5-ம் 6-ம் 17

உடனே 11 என்று சொல்ல  வேண்டாம். இது 6 அறிவு படைத்த எனக்கும் , 5 அறிவு படைத்த மிருகங்களுக்கும் நடந்த சுவாரஸ்யமான விசயங்கள். இந்த அறிவுகள் 6 / 5 என்றெல்லாம் எங்கே கணக்கு சொல்லித் தருகிறார்கள் என்று தெரியவில்லை. ஏனெனில்சில சமயங்களில் சில நாய்கள் செய்யும் லூட்டியில் அவைகள் ஏதும் சைக்காலஜி கிராஜுவேசன் முடித்து வாடகைக்கு வீடு கிடைக்காமல் அலைகிறதோ எனக்கு நினைக்கத் தோன்றுகிறது.

எனக்கும் சின்ன வயதில் யாரோ காதில் ஓதி விட்டுருப்பார்கள் என நினைக்கிறேன், அதாவது 'மிருகங்களை நேசி' என்று... [அதனால் தான் என்னவோ எனக்கு கோழிக்கறியை விட ஆட்டிறைச்சி வருவல் சாப்ஸ் ரொம்ப பிடிக்கும்] மிருகங்கள் மீதான ஆர்வம் அப்படி ஒன்றும் சொல்லிக்கொள்வது மாதிரி இல்லை. இருப்பினும் எப்படியாவது ஒரு நாய் வளர்ப்பது என்று 'ஆறாப்பு" [சிக்ஸ்த் ஸ்டேன்டர்ட்] படிக்கும் போது  ஒரு வீரமான முடிவுடன் நாய்க்குட்டி ஏதாவது கிடைக்குமா என்று தேட ஆரம்பித்தேன். அந்த சமயத்தில் எந்த சனியன் பிடித்தவனோ நாய்க்கும் குடும்ப கட்டுப்பாடு பிரச்சாரம் ஏதும் செய்தானா என்று தெரியவில்லை, எல்லா நாய்களும் ஏதோ ஆஸ்ரமத்தில் பகல் நேரத்தில் திரியும் பெண்கள் மாதிரி தனியாகவே திரிந்தது.

கடைசியில் ஒரு இடத்தில் [சரியாக ஞாபகம்  இல்லை], அப்படி ஞாபகம் இருந்து நான் சொல்லிவிட்டால் தாய்நாய் வந்து நான் தான் எனது கேவலத்தை மறைக்க இந்த குட்டி நாய் பிறந்தவுடன் மெட்ராஸ் போர கூட்ஸ் ட்ரைனில் அநாதையாக விட்டு விட்டேன் இப்போது திருப்பி தாருங்கள் என்றால் எங்கே போவது??.] ஒரு நாய்க் குட்டியின் ஹீனமான சத்தம் கேட்டு பக்கத்தில் போய் பார்த்தால் என்னை பார்த்த கடுப்பில் இன்னும் சத்தம் போட்டது. சரி நாம் அன்பாக இருந்தால் தான் நாய் நம்முடன் வரும் என்று கொஞ்சம் அன்பான முகத்த மாற்றிக் கொண்டு நாயின் கண்களைப் பார்த்தேன். [எப்படியாவது நம் கண்ணிலிருந்து ஒளி வெள்ளம் பாயும் என்று] யார் வைத்த சூனியமோ அன்றைக்கு எனக்கு பேட்டரி வீக் ஆன மாதிரி கண்ணின் ஒளி மஞ்சளாக இருந்து இருக்க வேண்டும். பணம் அனுப்பாத கணவனின் அறிவுரையை கேட்ட மனைவி மாதிரி அந்த நாய் எந்த சலனமும் இல்லாமல் தூங்கிபோனது.

தூங்கிக் கொண்டிருக்கும்போதே தூக்கிக் கொண்டு வந்து வீட்டில் கட்டிப் போட்டு அமுல்ஸ்ப்ரே போட்ட டீயெல்லாம் கொடுத்தேன். இருப்பினும் அது ஃபில்டர் காஃபி குடிக்கும் பழக்கம் உள்ளதோ என்னவோ தெரியவில்லை, ரொம்பவும் அழிச்சாட்டியம் செய்து மறுத்து விட்டது. கடுப்பாகிப் போன நான் வீட்டுக்கு வெள்ளையடிக்க வைத்திருந்த கம்பை எடுத்து கொஞ்சம்  கடுமையாகவே விலாசி விட்டேன். [இதைப் பார்த்த வீட்டில் இருந்தவர்கள் நாயை வீடு கடத்தி எங்கள் வீட்டு தோப்பில் கொண்டு போய் விட்டு விட்டார்கள். கவனிக்க: அப்போது பிஹேவியர் பற்றியெல்லம் தெரியாத ஆறாப்பு படிக்கும் மாணவன் நான்..

கொஞ்சம் நாளைக்கு நாய் வளையம் வளையமாக வந்தது. பின்னாளில் அது மனதை விட்டு "போயிந்தே' என்று போய் விட்டது. இதற்கு முன் ஒரு ஃப்ளாஸ் பேக்கில் கொக்கு கதை [உண்மை சம்பவம்.... சூடம் ஸ்டாக் எல்லாம் இல்லை அதனால் சத்யம் எல்லாம் செய்ய முடியாது] . அப்போது போலீஸ் பள்ளிக்கூடம் [1-ம் நம்பர் பள்ளிக்கூடத்தில்] படித்த நேரம். அப்போது எலக்ட்ரிக் சார்ஜ் செய்யும் பேட்டெல்லாம் கிடையாது கொசு அடிக்க. அப்போது என் வீட்டில் ஒரு கொக்கு வளர்த்தேன்.

அந்த கொக்கு தனக்கு கொடுக்கப்பட்ட சோறு ஆனத்தை தவிரவும் அதன் சைட் டிஸ் & ஹாபி  என்னவென்றால்   ஈயை லாவகமாக கொத்தி சாப்பிடுவது.  ஓரளவு அதனால் வீட்டில் ஈயின் ஊசலாட்டம் குறைந்தது. அது என்னவோ ஒலிம்பிக்கில் துப்பாக்கி சுடும் போட்டியில் தங்கம் வென்றதைப் போல் என் வீட்டை சுத்தி பேச்சாகிப் போய் அதற்கு திருஷ்டி விழுந்து  சேற்றில் ஓட்டும்போது சைக்கிளில் உள்ள டைனமோ மாதிரி குறைந்த பவருடன் சுனக்கமாகிப்போனது. இரண்டாம் நாள் நான் பசங்களுடன் விளையாடி விட்டு சீக்கிரமே தூங்கிப் போனேன் , இரவு பத்து மணிக்கு என் வீட்டில் உள்ளவர்கள் என்னை எழுப்பி ‘சாப்பிடாமல் படுத்தால் யானை பலம் குறையும் என்ற தத்துவத்துடன் மெயின் ரோட்டில் வாங்கி  வந்த பரோட்டா ரொட்டியுடன் ஏதோ Bird கறியுடன் சாப்பாடு தந்தார்கள். அடுத்த நாள்தான் தெரிந்தது நான் வளர்ந்த செல்லகொக்குதான் அந்த Bird கறி.

அதன் பிறகு எந்த பாய்மார்கள் வீட்டின் மேலேயும் எந்த கொக்கும் பறப்பதில்லை.

பின்னாளில் என் கல்யாணம் எல்லாம் முடிந்து சில காலம் ஊரில் தங்கியிருந்தேன், அல்மோஸ்ட் நான் புறப்பட சில நாட்கள்  சாகுல் வேட்டைக் கெல்லாம் போய் நிறைய கொக்கு எல்லாம் கொண்டு வந்தாப்லெ சாகுல் நான் மற்றும் என் நண்பர்கள் எல்லோரும் சிரித்துக் கொண்டே அந்த கொக்கு கறியை சாப்பிட்டாலும் எனக்கு என்னவோ அந்த இருட்டிலும் ஏற்கனவே சின்ன வயதில் செத்த கொக்கு லேசான புகையுடன் தூரத்தில் லதா மங்கேஸ்கர் குரலில் பாடிக் கொண்டு வருமோ என்று லேசான பயம்.

[கொக்குக்கு வெள்ளைப்புடவை தேவையில்லை...காஸ்ட்யூம்  செலவு மிச்சம்.]

அதற்கு பிறகு சென்னையில் படிக்கும்போது போயஸ் கார்டனில் எனக்கு ட்யூசன் எடுத்த கலீமுல்லா ப்ரொஃபொசர் வீட்டுக்கு போகும்போது சில வீடுகளைத் தாண்டி போகும்போது வீட்டுக்குள் நாய்கள் கட்டிக் கிடக்கிறதா என்பதை பஸ்பாஸ் புதுப்பிப்பதைவிட மிக முக்கியமாக கருதி நடந்துபோவேன். நாய் என் மீது காண்டாகி பாய்ந்தால் அவ்வளவு இறைச்சி நம்மிடமிருந்து தேராது. [ஏண்டா குடல் எடுத்த மீன் மாதிரி இப்படி ஒட்டிப் போயிருக்கே என்று என் நண்பன் ரியாஸ் எப்போதும் கேட்பான்.]

சில பூனைகளுக்கு உள்ள ரோசம் பெரும்பாலும் சில மருமகன் களுக்கு கூட இருப்பதில்லை. ஒரு முறை எங்கள் வீட்டில் ஏறக்குறைய 15 பூனைகள் அவுட்பேசன்ட் மாதிரி வந்து சாப்பிட்டு விட்டு போகும். என் தகப்பனாரும் பூனைக்கு மீன் எல்லாம் அவியல் செய்து போடுவதால்.. எலி வேகமாக வந்தாலே பயந்து ஒடிவிடும். நாளடைவில் சில பூனைகளுக்கு எலியை கண்டால் என்ன செய்ய வேண்டும் என்பது தெரியாமலே அதனுடைய மூலையில் உள்ள சில ஃபைல்கள் பேட்க்லஸ்டரில் பாதிப்படைந்த மாதிரி அடிக்கடி பூனைகள் திகைத்து நின்று விடும். இப்படி பூனைகள் மீது அதீத அன்பு வைத்ததால் பூனைகள் எல்லாம் உடல் பருமனாகி நடக்கவே கஷ்டப்பட்டு ஏறக்குறைய ஓவர் வெயிட்டிலேயே ப்ளட்ப்ரஸ்ஸர் எல்லாம் வந்து அடிக்கடி கோபப்பட ஆரம்பித்தது. இதில் ஒரு அதிசயம் ஒரு தாய்ப்பூனை மிகவும் ரோசமானது, அதன் பிள்ளைகளை என் தம்பி அவசரப்பட்டு 'சனியன்" என்று சொன்னதற்காக அந்த குட்டிப்பூனையை எடுத்துக்கொண்டு  மரத்துக்கு கீழே வைத்து கண்ணத்தில் தொடர்ந்து அடிக்க ஆரம்பித்தது [பிள்ளையை கண்டிக்கிறதாம்]. பூனைகள் எல்லாம் சேர்ந்து எடுத்த 'நல்லதங்காள்" படத்தில் கதாநாயகியாக நடித்த பூனையோ என்னவோ தெரியவில்லை. இன்னொரு பூனை கண்ணாம்பாள் ரேஞ்சுக்கு ரொம்ப ஆவேசமாக குட்டிப்பூனையை பார்க்கும்.  என் தகப்பனார் என்னவென்றால் ஒருமுறை Europe போயிருக்கும்போது அங்கு ஏர்போர்ட்டில் இறங்கியவுடன் எங்களை நலம் விசாரிக்கு முன் 'பூனைக்கு மீன் அவிச்சி போட்டாச்சா" என்று ரொம்பவும் பிரியமாக இருந்ததால் நான் என் தம்பி எல்லோரும் சேர்ந்து பூனையை கொண்டு போய் SPCA  யில் விட்டு விடுவது என்று ஏற்பாடு செய்து அத்தனை பூனையையையும் சில கார்ட்டன் பாக்சில் அடைத்து கொண்டு போய் விட்டு விட்டோம்.  SPCA  யில் ஒருவன் எங்களிடம் கேட்டான் 'பூனைக்கு என்ன சார் போட்டு வளர்த்தீங்க' இப்படி கணமா இருக்கு. உண்மையில் அந்த பூனைகள் சாப்பிட்ட மீனில் உள்ள ஒமேகா ப்ளஸ் மட்டும் ஒரு லாரி லோடு தேரும்.

