பாவமும் பழமும் 0

 நபிமணியும் நகைச்சுவையும் - தொடர் : 22

மனம் வருந்தி மன்னிப்புக் கேட்கும் இறை விசுவாசிகளின் பாவங்களை அல்லாஹு ரப்புல் ஆலமீன் மன்னித்து விடுவது மட்டுமல்லாமல், அந்தப் பாவங்களை நன்மையாக மாற்றி, பகரமாகப்  பரிசுகளை இந்த உலகிலும், சுவனத்தை மறு உலகிலும் தரவிருக்கும் அற்புத நிகழ்வை கீழே காணலாம்:

நாங்கள் நாயகம்  (ஸல்) அவர்களுடன் அமர்ந்திருந்தபோது,  அவர்களின் சபைக்கு ஒரு நபித் தோழர்  வருத்தத்துடன் வருகின்றார். நபியவர்களால் மட்டுமே தமக்கு உதவ முடியும் என்ற நம்பிக்கையுடன் ஸலாம் உரைக்கின்றார்.

ஸஹாபி: "இறைத்தூதர் அவர்களே! நான் அழிந்து போய் விட்டேன்! பாவம் செய்து விட்டேன்!”

நபி (ஸல்): (புன்னகையுடன்")  என்ன நடந்தது? " உமக்கு என்ன நேர்ந்தது தோழரே?"

ஸஹாபி: "நான் புனிதமான இந்த ரமளானின் நோன்பு வைத்த நிலையில், என் மனைவியுடன் தாம்பத்திய உறவில் ஈடுபட்டு விட்டேன். இப்போது நான் என்ன செய்வேன், இறைத் தூதரே?"

நபி (ஸல்): "அப்படியா? தவறு செய்து விட்டீரே! இந்தப் பாவத்திற்காக நீர் பகரம்  (கஃப்ஃபாரா)(1) அளித்தாக வேண்டும். விடுதலை செய்வதற்கு ஓர் அடிமை உம்மிடம் இருக்கிறாரா?"

ஸஹாபி: "இல்லையே!" யா ரஸூலல்லாஹ்"

நபி (ஸல்): "இரண்டு மாதம் தொடர்ந்து நோன்பு நோற்க உமக்கு சக்தி இருக்கிறதா?"

ஸஹாபி: "அதுவும் என்னால் இயலாத விஷயம் அல்லாஹ்வின் தூதரே!"

நபி (ஸல்): "அறுபது ஏழைகளுக்கு உணவளிக்க உமக்கு  வசதி வாய்ப்பு இருக்கிறதா?'"

ஸஹாபி: "அறுபது ஏழைகளுக்கா? அந்த அரிதான விஷயம் என்னால் முடியவே முடியாது நாயகமே!"

அனைத்து கேள்விகளுக்கும் அவர் இயலாது எனச் சொன்னதால் ‘இவருக்கு வேறு எப்படித்தான் உதவலாம்?’ என்ற யோசனையில், அல்லாஹ்விடமிருந்து உதவியை எதிர்நோக்கியவாறு இனிமை குணமும் இரக்க மனமும் கொண்ட அண்ணலார் அவர்கள்  மௌனமாகிவிட்டார்கள். அல்லாஹ்வின் அற்புதம் அப்போது நிகழ்ந்தது! பெருமானாரின் சபைக்கு இனிய பேரீத்தம் பழங்கள் நிறைந்த கூடை (“அரக்”) கொண்டுவரப்பட்டது.(2) மகிழ்ச்சியுடன் அல்லாஹ்வைப் புகழ்ந்தவாறு...

நபி (ஸல்): "கேள்வி கேட்டுக் கொண்டிருந்தவர்  எங்கே?"

ஸஹாபி: "இதோ நானே! இங்குதான் இருக்கிறேன்! யா ரஸூலல்லாஹ்"

நபி (ஸல்): "இதை எடுத்துக்கொண்டு போய் ஏழைகளுக்கு தர்மம் செய்வீராக. அதுவே உமது பாவத்துக்குப் பரிகாரம் ஆகும்!"

ஸஹாபி: (அண்ணல் நபியின் பொன் முகத்தை நோக்கி) "என்ன இறைத்தூதர் அவர்களே! என்னைவிட ஏழையாக இருப்போருக்கா என்னை தர்மம் செய்யச் சொல்கிறீர்கள்? கருங்கற்கள் நிறைந்த, இதோ இந்த இரண்டு மலைகளுக்கும் இடைப்பட்ட பகுதியாகிய இந்த மதீனா நகரில் வாழும் அனைவரிலும் என் குடும்பத்தினரைவிடப் பரம ஏழைகள் யாருமே இல்லையே, யா ரஸூலல்லாஹ்!"

இதைக்கேட்டதும் மனித வாழ்வினில் இனிமை சேர்த்த மாநபி (ஸல்) அவர்கள், பவளச் செவ்வாயின்  கடைவாய்ப் பற்கள் தெரியும் அளவுக்குச் சிரித்துவிட்டார்கள் .

நபி (ஸல்): "சரி. இதை எடுத்துக் கொண்டுபோய், உம்முடைய குடும்பத்தாருக்கே உண்ணக் கொடுத்து விடுவீராக!"(3) 

அல்லாஹ்வின் வாக்கு: ஆனால் (அவர்களுள்) ஈமான் கொண்டு, தவ்பாச் செய்து, (ஸாலிஹான) நற்செயல்கள் செய்கின்றவர்களுடைய பாவங்களை அல்லாஹ் நன்மையாக மாற்றிவிடுவான். மேலும், அல்லாஹ் மிக்க மன்னிப்போனாகவும் மிக்க கிருபையுடையோனாகவும் இருக்கின்றான். (4)

விவரங்கள்:

“கஃப்ஃபாரா” என்பது  அவசரத்தால்/அறியாமையால் செய்யப்படும் பாவங்களுக்கான பரிகாரமாகும்.

(2)  'அரக்' என்பது 15 'ஸாஉ' முகத்தலளவு கொண்ட கூடையாகும்; 1 'ஸாஉ' என்பது 4 'முத்'களாகும்; 1 'முத்' என்பது வயதுவந்தவர்களது இரு கரங்களால் ஒருமுறை அள்ளப்படும் தானியங்களின் அளவாகும்.

