குறிக்கோள் + நம்பிக்கை + முயற்சி = வெற்றி 1

அல்லாஹ்வின் திருப்பெயரால்...

அஸ்ஸலாமு அலைக்கும் (வரஹ்),

அன்பான அதிரைநிருபர் வாசகர்களே…

வாழ்க்கையில் முயற்சி, நம்பிக்கை, குறிக்கோள் இந்த மூன்று வார்த்தைகளில் உள்ள முக்கியத்துவத்தை பற்றி கொஞ்சம் அலசிப்பார்போம். நாம் சிறு வயதில் பள்ளியில் படிக்கும் காலத்தில் இருந்தே இந்த வார்த்தைகளை நம் வாத்தியார் / பெற்றோர் / உற்றார் சொல்ல கேட்டிருப்போம். ஆனால் எத்தனை பேர் கடைபிடித்தோம்? எத்தனை பேர் இவர்களுக்கு வேற எந்த வேலையும் கிடையாது என்று ஏளனம் பேசியிருப்போம் என்று நம் மனசாட்சியை கேட்டால் புரியும். ஆனாலும் வாழ்வில் ஏதாவது ஒரு தருணத்தில் இதை நிச்சயம் உணர்ந்து இருப்போம்.

குறிக்கோள்

இது ரொம்ப கஷ்டம், ஆனால் முதல் தடைவை மட்டும்தான். கூகிள் குதிரையில் ஒரு வார்த்தையை தட்டிவிட்டால் அது வேறு எதையும் தேடாது அந்த வார்த்தைகள் உள்ள இடங்களை மட்டும் அள்ளி கொண்டு வந்து தரும் அதுதான் கூகிளின் வெற்றி. அது மாதிரிதான் நம் குறிக்கோளும் இருக்க வேண்டும். நம் அடைய முடிய குறிக்கோள்களை ஏற்படுத்திக்கொண்டு (புர்ஜ் கலிஃபாவில் ஃபளாட் வாங்குவது என்பது நல்ல குறிகோள்தான். ஆனால் நிறைவேற்றுவது சிரமம்) அதை நோக்கி பயணிப்பது. வெற்றி என்ற பறவைக்கு வலை விரித்து விட்டோம் என்றுதான் பொருள்.

நம்மவர்கள் சில பேர் குறிக்கோள் இல்லாமல் மெயின் ரோட்டில் போய் சாமான் வாங்கலாம் என்று கிளம்பி, கடைத்தெருவுக்கு சென்று பின்னர் பட்டுக்கோட்டைக்கே சென்று பஸ் செலவை தெண்டத்துக்கு செலவு செய்துவிட்டு வருவார்கள் + போனஸாக உடம்பு வலியையும் அலைச்சலையும் சேர்த்து வாங்கி வருவார்கள். அந்த சாமான் நம்மூரில் கிடைக்கும் அதே விலைக்கு என்பது வேறு விசயம், இவர்கள் முயற்சி செய்து இருக்கிறார்கள் ஆனால் குறிக்கோள் இல்லா முயற்சி.

நம்பிக்கை

நம்பிக்கை என்பது தும்பிக்கை போல் வலுவாக இருக்க வேண்டும். நான் யாருக்கும் சளைத்தவனல்ல, அடுத்தவர் செய்யக்கூடியதை உருவாக்க கூடியதை நாமும் செய்ய முடியும் உருவாக்க முடியும் என்ற நம்பிக்கை வேண்டும்.

நம்பிக்கை என்றவுடன் எதோ குருட்டுதனமாக வைப்பது அல்ல. நம்மூரில் ”பூனை நபுசு” என்பார்கள் அந்த மாதிரி எண்ணங்களெல்லாம் வெற்றிக்கு உதவாது, அது வாழ்வை வெறுமையாக்கி விடும். சில பேர் கழிவறைக்கு போய்விட்டு வந்து அந்த கையை விரல் ரேகைகலெல்லாம் போகும் அளவிற்கு தேய்த்து தேய்த்து கழுவி கடைசிலேயும் அது இன்னு சுத்தமாகல என்ற அவ நம்பிக்கையுடன் போய்விடுவார்கள். இவர்களை “ஒசுவாசு” என்றும் அழைப்பதுண்டு, இந்த மாதிரி நம்பிகையற்ற ஆள்கள் ஜொலித்தாக எந்த நாட்டுல உள்ள டேட்டா பேஸ்லையும் இல்லை, கூகில் தேடலில் பார்த்தாலும் கிடைப்பது இல்லை.

வீட்டை பூட்டிவிட்டு “பூட்டிடுச்சா பூட்டிடுச்சா “ என்று தன்மேல் இல்லாவிட்டாலும் பூட்டு மேலயாவது நம்பிக்கை வைக்காமல் போன எத்தனையோ பூட்டான்களை (அதாங்க பூட்டை இழுத்து இழுத்து உடைத்த ஆட்கள்) நாம் பார்த்திருக்கிறோம்.

நாம் செய்யக்கூடிய ஒவ்வொரு செயலிலும் நம்பிக்கை வைக்க வேண்டும். வாழ்க்கையை நம்பிக்கை என்ற இயக்கியை (processor) கொண்டே ஒடிகொண்டு இருக்கிறது. ஒவ்வொரு செயலையும் செய்யும் போது தூய எண்ணத்துடன், முடிந்த அளவு நேர்த்தியாக செய்து விட்டு “ நம்பிக்கையுடன் அமருங்கள் வெற்றி உங்களை எட்டி பார்க்கும். நமது மார்க்கமே நம்பிக்கையின் அடிப்படையில் அமைந்ததுதான்.

முயற்சி

ஒரு முயற்சி செய்து அதன் மேல் நம்பிக்கை வைத்து (இறை நம்பிக்கையுடன் தான், அவனின்றி அணுவும் அசையாது), அடையக்கூடிய குறிக்கோளுடன் (அனில் அம்பானி போல வர வேண்டும் என்பது டூ மச் ) உழைத்தால் “வெற்றி” படுக்கை விரித்து போட்டு நாம் பக்கத்திலேயே படுத்துக்கொள்ளும்.

ஒரு மார்க்க சிறப்பு மிக்க ஊரில் ஒரு நல்ல முஸ்லிம் இருந்தார். அவர் எப்பொழுதும் இறைவன் தருவான்.. இறைவன் தருவான்… என்று சொல்லி கொண்டே இருப்பார். அவரிடம் சிலர் வந்து முயற்சி செய்யாமல் இப்படியே சொல்லிக்கொண்டு இருக்கீங்களே… இதை நிரூபித்துக் காட்டுங்கள் என்று கேட்டுக் கொண்டனர், ஒத்துக்கொண்ட அவரும் “நாளை நமதூர் பள்ளியில் ஒரு விசேசத்திற்காக சோறு ஆக்கி அனைவருக்கும் குடுப்பாங்க, நான் பள்ளிக்கு எதிரில் சும்மா உட்கார்ந்து இருப்பேன், அவர்கள் என் அருகில் வந்து உணவை தருவார்கள்“ என்றார். அந்த சிலரும் அதை ஏற்றுக்கொண்டு இடத்தை விட்டு அகன்றார்கள்…

மறுநாள் உணவு சமைக்கப்பட்டு அங்கு குவிந்த அனைவருக்கும் பரிமாறப்பட்டது. அனைவரும் வந்து வாங்கி சென்றனர். இவரை கவனித்தார்கள் ஆனால் கொடுக்கவில்லை, உணவெல்லாம் முடிந்து விட்டது.

அப்போது அந்த நல்ல முஸ்லீம், அருகில் சென்ற உணவு பரிமாறிய ஒருவரிடம் கேட்டார். “நான் பள்ளிக்கு எதிரில்தானே அமர்ந்து இருந்தேன் ஏன் எனக்கு உணவு தரவில்லை “ என்று

அதற்கு உணவு பரிமாரியவர் “ஓ !!! அப்படியா நீங்க மற்றவர்கள் போல வந்து உணவை வாங்கவில்லையே, நீங்க நோன்பு வச்சிருக்கீங்கலோ என்று எண்ணி எதுக்கு இந்த உணவை கொடுத்து பாவத்தை விலைக்கு வாங்கணும் என்று இருந்தோம்“ என்று பதில் அளித்தார்.

நம்பிக்கை வைத்திருந்த அந்த மனுசன் முயற்சி செய்யவில்லை. முயற்சி செய்வதற்கு முயலாவிட்டால் என்றும் எதுவும் கிடைக்காது, இறைவனும் உதவ மாட்டான். நமக்கு உறுப்புக்களை இறைவன் கொடுத்ததே முயற்சி எடுத்து முன்னேறத்தானே.

கண்டுப்பிடிப்பாளர்கள் முயற்சி செய்திருக்காவிட்டால் இன்று நாம் பயன்படுத்தும் எந்த பொருளும் நம்மிடம் வந்து இருக்காது. நம்பிக்கை இல்லாவிட்டால் எந்த ஒரு முயற்சியிலேயும் நாம் வெற்றி பெற்று இருக்க முடியாது. குறிக்கோளுடன் நம்பிக்கைவைத்து, முயற்சி செய்யாமல் இருந்திருந்தால் அதிரை கல்வி விழிப்புணர்வு மாநாடு நடந்தேறி இருக்காது.

ஏன் நம் தாய்மொழி தமிழை எளிதில் தட்டச்சு செய்வதற்கும், இணையத்தில் தமிழ் வெகுவாக வளர்வதற்கும், நம்மைப் போன்றவர்களுக்கு இலவசமாக அறிமுகப்படுத்தி பேருதவி செய்ததில் முதன்மையானவர்களாக இருந்தவர்களில் ஒருவர்தான் நம்மூரில் பிறந்தவர், தேனீ ஒருங்குறி எழுத்துரு தந்தவர் மர்ஹூம் உமர்தம்பி அவர்கள். அவர்களிடம் குறிக்கோள், நம்பிக்கை, முயற்சி இருந்ததால், அன்று தேனீ, வைகை என்ற தானியங்கி எழுத்துருக்களை (dynamic fonts) உருவாக்கி தமிழ் இணைய உலகில் ஒரு மாபெரும் புரட்சி செய்ததால்தான், அன்று அவர்கள் போட்ட விதையால் கடந்த 10 வருடத்திற்கும் மேலாக தாய்மொழி தமிழ் இணையத்தில் அளவிட முடியாத வளர்ச்சியடைந்துள்ளது என்பதை யாராலும் மறுக்க முடியாது. தமிழை இணையத்தில் பார்த்து, படித்து, ரசித்து, நல்லவற்றின் மூலம் பயனடைந்து வருகிறோம். மர்ஹூம் உமர்தம்பி அவர்கள் மற்ற தமிழார்வளர்களுடன் சேர்ந்து முதன் முதலில் உருவாக்கிய தமிழா ஏகலப்பை (Ekalappai) மென்பொருள்கள் (software) மூலம் இன்று நாம் தாய்மொழி தமிழை தட்டச்சில் தட்டித் தட்டி இணையத்தில் உலகெங்கும் பரவசெய்துக் கொண்டிருக்கிறோம்.

