குறிக்கோள் + நம்பிக்கை + முயற்சி = வெற்றி 1

அல்லாஹ்வின் திருப்பெயரால்...

அஸ்ஸலாமு அலைக்கும் (வரஹ்),

அன்பான அதிரைநிருபர் வாசகர்களே…

வாழ்க்கையில் முயற்சி, நம்பிக்கை, குறிக்கோள் இந்த மூன்று வார்த்தைகளில் உள்ள முக்கியத்துவத்தை பற்றி கொஞ்சம் அலசிப்பார்போம். நாம் சிறு வயதில் பள்ளியில் படிக்கும் காலத்தில் இருந்தே இந்த வார்த்தைகளை நம் வாத்தியார் / பெற்றோர் / உற்றார் சொல்ல கேட்டிருப்போம். ஆனால் எத்தனை பேர் கடைபிடித்தோம்? எத்தனை பேர் இவர்களுக்கு வேற எந்த வேலையும் கிடையாது என்று ஏளனம் பேசியிருப்போம் என்று நம் மனசாட்சியை கேட்டால் புரியும். ஆனாலும் வாழ்வில் ஏதாவது ஒரு தருணத்தில் இதை நிச்சயம் உணர்ந்து இருப்போம்.

குறிக்கோள்

இது ரொம்ப கஷ்டம், ஆனால் முதல் தடைவை மட்டும்தான். கூகிள் குதிரையில் ஒரு வார்த்தையை தட்டிவிட்டால் அது வேறு எதையும் தேடாது அந்த வார்த்தைகள் உள்ள இடங்களை மட்டும் அள்ளி கொண்டு வந்து தரும் அதுதான் கூகிளின் வெற்றி. அது மாதிரிதான் நம் குறிக்கோளும் இருக்க வேண்டும். நம் அடைய முடிய குறிக்கோள்களை ஏற்படுத்திக்கொண்டு (புர்ஜ் கலிஃபாவில் ஃபளாட் வாங்குவது என்பது நல்ல குறிகோள்தான். ஆனால் நிறைவேற்றுவது சிரமம்) அதை நோக்கி பயணிப்பது. வெற்றி என்ற பறவைக்கு வலை விரித்து விட்டோம் என்றுதான் பொருள்.

நம்மவர்கள் சில பேர் குறிக்கோள் இல்லாமல் மெயின் ரோட்டில் போய் சாமான் வாங்கலாம் என்று கிளம்பி, கடைத்தெருவுக்கு சென்று பின்னர் பட்டுக்கோட்டைக்கே சென்று பஸ் செலவை தெண்டத்துக்கு செலவு செய்துவிட்டு வருவார்கள் + போனஸாக உடம்பு வலியையும் அலைச்சலையும் சேர்த்து வாங்கி வருவார்கள். அந்த சாமான் நம்மூரில் கிடைக்கும் அதே விலைக்கு என்பது வேறு விசயம், இவர்கள் முயற்சி செய்து இருக்கிறார்கள் ஆனால் குறிக்கோள் இல்லா முயற்சி.

நம்பிக்கை

நம்பிக்கை என்பது தும்பிக்கை போல் வலுவாக இருக்க வேண்டும். நான் யாருக்கும் சளைத்தவனல்ல, அடுத்தவர் செய்யக்கூடியதை உருவாக்க கூடியதை நாமும் செய்ய முடியும் உருவாக்க முடியும் என்ற நம்பிக்கை வேண்டும்.

நம்பிக்கை என்றவுடன் எதோ குருட்டுதனமாக வைப்பது அல்ல. நம்மூரில் ”பூனை நபுசு” என்பார்கள் அந்த மாதிரி எண்ணங்களெல்லாம் வெற்றிக்கு உதவாது, அது வாழ்வை வெறுமையாக்கி விடும். சில பேர் கழிவறைக்கு போய்விட்டு வந்து அந்த கையை விரல் ரேகைகலெல்லாம் போகும் அளவிற்கு தேய்த்து தேய்த்து கழுவி கடைசிலேயும் அது இன்னு சுத்தமாகல என்ற அவ நம்பிக்கையுடன் போய்விடுவார்கள். இவர்களை “ஒசுவாசு” என்றும் அழைப்பதுண்டு, இந்த மாதிரி நம்பிகையற்ற ஆள்கள் ஜொலித்தாக எந்த நாட்டுல உள்ள டேட்டா பேஸ்லையும் இல்லை, கூகில் தேடலில் பார்த்தாலும் கிடைப்பது இல்லை.

வீட்டை பூட்டிவிட்டு “பூட்டிடுச்சா பூட்டிடுச்சா “ என்று தன்மேல் இல்லாவிட்டாலும் பூட்டு மேலயாவது நம்பிக்கை வைக்காமல் போன எத்தனையோ பூட்டான்களை (அதாங்க பூட்டை இழுத்து இழுத்து உடைத்த ஆட்கள்) நாம் பார்த்திருக்கிறோம்.

நாம் செய்யக்கூடிய ஒவ்வொரு செயலிலும் நம்பிக்கை வைக்க வேண்டும். வாழ்க்கையை நம்பிக்கை என்ற இயக்கியை (processor) கொண்டே ஒடிகொண்டு இருக்கிறது. ஒவ்வொரு செயலையும் செய்யும் போது தூய எண்ணத்துடன், முடிந்த அளவு நேர்த்தியாக செய்து விட்டு “ நம்பிக்கையுடன் அமருங்கள் வெற்றி உங்களை எட்டி பார்க்கும். நமது மார்க்கமே நம்பிக்கையின் அடிப்படையில் அமைந்ததுதான்.

முயற்சி

ஒரு முயற்சி செய்து அதன் மேல் நம்பிக்கை வைத்து (இறை நம்பிக்கையுடன் தான், அவனின்றி அணுவும் அசையாது), அடையக்கூடிய குறிக்கோளுடன் (அனில் அம்பானி போல வர வேண்டும் என்பது டூ மச் ) உழைத்தால் “வெற்றி” படுக்கை விரித்து போட்டு நாம் பக்கத்திலேயே படுத்துக்கொள்ளும்.

ஒரு மார்க்க சிறப்பு மிக்க ஊரில் ஒரு நல்ல முஸ்லிம் இருந்தார். அவர் எப்பொழுதும் இறைவன் தருவான்.. இறைவன் தருவான்… என்று சொல்லி கொண்டே இருப்பார். அவரிடம் சிலர் வந்து முயற்சி செய்யாமல் இப்படியே சொல்லிக்கொண்டு இருக்கீங்களே… இதை நிரூபித்துக் காட்டுங்கள் என்று கேட்டுக் கொண்டனர், ஒத்துக்கொண்ட அவரும் “நாளை நமதூர் பள்ளியில் ஒரு விசேசத்திற்காக சோறு ஆக்கி அனைவருக்கும் குடுப்பாங்க, நான் பள்ளிக்கு எதிரில் சும்மா உட்கார்ந்து இருப்பேன், அவர்கள் என் அருகில் வந்து உணவை தருவார்கள்“ என்றார். அந்த சிலரும் அதை ஏற்றுக்கொண்டு இடத்தை விட்டு அகன்றார்கள்…

மறுநாள் உணவு சமைக்கப்பட்டு அங்கு குவிந்த அனைவருக்கும் பரிமாறப்பட்டது. அனைவரும் வந்து வாங்கி சென்றனர். இவரை கவனித்தார்கள் ஆனால் கொடுக்கவில்லை, உணவெல்லாம் முடிந்து விட்டது.

அப்போது அந்த நல்ல முஸ்லீம், அருகில் சென்ற உணவு பரிமாறிய ஒருவரிடம் கேட்டார். “நான் பள்ளிக்கு எதிரில்தானே அமர்ந்து இருந்தேன் ஏன் எனக்கு உணவு தரவில்லை “ என்று

அதற்கு உணவு பரிமாரியவர் “ஓ !!! அப்படியா நீங்க மற்றவர்கள் போல வந்து உணவை வாங்கவில்லையே, நீங்க நோன்பு வச்சிருக்கீங்கலோ என்று எண்ணி எதுக்கு இந்த உணவை கொடுத்து பாவத்தை விலைக்கு வாங்கணும் என்று இருந்தோம்“ என்று பதில் அளித்தார்.

நம்பிக்கை வைத்திருந்த அந்த மனுசன் முயற்சி செய்யவில்லை. முயற்சி செய்வதற்கு முயலாவிட்டால் என்றும் எதுவும் கிடைக்காது, இறைவனும் உதவ மாட்டான். நமக்கு உறுப்புக்களை இறைவன் கொடுத்ததே முயற்சி எடுத்து முன்னேறத்தானே.

கண்டுப்பிடிப்பாளர்கள் முயற்சி செய்திருக்காவிட்டால் இன்று நாம் பயன்படுத்தும் எந்த பொருளும் நம்மிடம் வந்து இருக்காது. நம்பிக்கை இல்லாவிட்டால் எந்த ஒரு முயற்சியிலேயும் நாம் வெற்றி பெற்று இருக்க முடியாது. குறிக்கோளுடன் நம்பிக்கைவைத்து, முயற்சி செய்யாமல் இருந்திருந்தால் அதிரை கல்வி விழிப்புணர்வு மாநாடு நடந்தேறி இருக்காது.

ஏன் நம் தாய்மொழி தமிழை எளிதில் தட்டச்சு செய்வதற்கும், இணையத்தில் தமிழ் வெகுவாக வளர்வதற்கும், நம்மைப் போன்றவர்களுக்கு இலவசமாக அறிமுகப்படுத்தி பேருதவி செய்ததில் முதன்மையானவர்களாக இருந்தவர்களில் ஒருவர்தான் நம்மூரில் பிறந்தவர், தேனீ ஒருங்குறி எழுத்துரு தந்தவர் மர்ஹூம் உமர்தம்பி அவர்கள். அவர்களிடம் குறிக்கோள், நம்பிக்கை, முயற்சி இருந்ததால், அன்று தேனீ, வைகை என்ற தானியங்கி எழுத்துருக்களை (dynamic fonts) உருவாக்கி தமிழ் இணைய உலகில் ஒரு மாபெரும் புரட்சி செய்ததால்தான், அன்று அவர்கள் போட்ட விதையால் கடந்த 10 வருடத்திற்கும் மேலாக தாய்மொழி தமிழ் இணையத்தில் அளவிட முடியாத வளர்ச்சியடைந்துள்ளது என்பதை யாராலும் மறுக்க முடியாது. தமிழை இணையத்தில் பார்த்து, படித்து, ரசித்து, நல்லவற்றின் மூலம் பயனடைந்து வருகிறோம். மர்ஹூம் உமர்தம்பி அவர்கள் மற்ற தமிழார்வளர்களுடன் சேர்ந்து முதன் முதலில் உருவாக்கிய தமிழா ஏகலப்பை (Ekalappai) மென்பொருள்கள் (software) மூலம் இன்று நாம் தாய்மொழி தமிழை தட்டச்சில் தட்டித் தட்டி இணையத்தில் உலகெங்கும் பரவசெய்துக் கொண்டிருக்கிறோம்.

கூகில் தேடலில் “உமர்தம்பி” என்று தமிழில் தேடிப்பாருங்கள் அவர் குறிக்கோள்யுள்ளவர் + நம்பிக்கையுள்ளவர் + கடின முயற்சி செய்தவர் = வெற்றிப்பெற்றவர் என்று எல்லோருக்கும் புரியும். உலகத்தமிழ் செம்மொழி மாநாட்டில் உமர்தம்பி அரங்கம் என்று ஓர் அரங்கம் அமைத்து மற்றும் "தமிழ் இணைய அறிஞர்" என்ற விருதினையும் அளித்து நம் அதிரை உமர்தம்பி அவர்களின் வெற்றிக்கு அங்கீகாரம் தந்தார்கள் இணையத்தமிழ் ஆர்வலர்கள் என்பது உலகறிந்ததே.