ஆதாரங்கள்:

(3) புஹாரி 1936 : அபூஹுரைரா (ரலி) 

(4) அல்குர்ஆன் : 25:70

இன்ஷா அல்லாஹ் தொடரும் 

இக்பால் M. ஸாலிஹ்

படிக்கட்டுகள் - 17 4

வாழ்வியல் முன்னேற்றத்தைப் பற்றி எழுதும்போது உறவுகளின் முக்கியத்துவம்  ஏன் என சிலர் நினைக்கலாம். காரணம் இருக்கிறது, நம் வட்டாரம் சார்ந்த ஆண்கள் முன்னேர நினைத்து ஏறக்குறைய ஒரு ஓட்டப்பந்தய ட்ராக்கில் நிற்பதுபோல் வாழ்க்கையை தொடங்க நினைக்கும்போது அந்த ஆண்மகனின் எண்ணம் எல்லாம் தான் அடையப்போகும் அல்லது தொடப்போகும் வெற்றியில்தான் இருக்கும், அதற்கிடையில் தனது பிள்ளைகளும், சகோதர சகோதரிகளும் அந்த சம்பாதிக்கும் ஆண்மகனை ஓட விடாமல் ஆளுக்கு ஒரு தாம்புக் கயிற்றை அவன் இடுப்பில் கட்டி தன் வசம் இழுத்தால் எப்படித்தான் அந்த பாவப்பட்ட ஜென்மம் ஓடி ஜெயிக்க முடியும். இதை நான் எழுதக் காரணம் நம் சமுதாயங்களில் புரையோடிப் போயிருக்கும் ' ஆண்மகன் தான் தன் சகோதரியின் பொருளாதாரத்துக்கு பொறுப்பு, ஆண்மகன் தான் தன் சகோதரியின் பிள்ளைகளின் கல்யாணம் முடிந்தால் தனது பேரப் பிள்ளைகளின் தேவைக்கும் பொறுப்பு என்ற எழுதப்படாத சட்டம் நம் பகுதி ஆண்களின் தலையில் எழுதப்பட்டிருப்பதுதான். பெண்களை படிக்க வைத்து தனது சொந்த படிப்பையும் திறமையும் நம்ப விடாமல் அவர்களை தொடர்ந்து ஆண்களை சார்ந்து இருக்க வைக்கும் பழக்கம். தொடர்ந்து ஆண்களை சம்பாதிக்கும் எந்திரமாக்கியிருக்கிறது.

பெண்கள் அதிகம் படித்தால் எங்கு நம்மை அதிகம் கேள்வி கேட்டுவிடுவார்களோ என்று நினைக்கும் " ஆப்கானிஸ்தான் தனமான புத்தி" நம் பகுதியில் பல ஆண்களிடம் இருக்கிறது.

ஆக ஆண்களின் முன்னேற்றத்தில் மனைவியின் பங்கு எவ்வளவு முக்கியம் என்பதை முன்னால் அத்தியாயத்தில் பார்த்தாலும் அடுத்த வெகு அருகில் இருக்கும் உறவான பிள்ளைகளின் பங்கு இதில் மிக முக்கியம். இன்றைய தேதியில் நம் ஊர் பகுதிகளில் ஏற்பட்டிருக்கும் வாழ்வியல் மாற்றம் ஏதோ மேஜிக் ஷோவில் நடந்தது மாதிரி வந்ததல்ல.

நம் ஊர் பகுதிகளில் முன்பு இருக்கும் வீடுகள் இன்றைய பிள்ளைகள் மறந்து இருக்கலாம் அல்லது அவர்களுக்கு தெரியாமலேயே போயிருக்கலாம். இரண்டு ரூம்கள் குனிந்து நுழைந்து படுத்து குனிந்து வெளியே வருகிற மாதிரி ஒன்னுக்கும் உதவாத டிசைனில் , ஒரு குழந்தை பிறந்தால் தாய் / குழந்தை /தகப்பன் மூன்று பேரும் படுக்க முடியாத அளவுக்கு ' நாயர் ஸ்டைல்" வீடுகள் கட்டியிருப்பார்கள். இதில் நான் சொன்ன 2 வது ரூம் பெரும்பாலும் ஸ்டோர் ரூமாகவும் , மழைக்காலங்களில் சமையல் கட்டாகவும் பயன்படும். [சமையல் அறை எனும் 'பெரிய்ய்ய்ய வார்த்தை ' இதற்கு பொருந்தாது]. இப்படி அடிப்படை வாழ்க்கையை மாற்றி அமைத்து ஒரு நல்ல வீடு கட்டி வாழவே நம் இனம் குறைந்தது 30 வருட உழைப்பை கொட்டி உருவாக்கியிருக்கிறது. கடந்து போன 30 வருடமும் திருப்பி வரலாம். வாழ்க்கை திரும்பி கிடைக்குமா?

இன்றைக்கு 35 வயதிலிருந்து 65 வயது வரை உள்ளவர்கள் வெளிநாடு போய் இந்த அடிப்படை வாழ்க்கையை குறைந்த பட்சம் அடையத்தான் தனது இளமையை, தனது கனவுகளை, தனது சுதந்திரத்தை எல்லாவற்றையும் பணயம் வைத்து, தனது பிள்ளைகள் நன்றாக படித்து பொறுப்புள்ளவர்களாக ஆகிவிட்டால் என் வாழ்க்கை போனாலும் பரவாயில்லை என்று மிகப்பெரிய நம்பிக்கையுடன் இருக்கிறார்கள் . அவர்களை பிள்ளைகள் காதல் என்ற பெயரிலும், வசதியான வாழ்க்கை வாழ வேண்டி அளவுக்கு அதிகமாக ஆசைப்படுவதிலும் பெற்றோர்களை நோகடிப்பது எந்த வகையில் ஞாயம்?. இந்த பாவப்பட்ட பெற்றோர்கள் செய்த குற்றம்தான் என்ன...? பிள்ளைகளை நம்பியது தவறா?. பிள்ளைகளை நம்பாமல் வேறு யாரைத்தான் நம்புவது?.

இன்றைக்கு துபாயிலும், சவூதியிலும், அமெரிக்கா, யூ,கே, ஆஸ்திரேலியா, ஜப்பான் என்று பிழைக்க போன யாருக்கும் விசாவும், ஏர்லைன்ஸ் டிக்கட்டும் ஏதோ ஒரு காலை நேரத்தில்  நரசுஸ் காப்பி குடித்துக் கொண்டு, காலை பேப்பரை புரட்டிக் கொண்டிருக்கும்போது வாசல் வந்து கதவைத் தட்டி யாரும் கொடுத்து விட்டு போனதல்ல. முதன் முதலில் ஸ்டேம்ப் ஆகும் விசாவையும், முதன் முதலில் கிடைத்த ஏர்டிக்கட்டையும் பார்க்க இன்றைய தகப்பன்கள் எத்தனை நாள் பட்டினியாக இருந்திருப்பார்கள். எத்தனை நாள் பம்பாயில் கழிவறைக்கு கூட க்யூவில் வெகுநேரம் நின்றிருப்பார்கள் என்பது எனக்கு தெரியும். எத்தனை இன்டர்வியூ, எத்தனை ஏமாற்றங்கள்.. அத்தனையும் சுமந்துதான் நிமிர்ந்திருக்கிறார்கள்.

இத்தனை வருடத்து தியாகத்தையும் சில சமயங்களில் பிள்ளைகள் எப்படி ஒரே வார்த்தையில் பெற்றோர்களின் முதுகெழும்பை உடைக்க பயன்படுத்துகிறார்கள் என்பதுதான் இன்னும் விளங்காத வித்தை.

எதுவும் வாழ்க்கையில் அந்தந்த வயதும் பொறுப்பும் வந்தவுடன் நிகழ்ந்தால் அதற்கு மரியாதை.. அதை மீறி செயல் படும்போது... வாழ்க்கையின் சவால்கள் மீறியவர்களுக்கு எதிர்ப்பாகவே போய்விடுகிறது.