கூகில் தேடலில் “உமர்தம்பி” என்று தமிழில் தேடிப்பாருங்கள் அவர் குறிக்கோள்யுள்ளவர் + நம்பிக்கையுள்ளவர் + கடின முயற்சி செய்தவர் = வெற்றிப்பெற்றவர் என்று எல்லோருக்கும் புரியும். உலகத்தமிழ் செம்மொழி மாநாட்டில் உமர்தம்பி அரங்கம் என்று ஓர் அரங்கம் அமைத்து மற்றும் "தமிழ் இணைய அறிஞர்" என்ற விருதினையும் அளித்து நம் அதிரை உமர்தம்பி அவர்களின் வெற்றிக்கு அங்கீகாரம் தந்தார்கள் இணையத்தமிழ் ஆர்வலர்கள் என்பது உலகறிந்ததே.

ஆகையால் வாழ்க்கையில் முடிந்தவரை குறிக்கோள்,முயற்சி, நம்பிக்கை இந்த மூன்றையும் பேணுவோம். வெற்றிபெருவோம் நம் குழந்தைகளுக்கும் புகட்டுவோம். இன்ஷா அல்லாஹ்.

இக்கட்டுரையில் இன்னும் நிறைய எழுதலாம் நேரம் இல்லாததால் புள்ளி வைத்து நகர்கிறேன். யாரவது கண்டினிவ் பண்ணுங்களேன்… தொடரட்டும்…

முஹமது யாசிர்
இது ஒரு மீள்பதிவு

யார் அங்கே ? எங்கே போனார்கள்? - தேடல் - 4 14

ச்சன்டிகார்...

“தொடர்ச்சியானப் பனிப்பொழிவு காரணமாக இன்றும் போக்கு வரத்து கடுமையாகப் பாதிக்கப்பட்டிருக்கிறது. சில விமான சேவைகள் ரத்து செய்யப்பட்டுள்ளன. பல விமான சேவைகளின் நேரங்கள் மாற்றியமைக்கப் பட்டுள்ளன.  இந்தப் பனிப்பொழிவுக்கு இதுவரை 3 பேர் பலியாகியுள்ளனர்” 

அந்தத் தொலைக்காட்சிச் செய்தி எனக்கு கவலை அளித்தது.  “உங்க பாஸுக்கு ஃபோன் பண்ணி இன்னிக்குப் போக முடியாதுன்னு சொல்லிடுங்க” என்று மனைவியும் பிள்ளைகளும் தடுத்ததால் ஹெச் ஆருக்கு ஃபோன்  பண்ணி காரணத்தைச் சொல்லி “பயணத்தைத் தள்ளிப் போட முடியுமா?” என்று கேட்க, அவர் எம் டி ஐக் கேட்டுச் சொல்வதாகச் சொல்ல, காத்திருந்த அந்த நேரத்தில் சீக்கிரமாக நடப்பைச் சொல்லி விடுகிறேன்.

ஷார்ஜாவில் உள்ள எங்கள் நிறுவனத்திற்காக வேலைக்கு ஆட்கள் எடுப்பதற்காக ச்சன்டிகாரில் உள்ள ஒரு ரெக்ர்யூட்மென்ட் ஏஜென்ஸியிடமிருந்து பயோடேட்டாக்கள் பெறப்பட்டு அவற்றிலிருந்து 40 பேர்களை தெரிந்தெடுத்து (ஷார்ட் லிஸ்ட்) நேர்முகத் தேர்வுக்காக நான் அடுத்த நாள் ச்சன்டிகாரில் இருக்க வேண்டும்.  எல்லா ஏற்பாடுகளும் செய்யப்பட்டுவிட்ட நிலையில்தான் டெல்லி மற்றும் ச்சன்டிகாரில் பனிப்பொழிவு தீவிரமடைந்து விமானப் போக்குவரத்து பாதிக்கப்பட்டிருந்தது.

சற்று நேரத்தில் அலைபேசியில் அழைத்த ஹெச் ஆர்., நேர்முகத்தேர்வை ஒத்திப்போட இயலாததற்கானக் காரணங்களை விளக்கி நான் போயே ஆக வேண்டிய நிர்பந்தத்தை எடுத்துச் சொன்னான்.  வேறு வழியின்றி புறப்படலானேன்.

அன்றிரவு ஏர் இன்டியா எக்ஸ்ப்ரெஸ்ஸில் துபையிலிருந்து கிளம்பி மறுநான் அதிகாலை டெல்லி விமான நிலையத்தில் இறங்கியதும் எதிர்பார்த்த அதிர்ச்சி எந்த மாற்றமுமின்றி காத்திருந்தது.  அதாவது, சன்டிகார் செல்லும் விமானச்சேவைகள் அத்தனையும் ரத்து செய்யப்பட்டிருந்தன. டெல்லி விமான நிலையத்திலிருந்து ச்சன்டிகாருக்கு ட்ரான்ஸிட் ஏற்பாடு செய்திருந்ததால் டெல்லியில் என்னை வரவேற்க யாரையும் ஏற்பாடு செய்திருக்கவில்லை.  எனவே, அந்த அதிகாலை 3 மணிக்கு செய்வதறியாது தனித்து விடப்பட்டேன்.  இந்த இடத்தில் “தொடரும்” போடுமளவுக்கு அடுத்தது என்ன என்பதில் குழப்பமும் சற்று அச்சமும் நிலவியது.  ஏற்கனவே ஒரு முறை தாஜ்மஹால் பார்ப்பதற்காக ஆக்ரா செல்ல டெல்லி வந்திருந்தாலும் விமான நிலையத்திலிருந்து வெளியே வந்து பார்த்ததும் பயம் கவ்விக் கொண்டது.

நான் மேகப் பொதிகளுக்குள் தனித்து விடப்பட்டதுபோலவும் என்னைச் சுற்றி எந்த சீவராசியும் இல்லாதது போலவும் பணிப்பொழிவு அடர்த்தியாக நிகழ்ந்து கொண்டிருந்தது.  “சர் ஜி கஹான் ஜானா?” என்னும் குரல் மிக அருகில் கேட்டதால் திரும்பிப் பார்த்தேன்.  போர்வை போத்திக்கொண்டு வாயைச் சுற்றி ஊசியிலைக்காடுகளைப் போல மீசை தாடிகளால் ‘வைக்கோல் போரோ’ என்று எண்ணுமளவுக்கு உரோம அடர்த்தியோடும் தலையில் டர்பனோடும் ஒரு சர்தார்ஜி நின்று கொண்டிருந்தது மங்கலாகக் தெரிந்தது. “முஜேத்தோ ச்சன்டிகர் ஜானா ஹே பையா” என்றேன்.  “னா ஜா பாயகா. மோசம் கராப் ஹே. சுபே நவ் பஜேகே பாத் காடி பக்கட்கர் ஜாயியே” என்று சொன்னது தமிழில் சுருக்கமாக “மாட்டிக்கினியா?” என்று காதில் விழுந்தது. தொடர்ந்து “ஏம்ப்பா இங்கே அதுவரை தங்குவதற்கு அருகில் ஹோட்டல் உண்டா” என்று நான் ஹிந்தியில் புலம்ப அவர் 5  கிமீட்டருக்குள் ஒரு ‘அச்சா’ ஹோட்டல் இருப்பதாகச் சொல்லி அவர் வண்டியை நோக்கி என்னை அழைத்துச் சென்றார்.  அந்த காலச்சூழலுக்கும் அவர் அழைத்துச் சென்ற தோரணைக்கும் எனக்கென்னவோ நான் கடத்திச் செல்லப்படுவதுபோலவே உணர்ந்தேன்.  தோதாக, ஏர்ப்போர்டை விட்டு ஏறத்தாழ 500 மீட்டர் வரை நடந்தே அழைத்துச் சென்றவரிடம் “காடி கிதர் ஹே பாய்?’ என்று மூன்று முறை கேட்ட போதும் “இதரி ஹே” என்று இழுத்துச் சென்றவர் ஒரு வழியாக கார் என்று காட்டியது குட்டியானையைப் போன்ற ஒரு கச்சடா வாகனம்.

வேறு வழியில்லாமல் ஏறி அமர, காரை ஸ்டார்ட் செய்ததும் எஞ்சின் இயங்குவதற்கு முன்பே கார் ஸ்டீரியோ இயங்கத் துவங்கியது.  பல்லே பல்லே என்று துவங்கிய அந்த பாங்க்டா பாடல் நான் என் பயணத்தை முடிக்கும்வரை ஓயாது என்பது அப்போது எனக்குத் தெரியாது.  

அந்த த்ரில்லர் பயணம் துவங்கியது.  5 கிமீட்டரைக் கடக்கும் வரை நான் உயிரைக் கையில் பிடித்துக் கொண்டிருந்தேன்.  காரணம், எதிரே சாலையோ வேறு வாகனங்களோ எதுவுமே கண்களுக்குத் தெரியாத அளவுக்கும் பணிப் பொழிவு.  இவர் வாகனத்தை ஞாயமான வேகத்தோடு செலுத்த நான் அரண்டு போய், “என்னய்யா எதிரே ஒன்னுமே தெரியலையே. இப்டி வேகமா ஒட்றே?” என்றதற்கு, “நான்லாம் இங்கேயே பிறந்து வளர்ந்து வருபவன் ஜி. என் கண்களைக் கட்டிவிட்டு ஓட்டச் சொன்னாலும் ‘கரீட்டா’ ஓட்டிடுவேன்.” என்று பீத்திக் கொண்டவரிடம், ‘அதுசரி உனக்கு முன்னால் திடீர்னு ஒரு வாகனம் தோன்றினால் என்ன செய்வாய்?” என்று நான் ச்செக் வைக்க, அவர் சொன்ன பதில் வாழ்க்கையின் எதார்த்தத்தை எனக்கு உணர்த்தியது. “மோதிட வேண்டியதுதான். வேறென்ன செய்ய முடியும்?”.

ஒருவழியாக ஹோட்டலை அடைந்து, விடிந்ததும் 9 மணிக்கு ச்சன்டிகார் செல்ல தனி வாகனமொன்று அமர்த்தித் தருமாறு கேட்டுக்கொண்டு படுக்கையில் விழுந்த போது நிசப்தமாக இருந்தாலும் அந்த பல்லே பல்லே மட்டும் எங்கிருந்தோ ஒலித்துக் கொண்டுதான் இருந்தது.

காலையில் ஒன்பது மணியைப்போல், பாங்டாவுக்கு வந்து வாடகை மற்றும் வாகனத்திற்கான பாங்டாவை செலுத்திவிட்டு பாங்டாவில் உட்கார்ந்து பாங்டாவை ஸ்டார்ட் செய்து பாங்டா நோக்கி பயணிக்கத் துவங்கினேன். உள்ளே பல்லே பல்லே என்னும் ஒரே ராகத்தில் வித்தியாசமான ட்டெம்போவோடு பாங்டா பாடல்கள் ஒலித்துக் கொண்டே இருந்தன.  நம்மூர் மாதிரி (ட்விட்டர் வச்சி, ச்சில்லு ஏத்தியிருக்கேன் காக்கா) ட்ரெபிள் கூட்டி பேஸ் குறைத்து சாகடிக்க, “ பாய் ஸாப், கானா பந்த் னஹி கரோகே?” என்றதற்கு,”நீந்து ஆஜாயகா பாய்” என்றதும் பயந்து பொத்திக்கிட்டு உட்கார்ந்தேன், பாட்டை நிறுத்தினால் தூங்கிடுவானாம்ல!  6 மணி நேரப் பயணத்திற்குப் பிறகு ச்சன்டிகார் சமீபித்தது.