ஆகையால் வாழ்க்கையில் முடிந்தவரை குறிக்கோள்,முயற்சி, நம்பிக்கை இந்த மூன்றையும் பேணுவோம். வெற்றிபெருவோம் நம் குழந்தைகளுக்கும் புகட்டுவோம். இன்ஷா அல்லாஹ்.

இக்கட்டுரையில் இன்னும் நிறைய எழுதலாம் நேரம் இல்லாததால் புள்ளி வைத்து நகர்கிறேன். யாரவது கண்டினிவ் பண்ணுங்களேன்… தொடரட்டும்…

முஹமது யாசிர்
இது ஒரு மீள்பதிவு

போலித் தொப்பிகள் 53

அது ஒரு இஸ்லாமிய மேடை.தமிழ் இலக்கியம்,  மற்றும் முஸ்லிம்களின் தமிழுக்கான தொண்டு பற்றி பலர் பேசிக் கொண்டிருந்தனர்.மேடையில் இருந்த எல்லாரும் மற்ற மதங்களின் இதிகாசங்களைப் பற்றி விலா வரியாக அலசிக் கொண்டிருந்தனர்.

இஸ்லாம் பற்றி அல் குரானும், ஹதீசும் என்ன சொல்கிறது என அவர்கள் பேசவில்லை, அல்லது தெரியவில்லை.மற்றபடி, அவர்கள் தங்களை எல்லாரும் இலக்கியவாதிகள் என பாராட்ட வேண்டும் என்ற நோக்கில், இப்படி இதிகாசங்களைப் பற்றி பீற்றிக் கொண்டிருந்தனர்.பெயர்கள் எலாம் இஸ்லாமிய பெயர்கள், ஆனால் பிரசங்கமோ - இஸ்லாத்திற்கு சம்பந்தம் இல்லாமல்.

அந்தக் கூட்டத்தில் இருந்த முபாரக் மட்டும் எரிச்சல் பட்டுக்  கொண்டிருந்தான்.என்னே அறிவீனம்?ஏன் இப்படி செய்கிறார்கள்.இதற்கு இஸ்லாமிய மேடைகள்தான் கிடைத்ததா?இதே போன்றுதான், சிலர் பிலாகுகளில் இதே போன்று, செய்து கொண்டிருக்கிறார்கள்.அல்லாஹ்தான் அவர்களைக் காப்பாற்ற வேண்டும்.எடுத்து சொன்னாலும் திருந்துவார் இல்லை. ம்ஹூம்.

இவைகள் எல்லாமே தவறான போக்கு கொண்டவைகள் என சுட்டிக் காட்டினால், கண்டு கொள்வது கூட இல்லை.மேடை பேச்சாளர்களும் சரி, பிளாக் எழுத்தாளர்களும் சரி, என்ன செய்வது.அவர்களுக்கு அவர்களுடைய மேடைகளும், இணைய பிலாகுகளும் தான் முக்கியமாகப் போய்விட்டது.

சரி, இந்த முறையும், மேடை ஏறி, அவருடைய பேச்சு தவறு என சொல்லிப் பார்ப்போம்.

அஸ்ஸலாமு அலைக்கும் பாய்.

வ அலைக்கும் சலாம் 

என்ன பாய், நல்லா இருக்கீங்களா?

அல்ஹம்துலில்லாஹ் , நான் நல்ல இருக்கேன் நீங்க?

இருக்கேன் பாய், அல்ஹம்துலில்லாஹ் 

ஒரு சந்தேகம் பாய், கேட்கலாமா?

என்ன சந்தேகம், தாராளமா கேளுங்கோ?

இப்போ நீங்க பேசினீங்களே, இதுக்கும் இஸ்லாத்துக்கும் எதுனா சம்பந்தம் உண்டா?அல்லாஹ்வைப் பத்தி மத்தவங்க உவமானம் சொல்லுவாங்க, அத நம்ம எப்படி சொல்ல முடியும்.

இப்படி பேசுவது மிகப் பெரும் பாவம் இல்லையா?அவங்க இப்படி சொல்வதுக்கும், இஸ்லாமிய கருத்துக்கும் சம்பந்தமில்லை, இஸ்லாமியக கருத்து என்பது குர் ஆனும், நபிகள் நாயகம் ஸல் அவர்களின் பொன் மொழிகளும் மட்டுமே என்று சொல்லி மக்களுக்கு புரியவைப்பதை விட்டு விட்டு, அந்த இதிகாசங்களைப் பற்றியே பேசுகின்றீர்களே , இது சரியா?

அது வந்து, நாமெல்லாம், மதச் சார்பற்ற நாட்டில் இருக்கிறோம், மேலும் நம் தமிழ் மொழியில் உள்ள இலக்கியத்தில் உள்ளதை சொன்னேன், அது தப்பா?(அது தப்பு என்றால், நான் படித்த இலக்கியம் பற்றி மற்றவர்கள்  தெரிந்து கொள்ள வேண்டாமா?).

என்ன பாய், அப்படி என்றால், எம் மதமும் சம்மதம் என்கிறீர்களா?இஸ்லாத்தை மட்டுமே அல்லாஹ் அங்கீகரித்துக் கொண்டான் என்று உங்களுக்கு தெரியாதா?தமிழ் தான் பெரிது என்றால், அது அழிந்து போகக் கூடியது, இறைவனைப் பற்றி, இலக்கியங்கள் தப்பும் தவறுமாக போதிக்கின்றன.ஆனால் அல்லாஹ், நித்திய ஜீவன், என்றுமே அழியாதவன்.எனவே, அவனைப் பற்றி குரானும், ஹதீசும் எப்படி போதிகின்றனவோ , அப்படி அல்லவா பேசவேண்டும்.

தயவு செய்து, திருக் குரானின், 3:83 திரு வசங்களை புரட்டிப் பாருங்கள்.

இனியாவது , மேடையில் பேசினாலும், பிலாகுகளில் எழுதினாலும், அல்லாஹ் இருக்கிறான் என்பதை மறந்து விடாமல், பேசுங்கள், எழுதுங்கள்.

அஸ்ஸலாமு அலைக்கும்.

முபாரக் விறு விறுவென நடந்தான்.இன்ஷா அல்லா, இனி சரியாகிவிடும் என்ற எண்ணத்தில்.

இப்னு அப்துல் ரஜாக்

எதில் கஞ்சத்தனம்..! 1

நம்மில் சிலர் எப்படியெல்லாம் யோசிக்கிறாய்ங்க என்பதின் மின்னலே இதை எழுதத் தோன்றியது.

கந்தையானாலும் கசக்கி கட்டு - இந்த பழமொழியின் அர்த்தம் - கிழிஞ்சி போய் கடாச வேண்டிய துணியானாலும் , படித்துறையில் 501 பார் சோப் போட்டு துணி துவைப்பவனிடம் ஓசி வாங்கி துவைச்சு போட்டுக்கோ!! [ யாருக்கும் அந்த துணியை கொடுத்திடாதே...! அவன் அதை போட்டுக் கொண்டு 'கேன்ஸ்" திரைப்பட விழாவில் ஆஸ்காருக்கு அடித்தளம் போட்டுடுவான்] இனிமேல் பழமொழி எழுதும்போது ' பிஞ்சி போன துணியை டைலரிடம் கொடுத்து தைத்து / அயன் செய்து போடுங்கப்பா என்று எழுதர மாதிரியாவது எழுதச் சொல்லனும். அதற்கு முன்னாடி துணியை தொவச்சிடுங்கப்பா என்று எதுகை / மோனையில் யாராவது கவிஞரிடம் சொல்லி எழுதச் சொல்ல வேண்டும்.

ஆக ஆரம்பத்திலேயே சுபிட்சமான எந்த பழமொழியையும் படித்து கொடுக்காததால் இப்போதும் சிலர் எங்கள் வீட்டில் நாய்க்கு கூட கண் தெரியவில்லை, பூனைக்கு ஹார்ட்டில் ஓட்டை என்று புலம்பும் சமுதாயத்தையே உருவாக்கியிருக்கிறது.

இதில் வெளிநாட்டில் வேலைக்கு சேர்ந்து வாழும் வாழ்க்கை இருக்கிறதே, சிலரை பார்க்கும் போது அவர்களுக்கு ' மெமரி சிப்" இருக்கும் இடம் தெரிந்தால் கழட்டி மாட்டனும் போல் தோனும்.

நம் ஊர் பகுதியை சார்ந்தவர் இறந்து போன செய்தி கேட்டு போய் பார்க்க போயிருந்தேன் [இது 10 வருடத்துக்கு முன் நடந்தது]. அவர் படுத்து கிடந்த இடம் அட்டைபெட்டியை மடக்கி பாய்போல் உபயோகப் படுத்தியிருந்தார், கவலைப்பட்டேன். பிறகு கேள்விப்பட்டேன் ஊரில் பெரிய வீடு எல்லாம் இருக்கிறதாம். மற்றவர்கள் வாழ ஏன் இப்படி கஞ்சத்தனம் ?

ஒரு மனுசன் எத்தனை வருசம்தான் மத்தவங்களுக்காக வாழ்வது???..

சுகாதார விசயத்துக்கு முதலில் வருவோம். சிலருக்கு ஊரில் நல்ல வீடு இருக்கும், வீட்டில் உள்ளவர்கள் ஒரு சீரியல் விடாமல் பார்த்து முனைவர் பட்டம் வாங்கி பட்டிமன்றத்தில் திறமையாக பேசும் அளவுக்கு பெண்கள் எல்லாம் வீட்டில் இருப்பார்கள்.

ஆனால் இவன் பல்லைப் பார்த்தால் ரொம்ப நாள் மராமத்து பார்க்காத முதலாம் குலோத்துங்க சோழனின் பாழடைந்த குதிரைலாயம் மாதிரி இடிந்து, மஞ்சள் பூத்து போயிருக்கும். காரணம் பல்தேய்க்கும் பிரஸ் வாங்கினால் இவர்களின் சொத்து தேய்ந்து விடும் என்ற சயன நிலையில் இருப்பது தான்.

டூத் பிரஸ் வாங்குவதிலும் தன் பல்லுக்கு எது தேவை என்பதில் கவனம் செலுத்துவதில்லை. எது சீப் என்பதில் தான் கவனம். யாராவது புதிதாக வாங்கி கொடுத்தால் தனக்கு தேவை 'Hard’ என்று தெரிந்தும் “soft” பிரஸ்ஸை வைத்து பல வருடம் குப்பை கொட்ட நினைப்பது.

இந்த பட்ஜெட் ஏர்லைன் வந்ததில் நிறைய பேர் மிச்சப்படுத்துகிறேன் என்று கூட வருபவர்களை அடிமைகள் போல் நடக்க விடுகிறார்கள்.

சமீபத்தில் ஒருவரிடம் பேசிக் கொண்டிருந்தேன். அவர் ஊர் ராமநாதபுரம் மாவட்டம், அவர் எடுத்த டிக்கட்டுக்கு [ஏர் ஆசியா] அது சென்னைக்குத்தான் போகும். ஏன் நீங்கள் திருச்சிக்கு எடுக்க கூடாது என்று தெரியாமல் கேட்டு விட்டேன்.

அதற்கு அந்த ஆள் கொடுத்த விளக்கம் இருக்கிறதே, கருட புராணத்தில் உள்ள அந்த கூபம், அக்னி குண்டம் போன்ற தண்டனைகள் ரொம்ப ரொம்ப "லைட்' என்பேன். இதில் என்ன ஹைலைட் தெரியுமா?. அவருக்கும் அவர் மனைவிக்கும் 35 வயதுக்குள் இருக்கும். இருவரும் நிறைய லக்கேஜ்களை தூக்கிக் கொண்டு சென்னையில் இறங்கி, ஆட்டோ எடுத்து , சிங்கபெருமாள் கோயில் அருகில் பஸ் ஏறி லொங்கு லொங்குனு ராமநாதபுரம் போய் சேர குறைந்தது 10 மணி நேரம் ஆகலாம் [அதுவும் இரவு நேரம்]. இதில் அவர் மிச்சப்படுத்துவது எவ்வளவு தெரியுமா வெறும் 1700 ரூபாய்தான். பெண்களை கூட அழைத்து செல்லும் கணவான்களே.இது மிச்சமா செலவா உங்களுடைய அலுப்பு, அசெளகரியம் எல்லாவற்றிற்கும் ஒரு விலை இருக்கிறதே. ஏன் உங்களுக்கு அந்த கணக்கு மட்டும் தெரியாமல் போனது.