30 வயது தம்பதியினர் பிள்ளை பெறாதபோது 'இன்னுமா பிள்ளை இல்லை...என்று கேட்கும் சமுதாயம் , 60 வயது தம்பதியினர் பெற்றுக்கொண்டால் "இப்போது ஏன்" என்று கேட்க தவறுவதில்லை என்பதிலேயே... அது அது சரியான வயதில் நிகழ வேண்டும் என்ற உண்மை இளைய சமுதாயத்திற்கு தெரிந்திருக்க வேண்டும் என்பதை சொல்கிறது. 

எப்போதும் புத்திசாலிகள் வாழ்க்கையின் முக்கிய முடிவுகளை தனது நிலையை உயர்த்திக் கொள்ளாமல் எடுப்பதில்லை. திருமணப்பந்தலில் நிற்கும் ஒரு மணமகனின் கால் குறைந்த பட்சம் அடுத்த நாளே உழைத்து சம்பாதிக்கும் உறுதியை தன்னை நம்பி வந்தவளுக்கு தர வேண்டும். கல்யாணத்திற்கு பிறகு மனைவிக்கு தைக்கும் ஜாக்கெட்தையல் கூலியை கூட பெற்றோர்களிடம் கேட்கும் சூழ்நிலையை வைத்துக் கொண்டு ‘'சுதந்திரம்" 'யூத்' என்று பேத்திக் கொண்டிருப்பது தவிர்க்க.

இன்றைய இளைய சமுதாயம் தனது நண்பர்களை தெரிவு செய்வதிலும் கவனம் தேவை  Talking Companion க்கும் Friends  வித்தியாசம் தெரியவேண்டும்.

உங்களோடு ஊர்சுத்த , படம் பார்க்க, ப்ரவுசிங் சென்டருக்கு கூட வர, ரெஸ்டாரன்ட்களில் சாப்பிட, மோட்டார் சைக்கிளில் பின்னால் உட்கார்ந்து கதைத்து கொண்டுவர வருபவர்கள் எல்லாம் தனது குடும்பம், தனது தேவை என்று வந்தவுடன் கூட வருவார்கள் என்று ஒரு மாயையில் சுற்றும்போது நிதானித்து யோசிக்கவும்.

உங்களின் நட்பு உண்மையாக இருந்தால் அது காலத்தை வென்று தொடரும். அது உங்களின் வார்த்தைகளுக்குள் வசப்படாது. உங்களின் விளக்கத்தை விளங்காது. விதியின் துரத்தலிலும் விலகாத விதியை தன் வசப்படுத்தியிருக்கும்.

நல்ல நட்பு கிடைக்காதவன் வறுமைக்குள் தள்ளப்பட்டவனுக்கு சமம். ஆனால் இளமையின் துள்ளலில் நீங்கள் தேர்ந்தெடுக்கும் நட்பு உங்களுக்கு நஞ்சாக மாறிவிடாமல் பார்த்துக்கொள்ளும் திறமை உங்களுக்குள் இருக்க வேண்டும்.

சரி இதை இந்த அத்தியாயத்தில் சொல்ல காரணம் ஏன்? .. ஒரு சம்பாதிக்கும் குடும்ப தலைவனின் மொத்த எதிர்பார்ப்பே தனது பிள்ளைகள் நல்லபடியாக வர வேண்டும் என்ற ஒரே நோக்கில்தான் இருக்கும். எந்த தகப்பனும் தன் பிள்ளை கெட்டுப்போக வேண்டும் என்று எப்போதும் நினைக்க மாட்டான். பிறந்த நிமிடத்திலிருந்து தனது பிள்ளைக்கு எது தேவைப்படும் என்று தேட ஆரம்பித்து தேர்ந்தெடுத்து, தேர்ந்தெடுத்து ஒவ்வொன்றாய் செய்த தகப்பன் தன் பிள்ளைகளுக்கு வாழ்க்கையை மட்டும் தேர்ந்தெடுக்க தெரியாது என்று பிள்ளைகள் சொல்லும்போது குடும்பத்தை காக்க எடுத்துக்கொண்ட ஒவ்வொரு தியாகத்தையும் பூஜ்யமாக்கும் சூழ்நிலையை , வார்த்தையை எப்படி தாங்க முடியும்.?

பிள்ளைகள் பயன்படுத்தும் மோட்டார் சைக்கிளின் சிசி, பயன்படுத்தும் ஐ போனின் ஸ்பெக்ஸ் (specification) தெரியாத தகப்பன் இருக்கலாம் ஆனால் அதை வாங்கித் தந்தது அந்த தகப்பன் தான் என்று பிள்ளைகள் உணர்ந்தால் சரி.

பிள்ளைகளை வளர்ப்பதில் தகப்பனின் கடமையும் முக்கியம், பிள்ளைகளுக்கு   “ YES, YES” என்று  எல்லாம் கொடுத்து வளர்க்கும்போது  “NO”  என்பதின் அர்த்ததை புரிய வைக்க தெரிந்திருக்க வேண்டும். சில விசயங்களில் நமக்கு வாங்கி கொடுக்க வசதியிருந்தும் “NO’ என்று சொல்ல தெரிய வேண்டும். இல்லாவிட்டால் எதிர்காலத்தில் பிள்ளைகள் தன் வாழ்க்கையில் ஏற்படும் Rejectionஐ சமாளிக்க தெரியாமல் பாதிக்கப்பட்டு விடக்கூடும்.

பிள்ளையை வளர்க்கும் தாய்மார்களும் [அது எந்த வயது பிள்ளைகளாக இருந்தாலும்  சரி] சில விசயஙகளில் கவனம் தேவை. அன்பாக வளர்க்கிரேன் என்று பிள்ளைகளை அருகதையற்றவர்களாக்கி விடவேண்டாம்.

நாம் வாங்கித்தரும் ஐ போன் , கேட்ஜெட்டுகளால் பொருளாதாரத்தில் மிகப்பெரிய பள்ளம் விழுந்துவிடாது. ஆனால் அதை பிள்ளைகள் தனது தகுதிக்கு மீறி கேட்டு நச்சரிக்கும் அட்டிட்யூடில் இது கொஞ்சம் கொஞ்சமாக குடும்ப பொருளாதாரத்தில் குழி தோண்டும்.

பிள்ளைகள் மீது அன்பு செலுத்துவதற்கும் பரிவு காட்டுவதற்கும் யாரும் தடை சொல்ல மாட்டார்கள். அதே போல் பிள்ளைகளும் நான் என் பெற்றோரை மதிக்கிறேன் என்று வார்த்தை அளவில் மட்டும் சொல்லக்கூடாது. அது 'ஆக்சன்' எனும் செயல்பாட்டு வடிவிலும் இருக்க வேண்டும்.

இது இளைய சமுதாயத்துக்கு மட்டும். 

உங்கள் குடும்ப கெளரவம், பொருளாதார முன்னேற்றம் என்பது ஒரு ரிலே ரேஸ் மாதிரி, உங்கள் தகப்பன் ஏற்கனவே ட்ராக்கில் சரியாக ஒடி வந்து உங்களிடம் அந்த ரிலே பட்டனை தர வருகிறார்.. நீங்கள் இன்னும் தயாராகாமல் நீங்கள் ஒட வேண்டிய தூரத்தையும் அவரையே ஒட சொல்வது எந்த வகையில் ஞாயம்.?

