமுறையே பாசிசம்.

 தனியுரிமை, முதலாளித்துவம் ஆகியவற்றின் தோல்விகள் காரணமாகவே கையாலாகாத நிலையில் பாசிசத்தைச் சரணடைகின்றது என்பதே   உண்மை. அரசின் மகிமைக்காகத் தன்னுடைய எல்லாவற்றையும் அதற்கு அர்ப்பணம் செய்ய வேண்டுமென்ற அடிப்படையிலே தான் பாசிச இயக்கம் ஆரம்பிக்கப்பட்டது. தனிமனித சிந்தனை மற்றும் சுதந்திரம் கேள்விக்குறியாக்கப் பட்டு அடக்குமுறை மற்றும் ஆணவம் மேலோங்கியதால் பாசிசம் இறுதியில் நின்று நிலை பெற இயலவில்லை.  

ஆயினும் ஜனநாயகத்தின் பெயரில் , தாங்கள் நினைத்ததை அல்லது விரும்புவதை செய்துகொள்பவர்கள் , தங்களுக்கு வேண்டியவர்களை கூட வைத்துக் கொண்டு அரசியல் அத்துமீறல்களில் ஈடுபடுவோரும் சரி, தனது வாரிசுகளை உயர்நிலைக்குக் கொண்டுவர அரசு இயந்திரத்தைப் பயன் படுத்துபவர்களும் சரி  பாசிசத்தையே பரிணமிக்கிறார்கள்.   

சுதந்திரவாதம் :-

சுதந்திரவாதம் அல்லது தாராளமயமாக்கள்   (Libertarianism: லிபர்ட்டேரியனிசம்) என்பது மற்றோர் அரசியல் பொருளாதாரக் கொள்கை.  அரசின் பங்கு குறைவாகவும், தனிமனித சுதந்திரம் தடைகளின்றி விரிவாகவும் அமைய வேண்டும் என்பதே இந்தக் கொள்கையின் அடிப்படை. குறிப்பாக அரசின்  அதிகாரத்தை இயன்றவரை கட்டுப்படுத்த இந்தக் கோட்பாடு  பரிந்துரைக்கிறது. தனி மனிதனின் சுதந்திரம் இன்னொரு மனிதனை பாதிக்காத வகையில் அவளுக்கு/அவனுக்கு முழுமையான சுதந்திரத்தை இந்தக் கொள்கை வேண்டுகிறது. எங்கே ஒரு மனிதனின் உரிமைகள் பாதிக்கப்படுகிறதோ, அதைப் பாதுகாக்க மட்டுமே அரசுக்கு வன்முறைக்கான அதிகாரம் உண்டு என்கிறது. எடுத்துக்காட்டாக, விபச்சாரம்,ஆபாசம், அவதூறு  போன்றவற்றில் கூட அரசின் தலையீட்டை அல்லாது  ஒழுங்கு முறையை இந்தக் கோட்பாடு தவிர்க்கச்சொல்கிறது.   

சுதந்திரவாதக் கோட்பாடானது, பொதுவுடமை, சமவுடமை ஆகிய கொள்கைகளை முற்றிலும் எதிர்க்கிறது. மாறாக தனிமனித சுநந்திரத்தை, உரிமைகளை, உடமைகளை இது பாதுகாக்க முனைகிறது. பெரும்பானமையான பொருளாதார செயல்பாடுகள்  திறந்த சந்தை மூலமே நிகழவேண்டும் என்று வேண்டுகிறது.  கல்வி, மருத்துவம், போக்குவரத்து, ஊடகம், கலைத்துறை, நில மேலாண்மை, விவசாயம்,  உட்பட அனேக துறைகள் திறந்த சந்தை மூலமே நிகழவேண்டும் என்று கருதுகிறது. திறந்த சந்தையே இவற்றை சிறந்த செயல்திறன் மற்றும் நிர்வாகத்துடன் செய்ய முடியும் என்று விவாதிக்கிறது. இராணுவம்,  காவல்துறை, நீதித்துறை, பொதுமக்கள் மருத்துவம் ஆகிய துறைகளை  மட்டுமே அரசுவைத்துக்கொண்டு மற்றவற்றை சுதந்திரமாக திறந்து விட்டுவிடவேண்டுமென்று கூறுகிறது. அமெரிக்கா போன்ற நாடுகள் இத்தகைய கோட்பாடுகளை பெருமளவு கடைப்பிடிக்கின்றன. 

