கோடைகால கல்வி பயிற்சி முகாம் 13

அன்புடையீர்,

அஸ்ஸலாமு அலைக்கும். கடந்த ஆண்டுகளைப் போன்று, இவ்வாண்டும் மாணவ மாணவியர்க்கான பயனுள்ள கல்விப் பயிற்சிகளை வழங்கும் ஒரு மாத காலப் பயிற்சி முகாம், இன்ஷா அல்லாஹ், எதிர்வரும் 01 – 05 – 2011 முதல் 31 – 05 - 2011 வரை துபை 'அதிரை இஸ்லாமிக் மிஷன்' மற்றும் ஏ. எல். எம். பள்ளி நிர்வாகம் சார்பில் மேற்படிப் பள்ளி வளாகத்தில் நடைபெற இருக்கின்றது. ஆர்வமுள்ள பெற்றோர்கள் தம் ஏழு வயதுக்கு மேற்பட்ட மக்களைப் பயிற்சிகளில் பங்குபெற வைப்பது கொண்டும், மாணவ-மாணவியர் தாமே வந்து இணைந்து பயன்பெறுவது கொண்டும் இந்த விடுமுறை நாட்களைப் பயனுள்ள வழியில் கழித்து இம்மை-மறுமை வெற்றிக்கான முயற்சியில் ஒத்துழைப்புத் தருமாறு கோருகின்றோம்.

பாடங்கள்:

· தீனியாத் பயிற்சிகள்

· இஸ்லாமிய அடிப்படைக் கொள்கை

· கம்ப்யூட்டர் கோர்ஸ்

· Spoken English / Arabic

· Personality Development

· உயர்கல்வி வழிகாட்டுதல்கள்..

மற்றும் பல...

வகுப்புகளின் நேரம்: காலை ஒன்பது மணி முதல் பகல் ஒரு மணிவரை.

தூரப் பகுதிகளிலிருந்து மாணவ-மாணவியரை அழைத்து வருவதற்கும், வகுப்புகள் முடிந்த பின்னர் திருப்பிக் கொண்டுவந்து விடுவதற்கும் வாகன வசதி செய்யப்பட்டுள்ளது. முழுமையாகப் பங்கு பெற்று முடிக்கும் மாணவ-மாணவியர்க்குப் பரிசுகளும் அன்பளிப்புகளும் வழங்கப்படும்.

தொடர்புக்கு: 9566716216 / 9750969302 / 9894989230

அன்புடன் அழைக்கும்,

AIM & ALM

அதிராம்பட்டினம்

தகவல்: அதிரை அஹமது

பகிர்! 47

பூட்டி வச்சப் பொட்டிகளோ

பூதங் காத்தப் பொதையலு

புழுப் புழுத்துப் புகைஞ்சி போகும்

போற எடம் வேற யாகும்

சேர்த்து வச்ச சிந்தனையும்

காத்து வச்ச காசுபணம்
செல்லரிச்சி சிதஞ்சு போகும்
செலவழிச்சா சிறப்புச் சேரும்

கற்ற கல்வி பெற்ற ஞானம்
கற்றுக் கொடுத்தா வளர்ந்திடும்
கஞ்சி சோறு கழனி காடு
கலந்து உண்டா பெருகிடும்

தெளிஞ்சி வந்த நீரானாலும்
தேங்கி நின்னா குட்டையாகும்
மூளைக்குள்ளே முடக்கி வச்சு
தூங்கிநின்னா மதி கெட்டுடும்

பூமிக்குள்ளே பொதைச்சு வச்ச
பொக்கிஷந் தான் விதைகளும்
தரைபிளந்து தலைநிமிர்ந்தால்
தழைக்கும் இந்த உலகமும்

தாவரங்கள் காட்டித் தரும்
தியாகத்தை நாம் கற்கனும்
ஞானத்தோடு தணங்களையும்
ஞாலத்துக்கே வழங்கனும்

கொண்டு வந்ததொன்றுமில்லே

கொண்டுபோக வழியுமில்லே

கட்டிக்கொண்டு கிடந்திடவோ

கடுங் குழிக்குள் எடமுமில்லே

கற்றதெல்லாம் கற்றுக்கொடு
பெற்றதெல்லாம் பிரித்துக்கொடு
முற்றுப்பெறும் வாழ்க்கையிலே
முதல் பகுதி வெற்றி பெறு

அத்தனையும் அறியப்படும்
கணக்கு வழக்கில் பதியப்படும்
கேள்வி கணக்கு நாளினிலே
கெடைக்கும் அந்த சொர்க்கம் பெறு!

-- சபீர்
--Sabeer abuShahruk

10 -ஆம் வகுப்பு முடித்த பிறகு என்ன படிக்கலாம்? 6

10 -ஆம் வகுப்பு முடித்த பிறகு மூன்று வழிகளில் மேற்படிப்பு படிக்கலாம்.  இவ்வகை படிப்புகள் அனைவரும் அறிந்ததுதான் என்றாலும் தொடர்ந்து இவற்றை மீண்டும் தெரிந்துக்கொள்வது அவசியமே.

1.மேல் நிலை பள்ளி (+1,+2) படிப்பு

2. பட்டய படிப்பு (டிப்ளோமா)

3. சான்றிதழ் படிப்பு (ITI)

பத்தாம் வகுப்பு முடித்த பிறகு பெரும்பாலான மாணவர்கள் தேர்ந்தெடுப்பது மேல் நிலை (+1,+2) படிப்புதான். அதை பற்றி முதலில் பார்ப்போம்.

I. மேல் நிலை பள்ளி (+1,+2) படிப்பு:

1. First Group

எனப்படும் கணிதம், வேதியில், இயற்பில், உயிரியல் பிரிவு : பெரும்பாலும் மாணவர்கள் விருப்பும் பிரிவு. இந்த பிரிவில் படிப்பதன் மூலம், பொறியியல் (B.E/B.Tech,B.Arch, Diploma), மருத்துவம் (MBBS, BDS, B.Phar, Nursing etc...), சட்டம், ஆசிரியர் படிப்புகள், ஆராய்சி படிப்புகள் என பெரும்பாலான துறைகளில் மேல் படிப்பு படிக்கலாம். அரசு துறை, தனியார்துறை என பெரும்பாலான துறைகளில் வேலைவாய்ப்புகள் உள்ளது. இந்த பிரிவில் படிப்பது மிக சிறந்தது. எதிர்காலத்தில் அதிக வேலைவாய்ப்பு உள்ள பிரிவு இதுதான், எனவேதான் இந்த பிரிவிற்க்கு அதிக போட்டி இருக்கும், மாணவர்கள் பெரும்பாலும் இந்த பிரிவில் படிக்க முயற்சி செய்யவும். குறிபிட்ட பள்ளிகளில் இந்த குரூப் கிடைக்காவிட்டால், இந்த குரூப் கிடைக்கும் பள்ளியில் சேருங்கள்.

2. கணிதம், வேதியில், இயற்பில், கணினி அறிவியல் பிரிவு : பொறியியல் (B.E/B.Tech,B.Arch, Diploma) சார்ந்த படிப்புகள் படிக்க சிறந்த பிரிவு. (மருத்துவம் சார்ந்த பெரும்பான்மையான படிப்புகள் படிக்க இயலாது). மருத்துவ துறை தவிர்த்து மற்ற பெரும்பாலன துறைகளில் வேலைவாய்ப்புகள் உள்ளது. First Group கிடைக்காத மாணவர்கள் இந்த குரூபையாவது தேர்ந்தெடுக்கவும். அதிக வேலைவாய்ப்பு பெற்றுதரும் குரூப்பில் இதுவும் ஒன்று.

3. வேதியில், இயற்பில், தாவரவியல், விலங்கியல் பிரிவு : மருத்துவம் (MBBS, BDS, B.Phar, Nursing etc...) சார்ந்த படிப்புகள் படிக்க சிறந்த பிரிவு. (பொறியியல் சார்ந்த பெரும்பான்மையான படிப்புகள் படிக்க இயலாது). அதிகமாக மருத்துவம் சார்ந்த துறைகளில் வேலைவாய்ப்புகள் உள்ளது

4. Commerce, Accountancy, பொருளாதாரவியல் பிரிவு : B.Com, CA (Charted accountant ), M.Com படிப்பதர்க்கான பிரிவு, அரசு வேலை, Accountancy துறையில் நல்ல வேலை வாய்ப்புகள் உள்ளது.

5. வரலாறு, பொருளாதாரவியல் : எதிர்காலதில் B.A. M.A படிக்கலாம். அரசு தேர்வுகள் மூலம் வேலைவாய்ப்பு, ஆசிரியர் பணிகள் போன்றவற்றில் வேலைவாய்ப்புகள் உள்ளன

6. Vocational குரூப் : தொழில் நுட்பம் சார்ந்த படிப்புகள் அடங்கிய பிரிவு, பொறியியல் (B.E/B.Tech,B.Arch, Diploma ) சார்ந்த படிப்புகள் படிக்கலாம். தொழில் நுட்ப துறைகளில் வேலைவாய்ப்புகள் உள்ளது.

II. பட்டய படிப்பு (டிப்ளோமா):

இது 3 ஆண்டு படிப்பு. தொழில் நுட்பதுறைகள் , மருத்துவ துறைகள், கடல்சார் துறைகள், ஆசிரியர் படிப்புகள் என பெரும்பாலான துறைகளில் டிப்ளோமா படிப்புகள் உள்ளன. தொழில் நுட்ப டிப்ளோமாவில் Automobile, EEE, ECE, Mechanical, civil etc... போன்ற துறைகள் சிறந்த துறைகள். மேலும் பல சிறந்த பிரிவுகள் உள்ளன. டிப்ளோமா படித்து மேற்கொண்டு பொறியியல் (B.E/B.Tech) படிக்கலாம். பொறியியல் (B.E/B.Tech) படிக்க ஆர்வம் உள்ளவர்கள் டிப்ளோமா படித்து பொறியியல் படிப்பது சிறந்ததல்ல (Not Advisable ). 12 ஆம் வகுப்பு முடித்து பொறியியல் படிக்கவும். டிப்ளோமா மட்டும் படிக்க விரும்புவர்கள் 10 -ஆம் வகுப்பிற்க்கு பிறகு டிப்ளோமா படிக்கலாம். தொழில் நுட்ப துறைகளில் அதிக வேலைவாய்ப்புகள் உள்ளது.

III. சான்றிதழ் படிப்பு (ITI):

இது ஓராண்டு படிப்பு. Fitter welder, machinist , AC mechanic போன்ற துறைகள் சிறந்த துறைகள். இன்னும் மருத்துவம் சார்ந்த, தொழில் நுட்பம் சார்ந்த பல்வேறு படிப்புகள் ITI-ல் உள்ளது. உடனடி வேலைவாய்பிற்க்கு ஏற்ற படிப்பு, ஆனால் அதிக சம்பளம் கிடைக்காது.

10 - ஆம் வகுப்பு முடித்த பிறகு வேலை வாய்ப்பு (கோரிக்கை:- தயவு செய்து மாணவர்களை 10 -ஆம் வகுப்பு மேல் படிக்க வையுங்கள்)

1. சிறு தொழில் நுட்ப பயிற்சிக்கு பிறகு வேலை. (தமிழகத்தில் அரசு, மாணவர்களுக்கு இலவசமாகவும், குறைந்த கட்டணத்திலும் தொழில் பயிற்சி அளித்து வருகின்றது.)

2. இராணுவத்தில் வேலை மற்றும் அரசு வேலை, இரயில்வேயில் வேலை etc...

3.Data Entry வேலைகள்

4. சமுதாய கல்லூரிகள் மூலம் 6 மாத பயிற்சிக்கு பிறகு உடனடி வேலைவாய்ப்பு.

மேல் நிலை பள்ளி (+1,+2) படிப்பு , ITI, டிப்ளோமா படிப்புகள் பற்றி மேலும் அறிந்து கொள்ள sithiqu.mtech@gmail.com  என்ற மின்னஞ்சல் முகவரியில் தொடர்பு கொள்ளவும்

--- S.சித்தீக்.M.Tech

தகவல்: V.A. Syed Abdul Hameed,  www.anet2010.webs.com 

 

 

தகவல் புகைப்படம் உதவி: அதிரை அபூபக்கர்.

பருவமறிந்து பயிரிடலாமே ! - அனுபவம் பேசுகிறது ! 25

மாணவமணிகள் பள்ளி மேல்நிலை இறுதித் (+2) தேர்வில் மதிப்பெண்கள் எப்படியிருக்குமென்றும் அல்லது இவ்வளவு நிச்சயம் பெற்றிடுவோம் என்றும் முடிவுகளால் முடிச்சுப் போட்டுக் கொண்டிருக்கும் இளசுகளே !

நல்ல கல்லூரியில் இடம் கிடைக்குமா? ஒருவேளை கிடைக்கா விட்டால், என் எதிர் காலம்? சந்தேகங்கள் அலையலையாய் அடிக்கத்தான் செய்யும்!. சரி மறுபக்கம், கட்டுக்கோப்புடனிருந்த பள்ளி வாழ்க்கை நிறைவுக்குள் வந்து விட்டது. இனி, ஜாலியான கல்லூரி வாழ்க்கை என்று அடுத்த சில மாதங்களை உற்சாகக் கொண்டாட்டமாகக் கழிக்கத் திட்டமிட்டிருக்கும் பலர்.