இதில் அந்த ஆள் எடுத்த டிக்கட்டில் 'ச்'சாப்பாடும் சேர்த்து.. 'ச்'சாப்பாடும் சேர்த்து என்று ..அந்த சாப்பாட்டுக்கு 'ச்" போட்டு ரொம்ப கேவலப் படுத்திவிட்டார்.

கோயிலில் உண்டக்கட்டி , தர்ஹாவில் நார்சா சோறு வாங்கி சாப்பிடுவதை ஏதோ ஒலிம்பிக் சாதனை மாதிரி பீத்துபவர்களை ஸ்கேன் செய்யும் கருவி கண்டு பிடித்தால் நல்லது [ தூர இருக்கலாம்ல ]

இன்னும் சில பேர் சிம்பிளாக இருக்கிறேன் என்று பெயர் வாங்குவதற்காகவே சில "திருவாளியத்தன்" வேலை எல்லாம் செய்வார்கள். எனக்கு தெரிந்து ஒரு ஆள், நல்ல வசதியான மனுசன் , சென்னையிலும், அவரது ஊர் பகுதியிலும் பல கோடி சொத்து வைத்திருப்பவர், ஆனால் அவரது செருப்பு அவரது கால் அச்சு பதிந்து ரோட்டை அவரது கால் தொட சில மைக்ரோ மில்லிமீட்டர் அளவு அடர்த்தி குறைந்திருக்கும். ஆனால் தான் ஒரு மிகப் பெரிய பொருளாதார மேதை மாதிரியும் , தன்னுடைய இன்வெஸ்ட்மென்ட் எல்லாம் வானத்தை பொத்துக்கொண்டு லாபமாய் கொட்டுகிறது என சொல்லிக் காண்பிப்பதில் வல்லவர். சமயங்களில் நான் நினைப்பது உண்டு, தனக்கு இருப்பதோ இரண்டு கால்கள்,இதைச் சரியாக பாதுகாக்க காரணம் சொல்லும் இவர் இவ்வளவு சொத்தையும் பாதுகாப்பாரா??

வாழ்க்கை முழுக்க வாழ வேண்டும் என்ற ஏற்பாட்டில் இருந்து, வாழ ஆரம்பிக்கும்போது வாழ்வின் விழிம்பில் நிற்பது தெரியாமலே போய் விடுகிறது.

எப்போது நமக்காக வாழப்போகிறோம்!

இன்னும் சில குடும்பத்து பெண்கள் திருமண விருந்துகளில் வீட்டில் உள்ள பிள்ளைகளுக்கு சாப்பாடு எடுத்து போகிறேன் என்று நடந்து கொள்வது மிகவும் வருந்தக்கூடிய விசயம். அவர்கள் வீட்டின் ஆண்கள் சம்பாதித்த கெளரவத்தை ஒரு ப்ளேட் பிரியாணிக்கும், சில இறைச்சி துண்டுகளுக்கும் விற்று விடுவது வருந்தாமல் என்னதான் செய்வது.

கூட்ட நெரிசலில் இப்படி சாப்பாட்டுக்கு பேயாக அலைவதை யாரும் கண்டு கொள்வதில்லை என்னும் இவர்களின் நடத்தை கஞ்சத்தனத்தின் டாப் 10 வரிசையில் முதலிடம் பெறும்.

சிலர் சோப் போடுவது இயற்கையானது அல்ல, அது கெமிக்கல், பக்க விளைவுகள் / தூர விளைவுகளைத் தரும் என்று அடம் பிடிப்பதால் அநியாயத்துக்கு தானும் "நேத்திக்கட கிடாய்" மாதிரி நாறிப்போய் தான் இருக்கும் இடத்தையும் " மொச்ச" நாத்தம் நாற வைத்து சாகடிப்பார்கள். இங்கு சிலர் தான் போட்டிருக்கும் ட்ராக் சூட் / முழு அங்கி ஜிப்பா [இஸ்லாத்தை கடை பிடிக்கிறேன் என்று டிராமா வேறு] சிலர் அலையும் போது பக்கத்தில் நடக்கும்போது எப்படியாகப்பட்ட சாதுவும் கிரிமினல் ஆகி விடுவான்.

இந்த குரூப்தான் பல்விளக்கும் பிரஸ் பன்றி முடியில் செய்ததது என்று கொஞ்ச நாள் லந்து கொடுத்த குரூப். இப்போது அப்படி ஆதாரம் இல்லை என்றவுடன் கப்சிப்.

வீட்டுக்கு வரும் விருந்தாளிகளுக்கு சிலர் 'டீ குடிங்க" என்று சொல்வதிலேயே அவர்களின் மனதின் விசாலம் தெரியும். எனக்கு தெரிந்த ஒருவர் [சொந்தக்கார பெண்மணி] டீ குடியேன் என்று சொல்வதிலேயே அவருடைய சோம்பேரித்தனம் / “இவன் டீ வேணாம்னு சொல்லனும்” எனும் எண்ணம் எல்லாம் பம்பாய் ஸ்டாக் எக்ஸேஞ்சில் பங்குவிலை ஒடும் டிஜிட்டல் டிஸ்ப்லே மாதிரி நம் கண்முன்னே தெரியும். பிறகென்ன பரவாயில்லை இப்போதுதான் டீ குடித்தேன் என்று சொல்லி விடுவதுதான்.

இந்த ஆக்கத்தின் மூலம் என் வேண்டுகோளை நமதூர்க் காரர்களுக்கு வைக்கிறேன்.

கல்யாணத்துக்கு செய்யும் செலவில் நம் கண்முன்னே கையேந்தி யாசகம் கேட்பவர்களுக்கு முதலில் சாப்பாட்டை கொடுத்து விடுங்கள். அயர்ன் கலையாத சட்டையுடன் , உயர்தர சென்ட் போட்டு வருபவர்கள் கொஞ்சம் பொறுமை கடை பிடிக்கட்டும். 1986-ல் என் கல்யாணம் நடைபெற்ற போது எங்கள் பூர்வீக வீட்டை இடித்து புதிதாக கட்டிக் கொண்டிருந்தோம் , கான்க்ரீட் போட்டு சிமென்ட் பூசாமல் அப்போது இருந்த வீட்டில் காலை 11.30 மணிக்கே சாப்பாட்டுகாக காத்திருந்த யாசகம் கேட்கும் அந்த ஆட்களனைவருக்கும் அந்த வீட்டில் பந்தி பரிமாறப்பட்டு உணவளிக்கப்பட்டது. அதற்கு காரணம் இருந்தது என் வாப்பா சொன்ன வார்த்தைதான் ' வாழ்க்கையின் ஆரம்பமே தர்மத்தில் இருக்கட்டுமே" எனும் சொல்தான்.

கல்யாண விருந்து பட்ஜட்டில் ஏழைகள் 100 - 150 பேருக்கு உணவளிப்பதால் நாம் ஏழையாகிவிட மாட்டோம். அந்த ஏழைகளின் வயிற்றுப்பசி தீர்வதால் அவர்களின் திருப்தி இறைவனிடத்தில் இருந்து உங்களுக்கு பல விதமான நன்மைகளை தரும் [ இன்ஷா அல்லாஹ்]

ZAKIR HUSSAIN

இது ஓர் மீள் பதிவு

வதந்தியைப் பரப்பாதீர் !!! 0

மனிதனின் செயல்பாடுகளிலேயே மோசமான ஒரு செயல்பாடு என்றால் அது வதந்திகளைப் பரப்புவதாகத்தான் இருக்க முடியும். அதனால் தான் வதந்தியைப் பரப்புவோர் நாட்டின் எதிரிகள் என்றும் வதந்தியைப் பரப்பாதீர் என்றும் பல அறிவிப்புக்களை நாம் கேள்விப்பட்டு இருப்போம்.

வதந்தி என்பது நிகழாத ஒன்றை நிகழ்ந்ததாகவும் நடக்காத ஒரு விஷயத்தை நடந்ததாகவும் சொல்லி அச்செய்தியை பரப்பி நம்ப வைக்கும் கீழ்த்தரமான ஒரு செயலாகும். இன்னும் சிலர் சாதரணமான ஒரு செய்தியை பன்மடங்காக்கி அந்த ஒன்றுமில்லாத செய்திக்கு உயிர் கொடுத்து பிரச்சினையை பெரிதாக்கி விடுவார்கள்.. இப்படி உண்மைத்தடத்திலிருந்து விலகிப் பேசப்படும் அனைத்திற்கும் பெயர் வதந்தியே.!

வதந்தி இன்னும் பலரூபத்தில் பேசப்படுகிறது. நடந்த ஒரு சம்பவத்தை அதைச் சார்ந்தது போலவே வேறு ரீதியில் மாற்றிப் பேசுவது ஒருரகம். ஒன்றுமில்லாத சிறு சம்பவத்தை மிகைப்படுத்தி பேசி பெரிதாக்கி பெரிய பிரச்னையை உண்டுபண்ணி விடுவது ஒருரகம்.. ஒரு சம்பவம் நிகழும்போது அதைச் சரிவரத் தெரிந்துகொள்ளாமல் மிகைப்படுத்திப் பேசுவதும் ஒருரகம். இப்படிப்பேசப்படும்அனைத்தும் வதந்தியையேயாகும்.

இப்படிப் பேசப்படும் வதந்திகளினால் நாட்டுமக்களுக்கிடையே,நல்ல நட்புக்களுக்கிடையே,குடும்ப உறவுகளுக்கிடையே எவ்வளவோ பிரச்சனைகளையும் பிரிவினைகளையும் ஏற்ப்படுத்தி விடுகிறது.சிலநேரங்களில் பேசப்படும் வதந்தி வார்த்தைகளால் சிலரின் வாழ்க்கைகூட கேள்விக் குறியாக மாறிவிடுகிறது.இன்னும் சொல்லப்போனால் நல்ல ஆட்சி அரசாங்கத்தைக் கூட இந்த வதந்தி களங்கப்படுத்தி ஆட்டம்காண வைத்துவிடுகிறது..அவ்வளவு சக்திமிக்கதாக உள்ளது இந்த வதந்தி என்கிற வார்த்தை.!.

சிறு வதந்திச்சொல் கூட சிலசமயம் காட்டுத்தீபோல் பரவி மிகப்பெரிய கலவரத்தை உண்டுபண்ணி விடுகிறது. நாட்டின் அமைதியையும் மக்களின் மனநிலையையும் இவ்வதந்தி பாழ்படுத்தி விடுகிறது.சிலர் பின் விளைவுகளை சிந்திக்காமல் விளையாட்டாக பேசிடும் வதந்தி கூட வினையாகிப்போய் பெரும் பிரச்னையை ஏற்ப்படுத்தி விடுகிறது.இன்றைய சூழ்நிலையில் இவ்வுலகில் பல பகுதிகளில் இனக்கலவரமும் உள்நாட்டுக் குழப்பங்களும் பல புரட்சிகளும் நடக்க வதந்தியும் ஒரு காரணமாக இருக்கிறது.

