படிக்கட்டுகள்.. ஏற்றம் - 17 27

வாழ்வியல் முன்னேற்றத்தைப் பற்றி எழுதும்போது உறவுகளின் முக்கியத்துவம்  ஏன் என சிலர் நினைக்கலாம். காரணம் இருக்கிறது, நம் வட்டாரம் சார்ந்த ஆண்கள் முன்னேர நினைத்து ஏறக்குறைய ஒரு ஓட்டப்பந்தய ட்ராக்கில் நிற்பதுபோல் வாழ்க்கையை தொடங்க நினைக்கும்போது அந்த ஆண்மகனின் எண்ணம் எல்லாம் தான் அடையப்போகும் அல்லது தொடப்போகும் வெற்றியில்தான் இருக்கும், அதற்கிடையில் தனது பிள்ளைகளும், சகோதர சகோதரிகளும் அந்த சம்பாதிக்கும் ஆண்மகனை ஓட விடாமல் ஆளுக்கு ஒரு தாம்புக் கயிற்றை அவன் இடுப்பில் கட்டி தன் வசம் இழுத்தால் எப்படித்தான் அந்த பாவப்பட்ட ஜென்மம் ஓடி ஜெயிக்க முடியும். இதை நான் எழுதக் காரணம் நம் சமுதாயங்களில் புரையோடிப் போயிருக்கும் ' ஆண்மகன் தான் தன் சகோதரியின் பொருளாதாரத்துக்கு பொறுப்பு, ஆண்மகன் தான் தன் சகோதரியின் பிள்ளைகளின் கல்யாணம் முடிந்தால் தனது பேரப் பிள்ளைகளின் தேவைக்கும் பொறுப்பு என்ற எழுதப்படாத சட்டம் நம் பகுதி ஆண்களின் தலையில் எழுதப்பட்டிருப்பதுதான். பெண்களை படிக்க வைத்து தனது சொந்த படிப்பையும் திறமையும் நம்ப விடாமல் அவர்களை தொடர்ந்து ஆண்களை சார்ந்து இருக்க வைக்கும் பழக்கம். தொடர்ந்து ஆண்களை சம்பாதிக்கும் எந்திரமாக்கியிருக்கிறது.

பெண்கள் அதிகம் படித்தால் எங்கு நம்மை அதிகம் கேள்வி கேட்டுவிடுவார்களோ என்று நினைக்கும் " ஆப்கானிஸ்தான் தனமான புத்தி" நம் பகுதியில் பல ஆண்களிடம் இருக்கிறது.

ஆக ஆண்களின் முன்னேற்றத்தில் மனைவியின் பங்கு எவ்வளவு முக்கியம் என்பதை முன்னால் அத்தியாயத்தில் பார்த்தாலும் அடுத்த வெகு அருகில் இருக்கும் உறவான பிள்ளைகளின் பங்கு இதில் மிக முக்கியம். இன்றைய தேதியில் நம் ஊர் பகுதிகளில் ஏற்பட்டிருக்கும் வாழ்வியல் மாற்றம் ஏதோ மேஜிக் ஷோவில் நடந்தது மாதிரி வந்ததல்ல.

நம் ஊர் பகுதிகளில் முன்பு இருக்கும் வீடுகள் இன்றைய பிள்ளைகள் மறந்து இருக்கலாம் அல்லது அவர்களுக்கு தெரியாமலேயே போயிருக்கலாம்.  இரண்டு ரூம்கள் குனிந்து நுழைந்து படுத்து குனிந்து வெளியே வருகிற மாதிரி ஒன்னுக்கும் உதவாத டிசைனில் , ஒரு குழந்தை பிறந்தால் தாய் / குழந்தை /தகப்பன் மூன்று பேரும் படுக்க முடியாத அளவுக்கு ' நாயர் ஸ்டைல்" வீடுகள் கட்டியிருப்பார்கள். இதில் நான் சொன்ன 2 வது ரூம் பெரும்பாலும் ஸ்டோர் ரூமாகவும் , மழைக்காலங்களில் சமையல் கட்டாகவும் பயன்படும். [சமையல் அறை எனும் 'பெரிய்ய்ய்ய வார்த்தை ' இதற்கு பொருந்தாது]. இப்படி அடிப்படை வாழ்க்கையை மாற்றி அமைத்து ஒரு நல்ல வீடு கட்டி வாழவே நம் இனம் குறைந்தது 30 வருட உழைப்பை கொட்டி உருவாக்கியிருக்கிறது. கடந்து போன 30 வருடமும் திருப்பி வரலாம். வாழ்க்கை திரும்பி கிடைக்குமா?

இன்றைக்கு 35 வயதிலிருந்து 65 வயது வரை உள்ளவர்கள் வெளிநாடு போய் இந்த அடிப்படை வாழ்க்கையை குறைந்த பட்சம் அடையத்தான் தனது இளமையை, தனது கனவுகளை, தனது சுதந்திரத்தை எல்லாவற்றையும் பணயம் வைத்து, தனது பிள்ளைகள் நன்றாக படித்து பொறுப்புள்ளவர்களாக ஆகிவிட்டால் என் வாழ்க்கை போனாலும் பரவாயில்லை என்று மிகப்பெரிய நம்பிக்கையுடன் இருக்கிறார்கள் . அவர்களை பிள்ளைகள் காதல் என்ற பெயரிலும், வசதியான வாழ்க்கை வாழ வேண்டி அளவுக்கு அதிகமாக ஆசைப்படுவதிலும் பெற்றோர்களை நோகடிப்பது எந்த வகையில் ஞாயம்?. இந்த பாவப்பட்ட பெற்றோர்கள் செய்த குற்றம்தான் என்ன...? பிள்ளைகளை நம்பியது தவறா?. பிள்ளைகளை நம்பாமல் வேறு யாரைத்தான் நம்புவது?.

இன்றைக்கு துபாயிலும், சவூதியிலும், அமெரிக்கா, யூ,கே, ஆஸ்திரேலியா, ஜப்பான் என்று பிழைக்க போன யாருக்கும் விசாவும், ஏர்லைன்ஸ் டிக்கட்டும் ஏதோ ஒரு காலை நேரத்தில்  நரசுஸ் காப்பி குடித்துக் கொண்டு, காலை பேப்பரை புரட்டிக் கொண்டிருக்கும்போது வாசல் வந்து கதவைத் தட்டி யாரும் கொடுத்து விட்டு போனதல்ல. முதன் முதலில் ஸ்டேம்ப் ஆகும் விசாவையும், முதன் முதலில் கிடைத்த ஏர்டிக்கட்டையும் பார்க்க இன்றைய தகப்பன்கள் எத்தனை நாள் பட்டினியாக இருந்திருப்பார்கள். எத்தனை நாள் பம்பாயில் கழிவறைக்கு கூட க்யூவில் வெகுநேரம் நின்றிருப்பார்கள் என்பது எனக்கு தெரியும். எத்தனை இன்டர்வியூ, எத்தனை ஏமாற்றங்கள்.. அத்தனையும் சுமந்துதான் நிமிர்ந்திருக்கிறார்கள்.

இத்தனை வருடத்து தியாகத்தையும் சில சமயங்களில் பிள்ளைகள் எப்படி ஒரே வார்த்தையில் பெற்றோர்களின் முதுகெழும்பை உடைக்க பயன்படுத்துகிறார்கள் என்பதுதான் இன்னும் விளங்காத வித்தை.

எதுவும் வாழ்க்கையில் அந்தந்த வயதும் பொறுப்பும் வந்தவுடன் நிகழ்ந்தால் அதற்கு மரியாதை.. அதை மீறி செயல் படும்போது... வாழ்க்கையின் சவால்கள் மீறியவர்களுக்கு எதிர்ப்பாகவே போய்விடுகிறது.

30 வயது தம்பதியினர் பிள்ளை பெறாதபோது 'இன்னுமா பிள்ளை இல்லை...என்று கேட்கும் சமுதாயம் , 60 வயது தம்பதியினர் பெற்றுக்கொண்டால் "இப்போது ஏன்" என்று கேட்க தவறுவதில்லை என்பதிலேயே... அது அது சரியான வயதில் நிகழ வேண்டும் என்ற உண்மை இளைய சமுதாயத்திற்கு தெரிந்திருக்க வேண்டும் என்பதை சொல்கிறது.