இன்றைய இரவு உணவுக்காக நீங்கள் அமர்ந்திருக்க பசியுடன் தான் நீங்கள் தூங்கப்போக வேண்டும் என்ற சூழ்நிலையை உருவாக்காமல் உங்கள் சாப்பாட்டு தட்டையில் உணவை பரிமார ஒருநாளும் தவராமல் உழைக்கும் ஜீவனை நீங்கள் எப்படி மதிக்க வேண்டும்.?

ZAKIR HUSSAIN

முதல் மிடறு! 16

நீ தந்த உணவைக்கொண்டே
நோன்பை நான் முடித்துக்கொள்ள
பேரீத்தம் பழத்திற்குள்
பெரும் பலத்தைப் பொதித்து வைத்தாய்
இறைவா...

முதல் மிடறு தண்ணீரில்
உடல் குளிரக் கண்டேன்
உதிரத்தில் உற்சாகம்
ஊற்றெடுக்கக் கண்டேன்

உள்நாக்கு நனையும்போது
உயிர் மீளக் கண்டேன்
குளிர்நீர் உடலுக்குள்ளே
குடல் வரைந்து செல்லக் கண்டேன்

நட்டநடு நண்பகலில்
வெட்டவெளிப் பணிக்களத்தில்
தகிக்கின்றக் கதிரவனால்
தேகத்திரவம் தீர்ந்துபோகும்

வெயில் சுட்டு உடல் காய
குளித்து வந்த தோரணையில்
கொப்பளிக்கும் வியர்வை
குடல் சுருங்கிக் காய்ந்துபோகும்

உப்புறையும் உடைகளிலே
உலர்ந்துபோகும் உதடுகளும்
பேச்சும் பிறழ்ந்து வரும்
நாக்கு ஒட்டும் மேலண்ணம்

உட்கார உடல் வலிக்கும்
கண்பார்வை காட்சி மங்கும்
வார்த்தையொன்றும் வாய்பேச
வருவதில்லை தாகத்தால்

ஆனால், அதிசயம்!
உன்மறையைக் கையேந்த
உறுத்தாது ஒரு வலியும்
நோன்பு வைத்த நெஞ்சுக்கு
நின்மறையில் நிழலிருக்கும்

நாக்குப் பிறழாது
நல்மறையை நானோத
உரக்க ஓதுகையில்
செவிக்கும் தேன் இறைவேதம்

கண்ணாடிக் குப்பிகளில்
குடிப்பதற்குக் கனிரசமும்
கழுவிவைத்த குவளைகளில்
கற்கண்டாய்ச் சாறிருக்கும்

எதையுமே நாடாது
இதயமே உன் தஞ்சம்
அறிவித்த நேரம்வரை
காத்திருக்கும் என் களைப்பு

முதல் மிடறு நீர்தன்னில்
புலன்கள் திறந்துகொள்ளும்
புது ரத்தம் பாய்ந்ததுபோல்
பார்வையும் துலங்கிவிடும்

முதல் மிடறு தண்ணீரில்
முடிச்சு ஒன்று அவிழ்ந்து வரும்
உயிர் சுரக்கும் உதிரத்தில்
ஈமானும் திடமாகும்

முதல் மிடறு தண்ணீரில்
நோன்பைப் புரிய வைத்தாய்
இறைவா
முடித்துவைத்த நோன்பில் நின்
முழுக்கருணை காட்டித் தந்தாய்

தணியாத தாகத்தினின்றும்
தரணியைக் காப்பாற்று
இறைவா...
ஒவ்வொரு மிடறு நீரையும்
உவப்போடு தந்துதவு!

சபீர் அஹ்மது அபுஷாஹ்ருக்

தவிர்ப்போம் சஹர் நேரத்தில் டிவி ப்ரோகிராம்களை..! 1

அஸ்ஸலாமு அலைக்கும் வரஹ்......

சகோஸ்....!

நள்ளிரவு நேரம்..!

சாதாரண நாட்களில் நம்மில் பலர் தூங்கி விடுவது உண்டு. வெகுசிலரே நள்ளிரவு நேரமான தஹஜ்ஜத் நேரத்தில் எழுந்து அதை தொழுகிறோம். நைட் ஷிப்டில் இருக்கும் போது மட்டும் எனக்கு இது நல்ல வாய்ப்பாக அமையும். நம்மில் பலர் மற்ற ஐந்து வேலை நேர தொழுகைகளை அதன் அதன் நேரத்தில் சரியாக நிறைவேற்றுபவர்கள் கூட தஹஜ்ஜத் கடமையான தொழுகை இல்லாததால் அதில் அவ்வப்போது கவனக்குறைவாக இருப்பதற்கு வாய்ப்புக்கள் அதிகம். 

தஹஜ்ஜத் என்ற நள்ளிரவு தொழக்கூடிய தொழுகை மற்ற ஐந்து வேலை தொழுகைகள் மற்றவைகளுக்கு கடமை ஆவதற்கு முன்னரே அல்லாஹ் தான் தூதருக்கு மட்டும் இஸ்லாமிய பிரச்சாரத்தின் ஆரம்ப நாட்களிலேயே அதனை கடமை ஆக்கி இருந்தான்..! அதுபற்றிய குர்ஆன் வசனங்கள்...

73:1. போர்வை போர்த்திக் கொண்டிருப்பவரே!

73:2. இரவில் - சிறிது நேரம் தவிர்த்து (தொழுகைக்காக எழுந்து) நிற்பீராக;

73:3. அதில் பாதி (நேரம்) அல்லது அதில் சிறிது குறைத்துக் கொள்வீராக!

73:4. அல்லது அதைவிடச் சற்று அதிகப்படுத்திக் கொள்வீராக; மேலும் குர்ஆனைத் தெளிவாகவும், நிறுத்தி, நிறுத்தியும் ஓதுவீராக.

தஹஜ்ஜூத் என்ற அத்தியாயத்தில் வரும் சில ஹதீஸ்கள்..!

நபி(ஸல்) அவர்கள் தஹஜ்ஜுத் தொழுவதற்காக இரவில் எழும்போது பல் துலக்குவார்கள். - ஹுதைஃபா(ரலி) அறிவித்தார். புஃஹாரி-1136

நபி(ஸல்) அவர்கள் பதினொரு ரக்அத்கள் தொழுவார்கள். அதுவே அவர்களின் (வழக்கமான) தொழுகையாக இருந்தது. அத்தொழுகையில் உங்களில் ஒருவர் ஐம்பது வச

னங்கள் ஓதக் கூடிய நேரம் ஒரு ஸஜ்தாச் செய்வார்கள். ஃபஜ்ருத் தொழுகைக்கு முன்னால் இரண்டு ரக்அத்கள் தொழுதுவிட்டு ஃபஜ்ருத் தொழுகைக்காக முஅத்தின் அழைக்கும் வரை வலப்புறம் சாய்ந்து படுத்துக் கொள்வார்கள். ஆயிஷா(ரலி) அறிவித்தார். புஃஹாரி-1123. 