அண்மைக்காலத்தில் உலகப் பொருளாதாரத்தில் ஏற்பட்ட வீழ்ச்சியும் தளர்வும் இந்த சுதந்திர வாதத்தின் மாறான விளைவுகளையும் அழிவுகளின் சாட்சிகளையும்  நமக்கு கண்கூடாகக் காட்டும்.  

இன்னும் சோசலிசம் மற்றும் கம்யூனிசம் பற்றி நாம் விவாதிக்க வேண்டும். அதற்காக ஒரு அத்தியாயம் தேவை. அதன்பின்புதான் இங்கு குறிப்பிடப்பட்ட மத மற்றும் இசங்களோடு இஸ்லாமிய பொருளாதாரக் கோட்ப்பாடுகள் எவ்வாறு மேம்பட்டு நிற்கின்றன என்பதை நாம் நிலை நிறுத்த இயலும். 

ஆகவே இன்ஷா அல்லாஹ் தொடரலாம். 

இபுராஹீம் அன்சாரி

கலப்பட உணவு!? - கலக்கல்(!!?) காணொளி! 7

அளவற்ற அருளாளன் நிகரற்ற அன்பாளன் அல்லாஹ் பெயரால்..

நேர்வழி பெற்றோர் அனைவர் மீதும் ஓரிறையின் சாந்தி என்றென்றும் உண்டாகட்டுமாக!

கடந்த சில நாட்களுக்கு முன் ஐரோப்பிய நாடுகளில் மாட்டு இறைச்சி பர்கரிலும், நெஸ்ட்லே நிறுவனத்தின் தயாரிப்பான பாஸ்தாவிலும் குதிரை மாமிசம் கலந்திருந்த செய்தி பெரும் பரபரப்பை ஏற்படுத்தியிருந்த நிலையில் இப்போது தென்னாப்பிரிக்க நாட்டில் உணவுப் பொருளில் கலப்படம் தொடர்பாக மேற்கொன்ட ஆய்விலும் மாட்டு இறைச்சி பர்கரில் எருமை மற்றும் கழுதையின் மாமிசம் கலந்திருந்த செய்தி பெரும் அதிர்ச்சி அளிப்பதாக இருக்கின்றது. ஒவ்வொரு முஸ்லிமும் உணவுப் பொருட்களின் ஹராம் ஹலால் பேன வேண்டிய நிலையில் இச்செய்தி மிகவும் கவனிக்கத் தக்கதாகும்.

இலங்கையில் ஹலால் உணவுக்கு எதிராக புத்தர்களின் போராட்டம் முஸ்லிம்களை ஆன்மீக ரீதியாக பலகீனப்படுத்த யூத, கிறித்தவர்களின் சூழ்ச்சி பணத்திற்காக எதையும் செய்யத் துணிகின்ற நேர்மையற்ற வியாபாரிகள் என்று மனித நலனுக்கு எதிராகவும், இஸ்லாமியர்களின் இறை நம்பிக்கைக்கு எதிராகவும் பெரும்பான்மை உலகம் களம் இறங்கியிருக்க, நம்முடைய இறை நம்பிக்கையையும், ஆரோக்கியத்தையும் பாதுகாத்துக் கொள்வது நம் ஒவ்வொருவர் மீதும் கடமை.

இறை மார்க்கமான இஸ்லாம் மனிதர்களுக்கு உண்ணத் தடை செய்தவற்றுள் தானாய் செத்ததும், இரத்தமும், இறைவன் பெயர் சொல்லி அறுக்கப்படாததும், பன்றியின் மாமிசமும், கழுதையும் அடக்கம்.