வதந்தி சாதாரணமாக மக்களிடையே பேசப்பட்டு வந்தாலும் அதைவிட மக்கள் மிகவும் நம்பியிருக்கும் ஊடகங்கள், மீடியாக்களால் கூட சிலசமயம் மிகைப்படுத்தி அறியத்தரும் வதந்திகளினால் பெரும் சர்ச்சை ஏற்ப்பட்டு விடுகிறது. ஒரு விஷயத்தையோ ஒரு சம்பவத்தையோ நாம் கேள்விப்பட்டோமேயானால் அதை தீர விசாரிக்க வேண்டும்.தனி ஒரு நபர் சொன்ன வார்த்தையை வைத்தோ, எங்கோ கேள்விப்பட்டதை வைத்தோ நாம் தீர்க்கமாய் உண்மையென முடிவெடுத்து விடக்கூடாது. ஆகவே உண்மை நிலையை முழுவதும் அறிந்து அதை மக்களின் கவனத்திற்கு கொண்டு செல்வதே சிறந்ததாகும்.

இதைவிட மோசமான ஒரு வதந்தி என்று சொன்னால் சில சமூக விரோதிகள் குழப்பம் விளைவிக்கும் நோக்கில் தெரிந்திருந்தும் மனசாட்சியே இல்லாமல் பிரச்சனைகளை ஏற்ப்படுத்த வேண்டி பேசப்படும் வதந்தியாகும். இத்தகையோரின் பேச்சில் மயங்கிடாது பொது மக்கள் தான் விழிப்புணர்வுடன் இருந்துகொண்டு உண்மை நிலையை அறிந்து செயல்பட வேண்டும்.

ஆகவே இப்படி பலவகையிலும் தீங்கிழைக்கும் வதந்தியை பேரழிவுக்குச்சமமான வதந்தியை நாம் எந்த சூழ்நிலையிலும் பரப்பாமல் தவிர்க்க வேண்டும். வதந்தியால் ஏற்படும் பின்விளைவுகளை உணர்ந்து எதையும் யோசித்து பேசினால் நாட்டிற்கும், வீட்டிற்கும் நன்மையே உண்டாகும்.வதந்தியை பரப்பி நமக்கு நாமே தீங்கிழைத்துக் கொள்வது நல்லதொரு பண்பாடாக இருக்க முடியாது.எனவே மனித நேயத்தைக் காக்கவும்,உறவுகளை மேம்படுத்தவும், அமைதியை நிலைநாட்டவும், நிம்மதியாய் ஒற்றுமையுடன் வாழவும் வதந்தியை பரப்பாமல் நல்ல வழிமுறைகளை தேடிக்கொள்வோமாக..!!!

அதிரை மெய்சா

எண்ணிலடங்கா இஸ்லாமிய தியாகிகள் 3

தொடர் 24

கடந்த சில வாரங்களாக இந்திய சுதந்திரப் போராட்டத்துக்காக தங்களின் உடல் பொருள்,  ஆவியை தியாகம் செய்த பல இஸ்லாமியப் பெருமகன்களின் வரலாற்றை  சுருக்மாக கண்டு வருகிறோம். இந்திய சுதந்திரப் போராட்டத்தில் சிறைக்கு சென்றவர்களிலும் உயிர்களை தியாகம் செய்தவர்களிலும் முஸ்லிம்கள் அவர்களின் மக்கள் தொகையின் விகிதாச்சாரத்தோடு ஒப்பிடும்போது மிக அதிகமாகவே இருந்தார்கள் என்று பிரபல எழுத்தாளர் குஷ்வந்த் சிங் இல்லஸ்ட்ரேடட் வீக்லி பத்திரிகையில் எழுதி அது 20/12/1975 அன்று வெளிவந்தது. 

ஆனால் மறு புறத்தில் முஸ்லிம்கள் செய்த தியாகங்களை குறைத்து மதிப்பிடுகிற ஒரு கூட்டம் அளவற்ற பொய்களை அள்ளி விட்டுக் கொண்டிருக்கிறது. முஸ்லிம்களை  ஏதோ ஒரு வேண்டாத தலைச்சுமை போல ஆட்சியாளர்களும் அவர்களின் அடிவருடிகளும் நினைத்துக் கொண்டு இருக்கிறார்கள். இன்னும் ஒரு சிலர் இந்த நாட்டை விட்டு அப்புறப்படுத்த வேண்டுமென்றும் அள்ளிவிட்டுக் கொண்டிருக் கொண்டிருக்கிறார்கள். அரசியல் சட்டத்துக்கு விரோதமான அவர்களின்  இந்த  க் கருத்துக்கள், சட்டபூர்வமான நடவடிக்கைகளை அவ்விதம் பேசுவோர் மீது ஏவி விடப்பட்டாலும்,அவை யாவுமே    கண் துடைக்கும் காரியங்கள்தான்.  

அந்நியனுக்கு அடிமைச் சேவகம் செய்தவர்கள் எல்லாம் இன்று ஆட்சிக் கட்டிலும், அதிகார இடங்களிலும் அமர்ந்து கொண்டு சுதந்திரத்திற்கு தங்கள் எதிர்கால சந்ததியினரின் நலன்களை அர்ப்பணித்த சமுதாயத்தை அடக்கியாள்கின்ற அவலம் ஒருபுறம் ; சுதந்திரத்துக்காக வாளேந்திய சமுதாயம் வாழ்வுரிமை கேட்டு வீதியில் நிற்கும் அவலம் மறுபுறம்.

கிழக்கிந்திய கம்பெனிக்கு அவர்களின் பிரதிநிதிகளாக இருந்தூ கிஸ்தி வசூ¬லித்து தந்தவர்கள் எல்லாம் , இன்று தியாக வேஷம் போட்டு முஸ்லிம்களின் தியாகத்தின்  சூரியனின் கதிர்களை ,  கரங் கொண்டு மறைத்து விடலாம் என்று நினைக்கலாம், ஆனால் ஆயிரம் கரம் கொண்டு மறைத்தாலும் ஆதவன் மறைவதில்லை. இந்திய மண்ணின் கடைசி இஸ்லாமியர் இருக்கும் வரை இந்தியாவின் விடுதலைக்கு இஸ்லாமியர்கள் ஆற்றிய அரும்பணிகள் மறையாது. எவ்வளவு காவிச்சாயம் அடித்தாலும் இந்த தியாகங்களை மறைக்க முடியாது.

சிறு குறிப்புகளுடன் இந்தப் பட்டியல் நீளும். 

வேலூர் சிப்பாய்க் கலகம்:-

ஒரு சுதந்திரத்துக்கான முதல்  போராட்டம என்று வர்நிக்கப்படும் சிப்பாய் புரட்சியைக்  கூட முஸ்லிம்கள் தொடர்புடையதால்  செய்தால் கலகம் என்று வரலாற்றுப் புரட்டு செய்கிறார்கள். இந்தப் பாவிகள் .  1857 சிப்பாய்க் கலகப் புரட்சிக்கு வித்திட்ட மௌலவி அஹமது ஷாவின் தலைமையில் போராடிய சிப்பாய்களை பீரங்கி வாயில் வைத்து பிளந்து, அகழியில் வீசினார்கள்.  இந்த உயிர்த் தியாகங்களைக் கூட  மறந்துவிட்டு வரலாற்றுப் பாடங்களில் இரண்டு மார்க் கேள்விக்கு பதிலாகவே  இந்த சம்பவம் சித்தரிக்கப் படுகிறது.

மாப்பிள்ளைமார்கள் போராட்டம்:

1921ல் வெள்ளையனுக்கு எதிராக கிலாபத் இயக்கம் கண்ட 100க்கும் அதிகமான மாப்பிளாமார்கள் கேரளாவின் திரலிருந்து ஏற்றி கோயம்புத்தூருக்கு ஒரு கூட்ஸ் வண்டியில் அடைக்கப்பட்டு அனுப்பி, நசுக்கிக் கொல்லப்பட்டார்களே! இந்த மாப்பிள்ளைமார் மணவறையில் அனுபவிக்காமல் , பிணமாகி  அடக்கப் பட்ட மண்ணறைகள் இன்றும் கோவை ரயில் நிலையில் அருகில் அமைதியாக சான்று பகர்கிறதே! இந்த வரலாற்று தியாகத்தை  எப்படி மறக்க முடியும்? மறைக்க முடியும்?

காந்திஜியின் பட்டங்கள், பதவிகள் புறக்கணிப்பு போராட்டம்:-

அன்றைய வெள்ளையன் ஆட்சியில் 13% இடஒதுக்கீட்டில் இருந்த முஸ்லிம் சமுதாயம் காந்திஜியின் பட்டங்கள், பதவிகள் புறக்கணிப்புப் போராட்டத்திற்கு அழைப்பு விடுத்தது. கான் சாஹிபிலிருந்து, காயிதே மில்லத் வரை 90% அதிகமானோர் தங்கள் பட்டங்கள் பதவிகளைத் துறந்தனர். அன்று பட்டங்கள் பதவிகளைத் துறக்காமல் இருந்திருந்தால், இன்று, இடஒதுக்கீடு கேட்டுப் போராடும் அவல நிலை இருந்திருக்காதே ! அரசுபபதவி அதிகாரங்களில் முஸ்லிம்களின் சதவீதம் குறைந்ததற்கு இதுவும் ஒரு வலுவான காரணமல்லவா? முஸ்லிம்களை உசுப்பேத்திவிட்டு விட்டு மற்றவர்களுக்குப் பதவிகளைப் பெற்றுத்தந்த ஒரு அரசியல் அசித்க்கு ஆளானவர்கள்தானே முஸ்லிம்கள்?

இந்திய விடுதலைப் போரில் உலமாக்களின் பங்கு

இந்திய விடுதலைப் போரில் உலமாக்களின் பங்கு குறிப்பிடத்தக்கது. இந்திய விடுதலைப் போரில் தங்கள் வழிபாட்டுத் தலங்களைக் கூட வெள்ளையனுக்கு எதிராகப் பயன்படுத்திய ஒரு சமுதாயம் உண்டென்றால், அது இஸ்லாமிய சமுதாயம்தான்.

வெள்ளிக் கிழமை ஜூம்மா மேடைகள் எல்லாம் வெள்ளையனுக்கு எதிராக போர்ப் பரணி பாடின. ஜூம்மா மேடைகளில் உரமேற்றியதன் விளைவு வீரத்துடன் இந்த சமுதாயம் வெள்ளையனை எதிர்த்துப் போராடியது. வெள்ளையனின் உடை கலாச்சாரம், மொழி போன்றவை ஹராம் என பத்வாக்கள் அளித்தனர். வெள்ளையனின் அதிகார வரம்புக்கு உட்பட்ட நிலப்பரப்புகள் யுத்த பூமி  என்பது போன்ற பத்வாக்கள் வழங்கப்பட்டன.

19 ஆம் நூற்றாண்டின் மிக முக்கிய இஸ்லாமிய அறிஞராகத் திகழ்ந்த மௌலவி காசிம் அஹ்மத் நாளோத்வி 1885ல் இந்திய தேசிய காங்கிரஸில் முஸ்லிம் உறுப்பினராகச் சேர வேண்டும் என்று தீவிரமாகப் பிரச்சாரம் செய்தார். வெள்ளையனை நாட்டை விட்டு விரட்டுவது மார்க்கக் கடமை என்ற அடிப்படையில் நூற்றுக்கும் மேற்பட்ட பத்வாக்களை (மார்க்கத் தீர்ப்புக்களை) திரட்டி நுஸ்ரத்தூல் அஹ்ரார் (விடுதலைப் போராட்ட வீரர்களுக்கான உதவி) என்ற பெயரில் நூல் ஒன்றையும் வெளியிட்டார்.

காந்திஜி அழைப்பு விடுத்த கள்ளுக்கடை போராட்டத்திற்கு மதுரையில் கைதான 19 பேரில் 10 முஸ்லிம்கள் . இட ஒதுக்கீட்டில் பதிமூன்று சதவீதமே பெற்றிருந்த முஸ்லிம்கள் தியாகம் செய்வதில் – சுதந்திரத்துக்காகப் போராடுவதில் – துன்பங்களைத் தாங்கிக் கொள்வதில்  50 சதவிகிதத்திற்கு அதிகமாகப் பங்கு கொண்டிருந்தனர்  என்பது  குறிப்பிடத்தக்கது.