கொஞ்சம் கவனமாக என்ன சிரத்தை எடுத்தால்(மட்டுமே) +2 வுக்குப் பிறகான எதிர் நோக்கும் காலத்துக்கு நீங்களே சிவப்புக் கம்பளம் விரித்துக்கொள்ளலாம்.

இதெல்லாத்தையும் விட மனசுக்குப் பிடித்த பாடப் பிரிவில் விருப்பமான ஒரு கல்லூரியில் சேர்ந்தாகி விட்டது. இனி, கல்லூரிக்குச் செல்லும் முதல் நாள். படபடப்பு, ஆர்வம், பயம், பரவசம், "இனி நான் காலேஜ் ஸ்டூடன்ட்டாக்கும்!" என்று முதல் ஆண்டின் சில மாதங்களும் ஓடிடும். அதிலும் சீனியர்களின் ராகிங் வலையில் சிக்கநேர்ந்தால், கல்லூரி வாழ்க்கையின் அவஸ்தை, அத்தியாயமாகப் பதிவாகும் கலக்கமும் உங்களிடம் இருக்கலாம்.

ஊரோடு கல்லூரி என்றிருந்தால் பரவாயில்லை ஒருவேளை விடுதி வாசம், ஆரோக்கியம் இல்லாத உணவுகள், வீட்டைப் பிரிந்து இருக்கும் தனிமை இவைகளையும் சந்திக்க நேரிடும்.

ராகிங் மூலம் நட்பு பாராட்டுவதுதான் பெரும்பாலான சீனியர்களின் நோக்கமாக இருக்கும். ஆனால், தனி மனித சுதந்திரத்தை மீறும் வகையில், உங்களுக்கு விருப்பம் இல்லாதவற்றை செய்யச்சொல்லும் போது தயங்காமல், இதில் எனக்கு விருப்பம் இல்லை என்று மறுத்து விடுவதே நல்லது. அதையும் மீறி கட்டாயப்படுத்தினால், பேராசிரியரிடமோ, கல்லூரி முதல்வரிடமோ புகார் செய்யலாம்.

தமிழ் மீடியத்தில் இருந்து ஆங்கில மீடியத்தில் படிக்க நேரும் மாணவர்களுக்கோ, ஆரம்ப காலங்களில் தவிர்க்க இயலாத சங்கடங்கள் இருக்கலாம். ஆங்கிலம் என்பது தமிழைப் போல ஒரு மொழிதான். அதை மிகச் இயல்பாகக் கற்கலாம். ஆங்கிலம் என்பது அறிவு (knowledge) அல்ல. கூடுதல் தகுதியாக ஒரு மொழிப் புலமை மட்டுமே ! ஆகவே, ஆங்கில அறிவு என்பதற்கு பதிலாக ஆங்கிலப் புலமைதான் சரி. சித்திரமும் கைப் பழக்கம் ஆங்கிலமும் நாப் பழக்கம்!

மாணவர்களுக்கு டிரெஸ்ஸிங் சென்ஸ் காரணமாக தாழ்வு மனப்பான்மை ஏற்படலாம். நவநாகரிக உடைகள் அணியும் மாணவர்களைப் பார்த்து, குற்றவுணர்ச்சியால் குறுகுறுக்கத் தேவை இல்லை. வசதிக்கு ஏற்ப ஆடை அணிவதுதான் அவசியம். நாம் அணியும் உடை எந்த விதத்திலும் நமது கண்ணியத்தைக் குலைப்பதாக இருக்கக் கூடாது.

வசிப்பிடத்தைப் பலருடன் பகிர்ந்துகொள்வது போன்ற பிரச்னைகள் இரண்டொரு வாரங்களில் சரியாகிவிடும். அதனால், பயம் தேவை இல்லை. சிலர் வீட்டில் ஆறு பரோட்டா சாப்பிடுவார்கள். ஆனால், விடுதியில் மூன்று பரோட்டா மேல் சாப்பிட்டால், மற்றவர்கள் என்ன நினைப்பார்களோ என்ற கூச்சத்தில், கால் வயிறும் அரை வயிறுமாகச் சாப்பிடுவார்கள். உணவு விஷயத்தில் மட்டும் எங்கேயும் எப்போதும் கூச்சம் வேண்டாம்.

கல்லூரிப் பருவத்தில் பல சமயம் நீங்களே தன்னிச்சையாக பல முடிவுகள் எடுக்க வேண்டி இருக்கும். இரண்டாம் ஆண்டு விருப்பப் பாடம் துவங்கி, மேற்படிப்பு, வேலைவாய்ப்பு என்று பல விஷயங்களைப்பற்றி தீர்மானிக்க வேண்டியிருக்கும். இது பல சமயங்களில் மன உளைச்சலை உண்டாக்கி, தூக்கம் கெடுத்து, குழப்பத்தில் ஆழ்த்தும். அப்படி முடிவெடுக்க முடியாத சமயங்களில் தனிமை தவிர்த்து, பெற்றோர் அல்லது விவரம் தெரிந்த சீனியர், பேராசிரியர்களின் வழிகாட்டுதலின்படி நடந்துகொள்ளுங்கள். நாளை நீங்களே ஒரு வழிகாட்டி ஆகலாம் !

இவைகள் எல்லாவற்றையும் விட சிறகை விரித்துப் பறக்கும் பறவைகளாகிவிட்டோமே என்றில்லாமல் பெற்றோர் சொல் கேட்பதும் அவர்களின் மனங்களை குளிர வைப்பதும் கற்ற கல்வியின் பலனாகத்தான் இருக்க வேண்டும். ஆசிரியர்களை மதிப்பதும் அவர்களுக்கு உரிய மரியாதையைச் செலுத்துவதும் கற்ற கல்வியினால் கண்ட பலனாக இருக்க வேண்டும்.

சரி, இத்தனை போராட்டங்களும் ஏன் ?

கௌரவமான ஒரு வேலையைக் கைக்கொள்ளும் இலக்கை எட்டுவதற்காகத்தானே ! கல்லூரிப் பருவத்திலேயே தங்களின்வேலை வாய்ப்புத் திறனை அதிகரித்துக் கொள்வதும். கல்லூரியில் விருப்பப் பாடங்களைத் தேர்ந்து எடுப்பதில் உள்ள நிதானமும், உத்வேகமும் வேலை குறித்து முடிவு செய்வதிலும் வேண்டும்!

கல்லூரிப் படிப்பின் இரண்டாம் ஆண்டில் இருந்தே எதிர்காலத்துக்கு ஏற்பத் தன்னை மெருகேற்றிக் கொள்வதில், மாணவர்கள் கவனம் செலுத்த வேண்டும். ஆங்கிலம் மட்டும் தெரிந்தால் உலகத்தையே கட்டி ஆளலாம் என்று இதுவரை கற்பனைக் கோட்டை கட்டி இருந்தால், அதனை பக்கவாட்டில் வைத்துவிடுங்கள் ஊறுகாயாக தொட்டுக் கொள்ளலாம். நேர்முகத் தேர்வுகளில் ஆங்கில புலமையைவிட, டெக்னிக்கல் சம்பந்தமான அறிவையும், இண்டஸ்ட்ரி தொடர்பான விழிப்பு உணர்வையும்தான் சோதிக்கிறார்கள்.

இறுதி ஆண்டில் புராஜெக்ட்களைத் தங்கள் கைப்படச் செய்து முடிப்பது, கேம்பஸ் இன்டர்வியூக்களில் உங்களுக்குக் கூடுதல் மதிப்பை அளிக்கும். விலைக்கு வாங்கும் புராஜெக்ட்கள் உங்களின் இயல்பான திறமையைக்கூட மறைத்து, எதிரான எண்ணத்தை உண்டாக்கும்.

அதிமுக்கியமாக எந்த செமஸ்டரிலும் அரியர் (இடைத் தேர்தலுக்காக காத்திருக்கும் வேட்பளாராக) இல்லாமல் இருப்பது நலம். தகுதியுடைய மாணவர்கள் அதிக அளவில் இருந்தால், பத்து மற்றும் பன்னிரண்டாம் வகுப்பின் மதிப்பெண் சராசரிகளும் கணக்கில்கொள்ளப்படும். தனித் திறமைத் தகுதிகளுக்கும் அங்கீகாரம் உண்டு. தனித் திறமைகொண்டவர்கள் மற்றவர்களிடம் எளிதில் கலந்து பழகுவார்கள் என்ற எண்ணம் உதிப்பதற்கு கவிக் காக்காவின் வரிகளும் தான் ஞாபகத்திற்கு வருகிறது "கனவு மெய்ப்பட வேண்டும்".

இதற்கு மேலும் (வலுவான அனுபவமிக்க) பயி(ல்வான்)ன்றவகள் நிறைந்திருக்கும் சபையிது ஆதாலால் அவர்களின் ஆலோசனைகளும், ஆர்பரிக்கும் அனுபவங்களும் கருத்தாய்வார்கள் இதனைத் தொடர்ந்தே !

மேற்சொன்னவைகள் (அனுபவப்)பட்டதும், (உணர்வுகளைச்)சுட்டதும், (இனிமையாக)நேசித்ததும் அன்றையச் சூழலில் கற்றவைகளையும் கோர்வையாக்கியிருக்கிறேன்.

- அபுஇபுறாஹிம்

ஓட்டு எண்ணும் வரை என்ன எண்ணிக் கொண்டிருப்பார்கள்? 23

ஓட்டுப் பொட்டி பத்திரமா இருக்கிறதாம், ஆதலால் அதுவரைக்கும் சும்மா இந்த கிரிக்கெட் கிரவுண்டு பக்கம் போயிட்டு வருவோமா ?

அட நடுவர் என்ன சொல்கிறார், நம்ம பிரதமர் என்ன சொல்லியிருப்பார் / நினைத்திருப்பார் ?

கொஞ்சம் ஹெல்ப் பன்னுங்களேன் ப்ளீஸ் !!

யோசனையோடு : அபுஇபுறாஹிம்

உலக இஸ்லாம் 15

சில வாரங்களுக்கு முன்பு இந்திய மக்கள் தொகை தொடர்பாக செய்திகள் வெளிவந்தது, இந்நிலையில்  உலக இஸ்லாம் பற்றி மேலோட்டமாக தெரிந்து கொள்வது பொறுத்தமானதாக இருக்கும். கீழே தரப்பட்டுள்ள செய்திகள் இங்கிலாந்து இஸ்லாமிய இதழ் வெளியிட்ட தகவல்கள். இந்திய மக்கள் தொகை கணக்கீட்டிலேயே பல்வேறு குளறுபடிகள் இருக்கும் போது, உலக அளவில் பார்க்கும்போது முன்பின் வித்தியாசங்கள் சில இருக்கத்தான் செய்யும். இருந்தாலும் உத்தேசமாகவாவது தெரிந்துகொள்வது அவசியம் தானே!

உலக முஸ்லிம் மக்கள் தொகை அடுத்த 20 ஆண்டுகளில் 35% உயரப்போகிறது. இதில் முஸ்லிம்கள் வளர்ச்சி 1.5% ஆக இருக்கும். முஸ்லிமல்லாதவர்கள் வளர்ச்சி 0.7 ஆகத்தான் இருக்கும்.

உலக முஸ்லிம்கள் இன்று 23.4%. இது 2030ல் 26.4 ஆக உயரப்போகிறது இந்த என்ணிக்கையில் இது ஆசிய பசிபிக் நாட்டில் 59.2%ஆகவும், மத்தியக்கிழக்கு மற்றும் வடக்கு ஆப்பிரிக்காவை சேர்த்து 20% ஆகவும், மற்ற ஆப்ரிக்க பகுதிகளில் 17.6% ஆகவும், ஐரோப்பாவில் 2.7%ஆகவும், அமெரிக்காவில் 0.5% ஆகவும் இருக்கும்.

உலக முஸ்லிம் மக்கள் தொகையில் இந்தோனேசியாவை விட பாகிஸ்தான் 2030ல் முந்தி உலகிலேயே அதிக முஸ்லிம் மக்களை கொண்ட நாடு என்ற பெருமையை அடையப் போகிறது. முஸ்லிம்கள் உண்மையான முஸ்லிமாக இருக்க அல்லாஹ் உதவி செய்வானாக ஆமீன்.

முஸ்லிம்கள் ஐரோப்பா மற்றும் அமெரிக்காவில் தொடர்ந்து சிறுபான்மையராகவே இருப்பர். ஆனால் மொத்த மக்கள் தொகையில் வளர்ச்சி இருக்கும். இதில் ஐரோப்பா, ரஷ்யாவைவிட அமெரிக்காவே வளர்ச்சியில் முன்னனியில் இருக்கும்.

இப்போது 1 மில்லியன் முஸ்லிம்கள் அல்லது அதற்கு மேல் உள்ள நாடுகள் எண்ணிக்கை 72. இது 2030ல் 79 ஆகப்போகிறது.