மாட்டுக் கறியோடு குதிரை, கழுதையின் கறியைக் கலந்தவர்கள் தானாய் செத்த கோழியையும், மாட்டையும், ஆட்டையும் எப்படி விற்பனை செய்யாமல் விடுவார்கள்?

கலப்படம் சோதனை மூலம் வெளிச்சத்திற்கு வந்திருக்கிறது. ஆனால் தானாய் செத்ததை பயன்படுத்தினால் எந்த சோதனையில் தெறிய வரும்?

இது போன்றவைகள் ஹலால் என்ற பெயரில் நமக்கும் விற்பனை செய்யப்படலாம். அதை வாங்கி நாமும் உட்கொள்ள நேரலாம்! அல்லாஹ் பாதுகாக்க வேண்டும்.

இது போன்ற நிலையில் அது நம் மீது குற்றமாகாது என்றாலும் கால நிகழ்வுகளைக் கருத்தில் கொண்டு மேலை நாடுகளிலிருந்தும், நிராகரிப்பாளர்களிடமிருந்தும் வருகின்ற ஹராம், ஹலாலோடு தொடர்புடைய பொருட்களை தவிர்ப்பதே இறை நம்பிக்கைக்கு மிகவும் உகந்ததாக இருக்கும்.

எல்லாம் வல்ல இறைவன் நம் அனைவரையும் ஷைத்தானின் அனைத்து சூழ்ச்சிகளிலிருந்தும் பாதுகாக்கப் போதுமானவன்.

அபு ஈசா

கலக்கல்(!!?) காணொளி !

அதிரைநிருபர் பதிப்பகம்

அமைதியற்ற உள்ளத்திற்கு அருமருந்து - 28 6

அளவற்ற அருளாளனும் நிகரற்ற அன்புடையோனுமாகிய

அல்லாஹ்வின் திருப்பெயரால். . .

அன்பார்ந்த சகோதர, சகோதரிகளே! அஸ்ஸலாமு அலைக்கும் (வரஹ்) குர்ஆனையும், நபி வழியையும் பின்பற்றினால்தான் மனம் அமைதி பெறும், நேர்வழியும் கிடைக்கும். குர்ஆனையும், நபி(ஸல்)அவர்களின் வாழ்க்கையையும் பின்பற்றி நடந்தால், உள்ளங்கள் அமைதி பெற்று இம்மை மறுமை வாழ்வில் வெற்றி பெறலாம் இன்ஷாஅல்லாஹ்!.

அல்லாஹ்விடம் ஆதரவு கொள்ளல்:

தமக்கு எதிராக வரம்பு மீறிய எனது அடியார்களே! அல்லாஹ்வின் அருளில் நம்பிக்கையிழந்து விடாதீர்கள்! பாவங்கள் அனைத்தையும் அல்லாஹ் மன்னிப்பான். அவன் மன்னிப்பவன். நிகரற்ற அன்புடையோன் என்று (அல்லாஹ் கூறுவதைத்) தெரிவிப்பீராக! (அல்குர்ஆன்: 39:53)

(நம்மை) மறுப்போரைத் தவிர மற்றவர்களை நாம் தண்டிப்போமா? (அல்குர்ஆன் :34:17)

எனது அருள், எல்லாப் பொருட்களையும் சூழ்ந்திருக்கிறது. (அல்குர்ஆன்: 7:156)

''நபி(ஸல்) அவர்களிடம் ஒரு கிராமப்புற அரபி வந்து, ''இறைத்தூதர் அவர்களே! சொர்க்கம் - நரகத்தை அவசியமாக்கிடும் இரண்டு விஷயங்கள் என்ன? என்று கேட்டார். ''ஒருவர் அல்லாஹ்வுக்கு  எதையும் இணை வைக்காமல் இறந்து விட்டால், அவர் சொர்க்கத்தில் நுழைவார். அவனுக்கு எதையேனும் இணை வைத்தவனாக இறந்து விட்டால், அவன் நரகில் நுழைவான்;'' என்று கூறினார்கள். (அறிவிப்பவர்: ஜாபிர்(ரலி)  அவர்கள் (முஸ்லிம்) (ரியாளுஸ்ஸாலிஹீன்: 414)