இப்படி மிருகங்களை வெறுத்தது தானோ என்னவோ பக்கத்து வீட்டில் இருக்கும் சீனப்பெண்மனி [என் பிள்ளைகள் அவளுக்கு வைத்த பெயர் 'நாய் அன்ட்டி"] ஏறக்குறைய 13 நாய்கள் 16 பூனை என்று ஒரு ஃபார்ம் ஹவுஸ் வைத்து எங்களை வதைத்தாள். பிறகு அரசாங்கத்தில் ஏறக்குறைய பூம்புகார் கண்ணகி மாதிரி முறையிட்டு சமீபத்தில்தான் முனிசிபால்ட்டி வந்து அள்ளிக்கொண்டு போனது.

இங்கு உள்ள எலிகளைப்பற்றியும் சொல்ல வேண்டும், நான் முன்பு வேலைபார்த்த இடத்துக்கு பக்கத்தில் எலிகள் அதிகம் , டெய்லி எலிகள் பஸ்ஸில் அடிபட்டு செத்துக்கிடக்கும். இதில் கடை வைத்திருக்கும் சீனர்கள் எலிகூண்டைவைத்து பிடித்து அந்த எலி ஏறக்குறைய தப்பிக்க கூண்டுக்குள்ளேயே அலைந்து கொண்டிருக்கும்போது அதன்மீது கொசு மருந்து ஸ்ப்ரே அடித்து அதன் நுனியில் லைட்டரை பத்தவைத்து அந்த எலியை எரித்து வெறியை தவிர்த்துகொள்ளும் அளவுக்கு அவைகள் [எலிகள்]  'சிறந்த வில்லனுக்கான பரிசை' தட்டிச் செல்லும் அளவுக்கு இவனுகளை கொடுமை செய்திருக்கும்.  இந்த சீன் பார்க்க வரும் கூட்டம் சவூதியில் தலை வெட்டுவதை பார்க்கும் கூட்டத்தை விட கொஞ்சம் அதிகமாக இருக்கும்.  சமீபத்தில் சில மார்க்கெட்களை புதுப்பிக்க ஒரு எலி அடித்து கொடுத்தால் ஒரு மலேசிய ரிங்கிட் என்று அறிவிப்பு செய்தார்கள். மாநகராட்சியின் முயற்சியில் 2 நாளில் பிடித்த எலிகளின் எண்ணிக்கை 7600 ஐ தாண்டியது. சில எலிகள் சினிமாவில் வரும் ஸ்டண்ட் மாஸ்டர் மாதிரி ரொம்ப பெரிய சைசில் இருக்கும். 

எலிகள் இருந்த பொந்தை நோண்டிப்பார்த்தால் எலிகள் எல்லாம் ஏதோ ரேசன் கடை / கொடுக்கல் வாங்கல் அடமானக்கடை எல்லாம் வைத்து நடத்திய மாதிரி அவ்வளவு ப்ளேனிங்கோடு வாழ்ந்த மாதிரி அடுத்த சிந்து சமவெளி நாகரிகம் மாதிரி தெரிந்தது.

இங்கு சீனர்கள் குருவிகளை வைத்து பாட்டுபாடி கேட்டுக் கொண்டிருப்பார்கள். சிலர் மிருகங்களை விரும்புவார்கள்.

I also LOVE animal, it is very TASTY

ZAKIR HUSSAIN

கண்கள் இரண்டும் - தொடர் - 19 15

லேசர் சிகிச்சை

பதினெட்டு வயது பூர்த்தியாகிய பிறகு தான் ஒருவர் இந்த சிகிச்சை மேற்கொள்ள முடியும், ஏனென்றால் அதற்கு பிறகு தான் நம் கண்ணின் அமைப்பு மாறாது. நீங்கள் Contact Lens உபயோகிப்பவரானால் மருத்துவரை அணுகுவதற்கு குறைந்தது ஒரு 15 நாட்கள் முன்பே அதை தவிர்க்க வேண்டும். பின் பல்வேறு சோதனைகள் செய்து நீங்கள் இந்த சிகிச்சையை மேற்கொள்ள தகுதியானவரா என்பதை மருத்துவர் முடிவு செய்வார். இதற்கு நீங்கள் குறைந்தது ஒரு ஐந்து மணி நேரம் ஒதுக்க வேண்டும். பின் மருத்துவர் உங்களுக்கு எப்படி இந்த சிகிச்சை மேற்கொள்ளப்படும் என்பதை மிக தெளிவாக விளக்குவார், கடுகளவேனும் நீங்கள் பயம் கொள்ள வேண்டாம் மேல் `லேசிக்' செய்து கொண்டால் கண்களில் உள்ள பார்வைக் குறைவை முழுமையாக சரி செய்ய இயலும். லேசிக் செய்த பின்பு கண்ணாடி மற்றும் கன்டாக்ட் லென்ஸ் அணிய தேவையில்லை. `லேசிக்' பார்வைக் குறைபாட்டை நிரத்தரமாக சரிசெய்யும். தற்போது லேசிக் சிகிச்சை முறையில் மேலும் ஒரு வளர்ச்சியாக இன்ட்ரா லேசிக் (intra lasik) முறை உள்ளது. 

இதில் அனைத்து சிகிச்சைகளையும் மிக நுண்ணிய லேசர் கதிர்கள் மூலமாக செய்யப் படுகிறது. அமெரிக்காவில் இந்த சிகிச்சைக்கு உள்படுகிறவர்கள் ராணுவம் மற்றும் விமான போக்குவரத்திலும் பணிபுரியலாம். இந்தியாவிலும் இதற்கு நல்ல வரவேற்பு உள்ளது. 

திருப்பூர் பழைய பஸ் ஸ்டாண்ட், கஜலட்சுமி தியேட்டர் அருகில் உள்ள லோட்டஸ் கண் மருத்துவமனையில், கண் பார்வை குறைபாடு, "பவர்' வித்தியாசங்கள் உள்ளிட்ட பிரச்னைக்கு அதிநவீன சிகிச்சை அளிக்கப்படுகிறது. கண்ணாடி மற்றும் காண்டாக்ட் அணிபவர்கள், துல்லிய பார்வை பெறும் வகையில் "லாசிக்', "எபிலாசிக்' "சையாப்டிக்ஸ்', "எபிசையாப்டிக்ஸ்' சிகிச்சை லோட்டஸ் கண் மருத்துவமனையில் அளிக்கப்படுகிறது. லேசிக் சிகிச்சை மூலம் கருவிழியில் லேசர் செலுத்தி கண்ணில் உள்ள குறைபாட்டை சரி செய்து கொள்ளலாம். 

லோட்டஸ் கண் மருத்துவமனை சேர்மன் சுந்தரமூர்த்தி கூறியதாவது:கண் பவர் குறைபாடுகளான கிட்டப்பார்வை, தூரப்பார்வை மற்றும் "சிலிண்டிரிக்கல் பவர்' குறைபாடு உள்ளவர்கள், கண்ணாடியில் இருந்து விடுதலை பெறவும், தெளிவாக பார்க்கவும் "லாசிக்', "எபிலாசிக்', "எபிசையாப்டிக்ஸ்', "இன்ட்ராலேஸ்' உள்ளிட்ட அதிநவீன லேசர் சிகிச்சை அளிக்கப்படுகிறது.

இதுவரை 30 ஆயிரத்துக்கும் அதிகமானோருக்கு லாசிக், எபிலாசிக் சிகிச்சை அளித்துள்ளோம். "வேவ் லைட் டெக்னாலஜி' என்ற ஜெர்மன் நாட்டு தொழில்நுட்பத்தில் உருவான லாசிக் மெஷின் திருப்பூர் மருத்துவமனையில் வைக்கப்பட்டுள்ளது. இதன் மூலம் உலக தரம்வாய்ந்த, உயர்தொழில்நுட்பத்துடன் கூடிய கண் சிகிச்சை, திருப்பூரில் கிடைக்க வாய்ப்பு ஏற்பட்டுள்ளது. மேலும் விவரங்களுக்கு, 0421 - 4346 060, 4346 161, 77081 - 11036, 77081 - 11018 ஆகிய எண்களில் தொடர்பு கொள்ளலாம், என்றார்.

மேலும் இதில் பல வகைகள் உண்டு, பொதுவாக Lasik சிகிச்சை தான் பல மருத்துவமனைகளில் மேற்கொள்ளப்படுகிறது, இதற்க்கு காரணம் அதற்கு ஆகும் செலவு தான் (சற்று அதிகம் தான்). இந்த சிகிச்சை மேற்கொள்ள நான் விசாரித்ததில் Agarwal 40,000/- Sankara Nethralaya 35,000/- Reya Laser Vision Centre 38,000/- மற்றும் Lasik Laser Associates 30,000/- இப்படியாக உள்ளது. இந்த நேரத்தில் நான் ஒன்றை குறிப்பிட வேண்டும், பாதுகாப்பு துறையில் இந்த முறை சிகிச்சை செய்துகொள்பவர்களை அனுமதிப்பது கிடையாது. ஆனால் இப்பொழுது புதிதாக வந்துள்ள Intralasik முறையில் (Microkeratome என்ற நுண்ணிய கத்தி உபயோகப்படுத்தாத முறை) நீங்கள் சிகிச்சை செய்து கொண்டால் முதன் முறையாக அமெரிக்க ராணுவம் அனுமதி அளித்துள்ளது

லேசிக் லேசர் சிகிச்சை குறித்து  கொஞ்சம் பார்ப்போம்

லேசிக் லேசர் என்பது ஒரு வரப்பிரசாதம் என்று சொல்லலாம். எப்படின்னா ஹை பவர் கண்ணாடி போடறவங்களுக்கு காலையில் எழுந்ததும் கண்ணாடி போடவில்லையென்றால் பார்வை தெரியாது. அவங்களுக்கு லேசிக் லேசர் சிகிச்சை ங்கிறது வரப்பிரசாதம். லேசிக் லேசர்ங்கிறது என்னன்னா கண்ணாடியும் போட வேண்டிய அவசியம் இல்லை. காண்டாக்ட்  லென்சும் போட வேண்டிய அவசியம் இல்லை.

கண்ணாடி போடறவங்க முகம் அழகாகத் தெரியணும் என்பதற்காக காண்டாக்ட் லென்சுக்குப் போறாங்க. காண்டாக்ட் லென்ஸில் சில பாதுக்காப்பா வெச்சுக்கணும் என்பதற்காகவும், காண்டாக்ட் லென்ஸ் வைத்து முகம் அலம்பக் கூடாது, தூங்கக்கூடாது இது போன்ற சிக்கல்கள் இருப்பதால் அவங்களுக்கு இந்த சிகிச்சை மிகவும் நல்லது.

இது லேசிக் லேசரால் செய்யப்படும் அறுவை சிகிச்சை. கண் கருவிழியின் வடிவமைப்பை மாற்றி சீரமைப்பது. இது சின்ன ப்ரொசீஜர் தான். கண்டிப்பா 18 வயது தாண்டியவர்களுக்குதான் செய்யணும்.