அமெரிக்கா

கனடாவில் முஸ்லிம்கள் தற்போது 940,000 உள்ளனர்.இது 2030ல் 3 மடங்காகி 2.7 மில்லியனாக மாறும்.அர்ஜென்டினா அமெரிக்காவிலேயே 3 வது அதிக முஸ்லிம்களை கொண்ட நாடாக மாறும். 15 வயதுக்குட்பட்டவர்கள் தற்போது 13% மட்டுமே. அதிக வயதுடையவர்கள் மட்டுமே அதிகமாக குடியேறியது தான் இதற்கு காரணம். 2030ல் அமெரிக்காவில் பிறந்தவர் எண்ணிக்கை குறிப்பிடத்தகுந்த அளவில் உயரும்.இஸ்லாமிய வளர்ச்சி வீதம் தற்போது 0.8 ஆக இருப்பது 2030ல் 1.7 ஆக மாறும். தற்போது 64.5% முஸ்லிம்கள் வெளிநாட்டில் பிறந்தவராக இருக்கும் அமெரிக்காவில் 2030ல் 45% உள் நாட்டில் பிறந்தவராக இருப்பர்.

பசிபிக்-ஆசியா

30% முஸ்லிம்கள் ஆசிய பசிபிக் நாடுகளில் 2030ல் இருப்பர். சீனாவில் முஸ்லிம் மக்கள் தொகை 2% ஆகி 2030ல் உலகின் 19 வது வரிசையில் இருக்கும்.

மத்திய கிழக்கு-வடக்கு ஆப்ரிக்கா

இந்த மண்டலத்தில் 20 நாடுகள் முஸ்லிம் எண்ணிக்கையில் அதிகம் கொண்டதாக இருக்கும். 17.7% முஸ்லிம்களை உடைய இஸ்ரேலில் 2030ல் 23.2% ஆக உயரும். எகிப்து அல்ஜீரியா மொரோக்கோ போன்றவை அதிக எண்ணிக்கை கொண்ட நாடுகளாகும். இந்த மண்டலத்தில் 2 வது பெரிய நாடாக ஈராக் உருவெடுக்கும்.

ஐரோப்பா

இந்த மண்டலத்தில் 2030ல் 10% முஸ்லிம்களை கொண்ட நாடாக பிரான்ஸ், பெல்ஜியம், ரஷ்யா, கொசவா, அல்பேனியா, போஸ்னியா பல்கேரியா ரஷ்யா, ஜார்ஜியா ஆகியவை இருக்கும். ரஷ்ய முஸ்லிம்களின் வளர்ச்சி 0.6%, அதே சமயம் முஸ்லிமல்லாதவர்கள் 0.6% குறைந்து வருகிறார்கள்.பிரான்ஸில் குடியேறிய முஸ்லிம்கள் 68%, இங்கிலாந்தில் குடியேறியவர்கள் 28% மற்ற ஆப்ரிக்க நாடுகளில் 60% வளர்ச்சி இருக்கும்.நைஜீரியாவில் 51.5% முஸ்லிம்கள் இருப்பார்கள்.முஸ்லிம்களின் பிறப்புக் கட்டுப்பாடு 48% ஆக உள்ளது. முஸ்லிமல்லாதவர்கள் கட்டுப்பாடு 63% ஆக உள்ளது.

-- M. H. ஜஹபர் சாதிக்

சிந்திப்போம் - புகை பிடித்தல் ! 18

அஸ்ஸலாமு அலைக்கும் வரஹ்...

அவசரமான உலகம்! தனிமையில் இனிமை தேடும் தலைமுறை! அறிவுரைகளை அதிகம் விரும்பாத இளைஞர்கள்! என்று உலகம் எங்கோ போய்க்கொன்டிருக்க "திரும்பிப் பார்க்கிறேன்" என்று நம் கடந்த கால களியாட்டங்களை, இன்று வாழும் குழந்தைகளுக்குக் கிடைக்காத இயற்கையின் இன்பங்களை, சுதந்திரமாய்ச் சுற்றித் திறிந்து பெற்ற மகிழ்ச்சியை நினைவு கூறும் இவ்வேலையில் இவை அனைத்தையும் இத் தலைமுறையினருக்குக் கேள்விக் குறியாக்கிய நம் செயல்களைச் சற்று சீர்தூக்கிப் பார்த்து நாம் செம்மை படுத்திக்கொள்ளாவிட்டால், நம் இளமைப் பருவத்தை நோக்கி திரும்பிப் பார்க்க வைத்த அந்த இயற்கையின் சுவடு கூட இல்லாமல் போய்விடும் அபாயம் உள்ளதை உணர்ந்துகொள்ள வேண்டும்.

ஒவ்வொரு மனிதனும் இவ்வுலகில் தன்னுடைய சந்ததிகளை பெற்றெடுப்பதில் அதிகம் ஆர்வம் காட்டுகிறான். அவர்களின் மூலம் தாய் என்றும் தந்தை என்றும் தன்னுடைய நிலை உயர்வதை எண்ணிப் பெருமிதம் கொள்கிறான். இவ்வுலகின் அனைத்தைவிடவும் ஏன் தன்னைவிடவும் அதிகமாக அவர்களை அவன் நேசிக்கின்றான். அவர்களுக்கு காலில் முள் குத்தினால் தன் இதயத்தில் குத்தியதாய் இன்னல்படுகிறான். தான் உண்ணாமல் உடுத்தாமல் ஒறுத்தாவது அவர்களுக்கு உண்ணவும் உடுத்தவும் கொடுக்கிறான். இரவு பகல் பாராமல் உழைத்து கஞ்சன் என்ற பட்டத்தை மாத்திரம் தனதாக்கி மீதமுள்ள அனைத்தையும் தன் பிள்ளைகளுக்காக சேமித்தும் வைக்கிறான்.

இப்படி தன் பிள்ளைகளின் நலனையே சுவாசிக்கும் அவன் சிந்திக்கத் தவறியதன் காரனமாக எந்த பூமியில் தான் வாழ்கின்றானோ, எந்த பூமியில் தன் சந்ததிகளை விட்டுச் செல்ல இருக்கின்றானோ, எந்த பூமியை தவிர்த்து வேறு ஒரு வாழுமிடத்தை இந்த மனித இணத்தால் ஏற்படுத்திக்கொள்ள இயலாதோ அந்த பூமியை வாழத் தகுதியற்றதாக மாற்றிக் கொண்டிருப்பதை அறியாதவனாக இருக்கின்றான்!

இவ்வாறு இவ்வுலகை அழிவின் பக்கம் அழைத்துச் செல்வதில் வீண் விரயத்திற்கு முக்கியப் பங்குண்டு. பேராசிரியர். N A S அவர்கள் மேற்கோல் காட்டியதைப் போல தேவை இவ்வுலகை அழிவின் பக்கம் இழுத்துச் செல்லவில்லை மாறாக பேராசை தான் இவ்வுலை அழிவின் பக்கம் இழுத்துச் செல்வதில் முக்கியப் பங்கு வகிக்கிறது. வீன் விரயம் சம்பந்தமான நமது அனுகுமுறை வேறுபடுவதும் வீன் விரயத்திற்கு ஒரு முக்கிய காரனமாக அமைகிறது. வீன் விரயம் சம்பந்தமாக ஒரு தனிப் பதிவை இறைவன் நாடினால் விரைவில் பதிகிறேன் (சகோதரர் அலாவுதீன் அவர்கள் எழுதினால் இன்னும் சிறப்பாக இருக்கும் என்று கருதுகிறேன்)

தவிர, இவ்வுலகை மட்டுமல்லாது ஒவ்வொரு தனி மனிதனுக்கும் புற்று நோய், காச நோய், ஆண்மைக் குறைவு, குடல் புண், வாய் துர்நாற்றம் போன்ற ஏராளமான நோய்களை ஏற்படுத்தி அழிவின் பக்கம் கொண்டுச் செல்வதில் புகைப் பிடித்தல் முக்கியப் பங்கு வகிக்கிறது. முஸ்லிம்களிடத்திலேயும் இத்தீய பழக்கம் பரவலாகக் காணப்படுவதால் அதைப் பற்றிய எனது கண்ணோட்டத்தை இங்கே பதிகிறேன்.

இவ்வுலகில் காணப்படுகிற எந்த ஒரு தீமையை எடுத்துக் கொன்டாலும் அது முஸ்லிம்களிடத்திலே மிக மிகக் குறைவான அளவே இருப்பதை யாரும் மறுக்க முடியாது. அவ்வாறு மிகக் குறைவான குற்றப் பின்னனி கொன்ட முஸ்லிம்களிடத்தில் புகைப் பிடித்தல் பரவலாகக் காணப்படுவதற்கும், மேலும் எந்த உறுத்தலும் இல்லாமல் பொது இடங்களிலும் புகை பிடித்துத் திரிவதற்கும் முஸ்லிம்கள் இதை ஒரு தீமையாக உணராததே காரனம்.

எந்த ஒன்றையும் நாம் ஐயமற, தெளிவாக விளங்கிக்கொள்ள வேண்டுமென்றால் அதை நாம் சிந்தித்து உணர வேண்டும். அந்த அடிப்படையில் இத்தீய பழக்கமாகிய புகைப் பிடித்தலையும் நாம் சிந்தித்துப் பார்த்தோமானால் அதை விட்டும் தவிர்ந்து வாழக்கூடிய வாய்ப்பு ஏற்படும். அல்லாஹ் அருள் புரிவானாக!.

பொதுவாக மக்களிடத்தில் காணப்படுகிற குடி, சூதாட்டம், விபச்சாரம், என்று எதை எடுத்துக்கொன்டாலும் அது அத்தீமையில் யாரெல்லாம் நேரடியாக ஈடுபடுகிறார்களோ அவர்களையே பாதிப்பதைப் பார்க்கின்றோம். உதாரனத்திற்கு மது அருந்துவதினால் ஏற்படுகிற உடல் நலக் குறைபாடுகள் அதை அருந்துபவருக்கு மட்டுமே ஏற்படுகிறது. ஆனால் புகை பிடிப்பதனால் ஏற்படுகிற உடல் நலக் கோளாறுகள் புகை பிடிப்பவருக்கு மட்டுமல்லாது அப்புகையை சுவாசிக்க நேரிடுகிற மற்றவரையும் பாதிக்கிறது என்பதை எவரும் மறுக்க முடியாது. பொது இடங்களில் புகை பிடிப்பதனால் பெண்கள், குழந்தைகள், புகைப் பழக்கமில்லாத ஆண்கள் என பொதுமக்கள் படும் இன்னல்களை வார்த்தையால் வடிக்க முடியாது. அதுவும் வீடு, அலுவலகம், உணவகம், வாகனம் போன்ற நாலா புறமும் அடைக்கப்பட்ட இடமாக இருந்தால் பாதிப்பின் அளவு மிகவும் அதிகமாகவே இருக்கும்.

எந்த வித நன்மையும் இல்லாமல் அதே சமயம் அதிகமான அளவு தனக்கும், மற்றவருக்கும் பாதிப்பை ஏற்படுத்துவதில் முக்கியப் பங்கு வகிப்பது புகைப் பழக்கமாகும். 50 காசுக்கும், ஒரு ரூபாய்க்கும் புகையிலைப் பொருள்கள் கிடைப்பதாலோ என்னவோ ஏழைகளிடத்திலும் இப்பழக்கம் தாராளமாக இருப்பதைக் காண முடிகிறது.

புகைவண்டிகளெல்லாம் புகையில்லாமல் செல்லும்போது இம்மனிதன் மட்டும் புகையோடு செல்லவது ஏனோ? புகை உனக்குப் பகை என்றும், புகைப் பழக்கம் உடல் நலத்திற்கு கேடு தரும் என்றும் எச்சரிக்கை செய்து புகைப் பிடிப்பவர்களைப் பாதுகாக்க(?) எடுத்த சிறு முயற்சியைக் கூட அப்பாவி பொதுமக்களை பாதுகாக்க அரசாங்கம் எடுக்கவில்லை என்பதை நினைக்கும் போது வியப்பாகவே இருக்கிறது.

புகை பிடிப்பவர்கள் தாங்களுக்கு மட்டும் தீங்கு இழைத்துக் கொள்ளவில்லை. மாறாக அவர்கள் அதிகமாய் நேசிக்கும் அவர்களுடைய குழந்தைகள், மனைவி, பெற்றோர்கள், குடும்பத்தார், அவர்கள் வாழுகிற சமூகம், மற்றும் சுற்றுச் சூழலை மாசுபடுத்துவதன் மூலம் மனித இணத்திற்கு மட்டுமல்லாது இவ்வுலகிற்கும் அதில் இருக்கிற அனைத்திற்கும் தீங்கு விளைவிக்கிறார்கள் என்பதை உணர்ந்தாவது இத் தீமையிலிருந்து அவர்கள் விலகி வாழ வேண்டும்.