அல்லாஹ் படைப்புகளை படைத்தபோது, அர்ஷுக்கு மேலே தன்னிடம் உள்ள பதிவேட்டில், ''என் கருணை, என் கோபத்தை வென்று விட்டது'' என்று எழுதினான் என்று நபி(ஸல்) அவர்கள் கூறினார்கள். (அறிவிப்பவர்: அபூஹுரைரா(ரலி) அவர்கள் (புகாரி,முஸ்லிம்) (ரியாளுஸ்ஸாலிஹீன்: 419)

  

''அல்லாஹ், கருணையை 100 பகுதிகளாக ஆக்கினான். தன்னிடம் 99ஐ வைத்துக் கொண்டான். ஒரு பகுதியை மட்டும் பூமியில் இறக்கினான். இந்த ஒரு பகுதி (கருணை) மூலம்தான், படைப்பினங்கள் கருணை காட்டிக் கொள்கின்றன. உதாரணமாக, ஒரு மிருகம் தன் கால் குளம்பு தன் குட்டியின் மீது படுவதை பயந்ததாக உயர்த்திக் கொள்கிறது''  என்று நபி(ஸல்) அவர்கள் கூறினார்கள். (அறிவிப்பவர்: அபூஹுரைரா(ரலி) அவர்கள் (புகாரி,முஸ்லிம்) (ரியாளுஸ்ஸாலிஹீன்:420)

  

''நிச்சயமாக இறை மறுப்பாளர் ஒரு நன்மையைச் செய்தால், அதன் மூலம் இவ்வுலகில் அவனுக்கு உணவாக (கூலி) கொடுக்கப்படும். இறை நம்பிக்கையாளன்  நன்மை செய்தால், நிச்சயமாக அல்லாஹ் அவனுக்காக அவனது நன்மைகளை மறுமைக்காக சேகரிக்கிறான். மேலும் இவ்வுலகிலேயே அவனது வழிபாட்டிற்காக உணவை அவனுக்கு வழங்குகிறான்''  என்று கூறினார்கள். (முஸ்லிம்)

மற்றொரு அறிவிப்பில் (கீழ்க்கண்டவாறு உள்ளது):

''நிச்சயமாக அல்லாஹ், இறை நம்பிக்கையாளனுக்கு ஒரு நன்மைக்காக அநீதம் செய்ய மாட்டான். அதற்காக இம்மையில் கூலி கொடுக்கப்படும். மேலும் அதற்காக மறுமையிலும் கூலி கொடுக்கப்படுவான். இறை மறுப்பாளன் அல்லாஹ்வுக்குரிய செயல்களைச் செய்தால் நன்மைகளை இவ்வுலகிலேயே கொடுக்கப்படுவான். மறுமையை அவன் அடைகிறபோது, அவனுக்கு கூலிக் கொடுக்கப்படத்தக்க நன்மை எதுவும் இருக்காது.'' (அறிவிப்பவர்: அனஸ் (ரலி) அவர்கள் (முஸ்லிம்) (ரியாளுஸ்ஸாலிஹீன்: 428)

''ஜந்து நேரத் தொழுகைகளின்  உதாரணம், உங்கள் ஒருவரின் வாசலில் நிரம்பி வழிந்தோடும் ஆற்றில் ஒவ்வொரு நாளும்  ஐந்து தடைவ குளிப்பது போலாகும்,'' என நபி(ஸல்) கூறினார்கள்.  (அறிவிப்பவர்: ஜாபிர்(ரலி) அவர்கள் (முஸ்லிம்) (ரியாளுஸ்ஸாலிஹீன்: 429)

