அதிரை வர்த்தக மற்றும் கலாச்சார ? விழா - நடந்தது என்ன ? 26

அஸ்ஸலாமு அலைக்கும்.

கடந்த ஒருமாத காலமாக அதிரையின் சாலைகளில் 'வர்த்தக, கலாச்சார விழா' நடக்கப் போவதாக ஃப்ளக்ஸ் விளம்பரங்கள் அறிவித்தன.

என்ன? எங்கு? எப்போது? என்பன பரம இரகசியமாக இருந்தன.

ஏப்ரல் இறுதி வெள்ளியில் விபரங்கள் வெளிவந்தன. கற்றோர் பலர் அதில் பொறுப்பு வகிப்பதாகக் கூறப்பட்டிருந்தது. அதிரையில் 'பெருஸ்ஸ்ஸ்ஸா' ஏதோ மாற்றம் வரப்போகிறது என்று பலரும் நம்பியதுபோல் நானும் நம்பினேன்.

அது எத்துணை மடத்தனம் என்பது 28.4.2013 மாலை தெரியவந்தது.

படித்தவர்கள் நடத்திய 'கலைச் சேவை'களை வீடியோவில் பார்த்து மனம் கனத்தது.

என்னைப் போலவே ஏமாறிப்போன சகோதரர்களுள் ஒருவரான 'மீடியா மேஜிக்' நிஜாமுத்தீன், 'வர்த்தகமாம்லோ ...' என்ற எண்ணத்தில் ஒரு ஸ்டால் போட்டிருந்தார். அது புத்திசாலித்தனமா இல்லையா என்பது வேறு விஷயம். ஆனால், அங்குள்ள அரங்கத்தில் நடைபெற்ற அசிங்கங்களை வீடியோ எடுத்துப் பத்திரப்படுத்தியது வெகு புத்திசாலித்தனம்.

இத்தனைக்கும் அரங்கக் கலை(?) நிகழ்ச்சிகளுக்கு அனுமதி பெறப்படவில்லை என்ற தகவலையும் அவர் நேற்று காவல் நிலையத்திலிருந்து தெரிந்து வந்து சொன்னார்.

அரங்கம், அசிங்கங்களை அரங்கேற்றிய முதல் நாளே விழாவின் ஜாயிண்ட் செக்ரட்டரி செய்யது அஹ்மது கபீர் அவர்களை சந்தித்துத் தமது எதிர்ப்பினைத் தெரிவித்திருக்கிறார் சகோ. நிஜாமுத்தீன். "சரி, சரி! பாட்டுகளைக் குறைத்துக் கொள்ளலாம்" என்ற அறிவுசீவித்தனமான பதில் கிடைத்திருக்கிறது. என்றாலும் அடுத்தடுத்த நாட்களில் அரங்கம் தொடர்ந்து அசிங்கமாகிக் கொண்டே வந்தது.

நேற்று 2.5.2013இல் அதிரை உலமாக்கள் சபை, கலாச்சாரத்தை(!) அழைத்துப் பேச்சுவார்த்தை நடத்தியபோதும் பெரும் பொருட்செலவில் கலாச்சாரப் பொரட்சி நடைபெற்று வருவதால் "அரங்க நிகழ்ச்சிகளை நிறுத்தமுடியாது; யோசித்துச் சொல்கிறோம்" என்றெல்லாம் முட்டுக் கொடுக்கப்பட்டதை அறிந்த சகோ. நிஜாமுத்தீன் மாவட்ட ஆட்சியருக்குப் புகார் அனுப்பினார் (இணைப்பு).

இன்று மாலை ஐந்து மணியளவில் மாவட்ட ஆட்சியரின் ஆய்வுக் குழுவொன்று அதிரைக்கு வந்து, விழா இடத்தை ஆய்வு செய்யத் தொடங்கியது.