சில சமயம் நபி(ஸல்) அவர்கள் கால்கள் வீங்கும் அளவுக்கு (இரவில்) நின்று தொழுவார்கள். இதுபற்றி அவர்களிடம் கேட்கப்படும்போது 'நான் நன்றியுள்ள அடியானாக இருக்க வேண்டாமா?' என்று கேட்பார்கள். (முகீரா(ரலி) அறிவித்தார். புஃஹாரி 1130

நபி(ஸல்) அவர்கள் நோயுற்றபோது ஓர் இரவோ, இரண்டு இரவுகளோ தொழவில்லை. - ஜுன்துப்(ரலி) அறிவித்தார்.1124

ஒருவர் நபி(ஸல்) அவர்களிடம் இரவுத் தொழுகை பற்றிக் கேட்டதற்கு நபி(ஸல்) அவர்கள் 'இரவுத் தொழுகை இரண்டிரண்டு ரக்அத்களாகத் தொழ வேண்டும். உங்களில் எவரும் ஸுப்ஹுத் தொழுகை (வக்த் வந்திருக்குமோ என்று அதன் நேரத்தை) பற்றி அஞ்சினால் அவர் ஒரு ரக்அத் தொழட்டும். அவர் (முன்னர்) தொழுவற்றை அது ஒற்றையாக ஆக்கி விடும்" என்று கூறினார்கள். இப்னு உமர்(ரலி) அறிவித்தார் புஃஹாரி 990.

இறைத்தூதர் ஸல் அவர்கள் கூறினார்கள்: 

"இரவுகளின் கடைசித் தொழுகையாக வித்ரை ஆக்கிக் கொள்ளுங்கள்'.  - இப்னு உமர்(ரலி) அறிவித்தார் புஃஹாரி 998.

ரமலானின் இரவுத்தொழுகை ஜமாஅத்  தொழ-தொழவைக்க ஆக சிறந்த நேரம் எது..? 

வருடம் பூராவும் நள்ளிரவில் சுன்னத்தான நபிவழி தொழுகையாக அதிக நன்மைக்காகவேண்டி... தொழ வேண்டிய  தஹஜ்ஜத் தொழுகையை ரமளானில் இஷா ஜமாஅத் முடித்த உடனேயே தொடந்து தராவீஹ் என்ற பெயரில் இமாம் ஜமாத்தோடு தொழுதுவிட்டு தூங்கிவிடுகிறோம். தூய இஸ்லாத்தை பிரச்சாரம் செய்யும் இயக்கங்கள் உட்பட இதே வழிமுறையைத்தான் ஜமாஅத் விஷயத்தில் பின்பற்றுகின்றன. ஆனால், ஹதீஸ்களில் இந்த தொழுகையை நபி ஸல் அவர்கள் இஷா தொழுதுவிட்டு தூங்கிவிட்டு நள்ளிரவில் எழுந்துதான் தொழுது உள்ளார்கள் என்று பல ஹதீஸ்கள் மூலம் அறிகிறோம்.

ரமலானின் இரவுத்தொழுகை ஜமாஅத் பற்றி வந்துள்ள ஹதீஸ்கள்...!

புஃஹாரி 2010. அப்துர்ரஹ்மான் இப்னு அப்தில் காரீ(ரஹ்) அவர்கள் அறிவித்தார். 

நான் உமர்(ரலி) அவர்களுடன் ரமளான் மாதத்தின் ஓர் இரவில் பள்ளிவாசலுக்குச் சென்றேன். அங்கே மக்கள் பிரிந்து, பல குழுக்களாக இருந்தனர். சிலர் தனித்துத் தொழுது கொண்டிருந்தனர். அப்போது உமர்(ரலி) 'இவர்கள் அனைவரையும் ஓர் இமாமின் கீழ் திரட்டினால் அது சிறப்பாக அமையுமே!" என்று கூறிவிட்டு, அந்த முடிவுக்கு உறுதியாக வந்து, மக்களை உபை இப்னு கஅபு(ரலி) அவர்களுக்குப் பின்னால் திரட்டினார்கள். பின்னர், மற்றொரு இரவில் அவர்களுடன் நான் சென்றேன். மக்களெல்லாம் தங்கள் இமாமைப் பின்பற்றித் தொழுது கொண்டிருந்தார்கள். அப்போது உமர்(ரலி) 'இந்தப் புதிய ஏற்பாடு நன்றாக இருக்கிறது; இப்போது (இரவின் முற்பகுதியில்) நின்று வணங்குவதை விட உறங்கிவிட்டுப் பின்னர் (இரவின் பிற்பகுதியில்) வணங்குவது சிறந்ததாகும்!" என்று கூறினார்கள். மக்கள் இரவின் முற்பகுதியில் தொழுது வந்தனர். 

இரவின் கடைசி நேரத்தில் தொழுவதைக் குறித்தே இவ்வாறு உமர்(ரலி) கூறினார். - புஃஹாரி 2012. ஆயிஷா(ரலி) அறிவித்தார். 

நபி(ஸல்) அவர்கள் நள்ளிரவில் பள்ளிக்குச் சென்று தொழுதார்கள். அவர்களைப் பின்பற்றி மக்களும் தொழுதார்கள். விடிந்ததும் மக்கள் இதுபற்றிப் பேசிக் கொண்டார்கள். (மறுநாள்) முதல்நாளை விட அதிகமான மக்கள் திரண்டு நபி(ஸல்) அவர்கள் பின்னால் நின்று தொழுதார்கள். விடிந்ததும் மக்கள் இது பற்றிப் பேசிக் கொண்டார்கள். இந்த மூன்றாம் இரவில் பள்ளிவாசலுக்கு நிறையப் பேர் வந்தனர். நபி(ஸல்) அவர்கள் பள்ளிவாசலுக்கு வந்து தொழுதார்கள்; அவர்களைப் பின்பற்றி மக்களும் தொழுதனர். நான்காம் இரவில், பள்ளிவாசல் கொள்ளாத அளவுக்கு மக்கள் திரண்டனர்; ஆனால், நபி(ஸல்) அவர்கள் ஸுப்ஹுத் தொழுகைக்குத்தான் வந்தார்கள். ஸுப்ஹுத் தொழுகையை முடித்தும் மக்களை நோக்கி, தஷஹ்ஹுத் மக்களை நோக்கி, தஷஹ்ஹுத் மொழிந்து, 'நான் இறைவனைப் போற்றிப் புகழ்ந்து கூறுகிறேன்; நீங்கள் வந்திருந்தது எனக்குத் தெரியாமலில்லை; எனினும், இது உங்களின் மீது கடமையாக்கப்பட்டு, அதை உங்களால் நிறைவேற்ற இயலாமல் போய்விடும் என்று நான் அஞ்சினேன்!' எனக் கூறினார்கள். 

"நிலைமை இப்படியே இருக்க, (ரமளானின் இரவுத் தொழுகையை மக்கள் தனித் தனியாகவே தொழுது கொண்டிருக்க) நபி(ஸல்) அவர்கள் மரணித்தார்கள்!" என்று அறிவிப்பாளர் இமாம் ஸுஹ்ரீ(ரஹ்) அவர்கள் கூறுகிறார்கள். 

சஹர் நேரத்தில் டிவி ப்ரோகிராம்கள் தேவையா...?