''என் அடியான்  என்னை எண்ணுமிடத்தில்  நான் உள்ளேன். என்னை நினைவு கூரும் சமயத்தில் அவனுடன் நான் உள்ளேன்'' என்று அல்லாஹ் கூறுவதாக நபி(ஸல்) அவர்கள் கூறிவிட்டு, ''அல்லாஹ்வின் மீது சத்தியமாக, வனாந்திரத்தில் வழி தவறிய ஒட்டகத்தை உங்களில் ஒருவர் பெற்றுக் கொள்ளும் போது  அடையும் மகிழ்ச்சியை விட, தன் அடியான் பாவமன்னிப்பு கோரும் போது அல்லாஹ்வுக்கு  அதிக மகிழ்ச்சி ஏற்படுகிறது'' என்றும் நபி(ஸல்) கூறினார்கள். (புகாரி, முஸ்லிம்)

மேலும் நபி(ஸல்) அவர்கள் அல்லாஹ் கூறுவதாக (பின்வருமாறு) கூறினார்கள்:

என்னிடம் அவன் ஒரு சாண் நெருங்கினால், அவனிடம் நான் ஒரு முழம் நெருங்குவேன். என்னிடம்  ஒரு முழம் நெருங்கினால், அவனிடம் நான் இரண்டு முழம் நெருங்குவேன். என்பக்கம் அவர் நடந்து வந்தால், நான் அவர் பக்கம் விரைந்தோடி வருவேன். (அறிவிப்பவர்: அபூஹுரைரா(ரலி)  அவர்கள் (புகாரி,முஸ்லிம்) (ரியாளுஸ்ஸாலிஹீன்: 440)

''இறந்தவரின் உடல் (பெட்டியில்) வைக்கப்பட்டு, அதை மக்கள் தங்கள் தோள் பட்டைகளின் மீது சுமந்து சென்றால், அப்போது இறந்தவன் நல்லவனாக இருந்தால், ''என்னை சீக்கிரம் கொண்டு செல்லுங்கள். என்னை சீக்கிரம் கொண்டு செல்லுங்கள்''  எனக் கூறுவான். நல்லவனாக இல்லை என்றால், ''எனக்கு வந்த கேடே, என்னை எங்கே கொண்டு செல்கிறீர்கள்? என்று கேட்பான். மனிதனைத் தவிர மற்ற அனைத்தும் இந்த சப்தத்தைக் கேட்பார்கள். அதை மனிதன் கேட்டால், அவன் (மூர்ச்சையாகி) கீழே அடித்து விழுந்து விடுவான்'' என்று நபி(ஸல்) கூறினார்கள். (அறிவிப்பவர்: அபூஸயீத் குத்ரீ  (ரலி) அவர்கள் (புகாரி) (ரியாளுஸ்ஸாலிஹீன்: 444)

''சொர்க்கம் என்பது, உங்களில் ஒருவருக்கு அவரது செருப்பின் வாரை விட மிக நெருக்கமாக இருக்கும். நரகமும் இதுபோல் தான்'' என்று நபி(ஸல்) கூறினார்கள். (அறிவிப்பவர்: இப்னு மஸ்ஊத்(ரலி) அவர்கள் (புகாரி) (ரியாளுஸ்ஸாலிஹீன்: 445)

''அல்லாஹ்வின் அச்சம் காரணமாக அழுகின்ற மனிதர், கறந்தபால் மடுவுக்குள் மீண்டும் நுழைந்தாலும் நரகில் நுழைய மாட்டார். அல்லாஹ்வின் வழியில் படிந்த புழுதியும், நரகப் புகையும், இணைந்திடாது''  என்றும் நபி(ஸல்) கூறினார்கள். (அறிவிப்பவர்: அபூஹுரைரா(ரலி)  அவர்கள் (திர்மிதீ) (ரியாளுஸ்ஸாலிஹீன்: 448)