கண்ணின் கரு அமைப்பு, கார்னியாவின் ஷேப் சரியா இருக்கணும். விழித்திரை எந்தப் பிரச்சினையும் இல்லாமல் இருக்கணும். இப்படி இது எல்லாம் இருந்தால் கண்டிப்பாக லேசிக் லேசர் சிகிச்சை செய்யலாம். 

இந்த சிகிச்சை செய்ய, ஒரு கண்ணுக்கு இரண்டு அல்லது நான்கு நிமிடம் தான் ஆகும். ஒரு வாரம் கண்ணில் தண்ணீர் தூசு படாமல் இருந்தால் வாழ்நாள் முழுக்க பார்வை நன்றாக இருக்கும். 

Lasik சிகிச்சை எப்படி செய்யப்படுகிறது என்பதை விளக்க கீழே உள்ள படத்தை பார்க்கவும்.

 ஒரு மிக நவீன மிக சிறிய பிளேடு (Microkerotene) கொண்டு நம் கண்ணின் முன்பு உள்ள பகுதியில் (cornea)  ஒரு சிறிய பகுதியை (few microns) திறந்து (பயம் வேண்டாம்) அதை சற்று நீக்கிய பின்பு சிறிது விநாடிகள் லேசர் கற்றைகள் நம் கண்ணில் செலுத்தப்படுகிறது. பின் அந்த பகுதியை திறந்த மாதிரியே மூடி விடுகிறார்கள். அவ்வளவு தான் மேட்டர் ஓவர். ஒரு கண்ணுக்கு இதை செய்ய ஆனா நேரம் நான்கு நிமிடங்களுக்கும் சற்று குறைவு தான். வலி என்பது ஒன்றும் இல்லை. சிகிச்சை மேற்கொண்ட சற்று நிமிடங்களிலே பார்வையில் நன்றாக வித்தியாசம் உள்ளது.

அன்று ஒரு நாள் மட்டும் கண்னை திறக்காமல் மூடி இருப்பது நல்லது. சிலருக்கு கண் எரிச்சல், நீர் வடிதல் போன்ற தொல்லைகள் அன்று ஒரு நாள் மாட்டும் ஏற்பட வாய்ப்பு உண்டு ஆனால் எனக்கு ஒன்றும் தொந்தரவு இல்லை. மருநாள் முதல் பலுவற்ற வேலைகள் செய்யலாம். சொட்டு மருந்து விட வேண்டும். இதில் என்ன ஒரு பிரச்சனை என்றால் வெயிலில் செல்லும்பொழுது கருப்பு கண்ணாடி அணிவது நல்லது, அது கூட பரவாயில்லை ஆனால் மொத்தம் இரண்டு வாரங்களுக்கு இரவில் என்னால் வாகனம் ஓட்டிசெல்ல முடியவில்லை அவ்வளவு Glare. ஆனால் படிப்படியாக நல்ல முன்னேற்றம் இன்று ஒரு பிரச்னையும் இல்லை. கணினி உபயோகம் மற்றும் சற்று சிரமமாக உள்ளது, தொடர்ந்து மூன்று மணி நேரத்துக்கு மேல் உபயோகப்படுத்த இயலவில்லை.

முடிவாக நான் சொல்லுவது என்னவென்றால் வருடம் ஒரு முறை மருத்துவரை சந்தித்து ஆலோசனை பெற்று பிறகு கண்ணாடி மாத்தி, இந்த வேலையெல்லாம் செய்து சிறிது சிறிதாக செலவு செய்வதைவிட மொத்தமாக ஒரே முறை இந்த சிகிச்சை மேற்கொண்டு நிம்மதியாக இருங்கள்.  நான் சென்ற இந்த நாலு இடத்திலும் நான் பார்த்த வரையில் ஒவ்வொரு இடத்திலும் குறைந்தது ஐந்து சிகிச்சை செய்கின்றனர் தினமும். எந்த ஒரு வலியும் இல்லாம நோகாத நொங்கு உரிக்கிற வேல.

இந்த சிகிச்சை முறைக்கு இன்ஸ்யூரன்ஸ் கட்டுப்படுமா என்றால் கட்டுப்படாது

கண்டிப்பாக. கடந்த எட்டு வருடங்களாக இன்ஸ்யூரன்ஸ் பெரிய அளவில் மருத்துவ துறையில் சிறந்த தாக்கத்தை ஏற்படுத்தி இருக்கிறது. அதுக்கு முன்னால் நடுத்தர மக்களுக்கும் வறுமைக்கோட்டுக்கு கீழிருக்கும் மக்களுக்கும் பெரிய சிறந்த அறுவை சிகிச்சை கிடைப்பது பொருளாதார பிரச்சினையால் சிரமமாக இருந்து வந்தது. அவங்களுக்கு அரசு மூலமாக இந்த இன்ஸ்யூரன்ஸ் நல்ல பலனைக்கொடுக்கிறது. தலை முதல் கால் வரை பல நோய்களின் சிகிச்சைக்கு நல்ல மருத்துவங்கள் கிடைக்கின்றன. அரசு இன்ஸ்யூரன்ஸ்,  பல தனியார் இன்ஸ்யூரன்ஸ் பல ஸ்கீம்கள் வைத்திருக்கிறாங்க. இதனால் மக்கள் சிறந்த பலனை அடையலாம்.

மற்ற கேடராக்ட், ரெடினா, கிளக்கோமா போன்றவை கண் பார்வை குறைபாடுகளுக்கான சிகிச்சை என்பதால் இதில் வரும். ஆனால், கண்ணாடி போட்டாலும் பார்வை தெரியும் காண்டாக்ட் லென்ஸ் போட்டாலும் பார்வை தெரியும் எனும்போது லேசிக் லேசர் சிகிச்சை தன்னுடைய வசதிக்காக செய்யப்படுவதால் அதற்கு இன்ஸ்யூரன்ஸ் கிடையாது. பிற்காலத்தில் வரலாம். அதற்கு வாய்ப்பிருக்கிறது.

பள்ளி பாட சாலைகளில் குழந்தைகள் கண்களை தேய்ச்சுகிட்டிருப்பாங்க. போர்டை உற்றுப் பார்த்துக்கொண்டிருப்பார்கள். பின்னாடி வரிசையில் இருந்தால் கண் தெரியவில்லை என்பார்கள். ஆசிரியர்கள் இதை பெற்றோரிடம் சொல்லவேண்டும்.

கண் பார்வையை எப்படி காப்பாத்தணும், கண்ணுக்கு வரும் வியாதிகள் என்னென்ன என்றும் முக்கிய உடல் ரீதியான பிரச்சனைகள் என்னென்ன என்றும் கண்டிப்பாக  சொல்லித்தர வேண்டும். அதற்கென்றே ஒரு பீரிடு ஒதுக்கி அதற்கென்று உதவும் பல பொதுநல தொண்டு நிறுவனங்களை அனுகி பிரத்தியோக நபர்களை கொண்டு மாணவ மாணவிகளுக்கு சொல்லித்தரவேண்டும்.

லேசர் கண் அறுவை சிகிச்சை

கண்ணு நல்லாருக்கும். ஒரு பிரச்சனையும் வராது அதீதமான வெளிச்சம் வந்தால் கண் மிகவும் கூசும்னு சொல்லுவார்கள் அல்லவா அதீதம்னா என்னன்னு கேட்டீங்கன்னா - இராத்திரி கார் ஓட்டுணம்னா - ஹை வேல - இருட்டுல - எதிர் கார்களோட ஹை-பீம் லைட் அதீதமா இருக்கும். ரொம்ப நேரம் ஓட்ட முடியாது - கண்ணுக்குள்ள அடிச்சிட்டு போற மாதிரி இருக்கும். நல்ல பழக்கம் உள்ள ட்ரைவர்கள் எதிர்ல கார் வந்தா ஹை-பீம் கம்மி பண்ணுவாங்க ஒவ்வொரு முறையும். இது ( ஹை வேல - இருட்டுல - ஹை-பீம் ) அறுவை சிகிச்சை செய்யாதவங்களுக்குமே கஷ்டமாதான் இருக்கும். இப்படி இரவில் ட்ரைவிங் செய்யக்கூடியவர்களுக்கு  இந்த சிகிச்சை மிகவும் அவசியமாகும்

நான் கிட்டத்தட்ட ஒரு வருஷம் ஆராய்ச்சி பண்ணுனேன் இதைப் பத்தி. ஆராய்ச்சின்னா சும்மா இன்டெர்னெட்ல நேரம் கிடைக்கும்போதெல்லாம் படிச்சுப் பாத்தேன் - மருத்துவர்கள் என்ன சொல்றாங்க - சிகிச்சை பெற்றவங்க என்ன சொல்றாங்க - எல்லாமே. என்னன்ன கெட்ட விளைவுகள் வரலாம்னு ஒரு லிஸ்டு போட்டு பாத்தேன். கார்னியா போனா, புது கார்னியா போடலாம்னு தெரிஞ்சுக்கிட்டேன்! அதுக்கு எவ்வளவு பணம் ஆகும், எப்படி தானம் பண்றாங்க, எந்த மாதிரி மருத்துவமனைகள்ல பண்றாங்க எல்லாம் தெரிஞ்சிக்கிட்டேன். 

பஸ்ல ட்ரைன்ல போகும் போதெல்லாம் குருடர்களை கவனித்துப் பார்த்தேன். டி.சி. ட்ரைன்ல ஒரு முறை பார்த்த குருட்டுத் தம்பதியரின் அன்பு பரிமாறல்கள் இன்னும் மனசில இருக்கு. சின்னப் புள்ளையில இருமினாலே வாழ்வே மாயம் வியாதி, வயிறு வலிச்சா கேன்சர்னு கனவு காணுற மாதிரியான அல்பத்தனம்தான். இப்ப நினைச்சா பயங்கர சிரிப்பா இருக்கு.

இந்த சிகிச்சைக்கு மிகவும் முக்கியமானது - தடிமனான கார்னியா. கார்னியா தடிமும் பார்த்து, லேசர் செய்ய முடியுமா முடியாதான்னு பாக்குறதுக்கு ஒரு டெஸ்ட் இருக்கு. அதை லேசர் சிகிச்சை அளிக்க கூடிய டாக்டர்களே பார்த்து நம் கணகளுக்கு அந்த சிகிச்சை செய்யமுடியுமா முடியாதா என்று சொல்லிவிடுவார்கள்

அறுவை சிகிச்சை பத்தே நிமிடம். நாமதான் ஒத்துழைக்கணும். நம்முடைய ஒத்துழைப்புல தான் சிகிச்சையின் வெற்றி இருக்கு சிகிச்சை செய்து கொண்ட ஓரிரு நாட்களில் கண்கள் பழைபடி நன்றாக பார்க்கலாம்.

சவுண்ட் ஸ்கேப்

கண்பார்வை இல்லாதோருக்கு வேறு வகையிலும் ஆராய்ச்சி மேற்கொள்ளப்பட்டு வருகின்றது அவற்றை பார்ப்போம்.

காதில் பொருத்தப்படும், விசேஷ கருவியின் மூலம், கண் பார்வையற்றோரும், காட்சிகளை காணும் வகையிலான அதிநவீன கருவியை ஆராய்ச்சியாளர்கள் கண்டுபிடித்துள்ளனர்.

கண் பார்வையற்றோரும் காட்சிகளை காணும் வகையிலான கருவியை வடிவமைப்பதில், உலகின் பல நாடுகளைச் சேர்ந்த ஆராச்சியாளர்களும், கடந்த பல ஆண்டுகளாக ஆய்வு நடத்தி வருகின்றனர். இவர்களின் ஆராய்ச்சியின் பலனாக, காட்சிப் பதிவுகளை ஒளி அலைகளிலிருந்து ஒலி அலைகளாக மாற்றம் செய்து, அதற்கான மொழியின் மூலம் அதை மீண்டும் ஒளி அலைகளாக மாற்றி, மூளைக்கு கொண்டு செல்லும் அதிநவீன கருவியை ஆராய்ச்சியாளர்கள் வடிவமைத்துள்ளனர்.