இந்நிலையில்.... ரமளானில் கடமையான நோன்பை நோற்க ரஹ்மத்தான சஹர் உணவை சாப்பிட எப்படியும் துயில் எழுந்து விடுகிறோம். அதற்கு ஒரு மணி நேரம் முன்னர் எழுந்து நம்மில் பலர் தஹஜ்ஜத் தொழலாம். மற்ற நாட்களை விட ரமளானில் இது இலகு. ஆனால் அதை செய்யாமல்... ஸஹர் நேரத்தில் முன்னரே எழுந்து இப்போது டிவிக்கு முன்னர் அமர்ந்து விடுகிறோம். காரணம்...? எல்லா இயக்கங்களும் எக்கச்சக்க சஹர் ப்ரோகிராம்கள் போடுகின்றன. இதனை அவசியம் பார்க்க சொல்லி ஏகப்பட்ட விளம்பரங்கள் வேறு. அதிலும் இசையுடன் கூடிய ஏகப்பட்ட வர்த்தக விளம்பரங்கள். குறைந்த நேரமே இருந்தும், அதில் தட்டை பார்த்து சாப்பிடாமல்... டீவியை பார்த்துக்கொண்டே சாப்பிடுகிறோம். ஒரே டிவியில் முடிந்த வரை விளம்பர இடைவெளியில் சில நிகழ்ச்சிகளை காண்கிறோம்.

ஏன்..?

கொஞ்சம் பொறுத்தால்... அதே உரை சிடியாக நமக்கு கிடைக்க போகிறது..! அல்லது ஃப்ரீ டவுன்லோடு ஆப்ஷன் அவர்கள் வெப்சைட்டில் வைக்கிறார்கள்..! அல்லது ரமளான் முடிந்தவுடன்  தங்கள் வழமையான மாலை/இரவு நேர ப்ரோகிராம்களில் மறுஒளிபரப்பு செய்ய போகிறார்கள்...! அப்போது ஆற அமர அமர்ந்து பார்ப்பதைவிட்டுவிட்டு... எதுக்கு நாம் நமது நன்மையை... அதுவும்  வணக்கத்திற்கு சிறந்த ஆயிரம் மாதங்களை விட சிறப்பான லைலத்துல் கத்ர் எல்லாம் வரப்போகிற ரமளானில்... அதுவும்... துவா கேட்கும் சிறந்த நேரத்தை.... ஏன் இழக்கனும்..?   சிந்திக்கவும் சகோஸ்..!

பிரார்த்தனையும் வணக்கமே..!

அல்லாஹ் நம்மை பிரார்த்திக்கவும் சொல்கிறான் எனபதை அறிவோம்.

நபி (ஸல்) அவர்களும் கூட, "பிரார்த்தனையே வணக்கமாகும்" எனக் கூறியுள்ளார்கள். 

இறைவனை வணங்கும் வணக்கத்திற்கு நிகராகக் கருதப்படும் "பிரார்த்தனைகள் அல்லாஹ்வால் ஏற்றுக்கொள்ளப்பட குறிப்பிட்ட சில நேரங்கள் உள்ளன" என்று நபி(ஸல்) அவர்கள் குறிப்பிட்டுள்ளார்கள். 

மக்கள் உறக்கத்திலும் உலக இன்பங்களிலும் ஈடுபட்டிருக்கும் நேரத்தில் அல்லாஹ் நம்பிக்கையாளர்களுக்கு ஒரு வாய்ப்பளிக்கிறான் என்று புரியலாம்.

அல்லாஹ் நமக்கு ஒரு பிரத்தியேகமான பதிலளிக்கும் நேரம் ஏற்படுத்தி தூக்கத்தை வென்று அவனிடம் தமது எல்லாவித தேவைகளை கேட்பவர்களுக்கு அருள நாடுகின்றான் என்றும் புரியலாம்.

பிரார்த்தனைக்கு ஆக சிறந்த நேரம் எது...?

நபி (ஸல்) அவர்கள் கூறினார்கள், "இரவின் பகுதியில் ஒரு நேரம் இருக்கிறது அந்நேரத்தில் எந்த முஸ்லிமும் இந்த உலகத்தின் விஷயத்தில் அல்லது மறுமையின் விஷயத்தில் கேட்டு அது அளிக்கப்படாமல் இருப்பது இல்லை; இது ஒவ்வொரு இரவிலும் இருக்கிறது." (முஸ்லிம் : 757) 

நபி (ஸல்) அவர்கள் கூறினார்கள், "ஒருவர் தமது வணக்கத்தின் போது இறைவனிடம் மிகவும் நெருக்கமாக இருக்க வாய்ப்புள்ள நேரம் இரவின் இறுதி பகுதி நேரம் ஆகும். ஆகையால் உங்களால் அந்நேரத்தில் இறைவனை நினைவுகூர்ந்து வணங்குபவர்களில் ஒருவராக இருக்க இயன்றால் அதை செய்யுங்கள். (அம்ரு இப்னு அபஷ் அவர்கள் அறிவிக்கிறார்கள்:  திர்மிதி, நஸாயீ

அல்லாஹ்வின் தூதர் நபி (ஸல்) அவர்கள் கூறினார்கள், "ஒவ்வோர் இரவின் இறுதியில் மூன்றாம் பகுதியில் நமது இரட்சகனும் ரப்புமாகிய அல்லாஹ் அடிவானத்திற்கு இறங்கிவருகிறான். மேலும், 'என்னை அழைப்பவர் உண்டா?, நான் அவருக்கு பதிலளிப்பேன். என்னிடம் தமது தேவைகளை கேட்பவர் உண்டா? நான் அவருக்கு வழங்கக் கூடும். என்னிடம் பாவமன்னிப்பு கேட்பவர் உண்டா? நான் அவர்களை மன்னிக்கக்கூடும்' என்று கூறுகின்றான்" (அபூ ஹுரைரா (ரலி) அவர்கள் அறிவிகிறார்கள்:ஸஹீஹ் புகாரி)

அந்த நேரம்..., இரவுத்தொழுகைக்கான நேரம் அல்லவா..? அதைவிட அல்லாஹ்வே வலியுறுத்திய துவா கேட்க சிறப்பான நேரம் அல்லவா..? அந்த நேரத்தை எந்த ஜமாஅத்தும் ஜமாஅத் தொழுகையில் ஹயாத் ஆக்கக்காணோம்...! ஆனால், நம்மை துவா கேட்கவும் விடுவதாக இல்லையே..? இது சரியா..? 

ஆகவே, அந்த நேரம் தஹஜ்ஜத் தொழும் நேரம். தொழுதுகொண்டே சஜ்தாவில்... அல்லது தொழுதுவிட்டு இருகரம் ஏந்தி... மனம் ஒருமித்து.... நமது தேவைகளை நாம் கேட்கும் துவாவுக்கான அல்லாஹ் ஏற்படுத்தி தந்த சிறந்த நேரம். இதை பாழ்படுத்துகின்றன இந்த சஹர் நேர ப்ரோகிராம்கள்..! 

எவரும் இதை சஹர் நேரத்தில் மக்களுக்கு சொல்வதில்லை. சொன்னால் அது அவர்களுக்கே நஷ்டம். நாம் தான் நம்மிடையே இதை பரப்பிக்கொள்ள வேண்டும்..! யார் அதிக நேரம் ப்ரோகிராம் போடுவது... எந்த இயக்கத்துக்கு முன்னணி சேனல்கள் கிடைத்தன... எவ்வளவு விளம்பரம் வருகின்றன.... டிஆர்பி ரேட் எப்படி.... என்பதிலேயே போட்டி... இவற்றில் லீடிங் என்றால் அது பெருமை..!