ஆய்வுக் குழுத் தலைவர் அழைத்ததன் பேரில் சகோ. நிஜாமுத்தீனோடு நானும் தம்பி ஜமாலுத்தீன் புகாரியும் விழாக் குழுவினரின் அலுவலகத்துக்குச் சென்றோம். "கோரிக்கைகள் யாவை?" எனக் கேட்டபோது,

1. பெண்களுக்கான தடுப்பு அல்லது சிறப்பு நேரம் அல்லது 'பெண்கள் மட்டும்' நாள் ஆகிய ஏதேனும் ஒன்று ஏற்பாடு செய்ய வேண்டும்.

2. கலாச்சாரக் கேடு விளைவிக்கும் அரங்க நிகழ்ச்சிகள் தடை செய்யப்பட வேண்டும்

3. தீயணைப்பு வண்டிகள் வேண்டும்.

4. ஆம்புலன்ஸ் வண்டி தயார் நிலையில் வேண்டும்.

5. பலமான பாதுகாப்பு ஏற்பாடு (செக்யூரிட்டி) வேண்டும்.

ஆகிய கோரிக்கைகளை எழுதிக் கொடுத்து சகோ. நிஜாமுத்தீன் கையொப்பம் இட்டுக் கொடுத்தார்.

"பாட்டு, கூத்து, நாடகம் இனி அரங்கத்தில் நடக்காது. மற்றவை அனைத்தும் உடனடியாக ஏற்பாடு செய்யப்படும்" என அதிகாரி உறுதியளித்தார்.

"தடை செய்யப்பட வேண்டியவை இன்னும் வேறு பல இருக்கின்றன. சந்திப்போம்" எனக் கூறி விடைபெற்று மக்ரிபுத் தொழுகைக்கு விரைந்தோம்.

கடைசி நேரத்தில்தான் தெரியவந்தது. வந்த அதிகாரி நிஜாமின் காலேஜ்மேட்டாம்.

ஜமீல் M ஸாலிஹ்

அதிரையில் தர்கா கந்துரியும் கோவில் திருவிழாவும் 7

அன்பான வாசக நேசங்களே..

ஒரு சிறிய துவக்கமாக அதிரை பருவகால நிகழ்வுகளை தொகுத்தளிக்கும் முயற்சியில் ஈடுபட்டு வருவதை வாசக நேசங்கள் அறிவீர்கள். கால்பந்தாட்டம் நிகழ்வுகளை உங்கள் யாவரின் பார்வைக்கு கண்ணோட்ட காட்சிகளாய் கொண்டு வரும் முயற்சியில் தொகுப்பு தகவல்கள் உங்களை கவர்ந்திருக்கலாம்.

அதிரையில் நடைப்பெறும் சில பருவகால நிகழ்வுகளை உங்கள் கண்முன்னே கொண்டுவரும் தொடர் முயற்சியே கீழ் கானும் செய்திகள்.

அதிரை மேலத்தெரு மற்றும் கீழத்தெரு சந்திப்பில் இருக்கும் ஹாஜா அலாவுதீன் அப்பா வலியுல்லாஹ் (காட்டுப்பள்ளி) கந்தூரி நிகழ்வும். அதிரை கரையூர் தெரு மாரியம்மன் கோவில் திருவிழா என்ற நிகழ்வும் நடைப்பெற்றது. இதற்காக ஊரின் இரு பகுதிகளிலும் எவ்வித அசம்பாவிதங்கள் நடைப்பெறாமல் இருக்க போலீஸ் பாதுகாப்பும் இருந்தது. இதுவும் முக்கியம் தான் காரணம் இது போன்ற நிகழ்வுகளே சமூக விரோதிகள் தங்களின் குறுக்கு புத்திக்கொண்ட சமூக விரோத செயல்கள் அரங்கேற்றும் பயிற்சி களங்கலாக இருந்திடும். கந்தூரியாகட்டும் திருவிழாவாகட்டும் மக்கள் அதற்கு செல்வது சரியா தவறா என்ற வாதம் ஒரு புறமிருந்தாலும். இவற்றை பயன்படுத்தி சமூக விரோத செயல்கள் அதிரையில் நிகழ்ந்தேறியது முந்தைய காலங்களில் என்பதை யாரும் மறுக்க முடியாது. சரி முக்கிய விசயத்துக்கு வருவோம்...