இதன் மூலம், பிறவியிலேயே பார்வை இழந்தவர்கள் கூட, காதில் பொருத்தப்படும் விசேஷ கருவியின் உதவியுடன் காட்சிகளை காண முடியும் என, ஆய்வாளர்கள் நம்பிக்கை தெரிவித்துள்ளனர்.

இதுகுறித்து, ஜெருசலேமில் உள்ள ஹீப்ரு மருத்துவப் பல்கலைக்கழகத்தைச் சேர்ந்த பேராசிரியர், அமிர் அமேதி கூறியதாவது, கண் பார்வையற்றோரின் காதுகளில் பொருத்தப்படும் இந்த கருவி, காட்சிகளை ஒளி அலைகளின் அதிர்வுகளை உள்வாங்கி, அதை ஒலி அலைகளாக பதிவு செய்யும் தன்மை கொண்டது.

இந்த கருவிகளில் பொருத்தப்பட்டுள்ள கேமராக்களில், “விஷூவல் வேர்டு ஃபார்ம்” எனப்படும் காட்சிகளுக்கான, ஒளி மற்றும் ஒலியியல் மொழிகள் எழுதப்பட்டுள்ளன. எனவே, இவை உள்வாங்கிய ஒளி அலைகளை, விஷூவல் வேர்ட் ஃபார்மில் ஒலி எழுத்துகளாக மாற்றி மூளைக்கு அனுப்புகிறது. மூளையில் உள்ள காட்சிப் பதிவுகளை அறியும் பகுதியில், இவை மீண்டும் ஒளி அலைகளாக மாற்றம் செய்யப்படுவதால், இந்த கருவியின் மூலம் பார்வையற்றோரும் காட்சிகளை காண முடியும்.

இந்த கருவியில் உள்ள, “சென்சரி சப்ஸ்டிடியூசன் டிவைஸ்கள்” ஒலி அலைகளின் மூலம் பதிவு செய்யப்படும் காட்சிப்பதிவுகளை, “விஷூவல் டூ ஆடியோ மற்றும் ஆடியோ டூ விஷூவல்” என்ற முறையில், காட்சியாக மாற்றம் செய்கிறது. இதற்கு “சவுன்டுஸ்கேப்” என்று பெயர். (பக்கர் வாய்ஸ் சவுண்ட் சர்வீசை உள் அடக்கியது  அல்ல)  இந்த கருவியை பார்வையற்றோரிடம் பரிசோதனை செய்ததில், நல்ல பலன் கிடைத்துள்ளது. அவர்களால், காட்சிகளை தெளிவாக காண முடிகிறது. இந்த கருவியில் நிறை காட்சிகளுக்கு ஒலி வடிவம் கொடுத்து அதற்கான மொழியை எழுத வேண்டியுள்ளது.

முதற்கட்ட ஆராய்ச்சியில் வெற்றி கண்டுள்ளார்கள் இதற்கான முழு பணிகளும் முடிந்த பின், இந்த கருவியை வெற்றிகரமாக வெளியிடுவார்கள். இதன் மூலம், பார்வையற்றோரின் நீண்டநாள் கனவு நிறைவேறும். அவர்களும் காட்சிகளை கண்டு மகிழ முடியும். பிறகென்ன ரயில் பயணத்தின்போது இனிய குரல்களில் பாடல்களை கேட்க முடியாது. நமதூரில் ஆட்டோவில் விளம்பரம் செய்பவரின் (பெயர் தெரியவில்லை) வர்ணனைகள் கூடுவதோடு அல்லாமல் வார்த்தை ப்ரயோகம் மிக அற்புதமாக அமையும். இப்பொழுது கண்பார்வை இல்லாமலே இந்த போடு போடுகிறார். அப்புறம் சொல்லாவா வேண்டும்.

இதை அடுத்து "குளுக்கோமா (Glucoma)" என்னும் கண்களை குருடாக்கும் கண் பிரஸர் நோய் பற்றி இதை தொடர்ந்து  அடுத்து வர இருக்கும் அத்தியாயத்தில் பார்போம். 

தொடரும்

அதிரை மன்சூர்

சிந்திக்கத் தூண்டும் சித்திரங்கள் - தொடர்கிறது.... 23

அதிரைநிருபரில் தொடர்ந்து இடம் பெற்று வரும் சிந்திக்கத் தூண்டும் சித்திரங்களின் வரிசையில் இங்கு இடம் பெற்றிருக்கும் சித்திரங்கள் யாவும் அதன் வண்ணங்களின் பாத்திரங்கள் ! அவை ஒவ்வொன்றும் தனக்கே உரிய நுட்பத்தை மட்டுமல்ல தன்னகத்தே உள்ளடக்கிய தகவல்களோடு பளிச்சிடுகிறது !

முதல் சித்திரம் முதல் நிறைவுச் சித்திரம் வரை உங்கள் மனதில் உதிக்கும் சிந்தனைகளை இங்கே சிறகடிக்க விடுங்கள் !

ஷஃபி அஹ்மது

பேகம் ஹஜரத் மஹல் 25

தொடர் : பனிரெண்டு

ஆங்கிலேயரை எதிர்த்து வீர சுதந்திரம் வேண்டி நின்ற வீரப் பெண்களின் வரலாற்றுப்   பட்டியலை வரிசைப் படுத்தும்போது வழக்கமாக ஜான்சி ராணி, வீரமங்கை வேலு நாச்சியார், தில்லையாடி வள்ளியம்மை என்கிற சில குறிப்பிட்ட பெயர்களைத்தான் படித்திருக்கிறோம் கேட்டு இருக்கிறோம் . பல இஸ்லாமியப் பெண்டிர்களின் பெயர்கள் மறைக்கப் பட்டு இருக்கின்றன. அவர்களுள் முக்கியமானவர் பேகம் ஹஜ்ரத் மஹல் ஆவார்.  

ஆண்களை தைரிய புருஷர்கள் என்று வர்ணிக்கும் வரலாறுகளுக்கும் சமூகத்துக்கும் மத்தியில்  மனத்தெளிவுடன் கூடிய தைரியம் கொண்ட ஒரு முஸ்லிம் பெண்மணி அடக்கு முறைக்குப் பணியாமல் ஆசை வார்த்தைகளுக்கு உடன்படாமல் வாழ்ந்து காட்டினார் என்றால்  அவர்  பேகம் ஹஜ்ரத் மஹல் ஆகும். இவரைப் பற்றிய வரலாற்றுக் குறிப்புகள் புல்லரிக்க வைப்பதுடன் ஆங்கில ஏகாதிபத்தியத்தை எதிர்த்த இந்தப் பெண்மணியை நினைத்து இந்தியாவில் வாழும் ஒவ்வொரு முஸ்லிம்களையும் தலை  நிமிரவும் செய்கிறது. (Begum of Outh / Oudh / Awadh) என்று இந்திய சுதந்திரப் போராட்ட வரலாறு சில வரிகளில் எழுதிச் செல்லும் ஹஜ்ரத் மஹலின் வீரம் - தேசாபிமானம் - தியாக அர்ப்பணிப்பு பற்றிப் பார்க்கலாம். 

இதற்கு முன் நாம் எழுதிய அத்தியாயத்தில் 1857 - இல் , இந்தியாவின் முதல் சுதந்திரப் போர் என்று வரலாற்றில் வர்ணிக்கப் படும் சிப்பாய்ப் புரட்சி பற்றியும் , அந்தப் புரட்சியில்  மொகலாயப் பேரரசின் இறுதி மாமன்னர் பகதூர்ஷா  ஜஃபர் அவர்களின் கீழ் இணைந்த ஒட்டுமொத்த இந்தியாவின் சிற்றரசர்கள் பற்றி நாம் கண்டோம். 1857 - இல் மாமன்னர் பகதுர்ஷா ஜஃபர் தலைமையில் இந்திய ஆட்சியாளர்கள் ஆங்கிலேயருக்கு  எதிராக இப்படி  ஒருங்கிணைந்த போது, அதில் அரசாண்ட இரண்டு வீரமங்கையர் இருந்தனர். அவர்களில் ஒருவர் ஜான்சிராணி லக்குமிபாய், மற்றொருவர் உத்திரப்பிரதேசத்தில் ஒளத் (Outh) என்ற குறுநிலப்பகுதியை ஆண்ட பேகம் ஹஜ்ரத் மஹல் ஆவார்.

ஒளத் நவாபான வஜீத் அலிஷாவை ஆங்கிலேயர் சிறைப்படுத்தி வைத்திருந்தனர். அவரது புதல்வாரன இளவரசர் பிரிஜிஸ் காதிரைச் சுதந்திரப் போராட்ட வீரர்கள் சிம்மாசனத்தில் ஏற்றினர். பிரிஜிஸ் காதிர் சிறுவராக இருந்த காரணத்தினால் ஒளத் நிர்வாகம் அவரது பிரதிநிதி என்ற முறையில் அவரது தாயாரான ராணி ஹஜ்ரத் மஹலிடம் ஒப்படைக்கப்பட்டது. ஒரு சாதாரண ஏழைக் குடும்பத்தில் பிறந்து நவாபுக்கு  இரண்டாம் மனைவியாக அரண்மனைக்குள் புகுந்த பேகம், குழப்பமான நிலையிலும் உறுதியும் திறமையும் துணிச்சலும் வாய்க்கப் பெற்று ,  நிர்வாக்தை ஒழுங்காக நடத்தி வந்ததிலிருந்து அவரது இணையற்ற பெருமை வெளியாகிறது. அவருடைய நிர்வாக சாமர்த்தியத்தை ஆங்கில சரித்திர ஆசிரியர்களும் மிகவும் புகழ்ந்து பாராட்டி இருக்கிறார்கள். 

கணவன் சிறையில் – ஏகாதிபத்திய சக்திகள் சுற்றிலும் சூழ்ந்து நின்ற வேளையில் ஆங்கில ஆட்சியின் தலைமையை எதிர்த்து துணிச்சலுடன் பேகம் ஹஜரத் மஹல்  ஒரு பிரகடனத்தை விடுத்தார். அந்தப் பிரகடனத்தின் வாசகங்கள் ஏகாதிபத்தியத்தை எதிர்த்து நின்ற ஒரு முஸ்லிம் பெண்மணியின் வீரத்தைக்  குறிப்பிடுகிறது. 

"To  eat  pigs and drink wine, to bite greased cartridges and to mix pig's fat with sweetmeats, to destroy Hindu;s temples  and masjids of   Muslims  ,  on pretense of making roads, to build churches, to send clergymen into the streets to preach the Christian religion, to institute English schools, and pay people a monthly stipend for learning the English sciences, while the places of worship of Hindus and Muslims are to this day entirely neglected; with all this, how can people believe that religion will not be interfered with?" என்றார். 

ஒரு மாபெரும் ஆதிக்க சக்தியாக விரிவடைந்து கொண்டிருந்த ஆங்கில ஏகாதிபத்தியத்தை எதிர்த்து இப்படிப்பட்ட கடுமையான வாசகங்களைக் கொண்ட பிரகடனத்தை ஒரு சிறு குறு  நிலத்தை ஆண்ட பேகம் ஹஜரத் மஹல் வெளிப்படையாக விடுத்தார்  என்றால் அவரது தைரியத்தைப் புகழ வார்த்தைகளே இல்லை.  அதனால்தான் Qurratulain Hyder என்கிற வரலாற்று ஆசிரியர் பேகத்தை  இவ்விதம் புகழ்கிறார். 