காந்திஜி நடத்திய அஹிம்சைப் போராட்டத்தில் கலந்து கொண்ட முஸ்லிம்களின் பட்டியலில் ஒரு பகுதி:

1. காதிர் முஹைத்தீன் மரைக்காயர் (பர்மா, கிலாபாத், ஒத்துழையாமை)

2. மி.இ. முஹம்மது அப்துல் காதர் சாஹிபு ி தென்காசி (கிலாபத், அந்நியத் துணி எரிப்பு, ஒத்துழையாமை இயக்கம்)

3. அப்துல் ஹமீதுகான் 1932ல் சென்னை மேயராக பணியாற்றியவர் (சுதந்திரப் போராட்டத்திற்காக சென்னை சட்டசபையில் குரல் கொடுத்தார்.)

4.முகமதலி சேலம் (கள்ளுக்கடை மறியல்)

5. பி.என். அப்துல் கபீர் தாராபுரம் (வில்லுப்பாட்டு மூலம் தேசப் பற்றை 

வளர்த்தார், கிலாபத்திலும் கலந்து கொண்டார்)

6. பண்டிட் அப்துல் மஜீத் பளைக்குளம் (கிலாபத்)

7. கலிபுல்லாஹ் திருச்சி (கிலாபத்)

8. நூர்மல் சென்னை (பகத்சிங் படத்தை அடையில் வைத்து விற்றதாக கைது செய்யப்பட்டு, 18-1 அச்சு சட்டப்படி வழக்குத் தொடரப்பட்டது.)

9. அப்துல் ஹமீது

10. மௌலானா அப்துல் காதர்

1973 ம் ஆண்டு தமிழக அரசு புத்தகம் ஒன்றை வெளியிட்டது. அதில் நேதாஜியின் தேசிய இராணுவத்தில் பணியாற்றிய தமிழர்களின் பட்டியலை வெளியிட்டிருந்தது. அப்பட்டியலில் 25% மேற்பட்ட முஸலி¬ம்களின் பெயர்கள் இடம் பெற்று  இருந்தன. 

அவர்களின் விபரம் வருமாறு:

பள்ளப்பட்டி மனிமொழி மவ்லானா

இராஜகிரி அப்துல்லா

இளையான்குடி கரீம் கனி

திருப்பத்தூர் அபூபக்கர்

திருப்பத்தூர் தாஜிதீன்

அத்தியூத்து அபூபக்கர்

பக்கரி பாளையம் அனுமன் கான்

சென்னை அமீர் ஹம்சா

சென்னை ஹமீது

செங்குன்றம் கனி

வண்ணாரப்பேட்டை ஹயாத்கான்

புதுவலசை இபுராஹிம்

பார்த்திபனூர் இபுராஹிம்

வனரங்குடி இபுராஹிம்

இளையான்குடி அப்துல் கபூர்

மேலூர் அப்துல் ஹமீது

சோழசக்கர நல்லூரி அப்துல் ஜப்பார்

தத்தனனூர் அப்துல் காதர்

பட்டுக்கோட்டை அப்துல் காதர்

திருப்பூர் அப்துர் ரஜாக்

காரிவிப்பட்டினம் அப்துல் மஜித்

குருவம் பள்ளி அப்துல் மஜீத்

கண்ணாத்தாள் பட்டி அப்துல் முத்தலிபு

லெப்பைக் குடிகாடு அப்துல் சலாம்

ராம்நாடு அப்துல் வஹாப்

மானாமதுரை அப்துல் பாசித்

திரிவிடைச் சேரி அப்துல் வஹிப்

அத்தியூத்து இபுராஹிம்

சென்னை ஜாபர் ஹக்கிமி

சிங்கம் மங்களம் ஜெய்னுல் ஆபிதீன்

திருப்பத்தூர் காதர் பாட்ஷா

புதுவலசை முஹம்மது லால் கான்

பார்த்திபனூர் கச்சி மைதீன்

தஞ்சை முஹம்மது தாவூது

அறந்தாங்கி முஹம்மதுசெரிபு

திருச்சி வரகனேரி முஹம்மது சுல்தான்

வடபழனி சென்னை முஹம்மது யூசுப்

தூத்துக்குடி முஹம்மது கல்லுரிஜனி

சிவகங்கை முஹம்மது இபுராஹிம்

சென்னை முஹம்மது உமர்

மதுரை மொய்தீன் பிச்சை

அம்மன்சத்திரம் முஹம்மது மீராசா

திருப்பத்தூர் பீர் முஹம்மது

கும்பகோணம் ரஹ்மத்துல்லா

குடியத்தம் நஜீமுல்லாஹ்

கிருஷ்ணகிரி தாவூத் ஷாயிபு

இராமநாதபுரம் சையது கனி

பரங்கிப் பேட்டை  தாஜிதீன்

மன்னர்குடி சிக்கந்தர்

கம்பம் சிக்கந்தர்

முதுகுளத்தூர் சுல்தான்

கும்பகோணம் சுல்தான்

இராமநாதபுரம் தாஜிதீன்

இந்திய சுதந்திரத்துக்கான விடுதலைப் போரில் இவ்வளவு முஸ்லிம்களும் தங்களுடைய  தியாகத்தால் இந்திய சுதந்திரப் போராட்டத்தை வடிவமைத்தார்கள். தங்களின் இரத்தத்தை சிந்தினார்கள். இன்னுயிர் ஈந்தார்கள். கண்ணீர் சிந்தினார்கள். தியாகத் தழும்புகளை ஏற்றார்கள். 

இன்ஷா அல்லாஹ் அன்னியருக்கு மண்டியிட மறுத்த , மருத நாயகம் என்கிற மாவீரனின் வரலாற்றோடு  அடுத்த வாரம் இத்தொடர் நிறைவு பெறும். 

இபுராஹீம் அன்சாரி

அமைதியற்ற உள்ளத்திற்கு அருமருந்து - 022 0

அளவற்ற அருளாளனும் நிகரற்ற அன்புடையோனுமாகிய

அல்லாஹ்வின் திருப்பெயரால். . .

அன்பார்ந்த சகோதர, சகோதரிகளே! அஸ்ஸலாமு அலைக்கும் (வரஹ்) குர்ஆனையும், நபி வழியையும் பின்பற்றினால்தான் மனம் அமைதி பெறும், நேர்வழியும் கிடைக்கும். குர்ஆனையும், நபி(ஸல்)அவர்களின் வாழ்க்கையையும் பின்பற்றி நடந்தால், உள்ளங்கள் அமைதி பெற்று இம்மை மறுமை வாழ்வில் வெற்றி பெறலாம் இன்ஷாஅல்லாஹ்!.

தான் விரும்பிய தரமானப் பொருட்களை செலவு செய்தல்:

நீங்கள் விரும்புவதை (நல்வழியில்) செலவிடாத வரை நன்மையை அடைந்து கொள்ளவே மாட்டீர்கள். நீங்கள் எப்பொருளை (நல் வழியில்) செலவிட்டாலும் அல்லாஹ் அதை அறிந்தவன். (அல்குர்ஆன் : 3:92)

நம்பிக்கை கொண்டோரே! நீங்கள் சம்பாதித்ததில் தூய்மையானவற்றையும், பூமியிலிருந்து உங்களுக்கு நாம் வெளிப்படுத்தியதிலிருந்தும் (நல் வழியில்) செலவிடுங்கள்! கண்ணை மூடிக் கொண்டே தவிர எதை வாங்கிக் கொள்ள மாட்டீர்களோ அத்தகைய மட்டமான பொருளைச் செலவிட நினைக்காதீர்கள்! (அல்குர்ஆன் : 2:267)

அபூதல்ஹா(ரலி) அவர்கள் மதீனாவிலேயே அன்சாரிகளில் பேரீத்தம் பழத் தோட்டங்கள் அதிகம் உள்ளவராக இருந்தார். அவரது சொத்துக்களில் அவருக்கு மிக விருப்பமானதாக 'பய்ரூஹா' தோட்டம் இருந்தது. பள்ளிவாசலுக்கு அருகில் அது அமைந்திருந்தது. நபி(ஸல்) அவர்கள் அதன் உள்ளே போய், அதன் சுவையானத் தண்ணீரைக் குடிப்பார்கள்.

இந்த 3:92 வசனம் இறங்கியதும், நபி(ஸல்) அவர்களிடம் அபூதல்ஹா வந்தார். ''இறைத்தூதர் அவர்களே! அல்லாஹ் உங்கள் மீது 3:92 வசனத்தை இறக்கி உள்ளான். என் சொத்தில் எனக்கு மிகவும் விருப்பமானது 'பய்ரூஹா' தோட்டம்தான். அதை அல்லாஹ்வின் வழியில் (நான்) தர்மம் (செய்கிறேன்). அதன் நன்மையை, நற்கூலியை அல்லாஹ்விடமே ஆதரவு வைக்கிறேன். இறைத்தூதர் அவர்களே! அல்லாஹ்வின் நாட்டப்படி அதை நீங்கள் (செலவு) செய்து கொள்ளுங்கள்'' என்று கூறினார்.

அப்போது நபி(ஸல்) அவர்கள், ''நல்லது. இது லாபம் தரும் சொத்தாகும். இது லாபம் தரும் சொத்தாகும் என (இருமுறைக்) கூறிவிட்டு, ''இது விஷயமாக நீ கூறியதைக் கேட்டேன். உன் நெருங்கிய உறவினர்களுக்கு இதை பங்கீடு செய்வதை நான் விரும்புகிறேன்'' என்றும் கூறினார்கள். உடனே அபூதல்ஹா அவர்கள் ''இறைத்தூதர் அவர்களே! அப்படியே செய்கிறேன்'' என்று கூறிவிட்டு, அபூதல்ஹா அந்த தோட்டத்தை தன் நெருங்கிய உறவினர்களுக்கும் தன் சிறிய தந்தையின் மக்களுக்கும் பங்கீடு செய்தார். (அறிவிப்பவர்: அனஸ் (ரலி) அவர்கள் (புகாரி, முஸ்லிம்)           (ரியாளுஸ்ஸாலிஹீன்: 297)

தன் மனைவி, மக்கள், தன் பொறுப்பின் கீழ் உள்ளவர்கள் ஆகியோரை இறைவனுக்குக்கட்டுப்பட ஏவுதல்! தீமைகளை விட்டும் தடுத்தல்!