 

எப்போதும் புத்திசாலிகள் வாழ்க்கையின் முக்கிய முடிவுகளை தனது நிலையை உயர்த்திக் கொள்ளாமல் எடுப்பதில்லை. திருமணப்பந்தலில் நிற்கும் ஒரு மணமகனின் கால் குறைந்த பட்சம் அடுத்த நாளே உழைத்து சம்பாதிக்கும் உறுதியை தன்னை நம்பி வந்தவளுக்கு தர வேண்டும். கல்யாணத்திற்கு பிறகு மனைவிக்கு தைக்கும் ஜாக்கெட்தையல் கூலியை கூட பெற்றோர்களிடம் கேட்கும் சூழ்நிலையை வைத்துக் கொண்டு ‘'சுதந்திரம்" 'யூத்' என்று பேத்திக் கொண்டிருப்பது தவிர்க்க.

இன்றைய இளைய சமுதாயம் தனது நண்பர்களை தெரிவு செய்வதிலும் கவனம் தேவை  Talking Companion க்கும் Friends  வித்தியாசம் தெரியவேண்டும்.

உங்களோடு ஊர்சுத்த , படம் பார்க்க, ப்ரவுசிங் சென்டருக்கு கூட வர, ரெஸ்டாரன்ட்களில் சாப்பிட, மோட்டார் சைக்கிளில் பின்னால் உட்கார்ந்து கதைத்து கொண்டுவர வருபவர்கள் எல்லாம் தனது குடும்பம், தனது தேவை என்று வந்தவுடன் கூட வருவார்கள் என்று ஒரு மாயையில் சுற்றும்போது நிதானித்து யோசிக்கவும்.

உங்களின் நட்பு உண்மையாக இருந்தால் அது காலத்தை வென்று தொடரும். அது உங்களின் வார்த்தைகளுக்குள் வசப்படாது. உங்களின் விளக்கத்தை விளங்காது. விதியின் துரத்தலிலும் விலகாத விதியை தன் வசப்படுத்தியிருக்கும்.

நல்ல நட்பு கிடைக்காதவன் வறுமைக்குள் தள்ளப்பட்டவனுக்கு சமம். ஆனால் இளமையின் துள்ளலில் நீங்கள் தேர்ந்தெடுக்கும் நட்பு உங்களுக்கு நஞ்சாக மாறிவிடாமல் பார்த்துக்கொள்ளும் திறமை உங்களுக்குள் இருக்க வேண்டும்.

சரி இதை இந்த அத்தியாயத்தில் சொல்ல காரணம் ஏன்? .. ஒரு சம்பாதிக்கும் குடும்ப தலைவனின் மொத்த எதிர்பார்ப்பே தனது பிள்ளைகள் நல்லபடியாக வர வேண்டும் என்ற ஒரே நோக்கில்தான் இருக்கும். எந்த தகப்பனும் தன் பிள்ளை கெட்டுப்போக வேண்டும் என்று எப்போதும் நினைக்க மாட்டான். பிறந்த நிமிடத்திலிருந்து தனது பிள்ளைக்கு எது தேவைப்படும் என்று தேட ஆரம்பித்து தேர்ந்தெடுத்து, தேர்ந்தெடுத்து ஒவ்வொன்றாய் செய்த தகப்பன் தன் பிள்ளைகளுக்கு வாழ்க்கையை மட்டும் தேர்ந்தெடுக்க தெரியாது என்று பிள்ளைகள் சொல்லும்போது குடும்பத்தை காக்க எடுத்துக்கொண்ட ஒவ்வொரு தியாகத்தையும் பூஜ்யமாக்கும் சூழ்நிலையை , வார்த்தையை எப்படி தாங்க முடியும்.?

பிள்ளைகள் பயன்படுத்தும் மோட்டார் சைக்கிளின் சிசி, பயன்படுத்தும் ஐ போனின் ஸ்பெக்ஸ் (specification) தெரியாத தகப்பன் இருக்கலாம் ஆனால் அதை வாங்கித் தந்தது அந்த தகப்பன் தான் என்று பிள்ளைகள் உணர்ந்தால் சரி.

பிள்ளைகளை வளர்ப்பதில் தகப்பனின் கடமையும் முக்கியம், பிள்ளைகளுக்கு   “ YES, YES” என்று  எல்லாம் கொடுத்து வளர்க்கும்போது  “NO”  என்பதின் அர்த்ததை புரிய வைக்க தெரிந்திருக்க வேண்டும். சில விசயங்களில் நமக்கு வாங்கி கொடுக்க வசதியிருந்தும் “NO’ என்று சொல்ல தெரிய வேண்டும். இல்லாவிட்டால் எதிர்காலத்தில் பிள்ளைகள் தன் வாழ்க்கையில் ஏற்படும் Rejectionஐ சமாளிக்க தெரியாமல் பாதிக்கப்பட்டு விடக்கூடும்.

பிள்ளையை வளர்க்கும் தாய்மார்களும் [அது எந்த வயது பிள்ளைகளாக இருந்தாலும்  சரி] சில விசயஙகளில் கவனம் தேவை. அன்பாக வளர்க்கிரேன் என்று பிள்ளைகளை அருகதையற்றவர்களாக்கி விடவேண்டாம்.

நாம் வாங்கித்தரும் ஐ போன் , கேட்ஜெட்டுகளால் பொருளாதாரத்தில் மிகப்பெரிய பள்ளம் விழுந்துவிடாது. ஆனால் அதை பிள்ளைகள் தனது தகுதிக்கு மீறி கேட்டு நச்சரிக்கும் அட்டிட்யூடில் இது கொஞ்சம் கொஞ்சமாக குடும்ப பொருளாதாரத்தில் குழி தோண்டும்.

பிள்ளைகள் மீது அன்பு செலுத்துவதற்கும் பரிவு காட்டுவதற்கும் யாரும் தடை சொல்ல மாட்டார்கள். அதே போல் பிள்ளைகளும் நான் என் பெற்றோரை மதிக்கிறேன் என்று வார்த்தை அளவில் மட்டும் சொல்லக்கூடாது. அது 'ஆக்சன்' எனும் செயல்பாட்டு வடிவிலும் இருக்க வேண்டும்.

இது இளைய சமுதாயத்துக்கு மட்டும். 

உங்கள் குடும்ப கெளரவம், பொருளாதார முன்னேற்றம் என்பது ஒரு ரிலே ரேஸ் மாதிரி, உங்கள் தகப்பன் ஏற்கனவே ட்ராக்கில் சரியாக ஒடி வந்து உங்களிடம் அந்த ரிலே பட்டனை தர வருகிறார்.. நீங்கள் இன்னும் தயாராகாமல் நீங்கள் ஒட வேண்டிய தூரத்தையும் அவரையே ஒட சொல்வது எந்த வகையில் ஞாயம்.?

இன்றைய இரவு உணவுக்காக நீங்கள் அமர்ந்திருக்க பசியுடன் தான் நீங்கள் தூங்கப்போக வேண்டும் என்ற சூழ்நிலையை உருவாக்காமல் உங்கள் சாப்பாட்டு தட்டையில் உணவை பரிமார ஒருநாளும் தவராமல் உழைக்கும் ஜீவனை நீங்கள் எப்படி மதிக்க வேண்டும்.?

ZAKIR HUSSAIN

திருக்குர்ஆன் ஏற்படுத்தும் சமூக மாற்றங்கள் - காணொளி 0

நாகர்கோவில் அல்மஸ்ஜிதுல் அஷ்ரபில் கடந்த 22.07.2012 அன்று ரமளான் இரவு சிறப்பு நிகழ்ச்சியில், "திருக்குர்ஆன் ஏற்படுத்தும் சமூக மாற்றங்கள்" எனும் தலைப்பில் S.கமாலுதீன் மதனி அவர்கள் ஆற்றிய உரை.

நன்றி : 

மனு நீதி மனித குலத்துக்கு நீதியா? அலசல் தொடர் - 7 14

அலசல் தொடர் : ஏழு. 

மனு நீதியின் (CHAPTER : 5 : 147 TO 169 ) அத்தியாயம் ஐந்து வசனங்கள் 147  லிருந்து 169 வரை பெண்களுக்கான சட்டங்களை வரையறுக்கின்றன.   

பெண்கள் ஆண்களுக்கு பிறப்பிலும், சமூக வாழ்விலும் சமமானவர்கள் அல்ல.

பெண்களுக்கு வேதம் ஓத உரிமை இல்லை. கல்வி கற்க உரிமை இல்லை. கணவனுக்கு மனைவி வீட்டினுள்  இருந்து செய்யும் பணிவிடையே குருகுலக்கல்விக்கு சமமாகும்.  அத்தகைய பண்புள்ள பெண்ணுக்கு  மட்டுமே சொர்க்கத்தில் கணவனுடன் கைகோர்த்துப்போக “ போர்டிங் பாஸ் “ கிடைக்கும். 