“Begum Hazrat Mahal of Oudh was the last of the breed of able queens and generals. The queen led her kingdom's army into battle during the revolt of 1857. Even after she was defeated she defied Queen Victoria's famous Proclamation and issued a counter Proclamation”

மேலும் இளவரசர் அஞ்சும் குதர் என்பவர் ”  பேகம் ஹஜரத் மஹல் ஒளத் சாம்ராஜ்ஜியத்தை ஆண்ட அரச வம்சத்தின்  முகங்களில் வழிந்த  கோழைத்தனத்தை துடைத்து எறிந்தவர் “ என்று கூறுகிறார்.   

“She wiped out the blot of cowardice from the face of the ruling family of Avadh.” -Prince Anjum Quder

1857 - இல் சிப்பாய் கலகம் உச்சத்தில் இருந்த காலகட்டத்தில் பேகம் தனது படையுடன் சென்று லக்னோவில் இருந்த  பிரிட்டீஷ் தூதரகத்தை முற்றுகை இட்டார். அங்கிருந்த பிரிட்டீஷ் தூதுவர்கள் சிறைப் பிடிக்கப்பட்டனர். தூதரகத்தை இடித்து தரைமட்டமாக்கினார்.

பேகத்திற்கு மக்கள் மத்தியிலும் வீரர்கள் மத்தியிலும் மிகுந்த செல்வாக்கு இருந்தது. அவர் தலைமையின் கீழ் திரண்ட புரட்சியாளர்கள் இரண்டு லட்சம் பேர் என்றும் ஆங்கிலேயர்களை அவர் எதிர்த்த இறுதி யுத்தத்தில் பதினாயிரக்கணக்கில் வீரர்கள் வந்தனரென்றும் சரித்திர ஆசிரியர்கள் குறிப்பிடுகின்றனர்.

பிரிட்டீஷ் படைப் பிரிவுகளில் பணியாற்றிய சிப்பாய்கள் மத்தியில் கூட, பேகத்திற்கு மிகுந்த ஆதரவு இருந்தது. இதனால் பேரக்பூரில் இருந்த 34 வது படைப் பிரிவை ஆங்கில அரசு கலைத்து விட்டது. ஏனென்றால் அப்படைப்பிரிவில் இருந்த பெரும்பான்மையானவர்கள், ஒளத் பகுதியைச் சார்ந்த முஸ்லிம்களாவர். 

1858 மார்ச் 6 ஆம் தேதி 30 ஆயிரம் துருப்புகளுடன் வந்த மேஜர் காலின் படையோடு ஐந்துநாட்கள் தொடர்யுத்தம் நடத்தினார். இப்போரில் மாமன்னர் பகதூர்ஷா அவர்களின் மகன்களின்  தலைகளைக் கொய்து அவற்றை தட்டில் வைத்து பக்தூர்ஷாவுக்கு சிறையில் வைத்துக் கொடுத்த கொடியவனான மேஜர் ஹட்ஸன், பேகத்தின் வீரர்களால் கொல்லப்பட்டான். 

ஆயினும் , ஆங்கிலப் பெரும்படையின் தாக்குதலைச் சமாளிக்க முடியாமல் தனது ஆதவாளர்களுடன் ஒளத்தை விட்டுவெளியேறினார். பிதாவ்லியில் முகாமிட்டிருந்த பேகத்தை ஆங்கிலப் படை தொடர்ந்து வந்து விரட்டியது. அவர் தன் ஆதரவாளர்களுடன் நேபாளத்திற்குள் சென்று தலைமறைவானார். (R.C. AgarWal, Constitution Develapment of India and National Movement).

பேகத்தின் ஆட்சியையும் அரசுடைமைகளையும் சொத்துக்களையும் ஆங்கில அரசு பறிமுதல் செய்தது. மற்ற நவாபுகள், மன்னர்கள் போல் ஆங்கிலேயருக்கு மானியங்களை வழங்கி, அவர்களது நிர்ப்பந்தங்களுக்கு ஒத்துப் போயிருந்தால் நிம்மதியாக சகல சௌபாக்கியங்களுடன் அவர் ஆட்சி நடத்தியிருக்கலாம். ஆனால் மண்ணடிமை தீர ஏகாதிபத்தியத்திற்கு எதிராக அவர் குரல் கொடுத்ததால் இந்நிலைக்கு ஆளானார். தேசத்தின் விடுதலைக்காக தன் ஆட்சி அதிகாரங்கள் அனைத்தையும் இழந்து நாட்டை விட்டே வெளியேறும் நிலைக்காளான பேகம் ஹஜ்ரத் மஹலின் தியாகங்கள் நெஞ்சை உருக்கும் தியாகத்தின் சான்றுகளாகும். 

நேபாளத்துக்குள் தலை மறைவான பேகம் அந்நாட்டின் அன்றைய அரசர் ராணாவின் பிரதம மந்திரி ஜாங்க்க பகதூர் இடம் புகலிடம் கோரினார். ஆரம்பத்தில் ஆங்கிலேயருக்கு பயந்து அவருக்குப் புகலிடம் கூடத் தரப்படவில்லை. நாடு நகரங்கள் மற்றும் நவநிதியும் இழந்து நின்ற அரசிக்கு இறுதியில் நேபாளத்தில் புகலிடம் தரப் பட்டது.  

இவர் தப்பிப் போகும்போது கொண்டு சென்ற செல்வம் யாவும் அவரைப் போல நாடு துறந்து பேகத்துடன் கூட வந்த அகதிகளின் செலவுக்கே ஆகிப் போனது. இதனால் வறுமை வாட்ட ஆரம்பித்தது.  அன்றிலிருந்து பதினாறு வருடங்களுக்குப் பிறகு 1874–ல் காத்மாண்டுவில் வறுமையிலேயே  உழன்று தனது வாழ்வை நீத்தார். எப்படிப்பட்ட வறுமை என்றால் அவரது மையத்தை அடக்கம் செய்யும் செலவுக்குக் கூட பணம் எதுவும் அவரிடம் மிச்சம் இருக்கவில்லை. 

ஒரு சிற்றரசின் மகாராணி இப்படி சீரழியும் வாழ்வைத் தேர்ந்தெடுத்துக் கொண்டது இந்த நாட்டுக்காக அவர் செய்த அளவிட முடியாத தியாகத்தின் அடிப்படையிலானது. முதல் சுதந்திரப் போரின் போது ஆங்கிலேயர்களால் மூன்று முறை சமாதானக் கொடி பிடிக்கப் பட்டு இருந்ததை ஏற்று அவர்களை எதிர்த்து ஓங்கிய வாளைக் கீழே போட்டிருந்தால் மீண்டும் அதே சாம்ராஜ்யத்தின் அரசியாகவே அவர் இருந்து இருப்பார். இப்படி நாட்டை   விட்டு  நாடோடியாக நாதியற்று மரணம் அடைந்து இருக்க வேண்டிய அவசியம் ஏற்பட்டு இருக்காது. 

பேகம் ஹஜரத் மஹலின் வரலாறு இப்படிப் பட்ட புகழ்மொழிகளால்தான் வரையப்பட்டுள்ளது.  

A girl from a poor family, she rose to the height of a Queen and still higher to a place in history where here selfless devotion to the cause of freedom , her feminine  courage , her patriotism , her example of national pride shall ever remain resplendent with a hundred in aspiring themes. Her memory too is entitled to the respect of the brave and the true hearted of all nations.“ Ifthikar- un- Nisha “ was really the “ Pride of All Woman” 

தாய்நாட்டுக்கான சுதந்திரத்துக்காகப் போராடி அந்நிய மண்ணில் உயிர் துறந்த பேகம் ஹஜரத் மஹலுக்கு லக்னோவின் விக்டோரியா பூங்காவில் 1962   ஆம் ஆண்டு ஆகஸ்டு 15 ஆம் நாள் சலவைக்  கற்களால் ஆன நினைவுச்சின்னம் ஒன்று  நிறுவப்பட்டது.  இந்தப் பூங்கா இன்று பேகம் ஹஜரத் மஹல் பூங்கா என்று பெயரிடப்பட்டுள்ளது.  இதே நினைவுச் சின்னத்தில் ஒளத் இராஜவம்சத்தின் பாரம்பரிய கலாச்சார பிரதிபலிப்புகளை உள்ளடக்கிய பகுதியும் அழகுபடுத்தப் பட்டு அமைக்கப்பட்டு இருக்கிறது. பேகத்துடைய நினைவுச்சின்னம் அமைந்துள்ள இந்தப்  பூங்காவில்  மதச்  சார்பின்றி ராம்லீலா மற்றும் தசராப் பண்டிகைகள் இன்றும் விமரிசையாகக் கொண்டாடப் படுகின்றன. 

இன்ஷா அல்லாஹ் இன்னொரு வரலாற்றுடன் தொடரும். 

இபுராஹீம் அன்சாரி

இத்தியாதி இத்தியாதி - வெர்ஷன் - 4 50

1)  வலைப்பூ வளர்ப்பு

இதைப்பற்றி எழுத வேண்டும் என்கிற எண்ணம் எனக்கும் என் மலேசிய நண்பனுக்கும் நீண்ட நாட்களாக உண்டு.  “படிக்கட்டுகள்” எழுத ஆரம்பித்ததிலிருந்தே அவன் தனது இயல்பான தீவிர நகைச்சுவையிலிருந்து சற்றே விலகி மிதமான, சற்றே மிதமான நகைச்சுவைக்கு மாறிவிட்டதால், இப்போது இதை எழுதச்சொன்னால் அவனுக்கு எதிராக வழக்குத் தொடுக்குமளவிற்கு சீரியஸாக எழுதிவிடுவானோ என்கிற பயத்தால் நானே கோதாவில் இறங்கி இருக்கிறேன்.  அவன் அளவிற்கு சிரிக்கவைத்தே வயிற்றுவலி வரவைக்க என்னால் இயலாது எனினும் கொஞ்சமாவது கிச்சுகிச்சு மூட்டமுடியும் என்கிற நம்பிக்கை எனக்குண்டு.

இனி இக்கட்டுரையின் பேசுபொருளுக்குள் நுழைவோம்.  நாட்குறிப்பேடு (diary) எழுதும் பழக்கம் எனக்குக் கொஞ்ச காலம் இருந்தது. எழுதப் படிக்கத் தெரியாத என் உறவுக்கார ‘அங்கிள்’ ஒருவருக்கு இலவசமாகக் கிடைத்த டையரி ஒன்றை ‘படிக்கிற புள்ள’யாகிய எனக்குத் தந்து புது பழக்கத்தை உருவாக்கி விட்டார் (இந்த நோட்டு உன் க்ளாஸுக்கு உள்ளதாப் பாரு).  ஏதோ ஒரு பள்ளி இறுதியாண்டுகளில் தொற்றிய அந்தப் பழக்கம் கல்லூரிக் காலங்களில் தீவிரம் அடைந்து, கல்யாணம் ஆகும்வரை விடாப்பிடியாகத் தொடர்ந்தது. ஒவ்வொரு  வருடத்தின் துவக்கத்திலும் ‘எனக்கு நல்வழி காட்டு இறைவா’ என்ற முதற்பக்க வேண்டுதலோடு சுறுசுறுப்பாகத் தொடங்கப்படும் என் குறிப்பேட்டில் முதல் தேதியிலிருந்து சில காலங்கள்வரை விழித்தது, உண்டது, உடுத்தியது, சென்றது, வந்தது என எல்லா விவரங்களும் எழுதப்பட்டிருக்கும்.  இத்தனை மணிக்கு இன்ன செய்தேன் என்றெல்லாம் மிகவும் பொறுப்பாக எழுதி வைக்கத் துவங்கி, நாட்பட நாட்பட அதுவே ஒரு சுமையாகிப் போய் காலப்போக்கில் ஒன்றுமே எழுதாமல் விடப்பட்டிருக்கும் பக்கங்களைப் பார்த்து நான் இருக்கேனா போய்ச் சேர்ந்துவிட்டேனா என்று கேட்குமளவுக்கு பக்கங்கள் தொடப்படாமலிருக்கும்.  பிந்தையக் காலங்களில் ஆங்காங்கே கவிதைகளாகக் கிறுக்கி வைக்கப்பட்டிருக்கும். எல்லாம் கற்றுக்குட்டி கவிதைகள். சாம்ப்பிலுக்கு ஒன்னு:

அன்பே

நாம் 

லவ் ஸர்க்யூட்டை

சரியாகத்தானே போட்டோம்

பிறகு ஏன்

உன்னைத் தொட்டால்

ஷாக் அடிக்கிறது?