(முஹம்மதே!) தொழுமாறு உமது குடும்பத்தினரை ஏவுவீராக! அதில் (ஏற்படும் சிரமங்களை) சகித்துக் கொள்வீராக! உம்மிடம் நாம் செல்வத்தைக் கேட்கவில்லை. நாமே உமக்குச் செல்வத்தை அளிக்கிறோம். (இறை) அச்சத்திற்கே (நல்ல) முடிவு உண்டு. (அல்குர்ஆன்: தாஹா 20: 132)

நம்பிக்கை கொண்டோரே! உங்களையும் உங்கள் குடும்பத்தினரையும் நரகை விட்டுக் காத்துக் கொள்ளுங்கள்! அதன் எரிபொருள் மனிதரும், கற்களுமாகும். அதன் மேல் கடுமையும், கொடூரமும் கொண்ட வானவர்கள் உள்ளனர். தமக்கு அல்லாஹ் ஏவியதில் மாறு செய்ய மாட்டார்கள். கட்டளையிடப்பட்டதைச் செய்வார்கள். (அல்குர்ஆன்: அத்தஹ்ரீம் 66:6)

(ஒருமுறை) ஹஸன்(ரலி) அவர்கள் தர்மப்பொருளாக இருந்த பேரீத்தம் பழத்தை எடுத்து, தன் வாயில் வைத்தார்கள். (உடனே தமது அன்பு பேரரிடம்), ''துப்பு, துப்பு! அதை எறிந்து விடு, நாம் தர்மப் பொருளை உண்ணக் கூடாது என்பது நீ அறியாததா?'' என்று நபி(ஸல்) கேட்டார்கள். (அறிவிப்பவர்: அபூஹுரைரா(ரலி) அவர்கள் (புகாரி, முஸ்லிம்)                  (ரியாளுஸ்ஸாலிஹீன்: 298)

நபி(ஸல்) அவர்களின் வீட்டில் வளர்ந்தவரான அபூஹஃப்ஸ் என்ற உமர் இப்னு அபூஸலமா (ரலி) அவர்கள் அறிவிக்கின்றார்கள்:-

நான் நபி(ஸல்) அவர்கள் வீட்டில் சிறுவனாக இருந்தேன். உணவுத்தட்டில் என் கை அங்குமிங்கும் அலைந்தது. அப்போது நபி(ஸல்) அவர்கள் ''சிறுவரே! (சாப்பிடும் போது) 'பிஸ்மில்லாஹ்' கூறு! உன் வலது கையால் சாப்பிடு! உன் அருகில் உள்ள பகுதியிலிருந்து (எடுத்துச்) சாப்பிடு என்று கூறினார்கள். இதன்பின் இதுதான் என் உண்ணும் பழக்கமாக இருந்தது. (அறிவிப்பவர்: உமர் இப்னு அபூஸலமா (ரலி) அவர்கள் (புகாரி, முஸ்லிம்)  (ரியாளுஸ்ஸாலிஹீன்: 299)

''நீங்கள் ஒவ்வொருவரும் பொறுப்பாளர்களாவீர். ஒவ்வொருவரும் தன் பொறுப்பு பற்றி கேட்கப்படுவார். தலைவரும் பொறுப்புதாரரே! அவர் தன் பொறுப்பு பற்றி கேட்கப்படுவார். ஒரு மனிதர் அவரின் மனைவி குறித்து பொறுப்புதாரர் ஆவார். அவரின் பொறுப்பு பற்றி அவர் கேட்கப்படுவார். ஒரு பெண்ணும் தன் கணவனின் வீட்டிற்குப் பொறுப்புதாரர் ஆவாள். அவள் தன் பொறுப்பு பற்றி கேள்வி கேட்கப்படுவாள். ஓர் ஊழியர் தன் எஜமானர் விஷயத்தில் பொறுப்புதாரர் ஆவார். ஒவ்வொருவரும் பொறுப்புதாரரே! அவரவர் தம் பொறுப்பு பற்றி கேட்கப்படுவார்'' என்று நபி(ஸல்) அவர்கள் கூறினார்கள். (அறிவிப்பவர்: இப்னு உமர்(ரலி)  அவர்கள் (புகாரி, முஸ்லிம்)           (ரியாளுஸ்ஸாலிஹீன்: 300)

அம்ரு இப்னு ஷுஐப்(ரலி) அவர்கள் தன்பாட்டனார் கூறியதாக அறிவிக்கின்றார்கள்:-

உங்களின் குழந்தைகளை அவர்கள் 7 வயது ஆகும் சமயம் தொழும்படி ஏவுங்கள். அவர்கள் 10 வயது ஆகும் போது இதற்காக அவர்களை அடியுங்கள். ''மேலும், அவர்களுக்கிடையே படுக்கைகளைப் பிரித்துப் போடுங்கள்'' என்று நபி(ஸல்) கூறினார்கள். (அறிவிப்பவர்: அம்ரு இப்னு ஷுஐப்(ரலி)  அவர்கள் (அபூதாவூது)  (ரியாளுஸ்ஸாலிஹீன்: 301)

''ஒவ்வொரு தூதரும்; அற்புதங்களுடன் அனுப்பப்பட்டனர். எனக்கு வழங்கப்பட்ட அற்புதம் திருக்குர்ஆன் – நபி (ஸல்) அவர்கள் ''. (நூல்: புகாரி, முஸ்லிம்)

'' திருக்குர்ஆனைப் பொருளுணர்ந்து படியுங்கள் ''

இன்ஷாஅல்லாஹ் வளரும்...

அலாவுதீன் S.

தொடு... துலங்கும் ! 13

எட்டிப் பிடித்துவிடும் தூரத்தில்தான்
இருந்தது
என்றாலும்
துரத்திப்பிடிக்கும் தூரம் செல்லும்வரை
விட்டுப்பிடித்தே
வாழ்ந்து பழகுகிறோம்

சுட்டுவிடும் என்றறிந்திருந்தும்
கட்டுப்படுத்திக் கொள்ளாமலே
தொட்டுவிட்டுப்
பின்
பட்டுத் தெளிகிறோம்

கற்றறிந்தோ பட்டறிந்தோ
பெற்றுவந்த புத்தியெல்லாம்
இற்றுப்போக இருந்துவிட்டு
மற்றொரு நாளையும்
வெற்றொரு நாளாக்குகிறோம்

முந்திச்செல்லும் முயற்சியைச்
சிந்தித்தும் பாராமல்
உந்தித் தள்ளுவார் எதிர்நோக்கி
பிந்தியே நிற்கிறோம்

கவனத்தில் கொள்க:

காற்றையும் கனவுகளையும் தவிர
கைப்பிடியளவு மண்ணோ
கவளம் உணவோ
கையுழைப்பின்றி கிடைக்காது

நகர்ந்து செல்லாவிடில்
நதியோ மனிதனோ
தேங்கியோ தூங்கியோ
தகர்ந்து போய்விடுவது சத்தியம்

சோம்பிய உடலும் சுருங்கிய எண்ணமும்
சோலியின்றி கிடந்தால்
நோய்ச் சேரும், நேர்ப்படாது
வாய்ச் சோறும் வசப்படாது

முயல்பவன் தன்னின்
செயல்களுக்கு மட்டுமே
இலக்கை நோக்கி
இழுத்துச் செல்லும் பலமுண்டு
முடங்கிக் காத்திருப்பவன்
முயற்சி யின்மையால்
முவ்வெட்டு ஆண்டுகளுக்குள்
முதுமை எய்திடுவான்

யாக்கையின் வேட்கையில்
வாழ்க்கையைத் தொலைத்தால்
மேற்கையும் கிழக்கையும்
மிஞ்சிய திசைகளையும்
மின்னலற்ற இருளே நிறைக்கும்

செய்ய ஒன்றும் இல்லையெனில்
சிந்திக்க நிறைய உண்டு;
சிந்திக்கக்கூடச் சோம்பலா?
செவிவழிச் செய்திகளில்
சம்பாத்திய வழிகள் கேள்

எழுந்து பார்
எட்டிவிடலாம்

நடந்து பார்
அடைந்து விடலாம்

விதைத்துப் பார்
விளையும்

நகர்த்திப் பார்
நகரும்

தொடு...
துலங்கும் !

சபீர் அஹ்மது அபுஷாஹ்ருக்

என்னை கண்டெடுக்க உதவியது இஸ்லாம் 0

அஸ்ஸலாமு அலைக்கும் வ ரஹ்மதுல்லாஹி வ பர காத்துஹு....

உங்கள் அனைவர் மீதும் எல்லாம் வல்ல இறைவனின் சாந்தியும் சமாதானமும் நிலவுவதாக... ஆமின்.

சகோதரி ஏஞ்சலா கொலின்ஸ் (Angela Collins), 9/11க்கு பிறகு இஸ்லாத்தை தழுவிய ஆயிரக்கணக்கான அமெரிக்கர்களில் ஒருவர். கலிபோர்னியாவின் மிஷன் வியேகோ நகரத்தின் அல்-ரிதா (Al-Ridah Academy) இஸ்லாமிய சிறுவர்கள் பள்ளியின் முன்னாள் முதல்வர். 

ஏஞ்சலா அவர்களின் வாழ்க்கைக்கான தேடல் 9/11னுக்கு முன்பே தொடங்கி விட்டது. மத்திய கிழக்கு நாடுகள் மற்றும் இந்தியாவில் பயணம் மேற்கொண்ட அவர், அங்கு தான் கண்ட முஸ்லிம்களின் நடவடிக்கைகளால் கவரப்பட்டு, பின்னர் அமெரிக்கா திரும்பி, அங்குள்ள முஸ்லிம்களிடம் பழகி இஸ்லாத்தை பற்றி அறிந்து கொண்டார். 

இஸ்லாம் குறித்து தவறாக யாரும் பேசினால் அவர்களிடம் தன் மறுப்பை தெரிவிக்கும் அளவு ஆர்வம் கொண்டிருந்த ஏஞ்சலா, அவர்களுக்கு தெளிவாக பதில் கூற வேண்டுமென்பதற்காக குரானை படிக்கத் தொடங்க, அதன் விளைவாக 9/11 நடந்து சில வாரங்களுக்கு பிறகு இஸ்லாமை தன் வாழ்க்கை நெறியாக ஏற்றுக்கொண்டார்...அல்ஹம்துலில்லாஹ். 

இது குறித்து அவர் கூறிய கருத்துக்கள் இங்கே உங்கள் பார்வைக்கு.... 

 

"நம்மையும், உலகில் உள்ள மற்ற அனைத்தையும் படைத்தவனுக்கு முழுமையாக அடிபணிய சொல்கின்ற ஒரே மார்க்கம் இஸ்லாம் தான். ஒரு முஸ்லிமாக, நான் எந்தவொரு காரியத்தை தொடங்கினாலும் அதில் ஒரு நோக்கம் இருக்க வேண்டும் என்றும், பின்னர் அந்த நோக்கத்தை சரியான வழியில் உருமாற்ற வேண்டும் என்பதையும் அறிந்தே இருக்கின்றேன். இது என்னை மேம்படுத்த உதவுகின்றது.   

அல்லாஹ் என்னுடைய இதயத்தை திறந்திருக்கின்றான், இஸ்லாம் எனக்கு திசையை காட்டியிருக்கின்றது, என்னை படைத்தவனை திருப்திபடுத்தி அதன் மூலம் இந்த உலகின் மகிழ்ச்சியையும், இறைவன் நாடினால் மறுமையின் மகிழ்ச்சியையும் பெற விரும்புகின்றேன்.

நான் சமீபத்தில் இஸ்லாத்தை தழுவியவள். என் முன்னோர்கள் கத்தோலிக்க கிருத்துவர்கள். பதினான்காவது வயதில் திருத்துவ கொள்கையை நிராகரித்து விட்டேன். 

என் நம்பிக்கை என்று வரும்போது நான் மிகவும் குழம்பி போனேன். ஏன் இறைவன் மனித ரூபத்தில் வரவேண்டும்?, ஏன் மனிதர்களின் பாவங்களுக்காக தான் கொல்லப்பட அனுமதிக்க வேண்டும்?

என் வாழ்நாள் முழுவதும் அனைத்தையும் புரிந்து கொள்ள தேடியிருக்கின்றேன். ஆனால் இதனை என்னால் புரிந்துகொள்ள முடியவில்லை. என்னுடைய சந்தேகங்களை பாஸ்டர்களிடமும் அறிஞர்களிடம் கேட்பேன். அவர்களும் அதீத முயற்சி எடுத்து தங்களால் முடித்தவரை கிருத்துவ நம்பிக்கையை விளக்க முயன்றார்கள். 

இப்போது என்னை நானே கேட்டுக்கொண்டேன், "ஏன் என்னுடைய மார்க்கம் இவ்வளவு சிக்கலாக இருக்க வேண்டும்?"  

சிறிது காலம் சென்ற பிறகு இந்த குழப்பத்தை எளிதாக்க முடிவெடுத்தேன். ஒரே இறைவன் தான், அவன் தான் நம்மை படைத்தவன்....அவ்வளவுதான். வேறு எந்த விளக்கமும் அறிவுக்கு ஒத்துவரவில்லை.  

இறைவனுடைய வார்த்தைகளை தங்கள் சொந்த விருப்பங்களுக்காக மாற்றிய மனிதர்களின் தவறுகளை விளக்க வந்த மார்க்கமாக நான் இஸ்லாமை பார்க்கின்றேன். 