எந்த வர்ணத்தை சேர்ந்த பெண்களானாலும்  கணவனே குருவுக்கு சமம். உபநயனம் என்பது திருமணமே. கணவனை கடவுளின் நிலையில் வைத்துக் கொண்டாடவேண்டும். அந்தக் கணவன் ஒரு பெண்ணின் கண்ணெதிரே வேறொரு பெண்ணுடன் தகாத உறவு வைத்திருந்தாலும் கணவனின் கடவுள் ஸ்தானத்துக்கு குறை வரக்கூடாது. பெண்கள் இவற்றை சகிக்கவும் ஏற்கவும் வேண்டும். கல்லானாலும் கணவன் FULL  ஆனாலும் புருஷன். ஆகாத கணவனை , ஒத்துவராத கணவனை , கொடுமை செய்யும் கணவனை விவாகரத்து செய்யும் உரிமை பெண்களுக்கு இல்லை. 

கணவனை விட்டு வேறொரு ஆணுடன் கள்ளத்தொடர்பு வைத்திருக்கும் பெண் பலர் காணும் நிலையில் நிறுத்தப்பட்டு  கடித்துக் குதறும் வெறி  நாய்களுக்கு இரையாக்கப்படவேண்டும். ஆண்களுக்கு வெறும் சாதி கீழிறக்கம் மட்டுமே. 

கணவர்களை தேர்ந்தெடுக்கும் உரிமை பெண்களுக்கு இல்லை. தான் பிறந்த வர்ணத்தில் தந்தை கை காட்டும் - ஜாதகம் பொருந்தும்     சக்கரைக்கோ சப்பாணிக்கோ  கழுத்தை நீட்டவேண்டும். (சுயம்வரம் என்பது அரசகுமாரிகளுக்கு). CHOICES ARE LIMITED. 

மனைவியை  இழந்த கணவன் மறுமணம் செய்யலாம். ஆனால் கணவனை இழந்த மனைவி, பால்ய விவாகம் செய்யப்பட மனைவி  – அவள் கன்னி கழியாதவளாக இருந்தாலும் மறுமணம் செய்யக்கூடாது. கன்னி கழியாதவளாக இருந்தால் மட்டும் இறந்து போன கணவனின் சகோதரனுக்கு மட்டும் மணம் முடிக்கலாம். அப்படி யாரும் இல்லாவிட்டால் ஜென்மத்துக்கும் கிடந்தது சாகவேண்டியதுதான்.  

கணவனின் நினைவுகளில் ஏக்கப் பெருமூச்சை இதயத்திலே தேக்கி எடுத்துரைக்க முடியாத நிலையினிலே தான் மீதிக் காலத்தை கடத்தவேண்டும். கணவன் உயிருடன் இருந்த காலத்தில் அவனுக்கு பிடிக்காத எதையும் அவன் இறந்த பின்னும் செய்யக்கூடாது. கணவன் மறைந்த பின் தன்னடக்கம் உள்ளவளாகவும், அந்தரங்க ஆசைகளை திரையும் சிறையும் இட்டு மறைத்துக்கொள்பவளாகவும், கற்புக்கரசியாகவும் விளங்கி, விக்கி விக்கி சாகவேண்டும். தப்பித் தவறி எங்கேயாவது மனத்தளவில் சலனப்பட்டாலும் அவளுக்கு சொர்க்கத்தில் இட ஒதுக்கீடு இல்லை. 

பெண்களுக்கு குடும்பச் சொத்தில் பங்கு மற்றும்  உரிமை கிடையாது. கணவன் இறந்துவிட்டால்- சொத்துரிமையும் இல்லாததால்  கோயிலில் “உண்டக்கட்டி”யும் அன்னதானமும்  வாங்கித்தான் சாப்பிடவேண்டும். 

பெண்கள் தனிப்பட்ட சுதந்திரம் படைத்தவர்கள் அல்ல. இளமையில் தந்தைக்கும், மணமானபின் கணவருக்கும், முதுமையின் மகனுக்கும் கட்டுப்பட்டவர்கள். சுதந்திரமாக தனியே நடமாட பெண்ணுக்கு உரிமை இல்லை. தந்தை, கணவன், மகன் ஆகிய மூவரின் உத்தரவும் இல்லாமல் வீட்டின் உள்ளேயோ, வெளியேயோ நடமாடக்கூடாது. 

பெண் குடும்ப பந்தத்தால் கட்டப்பட்டவள்; கட்டுப்பட்டவள். அதை மீறக்கூடாது. பெண்கள் பாத்திரம் பண்டங்கள் கழுவுவது உட்பட்ட வீடுவேலைகளை கவனமாகப் பார்த்துக்கொள்ளவேண்டும் மற்ற விஷயங்களில் தலையிடக்கூடாது. அடுப்படியில் கிடந்து உப்புமாதான் கிளறவேண்டும் . குடும்ப விஷயமாக எதையும் கிளறக்கூடாது. சிந்திக்கக்கூடாது.

ஒரு தாழ்ந்த சாதி ஆணுக்கு மணமுடிக்கப்பட்டவள் , எந்த உயார்சாதி ஆணுடனும் கள்ளத்தொடர்பு வைத்திருந்தால் அவள் இந்த உலகத்தில் சபிக்கப்பட்ட பெண் ஆவாள். அத்துடன் அவள் உயர்சாதிக்கு பரபுர்வா (parapurva) என்ற இரண்டாம் திருமணம் ஆனவளாகவும் கருதப்படுவாள். 

இப்போது வருகிறது பாருங்கள் ஒரு இடி. 

ஒரு உயர்சாதிப் பெண் அதே சாதியில் உள்ள ஆண்மகனை மணந்தவள் தன் கணவனின் சாவுக்கு முன்பாகவே புனித நெருப்பு சீதை மூட்டி, சடங்குகள் செய்து தனது உயிரை கணவனின் சாவுக்கு முன்பாகவே அந்த அக்னிஹோத்ரா சிதையில் விழுந்து உயிர் விடலாம். அப்படி அவள் உயிர் விடும் பட்சத்தில் எல்லாப் பிறவிகளிலும் அதே கணவனுக்கு அவள் மீண்டும் மீண்டும்  மணம் முடிக்கப்படுவாள். 

மேலே கண்டுள்ள கருத்துக்களின் சாராம்சம் மனு நீதியின் வார்த்தைகளில் இதோ! 

 147. By a girl, by a young woman, or even by an aged one, nothing must be done independently, even in her own house. 

148. In childhood a female must be subject to her father, in youth to her husband, when her lord is dead to her sons; a woman must never be independent. 

149. She must not seek to separate herself from her father, husband, or sons; by leaving them she would make both her own and her husband's families contemptible. 

150. She must always be cheerful, clever in the management of her household affairs, careful in cleaning her utensils, and economical in expenditure. 

151. Him to whom her father may give her, or her brother with the father's permission, she shall obey as long as he lives, and when he is dead, she must not insult his memory. 

154. Though destitute of virtue, or seeking pleasure elsewhere, or devoid of good qualities, yet a husband must be constantly worshipped as a god by a faithful wife. 

156. A faithful wife, who desires to dwell after death with her husband, must never do anything that might displease him who took her hand, whether he be alive or dead. 

158. Until death let her be patient of hardships, self-controlled, and chaste, and strive to fulfill that most excellent duty which is prescribed for wives who have one husband only. 

159-160. Many thousands of Brahmins who were chaste from their youth have gone to heaven without continuing their race. A virtuous wife who after the death of her husband constantly remains chaste reaches heaven, though she have no son, just like those chaste men. 

161. But a woman who from a desire to have offspring violates her duty towards her deceased husband brings on herself disgrace in this world and loses her place with her husband in heaven. 

162. Offspring begotten by another man is here not considered lawful, nor does offspring begotten on another man's wife belong to the begetter, nor is a second husband anywhere prescribed for virtuous women. 

163. She who cohabits with a man of higher caste, forsaking her own husband who belongs to a lower one, will become contemptible in this world and is called a remarried woman (parapurva). 

 167-168. A twice-born man, versed in the sacred law, shall burn a wife of equal caste who conducts herself thus and dies before him with the sacred fires used for the Agnihotra and with the sacrificial implements. Having thus, at the funeral, given the sacred fires to his wife who dies before him, he may marry again and again kindle the fires. 

169. Living according to the preceding rules, he must never neglect the five great sacrifices and, having taken a wife, he must dwell in his own house during the second period of his life. 

மேல்கண்ட மனுவின் சட்டங்களைப் பார்க்கும்போது நம்மை அறியாமலேயே இஸ்லாம் தரும் திருக்குர் - ஆனின்  கீழ்கண்ட வசனங்களை ஒப்பிடாமல் இருக்க முடியவில்லை. நமது பெண்மணிகள் எவ்வளவு பேறு பெற்றவர்கள்  என்று இறைவனுக்கு நன்றி செலுத்தாமல் இருக்க முடியவில்லை.  

