அனைத்திந்திய அளவில் அதிரைக்கு முதற்பரிசு! 21

அது 1923 ஆம் ஆண்டு. ஆந்திர மாநிலம் காக்கிநாடாவில் காங்கிரஸ் கட்சியின் அனைத்திந்திய மாநாடு, மவ்லானா முஹம்மதலி அவர்களின் தலைமையில் நடைபெற்றது. அந்த நேரத்தில், ஆங்கில எதிர்ப்பலை முழு வலிமையுடன் நடைபெற்றுக்கொண்டிருந்தது. (இந்திய) சுதேசிப் பொருள்களையே மக்கள் பயன்படுத்தவேண்டும் என்ற பிரச்சாரம் நாடு முழுவதிலும் நாட்டு விடுதலைக்காகப் போராடிக்கொண்டிருந்த காங்கிரஸ் தலைவர்களால் பரப்பப்பட்டு வந்தது. இதையொட்டியே, அந்தக் காக்கிநாடா மாநாட்டில் மவ்லானா முஹம்மதலி ஒரு பிரகடனம் செய்தார்.

"மக்கள் தத்தம் வீடுகளில் பஞ்சிலிருந்து நூற்கும் நூல்களில் மிகச் சன்னமான நூலுக்குப் பரிசளிக்கப்படும்!" என்பதுவே அந்தப் பிரகடனம்.

நாட்டின் எல்லாப் பகுதிகளிலும், பட்டிதொட்டியெல்லாம், வீட்டுக்கு வீடு, 'ராட்டை' என்ற மரச் சுழல் கருவி மூலம் பஞ்சை நூலாகத் திரிக்கும் தொழில் ஒரு அன்றாடக் கடமை போன்று நடைபெற்று வந்தது. (மகாத்மா காந்தி ராட்டையில் நூல் நூற்கும் வரைபடத்தைப் பார்த்த நினைவுண்டா?)

நம் அதிரைப்பட்டினத்திலும் அன்றையக் காலத்தில் நூல் நூற்கும் பணி வீட்டுப் பெண்களால் செய்யப்பட்டு வந்தது. மவ்லானா முஹம்மதலியின் காக்கிநாடா மாநாட்டு அறிவிப்பு, அதிரை மூதாட்டி ஒருவரின் காதுகளிலும் விழுந்தது. அவர் பெயர் அஹ்மது நாச்சியார். இவர் கடற்கரைத் தெருவைச் சேர்ந்தவர். தற்போதைய சென்னை 'மஜ்ஃபா லாட்ஜ்' முதல்வர் மஹ்மூது மரைக்காயரின் தாயார் அவர்.

அந்தக் காலத்தில் சுதேசி இயக்கத்தவரால் 'பஞ்சுக் கம்பெனி'கள் நாட்டின் பல பகுதிகளிலும் நிறுவப்பட்டு, அங்கிருந்து மக்கள் பஞ்சை வாங்கிச் சென்று நூலாகத் திரித்து, அதை முறுக்கிக் 'கலி'யாக்கி, எடை போட்டு, நூல் கம்பெனிகளில் கொடுத்துக் காசையும் பஞ்சையும் பெற்றுச் செல்வார்கள். அனைவரும் இதில் ஏழை-பணக்காரர் என்ற வேறுபாடு இல்லாமல், ஈடுபட்டு உழைப்பார்கள்.

ஆண்கள் சிலோன், பர்மா, மலேயா போன்ற நாடுகளுக்குச் சென்று சம்பாதித்து வந்து, வீட்டைக் கட்டுவார்கள்; பெண்கள் தம் நேரத்தை வீணாக்காமல், நூல் நூற்றல், ஓலையில் 'குட்டான்' முடைதல் போன்ற பகுதி நேரப் பணிகளில் ஈடுபட்டுச் சேர்க்கும் தொகையிலிருந்து நகைகள் வாங்கிச் சேர்ப்பார்கள்.

அஹ்மது நாச்சியாருக்கு, 'எப்படியும் நாம் இப்போட்டியில் கலந்து பரிசு பெறவேண்டும்' என்ற ஆவல்! கண்ணும் கருத்துமாக நூல் நூற்றுப் போட்டித் தேர்வாளர்களுக்கு அனுப்பிவைத்தார். நூல் நூற்கப்பட்ட 'சன்னம்' எனும் தரத்தைப் பார்த்து, அதன் விற்பன்னர்கள் அதைத் தரம் பிரித்து, 50,60,70,80,90,100 என்று மதிப்பெண் போட்டு, அதற்குரிய தொகையைக் கொடுத்தனுப்புவார்கள்.

இவ்வடிப்படையில் போட்டித் தேர்வு மையத்தைச் சென்றடைந்த அஹ்மது நாச்சியாரின் நூலைத் தரம் பார்த்து, 'நூறாம் நம்பர்' என்று முடிவு செய்து, முதல் பரிசளித்துச் சிறப்பித்தார்கள், இந்தியச் சுதந்திரப் போராட்டத் தலைவர்கள்.

* மேற்காணும் தகவலை, நம் 'அதிரை அறிஞர்', 'தமிழ்மாமணி', புலவர், அல்ஹாஜ் அஹ்மது பஷீர் அவர்கள் நமதூர் ALM பள்ளி ஆண்டுவிழாவின் போது தமது தலைமையுரையில் தெரிவித்தார்கள்.

-- அதிரை அஹ்மது