இரண்டு நாட்களாக மெயின் ரோடு, பேருந்து நிலையம் அருகில் இருக்கும் அல்-அமீன் பள்ளி அருகில் பக்திப்(?) பாட்டும், சினிமா பாட்டு ஒலி பெருக்கி சத்தமே அதிகம் கேட்கிறது. காரணம் கரையூர் தெரு மாரியம்மன் கோவில் திருவிழாவாம். இது எத்தனை நாட்களுக்கு தொடரும் என்று தெரியவில்லை. திரைப்பட பாடகர்களின் வருகை என்பதால் அறிவிப்புகள் அலற வைப்பது போல் இருந்தது. பக்தகோடிகளுக்கு அல்லாமல் பொது மக்களுக்கும் அழைப்பு விடுத்துக் கொண்டே இருந்தார் அறிவிப்பாளர். காரணம் பொதுவான சினிமா பாடகர்கள் மனோ மற்றும் கங்கை அமரன் வருகையே!.

அவ்வழியே கடந்து செல்லும்போது ஒலிபெருக்கியின் சத்தத்திற்கிடையே சிறிது நேரம் கழித்து ஓர் பேச்சாளர் பேச ஆரம்பித்தார். ஓம் நமச்சியவாயம் என்ற சொல்லே உலகின் தலைச்சிறந்த சொல், இது தங்களின் மதத்திற்கு பெருமை சேர்க்கிறது. இந்த சொல்லாலே தங்களின் மதம் உலகிலேயே தலைச்சிறந்த மதமாக திகழ்வதாக கூறினார். ஆச்சரியமான அந்த சொல் எப்படி அவர்களின் மதத்தை உலகின் தலைசிறந்த(?) மதமாக உருவாக்கியது என்பதை அந்த பேச்சாளார் விளக்கிச் சொல்லுவார் என்று எதிர்ப்பாத்து நடை தளர்த்தி காத்திருந்ததால் நம் நேரம் விரையமானதே மிச்சம். கடைசிவரையில் அந்த மனுசன் சொல்லவே இல்லை.

வார கணக்கில் அதிகாலை முதல் நல்லிரவு வரை இப்படி சினிமா பாட்டையும், பக்திப் பாட்டையும் ஒலிபரப்பி அடுத்தவர்களுக்கு இடையூறு தருகிறோம் என்ற ஒரு துளிச் சலனம் கூட இதன் ஏற்பாட்டாளர்களுக்கு இருக்குமா என்பது தெரியவில்லை. இறைவன் தான் இது போன்ற மக்களை நேர்வழி படுத்தனும்.

இதே நிலை தான் காட்டுப்பள்ளி கந்தூரிவிழாவிலும். ஒருவாரமாக காலை முதல் நல்லிரவு வரை E.M. ஹனிபா பாடல்களும் மவ்லூது அரபிக் கவிபாடல்களும் இசைத்துக் கொண்டே இருந்தார்கள். இவைகளின் அர்த்தங்கள் மக்களுக்கு புரிந்ததோ இல்லையோ செவிச் சுவர் கிழியும் சத்தம் மட்டும் அதிரையின் பாதி பகுதிகளில் உள்ள மக்களின் செவிகளை கிழித்துக்கொண்டிருந்தது என்று சொல்லுமளவுக்கு இருந்தது. காட்டுப்பள்ளியில் தொடர் மவ்லுத் ஓதி வரும் ஒரு சகோதரரை சந்தித்து பேச வாய்ப்பு கிடைத்தது. இதன் அர்த்தங்கள் தங்களுக்கு தெரியுமா என்று கேட்டால், அதற்கு அவர் "நல்லதை தானே ஒதுகிறேன் எனக்கு அர்த்தம் தெரியும் வரை இதை ஓதிக்கொண்டிருப்பேன், இங்கு ஓதுனா நார்ஸாவும் காசும் கிடைக்கும்" என்று சொல்லிவிட்டு நகர்ந்துவிட்டார். யா அல்லாஹ் இவர்களுக்கு மார்க்க தெளிவை தந்தருள்வாயாக என்று துஆ செய்ய மட்டுமே முடிந்தது.