• ஆணாயினும் சரி , பெண்ணாயினும்  சரி, நீங்கள் ஒருவர்  மற்றவரிலிருந்து தோன்றிய ஒரே இனத்தவரே.    3:195

• ஆண்களுக்கு பெண்கள் மீது இருப்பது போன்றே பெண்களுக்கும் ஆண்கள் மீது உரிமை உண்டு 2:228.

• பெண்களுக்கு தொல்லை கொடுப்பதற்காக திருமண பந்தத்தில் வைக்காதீர்கள். 2: 231

• விவாகரத்து ஏற்பட்டபின் பெண்கள் மறுமணம் செய்துகொள்வதை நீங்கள் தடை செய்யாதீர்கள். 2:232

• உங்களுடைய துணையை உங்களின் அமைதிக்கான காரணமாக ஆக்கினான். 7:189

என்கிற அத்தாட்சிகள் – இறைவனின் வாக்குகள் இஸ்லாத்தின் சட்டங்கள். 

-ஒரு முஸ்லிம் பெண், ஒரு ஆணுக்கு இருக்கும் விவாகரத்து செய்யும் உரிமை உட்பட எல்லா உரிமைகளும் பெற்றவள். 

- ஒரு முஸ்லிம் பெண், வாரிசு உரிமை, குடும்ப சொத்தில் பங்கு ஆகியவை பெற தகுதிடையவள் ஆவாள். தனியாக வியாபார நிறுவனங்களை  உருவாக்கவும், நிர்வாகிக்கவும் , வேலைகளுக்குச் செல்லவும் உரிமை பெற்றவள். 

- ஒரு முஸ்லிம் பெண் ,தனது கணவனாக வரப்போகிறவனை சாட்சிகளின் முன்னாள் ஏற்றுக்கொண்டு சம்மதித்தால் மட்டுமே மணம் செய்து வைக்கப்படுகிறாள். 

-  ஒரு முஸ்லிம் பெண், வரதட்சணை பணம் கணவனுக்குக் கொடுத்து மணமுடிப்பது தடுக்கப்பட்டு இருக்கிறது. மாறாக கணவனாக வருகிறவன் பெண்ணுக்குத்தான் செல்வங்களை கொடுக்கவேண்டும் .

- ஒரு விதவையான முஸ்லிம் பெண், மறுமணம் செய்துகொள்ள ஊக்குவிக்கப்படுகிறாள். கணவனோடு அவளையும் அவளது அந்தரங்க ஆசைகளையும் கொன்றுவிட்டு செத்துவிடு என்று சொல்லவில்லை. 

- ஒரு முஸ்லிம் பெண் சமுதாயத்தில்  மேலான மரியாதைகளோடு நடத்தப்படுகிறாள். எந்த முஸ்லிம் பெண்ணும் உயிரோடு தீயில் எரிக்கப்படுவதில்லை. கணவனை இழந்த பெண்கள் நற் காரியங்களில் இருந்து ஒதுக்கிவைக்கப்படுவதில்லை. 

இத்தகைய காரணங்களை படித்து, அறிந்து உணர்ந்த அமெரிக்க, ஐரோப்பிய , ஆப்ரிக்க கண்டங்களைச் சேர்ந்த அளப்பறிய பெண்கள், ஆண்களைவிட பெரும் கூட்டங்களாக இஸ்லாத்தை தழுவி இணைந்து வருகிறார்கள் என்பதே இன்றைய வரலாறு கூறும் நற்செய்தியாகும். நாகரிகத்தின் உச்சத்தில் இருக்கும் நாடுகளில் கல்வி மூலம் இஸ்லாம் பற்றிய இந்த விழிப்புணர்வு பெருகி இருக்கிறது. இந்தியா போன்ற கல்வியில் பின் தங்கியுள்ள நாடுகளில் உள்ள மக்களிடம் இந்த உணர்வுகளைக் கொண்டு செல்ல மிகவும் உழைக்க வேண்டி இருக்கிறது. அவைகளை அவசரமாகத் தொடங்க வேண்டும். 

சாட்டையை இன்னும் வைத்துவிடவில்லை

இன்னும் சுழலும் இந்த சாட்டை ...

இபுராஹீம் அன்சாரி

பொடிசுகளின் தலை நோன்பு! 34

அஸ்ஸலாமு அலைக்கும்.

ஒரு சிலிர்க்கும் சுவாரசியம் கூடிய தகவலை நான் இங்கே பகிர்ந்துகொள்ள விழைகிறேன் அதுவும் சின்னதாய் செல்ல கவிதைவரிகளுடன்!. 

நகைச்சுவையாக சொல்ல நினைத்தேன், நேற்று 22-ஜூலை-2012 எனது மூன்றாவது மகளும், என் மூத்த காக்காவின் மூன்றாவது மகளும் (இருவரும் ஒரே வயது 6) நோன்பு இருக்க ஆசைப்பட்டு நோன்பு(ம்) பிடித்தார்கள்.

நாங்கள் ஏற்கனவே திட்டமிட்டிருந்தோம், அவர்களை கட்டாயப்படுத்தாமல் அவர்களின் போக்கில் முழுதாக நிறைவு செய்தால் நல்லது, இல்லையென்றால் பரவாயில்லை என்கிற முடிவில் நிறைவில் அல்லாஹ்வின் கிருபையினால் நல்ல முறையில் நிறைவு செய்தார்கள் அல்ஹம்துலில்லாஹ்!!.

இதற்குள், அவர்களை சோர்வு தாக்காதிருக்க எனது மனைவியும், என் காக்காவின் துணைவியார் (மச்சியும்) மற்றும் சகோதரர்கள் எங்கள் இருவரின் குழந்தைகளும் எப்படியெல்லாம் எங்கள் சின்னஞ்சிறு மொட்டுக்களை கவனித்து கொண்டார்கள் என்பது சுவாரசியமகவும். சிலிர்ப்பாகவும் நடந்தேறியது அன்றைய பொழுது. 

நேற்று எங்கள் பகுதியில் வெயில் உக்கிரமாக இருந்தது 107டிகிரி. ஆனாலும் இரு பிள்ளைகளும் செய்த சேட்டைகள் யாவும் குளிர்ச்சியாக அமைந்தது. எல்லாம் நல்ல படியாக முடிந்ததும் பின்னர் எனது மகள் "வாப்பா! இன்னைக்கும் நான் நோன்பு பிடிப்பேன் சஹருக்கு எழுப்புங்க" என்று சொன்னதும்.

எனக்குள் எழுந்தது இந்த சின்ன சுவாரசிய கவிதை!!?

செல்லமே!

கேட்பதெல்லாம் சரிதான்

கேட்பதும் நல் முறைதான்!

அல்லாஹ் சொன்ன கடமையை

இத்துணைச் சிறு வயதில்

கடைபிடித்த சிறுமி என் செல்லம்தான்!

கட்டாயம் உனக்கு இது

கடமை இல்லை செல்லமே!

நீ கேட்ட  ஒருமுறை

நாமும்தான் சம்மதித்தோம்!

மறுபடியும் நோன்பிருக்க

மரிக்கொழுந்தே கேட்கின்றாய்!

இனி ஒருமுறை

நீ(ங்கள்) நோன்பிருக்க

உங்களுக்குத் தெம்பிருக்கும்

வீட்டில் உள்ள

எங்கள் உடல் தாங்காது!

இப்படி நகைச்சுவையாய்???? முடித்தேன் காரணம் இந்த இரு வாண்டும் நோன்பிருக்க அடித்த லூட்டி, அலுச்சாட்டியம். அவர்கள் கேட்டு வைத்த ப(பா)ல நூறு கேள்விகள் அப்பப்பா!!! மறுபடியும் எங்க உடம்பு தாங்காது!!!!!

CROWN

நோன்பாளிகளே - 2 - மீள்பதிவு தொடர்கிறது..! 5

அளவற்ற அருளாளனும் நிகரற்ற அன்புடையோனுமாகிய அல்லாஹ்வின் பெயரால்...

அன்பார்ந்த சகோதர சகோதரிகளே! (அஸ்ஸலாமு அலைக்கும்(வரஹ்) இறைவனின் சாந்தியும் சமாதானமும் தங்கள் மீது என்றென்றும் நிலவட்டுமாக!) இந்த தொடரில் நமது சமுதாயம் தொடர்ந்து நிறைவேற்றிக் கொண்டு இருக்கும் சில தீமையான காரியங்களைப் பற்றி பார்ப்போம்.