இஸ்லாம் எளிமையானது. இங்கு இறைவன் இறைவனாக மட்டுமே பார்க்கப்படுகின்றான். அவன் நம்மை படைத்தான், நாம் அவனை மட்டுமே வணங்குகின்றோம். 

தன்னுடைய செய்தியை மனித சமுதாயத்துக்கு அறிவிக்க, இறைவன், மூசா (அலை), ஈசா (அலை), முஹம்மது (ஸல்) என்று நபிமார்களை அனுப்பி வைத்தான். இஸ்லாத்தில், ஈசா (அலை) மட்டுமே இறக்காத நபியாக இருக்கின்றார். அதனாலேயே உலகின் இறுதி நாளுக்கு முன்பு வேதம் கொடுக்கப்பட்டவர்களை வழி நடத்த அவர் வருவார். குரான் இறுதி இறைவேதமாகவும், மனிதர்களின் கரங்களால் மாற்றப்படாத வேதமாகவும் இருக்கின்றது. 

இஸ்லாம் உறுதிப்படுத்துகின்றது, நீங்கள் முஸ்லிம் என்பதால் மட்டும் உங்களுக்கு சுவர்க்கம் கிடைத்து விடாது என்று. இறைவன் ஒருவனே என்று நீங்கள் நம்பினால் மட்டும் நேராக சுவர்க்கத்துக்கு போய் விட முடியாது. சுவர்க்கத்துக்கு செல்ல உங்களுடைய எண்ணங்களும், செய்கைகளும் இறைத்தூதர்கள் வாழ்ந்து காட்டிய படியும் அவர்கள் கொண்டு வந்த இறைச்செய்தியை சார்ந்தும் இருக்கவேண்டும்.     

சுவர்க்கம் என்பது உங்கள் தாய் தந்தையர் காட்டியப்படி நடந்தால் மட்டும் வந்துவிடாது. மாறாக, ஒரு முஸ்லிமாக, தொடர்ந்து உண்மையை ஆராய்வதும், அதனை அறிந்து கொள்ள முயல்வதும் நம்முடைய பொறுப்பாகும்.    

குரானின் ஒவ்வொரு அத்தியாயத்தையும் இருமுறை படித்த பிறகு, விரிவான குறிப்புகளை எடுத்துக்கொண்ட பிறகு, இந்த தலைசிறந்த படைப்பு என்னை படைத்தவனிடமிருந்து தான் வந்திருக்க வேண்டும் என்று நம்பத் தொடங்கினேன். 

  

சந்தேகமே இல்லாமல், என்னைப் பற்றி நான் அறிந்திருந்ததை விட இந்த புத்தகத்தின் ஆசிரியருக்கு அதிகமாகவே தெரிந்திருக்கின்றது. 

இங்கே என்னுடைய நாட்டில் (அமெரிக்கா) இஸ்லாம் தவறான புரிதலுக்கும், வெறுப்புக்கும் ஆளாகி இருக்கின்றது. நான் இஸ்லாத்தை தழுவியது என்னுடைய குடும்பத்தினருக்கும், நண்பர்களுக்கும் புதிராக இருந்தது. 

மத்திய கிழக்கில் நான் கண்ட முஸ்லிம்களின் வாழ்க்கை முறையில் அதிக வேறுபாடுகள் இருந்தாலும், அவர்களிடம் பெருந்தன்மையையும், தாராள மனப்பான்மையையும் மிக அழகிய ஒன்றாக கண்டேன். அதுமட்டுமல்லாமல், அவர்கள் கண்ணுக்கு அந்நியமான ஒரு பெண்ணை அவர்களில் ஒருவராக உடனடியாக ஏற்றுக்கொண்டார்கள். 

இருந்தாலும், முஸ்லிம்களிடம் அவர்கள் சார்ந்த கலாச்சார தாக்கம் அதிகமாகவே இருக்கின்றது. முஸ்லிமாக பிறந்த ஒருவர் தான் சார்ந்த கலாச்சார தாக்கத்திலிருந்து வெளிவர எவ்வளவு கடினப்படுகின்றார் என்பதை உணர்ந்திருக்கின்றேன்.  

அதனால் நான் கலாச்சார வேறுபாடுகளை தள்ளி வைத்து விட்டு, குரான் மற்றும் நாயகம் (ஸல்) அவர்கள் காட்டித் தந்த வழிமுறை படியே வாழ முயற்சிக்கின்றேன்.  

இஸ்லாம் என்ற அமைப்பு (system) பல்வேறு பின்னணியை கொண்ட மக்களை தன்னகத்தே கொண்ட ஒன்று. இஸ்லாம் எந்தவொரு சூழ்நிலைக்கும் பொருந்தும் மார்க்கம். 

நான் நம்பிக்கையுடன் கூறுவேன், இஸ்லாம் என்ற ஒன்றை அல்லாஹ் எனக்குள் விதைத்திருக்காவிட்டால் என்னை என்னால் நிச்சயம் கண்டுபிடித்திருக்க முடியாது.   

இன்று, இதோ நான், ஏஞ்சலா, முஸ்லிம் அமெரிக்க பெண்: தன்னை படைத்தவனை பல காலங்களாக தேடிக்கொண்டிருந்த ஒரு ஆன்மா....இந்த பிரபஞ்சத்தையும் மற்றும் அதற்கு அப்பால் உள்ள அனைத்தையும் படைத்தவனை இஸ்லாத்தில் கண்டிருக்கின்றது....

ஏஞ்சலா கொலின்ஸ்"     

சகோதரி ஏஞ்சலா அவர்களின் பெற்றோர்கள் சிறிது காலத்திற்கு பிறகு அவரை ஏற்றுக் கொண்டார்கள். தங்களுடைய மகளின் முடிவை தாங்கள் ஏற்றுக் கொண்டதாகவும், இஸ்லாத்தை ஏற்றுக் கொண்ட பிறகு தங்கள் மகள் அதிக மகிழ்ச்சியுடன் இருப்பதாகவும் குறிப்பிடுகின்றனர்... அல்ஹம்துலில்லாஹ். 

இஸ்லாம், எத்தனை சோதனைகள் வந்தாலும் அதனை தாண்டி கம்பீரமாய் நிற்கும். கோடானுகோடி பேரை தொடர்ந்து அரவணைக்கும். அதில் நம்முடைய பங்கும் சிறிதளவேணும் இருக்க வேண்டுமென்று எல்லாம் வல்ல இறைவனை பிரார்த்திப்போம்....

மேலும் "அல்லாஹ் இறக்கி வைத்த இதைப் பின்பற்றுங்கள்" என்று அவர்களிடம் கூறப்பட்டால், அவர்கள் "அப்படியல்ல! எங்களுடைய மூதாதையர்களை எந்த வழியில் கண்டோமோ, அந்த வழியையே நாங்களும் பின்பற்றுகிறோம்" என்று கூறுகிறார்கள்; என்ன! அவர்களுடைய மூதாதையர்கள் எதையும் விளங்காதவர்களாகவும், நேர்வழி பெறாதவர்களாகவும் இருந்தால் கூடவா? --- Qur'an 2:170        

இத்தளத்தில் உள்ள இஸ்லாத்தை தழுவியவர்கள் தொடர்பான அனைத்து பதிவுகளையும் காண <<இங்கே>> சுட்டவும்.   

இறைவன் நம் அனைவரையும் என்றென்றும் நேர்வழியில் செலுத்துவானாக...ஆமின். 

அல்லாஹ்வே எல்லாம் அறிந்தவன்...

Original article published as: 

1. Why I decided to Submit - Angela Colins, dated 9th September 2006 on islamicity.com. 

Tamil translation of the meanings of the original article written by:

1. Aashiq Ahamed. A

My Sincere thanks to:

1. Youtube.

Reference:

1. Choosing Islam: My Life as a convert - Sandra Marquez, People Magazine dated 4th September 2006. 

உங்கள் சகோதரன், 

ஆஷிக் அஹ்மத் அ

நன்றி : http://www.ethirkkural.com/2010/09/blog-post.html

இறையச்சமுள்ள தந்தை - 02 0

ஈராக்கில் உள்ள டைக்ரிஸ் நதிக்கரை ஓரமாக இளைஞர் ஒருவர் அமர்ந்திருந்தார். அவருக்கு அதிகப் பசி இருந்தது. ஆனால், அவரிடம் உண்பதற்கு எதுவுமில்லை. நதியையே வெறித்துப் பார்த்தவாறு அவர் அமர்ந்திருக்க, அதில் ஆப்பிள் ஒன்று மிதந்து வந்தது.

விருவிருவென விரைந்து சென்றார்; அதை எடுத்தார்; உண்டு முடித்தார். பசியின் தாக்கம் சற்று குறைந்து ஆசுவாசம் அடைந்த பிறகுதான் அவருக்குக் கவலை தோன்றியது.

என்ன கவலை?

‘எனக்கு உரிமையில்லாத ஆப்பிள் பழம் அது. அதன் உரிமையாளர் யாரென்றும் தெரியாது. அவரிடம் அனுமதியும் வாங்கவில்லை. பிறகு, ஏன் அதைச் சாப்பிட்டேன்?’ என்பதே அந்தக் கவலை. யோசிக்க, யோசிக்க கவலை அதிகமாகி, அது யார் வீட்டு ஆப்பிள் என்பதைக் கண்டுபிடிக்க அதன் உரிமையாளரைத் தேடி நடக்கத் தொடங்கினார். வெள்ளம் பாய்ந்து வரும் திசையின் கரையோரம் உள்ள வீடுகளை எல்லாம் அவர் நோட்டமிட்டவாறே நடக்க, ஒரு வீட்டில் பழத்தோட்டத்தைக் கண்டார். அதிலுள்ள ஆப்பிள் மரமொன்றில் பழங்கள் கனிந்து தொங்குவதையும் அதன் கிளையொன்று நதியில் நீட்டிக் கொண்டிருப்பதையும் பார்த்துவிட்டார்.

‘ஹா! இந்த வீடாகத்தான் இருக்க வேண்டும்’ என நினைத்து அந்தக் கதவைத் தட்டினார். ‘இந்த வீட்டின் உரிமையாளரைச் சந்திக்க வேண்டும்’ என அனுமதி கேட்டார். முதியவர் ஒருவரிடம் அவரை அழைத்துச் சென்றார்கள். ஒளிவீசும் முகம்; தீர்க்கமான பார்வையுடன் அமர்ந்திருந்தார் அந்த முதியவர்.

‘ஐயா! உங்கள் வீட்டுக் கனியை உங்கள் அனுமதியின்றி நான் சாப்பிட்டுவிட்டேன்; தவறு செய்துவிட்டேன்’ என்று தம் கதையைச் சொன்னார் இளைஞர்.

தவறு செய்துவிட்டேன் என்று தெரிந்தவுடன் அந்த இளைஞர் இறைவனிடம் பாவ மன்னிப்புக் கோரி விட்டு அடுத்த வேலையைப் பார்க்கச் சென்றிருக்கலாம். அதுவே போதுமானதாக இருந்திருக்கும்தான். ஆனால், இவர் அதையும் தாண்டி உன்னதமானவர் என்று அந்தப் பெரியவருக்குத் தெரிந்துவிட்டது. இப்படியானவரை அப்படியே விட்டுவிட முடியாது என்ற முடிவுடன், ‘ஒரு நிபந்தனை. அதை நிறைவேற்றினால் போதும். உன்னை மன்னிப்பேன்’ என்றார்.

பெருந்தன்மையாளர் என்று நெற்றியில் எழுதி ஒட்டியிருக்கிறது. தோட்டத்திற்கு நீர்பாய்ச்சு; களை எடு என்று ஏதாவது எளிதான வேலையைச் சொல்லப் போகிறார் என்ற பெரும் நம்பிக்கையுடன் இளைஞர் தலையாட்ட, முதியவர் அந்தத் தலையில் ஒரு குண்டைப் போட்டார்.