''ஏழுபேர், இவர்களுக்கு  தன் நிழலைத்தவிர வேறு நிழல் இல்லாத அந்த (மறுமை நாளில்) தன் அர்ஷின் நிழலில் அல்லாஹ் நிழல் தருவான். (1) நீதமான அரசன் (2) அல்லாஹ்வை வணங்குவதில் ஈடுபடும் வாலிபர் (3) பள்ளிவாசல்களில் தன் உள்ளத்தைப் பறி கொடுத்த மனிதர் (4) அல்லாஹ்வுக்காக பிரியம் கொண்டு, அவனுக்காகவே ஒன்று சேர்ந்து, அவனுக்காகவே பிரிந்தும் நிற்கின்ற இருவர் (5) அழகும், குடும்பப் பெருமையும் நிறைந்தப் பெண் விபச்சாரத்திற்கு  அழைத்தும், ''நான் அல்லாஹ்வைப் பயப்படுகிறேன்'' என்று கூறும் நபர் (6) தன் வலது கை செய்யும் செலவை இடது கைக்குத் தெரியாமல் அதை மறைத்துக் கொண்டு தர்மம் செய்கின்ற ஒருவர் (7) கலப்பற்ற நிலையில் அல்லாஹ்வை நினைவு கூர்ந்து, இதனால் கண்கள் கண்ணீரைச்சிந்தும் ஒருவர்'' என்று நபி(ஸல்) கூறினார்கள். (அறிவிப்பவர்: அபூஹுரைரா(ரலி) அவர்கள் (புகாரி,முஸ்லிம்) (ரியாளுஸ்ஸாலிஹீன்: 449)

 இர்பாழ் இப்னு ஸாரியா (ரலி) அறிவிக்கின்றார்கள்:

''உள்ளங்கள் நடுங்கி கண்கள் கண்ணீரைச் சிந்தும் அளவுக்கு நபி(ஸல்) அவர்கள் எங்களுக்கு உபதேசம் செய்தார்கள்.''(அபூதாவூது, திர்மிதி)

(ரியாளுஸ்ஸாலிஹீன்: 456)

''ஒவ்வொரு தூதரும்; அற்புதங்களுடன் அனுப்பப்பட்டனர். எனக்கு வழங்கப்பட்ட அற்புதம் திருக்குர்ஆன் – நபி (ஸல்) அவர்கள் ''. (நூல்: புகாரி, முஸ்லிம்)

'' திருக்குர்ஆனைப் பொருளுணர்ந்து படியுங்கள் ''

  

இன்ஷாஅல்லாஹ் வளரும்...

அலாவுதீன் S.

அதிரை பிலால் நகரில் மார்க்க விளக்கப் பொதுக் கூட்டம் ! 12

அஸ்ஸலாமு அலைக்கும் வரஹ்...

அதிரை தாருத் தவ்ஹீத் தனது சீரான பணியின் அடுத்தடுத்த ஆக்கப்பணிகளில் நிதானமாக மட்டுமல்ல அழுத்தமாக அதன் சேவையை முன்னெடுத்து செல்கிறது அல்ஹம்துலில்லாஹ்!

அதிரையில் குறிப்பாக பெண்கள் மத்தியில் மவுனப் புரட்சியை ஏற்படுத்திக் கொண்டிருக்கும் அதிரை தாருத் தவ்ஹீத், பெண்களுக்கென்று கல்லூரி, பெண்களுக்கென்று பெண்களால் நடத்தப்படும் ஒவ்வொரு வாரமும் தொடர் பிரச்சாரம், விழிப்புணர்வு பிரசுரங்கள் என்று தொடர்ந்து கொண்டிருக்கிறது.

அவ்வகையில் அதிரையில் இன்று மாலை (01-மார்ச்-2013) அதிரை தாருத் தவ்ஹீத் அமைப்பின் அங்கமான "பிலால் நகர் இஸ்லாமிய பயிற்சி மையம்" அருகில் மாபெரும் இஸ்லாமிய மார்க்க விளக்கப் பொதுக்கூட்டம் நடத்த இருக்கிறது.

அனைத்து தரப்பு மக்களும் நடக்க இருக்கும் மார்க்க விளக்கப் பொதுக்கூட்டத்தில் கலந்து கொண்டு பயனடைய வேண்டுகிறோம் இன்ஷா அல்லாஹ் !

அதிரைநிருபர் பதிப்பகம்