நம்முடைய சமுதாயத்தில் பிற மதக் கலாச்சாரத்தில் இருந்து நம் மக்களிடையே பரவி காலம் காலமாக நல்லது என்று பின்பற்றப்படும் காரியங்களில் பிறந்த நாள் விழா, காதணி விழா, பூப்பெய்த விழா, வரதட்சணை விழா, தர்கா கந்தூரி விழா, மௌலூது விழா போன்ற மார்க்கம் காட்டித்தராத விழாக்களை தொடர்ந்து செய்து வருகிறார்கள். இந்தக்காரியங்கள் நமக்கு நன்மையை பெற்றுத்தருமா?

சகோதர, சகோதரிகளே! நோன்பை பற்றி சொல்லாமல் நமக்கு தெரிந்த சாதாரண காரியங்களைப்பற்றியா? கூறப்போகிறீர்கள் என்று தாங்கள் நினைக்கலாம். மக்களால் உணரப்படாத தீமையான காரியங்கள் அனைத்தும் நம்மை விட்டு அகலும் வரை சொல்லிக்கொண்டே இருந்தால்தான் நானும், நீங்களும் இதிலிருந்து விலகி இருக்க வேண்டும் என்ற அச்சம் ஏற்படும்.

நாம் வைத்திருக்கும் நோன்பு நம்முடைய தீமைகளை அகற்றி தூய்மையான இறையச்சத்துடன் கூடிய மக்களாக நம்மை மாற்ற வேண்டும்.

பிற மதத்தில் இருந்து இஸ்லாத்திற்கு இறக்குமதியான பழக்கங்கள்:

பிறமதத்தில் இருப்பது	இஸ்லாமியர்கள் பின்பற்றுவது
தேர் திருவிழா	சந்தனக் கூடு திருவிழா
காது குத்து விழா	காதணி விழா
வளைகாப்பு	ஒப்பிச்சு பார்ப்பது
கொடிமர விழா	கொடிமர கந்தூரி விழா
பிறந்த நாள் விழா	பிறந்த நாள் விழா
மஞ்சள் நீராட்டு விழா	பூப்பெய்த நீராட்டு விழா
கல், மரம், புனிதம்	தர்கா,மரம்,நார்சா புனிதம்
தவசம்,திதி	மூன்று,ஏழு,நாற்பது பாத்திஹா
வரதட்சணை	கைக்கூலி
தலை தீபாவளி	தலை பெருநாள்

பிறமதத்தில் இருந்து இறக்குமதியானதை மார்க்கம் அறியாமல் பின்பற்றி வந்த சிலர் தூய்மையான மார்க்கம் அறிந்த பிறகு இதிலிருந்து விலகி விட்டார்கள். என்னதான் விலகினாலும் குடும்பத்திற்குள் போராடிக் கொண்டுதான் இருக்கிறார்கள் மற்றவர்களும் விலக வேண்டும் என்று.

பிறந்த நாள் விழா:

பிள்ளைகள் ஆசைப்பட்டார்கள் என்று பிற விழாக்களை புறக்கணிப்பவர்கள் கூட இந்த விழாவை அதிக இடங்களில் கொண்டாடி வருவதை பார்த்து வருகிறேன். மார்க்கத்தில் இல்லாத ஒன்றை செய்கிறீர்கள் என்று கூறினால் - நாங்கள் இணைவைக்கும் காரியம் செய்யவில்லையே என்று பதில் சொல்கிறார்கள். வளைகுடாவில் குடும்பத்தோடு உள்ள சகோதரர்கள் அதிகமான பேர் கொண்டாடி வருகிறார்கள். பிற மத நண்பர்கள் வீட்டு பிறந்த நாள் விழாவுக்கும் சென்று வருகிறார்கள். நாமும் இதிலிருந்து விலகி பிறர் கொண்டாடும் இடங்களுக்கும் செல்லாமல் இருப்பது நமக்கு நன்மையை பெற்றுத் தரும்.

காதணி விழா:

பெண் குழந்தை பிறந்து 2 வயது அல்லது 3 வயது வந்து விட்டதா? காதணி விழா அவசியம் செய்ய வேண்டும். அடி பத்திரிக்கையை, கொடு ஊரைக் கூட்டி பிரியாணி விருந்தை. பகுத்தறிவு மார்க்கத்தில் இருந்து கொண்டு சகோதர சகோதரிகள் எங்கு சென்று கொண்டு இருக்கிறார்கள் என்று தெரியவில்லை.

பூப்பெய்த நீராட்டு விழா:

ஒரு பெண் 10 வயதிலிருந்து 15 வயது வரைக்குள் (அதற்கும் மேலும் ஆகலாம்) இயற்கையாக வயதிற்கு வரும் நிகழ்ச்சி நடைபெறும். பல ஊர்களில் இந்த விழா பத்திரிக்கை அடித்து அழைக்கும் அளவுக்கு முன்னேறி இருக்கிறது. நமது ஊரில் கூப்பாடு மட்டும்தான் என்று நினைக்கிறேன். என் மகள் வயதிற்கு வந்து விட்டால் என்பதை ஊருக்கு அறிவித்து விருந்து போடும் நிகழ்ச்சியா இது.

நேற்று வரை பாவாடை சட்டை, சுடிதார் அணிந்த பிள்ளைக்கு விலை உயர்ந்த பட்டு சேலை எடுத்து அந்த பிள்ளைக்கு கட்டி விடுவார்கள் (பொம்மைக்கு சுற்றுவது போல்). இந்தப்பிள்ளையை அனைவரும் வந்து பார்த்து விட்டு அன்பளிப்புகளை செய்து விட்டு விருந்திலும் கலந்து கொள்வார்கள்.

வெளியூரைச் சேர்ந்த என் உறவினர் வீட்டில் வயதிற்கு வந்த விழா பத்திரிக்கை அடித்து நடத்தப்போகிறார்கள் என்று கேள்விப்பட்டவுடன் போன் செய்து இந்த விழா மார்க்கம் காட்டித்தராதது, இதை செய்யாதீர்கள் என்று சொன்னேன். பிள்ளையின் தந்தை, தாத்தா விருந்து வைக்க வேண்டும் என்று ஆசைப்படுகிறார்கள். மேலும் தெருவில் உள்ளவர்கள் விருந்து வைக்கவில்லை என்றால் கேவலமாக பார்ப்பார்கள் என்ற பதில்தான் வந்ததது. மார்க்கத்தை விட இவர்களின் போலி கௌரவம் பாதுகாக்கப்பட வேண்டுமாம்.

வசதி உள்ளவர்கள் இந்த விழாவை நடத்தி விடுகிறார்கள். ஏழை வீட்டுப் பிள்ளைகள் நமக்கும் நம் வீட்டில் இந்த விழா நடத்தப்பட வேண்டும் என்று தங்கள் தாயாரிடம் சொல்லி வைத்து விடுகிறார்கள்.

ஒரு பெண் வயதிற்கு வந்து விட்டால் யாருக்கும் சொல்ல வேண்டியதில்லை. பெரிய அளவு செலவு எதுவும் செய்ய வேண்டியதில்லை. வயதிற்கு வந்த பெண்ணை பார்க்க போகிறேன் என்று அன்பளிப்பு எதுவும் செய்ய வேண்டியதில்லை.

வயதிற்கு வந்த பெண்ணிற்கு ஆரோக்கிய உணவுகள் அளித்து 7 நாள் அல்லது 10 நாள் வீட்டில் வைத்து நல்லபடியாக கவனித்து பிறகு சாதாரணமாக எப்பொழுதும் போவது போல் பள்ளிக்கூடம் அனுப்பி வைக்கலாம். சாதாரணமாக சென்ற பெண் புர்க்கா அணிந்து வெளியில் சென்றாலே இந்த பெண் வயதிற்கு வந்து விட்டது என்று புரிந்து கொள்வார்கள். ஊரைக் கூட்டி செய்யப்படும் காரியம் இது இல்லை.

தர்கா கந்தூரி விழா:

இதைப்பற்றி தாங்கள் அனைவரும் அறிந்திருப்பீர்கள். தெருவுக்கு ஒரு புனித தர்கா. கந்தூரிக்கு செல்வதற்கு பிள்ளைகளுக்கு புது துணி உடுத்தி அழைத்துச் சென்றதை போன வருடத்தில் கூட பார்த்தேன். ஆனால் இஸ்லாம் காட்டித்தராத இந்த விழா வருடா வருடம் முன்னேற்றப்பாதையில் சென்று கொண்டு இருக்கிறது. சில வருடங்களுக்கு முன்னால் குறைந்து கொண்டு வந்தது இப்பொழுது சில மெருகேற்றத்துடன் ஷைத்தானின் துணையுடன் நலமாக நடந்து கொண்டு இருக்கிறது. பிள்ளைகளை கவர்வதற்காக ராட்சத ராட்டினங்களும் உண்டு. பிள்ளைகள் வந்தால்தானே தாய்மார்களும் வரமுடியும். கந்தூரியை நடத்துபவர்கள் பார்த்தீர்களா கந்தூரிக்கு உள்ள கூட்டத்தை என்று பெருமைப்பட??? முடியும்.