இன்ட்டரிவிவ் ஏற்பாடு செய்யப்பட்டிருந்த ஹோட்டலை அனுகியதும் ஏற்பாட்டாளர் வந்து கார் கதவைத் திறந்து விட்டதும் குசல விசாரிப்புகளும் எனக்கு என்னை ஒரு தேர்தல் காலத்து வாக்காளன்போல காண்பித்தது.  எதிர்பார்த்தபடி யாவரும் வந்திருந்ததால் ஒரே ஒரு காஃபியோடு நேர்காணலைத் துவங்கினேன்.  அறைக்குள் நான் மட்டுமே என் மடிக்கணினியோடு இருக்க உள்ளே வந்தவர்கள் வந்ததும் நேராக என் காலைத் தொட்டு வணங்க, நான் அதை கடுமையாக மறுத்து, உள்ளே வருமுன் ஒவ்வொருவரிடமும் காலைத் தொடக்கூடாது என்று சொல்லியே அனுப்பச் சொன்னேன்.

இன்டர்விவ் களேபரங்கள் எல்லாம் உங்களுக்குத் தேவையில்லாதது. இன்னொரு பதிவு எழுதுமளவுக்கு சுவாரஸ்யமான சம்பவங்கள் நடந்தேறின என்றாலும் 14 ஆட்களைத் தெரிந்தெடுத்து விட்டு இரவு 9 மணிக்கு வேலை முடிய ச்சன்டிகாரிலேயே தங்கி, இரவுச் சாப்பாட்டை ஒரு பிடி பிடித்துவிட்டு நன்றாக உறங்கி மறுநாள் காலை, அதே பணிப்பொழிவு காரணமாக காரிலேயே டெல்லி வந்து, விமானம் பிடித்து ஷார்ஜா வந்த பிறகும் இரண்டு மூன்று நாட்களுக்கு “பல்லே பல்லே” என் காதில் ரீங்காரமிட்டுக்கொண்டே இருந்தது. 

திரும்பி வந்த பிறகுதான் தெரிய வந்தது, ச்சன்டிகாருக்கு இந்தப் பக்கம் 2-3 மணி நேர பயண தொலைவில் குலுமனாலியும் அந்தப் பக்கம் 2-3 மணி நேர பயண தொலைவில் சிம்லாவும் இருப்பதாகவும் சீஸன் வேறு கலை கட்டியிருப்பதாகவும்.  அடச்சே, சரியாகப் ப்ளான் பண்ணாமப் போயிட்டமே.  மேலும் இரண்டு நாட்கள் இருந்து இரண்டு பணிப் பிரதேசங்களையும் கன்டு வந்திருக்கலாமே என்று  அங்கலாய்த்துக்கொண்டேன்.  இதுக்குத்தான் சொல்றாங்க, “எதையும் ப்ளான் பண்ணித்தான் பண்ணனும்; ப்ளான் பண்ணாம எதையுமே பண்ணக்க்கூடாது”என்று.

முஹம்மது யாசிர் எழுதியதல்ல

நானும் ஆஃப்ரிக்காவும் - நிறைவுறுகிறது ! 44

மீண்டும் தாமதம், என்ன யாசிர் நீங்க தொடர் முடிப்பதற்குள் நாங்கள் ஆஃப்ரிக்காவையே ஒரு எட்டுபோய் பார்த்திட்டு வந்திடுவோமே என்று பலர் முணுமுணுப்பது காதில் அ(றை)ரையும் குறையுமாக விழுகின்றது,சிலர் பார்த்துவிட்டே வந்திருக்கலாம் நானும் இரண்டு நாடுகளுகு போய்விட்டு வந்துட்டேன்

கடந்த தொடரின் கடைசியில் காட்டிய பட மேட்டருக்கு வருவோம் என்ன மறந்துட்டீங்களா ??

இந்தபடம்தான் அது

தாயின் காலடியில்தான் சொர்க்கம் உண்டு என்று சொன்னது இஸ்லாம். தாயின் அன்பு சுயநலமில்லாதது,தன் குழந்தைகளின் நலம் விரும்புவது,அந்த பாசத்திற்கு எடுத்துக் காட்டுவதுபோல் மேலே உள்ள படத்தில் நீங்கள் காண்பது எத்தியோப்பியர்களின் பாரம்பரிய வீடுகளில் சாப்பிடும் தட்டுகள். இதைப்போல் வயது வாரியாக,வரிசையாக அடுக்கி வைக்கப்பட்டிருக்கும், குழந்தைகள் தங்களுக்கு சாப்பாடுத் தேவைப்படும்போது அவர்களுடைய தட்டை எடுத்துக் கொண்டு அமர வேண்டும்,அதனைக் காணும் தாய் அத்தட்டில் உணவு பரிமாறி மகிழ்வாள். அவர்கள் பெரியவர்களாகி பல இடங்களுக்குச் சென்று பொருள் சேர்த்து, வருடத்தில் ஒரு நாள் ஒன்றுகூட வேண்டும் என்பது அம்மக்களின் மரபு, அப்பொழுதும் அந்த பெரிய குழந்தைகள் தட்டுகளை எடுத்துக்கொண்டு அமர வேண்டும். எல்லாத் தட்டுகளும் தரையில் இருந்தால் தாய் எல்லையில்லா மகிழ்ச்சியடைவாள். அதில் ஒன்று தரையில் இறக்கபடாமல் இருந்தால் அவள் அதிகமான கவலையில் மூழ்குவாள். அத்தட்டுக்குரியவர் ஏதாவது காரணத்தால் வராமல் இருக்கலாம் அல்லது இவ்வுலகைவிட்டே சென்று இருக்கலாம், தாய் அன்பிற்கு நிகர் எதுவுமே உலகிலில்லை.

அடுத்த நாள் என்னுடைய கஸ்டமர் “வாங்க” அடிஸ் அபாபாவை ஒரு சுற்று சுற்றி விட்டு வரலாம் என்று கூற நானும் கிளம்பினேன்..பல புராதன இடங்கள்,வரலாற்று வாழ்விடங்கள், அழிந்தும் அழியாமலும் இருக்கும் நினைவுச்சின்னங்கள் என்று பட இடங்கள் சுற்றிக் காட்டப்பட்டாலும் ஹஜ்ரத் பிலால்(ரலி) அவர்கள் பெயருடைய பள்ளியை அவர்கள் பிறந்த ஊரிலயே காணும்போது உடல் மெதுவாக சிலிர்க்கத்தான் செய்தது.

மேகங்கள் புடைசூழ,கார்கள் அணிவகுக்க கம்பீரமாக நடந்துவரும் எத்தியோப்பியன்

கண்ணியத்திற்குரிய ஹஜ்ரத் பிலால் அவர்களின் பெயரில் உள்ள பள்ளி.

அடிஸ் சபாபாவின் ஆர்தொடக்ஸ் சர்ச்(கத்தோலிக்க கிருஸ்டியன்கள் விரல்விட்டு எண்ணக்கூடிய தொகையே).

வளர்ந்து வரும் இஸ்லாம் பெருகிவரும் பள்ளிகள்.

நாட்டின் பார்லிமென்ட், கண்ணுக்கு தெரிகின்றதா ? 

இத்தாலி ஆக்கிரமிப்பாளர்களை விரட்டியடித்த தியாகிகளின் நினைவு சதுரம் (ஆஃப்கானில் விரட்டி அடிக்கப்பட்டால் அது “தீவிரவாதம்”)

என்ன எத்தியோப்பியாவைச் சுற்றி பார்த்தாச்சா !!!

இவ்வுலகில் இறைவனால் செல்வத்தால் சிறப்பாக்கிவைக்கபட்டவர்களில் எத்தியோப்பியவைச்சேர்ந்த சேக் முகம்மதுவும் ஒருவர் ( Mohammed Hussein Al Amoudi),எத்தியோப்பியா / சவூதி என்று இரட்டைக்குடியுரிமை பெற்ற இவரின் ஷெரட்டான் ஹோட்டல் ஆஃப்பிரிக்காவிலயே மிகப்பெரிய ஹோட்டல். அதன் அழகும், அமையப் பெற்றிருக்கும் லோகேஷனும் ஒரு நிமிடம் திக்கு முக்காட வைத்தது என்றே சொல்லவேண்டும் (அல்லாஹ் காப்பாற்ற வேண்டும் )சில மனிதர்கள் அதனையே சொர்க்கம் என்று நினைத்து வாழ்ந்துகொண்டிருக்கின்றார்கள் அவர் பல நல்ல காரியங்களை நாட்டிற்கும் ,மார்க்கத்திற்கும் செய்து கொண்டிருப்பதாகக் கேள்விப்பட்டேன்.

மழை மேகங்கள் இருட்டிக்கொண்டு வந்தாலும்,நாங்க எங்கள் பயணத்தைச் சுருட்டிக்கொண்டு வர தயாரில்லை,அடு்த்து அனைத்து ஆஃப்ரிக்க நாடுகளும் ஒன்று கூடும் ஆஃப்ரிக்க யூனியனைக் காணவேண்டி சென்றோம், அந்த பில்டிங்கை போட்டோ எடுத்தவுடன் பில்ட் பாடியுடன் வந்த இரண்டு செக்யூரிட்டிகள் இக்கட்டிடத்தை புகைப்படம் எடுக்க அனுமதியில்லை எடுத்ததை அழித்துவிடுங்கள் என்றனர்…நாங்கள் எடுக்கவே இல்லை எங்க அழிப்பது என்று கூறிவிட்டு காரை தள்ளிக்கொண்டு கிளம்பினோம்…ஆமாம் துபாயில் 130KMH ஓட்டிவிட்டு அங்கே 50 KMH ஓட்டுவது என்பது தள்ளிக்கொண்டு போவதற்கு  சமமாகத்தான் இருந்தது

ஆஃபிரிக்காவை தாழ்வு  நிலையில் வைத்துவிட்டு தான் நிமிர்ந்து நிற்கும் ஐ.நா-வின் ஆஃபிரிக்க யூனியன் கட்டிடம்

எத்தியோப்பியாவின் மிகப்பழமையான மார்க்கெட் “மெர்க்காட்டோ (Mercato)” மால் 200 வருட பாரம்பரியமிக்க அந்த மார்க்கெட்டுக்கு சென்றால் எல்லாவற்றையும் வாங்கிவிடலாம் (வாப்பா/உம்மாவைத்தவிர என்று துபாய் ஆட்கள் சிட்டி சென்டரைப் பற்றி முன்னர் சொல்லுவார்கள் ). அல்ஹம்துலில்லாஹ் அந்த மார்க்கெட் இயக்கத்தைக் கட்டுபடுத்துபவர்கள் முஸ்லிம்கள்தான் என்றதும் மனதில் எத்தியோப்பிய குளிர்க்காற்றின் சுகம் முழுவதுமாக உடம்பெங்கும் பரவியது

கம்பீரமாக காட்சி தரும் மெர்க்காட்டோ மார்க்கெட் பள்ளி

அப்புறம் சகோதரர் மாலிக்கிற்காக… சில பிஸினஸ் குறிப்புகள்

90 மில்லியன் மக்கள் தொகையுள்ள நாடு…மிகப்பெரிய கன்னி மார்க்கட்

சொந்த நாட்டில் தயாரித்து அல்லது அசெம்பிள் செய்து விற்கப்படும் பொருள்களுக்கு அரசு ஆதரவும்,வரிச்சலுகைகளும் உண்டு

வளர்ந்து வரும் துறை என்றால், கணினி(மென்பொருள்/வன்பொருள்) / கட்டுமான சம்பந்தமான தொழில்கள்/ கனரக வாகனங்கள் / ஜெனரேட்டர்கள்/ஆடைகள் அதன் மூலப்பொருட்கள்