இப்போது, இந்த நாட்குறிப்பேடு டிஜிட்டலில் வந்துவிட்டதுபோலும். ஆளாளுக்கு திறந்து வைத்துக் கொண்டு எழுதிக் கொண்டிருக்கிறார்கள். நாட்குறிப்பேடு வலைப்பூ (blog) என்றாகிப்போனது.  என்ன ஒரு வித்தியாசம் என்றால் என் டயரியை மூடி மேசையின் இழுவறக்குள் வைத்திருப்பேன்; ப்ளாகையோ திறந்து போட்டு வைத்திருப்பதால் யார் வேண்டுமானாலும் வாசித்துப் போகலாம்.  தத்தம் கருத்துகளையும் சொல்லிவிட்டுச் செல்லலாம் போன்ற உபரி வசதிகளோடு வலைப்பூக்கள் கலை கட்டுகின்றன. நல்ல ஆரோக்கியமான விஷயம்தான்.  ஆனால், என் குறிப்பேடுகளைப் போலவே பல நாட்கள் எந்தவித பதிவுகளும் பதியப்படாமல் பல வலைப்பூக்கள் வெறிச்சோடிப்போய்க் கிடக்கின்றன.  

“ஜாயிரு, இன்னிக்கு அந்த ப்ளாக் பார்க்கப் போகிறேன். துணைக்கு வாயேன், தனியாகப் போக பயமாயிருக்கு” என்று கேட்குமளவிற்கு இருண்டுபோய்க் கிடக்கின்றன. அவனோ “அங்கேயெல்லாம் போகாதடா பூச்சி வட்டை இருந்து கடிச்சிடப் போவுது” என்பான். ஏற்கனவே பதியப்பட்டு நாட்பட்டுப்போன பதிவுகளைச் சொடுக்கினால் தூசு கிளம்பி நெடி ஏறி தும்மல் வருமளவுக்கு பாழடைந்துபோய்க் கிடக்கின்றன.  கோவாலு துணைக்கு இல்லாமல் எந்த மாப்ளேயும் தனியாகப் போக முடியாத அளவுக்கு ஒட்டடையோடும் காலாவதியானப் பதிவுகளின் இடிபாடுகளுடனும் வெளவ்வால் அடைந்துபோய் கிடக்கின்றன பல ப்ளாக் கள்.  பழைய பேப்பர் வாசிக்கும் பழக்கம் உள்ளவர்களுக்கு மட்டும் என்று வெளியே ப்ரவ்சிங் செய்யும்போதே போர்ட் போட்டுவிடுவது நல்லது. ப்ளாகுக்குச் சொந்தக்காரர்களே வரதட்சணை பாக்கி வைத்துவிட்ட மாமியார் வீட்டைப்போல புறக்கணித்துவிடுவதால் அவர்கள் வலைப்பூ வாழாவெட்டி ரேஞ்சுக்குப் பார்க்கப் பரிதாபமாக இருக்கிறது.  சில வலைப்பூக்கள், என்னுடையதையும் சேர்த்து, அன்டர் கன்ஸ்ட்ரக்ஷன் என்று பல வருடங்களாக அப்படி அப்படியே கிடக்கிறது.  சிமென்ட் செங்கல்லாம் இருந்தும் கட்டி முடிக்காமல் ஜல்லியடிக்கின்றன.

வலைப்பூக்களுக்குப் பெயர் வைப்பதில் எல்லோருமே தன் முழுத் திறமையையும் காட்டியிருப்பர்.  பிள்ளைக்குப் பேர் வைப்பதைவிட ப்ளாக்குக்குப் பேர் வைப்பதற்கு அதிக சிரத்தை எடுத்துக்கொண்டதாகத் தோன்றும். தலைப்புக்குக்கீழே ஒரு கோஷம் இருக்கும். அதில் நச்சென்று சிலரும் நசநசவென்று சிலரும் பஞ்ச் டயலாக் ஸ்டைலில் எழுதி வைத்திருப்பர்.  ஆயினும் அந்த கோஷத்திற்கும் பதிவுகளுக்கும் குறைந்த பட்சம் ஆயிரம் வித்தியாசங்கள் இருக்கும்.  கவிதை வலைப்பூக்களில் பெரும்பாலும் பூ, நிலா, மழை, பெண் இவையில்லாமல் கவிதையே இருக்காது.  இதையும் தாண்டி சிலர் தம் நிலையை உண்மையிலேயே அறியாது வித்தியாசமாக எழுதுகிறோம் என்கிற பேரில் டபுள் ஸ்ட்ராங்காக எழுதி விடுவதால் எனக்கும் என் சுற்றத்திற்கும் நட்புக்கும்கூட புரிவதில்லை.  தமிழ் எழுத்துகளை தெளித்து வைத்தால் அது மொழியாகாது; புரிந்தாலே தமிழ் என்பதை யாராவது இவர்களுக்கு எடுத்துச் சொன்னால் வாசிப்பவருக்கு தலையில் முடி மிஞ்சும். 

திருட்டு விசிடியைப்போல சில ப்ளாக்’கள் பிறர் படைப்பைத் திருடி கீழே தம் பெயரைப் போட்டுப் பதிந்து வைத்துள்ளனர். பல பெண்களின் தளங்கள் பழக்க தோஷத்தால் ஆலங்கரிக்கப்பட்டு படு ஷோக்காக இருக்கும்.  தலைப்பூவைப்போல அழகாக தலைப்பு வைத்தாலும் வலைப்பூ வாசிக்க வருபவர்களுக்கு ஒரு களைப்பு வராமல் சுவாரஸ்யமாக வைத்திருத்தல் அவசியம்.

தத்தம் வலைப்பூக்களைக் கொண்டு வாட்ப்போர் போல சதாவும் பிரச்னைகளை கிளப்புவது தற்கால வலைப்பூக்களின் மற்றும் சமூக வலைதளங்களின் வாடிக்கையாகி விட்டது.  எதற்கெடுத்தாலும் பிற தளங்களைக் குறை சொல்வது, தன்னிச்சையாக இயங்கும் வலைஞர்களை வம்புக்கிழுப்பது, எந்த ஒரு சமூகச் செயல்பாடுகளிலும் தமக்கு என்றொரு நிலைபாடு இல்லாமல் பொத்தாம் பொதுவாக ஏனோதானோவென்று பதிவுகளை வெளியிடுவது போன்றவற்றால் ஊடகவியலைப் பற்றி ஒரு அடிப்படை ஞாயதர்மம்கூட அறியாமல் இருப்பது வேதனைக்குரியது.  தவிர, வெளியிடப்படும் வாழ்வியல், உளவியல் மற்றும் தத்துவப் பதிவுகள் வாழ்க்கையை ஊக்குவிப்பதாக இருக்க வேண்டுமேயொழிய ஒப்பாரி வைக்கச் சொல்வதாக இருக்கக் கூடாது. 

O0O0O0O0O0O0O0O0O0O0O0O0O0O0O0O0O

02) விபரீதம் – ஒரு மாதிரி உரையாடல்

-அஸ்ஸலாமு அலைக்கும் 

-வ அலைக்குமுஸ்ஸலாம். செளக்கியமா? பார்த்து நாளாச்சு?

-நல்லாருக்கேன். நீங்க எப்டி இருக்கீங்க? உங்களத்தான் பார்க்க முடியல

-என்ன பண்றது நாம் எல்லோருமே பொழப்புக்காகத்தானே பிரிஞ்சி கிடக்கோம். ம்..அப்புறம்?

-உங்க கிட்ட கொஞ்சம் பேசனும். எப்ப வீட்டுக்கு வர?

-என்ன விஷயம்?

-இல்ல நம்ம தவ்ஹீது பள்ளி கட்டுமான விஷயமாப் பேசனும்.

-அல்லாஹ்வோட பள்ளின்னு சொல்லுங்களேன்.

-அல்லாஹ்வோடதுதான். ஆனா, தவ்ஹீதுக்கென்று தனிப்பள்ளி காண்கிறோம்

-பொதுவாக அல்லாஹ்வோட பள்ளியென்று சொல்வீர்களேயானால் நான் இன்ஷா அல்லாஹ் ஒரு கணிசமானத் தொகைத் தருகிறேன். தவ்ஹீதுக்கென்று தனிப்பள்ளி என்று முழங்கினால், எல்லோரையும் போல ஒரு குறைந்த பட்ச தொகையையே நான் தர விரும்புவேன்.

-நாம் பிரியவில்லையே? அவர்கள்தானே பிரித்து வெளியே அனுப்பி விட்டார்கள். எங்களை உள்ளே அனுமதிக்கமாட்டோம் என்று அறிவிப்புப் பலகையே வைக்கிறார்களே?

-நீங்கள் பழங்கதை பேசுகிறீர்கள். இப்ப அப்படியெல்லாம் இல்லை. வேறு ஊர்களைப்பற்றி அவ்வளவாக என்னால் உறுதியாகச் சொல்ல முடியாது. ஆனால், நம்ம ஊர்ல இல்லே.  யாரும் எந்தப் பள்ளியிலும் தொழலாம்.

-அல்லாஹ் குர் ஆனில் சொல்கிறான்….

-நிறுத்துங்கள்.  அல்லாஹ் குர் ஆனில் என்ன சொல்கிறான் என்று எனக்கு விளக்காமாகத் தெரிவதற்கு முன்பிருந்தே பெற்றோர் வளர்ப்பில் நான் ஒழுக்கமான வாழ்க்கையையே வாழ்ந்து வந்துள்ளேன்.  இப்பவும் ஒரு பொது மேடையில் ஏறி தைரியமாக என்னால் அரைகூவ இயலும், “என் மேல் குற்றம் பிடிப்பவர், குறை சொல்பவர் யாரும் உள்ளனரா?” என்று. உங்கள் நிலை என்ன? பள்ளிக்குப் படிக்க அனுப்பினால் மட்டம் போட்டு படம் பார்க்கச் சென்றீர்கள், ஓத அனுப்பினால் ஒளிந்து கொண்டீர்கள், மீசை வருமுன் பீடி சிகரெட், கழிசடைகளோடு சேர்ந்துகொண்டு கள்ளு சாராயம், கல்யாணம் கட்டிக்கொடுத்தபின்பும் கண்டவளோடும் தொடுப்பு, இப்படித்தானே பகிரங்கமாக நீங்கள் என் கண்முன் வாழ்ந்து காட்டினீர்கள். மூத்தவரை மதிப்பதில்லை. ஒரு வக்த் தொழுவதில்லை; நோன்பு நேரத்திலும் குடிபோதை, ஒரு நல்ல செயல்? நல் வார்த்தை? ம்ஹூம்.  இப்படி வாழ்ந்த உங்களுக்கு நினைவிருக்கா நான் எப்படி வாழ்ந்தேன் என்பது? 

-ஒரு காலத்தில் தப்பு செய்தவர் திருந்தக் கூடாதா?