(குறிப்பு: இது ஐந்து - ஆறு வருடங்களுக்கு முன்னர் உள்ள நிலை. இப்போது என்ன நிலை என்று தெரியவில்லை. ஏனெனில், நான் ஸஹர் நேரத்தில் டிவி போட்டு ஐந்தாறு வருடங்கள் ஆகிவிட்டன.)

"என்னிடமே நீங்கள் பிரார்த்தியுங்கள்; நான் உங்(கள் பிரார்த்தனை)களுக்கு பதிலளிக்கிறேன்; எவர்கள் என்னை வணங்குவதை விட்டும் பெருமையடித்துக் கொண்டிருக்கிறார்களோ, அவர்கள் சிறுமையடைந்தவர்களாக நரகத்தில் நுழைவார்கள்." (அல்குர்ஆன் 4:60) 

ஆகவே.... இஸ்லாமிய தாவா நோக்கத்தில் அமைந்த சொற்பொழிவு என்றாலும்... அந்த  ஸஹர் நேர டிவி ப்ரோக்ராம்களை எல்லாம் ஒதுக்கி விட்டு... நாம் நமக்கான நன்மையை சரியான நேரத்தில் தொழுது சிறப்பான நேரத்தில் பிரார்த்தித்து பெற்றுக்கொள்ள முயல்வோமாக. வல்ல நாயன் அல்லாஹ் அதற்கு நமக்கு கிருபை செய்வானாக. ஆமீன்.

முஹம்மத் ஆஷிக் citizen of world

நன்றி : உம்மத் - http://onlyoneummah.blogspot.ae/2012/07/blog-post_31.html

ரமளானும் அதன் சிறப்புகளும் 1

அல்லாஹ்வின் திருப்பெயரால். . .

அன்பார்ந்த சகோதர சகோதரிகளே! (அஸ்ஸலாமு அலைக்கும்(வரஹ்) இறைவனின் சாந்தியும், சமாதானமும் தங்கள் மீது என்றென்றும் நிலவட்டுமாக!)  ஒவ்வொரு வருடமும் நம்மை வந்து அடையும் புனித மாதத்தை வரவேற்பதில் மிக அதிக அளவில் நாம்  மகிழ்ச்சி  அடைகிறோம். இன்னும் சில தினங்களில் நம்மை வந்து அடைய இருக்கும் ரமளானைப் பற்றி தெரிந்து கொள்வோம் வாருங்கள்.

நம்பிக்கை கொண்டோரே! நீங்கள் (இறைவனை) அஞ்சுவதற்காக உங்களுக்கு முன் சென்றோர் மீது கடமையாக்கப்பட்டது போல் உங்களுக்கும் குறிப்பிட்ட நாட்களில் நோன்பு கடமையாக்கப்பட்டுள்ளது. (அல்குர்ஆன் : 2:183)

நோன்பு சென்று போன சமூகத்தாருக்கும் கடமையாகி ஆரம்ப காலம் முதல் கடைபிடிக்கப்பட்டு வந்துள்ளது. நீங்கள் இறைவனை அஞ்சுவதற்காக நோன்பை கடமையாக்கி இருக்கிறேன் என்று வல்ல அல்லாஹ் கூறுகிறான்.

ரமளான் பிறை:

'ரமளான் பிறையை நீங்கள் காணும் வரை நோன்பு நோற்காதீர்கள். (மறு) பிறையைக் காணும்வரை நோன்பை விடாதீர்கள்; உங்களுக்கு மேக மூட்டம் தென்படுமானால் (முப்பது நாள்களாக) அதைக் கணித்துக் கொள்ளுங்கள்.' என்று நபி(ஸல்) அவர்கள் கூறினார்கள். (அறிவிப்பவர் : அப்துல்லாஹ் இப்னு உமர் (ரலி) (புகாரி : 1906)

அருள்வாயில்கள் திறக்கப்படும் மாதம்:

'ரமளான் மாதம் வந்து விட்டால் சுவர்க்கத்தின் வாசல்கள் திறக்கப் படுகின்றன' என்று நபி (ஸல்) அவர்கள் கூறினார்கள். (அறிவிப்பவர்:அபூஹுரைரா(ரலி)நூல்: புகாரி: 1898).

'ரமளான் மாதம் வந்து விட்டால் வானத்தின் வாசல்கள் திறக்கப் படுகின்றன. நரகத்தின் வாசல்கள் அடைக்கப்படுகின்றன. ஷைத்தான்கள் விலங்கிடப்படுகின்றனர்' என்று நபி (ஸல்) அவர்கள் கூறினார்கள். (அறிவிப்பவர்:அபூஹுரைரா (ரலி) நூல் புகாரி :1899).

நோன்பும் உள்ளமும்:

நோன்பு பசியை உணரச்செய்கிறது. நல்ல பழக்கங்களை கற்றுத் தருகிறது. பிறருக்கு உதவும் எண்ணத்தை தாராளமாக வழங்குகிறது. மற்ற நேரங்களில் உதவும் எண்ணம் இல்லாதவர்கள் கூட நோன்பு காலங்களில் பிறருக்கு உதவி செய்யும் நிலைகளை காணமுடிகிறது.

எந்த ஒரு காரியத்தையும் தொடர்ந்து செய்தால் பழக்கமாகிவிடும். மற்ற நேரங்களில் மனிதர்கள் பல தவறுகளில் இருந்தாலும் நோன்புக் காலங்களில் எல்லாவற்றையும் தவிர்த்துக் கொள்கிறார்கள். இப்படியே தொடர்ந்து கொண்டு இருப்பதால் (வருடா வருடம் நோன்பு வைப்பதால்) இறையச்சத்துடன் நோன்பு வைத்தவர்களின் கஞ்சத்தனம், தீய செயல்கள் இவையெல்லாம் கொஞ்சம் கொஞ்சமாக அவர்களை விட்டு அகன்று உள்ளத்தை தூய்மைபடுத்தி நல்லபழக்கத்தை கற்றுத்ததருகிறது புனித ரமளான் நோன்பு.

ரமளானின் சிறப்புகள்:

இந்தக் குர்ஆன் ரமளான் மாதத்தில் தான் அருளப்பட்டது. (அது) மனிதர்களுக்கு நேர் வழி காட்டும். உங்களில் அம்மாதத்தை அடைபவர் அதில் நோன்பு நோற்கட்டும். (அல்குர்ஆன் : 2:185)

'சொர்க்கத்தில் 'ரய்யான்' என்று கூறப்படும் ஒரு வாசல் இருக்கிறது! மறுமை நாளில் அதன் வழியாக நோன்பாளிகள் நுழைவார்கள். அவர்களைத் தவிர வேறு எவரும் அதன் வழியாக நுழைய மாட்டார்கள்! 'நோன்பாளிகள் எங்கே?' என்று கேட்கப்படும். உடனே அவர்கள் எழுவார்கள்; அவர்களைத் தவிர வேறு எவரும் அதன் வழியாக நுழைய மாட்டார்கள்! அவர்கள் நுழைந்ததும் அவ்வாசல் அடைக்கப்பட்டுவிடும். அதன் வழியாக வேறு எவரும் நுழையமாட்டார்கள்!' என்று நபி(ஸல்) அவர்கள் கூறினார்கள். (அறிவிப்பவர் : ஸஹ்ல் (ரலி) நூல் : புகாரி : 1896)