பணம் சம்பாதிப்பதற்காக புகையிலைப் பொருட்களை உற்பத்தி செய்பவர்கள், அவர்களிடத்தில் லஞ்சம் வாங்கிக்கொன்டு அதற்கான அனுமதி வழங்குகிற ஆட்சியாளர்கள், அதற்கு உடந்தையாய் இருக்கிற அதிகாரிகள், மேலும் அதை விற்பனை செய்கிற வியாபாரிகள் ஆகியோரின் செயலை தன்னுடைய மனைவி, தான் பெற்ற பிள்ளைகள், தனது பெற்றோர்கள், தான் ஈட்டிய செல்வம் ஆகிய அனைத்தையும் வீட்டினுல் வைத்து தானும் உள்ளே இருந்துகொன்டு வீட்டை தீயிட்டு எரிப்பவனில் செயலுக்கு ஒப்பாகவே கருத முடிகிறது.

மேலும் புகை பிடிப்பது ஹராம் (பாவம்/விலக்கப்பட்டது) என்று ஏராலமான உலமாக்கள் மார்க்கத் தீர்ப்பு வளங்கியுள்ளனர். ஹராம் என்ற நிலையில் இருக்கின்ற ஒன்றை வாங்குவதும், விற்பதும், அதற்காக கடைகளை வாடகைக்குக் கொடுப்பதும், அது தொடர்பான எந்த ஒரு செயலில் ஈடுபடுவதும் ஹராம்.

பல இலட்சங்களை முதலீடு செய்து நடத்துகிற வியாபாரத்தில் சில ஆயிரங்களுக்காக விற்கப்படுகிற புகையிலைப் பொருட்களால் இலாபத்தில் பெரிய மாற்றம் ஒன்றும் வந்துவிடப் போவதில்லை என்பதையும், ஹலாலான வியாபரத்தோடு புகையிலைப் பொருட்களையும் சேர்த்து விறபதனால் அதில் ஹராம் கலக்கின்ற ஆபத்து இருப்பதையும் வியாபரிகள் உணர வேண்டும்.

பொதுவாக சில நிலைகளிலே இருப்பவருடைய பிராத்தனைக்கும் அல்லாஹ்வுக்கும் இடையில் எந்தத் திரையும் இல்லை, அவர்கள் பிராத்தித்தால் அல்லாஹ் அதை உடனே அங்கீகரிக்கிறான் என்பது இஸ்லாத்தின் நிலைபாடு. அதில் பிரயானியும் ஒருவர். ஒருமுறை மக்காவை நோக்கிப் புனிதப் பயனம் மேற்கொன்டிருந்த ஒருவரின் பிராத்தனையை அல்லாஹ் நிராகரித்துவிட்டான்! காரனம் "ஒருவருடைய உணவு, உடை, வீடு ஆகிய ஏதேனும் ஒன்று ஹராமாக இருந்தாலும் அவருடைய பிராத்தனையை அல்லாஹ் ஏற்க மாட்டான்" என்று அல்லாஹ்-வின் தூதர் தனது தோழர்களுக்கு எச்சரிக்கை செய்ததை ஹதீஸ்களிலே கானமுடிகிறது.

எனவே புகை பிடிப்பது தீமை என்பதையும், அத் தீமையில் ஏதேனும் ஒரு வகையில் சம்மந்தப்பட்டவரையும் நாளை மறுமையில் அல்லாஹ் அத் தீமையில் சம்மந்தப்பட்டதற்காகவும் அதன் மூலம் பிறருக்கு தீங்கிழைத்ததற்காகவும் விசாரிப்பான் என்பதை அஞ்சி இத் தீமையிலிருந்து விலகி வாழ எல்லாம் வல்ல ஏக இறைவன் நம் அனைவருக்கும் அருள்புரிவானாக! மேலும் அனைத்தின் தீங்குகளிலிருந்தும் நம் அனைவரையும் பாதுகாப்பானாக!

அல்லாஹ் மிக்க அறிந்தவன்

ம'அஸ்ஸலாம்

அபு ஈஸா

அண்ணாவுக்கு கடுதாசி ! 27

முக்கிய குறிப்பு : அடுத்தவர் கடுதாசியை வாசிப்பது தவறு என்று தெரிந்த நமக்கு கடிதம் எழுதுவதற்கே காலையில் ஒன்றும் மாலையில் ஒன்றும் தினசரி நடத்தி அங்கே அச்சிட்டு போட்டுக் காட்டியதால் இந்தக் கடுதாசியையும் வாசிக்கும் படியாகிவிட்டது.

அண்ணா!

நீங்கள் எழுதிய மடல் என்னை மகிழ்சி கடலில் அப்படியே தூக்கிப் போட்டது, ஆனாலும் தமிழ் வாழ நான் கட்டு மரம்போல் மிதந்து எதையும் தாங்கும் இதயமாக இருக்கிறேன். உடலில் ஓடும் குருதியை கண்ணால் கான முடியாது, ஆனாலும் அந்த குருதி ஓடாவிடின் நாம் வாழ முடியாது என்பது உறுதி. அதுபோலவே என் உடலில் ஓடும் உணர்வில் உங்கள் எண்ண ஓட்டங்களை அறிந்து கொள்ளும் ஆற்றலை பெற்றுள்ளவன் தான் உங்கள் தம்பி.

என் உள்ளத்தில் வீற்றிருக்கும் அண்ணாவே! உங்கள் சிந்தனைதான் என் சிந்தனையும். நம் உறவு ஊருக்கு (எல்)நகையாக இருக்கலாம். அவர்தம் சந்தேதக்கண் கொண்டு பார்க்கலாம், ஆனால் இந்த தம்பியை நன்கு அறிந்தவராயீற்ரே.

என் அண்ணாவே ! நீங்கள் கூப்பிட்ட குரலுக்கு ஓடிவரத்தான் இந்த தம்பி இருக்கிறேன். தண்டவாளத்தில் தலை வைக்க வா என்றாலும், தலைமை ஏற்கவா என்றாலும் இரண்டையும் ஒன்றாக செய்பவனே என் தம்பி என நீங்கள் என்னைப்பற்றி குறிப்பிட்டதும் பார்கடலில் அமுதெடுத்து குடித்தவன் போல் உணர்ந்தேன். (இந்த மடலை தயவு செய்து அஞ்சல் செய்து அல்லது தவறவிட்டு விடாதிர்கள் அப்புறம் என் பகுத்தறிவு வேசம் கலைந்துவிடும்).

அண்ணா ! எப்படி நான் உங்களுக்கு நன்றி சொல்வேன்? நினைக்கும் போது என் கண்ணின் ஒரம் ஈரம் எட்டிப்பார்கிறது. இந்தி (எதிர்ப்பு)நெருப்பின் தகிப்பில் தமிழ் கடலே காய்ஞ்சி(காய்ந்து) போய்யிருந்த வேளையில் காஞ்சியில் முளைத்த குறிஞ்சி நீங்கள் ஆம் தமிழை உறிஞ்சி குடித்த ஹிந்தி ஓனாய்களை முரம் கொண்டு, திரம் கொண்டு, வீரம் வென்றதே அண்ணா !

அன்று தமிழச்சி புலிப்பால் புகட்டினால் இன்றோ அய்யகோ, நம் திராவிட இனத்தை குழிதோன்டிய புதைக்க ஆர்ய(மேதை) அம்மையார் புறப்பட்டு நம்மை தேர்தலில் மக்கள் வீழ்தினால் ஆடும், மாடும் கொடுப்பேன் என்று அறிவித்துள்ளதால் இனி புலிப்பாலுக்கு பதில் ஆட்டுப் பால், மாட்டுப் பால் தான் இதனால் நம் தமிழர் வீரம் மட்டுப் படுமே !!!

நானும் (எம்)மக்களின் வரிபணத்தில் பல இலவசங்கள் அறிவித்துள்ளேன். மேலும் தமிழ் நாட்டை பெரும் தொழில் அதிபர்களுக்கும் விற்றுள்ளேன். என் சந்ததினரை (கடற்)கரை(கள்) சேர்த்த கறைபடியாத "கை"க்கு சொந்தகாரனாகி உள்ளேன். சோனியாவும், கனிமொழியும் சேர்ந்து மெரினாவில் இட்லி, தோசை காலை உணவுவிடுதி திறக்க உள்ளார்கள் அதற்கு நன்றி மறவாமல் தமிழ் பெயரேயே சூட்ட உள்ளேன். என்றும் உங்கள் வழி நடப்பவனாக இறுதி மூச்சுவரை இருப்பேன் என்பதை நான் சொல்லி நீங்கள் தெரிய வேண்டியதில்லை. (தில்லை) அண்ணா !

(இது வரை தமிழீனத் தலைவன் நான்(தான்) கலைஞர் என்று சொல்லி தமிழையே ஏமாற்றியவரின் கடிதத்தை பிரித்து படிச்சுட்டேன்).

******************************************************************************

இனி வருவோம் விஷயத்திற்கு அன்றொரு நாள் தம்பிக்கு கடுதாசி எழுதிய எங்கள் அண்ணா(வே) உங்களுக்கு பதில் கடுதாசி எழுதாமல் கலிபோர்னியா கடற்கரையோரம் என்னால் நிம்மதியாக உறங்க முடியவில்லை ஆதலால் இதோ என் பங்கிற்கு எழுதி அனுப்பியிருக்கிறேன் அப்படியே எம் மக்களுக்கும் வாசிச்சு காட்டிடுங்க ! வேண்டாம் வேண்டாம் அவர்களிடமே கொடுத்திடுங்கள் வாசித்துக் கொள்ளட்டும்.

அஸ்ஸலாமு அலைக்கும்.

இது கிரவுனாகிய நான் (நெய்னா தம்பிக்) காக்காவுக்காக எழுதிய மறு(ப்பில்லாத)மடல்.

எல்லாம் தெரிந்து தானா அண்ணா நீஙகள் துபாயில் போய் தங்கிவிட்டீர்கள்? அதனால் நானும் கலிபோர்னிய கடல் பக்கம் ஒதுங்கி, விழிபிதுங்கி தவிக்கிறேன். நாம் சென்ன்னையில் நம் தமிழ் அன்னை ம(ண்ண)டியில் வாழ்ந்த காலம் பொற்காலம். இப்பொழுது (சரியான) boreகோலம்.

அந்த சென்னை மாநகரில் நாம் மக்களோடு மக்களாக கலந்திருந்த நாட்கள் நினைவில் இன்னும் அப்படியே நிழலாடுகிறதே !

அண்ணா ! அங்கேயும் அப்படித்தானோ ? இல்லை இல்லை இருக்காது உங்களுக்கோ ! தினம் தினம் தமிழ் (கவிக்)குடிமகனார் சபிர் அவர்களின் கவிதைகள் கேட்டுக் கொண்டிருக்கும். சகோதரர் மொழி ஆர்வலர் யாசரின் முத்தான வார்தைகள் கேட்டு பொழுதுகள் எழுவதும் மறைவதும் தெரியாமல் எளிதாக இருக்கும். உங்கள் உடன் பிறப்பு தாஜுதீனின் இனிய கவனிப்பில் காலம் களிப்புடன் செல்லும் என நம்புகிறேன்.

மலேசிய நாட்டில் குடியேரிய நம் அரசவை வைத்தியர் நகைச்சுவையின் சக்கரவர்த்தி சகோ ஜாஹிரின் ஆலோசனையும் நகைச்சுவையும் முன்ட கூவியில்(அலைபேசி) கேட்டு மகிழ்ந்து வருவீர்கள்.

மேலும் நம்மையெல்லாம் பாசத்தில் கட்டிபோடும் நம் விகடகவி சகோதரர் Sஹமீத் அடிக்கடி தொடர்பில் இருப்பதால் சகல பாக்கியமும் (வெட்கிரைண்டர்) கிட்டியவனாக இருப்பீர்கள், அனால் தாங்கள் பூலோகத்தில் தொலைவில் இருப்பதால் புலம்பிதவிக்கிறேன். இந்த தம்பியின் ஆதாங்கம் புரியும் என்று நம்புகிறேன்.

இதற்கு மேல் தொடர முடியாமல் கையில் நகசுத்தி அவதியினால் இந்த அறுவை (அருசுவையின் சுருக்கம் என கொள்க).

கடிதத்தை முடிக்கிறேன்.

பதில் கடிதங்கள் போட வேண்டாம் புறாக்கள் எல்லாம் ஆளுக்கொரு ஐஃபோன் வைத்துக் கொண்டு இறக்கை கட்டிப் பறந்திடுவதால்...

என்றுமே உங்களின் யாவரின் நேசம் வந்து வருடட்டும் !

- CROWN

அதிரைநிருபர் – அமைதியின் ஆளுமையா? 25

அல்லாஹ்வின் திருப்பெயரால்…

அன்பான அதிரைநிருபர் நேசங்களே, உங்கள் அனைவருக்கும் ஏக இறைவனின் சாந்தியும் சமாதானமும் உண்டாவதாக.

படைத்தவனின் பேருதவியால் நம் அதிரைநிருபர் இன்னும் இரண்டு மாதத்தில் ஒரு வருடத்தை நிறைவு செய்யவிருக்கிறது. இச்சூழலில் அதிரைநிருபரில் அன்றாடம் சந்தித்த, சாதித்த மற்றும் சகித்தவைகளை என்று உங்கள் அனைவருடன் ஞாபகப்படுத்தி பகிர்ந்துக்கொள்வதில் பெருமையடைகிறோம்.