-திருந்தலாம். கண்டிப்பாகத் திருந்த வேண்டும்.  ஆனால், திருந்திய பிறகு, உங்கள் கண்களுக்கு முன்னாலேயே ஓர் ஒழுக்கமான வாழ்க்கை வாழ்ந்து வருபவனுக்கு தவ்ஹீது என்னும் கட்டுக்குள் உபதேசம் செய்ய முயல்வதைவிட உங்களிடம் பண பலமும் உடல் பலமும் இருந்தபோது உங்களைச் சுற்றி கூடவே ஒரு கழிசடைக் கூட்டம் இருந்ததே, அவர்களையும் வழி கேட்டில் அழைத்துச் சென்றீர்களே அவர்களிடம் போங்கள்; உபதேசியுங்கள், நீங்கள் எட்டிய நேர்வழிக்கு அழைத்து வாருங்கள். நாம் யாவரும் சகோதரர்களே. நமக்குள் மார்க்க விஷயத்தில் மாற்றுக் கருத்துகள் ஏற்படும்போது கண்ணியமாக உரையாடுங்கள்.  நக்கலோடும் குத்தலோடும் எல்லாம் தெரியும் என்னும் இருமாப்போடும் ஏனையோரை முட்டாள்கள் என்று தீர்மாணித்து உரையாடுவதைத் தவிர்த்துக் கொள்ளுங்கள். நல்ல அழகிய முறையில் மனிதர்களை அனுகி புரியும்படி இலகுவாக மார்க்கத்தை எத்தி வையுங்கள்.  எல்லாவற்றிற்கும் மேலாக, நம் சகோதரர்களுக்குள் ஒற்றுமையை வளர்த்தாலே நம்மை எதிர் நோக்கியிருக்கும் ஆபத்திலிருந்து நம்மை நாம் காத்துக் கொள்ள முடியும்.  போய் வாருங்கள்.

~()~~()~~()~~()~~()~~()~~()~~()~~()~~()~~()~

3) குறி சொல்லவா குறி!

எல்லா உறவுகளும்

ஏதாவதொரு சந்தர்ப்பத்தில்

காற்புள்ளியோடு கலங்கியோ

அரைப்புள்ளியோடு தயங்கியோ

கேள்விக்குறியேந்தி

உம் வீட்டு வாசல் 

வந்து நின்றால்

ஆச்சர்யக்குறிகளில் பிணைத்துவைத்து

ஆணியடிக்காமல்

முறைத்து

முற்றுப்புள்ளியிடுமுன்

அவர்கள் கேள்விக்குறிக்கு

திருப்தியான

விடையளித்து விடைபெறவும்

மேற்கோள் குறிகளுக்குள் வைத்து

முகஸ்துதி பாடாமல்

அடைப்புக் குறிகளினுள்

அவமானப் படுத்தாமல்

தட்டை வரிகளால்

தரம்பிரித்தால் போதும்

பத்திபத்தியாய் நீளும் பாசம்

வாழத்தலைப்பட்டு

வழிநெடுக வாய்த்தக்

கூட்டல் குறிகளால்தான்

வாழ்க்கையில் 

பெருக்கல் குறிகள் வாய்த்தன

கழித்தல் குறிகளால்

காயப்படுத்துமுன்

வகுத்தல் குறிகளுக்குளிட்டுப்

பகுத்துப்பாருங்கள் 

இன்பம் 

ஈவு எனப் பொங்க

மீதியாக மிஞ்சும்

நிறைவான நிம்மதி!

சபீர் அஹ்மது அபுஷாஹ்ருக்

அவர்கள் வாழ்வும் நம் வாழ்வும் - தொடர் - 24 7

அல்லாஹ்வின் திருப்பெயரால்.

முந்தைய பதிவுகளில் மரணத்தை எதிர்பார்த்து வாழ்ந்த அந்த சத்தியத்தோழர்கள் சிலரின் வாழ்விலிருந்து ஓரிரு சம்பவங்களைப் பார்த்தோம் படிப்பினை பெற்றோம். இந்த வாரம் முதல் நபி(ஸல்) அவர்களின் நற்குணங்களுக்கு எடுத்துக்காட்டாய் உள்ள சம்பவங்களைப் பார்ப்போம், படிப்பினைகளை பெறுவோம். இன்ஷா அல்லாஹ்.

இவ்வுலகில் நன்மை தீமை, வெற்றி தோல்வி, இவை அனைத்தும் அல்லாஹ்வின் நாட்டப்படியே நடைபெறுகிறது என்பது நம்முடைய ஈமானில் உள்ள ஒரு நம்பிக்கை. ஆனால் நாம் இன்று நம்முடைய வளர்ச்சிக்கும், வெற்றிக்கும் நாம் தான் காரணம் என்று அல்லாஹ்வின் நாட்டத்தை, அல்லாஹ் நமக்கு நிர்ணயித்த அந்த விதியை இரண்டாம் பட்சமாகவே பார்க்கிறோம். அல்லாஹ் எனக்கு அளித்த நிஃமத் என்பதை மறந்துவிடுகிறோம். இது போல் நமக்கு ஒரு தீங்கு ஏற்பட்டுவிட்டால், அதன் மூலம் பிறரைக் காரணம் காட்ட முயற்சிக்கிறோமே தவிர இது அல்லாஹ் நமக்கு நிர்ணயித்த விதி, இதன் மூலம் அல்லாஹ் நம்முடைய ஈமானைச் சோதிக்கிறான் என்பதை மறந்து விடுகிறோம். ஆனால் நம்முடைய வாழ்வுக்கு முன் மாதிரி அண்ணல் நபி(ஸல்) அவர்களின் வாழ்வில் நடைபெற்ற சம்பவங்களை காணும் போது நம்முடைய வாழ்வு அவர்கள் காட்டித்தந்த வழியில் உள்ளதா என்பதை சிந்திக்கத் தூண்டும்.

ஹிஜ்ரி எட்டாம் ஆண்டு ரமழான் பிறை 12இல் இடம்பெற்ற மக்கா வெற்றி இஸ்லாம் அரபு தீபகற்பத்தில் மிக பலம் வாய்ந்த சக்தி என்பதை புலப்படுத்தியது. ஹூதைபியா உடன்படிக்கைகளுள் ஒன்றை மக்கத்து காஃபிர்கள் முறித்ததைத் தொடர்ந்து   நபி (ஸல்) அவர்கள் மதீனாவிலிருந்து 10,000க்கும் மேற்பட்ட படை வீரர்களோடு மக்காவை நோக்கிச் சென்றார்கள்.

நபி(ஸல்) அவர்களின் உயர்ந்த பண்புகளால் கவரப்பட்ட மக்கத்து குறைஷி வம்சத்தின் தலைவர்களுள் ஒருவரான அபூ ஸூப்யான் இஸ்லாத்தைத் தழுவிக்கொண்டார்கள். நபி (ஸல்) அவர்கள் மக்கத்து மக்களுக்கு "யார் அபூஸூப்யானின் வீட்டில் நுழைகின்றனரோ அவர்களும், மதீனா பள்ளிவாசலில் யார் நுழைகின்றனரோ  அவர்களும் பாதுகாப்பு பெற்று விட்டார்கள்" என பிரகடனம் செய்தார்கள்.

நபி (ஸல்) அவர்கள் எந்த யுத்தமுமின்றி அல்லாஹ்வுக்கு நன்றி செலுத்தியவர்களாக மக்காவுக்குள் பாதுகாப்பாக நுழைந்தார்கள். பிறகு கஃபாவை தவாப் செய்துவிட்டு அதனுள் காணப்பட்ட 360 சிலைகளையும் அகற்றினார்கள்.

பிறகு மக்கத்து காபிர்கள் தங்களுக்கு முஹம்மத் என்ன செய்துவிடுவாறோ என அஞ்சி நின்றபோது அவர்களை அழைத்து பொது மன்னிப்பு வழங்கி விட்டு 'நீங்கள் சென்று விடுங்கள். நீங்கள் சுதந்திரம் பெற்று விட்டீர்கள்' எனக்கூறி சுதந்திர பிரகடணம் செய்தார்கள்.

அநீதிக்கும் சித்திரவதைக்கும் உட்பட்டு தாய்நாட்டிலிருந்து துரத்தப்பட்ட நபி (ஸல்) அவர்கள் அம்மக்களுக்கு பூரண மன்னிப்பை வழங்கி வெற்றியை ஆரவாரமின்றி கொண்டாடியமை எவ்வளவு படிப்பினை மிக்க செயலாகும். இது இஸ்லாம் சாந்தி சமாதான மார்க்கம் என்பதை உறுதிசெய்கிறது.

இங்கு நாம் கவனிக்க வேண்டிய விசயம் என்னவென்றால், இன்று நாம் பிறந்த ஊரைவிட்டு விரட்டி அடிக்கப்பட்டால், நம் நிலை என்னவாக இருக்கும் என்பதை நாம் சிந்திக்க வேண்டும். நாம் சம்பாதித்த சொத்துக்கள், கட்டிய வீடு, சொந்த பந்தங்கள், நண்பர்கள், ஓடி ஆடி விளையாடிய தெருவீதிகள், ஐவேளை தொழுகை தொழுதுவரும் பள்ளி வாசல்கள், நாம் படித்த பள்ளிக்கூடங்கள், நல்ல நண்பர்களாக இருந்த பிற மத நண்பர்கள், இவைகள் அனைத்தனையும் விட்டு நிர்கதியான நிலையில் வேறு ஊருக்கு அடித்து துரத்தப்பட்டால் நம்மிடம் நிச்சயம் சந்தோசம் இருக்காது, நிம்மதி இருக்காது. 

என்னதான் காலம் கழிந்தாலும் நான் வாழ்ந்த அதே ஊருக்கு வந்தடைய வேண்டும் என்ற ஏக்கம் இருந்துக் கொண்டே இருக்கும், பெருளாதார பலத்துடன் ஆள் பலத்துடன் நாம் துரத்தி அடிக்கப்பட்ட அந்த சமூகத்துக்கு நம் ஊருக்கு வந்தால், மனிதனாக பிறந்த நாம் நிச்சயம் நம்மை துரத்தி அடித்தவர்களை பழிவாங்கியே ஆகவேண்டும் என்ற கோப எண்ணத்தில் மலை உச்சி பெருமை கொண்டவர்களாகத் தான் நாம் வருவோம். ஆனால் அண்ணல் நபி(ஸல்) அவர்கள் அல்லாஹ்வை  புகழ்ந்தவர்களாக, ஒரு துளி பெருமையும் மனதில் இல்லாமல், தன்னை துன்புறுத்தியவர்களை மன்னித்து, அவர்களுக்கு பாதுகாப்பும் கொடுத்துள்ளார்கள் என்றால், அவர்களின் வழியில் வாழ்கிறோம் என்று சொல்லும் நாம், பழிவாங்கும் எண்ணத்தில் இன்று நம்மை சுற்றியுள்ளவர்களை நிரந்தர எதிரிகளாக பாவித்து வருகிறோமே? இது தான் நபி(ஸல்) அவர்களிடமிருந்து நாம் கற்ற நற்குணங்களா?