நீங்கள் ஏற்றுமதி செய்வதாக இருந்தால் முதலில்  ஒவ்வொரு பொருட்களுக்கும் விதிக்கப்படும் வரிகளின் தகவல்களை பெறவேண்டும் சில பொருட்கள் 100% வரிகளுக்குட்பட்டவை.பொதுவாக அனைத்துப் பொருட்களுக்கும் 35 முதல் 45% வரிகள் உண்டு

HS code எனப்படும் பொருட்களின் கஸ்டம்ஸ் எண் குறியீடு உலகின் டாப் பிராண்ட்களின் குறியீட்டையே அவர்கள் முட்டாள்தனமாக பயன்படுத்துவதால் நீங்கள் ஒரு 3 டாலர் வெப் கேமை எடுத்து சென்றாலும் 1000டாலர் மதிப்புள்ள சோனிக்கு கேமராவிற்கு நிகரான வரி செலுத்த வேண்டி வரும்

அலுவலக செட்டப் அந்த நாட்டின் குடிமகனோடுதான் செய்யவேண்டும் அந்த”குடி”மகனை கொஞ்சம் நாள் கழித்து ஓரம் கட்டிவிடலாம்

நான் பயணத்தை முடித்துகொண்டு கிளம்பும்போது, வழியனுப்ப வந்த மேகங்கள்

போர்டு சாய்ந்து இருந்தாலும், அந்தநாட்டின் மக்களின் மனதில் நிமிர்ந்த நடைபோடும் இந்தியா(ர்கள்)

வீட்டிற்கு போக காந்திருந்த நேரம்…எமிரேட்ஸ்..இதன் டேஸ்ட்டே தனிதான்

வளங்கள் பல இருந்தும் வறுமையாக வாழும் நிலைக்கு தள்ளப்பட்ட ஆஃபிரிக்கா கண்டம்தான் இன்றைய வியாபார உலகிற்கு விடிவெள்ளியாக திகழ்கின்றது.பல முன்னேறிய மார்க்கெட்டுகள் தன்னிறைவு அடைந்துவிட்டது. அங்குள்ள பயன்பாட்டாளர்களும் முதிர்ச்சி அடைந்து விட்டார்கள். ஆனால் கன்னித் தன்மை மாறாத ஆஃப்ரிக்கா இன்னும் பல நூறு வருடங்களுக்கு உலக வியாபார நிறுவனங்களுக்கு வரப்பிரசாதமாக இருக்கும் என்பதில் ஐயமில்லை

என்ன வாசகர்களே …கென்யா பயணத்தைத் தொடரலாமா?…மறுபடியுமா ?  எக்ஸ்கீயூஸ் மீ இந்த ”எக்ஸ்ட்” எங்கே இருக்கு என்று கேட்டு வெளியே வந்துடலாமா ? எல்லாம் உங்கள் கமெண்டின் வீரியத்தை பொறுத்துதான் இருக்கும்..மீண்டும் சந்திப்போம் இன்னொரு கோணத்தில்

இத்துடன் இத்தொடர் நிறைவடைகின்றது. ஆனால் ,பயணங்கள் தொடரும்

முஹம்மது யாசிர்

இன்று இரு தகவல் ! 11

நரகத்தின் கதவு (Door to Hell )

இரும்பு திரையிட்ட சோவியத் ரஷ்யாவில் இருந்து பிரிந்த பல நாடுகள் பெரும்பாலும் இஸ்லாத்தை வாழ்வியல் நெறியாக ஏற்றுக்கொண்டன. அந்நாடுகளில் ஒன்று துர்க்மெனிஸ்தான், அங்குள்ள ஒரு கிராமம் தாங்க தர்வேஜ் (கதவு என்று பொருள்) அங்கே கேஸ் (gas) நிறைய கிடைக்குதுங்க,முஸ்லிம்கள் வாழும் பகுதி பெரும்பாலும் இயற்கை வளத்தால் செழித்து விளங்குவது புதிதல்லவே, மேட்டருக்கு வருவோம். 

1971 ஆம் ஆண்டு சோவியத்காரங்க ஒரு கேஸ் உள்ள இடத்தக் கண்டுபிடித்து தோண்ட ஆரம்பிச்சாங்க,அப்ப அங்கேக் கட்டுப்படுத்த முடியாத அளவிற்கு ஒரு 70 மீட்டர் அகலத்திற்கு பள்ளம் விழுந்துவிட்டது,அதிலிருந்து கேஸ் பாய்ந்து வர ஆரம்பிச்சுடுச்சுங்க..என்ன செய்றதுண்டு தெரியல அந்த ஆள்களுக்கு ஒரு சமயம் நச்சு கேஸா இருந்து பரவ ஆரம்பிச்சா அங்கு வாழும் மக்களின் கதி அம்பேல்தான் என்று நினைத்தவர்கள் இத பத்தவச்சிட்டா எல்லா கேஸும் எரிந்து ஒரு நாளில் முடிந்துவிடும் என்று நினைத்தவர்களாக,பத்த வச்சாங்க பாருங்க இன்னையோடு கிட்டத்தட்ட 40 வருஷம் ஆச்சு எரிஞ்சிக்கிட்டேதாங்க இருக்கு..பத்த வச்சவனெல்லாம் மண்டைய போட்டுட்டாங்க ஆனா “இந்த நெருப்பு மட்டும் பளிச் சென்று எரிஞ்சிகிட்டே இருக்கு.

இப்படியே அனலை கக்கி எரிந்து கொண்டே இருக்கிற இந்த கிணத்தைp பார்த்து இக்கிராம மக்கள் இதனை அழைப்பது “ நரகத்தின் கதவு” என்று,கூகுள் மாமாட்ட இந்த விவரங்களை நீங்களே கேட்கலாம்

அறிவியல் இன்னொன்று உறுதிப்படுத்த முடியாத தகவல்  : கேஸ் தோண்டும்போது சில இடங்களில் திடீரென்று வெப்பநிலை பூமியில் அதிகரித்ததாகவும் அந்த இடங்களில் வேதனைப்படும் மனித அலறும் குரல்கள் கேட்டதாகவும் ஒரு ரஷ்ய விஞ்ஞானி சொன்னதாக கேள்வி.. அல்லாஹூ அக்பர் அதிகாரப்பூர்வ தகவல்களை திரட்டிக்கொண்டு விரைவில் வருகின்றேன்.

அரோரா (aurora )

என்ன இது? சீசன் கூட இல்லையே, யாசிர் இப்படிக்கிளம்பிட்டானே என்று தப்பா நினைத்தவங்களுக்கு…இது ஒரு பூமியின் துருவப்பகுதியில் வானில் ஏற்படும் இயற்கையின் ஒளி ஆட்டம்தாங்க, இது எப்படி உண்டாகுதுண்டு பார்த்தா, நமக்கு எதுக்குங்க அதெல்லாம் பிச்சுகிச்சு படித்த கவிக்காக்காவுக்கு புரியும் நம்மல போல பிஸ்கோத்துக்கெல்லாம் புரிய ஒரு சில மாமாங்கமாவது எடுக்கும் வேணா விட்டுறவோம். சூரியப்புயலால் செறிவூட்டப்பட்ட துகள்கள் பூமியின் காந்தபுலத்தில் உலவுவதால் இந்த விளைவும் ஏற்படுவதாக ஆராய்ச்சியாளர்கள் சொல்கிறார்கள்,பேய் உலவுவதையே பொய்யாக கண்டுபிடிக்கும் ஷிர்க் பிடித்த சில ஆள்களை அங்கே தனியா விட்டா ஆடிப்போய்டுவானுங்க.

இயற்கையின் அற்புதம் இந்த அரோரா,கனடாவில் இருக்கும் நம்மவர்கள் இதனை பார்த்திருக்கலாம்… ஆட்டோ பிடித்து ஆளைப் பார்த்து வருவது போன்ற மேட்டரல்ல இந்த அரோரா,,அரோராவைப்பார்கக சும்மா வெட்டியா ஒரே இடத்தில் குந்தவச்சு சில நாள்கள்/மாதங்கள் கூட உட்காந்து இருக்கணும்ங்க,உங்களுக்கு வேலை வெட்டி எதுவும் இல்லைண்டா இங்குள்ள லிங்கை கிளிக்பண்ணி காத்திருங்க..லைவ் அரோரா வரலாம்.

http://www.asc-csa.gc.ca/eng/astronomy/auroramax/connect.asp

நல்லது மீண்டும் சந்திக்கலாம்.

முஹம்மது யாசிர்

ஈகை :: உணர்த்தும் சம்பவம் ! 13

நஞ்சையும்,புஞ்சையும் பின்னி விளையாடும் தரணி அவ்வூர், வானம் தன் அருட்கொடைகளை அள்ளி வீசிய வீச்சில் கிளர்ந்தெழுந்த மரங்களும் செடிகளும் பச்சைப்பசேலென மின்னிக் கொண்டிருக்கும் ஊர், அங்கு ரமலான் மாதம் தன் நிறைவின் கடைசி நாட்களை நெருங்கி இருந்தது. வழக்கம்போலவே அமல்களின்பால் ஏற்படாத ஆர்வம், ஆடை எடுப்பதில் அதிகமிருந்தது. கடைகளில் நிற்பதற்குக் கூட இடமில்லாமல் கூட்டம், பெருநாளைக்கென நல்ல துணிமணிகள் எடுத்து எடுப்பாகவும், அழகாவும் தெரிய வேண்டும் என்ற ஆர்வம் அனைவரிடத்திலும் காணப்பட்டது, அது அனுமதிக்கபட்டதும் கூட !

அன்று ரமலான் 27ம் கிழமை அப்துல் விடிய விடிய விழித்திருந்து செய்த அமல்களினால் கொஞ்சம் அதிகமாகவே தூங்கிவிட்டிருந்தான் அப்துல். ஆயிஷா கொஞ்சம் முன்னாடியே எழுந்து, வீட்டில் சிறு சிறு வேலைகளையெல்லாம் அரக்கப்பரக்க முடித்துக் கொண்டிருந்தாள். அவளுக்கும் ஆசை இருக்காதா பின்னே? தன் ஒரே மகன் உமருக்கும், தன் ஆசை கணவனுக்கும், தனக்கும் மகிழ்ச்சி தரும் பெருநாள் நாளில் நல்ல துணிமணிகள் எடுத்து தொழுகைக்குப் போக உடுத்த வேண்டும் என்று. லேட்டாகி விட்டாலும் இன்னும் மூன்று நாள் இருக்கின்றது பெருநாளைக்கு, இன்றைக்கு எப்படியாவது கிளம்பி போய் துணிமணிகள் எடுத்துவிட்டு நோன்பு துறப்பதற்குள் வீடு திரும்பிவிட வேண்டும் என்று முடிவெடுத்து அப்துலை எழுப்பினாள். அசந்த தூக்கத்தில் இருந்து எழும்பிய அப்துல் மனைவியின் விருப்பதிற்கு மறுப்பேதும் தெரிவிக்காமல், உமரை எழுப்பினான், இந்த ஒரு நாளுக்காக காத்திருந்தவன் போல உமர் மகிழ்ச்சியால் துள்ளிக் குதித்து எழுந்தான்…,

மூவரும் துணிக்கடைகள் நிறைந்த கடைத் தெருவை நெருங்கினார்கள், ரம்ஜான் தள்ளுபடி என்று வார்த்தை மாயம் காட்டி நிறைய கடைகள் கல்லா கட்டிக்கொண்டிருந்தார்கள். கலர்கலரான, மயக்கும் வகை டிசைன்கள் ஆங்காங்கே அடுக்கி வைக்கப்பட்டும், தொங்கவிடப்பட்டும் காட்சியளித்தன நீண்ட தேடலுக்குப்பின் ஆயிஷா தன் மனதுக்குப் பிடித்ததை அப்துலிடம் காட்டி அவன் ஒகே என்று சொன்னதும் எடுத்துவிட்டாள். அடுத்து அப்துலுக்கும் அசத்தலான உடையும் கிடைத்துவிட்டது. உமருக்கு அழகான அவன் ஆசைப்பட்டது போலவே குர்தாவும், ஜிப்பாவும் கிடைத்துவிட்டது ஆனாலும் உடனடியாக உமர் அதனை எடுக்கவில்லை.