அதிரைநிருபர் ஆரம்பித்த நாள் முதல் இன்று வரை கல்வி விழிப்புணர்வு, சுகாதார விழிப்புணர்வு, இஸ்லாமிய விழிப்புணர்வு, சகோதரத்துவம் மற்றும் சமுதாய சகோதரகளிடையே ஒற்றுமையை வழியுறுத்தும் செய்திகள், கவிதைகள், கட்டுரைகள், பழைய முத்திரை பதித்த அதிரைப்பட்டின நிகழ்வுகளை நம் கண்முன்னே கொண்டுவரும் பதிவுகள், சகபதிவாளர்களை ஊக்கப்படுத்தும் கருத்துப் பின்னூட்டங்கள் என்று அதன் கவனத்தில் சிறிதளவும் சிதறாமல் தன் நிலையில் மிகத் தெளிவாக இணைய வலையுலகில் அதிரையை சார்ந்த வாசகர்களை மட்டுமல்லாது மற்ற ஊர் சகோதரர்களையும் தன்னோடு வசப்படுத்திக் கொண்டுள்ளது என்பது பெருமைப்பட வேண்டியது என்று சொன்னால் அது மிகையில்லை.

ஒத்தக்கருத்துடன் ஒத்துழைத்து நமக்கு ஊக்கமும் ஆதரவும் தந்து சகோதரத்துவத்துவத்தை வலுபடுத்தி நாளுக்கு நாள் பழைய நட்புகளை புதுப்பித்து மற்றும் புதிய நட்புகளை உருவாக்கி நல்ல செய்கைகளை பரிமாறிக்கொள்வதால் ஒரு ஒற்றுமையான சமூக சகோதர கட்டமைப்பை உருவாக்க முடியும் என்பதை அதிரைநிருபர் நேசவட்டம் உருவாக்கியுள்ளது என்று சொன்னால் யாரும் மறுக்கமாட்டீர்கள் என்று நம்புகிறோம். இது மென்மேலும் தொடரவேண்டும், ஒற்றுமையை அதிகம் வழியுறுத்தும் நகரீகமான நம் நேசவட்டம் தொடர்ந்து வளரவேண்டும்.

அதிரைநிருபர் என்று வைத்துக்கொண்டு அதிரை சார்புடையச் செய்திகள் ஒன்றும் மிளிர்வதில்லையே என்ற குழப்பமான சிந்தைனையோட்டம் சிலரிடமும் இருப்பதையும் எங்களால் உணர முடிகிறது. அதிரைநிருபர் வலைத்தளம் குழுவாக இருந்து நிர்வகிப்பவர்கள், ஆலோசகர்கள் யாவரும் ஊரிலும் மற்றும் வெளிநாடுகளில் வசிப்பவர்கள். ஊர் தகவல்கள் அன்றாட நிகழ்வாக உடனுக்குடன் தருவதற்கான முயற்சிகள் முழு அளவில் செய்யப்பட்டாலும், அதற்கான ஒத்துழைப்பும் ஆர்வமும் ஏனோ அதிரையில் உள்ள சகோதரர்களிடமும் கிடைக்கவில்லை. மேலும் ஒன்றினைந்து மேலும் வலுவாக செயல்படலாமே என்ற வேண்டுகோளும் வெறும் அறிக்கையாகவே உள்ளது என்பது நாம் அனைவரும் அறிந்ததே. இன்ஷா அல்லாஹ் விரைவில் அதிரைநிருபர் தனது இரண்டாம் ஆண்டு தொடக்கம் (ஜூன் 2011) முதல் எல்லா அதிரையின் ஏனைய பகுதிகளுக்கும் முக்கியத்துவம் கொடுத்து அன்றாட அதிரை நிகழ்வுகளை செய்திகளாக வெளிவரும் வகையில் ஏற்பாடு செய்துவருகிறோம். எம்மோடு கைகோர்த்திடும் அதிரை சகோதரர்களின் ஒத்துழைப்புடன் வழக்கம் போல் வெற்றிநடை போடும் நிதர்சன உணர்வுபூர்வமான பதிவுகளுடன் சேர்த்து விரைவில் அதிக அதிரை செய்திகளை அதிரைநிருபரில் காணலாம்.

நாம் ஏற்கனவே பிரகடனம் செய்ததுபோல் நம் அதிரைநிருபர் வலைப்பூ எந்த ஒரு அதிரைசார்புடைய வலைப்பூவுக்கும் போட்டியாக மலர்ந்தது அல்ல, நாம் இதுநாள் வரை யாருடனும் போட்டி போடவில்லை என்பதை பல முறை அறிவித்துவிட்டாலும் மீண்டும் அதை வழியுறுத்தி சொல்லுகிறோம். மேலும் விழிப்புணர்வுகள் மற்றும் சர்ச்சைகளற்ற பதிவுகளை நம்மவர்களிடையே பகிர்ந்து எல்லோரிடமும் வரவேற்பை பெற்றுள்ள அதிரைநிருபர் வலைப்பூ மற்ற அதிரை வலைப்பூக்களுக்கு முன்மாதிரியாக செயலாற்றி வருகிறது என்பதற்கு அதிரை வலைப்பூகளின் தற்போதைய செயல்பாடுகளே சாட்சி. இதற்காக அதிரைநிருபர் மட்டும்தான் முதலில் இருப்பதாக நாமே சொல்லிக்கொள்ள விரும்பவில்லை. அதிரைநிருபர் இதுவரை இரண்டு இலட்சம் செல்ல குட்டுக்களே வாங்கியிருந்தாலும், உங்கள் யாவரின் தகவலுக்காக நம் அதிரைநிருபர் உலக இணையத் தளங்களின் தரவரிசையில் மற்ற பிரபலமான தமிழ் வலைப்பூக்களை காட்டிலும் முன்னனியில் உள்ளது என்பதற்கு ALEXA உலக இணையதள தரவரிசைப் பட்டியலே சாட்சி. தற்போது (15.04.2011) ALEXA RANKINGல் அதிரைநிருபர் 225,637 இடத்தில் உள்ளது. மற்ற வலைப்பூக்கள் எந்த இடங்களில் உள்ளது என்பதை இந்த சுட்டியில் http://www.alexa.com/siteinfo  சென்று அந்த வலைப்பூ முகவரிகளை தட்டிப்பார்த்தால் அவைகளின் உலக தரவரிசைகளின் எண்ணிக்கை தெரியும்.

முக்கியமான ஒரு தகவல், சுய அறிமுகமில்லாமல் அனாமத்தாக அனைவருக்கும் எரிச்சலூட்டி வரும் பின்னூட்டங்களுக்கு நாம் முக்கியத்துவம் கொடுப்பதில்லை, ஒரிரு முகவரிகளை வைத்துக்கொண்டு பல பெயரில் ஒரு சில சகோதரர்கள் நம்மேல் ஏற்பட்ட பாசத்தாலும் இன்னும் மெருகு ஊட்டவும், நமக்கு சில நேரங்களில் அவர்களின் பொன்னான நேரங்களை வீணடித்தும் நம்முடைய நேரத்தையும் வீணடித்து விடுகிறார்கள். நாம் அவர்களுக்கு எந்த வகையில் இடையூறாக இருக்கிறோம் என்று தெரியவில்லை. அனாமத்து பின்னூட்டக்காரார்கள் தொடர்பாக விரிவான விபரங்களுடன் இணையக் குற்றங்கள் Cyvber Crime என்று ஓர் ஆய்வுப் பதிவு தயாராகிக் கொண்டிருக்கிறது. இதன் மூலம் அனாமத்துக்களாக வலம் வரும் விபரமான(?) சுய அறிமுகமில்லாத பலமுக (வரிகள்)வாளிகள் பற்றி தெரிந்து கொள்ளலாம்.

இது போன்று மின்னலடித்து சன்னலைச் சாத்துபவர்கர்களின் இருப்பிடக் கதவை எப்படித் தட்டுவது என்றும் நமக்கு நன்றாகவே தெரியும். அதிரைநிருபர் பக்கம் வந்து செல்லும் நேசங்களின் வழித்தடங்கள் எவைகள் என்று அதிரைநிருபர் குழுவுக்கு நன்றாகவே தெரியும். அனாமத்தாக பின்னூட்டமிடும் சகோதரர்கள் நம் அதிரைநிருபர் குழுவின் செயல்பாடுகள் பற்றி அறியாதவர்கள் அல்லது அறிந்திட மறுக்கும் மனம் கொண்டவர்கள் என்ற காரணத்தால் அவர்களின் அறியாத தவறுகளை நாம் பெரிதுபடுத்தி நம் யாவரின் நேரத்தை வீணடித்துக் கொள்வதற்கு நாம் தயாராக இல்லை என்பதை மட்டும் நேசத்துடன் தெரிவித்துக்கொள்கிறோம்.

கடந்த ஒரு மாதகாலமாக தமிழக சட்டமன்ற தேர்தலில் கவனம் திரும்பியதால் அரசியல் தொடர்பான பதிவுகள், விமர்சனங்கள், விவாதங்கள் வெளிவந்தது, இது நல்ல வரவேற்பபை பெற்றாலும் நம்மிடையே நலமே நாடும் சில சகோதரர்களுக்கு இதில் உடன்பாடு இல்லை என்பதையும் எங்களால் உணர முடிந்தது. இனிமேல் (back to pavilion) நாம் எடுத்திருக்கும் சேவைப் பணியான கல்வி, சுகாதாரம், இஸ்லாம் என்று வழக்கம்போல் தொடருகிறது, இன்ஷா அல்லாஹ்.

இந்த கோடைவிடுமுறையில் கல்வி தொடர்பான நிகழ்வுகள் அதிரையில் நடத்தப்பட வேண்டும். கல்வி விழிப்புணர்வு மாநாட்டில் ஈடுபட்ட சகோதரர்கள் பெரும்பாலானவர்கள் தங்களின் அதிக அலுவலக பணிச்சுமைகள் காரணமாக தற்போது கல்வி விழிப்புணர்வு நிகழ்வுகள் தொடர்பாக அதிகமாக கவனம் செலுத்த முடியவில்லை. கோடைவிடுமுறை கல்வி பயிற்சி விழிப்புணர்வு தொடர்பாக விரைவில் நல்ல அறிவிப்புக்கள் நம் அதிரைநிருபரில் வெளிவரும். இன்ஷா அல்லாஹ் !.

படைத்தவனின் துனையில்லாமலும், நம் பங்களிப்பாளர்கள் மற்றும் வாசக நேசங்களின்  ஆதரவும், பங்களிப்பும் ஊக்கமும் இல்லாமலும் நாம் நிச்சயமாக இவ்வளவு மிகப்பெரிய வளர்ச்சியடைந்திருக்க முடியாது என்பதை மிக உறுதியாக நம்புகிறோம்.

 

வழக்கம் போல் தொடர்ந்து  இணைந்திருங்கள்....

 

அதிரைநிருபர் குழு

மாணவர்களின் விடுமுறையை பயனுள்ளதாக மாற்றுவோம்!. 8

10 ஆம் வகுப்பு மற்றும் 12 ஆம் வகுப்பு தேர்வுகள் முடிந்துவிட்டது. மாணவர்களும், பெற்றோர்களும் நிம்மதி பெருமூச்சுடன் தேர்வுக் முடிவுகளை எதிர்பாத்த வண்ணம் இருக்கின்றனர். இடையில் 6 முதல் 10 வாரம் வரை மாணவர்களுக்கு விடுமுறை விடப்பட்டுள்ளது. இந்த விடுமுறை நாள்களை எதிர்காலத்தில் தமது கல்வி அறிவு சிறக்க பயன்படும் வகையில் மாணவர்கள் பயன்படுத்த வேண்டும்.

 

விடுமுறை நாள்களின் என்ன பண்ணலாம்?

1.ஆங்கில மொழிதிறனை (English language skill) வளர்த்து கொள்ள முயற்சிக்கவும் :

ஆங்கில மொழிதிறன் என்பது இன்று இன்றியமையாத ஒன்றாக உள்ளது. தமிழ் வழி கல்வி பயின்ற மாணவர்கள் ஆங்கில பயிற்சி வகுப்புகளில் சேர்ந்து படிக்கலாம் அல்லது வீட்டில் இருந்தே ஆங்கில மொழி பயிற்சி புத்தகங்களை படிக்கலாம். ஆங்கில திறனை வளர்த்து கொள்ள மிக சிறந்த வழி ஆங்கில குர்ஆனை தமிழ் குர்ஆனுடன் ஒப்பிட்டு வாசிப்பது. குர்ஆனை, வசனத்திற்க்கு வசனம் ஆங்கிலத்திலும் தமிழிலும் படிப்பதின் மூலம் ஆங்கில அறிவும் வளரும், அல்லாஹ்வுடைய கட்டளைகளையும் அறிந்து கொள்ளமுடியும்.