ஒரு தடவை (1999ஆம் வருடம்) ஆட்டோவில் அறிவிப்பு கந்தூரி நிகழ்ச்சியில் ஒரு நடிகையின் பெயர் கூறி நாட்டியம் நடக்க உள்ளது, அனைவரும் வந்து கலந்து கொண்டு அவுலியாவிடம் ஆசி பெற்று செல்லுங்கள் என்பதாக, நடிகையின் நாட்டியத்தை பார்த்து விட்டு அவுலியாவிடம் ஆசி??? வாங்க வேண்டுமாம். இந்த அறிவிப்பை கேட்டு இதற்கு செல்லும் இஸ்லாமியர்களை என்ணி வருத்தப்படத்தான் முடிந்தது. (ஏகத்துவ மணம் வீச ஆரம்பித்தவுடன் தர்காவுக்கு செல்லும் கூட்டம் அதிகளவில் குறைந்திருப்பது உண்மையே).

வரதட்சணை விழா (பெண் வீட்டில் பகல் கொள்ளை):

பெண்களுக்கு அவர்களின் மணக் கொடைகளை (மஹர்) கட்டாயமாகக் கொடுத்து விடுங்கள்! அவர்களாக மனமுவந்து அதில் எதையேனும் விட்டுத் தந்தால் மனநிறைவுடனும், மகிழ்வுடனும் அதை உண்ணுங்கள்! (அல்குர்ஆன் : 4:4)

வல்ல அல்லாஹ் கூறியதை நம் மக்கள் அலட்சியப்படுத்தி விட்டார்கள்.

ஆனால் பெண் வீட்டில் எல்லோரும் விழித்திருக்கும் சமயத்தில் மாப்பிள்ளையின் தந்தை, தாய், சகோதரிகள் அனைவரும் ஒன்று கூடி வந்து பெண்ணின் பெற்றோர் சம்மதத்துடன் (மனவேதனைப்படுத்தி வலுக்கட்டாயமாக) பெண்ணிற்கு வேண்டிய வீடு, நகைகளை கொள்ளையடித்து சென்று கொண்டு இருக்கிறார்கள். இந்த கொடுமையைப் பற்றி அதிகம் விளக்க வேண்டியதில்லை உங்களின் சிந்தனைக்கே விட்டு விடுகிறேன்.

மௌலூது விழா:

மௌலூது மாதம் என்று கணக்கு வைத்து மௌலூது ஓதப்படுகிறது. வீடு குடி போனாலும் ஓதப்படுகிறது. பரக்கத் வேண்டியும் ஓதப்படுகிறது. எந்த ஆதாரத்தின் அடிப்படையில் ஓதுகிறார்கள். யார் காட்டித் தந்தது. இதுவும் மார்க்கத்தில் இல்லாத காரியம்.

மார்க்கத்தில் இல்லாத பழக்கங்கள் இன்னும் நம் மக்களின் மனதில் நீங்காத இடம் பிடித்துள்ளதற்கு ஓர் உதாரணம்: வளைகுடாவில் பல வருடங்கள் வேலை செய்து வந்த நண்பர் ஒருவர் வேலை பிடிக்காத காரணத்தாலும் உடல் நலம் கருதியும் ஊரோடு போய் தங்கி ஒரு சிறு கடை நடத்தி சிரமத்தோடு வாழ்க்கையை நடத்தி வருகிறார்.

மார்க்கம் அறியாத காலத்தில் கந்தூரி, மௌலூது போன்ற காரியங்களில் ஈடுபட்டவர். இவரின் உறவினர்கள் யாரும் மாறவில்லை. இவர் மட்டும் மாறியதால் உறவினர் அனைவரும் நீ நஜாத்(தவ்ஹீது)காரனாகி விட்ட காரணத்தால் உனக்கு முஸீபத்து பிடித்து விட்டது. எங்களைப்போல் மௌலூது ஒது, தர்காகளுக்குச் செல் என்று அறிவுரை கூறுகிறார்களாம். எனக்கு அல்லாஹ் உதவி செய்வான் என்று உறுதியோடு இருக்கிறார்.

இதற்கெல்லாம் ஆதாரம் இருக்கிறதா? மார்க்கம் காட்டித்தந்துள்ளதா? என்று கேட்டால் எங்கள் முன்னோர்கள் செய்தார்கள் அதனால் செய்கிறோம் என்ற பதில் வரும். தூதர்தான் வழிகாட்டியே தவிர, முன்னோர்கள் வழிகாட்டியாகி விடமாட்டார்கள்.

எவர் ஒருவர் பிறமத கலாச்சாரத்தை பின்பற்றுகிறாரோ அவர் நம்மை சார்ந்தவரல்ல என்பது நபிமொழி (அறிவிப்பவர்: அபூஹூரைரா(ரலி))

இந்த நபிமொழியை மனதில் வைத்து மார்க்கம் காட்டித்தராத காரியங்களை செய்து வரும் சகோதர, சகோதரிகள் தவ்பா செய்துவிட்டு இதிலிருந்து விலகி தூய்மையான மார்க்கத்தை அறிந்து அதன்படி வாழ முயற்சி செய்ய வேண்டும்.

மேலும் ஏகத்துவத்தை பிறருக்கு சொல்லும் சகோதரர்கள் கூட சில நேரங்களில் மேற்கண்ட காரியங்களில், (தர்காவுக்கு செல்லமாட்டார்கள், மௌலூது ஓத மாட்டார்கள்) தன் மனைவி, உறவினர்களுக்கு அடிபணிந்து சிலவற்றை செய்து விடுகிறார்கள். அவர்களுக்கு வல்ல அல்லாஹ்வின் எச்சரிக்கை:

வேதத்தை படித்து கொண்டே உங்களை மறந்து விட்டு, மக்களுக்கு நன்மையை ஏவுகிறீர்களா? நீங்கள் சிந்திக்க வேண்டாமா? (அல்குர்ஆன் : 2:44)

S. அலாவுதீன்

இன்ஷாஅல்லாஹ் வளரும்.

வலைச் சுவடி !

ZAKIR HUSSAIN சொன்னது…

இன்றைக்கு மவுளவி அகார் அஹமதின் [இலங்கை] நல்ல சொற்பொழிவு தமிழ்பயான்.காமில் கேட்டேன். நல்ல வீடியோ. எப்படி முஸ்லீம் சமுதாயம் பிளவு பட்டது அதை போக்க குர் ஆன் சொல்லும் ஆயத்துக்கள் என்ன என்பதை தெளிவாக்கினார் [ முரண்பாட்டில் ஒற்றுமை. எப்படி தவ்ஹீது வாதி, நஜாத், சுன்னத்துல் ஜமாத், தப்ளீக் இப்படி பிளவு பட்டது என்பதும் அதன் தீர்வும். நம் ஊருக்கு நிச்சயம் தேவை.

அலாவுதீன் சொல்லியிருக்கும் விசயமும். முழுக்க முழுக்க நடைமுரையில் நடப்பதுதான்.

பெரும்பாலான தேவைகள் செம்மரியாட்டுக்கறிக்கும் , பிரியாணிக்கும் உருவாக்கப்பட்டது.

சான்று...வயிற்றுப்பகுதி பட்டன் எப்படி தெரிக்க, தெரிக்க சட்டை போடுகிறார்கள்...

Tuesday, August 09, 2011 10:06:00 PM 

sabeer.abushahruk சொன்னது…

மெல்ல மெல்லத் திருந்தும் சமயத்தில், மேற்கொண்டு வழிகேட்டுக்கு வக்காலத்து வாங்கும் சுயநலமிக்க தலைவர்கள் உருவாவதை முதலில் தடுக்க வேண்டும்.

தவ்ஹீது தழைத்தோங்கி மறுமலர்ச்சி ஏற்பட்டுவந்த காலகட்டத்தில் சற்றே செய்வதறியாது ஸ்தம்பித்த அத்தகைய தலைவர்கள் இப்போது விவாதம் அது இது என்று சாமானிய முஸ்லிமை குழப்புவது நிற்க வேண்டும்.

அதுவரை நான் பாமர முஸ்லிமைக் கோபிக்க மாட்டேன்.