“தான் தேர்ந்தெடுக்கும் ஆடையில் இரண்டு உடுப்புகள் இருந்தால் மட்டுமே எடுப்பேன்” என்று கூறிவிட்டான்.

“ஏன் அப்படி?” என்று அப்துல் வினவ!

"ஏதாவது சாப்பிடும்போது உடையில் பட்டுவிட்டால் என்ன செய்வது அதான் மாற்று உடை" என்று பதிலளித்த பாசமான மகனைக் கடிந்துகொள்ள மனமில்லாமல் அவன் இஷ்டத்துக்கு விட்டுவிட்டான். இரண்டு உடைகளும் கிடைத்தாயிற்று, பணத்தை செட்டில் செய்துவிட்டு கிளம்பினார்கள்

அன்று பெருநாள் சுபுஹூ பாங்கு சொல்வதற்கு முன்பே எழுந்துவிட்டான் உமர். அடுப்படியில் வேலை பார்த்துக் கொண்டிருந்த உம்மாவிடம் சென்று என்னென்ன செய்கிறீர்கள் என்று கேட்டு தெரிந்து கொண்டான், அப்துலும் குளித்துவிட்டு புத்தாடை உடுத்தி தன் மகனுக்கும் உடுத்தி விட்டுக்கொண்டு இருக்கும்போது உமர்.

“வாப்பா நாம் கிழக்கு தெரு வரை போய்விட்டு வரவேண்டும்" என்றான்

"ஏன்?" என்று அப்துல் கேட்பதற்குள் வாப்பா "ப்லீஸ்" என்று கொஞ்சியவனாக வாப்பாவை இழுத்துக்கொண்டு தன் கையில் ஒரு பை தொங்க காரை நோக்கி ஓடினான் அப்துலும் ஒன்றும் புரியதவனாக அவன் பின்னாலேயே சென்று காரை எடுத்து அவன் சொன்ன வீட்டின் அருகில் போய் நிறுத்தினான்.

அவ்வீடு சமீபத்தில் எதிர்பாராத விபத்தில் சிக்கி உடல் உறுப்புகள் செயலிழந்த உமரின் நண்பன் அமீரின் வீடு. நடுத்தர குடும்பம் ஓகோ என்று வாழாவிட்டாலும் ஓகே ஆக வாழ்ந்த குடும்பம். அங்கு இறங்கிய உமர், அமீரை அழைத்தான், வந்து நலம் விசாரித்தவனிடம் தன் கையில் உள்ள பையை கொடுத்தான். அது என்னவென்று அமீர் பிரித்துப் பார்த்தபோது அது அவனுக்காக எடுத்த இரண்டாவது உடை…

“இதனை நீ உடுத்திக்கொள் உனக்கும் எனக்கும் ஓரே உடை, கொஞ்சம் நேரம் கழித்து சாப்பாடு கொண்டு வருக்கின்றேன்” என்று அவன் அமீரிடம் சொன்னதைக் கேட்டு. அப்படியே அசந்துவிட்டான் அப்துல் என்ன நடக்குதென்று புரிந்து கொள்ள முயன்றபோது “வாப்பா எங்க இஸ்லாமிக் டீச்சர் தான்ன் விரும்புவதைத் தன் சகோதரனுக்கும் உறவுகளுக்கும் விரும்பவேண்டும் பெருநாட்களில் தான் நல்ல உடை உடுத்தும்போது அவ்வசதி வாய்ப்பில்லாத ஏழை எளியவருக்கும் அதே போல கொடுக்க முயற்ச்சிக்கவேண்டும்” என்று கூறியது என் மனதில் பதிந்து இன்று நனவாகிவிட்டது என்று சொன்ன, அழகிய இச்சிறந்த செயலைச் செய்த தன் மகனை இரு கைகளிலும் அணைத்து முத்தமழை பொழிந்தான் அப்துல்… ஈன்ற பொழுதினும் பெரிதுவக்கும் தன் மகனை ஈகையாளனாகப் பார்த்த தகப்பன் பெருமையடைவது போல கண்களில் ஆனந்த கண்ணீர் வர மகிழ்ந்தான்.

இந்த சம்பவத்தில் சொல்லப்பட்ட கதாபாத்திரங்களின் பெயர்கள் கற்பனையேயன்றி வேறில்லை,ஒரு விசயத்தை வற்புறுத்தி சொல்ல வேண்டும் என்பதற்காகவே இங்கே விவரிக்கப்பட்டுள்ளது

ஆகவே! சகோரர்களே, நாம் புத்தாடை உடுத்தி மகிழும் இத்தகைய தருணங்களில் நாம் அறிந்த ஏழைக்கு ஒரு உடை எடுத்து கொடுத்து மகிழ்வதில் இந்த ஈகைத் திருநாள் இரட்டிப்பு மகிழ்ச்சியுடன் குதூகலிக்கும். நாம் வட்டிலப்பம் சாப்பிடும் போது வசதியற்றவருக்கு ஒரு வடை கொடுத்தால் அது இறைவனிடத்தில் மிகப்பெரியதாக கருத்தப்படும். என்ன நண்பர்களே! இதற்கான முயற்சியை இந்த ஈகைத் திருநாளில் செய்வோமா !? கட்டாயமென்று இல்லை இருப்பினும் ஜகாத், சதக்கா கொடுத்தது போக, நமக்கு நேரமும், வசதியும் இருந்தால் இவ்வாறான நற்காரியங்களைச் செய்வதில் கிடைக்கும் பயனுக்கு ஈடு இணை ஏது ??

சம்பவங்களை விவரித்து ஒரு நல்ல கருத்தைச் சொல்ல எத்தனித்த எனக்கு இது ஒரு கன்னி முயற்சிதான்....

பின்னூட்டங்களில் பின்னால் ஓட்டலாம் !

முஹம்மது யாசிர்

துபாய்

வெலக்காத்தெரு (பெண்கள் கடைத்தெரு) - இன்று ஒரு தகவல் 40

இப்படி படிக்கிற யாருக்குமே இதன் அர்த்தம் நேரடியாக தெரியுமா என்பது கேள்வியானாலும், ஆனால் அந்த இடம் மட்டும் நன்றாகத் தெரியும். எனக்கும் தெளிவில்லைதான், ஒரு சமயம் “விலைகாரத் தெரு”வாக இருக்குமா அல்லது வெளியாட்கள் அதிகம் வந்து கடைவிரித்து வியாபரம் தெரு ஓரம் செய்வதனால் ”வெளிக்காரர்” மருவி ”வெலக்காத்தெரு”வானதோ ? இதுக்கு போய் ஏன் இப்படியான ராக்கெட் சயின்ஸ் ரேன்ஞ்சுகு ஆராய்சியெல்லாம் என்ற கேட்பது காதில் விழுகிறது. சரி சரி இத்தோடு இந்த ஆய்வை நிறுத்திடுவோம். என்னோட இந்த கருத்துக்கு மேலே நீங்களும் வரக்கூடாது நானும் வரமாட்டேன், இரத்தம் வர்ராப்லயா இருக்கு ?!!!

இங்கே எங்க கடற்கரைத் தெருவில் உள்ள “வெலக்காத்தெரு”வை சொல்லியே ஆகனும் ஏனென்றால், மீன் தோன்றி இறால் வலையில் சிக்காத காலத்திற்கு முன் தோன்றியது (!!!) கடற்கரைத் தெரு பெண்கள் வெலக்காத்தெரு. ஒரு ஊரின் திறவு வாயில் அதன் கடற்கரைப் பகுதியைத்தான் பெரும்பாலும் குறிக்கும். பட்டுக்கோட்டைக்கு எப்படி என்று யாரோ முனுமுனுப்பது ஏதோ கொஞ்சம் ஒவராத்தான் போய்ட்டோமோ என்ற உணர்வை தருகிறது. அதன்படி பல தெருக்களுக்கு தாய் தெருவான கடற்கரைத் தெருவின் பெண்கள் மார்க்கெட்டை அறியாத நடுத்தர வயதினர் குறைவே. அந்த அளவிற்கு வசதி வாய்ப்புகளுக்காவும், புளிய மரத்தை வெறுத்தும், கடற்கரைத் தெருவின் உப்பு வீட்டை அரித்து அப்புறபடுத்தி விடும் என்று பயந்தும் ஊரின் மற்ற பகுதிகளுக்கு புலம்பெயர்ந்து சென்றவர்களும் இந்த லேடீஸ் மார்க்கெட்டை மறக்காமல் ஆட்டோபிடித்து வந்தாவது ஒரு கெளக்கமீனையோ, உயிர் கெண்டை மீனையோ வாங்கி செல்வது இன்றும் கண்கொள்ளா காட்சி!

எனக்கு தெரிந்தவரை தமிழ்நாடு அளவில், அட ! இந்திய அளவில் ஏன் உலக அளவில் கூட பார்த்தோம்ண்டா(ங்க) பெண்களுக்காக இயங்கும் ஒரு மீன் மார்க்கெட் கடற்கரைத் தெரு பெண்கள் வெலக்காதெருதான் (வேற எங்கேயும் இருந்தாலும் இதான் ரோல் மாடலாக இருக்ககூடும் !!! நம்பும்படியாக இருக்கா !). இதை கின்னஸ்காரனுங்ககிட்ட கொஞ்சம் அமெரிக்கவுல இருக்கிற சகோ. கிரவுன் எடுத்து சொன்னா நல்லது அவனுங்க தானே கண்ணுல ஒத்திக்கொள்வதையும் / கண்றாவியையும் போடுறானுங்க.

எனக்கு தெரிந்தவரை வெலக்காத்தெரு மார்க்கெட்டின் நீண்ட கால கதாநாயகி செல்லம்மா ஆச்சிதான். அந்த ஆச்சி குட்டானை (பனை ஓலையில் செய்தது) தலைகீழா கவுத்தி அதில் சோளக்கதிறு, நிலக்கடலை, வெள்ளரிப்பிஞ்சு, பயறு, நடுவிலே மாங்கய் தூண்டு, பக்கத்தில் அவிச்ச சக்கரவள்ளிகிழங்கு, அட போங்க… ஒரு பெரிய சூப்பர் மார்கெட்டின் செல்ஃப்லேயே இவ்வளவு சின்ன இடத்தில் இத்தனை நேர்த்தியாக அடுக்கி வைத்திருக்க முடியாது, அந்த அளவிற்கு அடுக்கி வைத்து இருக்கும். ஏதோ ஒரு பக்கத்து கிராமத்தில் இருந்து பொடி நடையாக வரும் அந்த குமரி(க்)கிழவி, சில்லறையாக குடுத்தால் சிரித்து கொண்டே பொருள் கொடுக்கும் செல்லம்மா. பெரிய பணத்தை கொடுத்தா “டேன்ஞ்ர் மூஞ்சு” வச்சிக்கிட்டு ஏதோ எதிரியை பார்ப்பதுபோல் பார்க்கும், பல வருடங்கள் தன் ஜீவிதத்தை அந்த மார்கெட்டிலேயே ஓட்டிக் கழித்தது அந்த இளம்கிழவி !