2. தொடர்பு திறனை (Communication skill) வளர்ப்பது : 

வேலைவாய்ப்பு பெற மிக முக்கிய தகுதியாக கருதபடுவது தொடர்பு திறன் எனப்படும் Communication skill. என்னதான் மதிப்பெண் வாங்கி இருந்தாலும் Communication skill இல்லாவிட்டால் எந்த நிறுவனத்திலும் வேலைக்கு எடுக்க மாட்டார்கள். இந்த தொடர்பு திறன் Communication skill -யை வளர்த்து கொள்ள மிக முக்கிய தேவை தைரியம், தைரியமாக நீங்கள் நினைக்கும் கருத்துக்களை பிறருக்கு சொல்ல பழகுங்கள். அதாவது இஸ்லாமிய ரீதியில் சொல்வதாக இருந்தால் நல்ல தாயிகளாக ( பிரசாரகர்களாக) மாற பழகுங்கள். Communication skill என்பது ஒவ்வொறு முஸ்லீமிடமும் கட்டாயம் இருக்கவேண்டிய பண்பாகும். 

"நன்மையை ஏவி, தீமையைத் தடுத்து நல் வழியை நோக்கி அழைக்கும் சமுதாயம் உங்களிடம் இருக்க வேண்டும். அவர்களே வெற்றி பெற்றோர்." (குர்ஆன் 3 : 104)

தினமும் குர் ஆனை எடுத்து தொழுகைக்கு பிறகு வீட்டில் உள்ளவர்காளுக்கு படித்துகாட்டுங்கள், முடிந்தவரை பிறருக்கு எடுத்து சொல்லுங்கள், அவர்கள் கேட்கும் கேள்விகளுக்கு பதில் சொல்ல பழகுங்கள். குர் ஆனுடைய கருத்துகளை பிறருக்கு சொல்வதற்க்கு வெட்க படாதீர்கள், தைரியமாக சொல்லுங்கள். இப்படி தொடர்சியாக செய்வதன் மூலம் நம்முடைய Communication skill - யை வளர்த்து கொள்ள முடியும்.

கணினி அறிவை (Computer knowledge ) வளர்த்து கொள்ளுங்கள்:

தற்போது பள்ளிபடிப்பு படிக்கவே கணினி அறிவு (Computer knowledge)அவசியமாகின்றது, எனவே கணினியில் குறிப்பாக MS Office (Word, Excel, Power Point etc..)கற்றுகொள்ளுங்கள். மேலும் internet-ன் பயன்பாட்டையும் கற்றுகொள்ளுங்கள், குறிப்பாக மின் அஞ்சல் (E -mail) துவங்குவது, google Search, விக்கீபீடியா போன்றவைகளை அறிந்துகொள்ளுங்கள், இன்டெர்னெட் பயன்படுத்தும் போது பெற்றோர்கள் மிக கவனமாக இருக்க வேண்டும், இணையதளத்தில் நல்ல வியஷயங்களுக்கு இணையாக கெட்ட விஷயங்களும் கொட்டிகிடக்கின்றது. தற்போதுள்ள காலத்தில் இன்டெர்னெட்டே வேண்டாம் என ஒரேடியாக ஒதுக்கிவிட முடியாது, எனவே பெற்றொர்கள்தான் மாணவர்களை இன்டெர்னெட்டை சரியான முறையில் பயன்படுத்த பழக்க படுத்த வேண்டும்

10 மற்றும் +2 ஆம் வகுப்பு படிக்க போகும் மாணவர்களுக்கு :

விடுமுறையை வீணாகாமல் இப்போதே பொது தேர்விற்க்கு படிக்க ஆரம்பித்து விடுங்கள். 9 - ஆம் வகுப்பு முடித்து 10 - ஆம் வகுப்பு செல்லும் மாணவர்கள் 10 - ஆம் வகுப்பு பொது தேர்விற்க்கும். +1 முடித்து +2 செல்லும் மாணவர்கள் +2 வகுப்பு பொது தேர்விற்க்கு தயாராகுங்கள். +2 ஆம் வகுப்பு படிக்க போகும் மாணவர்கள் தேசிய அளவில் மருத்துவம் பொறியியல் படிக்க நடத்தப்படும் போட்டி தேர்வுகளுக்கு தயாராகுங்கள்.

+2  வகுப்பு படிக்க போகும் மாணவர்களுக்கான போட்டி தேர்வுகள் :

IIT-JEE - இந்த தேர்வு IIT, IISc - ல் B.E/B.Tech/B.Arch படிக்க நடத்தபடும் தேர்வாகும், +2 - ல் கணிதம், இயற்பியல், வேதியியல் படிக்கும் மாணவர்கள் எழுதலாம். AIEEE - NIT மற்றும் மத்திய பல்கலை கழகங்களில் B.E/B.Tech/B.Arch படிக்க நடத்தபடும் தேர்வாகும், +2 - ல் கணிதம், இயற்பியல், வேதியியல் படிக்கும் மாணவர்கள் எழுதலாம்.

AIPMT - மத்திய அரசின் மருத்துவ கல்லூரிகள் மற்றும் தனியார் மருத்துவ கல்லூரிகளில் MBBS படிக்க நடத்தபடும் தேர்வு, உயிரியல் அல்லது விலங்கியல், தாவரவியல் மற்றும் இயற்பியல், வேதியியல் படிக்கும் மாணவர்கள் எழுதலாம்.

HSEE - IIT -யில் ஒருங்கினைத்த 5 ஆண்டு M.A. படிப்பிற்க்கான தேர்வு. அனைத்து பிரிவு மாணவர்களும் எழுதலாம், குறிப்பாக Arts குரூப் படிக்கும் மாணவர்கள் இந்த தேர்வின் மூலம் IIT-யில் படிக்கலாம்

மாணவர்களே! நேரத்தை வீணாகாமல் இப்போதே போட்டி தேர்வுகளுக்கும் , பொது தேர்வுகளுக்கும் தயாராகுங்கள். தேர்வுகள் கடினம் என்ற தவறான சிந்தனையை குப்பையில் போடுங்கள், எந்த தேர்வையும் சந்தித்து சாதிக்க நம்மோடு அல்லாஹ் இருகின்றான், அல்லாஹ்விம் மீது நம்பிக்கைவையுங்கள் அவனிடம் வலியுத்தி கேளுங்கள், கடினமாக உழைத்து படியுங்கள் நிச்சயம் அல்லாஹ் நமக்கு வெற்றியை தருவான் இன்ஷா அல்லாஹ்.

அனைத்து போட்டி தேர்வுகள் பற்றி மேலும் அறிந்து கொள்ள sithiqu.mtech@gmail.com என்ற ஈ - மெயில் முகவரியில் தொடர்பு கொள்ளவும்.

நன்றி: S.சித்தீக்.M.Tech

                 
தகவல்: அதிரை மீரா B.E

Thanks: http://adiraimujeeb.blogspot.com/2011/04/blog-post_14.html

இனிப்பும் கசப்பும் - பகுதி 2 3

சென்ற பதிவில் சர்க்கரை நோயின் வகைகள் மற்றும் அந்த நோய் எப்படி ஏற்படுகிறது என்று பார்த்தோம். இந்த பகுதியில் இந்த நோய் ஏற்பட்டிருந்தால் என்னென்ன அறிகுறிகள் தென்படும் மற்றும் எவ்வகையான நோய்கள் இதன் மூலம் ஏற்படுகிறது என்பதைக் காணலாம்.

குறிப்பு:

கீழ்க் காணும்வற்றில் ஏதேனும் ஒன்று உங்களுக்கு இருப்பதாக உணர்ந்தால் அச்சப் பட்டுவிடாதீர்கள். அது தற்காலிகமான ஒன்றாகக் கூட இருக்கலாம். அவை தொடர்ந்து இருந்தால் அருகிலுள்ள மருத்துவரை அனுகி ஆலோசனை பெற்று குறுதிச் சோதனை செய்து கொள்ளலாம்.

அறிகுறிகள்:

-அதிகப்படியான தாகம்

-அடிக்கடி சிறுநீர் போதல்

-அதிகமாப் பசித்தல்

-காரணமில்லாத எடை குறைவு

-உடம்பில் வலியெடுத்தல்

-சோர்வு

-காயங்கள் எளிதில் ஆறாமை

-அடிக்கடி சிறு சிறு நோய்கள் தொற்றுதல்

-சில நேரங்களில் பார்வை தெளிவின்மை.

மேற்கண்டவற்றில் சிலவோ அல்லது எல்லாமோ ஒருவருக்கு இருக்கலாம். இனி, இந்த குறைபாடு எப்படி வருகிறது என்பதையும் ஒவ்வொரு வகையின் தன்மையையும் காண்போம்.

வகை I

அதிகப்படியான சர்க்கரையை glycogen (கிளைக்கோஜன்) ஆக மாற்றி சேமித்து வைக்க கணையத்திலிருந்து சுரக்கும் இன்சுலின் தேவையான ஒன்று என்று கண்டோமல்லவா? கணையம் இன்சுலினை சுரகத் தவறும்போது இந்நோய் வெளிப் படுகிறது. ஏன் இப்படி? இந்த இன்சுலின் சுரக்கக் காரணமாக இருக்கும் beta((பீட்டா) செல்கள் கணையத்தில் மிக மிகக் குறைந்தோ, அல்லது முழுவதுமாக இல்லாமலோ இருக்கலாம். இப்படி, பிறக்கும்போதே கூட சில இளம் நோயாளிகளுக்கு இருக்கலாம். அல்லது ஏதோ ஓர் காரணத்தால் அவை அழிக்கப் பட்டும் இருக்கலாம். இம்மதிரியான குறை, இளம் வயதில் (கிட்டத்தட்ட 20 வயதிற்குள்) தோன்றிவிடுவதால் இவ்வகையை Juvenile diabetes- இள வயது சர்க்கரை நோய் என்றழைக்கிறார்கள். இம்மதிரியான நோயாளிகளுக்கு இன்சுலினை வெளியிலிருந்து உடலுக்குள் செலுத்துவதைத் தவிர வேறு வழி இல்லை.

வகை II

இரண்டாவது வகை வயதானவர்களுக்கு(40 வயதிற்கு மேல்) வருவதாகும். கணையதில் இருக்கும் பீட்டா செல்கள் அளவு குறைந்தோ அல்லது இன்சுலின் போதுமான அளவு சுரந்தாலும் அதைப் பயன்படுத்திக் கொள்ள இயலாத ஓர் எதிர்ப்பு சக்தி உடலில் இருக்கலாம். இம்மாதிரியான குறைபாடுடையவர்கள் வாய் மூலம் உட்கொள்ளும் மருந்துகள் மூலம் சரி செய்து கொள்ளலாம்.

மேற்கண்ட விளக்கங்களிலிருந்து ஒன்றைத் தெரிந்து கொள்ளலாம். சர்க்கரை நோய் ஒரு நோயல்ல - ஒரு குறைபாடு. அந்தக் குறைபாட்டை மருந்துகள் உண்டோ அல்லது இன்சுலின் எடுத்தோ எவ்வழியிலாவது சரிசெய்ய முடியுமானால் வாழ்க்கையைச் சிக்கலின்றிக் கழிக்கலாம்.

முதல் வகையானது 10 விழுக்காடே காணப் படுகிறது. இரண்டாவது வகைதான் வயதானவர்களிடையே அதிகம் காணப்படுகிறது. இது ஆளுக்கு ஆள் வேறுபடலாம். ஒருவரின் உடற்கூறு, வாழும் வகை, உண்ணும் உணவு, செய்யும் தொழில் இவை எல்லாமே சர்க்கரை நோயின் அளவை நிர்ணயிக்க கூடியவை.

ஓர் உண்மையைத் தெரிந்து கொள்ளுங்கள். ஒருமுறை சர்க்கரை நோய் என்று அறிய வந்துவிட்டால்(கர்ப்பகால சர்க்கரை நோய் போன்ற தற்காலிக வகை தவிர) அந்த 'வரத்தோடு' வாழ வேண்டியதுதான். ஆரம்ப காலத்திலேயே கண்டறிந்து விட்டால் அச்சம் கொள்ளத் தேவையில்லை. ஒரு பொன்மொழியை மனதில் கொள்ளுங்கள்: சர்க்கரை நோய் நம்மை ஆளுவதற்கு முன்னால் அதை நாம் ஆளத் தொடங்கிவிட வேண்டும். அதனால்தான் சர்க்கரை நோயை treat செய்வதாகச் சொல்வதில்லை; manage செய்வதாகச் சொல்கிறோம். என்ன, முன் சொன்ன அறிகுறிகளில் சில உங்களுக்கு இருப்பதாக எண்ணிக் கொண்டு குறுதிச் சோதனை செய்து கொண்டுவிட்டீர்களா? எல்லாம் சரியாக இருக்கிறதா? வாழ்த்துக்கள்.