எல்லா புகழும் அல்லாஹ்வுக்கே (அல்ஹம்துலில்லாஹ்) என்ற இந்த வார்த்தையை நாம் சரியாக உணரவில்லை என்பது நாம் நம்முடைய வாழ்விலிருந்து கண்டுவரும் உண்மை. பெருமையின் உச்சக்கட்ட்த்தில் சிறிய பெரிய உதவிகளைச் சுய விளம்பரங்களின் மூலம் முக்கியத்துவம் கொடுக்கிறோமா இல்லையா? நான் உத்தமனாக வாழ்கிறேன், அவன் இப்படிப்பட்டவன், இவன் இப்படிப்பட்டவன் என்று அடுத்தவனை இழிவுபடுத்தி நம்மை நாமே பெறுமையடித்துக் கொள்கிறோமா இல்லையா? எனக்கு கோபம் என்பதே வராது, நான் காசு எல்லாம் பார்க்க மாட்டேன் தர்மம் அள்ளிக்கொடுப்பேன் மேலும் நான் மார்க்கத்தில் வழி தவறாதவன் அவன் வழி தவறியவன் என்று சொர்கத்துக்கு அனுமதி சீட்டு வாங்கியவர்கள் போன்று பேசிக் கொள்பவர்களாக இருக்கிறோமா இல்லையா? என்பதை நாம் சிந்திக்க வேண்டும்.

யா அல்லாஹ்! அனைவரையும், சத்திய சஹாபாக்கள் எவ்வாறு குர்ஆன் மற்றும் நபி(ஸல்) அவர்களின் சொல் செயல் ஆகியவற்றின் அங்கீகாரத்தின் அடிப்படையில் வாழ்ந்தார்களோ அதுபோல் எங்கள் அனைவரையும் வாழ அருள் புரிவாயாக.

தொடரும்....

M. தாஜுதீன் 

நீரடிச்சு நீ(ர்)தம் விலகாதீர் ! 93

அதிரை குளங்களில் தண்ணீர் நிரப்புவதற்கு தன்னார்வலர்கள் மேற்கொண்ட முயற்சி, அதனால் சிலரிடம் எழுந்த காழ்ப்புணர்வுள், இணைய கருத்துப் பரிமாற்றங்களால் எழுந்த நீயா-நானா மனப்பான்மை, இவற்றையெல்லாம் மீறிய அரசியல் குறுக்கீடுகளால் தற்போது தடைபட்டுள்ள நீர் வரத்து குறித்து இணைய தளங்களில் வெளியான பதிவுகள், புகைப்படங்கள், காணொளிகள் இவற்றையெல்லாம் கண்டபிறகு நானறிந்த சில விளக்கங்கள் மூலம் 

சிலரின் தவறான புரிதலை நீக்கும் என்று நம்புகிறேன்.

1) காவிரி கடைமடை பகுதியான அதிரைக்குத் தேவையான நீர்வரத்து கிழக்கில் நசுவினி ஆற்றிலிருந்தும், மேற்கில் ராஜாமடம் அருகே கடலில் கலக்கும் ஆற்றிலிருந்தும், பள்ளிகொண்டான் அருகேயுள்ள செல்லிகுறிச்சி ஏரியிலிருந்தும் கிடைக்கிறது என்பதை அதிரையர்கள் அறிவோம். அவ்வகையில் ராஜாமடம் வழியாகக் கடலில் கலக்கும் ஆற்றுநீரை ஊருக்குள் திருப்பிவிடும் முயற்சியை தன்னார்வலர்களின் ஒத்துழைப்புடன் பேரூராட்சி சேர்மனும் முன்னின்று செய்தார். 

2) ராஜாமடம் ஆற்றிலிருந்து வரும் நீரை ஊருக்குள் கொண்டு வரும் வழித்தடமாக சி.எம்.பி வாய்க்கால் இருந்து வந்தாலும், குப்பைகள் மற்றும் ஆக்கிரமிப்புகளால் இந்த வாய்க்கால் அடைபட்டிருந்ததையும் அறிவோம். இந்த வாய்க்காலை சீர்செய்வதன்மூலம் அதன்வழியாக ஆலடிக்குளம், செக்கடிகுளம், காட்டுக் குளம், மரைக்காயர் குளம், நடுத்தெரு கீழ்புறமுள்ள செட்டியாகுளம், ஆஸ்பத்திரி தெரு புதுப்பள்ளி குளம் ஆகியவற்றை நிரப்ப முடியும்.

3) சி.எம்.பி வாய்க்காலில் வரும் தண்ணீர் வரத்து பட்டுக்கோட்டை சாலை வழியாக வெள்ளக் குளம்,கரிசல் மணி வழியாக சி.எம்.பி வாய்க்கால் மூலம் செக்கடி, ஆலடி, மரைக்காயர் ஆகிய குளங்களுக்குச் செல்கிறது.

4) நமதூரின் இயற்கை நீர்வரத்து வழிகளை வைத்துப் பார்க்கும்போது செக்கடி குளம் நிரம்பினால் ஆலடிக்குளம், செட்டியாகுளம்,புதுப்பள்ளி குளம் ஆகியவற்றிற்குள்ள வாய்க்கால் மூலம் அடுத்தடுத்து நான்கு குளங்கள் நிரம்பும். 

5) ஆலடி குளம் நிரம்பினால் அதிலிருந்து வெளியேறும் நீர் மண்ணப்பன் குளத்திற்கும் யானையன் குளத்திற்கும் செல்லும்.யானையன் குளம் நிரம்பி மெயின்ரோடு வழியாக செல்லியன் குளம், நாரக்குட்டை ஆகியவை நிரம்பும். ஆஸ்பத்திரி தெருவிலிருந்த இன்னொரு வழித்தடம் மூலம் புதுப்பள்ளி குளத்திற்கு இருவழிகளில் நிரம்பும் வசதி இருந்தது.

6) மேற்கிலிருந்து ஆறு வழியாகவும், செல்லிக் குறிச்சி ஏரி வழியாகவும் நீரவரத்து இருக்கும் போது இவ்வாறு செயல்பட்டால் தான் மேற்கண்ட குளங்கள் நிரம்பும் என்பதை அறியாமல், செக்கடிக் குளத்திற்கு மட்டும் ஏன் நீரை அனுப்ப வேண்டும்? மற்ற குளங்கள் புறக்கணிக்கப்பட்டன என்று புலம்புவதில் நியாயம் இல்லை.

7) ஒரு குளத்தில் போதுமான நீர் இருப்பு இருந்தால் சுற்றியுள்ள அனைத்து பகுதிகளின் நிலத்தடி நீர்மட்டமும் உயரும் என்பது இயற்கை. அவ்வகையில் ஊரின் நடுவில் நீர் நிரம்ப தயார் நிலையில் இருக்கும் செக்கடி குளம் நிரம்புவதன்மூலம் புதுமனைத்தெரு,சி.எம்.பி லேன்,செக்கடித்தெரு,நடுத்தெரு,ஆலடித்தெரு,செட்டித்தோப்பு ஆகிய பகுதிகள் பலன்பெறும்.

8) மூலிகைக் குளியலுக்குப் பேர்பெற்ற நமதூரின் செடியன் குளத்திற்கு நீர்வரத்து, ராஜாமடம் ஏரியிலிருந்து ரயில்வே பாதையையொட்டிய ஓடைகள் மூலமே சாத்தியம் என்பது தெரிந்தும், வந்துகொண்டிருந்த ஆற்றுநீர் திட்டமிட்ட குளங்களுக்குள் வந்தடைவதற்குள்ளாக செடியன் குளத்திற்கும் நீர்வேண்டி தனியாக கலெக்டரிடம் மணு கொடுத்தது எவ்வகையில் சரியானது என்று தெரியவில்லை. 

9) சில வருடங்களுக்கு முன் ஊர் குளங்களெல்லாம் வறண்டு கிடந்தபோது செடியன் குளம் தூர் வாரப்பட்டு அதிக நீர் நிரம்பியதனால் ஏற்பட்ட உடைப்பில் பிலால் நகரில் வெள்ளப்பெருக்கு ஏற்பட்டதும் அறிவோம். செடியன் குளம் தூர்வாரப்பட்டபோது செக்கடி குளம் கண்டு கொள்ளப்படவில்லை என்று யாரும் கேட்கவில்லை அல்லது இப்பகுதியில் இருந்தவர்கள் அதற்கான முயற்சிகளைச் செய்யவில்லை.

10) மேற்ச் சொன்ன இயற்கையான காரணங்களால் செக்கடி குளமும் ஆலடிக்குளமும் நிரப்புவதற்கு முயற்சிகள் நடக்கும்போது, குறிப்பிட்ட குளங்களுக்கு மட்டும் சாதகமாக நீர்வரத்து திருப்பி விடப்படுகிறது என்று குற்றம் சொல்வது நியாயமா?

11) சமீபத்தில் குடிநீர் பஞ்சத்தால் அதிரையின் பாரம்பரிய தெருக்களில் ஒன்றான கடற்கரைத் தெருவுக்கு ரூ.15 லட்சம் செலவில் குழாய் மூலம் குடிநீர் கொண்டு வந்தபோது, புதுமனைத்தெரு,சி.எம்.பி லேன் சுற்று வட்டாரமும் குடிநீர் பஞ்சத்தில் வாடிய போதும்,சேர்மன் கடற்கரைத் தெருவுக்குச் சாதகாமகச் செயல்படுகிறார் என்று இப்பகுதி மஹல்லாவாசிகள் சொல்லவில்லை. அதுபோல் செய்னாங்குளம் தூர் வாரப்பட்டபோதும் சொல்லவில்லை.

12) நீண்டகால பயன்பாடுகளின் அடிப்படையிலான ப்ளாஸ்டிக் பொருட்களின் பயன்பாடு குறைப்புக்காக அதிரை பேரூராட்சி சேர்மனின் தனியார்வமும், அதனால் சந்தித்த இடையூறுகளும் அறிவோம். ஊர் நலனில் அக்கரை இருந்திருந்தால்,இவ்விசயத்திலும் சேர்மனுடன் இணைந்தோ அல்லது தனியாகவோ ஒத்துழைத்திருக்கலாமே! 

13) யாருமே கண்டு கொள்ளாத நிலையில் தன்னார்வலர்களின் முயற்சியால் அதிரை சேர்மன் இவ்விசயத்தில் களம் இறங்கிய பிறகு, இன்னொரு வழியில் ஆற்றுநீரைக் கொண்டு வரப்போகிறோம் என்பதிலிருக்கும் அரசியல் வெளிப்படையாகத் தெரிந்தது. எனினும், எப்படியாவது நமதூர் குளங்கள் நிரம்பட்டும், நீர்நிலைகளும்  நீர்மட்டமும் உயரட்டும் என்பதாகத்தானே பலரது எதிர்பார்ப்பும் இருந்தது. 

14) சுயவெறுப்புகளின் அடிப்படையிலும் போட்டிமனப்பான்மையிலும் அரசியல் ஆளுமைகளைத் தூண்டிவிட்டு தண்ணீர் வரத்தைத் தடுத்தவர்களின் முந்தைய செயல்பாடுகளும், இவர்களின் ஒத்துழைப்பின்மை, இடையூறு குறித்து சேர்மன் வைத்த குற்றச்சாட்டு நிரூபனமாகியுள்ளதை நடுநிலையாளர்கள் கவனத்தில் கொள்ள வேண்டும்.

15) 2014 ஜனவரி 28 ஆம் தேதி வரை காவிரியில் நீர்வரத்து விவசாயத்திற்காகத் திறந்து விடப்பட்டும் என்று அரசு குறிப்பு தெரிவிக்கிறது.எஞ்சியுள்ள நாட்களுக்குள் இந்த வாய்ப்பைப் பயன்படுத்தி காழ்ப்புனர்வுகளைக் கைவிட்டு ஒற்றுமையாகச் செயல்பட்டால் எதிர்வரும்கோடையில் தண்ணீர் பஞ்சத்தை ஓரளவு சமாளிக்கலாம். இன்ஷா அல்லாஹ். 

இந்த அக்கரையிலும் ஆற்றாமையிலும்தான் இந்த விளக்கங்கள். யாரையும் உயர்த்த அல்லது தாழ்த்துவதல்ல என் நோக்கம்.

வஸ்ஸலாம்,

அதிரைக்காரன்

N.ஜமாலுதீன்