அடுத்த எனக்கு தெரிந்த மிகப்பிரபலமான காய்கறி வியாபாரி. போஸ்ட் ஆபீஸ் சல்மா ஹோட்டல் (மர்ஹும் சாகுல்ஹமீது) அவரின் தாயார், மிக கஷ்டப்பட்டு காய்காறி வியாபாரம் செய்து தன் குழந்தைகளை காப்பாற்றினார்கள், அனைத்து காய்கறிகளும் பிரிட்ஜ் இல்லாமலேயே ஃபிரஷ்-ஷாக இருக்கும் அவர்களின் கடையில்.

அப்புறம் கொடுவா மீன் விற்க்கும் வியாபாரிகள், கில்லட் மெசின் கண்டுபிடித்த ஜெர்மன் ஆசாமிகள் நம்ம ஊரின் கொடுவாமீன் பிஸ்க்கை (பீஸ்) பார்த்தா அவர்களின் காப்புரிமைக்கு வேட்டு வைத்து விடுவோமோ என்று தலைதெரிக்க ஓடிவிடுவார்கள். அந்த அளவிற்க்கு முடியைவிட சிறிது அகலமாக பீஸை வெட்டுவதில் கில்லா(ட்)ட்டிகள் நம்ம ஆட்கள். சரிங்க! உங்களிடம் ஒரே ஒரு கேள்வி (எனக்கும் தெரியாமாத்தான் கேட்கிறேன்)  அது ஏன் மீன் வெட்டியதும் அதன் மீனின் இரத்ததை தடவுவதன் மர்ம்ம் என்னங்க.

அப்புறம் மண் புரட்டி இறால் விற்கும் வியாபாரிகள், தரகர் தெரு ஜெய்லானி கடை, டெம்பரவரியாக ஐஸ் மோர் விற்கும் ஸ்கூல் பசங்க இப்படியாக பெண்கள் தலைகள் மட்டுமே தெரிய களைக்கட்டி நிற்கும் கடற்கரைத் தெரு வெலக்காத் தெரு. முன்பெல்லாம் ஆண்கள் அங்கே நுழைந்து விட்டால், அந்த செய்தி புளிய மரத்தடியில் குச்சி ஐஸ் சாப்பிட்டுக் கொண்டு இருக்கும் சமுகக்காவலர்களுக்கு எட்டியதும் உள்ளே நுழைந்தவருக்கு சில சமயம் அவருக்கு அபராதம் அல்லது தர்ம அடி கொடுப்பார்கள். அந்த காலமெல்லாம் ஐஸ் போல கரைந்து விட்ட பிரம்மை மனத்திரையில் ஓடுகிறது. பெண்களின் நெகோஷியஷன் திறமைகளை அங்கே காணலாம், ஆனால் இப்போது அப்படி இல்ல பல்லு உள்ளவன் பக்கோடா திண்கிறான் என்பதுபோல் பணம் உள்ளவன்(ர்) பெரியமீன் சாப்பிடுறாங்க, பணம் இல்லாதவன்(ர்) ”பொடிபட்டு” வாங்கி வந்து அவியல் வைச்சு தான் வாழ்வை வாழ்ந்து கொண்டுதான் இருக்கின்றார்கள். இரண்டு பேரின் வயிறும் நிரம்பித்தான் போகுது.

சரிங்க ! ஒரு சின்ன மேட்டரை எவ்வளவு(தான்) சவ்வு போல இழுத்தாலும் இதற்கு மேல வெலக்காத்தெருவப் பத்தி எழுத முடியல. என்னுடைய சீனியர்கள் (கவிக்காக்கா, சாவன்னா காக்கா, ஜாஹிர் காக்கா இடிசி.....) இதனைக் கொஞ்சம் சிரியஸாக எடுத்துகொண்டு பின்னூட்டத்தில் போட்டா அது செல்லம்மாவுக்கு நாம் கொடுக்கும் சில்லரை காசுகளின் சந்தோஷம் முகத்தில் காணலாம் உத்திரவாதம்!

ச்ச்சும்மா டைம்பாஸூக்காக… (எல்லோரும் சீரியஸா எழுதுறாங்களே அதனாலதானுங்க இப்புடி…)

முகமதுயாசிர்

நிழற்படம் உதவி : S.ஹமீத்

பாலஸ்தீனப் படுகொலைகளும், பிரஞ்சு ஷூட்டிங்கும் 26

அல்லாஹ்வின் பெயரால்…

இஸ்லாம் அமைதியைப் போதிக்கும் மார்க்கம் நபி(ஸல்) அவர்கள் எப்பேர்ப்பட்ட சூழ்நிலையிலும் வாளெடுத்துப் போர் புரிவதைக் கடைசி வாய்ப்பாகத்தான் பயன்படுத்தினார்கள். அன்பினாலும், அமைதியாலும் பரப்பப்பட்டது இஸ்லாம் என்று நமக்கெல்லாம் தெரியும். 

சில இஸ்லாமிய விரோதிகளால் தவறாகச் சித்தரிக்கப்பட்டாலும், அதனை எல்லாம் தூசு போல துடைத்தெறிந்துவிட்டு “இஸ்லாம்” இன்று உலகிலயே அதிக மக்களால் வாழ்வியல் நெறியாக கடைபிடிக்கப்பட்டு, மக்கள் கூட்டம் கூட்டமாய் வந்து தழுவி தவறாகச் சித்தரித்தவர்களின் முகத்தில் கரியைப் பூசிக்கொண்டுதான் இருக்கின்றார்கள். சத்தியம் ஜெயிக்கும் அசத்தியம் என்றாவது ஒருநாள் மண்ணோடு மண்ணாக அழிந்துவிடும். அல்லாஹ் போதுமானவன். இஸ்லாம் தீவிரவாதத்தை எள்ளளவும் விரும்பவில்லை, ஆதரிக்கவும் இல்லை.

பாலஸ்தீனம்

சுற்றிலும் அரபு நாடுகளின் அன்பு கரம் பற்றி அமைதியாகவும், கண்ணியத்துடனும் இருந்த “பாலஸ்தீனம்” என்ற நாட்டை, அந்த அரபுகளின் அமைதியைக் குலைக்க வேண்டியும்,மத்திய கிழக்கு ஆசியாவின் அதிகாரத்தைத் தன் கைக்குள் கொண்டுவர வேண்டியும், அந்நாடுகளுக்கு வல்லோன் வாரி வழங்கி இருக்கும் வளத்தைச் சுரண்டவேண்டியும் நினைத்த சில வல்லரசுகள் “ஜெருசலம்” என்ற புனித நகரை மையமாகக் கொண்டு இறைவனால் உயர்ந்த குலம் என்று கூறப்பட்ட (தன் துரோகச் செயல்களால் அதே இறைவனால் சபிக்கப்பட்ட, தான் உண்டு வாழும் வீட்டிற்கும் நாட்டிற்கும் துரோகம் செய்ததால் உலக முழுவதும் வெறுக்கப்பட்ட, அந்த துரோகத்திற்காக அடையாளம் தெரியாமல் வேரறுக்கப்பட்ட) “இஸ்ரேலியர்களை பாலஸ்தீனம் என்ற நாட்டில் குடியேற்றி, வந்தேறிகளுக்கு ஆயுதமும், நிதியும் கொடுத்து, அமைதியாக வாழ்ந்து கொண்டிருந்த அரபுகளைச் சீண்டி, ரத்தக் களறியை ஏற்படுத்தி "பாலஸ்தீனம்" என்ற நாட்டை உலக வரைபடத்தில் இருந்து எடுத்து விட்டு “இஸ்ரேல்” என்ற துரோகத்தின் சின்னத்தை மேப்பில் ஏற்றி தீயைப்பற்ற வைத்தன. அரபுகளின் அமைதியைக் குலைத்தன. இந்த வரலாற்றை இங்கு எழுத ஆரம்பித்தால் கல் நெஞ்சமும் கண்ணீர் விட்டு கதறி அழும்.

கொடுமைகள்

எத்தனையோ வகையில் தண்டிக்கப்பட்டிருந்தாலும், அவர்களின் டி.என்.ஏ யிலும் கலந்துவிட்டிருந்த ”இஸ்லாமிய வெறுப்பு” என்ற நெருப்பைக் கொண்டு தான் விரும்பும் போதெல்லாம் தன் வான்படையைப் பயன்படுத்தி குறிபார்த்து, முக்கியமாக ஆண் குழந்தைகளே வருங்காலப் பாலஸ்தீன தலைமுறையில் இருக்கக்கூடாதென்ற குறிக்கோள் கொண்டு சின்னஞ்சிறு பாலகர்களையும், இந்த உலகையே காணாத சிசுக்களையும் கொன்று குவித்து அழிக்கும் அரக்க குணம் படைத்த இஸ்ரேலுக்கு மேற்கத்திய நாடுகள் அரண்போல நின்று பாதுகாக்கின்றன. தன் சொந்த நாட்டிலிலேயே வந்தேறிகளால் சிறுமைப் படுவதைக் கண்டு ரசிக்கின்றன, அரபு நாடுகளின் வளங்களைச் சுருட்டி அவர்களை அழிக்கப் பயன்படுத்துகின்றன இந்த அழுக்குப்பிடித்த வல்லரசுகள், கொன்று குவிக்கும் பாலஸ்தீன இளைஞர்கள் உடற்பாகங்களை வெட்டி எடுத்து விற்கின்றது இந்த ஈன இஸ்ரேல்,

ஆப்கானிஸ்தான், ஈராக், பாலஸ்தீனம் போன்ற இடங்களுக்கெல்லாம் பொய் காரணங்களைச் சொல்லி சென்ற இடங்களிலெல்லாம் நிராயுதபாணிகளையும், பெண்களையும், முஸ்லிம் சமுதாயத்தை வேரறுக்கும் நோக்கோடு வருங்கால செல்வங்களான குழந்தைகளையும் கொன்றுகுவிப்பது எந்த வகையில் நியாயம்? ஏன் இந்த உலகநாடுகள் அதனைத் தட்டிக் கேட்கவோ,தண்டிக்கவோ முன்வரவில்லை?. முஸ்லிம்களின் இரத்தம் அந்த அளவிற்கு மலிவானதா? அல்லது இந்த காட்டேரிகளுக்கு சுத்தமான முஸ்லிம்களின் இரத்தம்தான் பிடித்திருக்கின்றதா ?