இல்லை, இரத்தத்தில் சர்க்கரை இருப்பதாகத் தெரிய வந்ததா? கவலையை விடுங்கள். அயர்ந்து போக வேண்டாம். இந்த உலகில் நீங்கள் தனித்தவரல்லர். உங்களோடு கோடிக்கணக்கான மக்கள் இருக்கின்றனர். அவர்களுள் இலட்சக் கணக்கான அறிவியலாளர்களும், பேராசிரியர்களும், பொறியிலாளர்களும், கணினி வல்லுனர்களும், மருத்துவர்களும், விளையட்டுத் துறையைச் சேர்ந்தவர்களும் அடங்குவர். இந்த நோய் கொண்டிருந்தும் அழகிகளாகத் தேர்ந்தெடுக்கப் பட்ட பெண்களும் உண்டு. அது ஏன் -

கிரிக்கெட் உலகின் மிகச் சிறந்த வேகப் பந்தாளர்களில் ஒருவராகத் திகழ்ந்த வசீம் அக்ரம், இன்சுலின் எடுத்துக் கொள்ளும் ஒரு சர்க்கரை நோயாளிதானாம்!

சர்கரை நோயை முன்னறிய முடியுமா? அவற்றை தடுத்துக்கொள்ள முடியுமா? இக்கட்டுரையைப் படிக்கும்போது எல்லோர் மனதிலும் எழக்கூடிய முதல் கேள்வி. இதற்கு ஆம் என்றோ அல்லது இல்லை என்றோ பதில் சொல்ல இயலாது. காரணம், கணையத்தில் ஏற்படக்கூடிய கட்டி, கல்லடைப்பு, வீக்கம் போன்றவற்றால் இன்சுலின் சுரப்பு பாதிக்கப் படும் சூழ் நிலை தவிர இது உடம்பிற்குள்ளேயே முன் கணிக்கப்பட்ட(programmed) ஒன்றாக அமைந்து விடுகிறது. இதில் பாரம்பரியமும் ஒரு பெரும் பங்கு வகிக்கிறது. தாயோ அல்லது தந்தையோ சர்க்கரை நோயாளியாக இருந்தால் பிள்ளைகளுக்கும் வர அதிக வாய்ப்பிருக்கிறது. இப்படி முன் கணிக்கப் பட்டிருப்பதை நாம் அறிந்து கொள்ள இயலுமா? கடினம்தான். ஆனால் இந்த நோய் தலைகாட்டப் போகும் சற்று முன் அறிந்து கொள்ள இயலும். இதற்கு GTT - glucose tolerance test(சர்க்கரை அளவை தாங்கும் தன்மை) ஒன்றைச் செய்து கொள்ளலாம். ஓர் இரவுப் பட்டினிக்குப் பின், ஒரு குறிப்பிட்ட இடைவெளியில்(எடுத்துக்காட்டாக அரை மணிக்கொருமுறை) ஒரு குறிப்பிட்ட அளவு(50 - 100grams) கரைக்கப் பட்ட சர்க்கரையை(glucose)க் கொடுத்து அதே இடைவெளியில் இரத்ததை எடுத்து சோதனை செய்வர். ஒரு நோயில்லாத மனிதருக்கு சர்க்கரையின் அளவு அவ்வளவு ஒன்றும் கூடிவிடாது. ஆனால் நோய் இருக்கும் மனிதருக்கு அதன் அளவு கூடியே இருக்கும்.

பொதுவாக உடல் பருமனாக இருப்பவர்களுக்கு இந்நோய் வர வாய்ப்பிருக்கிறது. உடல் எடையை அளவாக வைத்துக் கொள்ளுதல், தொடர்ந்த உடற்பயிற்சி, மனச் சிக்கல்(stress) இல்லாமல் பார்த்துக் கொள்ள்ளுதல் ஆகியவை இந்த நோயைத் தூர வைப்பதற்குண்டான வழியாகும்.

சர்க்கரை நோயைப் பற்றிய விழிப்புணர்வு இப்போது அதிகமாகியிருக்கிறது. என்றாலும் பலருக்கு இந்தோய் இருப்பது தற்செயலாகவே தெரிய வருகிறது. வேறு ஏதாவது ஒரு நோய்க்காக குறுதிச் சோதனை செய்யும்போது குறுதியில் சர்க்கரை அளவு அதிகமாக இருப்பதாகத் தெரிய வரும்போதுதான் பலர் இந்த நோய்க்கு ஆட்பட்டிருக்கிறார்கள் என்று அறிய வருகிறார்கள்.

நாம் முன்பு கண்டபடி இந்நோயின் சில அறிகுறிகளோடு(தாகம், அடிக்கடி சிறுநீர் போதல், சோர்வு போன்றவை) இதன் தாக்கம் நின்று விடுவதில்லை. அவ்வறிகுறிகள் இனி ஏற்படப் போகும் சிக்கல்களுக்கான முன்னோடிகள். சர்க்கரை நோய், வேறு பல நோய்களின் தாய் என்று சொன்னேனல்லவா? அவற்றுள் அச்சமுறுத்தும் நோய்கள் சில:

-கண்பார்வை பாதித்தல்

-சிறுநீரகங்கள் பழுதடைதல்

-இதய நோய்

-கால்களில் புரையோடிய புண்

அதிர்ந்து போய்விடாதீர்கள். சர்க்கரை நோய் ஆரம்பித்த ஓரிரு நாட்களில் இவை வந்துவிடுதில்லை. சர்க்கரை நோயைக் கட்டுக்குள் வைத்திருக்காமல் ஆண்டுக் கணக்கில் தொடர விடுவோமானால் இவ்விளைவுகள் உண்டாகும். முதலில் தொடக்க கால அறிகுறிகளான தாகம், சிறுநீர் அடிக்கடி போதல் போன்றவை ஏன் ஏற்படுகிறது என்று அடுத்த பகுதியில் பார்ப்போம்.

தொடரும் - பகுதி 3

--உமர்

இனிப்பும் கசப்பும் - பகுதி 1

அன்பான அதிரைநிருபர் வாசகர்களே,

இன்றைய காலத்தில் சர்க்கரை நோய் இல்லாத குடும்பமே இல்லை. இந்த ஆக்கம் நம் அதிரை புதல்வர் மர்ஹூம் உமர்தம்பி அவர்கள் தென்றல் என்ற தன் வலைப்பூவில் எழுதிய நீண்ட பதிவு, இதை ஏற்கனவே நம் அதிரைநிருபரில் பதிந்திருந்தாலும் எல்லோரும் படிக்கும் வண்ணம் தொடராக சுருக்கமாக புத்தம் புதுவடிவில் நம் அதிரைநிருபரில் மீள்பதிவு செய்கிறோம்.

இந்த அருமையான மருத்துவ பதிவை எல்லோரும் படித்து பயன்பெறுவீர்கள் என்று நம்புகிறோம். பயன்பெறும் இந்த மருத்துவ ஆக்கத்தை நமக்கு தந்த நம் அதிரை உமர்தம்பி அவர்களுக்காக நாம் அனைவரும் துஆ செய்வோமாக.


--அதிரைநிருபர் குழு.

அலுமினி"யமான தங்கங்கள் 13

நேற்று ஒரு சுவையான சம்பவம். அமெரிக்காவில் நான் தங்கி இருக்கும் வீட்டிற்கும் பக்கத்து வீட்டிற்கு ஒரு நண்பர் புதிதாக குடி வந்தார். அவர் பெயர் சுஷில்குமார். எதேச்சையாக சந்திக்க நேர்ந்தபோது ஒரு 'ஹாய்' சொல்லிக் கொண்டோம். கை குலுக்கும்போது அவரவர் பெயர் சொல்வது முறை என்பதால் 'Hi.. This is Safath ' என்றேன்.

பதிலுக்கு அவரும் "Hello.. This is Sushil'' என்றார்.

பிறகு பேசத் தொடங்கினோம்.

'' Where are you from ?"-இது நான்.

"I'm from Chennai. "

'ஓ அப்படியா.. நானும் தமிழ்நாடு தான்'- தமிழுக்கு மாறியாச்சு....

'நெஜமாவா? பார்த்தா அப்படி தெரியலையே.'- இதே போல் என்னிடம் சொன்ன மூணு லட்சத்து முப்பதாயிரத்து முன்னூற்றி ஒன்றாம் நபர் இவர். எண்ணிக்கையை அவரிடம் சொல்லாமல், சின்ன புன்னகையோடு நிறுத்திக் கொண்டேன்.

பிறகு அவர் தொடர்ந்தார்.

"தமிழ்நாட்டுல எங்கே?"

"தஞ்சாவூர்-ங்க."

"தஞ்சாவூர் ல எங்கே?"

"தஞ்சாவூர் பக்கத்துல பட்டுக்கோட்டை-னு ஒரு ஊர், அங்கே தான்".

"ஓ அப்படியா? பட்டுக்கோட்டைக்கு பக்கத்துல அதிராம்பட்டினம் காதிர் மொஹைதீன் கல்லூரி தெரியுமா"- இது அவர்.

என்னடா இது... நம்ம ஊரைப் பத்தி நம்ம கிட்டயேவா?

"அதிராம்பட்டினம் காதிர் மொஹைதீன் கல்லூரில தான் நான் M.C.A படிச்சேன், நாங்க தான் முதல் Set. ஜெயவீரன் சார் தெரியுமா? அப்துல் காதர் சார் தெரியுமா? NAS சார் தெரியுமா?"னு பட்டியலும் பேச்சும் நீண்டது. பின், கல்லூரி நாட்கள், நம்மூரில் அவர் இருந்த மூன்றாண்டு கால வாழ்க்கை, நாயக்கர் கடை சாப்பாடு-னு பேசினார்.

இதே மாதிரி எனக்கு இதுக்கும் முன்பே ஒரு அனுபவம். நம்மூர் கல்லூரியில் இளங்கலை முடித்து சென்னை அண்ணா பல்கலைக்கழகத்தில் முதுகலை சேர்ந்த சமயத்தில் என்னுடைய ஆசிரியரில் ஒருவரும் இப்படி கேட்டார்.

"நீ எந்த ஊருப்பா?"

"தஞ்சாவூர் சார்"

"தஞ்சாவூர் ல எங்கேப்பா?"

"தஞ்சாவூர் பக்கத்துல பட்டுக்கோட்டை-னு ஒரு ஊர் சார்,"

"அப்படியா.. எதுக்கு கேக்குறேன்னா.. அதிராம்பட்டினம்னு ஒரு ஊர்ல காதிர் மொஹிதீன் காலேஜ்-னு ஒரு காலேஜ் இருக்கு, அங்கே இருந்து வருஷத்துக்கு ஒரு மாணவரையாவது இந்த கல்லூரிக்கு மேல்படிப்புக்கு அனுப்பிடுறாங்க. ஒரு வேளை நீயும் அங்கே இருந்து தான் வர்றியோ-னு தான் கேட்டேன்"

"சார், நான் அந்த காலேஜ்-ல இருந்து தான் சார் வர்றேன், உங்களுக்கு தெரியுமோ தெரியாதோ-ன்னு தான் தஞ்சாவூர்-னு சொன்னேன் சார்".

ஆக மொத்தத்துல நான் எடுத்திருக்கிற முடிவு என்னான்னா... யாராவது தமிழ் ஆட்கள் நம்ம கிட்ட, எங்கே இருந்து வர்றீங்க?-னு கேட்டால், அதிராம்பட்டினத்துல இருந்து வர்றேன்னு முதல்-ல சொல்லனும். "அது எங்கே இருக்கு?"-னு கேட்டாங்கன்னா மட்டும் "என்னங்க நீங்க. G.Kல இவ்ளோ கம்மியா இருக்கீங்க.. பட்டுக்கோட்டைக்கு பக்கத்துல தான்". இதையும் தாண்டி "அது எங்கே இருக்கு?"-னு கேட்டாங்கன்னா... "அது தஞ்சாவூருக்கு பக்கத்துல இருக்கு-னு சொன்னா மட்டும் உங்களுக்கு புரியவா போகுது?"-னு கேட்கனும்!!!

ஓ.கே. On a serious note......இந்த கட்டுரையின் முதல் பத்தியில் குறிப்பிட்ட சுஷில்குமார் போன்று, நமதூர் கல்லூரியில் பயின்று, இன்று நல்ல பொருளாதார வசதியோடு, நல்ல நிலைமையில் வாழ்ந்து வருவோர் நிறைய பேர் இருக்கின்றார்கள். என்னுடைய சக நண்பர்களாக இருக்கட்டும், இதை வாசிக்கும் நீங்கள் ஒரு வேளை காதிர் மொஹைதீன் கல்லூரியில் பயின்றவராக இருந்தீர்களானால் உங்க வயது ஒத்தவர்களில் கூட நிறைய பேர் நல்ல நிலைமையில் இருக்கின்றார்கள் என்பதை, கண்டிப்பாக ஒத்துக்கொள்வீர்கள். ஆனால், நம் கல்லூரியில் பயின்ற மாணவர்கள் எங்கு இருக்கின்றார்கள்? என்ன செய்து கொண்டிருக்கின்றார்கள்? எப்படி இருக்கின்றார்கள்? என்ற ஒரு தகவலும் இது வரையிலும் கல்லூரிக்கு தெரியாது. பழைய மாணவர்களோடு இருந்திருக்க வேண்டிய தொடர்பு, இறந்திருக்கின்றது. "பழைய மாணவர்கள் சங்கம்" என்ற ஒரு அமைப்பு கூட இருப்பதாக எனக்கு தெரியவில்லை. அவர்களது மூன்றாடு கால கல்வியோடு, அவர்களுக்கும் கல்லூரிக்குமான தொடர்பு அறுந்துபோய் விடுகின்றது. இந்த நிலை மாற வேண்டும். நமதூர் கல்லூரியில் பழைய மாணவர்கள் பற்றிய தகவல் திரட்டப்பட வேண்டும். இது காலத்தின் கட்டாயம்.