நாட்கணக்கில் அதிகாலை முதல் நல்லிரவு வரை இப்படி ஹனீபா பாட்டையும், மவ்லுது பாட்டையும் போட்டு சாதராணமாக மக்களுக்கு தொந்தரவு தருகிறோம் என்ற ஒரு துளி சலனம்கூட இதன் ஏற்பாட்டாளர்களுக்கு இருக்குமா என்பது தெரியவில்லை. அவர்களின் (அகப்)பார்வையில் இச்செயல்கள் நற்செயலாக இருந்தாலும் எவ்வித நற்செயல்(?)களுக்கும் ஒர் அளவு உள்ளது இப்படியா மணிக்கணக்கில் ஒலிப்பெருக்கி ஒசையில் அடுத்தவர் காதுகிழிய இசைப்பது?

நிறைவாக ! இந்த வருடம் கந்தூரி நடத்துவதை நிறுத்தும் முயற்சியில் அதிரையில் உள்ள மார்க்க அறிஞர்கள் (!!) முயற்சி செய்தார்கள் அது தோல்வியில் முடிந்தது காரணம். கந்தூரியை ஷரீயத் முறையில் நடத்த அனுமதி (!!!) அளிப்பதாக ஊரில் உள்ள ஒரு பெரிய ஆலிம் சொல்லிவிட்டார்களாம். வழக்கம் போல் எந்த மாற்றமும் இல்லாமல் நடத்தது காட்டுப்பள்ளி கந்தூரி. அட ! இதுதான் ஷரீயத் முறைப்படி நடைப்பெறும் கந்தூரியா ???

இந்த வருடம் கந்தூரி கூ(ட்)டு இரவை முன்னிட்டு அதிரையில் உள்ள அநேக ரொஸ்டொரன்டுகளில் ஸ்பெஷல் கொத்துரொட்டி /கொத்துப்பரோட்டா போடப்பட்டு விற்பனை செய்யப்பட்டது. காட்டுப்பள்ளி முதல் போஸ்டாபிஸ் வரை கிட்டத்தட்ட 10 கடைகளுக்கு மேல் கொத்துப் புரோட்டா போடும் கொத்துச் சத்தம், கரையூர் தெரு கோவில் திருவிழா ஒலிபெருக்கி சத்தத்தைவிட அதிகமாகவே இருந்தது. ஒரு சில வீடுகளில் நேற்று முன்தின இரவில் இரண்டு வகை சாப்பாடுகள் 1) கந்தூரி சாப்பாடு (கொத்துப் புராட்டா) 2) non கந்தூரி சாப்பாடு.

ஒரு (மார்க்க) கேள்வி(தாங்க) ! ஷிர்க்கை மூலதனமாக கொண்ட கந்தூரி விழாவை முன்னிட்டு ஸ்பெஷலாக கந்தூரிக்கென்று பெயரிட்டு செய்யப்பட்ட உணவை காசு கொடுத்து வாங்கி சாப்பிடுவது கூடுமா? கூடாதா?

மீண்டும் மற்றொரு சொல்லத் தூண்டும் அதிரை நிகழ்வுகளோடு சந்திக்கலாம்.

-அதிரைநிருபர் குழு.