இந்தச் சம்பவங்களைக் கண்டு முஸ்லிம்களாகிய ஒரு சிலபேர் கண்ணை மூடிக்கொண்டு இருக்கின்றோம் பலர் அல்லாஹ்விடம் துவாச் செய்துகொண்டு, இருக்கின்றோம், ஆனால் கண் |முன்னால் தன் நாட்டின் பிஞ்சுக் குழந்தைகளும், தலைமுறைகளும்,அழித்தொழிக்கப்படுவதை கண்டு வேதனையுற்று உணர்ச்சி வசப்பட்ட ஒரு இளைஞன் பிரான்சில் உள்ள இஸ்ரேலியப் பள்ளிக்குச் சென்று தன்|கோபத்தை துப்பாக்கி மூலம் கொந்தளிக்க வைத்தான். அதில் சில பெரியவர்களும், இரண்டு சின்ன குழந்தைகளும் கொல்லப்படுகின்றனர். பாலஸ்தீனப்பள்ளியில் பாஸ்பரஸ் குண்டு போட்டு பல குழந்தைகளை அழித்தும்,இன்னும் சிலரை நிரந்தர ஊனப்படுத்தியும் கொக்கரித்த இஸ்ரேலிய அரசின் இனப்படுகொலைக்கு மத்தியில் இதெல்லாம் சிறு கடுகுக்கு சமம்தான்

இலட்சக்கணக்கான பிஞ்சுகளைத் தங்களின் வலிமையான ஆயுதங்கள் மூலம் துளைத்தெடுத்த அரசுகள் இச்சம்பவத்தால் அலறுகின்றன..ஏனென்றால் சிந்தியது யூத இரத்தம்,சுட்டுவிட்டு தன் கருத்தைச் சொன்ன அவ்விளைஞன் ”நான் கொண்டு சென்ற வெடிமருந்துகளை முழுவதுமாக பயன்படுத்தி இருந்தால் மொத்த பள்ளியையும் என்னால் அழித்திருக்க முடியும்,ஆனால் அது என் நோக்கமன்று,என் சகோதரர்கள் பாலஸ்தீனத்திலும், ஈராக், ஆப்கானிஸ்தானிலும் படும் சித்ரவதைகளையும் தாம் பெற்ற பிஞ்சுக் குழந்தைகளை இழந்துவாடும் வேதனையையும் நீங்களும் சிறிதளவிலாவது உணர வேண்டும் ”என்று கூறி தன் உயிரை விட்டான், ஒரு அரசாங்கமே இனப்படுகொலையை முன்னின்று நடத்தும்போது,தனிப்பட ஒருவன் இச்செயல் செய்தது கடலில் கலக்கபடும் ஒரு கரண்டி உப்புக்குச் சமம்

வன்முறையும், தீவிரவாதமும் என்றுமே வெற்றிபெற முடியாது, அமைதியாக எங்கள் சகோதர்களை அவர்கள் குழந்தைகளுடன் வாழ விடுங்கள், எறும்புகள்கூட தான் நிம்மதியைக் கெடுக்கும் ஜந்துக்களை எதிர்த்து போரடுகிறது, பாலஸ்தீனபடுகொலைகளைத் தடுத்துநிறுத்துங்கள் அது நிறுத்தப்படாதவரை உணர்ச்சிவசத்தால் இதுபோன்ற சம்வங்களும் நடப்பதைத் தவிர்க்கமுடியாது.

(அப்பாவிகளையும்,குழந்தைகளையும், பெண்களையும், போரில் கூட கொல்வதை தடைசெய்கிறது இஸ்லாம். அதேநேரத்தில் நம்மோடு எதிர்த்து நின்று போரிடுவோருக்கு பதிலடி கொடுக்கவும் சொல்கிறது. ஆனால் இப்படி அப்பாவிகளை உணர்ச்சி வசப்பட்டு கொல்வது இஸ்லாம் காட்டிய வழி முறை கிடையாது).

-முஹம்மது யாசிர்

இன்று ஒரு தகவல் ! 21

சில சுவராஸ்யமான தகவல்களைத் தருவதுதான் இந்த சிறு தொகுப்பின் நோக்கம். சும்மா போட்டு அறுக்கிறானே என்று அலுத்துக்கபிடாது. சோற்றில் அஞ்சுகறியையும் வச்சு சுவையாக பரிமாறுவதுதான் நோக்கமே தவிர. வேறெதுவும் இல்லை, இரண்டு கறிதான் இங்கே இருக்கு மத்த மூணு எங்கேண்டு கேட்காதீங்க. நேரம் கிடைச்சா வரும் (ஆனா வராது)..

நடைபயிற்சி

அக்குபஞ்ச்சர் பற்றி கேள்விப்பட்டு இருப்பீர்கள், இது சைக்கிள் டயரை பஞ்ச்சர் செய்வதுபோல,நம்முடைய பாதத்தை பஞ்ச்சர் செய்து சில வியாதிகளை பக்குவப்படுத்துவதுதான் அது அல்லாஹ் நம் பாதத்தை நடப்பதற்காகத்தான் படைத்து இருக்கின்றான்..நடக்காமல் நந்திபோல் இருப்பதால் என்னென்ன வியாதிகள் வரும் என்பதை நாம் பார்த்து / அனுபவித்து கொண்டு இருக்கின்றோம்.அல்லாஹ் காப்பானாக அமீன்

நம் உடலில் உள்ள அனைத்து உறுப்புகளுக்கும் ஒரு சென்சர் (sensor)  புள்ளி நம் பாதத்தில் உண்டு,அங்குதான் அதன் நரம்புகள் முடிவடைவதாக ஆராய்ச்சிகள் சொல்கின்றன, கீழே உள்ள படத்தைப் பார்த்தால் உங்களுக்கு புரியும், இதயம் வலப்புற பாதத்தில் உள்ளதை அறியலாம்,அந்த சென்சார் புள்ளிகளை மசாஜ் செய்வது மூலம்,அதன் வலிகளை குணப்படுத்த முடியும் என்று பஞ்ச்சர் செய்பவர்கள் கூறுகிறார்கள்.

அல்லாஹ் நாம் நடக்க பாதத்தை வைத்து அதன் மூலம் நம் உறுப்புகளை சுறுசுறுப்படைய செய்கின்றான் அதனால் தொடர்ந்து உறுப்புகளை மசாஜ் செய்வோமா அட அதாங்க “வாக்கிங்” போவமா நண்பர்களே

இரத்தவகையும், குணங்களும்

முயற்சிதான் மெய் வருத்தக்கூலிதரும் என்ற சொல்லுக்கு ஏற்ப, நாம் எந்த் அளவிற்கு தூய்மையான எண்ணத்துடன் முயற்ச்சி செய்கிறோமோ அந்த அளவிற்குத்தான் வெற்றி கிட்டும், அடுப்பே எரிக்காமே அல்லாஹ் சோறு தருவான் என்றிருப்பது மடமையின் உச்சகட்டம்

ஒரு சில ஆராய்ச்சியின் முடிவில் கிடைத்த தகவல்கள் படி வெவ்வேறு இரத்த குருப்பை சேர்த்தவர்களின் குணாதிசியங்கள் எப்படி இருக்கு என்று பார்ப்போம். இது உங்கள் குணங்களுடன் ஒத்து போகவில்லையென்றால் எனக்கெதிரா எதுவும் கேஸ் போட்டுராதீங்க.. !

‘O” டைப்

எதற்க்கும் தலைமை தாங்க வேண்டும் என்ற விருப்பம், குறிக்கோளை அடைய வேண்டும் என்ற தாகம் அதனை அடையும் வரை களைப்படையாத முயற்ச்சி,உங்களை நம்பலாம் அவ்வளவு நல்லவரு நீங்க,ஆனா சாதனைகள் செய்தாலும் பெருமை அடித்துக்கொள்வீர்கள் கொஞ்சம் பொறாமையும் உங்களிடம் உண்டு

‘A” டைப்

உங்களுக்கு ஒற்றுமை, அமைதி, ஒருங்கிணைப்பு ரொம்ப அதிகம்,மற்ற ஆள்கள் கூட பழகkகூடிய,பொறுமையாக உள்ள அன்பானவங்க நீங்க கொஞ்சம் பிடிவாத குணமும்,பரபரப்பாகவும் திரிவீங்க நீங்க

’B” டைப்

நீங்க கொஞ்சம் அப்படியும் இப்படியும் உள்ள நபர்தான், முகத்திற்கு நேரா பேசக்கூடிய ஆள்தான் உங்க வழியிலயே எல்லாத்தையும் செய்ய விரும்புவீங்க.கிரியேட்டிவிட்டியும் உங்களிடம் உண்டு ,ஆனால் நீங்க தனியாக சும்மா கம்பு போல நின்று செயல்களை செய்ய வேண்டும் என்ற குணம் உங்களை சில சமயம் துன்பத்திலும் மாட்டிவிடும்

“AB” டைப்

கூலான / கட்டுப்பாடனா ஆள்தான் நீங்க.எல்லாருக்கும் உங்களை பிடிக்கும், இயற்கையாகவே மற்றவர்களை மகிழ்ச்சிபடுத்த வேண்டும் என்ற குணம் உங்களிடம் மேலோங்கி இருக்கும்,ஆனா உங்களக்கு நட்ப்போட பழகத்தெரியாது, ஒரு விசயத்தில் 'டக்'கென்று முடிவெடுக்கவும் தெரியாது

என்னங்க! தகவல்கள் நல்லா இருந்துச்சா இல்லை புளிச்சமாவை அரைத்த கதைதானா!?

-முஹம்மது யாசிர்

நாவால் நோவாதீர்... 21

நாக்கு - அதை அடக்கு !!!

தலைப்பைக் கண்டதும் சாப்பாட்டு பிரியர்கள், பிரியமாக கோபப்படாதீங்க. ருசியான சாப்பாட்டுக்காக நாக்கை நாலு முழம் நீட்டி, நானூறு கிலோமீட்டர்ல ஒரு நல்ல சுவையான உணவு பறிமாறும் உணவகம் இருந்தால், உடனே கிளம்பிவிடுகிற டைப் ஆளுதான் நானும். இங்க சொல்லப்போவது வேற விடயமிது.

சிலரைக் கண நேரிடும்போது அவர்களிடம் "நல்லா இருக்கீங்களா?" என்று கேட்டால் போதும்

"அது, இது, அப்படி இல்ல, இப்படி இல்ல" என்று தாழ்வான வார்த்தைகளையே கூறி நம்மை இல்லாமல் செய்து விடுவார்கள். அப்படிப்பட்டவர்களுக்காக, கா.மூ.தொ கூட்டணியில் உட்கட்சி பொறுப்பிலிருக்கும் இந்த உறுப்பினர் வாரம் முழுவதும் பேசும் வார்த்தைகளை ஒன்றாகச் சேகரித்து கோர்த்தால் ஏறத்தாழ 500 பக்கம் உள்ள புத்தகத்தை தயார் செய்து விடலாம்… "தொன தொன ஆட்களுக்கு 500 பக்கம் உள்ள புத்தகமா?’ என்று சாவன்னா காக்கா சவூதில் இருந்து கேட்கிறது காதில் விழுகிறது.

“முஃமின்களே! (சந்தேகமான) பல எண்ணங்களிலிருந்து விலகிக் கொள்ளுங்கள்; ஏனெனில் நிச்சயமாக எண்ணங்களில் சில பாவங்களாக இருக்கும்; (பிறர் குறைகளை) நீங்கள் துருவித் துருவி ஆராய்ந்து கொண்டிராதீர்கள்; அன்றியும், உங்களில் சிலர் சிலரைப் பற்றிப் புறம் பேசவேண்டாம், உங்களில் எவராவது தம்முடைய இறந்த சகோதரனின் மாமிசத்தைப் புசிக்க விரும்புவாரா? (இல்லை!) அதனை நீங்கள் வெறுப்பீர்கள். இன்னும், நீங்கள் அல்லாஹ்வை அஞ்சுங்கள். நிச்சயமாக பாவத்திலிருந்து மீள்வதை அல்லாஹ் ஏற்றுக் கொள்பவன்; மிக்க கிருபை செய்பவன்.” - அல்குர்ஆன் (அத்தியாயம் 49:12) 

“உங்கள் நாவை பேணிக்கொள்ளுங்கள் “  - நபிமொழி

“தீயினால் சுட்ட புண் உள்ளாறும் ஆறாதே
நாவினால் சுட்ட வடு." - திருவள்ளுவர்

“நாக்கு கத்தியை விட கூரானது “ - யாரோ

“முள்ளில்லாத நாக்குமா “ - நம்மூர்காரங்க

சுவையை அறிய தரும் நாக்கு சுட்டும் விடும், அதனால் பல நட்புகளும், உறவுகளும், செயல்களும் கெட்டுவிடும்.

