அஸ்ஸலாமு அலைக்கும்…
நீண்ட இடைவேளைக்குப் பிறகு உங்கள் அனைவரையும் சந்திப்பதில் மகிழ்ச்சி. 1977 பொற்கால நினைவுகளில் பல சம்பவங்களைப் பகிர்ந்து கொண்டோம் இப்பொழுது சொல்ல வரும் சம்பவங்கள் நான் குறிப்பிடும் பொற்காலத்தில் மட்டுமல்லாமல் தொடர்ந்து இருந்து வருகிறதா ? என்பதை வாசகர்களாகிய தங்களின் கருத்திற்கே விடுகிறேன்.
கல்வெட்டுக் குறிப்பு: இங்கே குறிப்பிடப்பட்டிருக்கும் ஊர் பழக்க வழக்கங்கள் இன்றைய காலகட்டத்தில் ஏகத்துவ மீள் எழுச்சியின் விளைவாக விட்டொழிந்து விட்டாலும், ஒரு சில இடங்களில் இங்கொன்றும் அங்கொன்றும் நடக்கத்தான் செய்கிறது என்பதை மறுக்க இயலவில்லை. அவைகள் முற்றிலும் நம் சமுதாயத்திலிருந்து துடைத்தெரியப்பட வேண்டிய ஒன்றாகும்.
விராத்து:
பராஅத் என்றொரு நாளை விராத்து என்று நம் ஊரில் அழைப்பதுண்டு, அன்று இரவு குழந்தைகள் சிறுவர்கள் இறந்த வீட்டில் பாலில் வாழைப்பழத்தை சிறிது சிறிதாக வெட்டி ஒரு பாத்திரத்தில் கலந்து எடுத்து வாசல் முன் சிறுவர்கள் அமர்ந்து கொண்டு, வருவோர் போவோருக்கெல்லாம் வாழைப்பழம் கலந்த பாலை கொடுப்பார்கள். உங்களில் எத்தைனை பேர்கள் குடித்திருப்பீர்கள்?!?!
ஒடுக்கத்து புதன்:
பெண்கள் அனைவரும் (முக்கியமாக கல்யாணம் ஆகாத பெண்கள்) அன்றைய நாட்களில் கடலுக்குச் செல்வார்கள்(!!!) முசீபத்துகள்!! கழியும் நாள் என்று (ஒரு கதையைச்) சொல்வார்கள் ‘ஹத்’ எனும் ஓர் விஷயமுண்டு பனை ஓலையில் கருப்பு மையால் எழுதி தண்ணீரில் கரைத்து குடிப்பார்கள். அதில் ‘சலாமுன் கவ்முன் மின்ரப்பிர்ரஹீம் சலாமுன் அலானூஹின்’ (துவங்கி நீண்டு கொண்டு போகும்) என்று எழுதி இருக்கும். அதற்காக சொல்லப்படும் கதை நாயகம்(ஸல்)அவர்களின் மேல் கண்திருஸ்டி பட்ட நாளாம் அந்த புதன் ஆகையால் தான் முசீபத் கழிக்கிறார்களாம் கடலுக்கு சென்றவர்கள் கிதுர் நபி பெயரால் துஆ செய்வார்களாம் (!!!?).
வேறு ஒரு சம்பவம், இதற்கும் வாசகர்களாகிய உங்கள் அனைவரிடமிருந்து உண்மையான கருத்துக்களை எதிர்பார்க்கிறேன். அதே காலத்தில் நமதூரின் மார்க்க மேதை, மிகத் தெளிவான அதோடு தைரியமான ஆலிம் அவர்கள் எந்த வீட்டில் ரேடியோ படினாலும் அந்த வீட்டாரை கண்டித்து விட்டு செல்வார்கள் (இஸ்லாமிய பாடலாக!!! இருந்தாலும் சரியே) சொந்தக்கார வீடாக இருந்தால் வீட்டிற்குள் அவ்வீட்டாரின் அனுமதியுடன் உள்ளே சென்று ரேடியோவை அகற்றச் சொல்வார்கள்.
தொலைக்காட்சிப் பெட்டிகள் வந்த காலம் ஊர் ஆலிம்கள் அனைவரும் ஒன்று கூடி கண்டித்தார்கள், எதிர்ப்புகளை தெரிவித்தார்கள். அவர்களுடைய அறிவுரையை கேட்டு 'இல்லத்தின் நடுவே உள்ளத்தை கெடுக்கும் டிவி' என்று நோட்டீஸ் அடித்து டிவிப் பெட்டிகள் வைத்திருந்த வீடுகளின் கதவில் ஒட்டிவிட்டு நிறைய பிரச்சனைகளையும் நாங்கள் சந்தித்தோம்.
இன்றய ஆலிம்களோ 'விளம்பர இடைவேளைக்குப்' பிறகு மீதமுள்ள ஹதீஸை பார்க்கலாம் என்று டிவிக்குள்ளேயே வந்து விட்டார்கள். ஏகத்துவ எழுச்சி வெகுண்ட காலங்களில் ஆலீம்கள், ஆடியோ கேசட்டில் பிரச்சாரம் தொடர்ந்த்து அதன் பின்னர் சீடி / டிவிடி வழியாக வீடியோவில் வந்து இஸ்லாமியர் வீடுகளுக்குள் டீவி ஓர் அவசியமானதாக மாறக் காரணமாகி விட்டார்கள்.
சரி இனி உங்கள் பங்கிற்கு என்ன சொல்ல வருகிறீர்கள்!? விஞ்ஞான மாற்றங்களினால் சீர்திருத்தமா அல்லது சிரழிவா ?
மு.செ.மு.சஃபீர் அஹமது