சரி. இதனால் என்ன நன்மை ?

நிகழ்கால மாணவர்களுக்கு வேலை வாய்ப்பிற்கு வழி காட்டல்.

பழைய மாணவர்களின் உதவியில் உள்கட்டமைப்பு வசதிகளை மேம்படுத்துதல்.

கல்வி முறைகளில் செய்யப்படவேண்டிய முன்னேற்றம் பற்றிய முன்னாள் மாணவர்களின் கருத்துக்களை கேட்டறிந்து அவற்றை செயல் படுத்துதல்.

இது போன்ற அரும்பெரும் நன்மைகள் கண்டிப்பாக கிடைக்கும் என்பதில் ஐயமில்லை. இதற்கு நிகழ்கால உதாரணம் தேடுவோர் 'திருச்சி ஜமால் முஹம்மது கல்லூரி'யின் அலும்னி-அமைப்பைப் பற்றி விசாரித்து அறியலாம். அவர்கள் செய்வது போன்று, வருடத்திற்கு ஒருமுறை சென்னையில் 'முன்னாள் மாணவர்களின் சந்திப்பு நிகழ்ச்சிகள்' நடத்தலாம். சிந்திப்போம், செயல்படுத்துவோம்.

STUDENT ALUMNI நம்மூர் பள்ளிகளில் உள்ளதா?  என்ற தலைப்பில் சகோதரர் தாஜுதீன் அவர்கள் அதிரைநிருபரில் சில மாதங்களுக்கும் முன்பு எழுதி நல்ல வரவேற்பை பெற்ற கட்டுரையையும் படித்துப்பாருங்கள்.

 

அன்புடன்,

-- அதிரை என்.ஷஃபாத்

சுட்டும் விரலே சுட்டிக் காட்டிடு - வாக்கு அளிக்க வழிமுறைகள் ! 23

வாக்கு அளிப்பது இந்திய இறையான்மையில் ஜனநாயக உரிமை, இந்தத் தேர்தலில் கட்டாயம் உங்கள் வாக்கைப் பதிவுசெய்யுங்கள். அதற்கான இலகுவான வழிமுறைகள்.

காலை 8 மணி முதல் மாலை 5 மணி வரை வாக்களிக்கலாம். ஆனாலும், உங்கள் ஓட்டை வேறு யாரும் போட்டுவிடாமல் இருக்க, முன்னதாக ஓட்டுப் போடச் செல்வதே சிறந்த வழி.

உங்கள் வீட்டுக்கு அருகிலிருக்கும் வாக்குச் சவடிக்குச் செல்லுங்கள், மற்றவர்கள் அழைத்தார்கள் என்று வேறு வாக்குச் சாவடிக்கு வேடிக்கைப் பார்க்கச் செல்லாதீர்கள்.

வாக்குச்சாவடியில் ஆண், பெண், மாற்றுத்திறனாளிகள், முதியோர்என்று தனித்தனி வரிசைகள் இருக்கும். உங்களுக்கு என்று உள்ள வரிசையில் நின்று பொருமை காத்திருங்கள். பெண்களுக்கும், முடியாதவர்களுக்கு முன்னுரிமை அளியுங்கள்.

எவ்விதப் பதற்றம் இல்லாமல் நிதமான வாக்குகளை பதியுங்கள், ஒவ்வொரு வாக்காளராகவே உள்ளே அனுமதிப்பார்கள்.

வாக்குச்சாவடிக்குள் நுழைந்தவுடன் முதல் வாக்குப்பதிவு அலுவலர், வாக்காளர் பட்டியலில் உங்கள் பெயர் இருக்கிறதா, அந்தப் பெயருக்கு உரியவர் நீங்கள்தானா என்பதைப் பரிசோதிப்பார். வாக்காளர் அடையாள அட்டையையும் தேர்தல் ஆணையம் வழங்கிய அடையாளச் சீட்டையும் அவரிடம் காண்பிக்க வேண்டும். அதன் பிறகு, அவர் உங்கள் பெயரையும் வரிசை எண்ணையும் சொல்வார். இதன் மூலம், தேர்தல் (கட்சி வேட்பளர்களின்) முகவர்கள் உங்களின் இருப்பை அறிந்துகொள்வார்கள். அடுத்து, நீங்கள் இரண்டாவது வாக்குப்பதிவு அலுவலரிடம் செல்ல வேண்டும்.

இரண்டாவது வாக்குப்பதிவு அலுவலரிடம் செல்லும்போது, அவர் உங்களின் இடது கையில் உள்ள ஆள்காட்டி விரலில் அழிக்க முடியாத மையைத் தடவுவார். அதன் பிறகு, வாக்காளர் பதிவேட்டில் உள்ள வாக்காளர் பட்டியலில் உங்கள் வரிசை எண்ணைப் பதிவு செய்வார். அதன் பிறகு, அந்தப் பதிவேட்டில் நீங்கள் கையெழுத்திட வேண்டும் அல்லது இடது கைப் பெருவிரல் ரேகையைப் பதிவு செய்ய வேண்டும். அவர் கையெழுத்திடப்பட்ட அடையாளச் சீட்டை உங்களுக்குத் தருவார். அடுத்து, நீங்கள் மூன்றாவது வாக்குப்பதிவு அலுவலரிடம் செல்ல வேண்டும்.

மூன்றாவது வாக்குப்பதிவு அலுவலரிடம் செல்லும்போது, இரண்டாவது வாக்குப்பதிவு அலுவலரால் வழங்கப்பட்ட அடையாளச் சீட்டைப் பெற்றுக்கொண்டு, கட்டுப்பாட்டு இயந்திரத்தின் பொத்தானை இயக்குவார். இப்போது நீங்கள் வாக்களிப்பதற்கான அனுமதியைப் பெற்று விட்டீர்கள்.

ஓட்டுப் போடும் இயந்திரம் இருக்கும் மறைவான வைத்திருக்கும் இடத்துக்கு சென்றதும், ஏற்கனவே முடிவு எடுத்திருந்தாலும் அல்லது அதுவரை முடிவுக்குள் வரவில்லை என்றால் ஒரு கணம் ஆழ்ந்து யோசியுங்கள். தகுதி உடைய சரியான நபரை மனதில் தேர்ந்தெடுங்கள். முக்கியமாக, உங்களுக்கும் சமுதாயத்திற்கும் நீங்கள் நேர்மையாக நடந்துகொள்ளுங்கள். வேட்பாளருக்கு உரிய பெயர் மற்றும் சின்னத்துக்கு நேராக இருக்கும் நீலப் பொத்தானை அழுத்துங்கள். 'பீப்’ ஒலி கேட்கும். அதேசமயம், நீங்கள் தேர்ந்தெடுத்த வேட்பாளரின் பெயர் மற்றும் சின்னத்துக்கு நேராக சிவப்பு ஒளி ஒளிரும். ஒரு முறை பொத்தானை அழுத்தினால் போதும். இப்போது உங்கள் ஓட்டு பதிவாகிவிட்டது.

நீங்கள் யாருக்கு வாக்களித்தீர்கள் என்பது உங்களுக்கு மட்டுமான ரகசியம். வாக்குச்சாவடிக்குள் நின்றுகொண்டு நீங்கள் யாருக்கு வாக்களிக்கப் போகிறீர்கள் என்பதைத் தெரிவித்தால், உங்களை வாக்களிக்க அனுமதிக்க மாட்டார்கள். யாருக்கு வாக்களித்தீர்கள் என்பதைத் தெரிவித்தால், மக்கள் பிரதிநிதித்துவச் சட்டப்படி, உங்கள் மீது நடவடிக்கை எடுக்கலாம். அதேபோல, வாக்களிப்பதைப் படம் எடுப்பதும் கூடாது அங்கே மொபைல் ஃபோன் எடுத்துச் செல்லாதீர்கள்!

வாக்காளர் பட்டியலில் உங்கள் பெயர் இருந்து, வாக்காளர் அடையாள அட்டை இல்லையென்றால், கவலை வேண்டாம். தேர்தல் ஆணையம் வழங்கும் அடையாளச் சீட்டு உங்களிடம் இருந்தால்போதும். தாராளமாக ஓட்டுப் போடலாம். அதுவும் இல்லையென்றால், நீங்கள் ஓட்டுப் போட முடியாது.

சிலருக்கு இப்படியான பிரச்னைகள் வரலாம். அதாவது, பட்டியலில் உங்கள் பெயர் இருக்கும். ஆனால், உங்கள் படம் இருக் காது. வாக்காளர் அடையாள அட்டையும் இல்லை. தேர்தல் ஆணையம் வழங்கும் அடையாளச் சீட்டும் இல்லை என்றால் என்ன செய்வது? பாஸ்போர்ட், டிரைவிங் லைசென்ஸ், பான்கார்டு இவற்றில் எதையாவது ஒன்றைச் சான்றாகக் காட்டி ஓட்டுப் போடலாம். குடும்ப அட்டைகளை ஏற்றுக்கொள்ள மாட்டார்கள்.

வாக்காளர் பட்டியலில் உங்கள் பெயர் இருக்கிறது. ஆனால், அந்தப் பெயருக்கு உரியவர் நீங்கள் இல்லை என்று வாக்குச் சாவடியில் உள்ள யாராவது சந்தேகம் எழுப்பினால், என்ன செய்வது? பாஸ்போர்ட், டிரைவிங் லைசென்ஸ்... இப்படிச் சில ஆவணங்கள் மூலம் உங்கள் அடையாளத்தை நீங்கள் நிரூபிக்க வேண்டும். ஒருவேளை நீங்கள் போலியானவர் என நிரூபிக்கப்பட்டால், உங்கள் மீது சட்டப்படி நடவடிக்கை எடுக்கப்படும்.

முதல் வாக்குப்பதிவு அலுவலர், வாக்காளர் பட்டியலில் உங்கள் பெயர் இருக்கிறதா எனப் பரிசோதிப்பார். உங்கள் பெயரில் வேறு யாரேனும் ஓட்டுப் போட்டு இருந்தால், அதை உடனே வாக்குச்சாவடித் தலைமை அலுவலரின் கவனத்துக்கு எடுத்துச் செல்ல வேண்டும். உங்களுக்கு ஆராய்ச்சிக்குரிய ஓட்டுச் சீட்டு (டென்டர்ட் பேலட் பேப்பர்) அளிக்கப்படும். அதைப் பெற்றுக்கொண்டு, நீங்கள் கையெழுத்திட வேண்டும். நீங்கள் வாக்களித்ததும், அதை ஓர் உறையில் இட்டு தனியே வைத்துக்கொள்வார்கள். நினைவில் வைத்துக்கொள்ளுங்கள்... நீங்கள் மின்னணு ஓட்டு இயந்திரத்தின் மூலம் வாக்களிக்க முடியாது. ஏதாவது விசேஷக் காரணங்கள் இருந்தால் தவிர, உங்கள் ஓட்டு கணக்கிலும் எடுத்துக்கொள்ளப்படாது!

வாக்கு அளித்து விட்டு அங்கேயே காத்திருக்காதீர்கள், உடணடியாக உங்களின் வீடுகளுக்கு திரும்பிடுங்கள், வாக்கு நடைபெறும் நாளில் வெளியில் கூட்டமாக இருந்திடாதீர்கள்.

பெண்கள் அணிகலங்களை அணிந்து கொண்டு வாக்கு அளிக்கச் செல்லாதீர்கள், உங்களின் விரலில் பெண் அதிகாரி மை வைக்குமிடத்தில் இல்லாவிடின் அவர்கள் சொல்லும் இடத்தில் உங்கள் விரலை மேஜைமேல் வையுங்கள், விரல் நீட்டிக் கொண்டிருகாதீர்கள்.

பெண்களே வீட்டில் இவர்கள் இல்லையே அவர்கள் இல்லையெ என்று அடுத்தவர்கள் வாக்குகளை செலுத்த கட்சிகளின் உறவுகளோ அழைத்தால் உங்கள் வாக்கைத் தவிர வேறு வாக்குகள் அளிக்க முன்வராதீர்கள் மறுத்தி விடுங்கள், இன்றையச் சூழலில் சட்டம் கடுமையாக இருக்கிறது அதோடு மீடியாக்களின் பிரச்சாரம் விபரீதத்தை உண்டாக்கிடும்.

இந்தத் தேர்தலின் கதாநாயகி 'எது’வாக வேண்டுமானாலும் இருக்கலாம். கதாநாயகன் / கதாநாயகி நீங்களாகத்தான் இருக்க வேண்டும்.

வாழ்த்துக்கள் மனசுல வைத்திருப்பவர்கள் வென்றிட !

தொகுப்பு : அபுஇபுறாஹிம்