ஒரு ஊரில் மூன்று தவளைகள் நல்ல நண்பர்களாக இருந்து வந்தன, அதில் ஒன்றுக்கு உணவு இல்லாவிட்டாலும் மற்றவர்கள் கொண்டு வந்ததைப் பங்குபோட்டு சாப்பிடும் பழக்கத்தைக் கொண்டிருந்தன. அவர்கள் ஒருவருக்கொருவர் சிரிப்பும் கும்மாளமுமாக வாழ்ந்து வந்தன (நம்மைபோல சீரியஸாக அல்ல எப்பவுமே ஒரு சில கவலைகள் ஏதாவது விதத்தில் நம்மை ஆட்டிப்படைத்து போலன்று)

அழகிய மாலை நேரத்தில் இவை மூன்றும், இரைக்காவும், இன்பதிற்காவும் வாக்கிங் போய்க்கொண்டிருந்தன. அப்பொழுது இலைகள் மூடிய கடின கற்கள் உள்ள பழமைய் வாய்ந்த பாழும் கிணற்றில் தெரியாமல் கால் வைத்ததில் இரண்டு தவளைகள் தவறி விழுந்தன. அதில் ஒன்று மட்டும் நூலிழையில் தப்பித்து நணபர்களைக் காப்பற்ற போராடியது.

கிணற்றில் விழுந்த இரண்டு தவளைகளும், தன் உயிரைக் காப்பாற்றிக்கொள்ள வேண்டுமே, உணவில்லாத இக்கிணற்றிலிருந்து எப்படியாவது வெளியேறி விடவேண்டும் என்ற நோக்கில் தத்தித்தத்தி கிணற்றை விட்டு வெளிவர குதித்தன. மேல நின்று கொண்டிருந்த தவளை அவைகளை பார்த்து ‘குதிக்காதீர்கள், குதிப்பதால் நீங்கள் தட்டு தடுமாறி கிணற்றில் உள்ள கற்களால் காயமேற்படும் அல்லது தலையிலடித்து சாவதைவிட அங்கேய தங்கி விடுங்கள் என்று ஆரவாரமாக காட்டு கத்து கத்தியது. அதைக் காதில் வாங்காத இரண்டும் தவளைகளும் மீண்டும் மீண்டும் குதித்தது, அதில் ஒரு தவளை மேலே உள்ள தவளை உண்டாக்கிய பயத்துடன் கீழே பலமாக விழுந்ததில் அடிபட்டு மாய்ந்தது. மற்றொரு தவளை குதித்து குதித்து சாதித்தது அதன் பின்னர் கிணற்றுக்கு மேலே வந்து உயிர்க்காற்றை சுவாசித்தது.

மேலே இருந்த தவளை அதனைக் கண்டு ஆச்சரியப்பட்டு, “ நான் வர வேண்டாம், குதிக்கவேண்டாம், அது உயிருக்கு ஆபத்து என்று கத்தியும், நீ எப்படி மேலே வந்தாய்” என்று கேட்க. 

அதற்கு மேலே தப்பித்து வந்த தவளை சொன்னது "நீ குதிக்க வேண்டாம் என்றா கத்தினாய் !!! எனக்கு காது கேட்காததால் நீ ஆரவாரமாக கத்தியது என்னை உற்சாகப் படுத்தி மேல வர செய்யத்தான் என்று நினைத்து உற்சாகத்துடனும் ,ஊக்கத்துடனும் குதித்தேன்,மேலே வந்துவிட்டேன்" என்றது.

ஆகையினால் இங்கே அறியப்படும் நியதி என்னவென்றால் “ சில சொற்கள் கொல்லும் வேறு சில சொற்கள் வெல்லும்” என்பதற்கேற்ப நல்ல சொற்களை நாவால் அடுத்தவர்களுக்கு சொல்லுங்கள் அது அவர்களுக்கு, ஊக்கமளிக்கும், பக்குவபடுத்தும், உங்களைப் பண்படுத்தும், வேண்டாத சொல்லை பிறருக்கு நீங்கள் சொன்னால் அது அவர்களை மட்டுபடுத்தும், மடமையாக்கும்.

நாவால் கெட்ட & சீரழிந்த குடும்பங்களையும், வாழ்க்கைகளையும் நிறைய பேசலாம் & எழுதலாம் ஆனால் நாம் உதாரணத்திற்காக சொல்லும் சில சம்வங்கள் யாரையும் தனிப்பட்ட முறையில் பாதித்துவிடும் என்பதால் அதனை தவிர்ப்பதற்காகவே மேற்சொன்ன உதரணத்தை சொல்லிக் காட்டினேன் ஆதால அவைகளை தவிர்த்திடுவோம்.

நாவை கட்டுக்குள் வைத்து பேணிக்கொள்வோமா நண்பர்களே !!! பேச வேண்டிய இடத்தில் அவசியமானதை பேச வேண்டியதை பேசினால் பிரச்சனை என்பதே வராது.

“உலகத்திலேயே பயங்கரமான ஆயுதம் எது?”

“தரிகெட்டுப் போன நயவஞ்சகரின் நாக்குத்தான் அது!” – என் எஸ் கே.

சிந்தனை & ஆக்கம்

- முகமது யாசிர்

பரோட்டா பிரியர்களுக்கு ஓர் எச்சரிக்கை ! 43

தினமும் இரவு பரோட்டா சாப்பிட்டால்தான் சாப்பிட்ட திருப்தி கிடைக்கிறதா?

இன்று தமிழகம் முழுவதும் பரவலாக காணப்படுகிறது பரோட்டா கடை ,அந்த பரோட்டாவும் ஊருக்கு ஊர் வகை வகையாகவும், அளவிலும், சுவையிலும். எத்தனை வேறுபாடுகள் கொத்து பரோட்டா, சில்லி பரோட்டா, என்று பட்டியலிடும்போதே நாக்கில் எச்சில் ஊருமே!.

பரோட்டாவின் கதை என்ன தெரியுமா ?

பரோட்டா என்பது மைதாவிலிருந்து செய்யப்படும் ஒரு திட உணவாகும். இது தமிழகமெங்கும் எளிதில் கிடைக்கிறது. இரண்டாம் உலகப் போரின் போது ஏற்பட்ட கோதுமைப் பற்றாக்குறையால், மைதாமாவினால் செய்யப்பட்ட உணவுகள் தமிழகத்தில் பரவலாகப் பயன்படத் தொடங்கின, அதில் உருவான பரோட்டாவும் பிரபலமடைந்தது.

பரோட்டா பொதுவாக எப்படி செய்வார்கள்?

மைதாமாவில் உப்பு போட்டு, தண்ணிர் கலந்து அதனை கைகளால் பிசைந்து, அதன் பின்னர் எண்ணெயிட்டு, உருட்டி, ஒவ்வொரு உருண்டையையும் தட்டியெடுத்து, வீசி அடித்து, கைக்குட்டைபோல் பறக்க விட்டு, அதனை கழுவிய கைக்குட்டையை நீட்டி சுருட்டி மடிப்பதுபோல் அதை அப்படியே சுருட்டி, திரும்ப வட்ட வடிவில் உருட்டி, தட்டையாக இருக்கும் சூடான / தோசைக் கல்லில் போட்டு அதன் நிறம் சிவப்புக்கும் கறுப்புக்கும் இடையில் வரும் வரை புரட்டி எடுத்துப் போடுவார்கள்.

இப்போது பரோட்டாவின் மூலபொருளான மைதாவில்தான் பிரச்சனை துவங்குகிறது.

பரோட்டா மட்டும் இல்லாது இன்னும் பல வகை உணவு வகைகள் இந்த கொடிய மைதாவில் இருந்து தயாரிக்கப்படுகிறது ,நம் பிறந்த நாளுக்கு கொண்டாட வாங்கும் கேக் உட்பட .

மைதா என்றொரு மாவு எப்படி தயாரிக்கிறார்கள் ?

நன்றாக மாவாக அரைக்க பட்ட கோதுமை மாவு மஞ்சள் நிறத்தில் இருக்கும் அதை பென்ழோய்ல் பெராக்ஸைட் (benzoyl peroxide) என்னும் ரசாயனம் கொண்டு வெண்மை யாக்குகிறார்கள்,அதுவே மைதா .

Benzoyl peroxide நாம் முடியில் அடிக்கும் டை யில் உள்ள ரசாயனம் இந்த ரசாயனம் மாவில் உள்ள protein உடன் சேர்ந்து நிரழிவுக்கு காரணியாய் அமைகிறது .

இது தவிர Alloxan என்னும் ரா ரசாயனம் மாவை மிருதுவாக்க கலக்கப்படுகிறது மேலும் Artificial colors, Mineral oils, Taste Makers, Preservatives , Sugar, Saccarine , Ajinomotto  போன்ற உபபொருட்களும் சேர்க்க படுகிறது ,இது மைதாவை இன்னும் அபாயகரமாக்குகிறது .

இதில் Alloxan சோதனை கூடத்தில் எலிகளுக்கு நிரழிவு நோய் வரவைpபதற்கு பயன்படுகிறது ,ஆக பரோட்டாவில் உள்ள Alloxan மனிதனுக்கும் நிரழிவு வர துணை புரிகிறது .

மேலும் மைதாவில் செய்யும் பரோட்டா சீரணத்துக்கு உகந்தது அல்ல ,மைதாவில் நார் சத்து கிடையாது , நார் சத்து இல்லா உணவு நம் சிரண சக்தியை குறைத்து விடும் .

இதில் சத்துகள் எதுவும் இல்லை குழந்தைகளுக்கு இதனால் அதிக பாதிப்பு உள்ளது , எனவே குழந்தைகளை மைதா வினால் செய்த bakery பண்டங்களை உன்ன தவிர்பது நல்லது.

Europe union,UK,China  இந்த மைதா பொருட்கள் விற்க தடை விதித்துள்ளன .

மைதாவை நாம் உட்கொள்ளும் போது சிறுநீரக கல் ,இருதய கோளாறு ,நீரிழிவு போன்றவை வருவதற்கு பல வாய்ப்புகள் உண்டு .

நமது அண்டை மாநிலமான கேரளத்தில் பரோட்டாவின் தீமைகள் குறித்து இப்போதே பிரச்சாரம் செய்ய தொடங்கி விட்டனர்.மேலும் மைதாவை அதன் தீமைகள் குறித்து ஆராச்சி செய்து ஆய்வறிக்கையும் சமர்ப்பித்துள்ளனர்.

இப்போதே நாமும் விழித்து கொள்வோம் நம் தலைமுறையைக் காப்போம்.

வலைப்பூகளில் வாசித்ததை திரட்டி பயனுல்ல தகவலாக பதிந்திருக்கிறேன்.

- முஹம்மது யாசிர்