Wednesday, August 10, 2011 12:55:00 AM 

அபுஇபுறாஹீம் சொன்னது…

//சில வருடங்களுக்கு முன்னால் குறைந்து கொண்டு வந்தது இப்பொழுது சில மெருகேற்றத்துடன் ஷைத்தானின் துணையுடன் நலமாக நடந்து கொண்டு இருக்கிறது.//

நானும் இதனை சமீபத்தில் உணர முடிந்தது.

ஊரிலிருக்கும் பித்அத்களைப் பற்றியும் அடுத்தடுத்த தொடரில் விளக்கித் தாருங்கள் காக்கா !

Wednesday, August 10, 2011 12:57:00 AM 

அபுஇபுறாஹீம் சொன்னது…

//தவ்ஹீது தழைத்தோங்கி மறுமலர்ச்சி ஏற்பட்டுவந்த காலகட்டத்தில் சற்றே செய்வதறியாது ஸ்தம்பித்த அத்தகைய தலைவர்கள் இப்போது விவாதம் அது இது என்று சாமானிய முஸ்லிமை குழப்புவது நிற்க வேண்டும்.//

கவிக் காக்கா: மிகச் சரியே.. அன்று தவ்ஹீத் தழைத்தோங்க நேரம் காலம் பார்க்காமல் அரும்பாடு பட்ட நல்லுளங்கள் இன்று அவர்களுக்குள்ளேயே கூறுகளாக பிரிந்து சின்னா பின்னமாகி தர்கம் செய்வதிலும் அவர்களுக்குள்ளே அவதூறுகளை அள்ளித் தெளிப்பதிலும் அவர்களின் பெண்ணான நேரத்தையும் நல்ல மார்க்க அறிவையும் பாழடித்துக் கொண்டிருக்கிறார்கள் - வேதனையே...

இவர்கள்தானே எமக்கு நல்லதை மட்டுமே சொல்லி நல்வழி எவ்வழின்னு உரக்கச் சொன்னவர்கள் ஆனால் இப்போது !!?????????

Wednesday, August 10, 2011 1:02:00 AM 

sabeer.abushahruk சொன்னது…

//பெண் வீட்டில் எல்லோரும் விழித்திருக்கும் சமயத்தில் மாப்பிள்ளையின் தந்தை, தாய், சகோதரிகள் அனைவரும் ஒன்று கூடி வந்து பெண்ணின் பெற்றோர் சம்மதத்துடன் (மனவேதனைப்படுத்தி வலுக்கட்டாயமாக) பெண்ணிற்கு வேண்டிய வீடு, நகைகளை கொள்ளையடித்து சென்று கொண்டு இருக்கிறார்கள்//

மொழியை ஆயுதமாகப் பிரயோகித்திருக்கிறாய் அலாவுதீன். முனைகளும் கூராகவே இருக்கின்றன. நாம் ஜெயிப்பது உறுதி! இட்ஸ் ஜஸ்ட் தி மேட்டர் ஆஃப் டைம்.

Wednesday, August 10, 2011 1:37:00 AM 

M.H. ஜஹபர் சாதிக் சொன்னது…

பிறமதத்தில் இருப்பதை வேறுபடுத்தி அட்டவணைப்படுத்தி இருந்தாலும் அதோடு ஒன்றுபட்டிருப்பதை தெளிவாக விளக்கிய விதம் அருமை.

Wednesday, August 10, 2011 2:37:00 AM 

crown சொன்னது…

அஸ்ஸலாமு அலைக்கும். நல் முத்துக்கள் குவிந்து கிடக்கிறது. அவ்வளவும் நன்மை தரக்கூடிய சொத்துக்கள்.சகோ.அலாவுதீன் எழுதும் ஆக்கம் , நன்மையின் நோக்கமே! படித்து செயல் படுத்திர் பய(யான்)தரும் விளக்கம்.

Wednesday, August 10, 2011 5:22:00 AM 

அப்துல்மாலிக் சொன்னது…

விழுப்புணர்ச்சியை தூண்டியும், தீமையை தடுக்கவுதவும் பதிவு, இது மாதிரி அதிககதிகம் பதியப்பட வேண்டும், இனி வரும் இளைஞர் சமுதாயம் புத்துணர்ச்சியுடன் நபி(ஸல்) அவர்களின் வழிமுறையய் பின்பற்றி நடக்க எல்லாம் வல்ல அல்லாஹ் உதவிசெய்வானாக

தகவல் பதிவுக்கு நன்றி சகோ

Wednesday, August 10, 2011 11:34:00 AM 

லெ.மு.செ.அபுபக்கர் சொன்னது…

அஸ்ஸலாமு அலைக்கும்.

பித்து பிடித்தவர்களால் அரங்கேற்றப்படும்.பித் அத்தைப்பற்றி நல்ல விளக்கமான பதிவு.

நபி(ஸல்)அவர்கள் கூறினார்கள்.உங்களை ஒருவர் புகழ கண்டால் அவரின் முகத்தில் மண்ணை வாரி தூற்றுங்கள் என்று.

இன்று சமுதாயத்தில் சிலர் அல்லாஹ்வை பெயரை மட்டும் சொல்லி அழைக்க புகழ வேண்டிய பள்ளிவாசலில்.மௌலிது என்ற பெயரில்.எஜிப்திலிருந்து இறக்குமதி செய்யப்பட்ட ஒரு பாடலை பிடிவாதமாக நாங்கள்தான் நபி (ஸல் ) அவர்கள் மீது அன்பு வைத்திருக்கிறோம்.என்று மனப்பால் குடித்துக்கொண்டு பள்ளிவாசலின் கன்னியத்தை சீர் குலைத்து கொண்டிருக்கிறார்கள்.அல்லாஹ் இப்படிப்பட்டவர்களுக்கு தவ்பா செய்யக்கூடிய பாக்கியம் இல்லாமையிலே அவர்களின்.ரூகை பிடுங்கிவிடுவான் என்பதை மனதில் இருத்திக்கொள்ளட்டும்.

Wednesday, August 10, 2011 12:30:00 PM 

Yasir சொன்னது…

படிக்கும்போது உணர்ச்சி வசப்பட்டும் எழுத்து நடை.....நல்ல கருத்துக்கள் விளங்கங்கள்....அடிக்கடி இந்த மாதிரி பதிவுகள் உங்களிடம் இருந்து வரவேண்டும்...சமுதாய மாற்றங்கள் நிச்சயம் ஏற்படும் காக்கா...

Wednesday, August 10, 2011 12:33:00 PM 

Ameena A. சொன்னது…

அஸ்ஸலாமு அலைக்கும் வரஹ்,

கலப்படமற்ற அப்பழுக்கற்ற நம் மார்க்கத்தில் சுமுதா சுயல நலன்காரகளாலும் குழப்பவாதிகளாலும் இப்படியான கழுவிட வேண்டிய அழுக்குகள் இன்னும் இருக்கத்தான் செய்கிறது.

எல்லாம் வல்ல அல்லாஹ் இம்மாதிரியான சூழலில் இருக்கும் நம் சமுதாயத்தை பாதுகாத்து தூய்மைபடுத்துவானாக.

அன்புச் சகோதரர் அலாவுதீன் அவர்கள் தொடர்ந்து எழுதுங்கள்.

Wednesday, August 10, 2011 1:17:00 PM 

தாஜுதீன் சொன்னது…

அஸ்ஸலாமு அலைக்கும்,

அன்பினிய அலாவுதீன் காக்கா...

நோன்பாளிகளுக்கான அறிவுரைகளை தெளிவான விளத்துடன் தந்துள்ளமைக்கு மிக்க நன்றி. அல்லாஹ்வுக்கே எல்லா புகழும்.

இறுதியாக ஏகத்துவத்தை பிறருக்கு எடுத்துச்சொல்லும் சகோதரர்கள் தன் மனைவி, உறவினர்களுக்கு அடிபணிந்து சிலவற்றை செய்து விடுகிறார்கள் என்ற செய்தியை திருக்குர்ஆன் எச்சரிக்கை சொல்லியதை மீண்டும் குறிப்பிட்டு காட்ட விரும்புகிறேன்.

ஜஸக்கல்லாஹ்..

Wednesday, August 10, 2011 7:32:00 PM 

அலாவுதீன்.S. சொன்னது…

அஸ்ஸலாமு அலைக்கும்(வரஹ்) 

கருத்திட்ட சகோதரர்கள் அனைவருக்கும் நன்றி!

கருத்திட்ட சகோதரி ஆமினா A. அவர்களுக்கும் நன்றி!

ஜஸாக்கல்லாஹ் ஹைர்!