“திருமண வயதில் எனக்கொரு மகள் இருக்கிறாள். ஆனால் அவளது தோற்றம் அழகில்லாதது; பேதை; என்னுடைய இறப்புக்குப் பிறகு அவளை யார் கவனித்துக் கொள்ளப்போகிறார்கள் என்ற கவலையில் இருந்தேன். உன்னைப் பார்த்ததும் அந்தக் கவலை பறந்துவிட்டது. அவளுக்குரிய தேவைகளை உன்னைவிடச் சிறப்பாய் யார்தான் நிறைவேற்ற முடியும்? எனவே அவளை நீ மணமுடிப்பதாக வாக்குறுதி அளித்தால் உனக்கு மன்னிப்பு வழங்குவேன்!”

காசோ, பணமோ சற்று அதிகமாகக் கேட்டாலும் கடன் வாங்கியாவது பிரச்சினையைத் தீர்த்துவிடலாம். இவரோ வாழ்க்கையைக் கேட்கிறாரே என்ற திகைப்பு தாக்கினாலும் நிதானமாக யோசித்தார் அந்த இளைஞர். மாற்றான் தோட்டத்துக் கனியை அனுமதியின்றி உண்ட பாவத்திற்கு மறுமையில் நிரந்தர இழப்பு அடைவதைவிட அவருடைய மகளை மணந்து கொண்டு இம்மையிலேயே பரிகாரம் செய்துவிடலாம் என்று முடிவெடுத்து, தலையாட்டினார் அந்த இளைஞர். திருமணமும் நடைபெற்றது.

ஆனால், முதல் இரவன்றுதான் அவருக்குப் பெரிய அதிர்ச்சி காத்திருந்தது. இனிய அதிர்ச்சி. பெரியவர் குறிப்பிட்ட எந்தக் குறைகளும் இல்லாத, நிறைவான அழகு ததும்பிய மங்கை அவருக்கு மனைவியாக வாய்த்திருந்தார்.

தாபித் பின் ஸவ்தி எனும் அந்த பாரசீக முஸ்லிம் இளைஞருக்கும் முஸ்லிம் பெரியவரின் மகளுக்கும் ஈராக்கின் தெற்குப் பகுதியில் அமைந்துள்ள கூஃபா நகரில் ஹிஜ்ரீ 80ஆம் ஆண்டு, (கி.பி. 700) பிறந்தார் அந்நுஃமான்; இவர்தாம் பிற்காலத்தில் தம் ஞானத்தால் புகழ்பெற்ற இமாம் அபூஹனீஃபா அந்நுஃமான் இப்னு தாபித் (ரஹிமஹுல்லாஹ்).

இமாம் அபூஹனீஃபாவின் தந்தை துணி வர்த்தகத்தில் ஈடுபட்டிருந்தார். அது நன்கு செழித்தோங்க, வர்த்தகக் குடும்பத்தின் செல்வச் செழிப்பில் வளரத் தொடங்கினார் இமாம். எனினும் அவரது சிறுவயதிலேயே இஸ்லாமியக் கல்வி புகட்டப்பட்டது. சிறு வயதிலேயே திருக்குர்ஆன் முழுவதையும் மனனம் செய்துவிட்டார். அதுவும், குர்ஆன் ஓதும் கலையின் முன்னோடி இமாமான ஆஸிம் அவர்களிடமிருந்து அதனை அவர் பயின்றார். அதை முடித்துவிட்டு நபிமொழிகள், மார்க்கத்தின் அடிப்படைக் கூறுகள் ஆகியவற்றைப் பயின்றாலும் அத்தருணங்களில் அவரது நோக்கமெல்லாம் தம் வாழ்க்கையையும் குடும்பத் தொழிலையும் இஸ்லாமிய நெறிமுறைகளுக்குள் அமைத்துக்கொள்ள வேண்டும் என்பது மட்டுமே இலட்சியமாக இருந்திருக்கிறது. எளிய இலட்சியம். இஸ்லாமிய வரலாற்றில் தமக்கென சிறப்பான ஓர் இடம் காத்திருப்பதை அவர் அப்போது அறியவும் இல்லை; அதற்கான பெரு முனைப்புகளில் ஈடுபடவும் இல்லை.

அக்காலத்தில் ஈராக்கின் இருபெரும் நகரங்களுள் ஒன்று கூஃபா. பண்டைய நாகரிகத்தில் திளைத்திருந்த ஈராக்கில் கிறித்தவர்கள், பாரசீகர்கள், கிரேக்க தத்துவவாதிகள் எனப் பலதரப்பட்ட மதங்களும் நம்பிக்கைகளும் பரவியிருந்தன. இப்படியான நாட்டில் இஸ்லாம் எழுச்சியுற்றதும் மக்களிடம் ஊறியிருந்த அந்தப் பலவித நம்பிக்கைளும் கருத்துகளும் இஸ்லாமிய மார்க்கத்தில் புகுந்து முரண்பாட்டைத் தோற்றுவிக்கத் தொடங்கின. இவை போதாதென்று ஷியா, முஅதஸிலா, பாலைவனங்களில் பரவியிருந்த காரிஜியாக்கள் ஆகியோர் விளைவித்த குழப்பமோ பெரும் குழப்பம்.

இவை தவிர, மற்றொரு முக்கியப் பிரச்சினையாக திருக்குர்ஆன் இறைவனால் உருவாக்கப்பட்டது என்றொரு குதர்க்கம் தோன்றி, அந்தக் கூட்டத்தினர் பெரும் குழப்பத்தை ஏற்படுத்தி வந்தனர். உமய்யாக்களுக்குப் பிறகு தோன்றிய அப்பாஸிய கலீஃபாக்கள் அதை அரசாங்கத்தின் முடிவாகவே ஏற்றுக்கொண்டிருந்தனர். அந்தக் குழப்பத்தை எதிர்த்துப் பேசி, எழுதி, வாதிட்ட அறிஞர்கள் பட்ட பாடு பெரும்பாடு. அதுவே ஒரு தனித்தொடராக நீளும்.

இப்படியாக மார்க்கத்துக்குள் கருத்து வேறுபாடுகளும் குழப்பங்களும் நிலவின. ஓர் அசாதரண சூழ்நிலை நிலவியது.

இவை அத்தனைக்கும் இடையே, நபித்தோழர்களுக்கு அடுத்த தலைமுறையினரான தாபியீன்கள் தாங்கள் சந்திக்கும் நபித்தோழர்களிடமிருந்து இஸ்லாமிய ஞானத்தைப் பெறுவதிலும் பயில்வதிலும் முனைப்புடன் கண்ணும் கருத்துமாய் இருந்தனர். கவனத்தை திசை திருப்பும் சூழல்கள் நிறைந்த அந்த வேளையிலும் தங்களின் இலட்சியம் என்னவாக இருக்க வேண்டும் என்ற தெளிவு அவர்களிடம் இருந்திருக்கிறது.

திருக்குர்ஆனை முடித்துவிட்டு, நபிமொழிகளையும் பயின்று விட்டு, அதற்குமேல் பெருமுனைப்பு ஏதும் இன்றி இருந்த அபூஹனீஃபாவுக்கு சராசரியைத் தாண்டிய நுட்பமான அறிவுக்கூர்மையை அல்லாஹ் அளித்திருந்தான். அது அவரது இளமையிலேயே சுடர்விட ஆரம்பித்தது. அந்நகரில் தம்மைச் சுற்றிப் பரவியிருந்த பல தரப்பட்ட இஸ்லாமிய நம்பிக்கைகளை, சித்தாந்தங்களைப் பின்பற்றுபவர்களைக் கண்ட அவருக்கு, அதிலுள்ள முரண்கள் தெரிந்தன. அவை இஸ்லாத்திற்கு அப்பாற்பட்டவை, தொடர்பில்லாதவை என்பதை அவருடைய இயற்கையான உள்ளுணர்வு உணர்த்தியது. அவர்களுடன் வாதம் புரியத் தொடங்கினார் இமாம் அபூஹனீஃபா.

அது வளர்ந்து, வளர்ந்து வாதம் புரிவது என்பது அவருக்கு மிகவும் விருப்பமான ஒரு விவகாரமாகவே ஆகிவிட்டது. பஸரா நகருக்குப் பயணம் சென்று, அங்குள்ள பலதரப்பட்ட குழுக்களுடன் வாக்குவாதத்தில் ஈடுபட்டிருக்கிறார். வாத விவாதங்களை மேம்போக்காகவோ, தம் பராக்கிரமத்தை நிலைநாட்டுவதற்காகவோ நிகழ்த்துவது அவரது நோக்கம் அல்ல என்பதால், இஸ்லாத்தின் அடிப்படை நம்பிக்கைகளை ஆழமாகப் பயிலத் தொடங்கினார்.

இவையெல்லாம் ஒருபுறம் இருந்தாலும் குடும்பத் தொழிலை மட்டும் அவர் கைவிட்டுவிடவில்லை. சந்தைக்குச் செல்வது, வணிகம் புரிவது என்று அதனையும் கவனத்துடன் தொடர்ந்தார்.

நபித்தோழர்களுக்கு அடுத்த தலைமுறையினரான தாபியீன்களில் குறிப்பிடத்தக்க மார்க்க அறிஞர் ஆமிர் அஷ்-ஷாபி. அவர் அபூஹனீஃபாவைக் கவனித்துக்கொண்டே இருந்தார். அபூஹனீஃபாவின் அறிவுக் கூர்மையைச் சரியாகக் கணித்து வைத்திருந்தார் அவர். ஒருநாள் ஆமிர் அஷ்-ஷாபி அமர்ந்திருந்த பாதையை அபூஹனீஃபா கடந்து செல்லும்போது, அவரை அழைத்தார் ஆமிர்.

“எங்கே செல்கிறீர்?” என்று கேட்டவரிடம் “சந்தைக்குச் செல்கிறேன்” என்று பதில் அளித்தார் அபூஹனீஃபா.

“நான் சந்தைக்கு அதிகமாகச் செல்வதில்லை. மார்க்க அறிஞர்களிடம் செல்வதே எனது நாட்டமாயிருக்கிறது” என்றார் ஆமிர்.

“நான் எப்பொழுதாவதுதான் அவர்களிடம் செல்வேன்” என்றார் அபூஹனீஃபா.

“விழிப்பான அறிவும் ஊடுருவிச் செல்லும் புத்திக்கூர்மையும் உள்ள ஒருவரை உம்மிடம் நான் காண்கிறேன். மார்க்க ஞானத்தை தேடிப் பயில்வது உமக்குச் சிறப்பானது. மார்க்க அறிஞர்களின் கல்விக் குழுமங்களில் கலந்து கொள்ளுங்கள்” என அறிவுரை கூறினார் ஆமிர்.

அந்த அறிவுரை அபூஹனீஃபாவிடம் சரியான தாக்கத்தை ஏற்படுத்தியது. பிற்காலத்தில் அதைக் குறித்து அபூஹனீஃபா கூறும்போது, “அவர் சொன்னது எனக்குப் பிடித்திருந்தது. சந்தைக்குச் செல்வதை குறைத்துக்கொண்டு இஸ்லாமியக் கல்வி பயில்வதைத் தொடர ஆரம்பித்தேன். அவருடைய அறிவுரையினால் நான் பயனடைவதை அல்லாஹ் எனக்குச் சாத்தியமாக்கினான்.”

அந் நுஃமான் என்றோ அபூஹனீஃபா என்றோ வரலாற்றில் ஏதோ ஒரு மூலையில் ஒதுங்கிவிட இருந்தவரை, பிற்காலத்தில் இமாம் அபூஹனீஃபா என்ற உயர்நிலைக்கு உயர்த்த அந்த அறிவுரை ஒரு முக்கியக் காரணமாய் அமைந்தது வரலாறு.

(தொடரும்)

நூருத்தீன்

சமரசம் பத்திரிகையில் டிசம்பர் 1-15, 2015 இதழில் வெளியானது