Wednesday, August 10, 2011 11:59:00 PM 

கவிதை, ஓர் இஸ்லாமியப் பார்வை – 24 18

‘நபிகள் நாயகம் (ஸல்) அவர்கள் கவி பாடியுள்ளார்களா?!’ 

இந்த வினாவும் வியப்பும் பலருக்கும் தோன்றியிருக்கக் கூடும்.  குறிப்பாக, நம் சமகாலக் கவிஞர்கள் இதில் தம் கண்களையும் கருத்தையும் பதித்து, இதற்கான விடையை எதிர்பார்த்துக் காத்திருப்பதை அறிய முடிகின்றது.

மனிதர்கள் எவரிடத்தும் மண்டியிட்டுப் பாடம் படிக்காத மாமனிதரும் மனிதப் புனிதரும் ஆவார்கள் நபியவர்கள்.  இவ்வுண்மையை,

الذين يتبعو ن الرسول النبي الامي

(அவர்கள் எழுதப் படிக்கத் தெரியாத நபியாகிய (நம்) தூதரைப் பின்பற்றுகின்றார்கள்.)

எனும் (7:157) இறைவசனத்தால் வல்ல இறைவன் அல்லாஹ் உறுதிப் படுத்துகின்றான்.  எழுதப் படிக்கத் தெரியாத நபியால் இத்துணைப் பெரிய சமூக மாற்றத்தையும் விழிப்புணர்வையும் எவ்வாறு ஏற்படுத்த முடிந்தது என்பதுதான் அன்றைய மற்றும் இன்றைய அறிவு ஜீவிகளால் வியந்து பாராட்ட வைத்த பண்பாகும்.

இலக்கிய விற்பன்னர்களும் கவிஞர்களும் சொற்போர் வீரர்களும் நிறைந்திருந்த அன்றைய அரபுச் சூழலில், அறிவார்ந்த சொற்களால் மறுப்புரை செய்து மாற்றத்தை ஏற்படுத்த இந்த இறை இறுதித் தூதரால் முடிந்தது என்றால், அது இறைவன் அவர்களுக்கு அளித்த சிறப்புத் தகுதியே அன்றி வேறில்லை. 

ஆதிக்க வலிமையால் அடக்கி ஒடுக்கப் பார்த்தார்கள் குறைஷியர்;  முடியவில்லை!  கேலி கிண்டல்கள் செய்து பார்த்தார்கள்;  தோல்வியைத் தழுவினார்கள்!  இறுதியாக அவர்கள் கைகளில் எடுத்த போர்க்கருவிதான் கவிதை!  அவர்களுள் இருந்த கவிஞர்கள் தம் திறமை முழுவதையும் கொண்டு கவிதை பாடினார்கள்; இறைப் பேரொளியைத் தம் நாவுகளால் ஊதி அணைக்கப் பார்த்தார்கள்!  அப்போது,

والشعرآء يتبعهم الغاون،  الم تر انهم في كل واد يهيمون، وانهم يقولون ما لا يفعلون

(இன்னும் கவிஞர்கள் எத்தகையோரென்றால், அவர்களை வழிகேடர்கள்தாம் பின்பற்றுகின்றார்கள்.  திண்ணமாக அவர்கள் ஒவ்வொரு பள்ளத்தாக்கிலும் அலைந்து திரிவதை (நபியே) நீர் பார்க்கவில்லையா?  இன்னும் திண்ணமாகத் தாம் செய்யாததைச் செய்ததாகச் சொல்கின்றார்கள்.)

எனும் (26:2 இறை வசனங்களைக் கொண்டு நபியவர்களை ஆற்றுப் படுத்தினான்; தேற்றினான் அல்லாஹ்.  ஆனாலும், அத்தகைய கவிஞர்களுக்கும் வாயாப்புக் கொடுக்கும் வாய்ப்பினை, நபியவர்களின் ‘ஹிஜ்ரத்’ எனும் புலம்பெயர்தலுக்குப் பின்னால் அமைத்துக் கொடுக்கின்றான்.    இதற்கான பல சான்றுகளை இத்தொடரின் இடையிடையே கண்டுவந்துள்ளோம்.

புலம் பெயர்ந்த நபியவர்களும் முஸ்லிம்களும் மதீனாவில் தம் வாழ்க்கையைத் தொடங்கிய காலகட்டத்தில் முதலாவதாகச் செய்த பணிகளுள் ஒன்று, தொழுகைப் பள்ளி கட்டியதாகும்.  தோழர்களுக்குத் தோள் கொடுக்கும் விதமாக, நபியவர்களும் கற்களைச் சுமந்துவந்து இறைவணக்கத்திற்கான இல்லம் கட்டும் பணியில் உதவினார்கள்.  அந்த ஆர்வம் மிக்க நேரத்தில் இறைத் தூதரின் இதயத்திலிருந்து கீழ்க்காணும் கவிதையடிகள் வெளிவந்தன:

هذا الحمال لا حمال خيبر ، هذا ابر ربنا و اطهر

اللهم إن الأجرأجرالآخرة ، فارحم الأنصار والمهاجرة

இதன் தமிழ்க் கவியாக்கம்:

                                   கற்கள் சுமக்கும் இச்சுமையோ

                                               கைபர்ச் சந்தைச் சுமையன்று

                                   பொற்புள தூய நன்மையினைப்  

                                                பொழியும் இறையின் சுமையாகும். 

                                    இறைவா!  எமது கூலியதோ 

                                                இறவா மறுமைக் கூலியதே 

                                    நிறைவாய் மக்கா மதீனாவின்

                                                நேசர்க் குதவி புரிந்திடுவாய்!

(சஹீஹுல் புகாரீ – 3906)

                  

அண்ணலெம் பெருமான் (ஸல்) அவர்கள் தமது நபித்துவத்தின் தொடக்கத்தில் எதிர்கொண்ட போரின்போது ஒரு மலை மீது ஏறிச்  சென்றுகொண்டிருந்தார்கள். அப்போது கற்பாறையொன்றில் தடுக்கி விழப் போனார்கள்!  கல் தடுக்கிய காலை நோக்கினார்கள்;  முன் விரலிலிருந்து குருதி வடிந்துகொண்டிருந்தது!  அந்த வேதனை அவர்களை வருத்தியபோதும், தமது கால் விரலைப் பார்த்துக் கீழ்க்கண்டவாறு கவியடியொன்றைக் கூறி, வேதனையை மாற்றிக்கொண்டார்கள்:

إصبع دميت هل أنت إلا 

و في سبيل الله ما لقيت

இதன் தமிழ்க் கவியாக்கம்:

                                      செங்குருதி சிந்துகின்ற விரலே உன்கால்

                                                     செல்லுகின்ற பாதையிறைப் பாதை யன்றோ?

(சஹீஹுல் புகாரி – 2802 / 6146, சஹீஹ் முஸ்லிம் - 3675)

         

ஹிஜ்ரி ஐந்தாமாண்டில் நடைபெற்ற அகழ்ப் போரின் முன்னேற்பாடாக மதீனாவைச் சுற்றி அகழ் வெட்டும் பணியில் ஈடுபட்டிருந்த அருமைத் தோழர்களைக் கண்டு கவலையுற்றும், அவர்களுக்கு ஆர்வமூட்டியும் அண்ணல் நபி (ஸல்) அவர்கள்,

اللهم  لا عيش إلا عيش الآخرة

فاغفر للأنصار و المهاجرة     

என்ற ஈரடிக் கவிதையினைப் பாடினார்கள்.

(சஹீஹுல் புகாரீ – 2834,4099)

அக்கவியடிகளின் தமிழ்க் கவியாக்கம் இதோ:

                                      இறைவா!  உண்மை வாழ்வதுவோ 

                                                    என்றும் நிலைத்த மறுமையதே

                                       நிறைவாய் மதினா மக்காவின் 

                                                     நேசர் களைநீ மன்னிப்பாய்!   

கருணை நபியவர்கள் கவிகளும் பாடியுள்ளார்கள் என்பதற்கான சில சான்றுகளே இவை.  அவர்கள் காரணமின்றிக் கவிதைகளை வெறுக்கவுமில்லை;  அவர்களுக்கு இறைவன் கொடுத்திருந்த ‘வஹி’ என்ற உயர் இலக்கியத் திறன் கொண்டு, கவிதைகளைக் கேட்டு மகிழ்ந்தும் உள்ளார்கள்;  பாடுவோரை ஊக்கப்படுத்தியும் உள்ளார்கள் என்பதுவே உண்மையிலும் உண்மையாகும்.  

                                                                                                                     (போதுமா...?)

அதிரை அஹ்மது
adiraiahmad@gmail.com