'நோன்பு (பாவங்களிலிருந்து காக்கின்ற) கேடயமாகும்; எனவே நோன்பாளி கெட்ட பேச்சுகளைப் பேசவேண்டாம்! முட்டாள் தனமான செயல்களில் ஈடுபட வேண்டாம்! யாரேனும் அவருடன் சண்டைக்கு வந்தால் அல்லது ஏசினால் 'நான் நோன்பாளி!' என்று இருமுறை கூறட்டும்! என் உயிர் எவன் கைவசம் இருக்கிறதோ அ(ந்த இறை)வன் மேல் ஆணையாக! நோன்பாளியின் வாயிலிருந்து வீசும் வாடை அல்லாஹ்விடம் கஸ்தூரியின் வாடையை விடச் சிறந்ததாகும்! (மேலும்) 'எனக்காக நோன்பாளி தம் உணவையும் பானத்தையும் இச்சையையும்விட்டு விடுகிறார்! நோன்பு எனக்கு (மட்டுமே) உரியது; அதற்கு நானே கூலி கொடுப்பேன்! ஒரு நன்மை என்பது அது போன்ற பத்து மடங்குகளாகும்!' (என்று அல்லாஹ் கூறினான்)' என்று நபி(ஸல்) அவர்கள் கூறினார்கள். (அறிவிப்பவர் : அபூ ஹுரைரா(ரலி) நூல்: புகாரி : 1894)

'நோன்பாளிக்கு இரண்டு மகிழ்ச்சிகள் உள்ளன. ஒன்று நோன்பு துறக்கும் போது ஏற்படும் மகிழ்ச்சியாகும். மற்றொன்று தனது இறைவனைச் சந்திக்கும் போது கிடைக்கும் மகிழ்ச்சியாகும்' என்று நபிகள் நாயகம் (ஸல்) அவர்கள் கூறினார்கள். அறிவிப்பவர்: அபூஹுரைரா (ரலி) நூல்: புகாரி : 1904)

நோன்பு திறப்பதும் ஸஹர் உணவும்:

சிலபேர் 2மணிக்கு ஸஹர் செய்து விட்டு தூங்கி விடுகிறார்கள். ஸஹர் நேரத்தில் ஸஹர் உணவை சாப்பிடுவதுதான் சிறந்தது.

நீங்கள் ஸஹர் செய்யுங்கள். ஏன் எனில் ஸஹரில் பரக்கத் (அபிவிருத்தி) உள்ளது என்று நபி(ஸல்) அவர்கள் கூறினார்கள். அறிவிப்பவர்: அனஸ் (ரலி) (புகாரி,முஸ்லிம்)

எனது சமுதாயத்தினர் நோன்பு திறப்பதை அவசரப்படுத்தி ஸஹர் செய்வதைப் பிற்படுத்தும் காலம் வரை நன்மையில் இருக்கின்றனர். (புகாரி,முஸ்லிம்)

குர்ஆன் ஓதுதல்:

திருக்குர்ஆனை ஐந்து வேளை தொழுத பிறகும் ஓதுங்கள். நேரம் கிடைப்பவர்கள் மற்ற நேரங்களிலும் ஓதுங்கள். நன்மையை வாரி வழங்கும் இந்த மாதத்தில்தான் திருக்குர்ஆன் இறக்கியருளப்பட்டது.

இந்த மாதத்தில் குர்ஆனை முழுவதும் ஓதி முடித்து விட வேண்டும் என்பது சிலரின் நம்பிக்கை. ஆனால் இதற்கு எந்த ஆதாரமும் கிடையாது. (நிதானமாக குர்ஆன் முழுவதையும் ஓதி முடிக்கலாம்). அவசரப்படாமல் குர்ஆனை தெளிவாக நிறுத்தி நிதானமாக ஓதுவது மிகச்சிறந்த நன்மையை பெற்றுத்தரும்.

இரவுத்தொழுகை:

ரமளானில் நபி(ஸல்) அவர்களின் தொழுகை எவ்வாறு இருந்தது என்று ஆயிஷா(ரலி) அவர்களிடம் கேட்டேன். அதற்கவர்கள் 'நபி(ஸல்) அவர்கள் ரமளானிலும் ரமளான் அல்லாத நாட்களிலும் பதினொரு ரக்அத்களை விட அதிகமாகத் தொழுததில்லை என்று ஆயிஷா(ரலி) அவர்கள் கூறினார்கள். (அறிவிப்பவர் : அபூ ஸலமா (ரலி) (புகாரி : 1147)

லைலத்துல் கத்ர்:

'மகத்துவமிக்க இரவில் இதை நாம் அருளினோம். மகத்துவமிக்க இரவு என்றால் என்னவென உமக்கு எப்படித் தெரியும்? மகத்துவமிக்க இரவு ஆயிரம் மாதங்களை விடச் சிறந்தது. வானவர்களும், ரூஹும் அதில் தமது இறைவனின் கட்டளைப்படி ஒவ்வொரு காரியத்துடனும் இறங்குகின்றனர். ஸலாம்! இது வைகறை வரை இருக்கும்.' (அல்குர்ஆன் 97:1-5)

'நம்பிக்கை கொண்டவராகவும் நன்மையை எதிர்பார்த்தவராகவும் லைலத்துல் கத்ர் எனும் புனித இரவில் நின்று வணங்குகிறவரின் முந்தைய பாவங்கள் மன்னிக்கப்படும்' என்று நபி(ஸல்) அவர்கள் கூறினார்கள். (அறிவிப்பவர் : அபூ ஹுரைரா(ரலி) (புகாரி : 35)

'லைலத்துல் கத்ரில் நம்பிக்கையுடனும் நன்மையை எதிர்பார்த்தும் வணங்குகிறவரின் முன் பாவம் மன்னிக்கப்படுகிறது. ரமளானில் நம்பிக்கையுடனும் நன்மையை எதிர்பார்த்தும் நோன்பு நோற்கிறவர்களின் முந்தைய பாவங்கள் மன்னிக்கப்படுகின்றன.' என்று நபி(ஸல்) அவர்கள் கூறினார்கள். (அறிவிப்பவர் : அபூ ஹுரைரா(ரலி) (புகாரி : 1901)

'ரமளானின் கடைசிப் பத்து நாள்களில் உள்ள ஒற்றைப்படை இரவுகளில் லைலத்துல் கத்ரைத் தேடுங்கள்!' என்று நபி(ஸல்) அவர்கள் கூறினார்கள். (அறிவிப்பவர் : ஆயிஷா(ரலி) (புகாரி : 2017)

நோன்பில் பொய் பேசுவது:

நோன்பு வைத்துக்கொண்டு தம் நடவடிக்கையை மாற்றிக்கொள்ளாதவர்களுக்கு இறைத்தூதரின் எச்சரிக்கை:

'பொய்யான பேச்சையும், பொய்யான நடவடிக்கைகளையும் விட்டு விடாதவர் தம் உணவையும் பானத்தையும் விட்டு விடுவதில் அல்லாஹ்வுக்கு எந்தத் தேவையுமில்லை!' என்று நபி(ஸல்)அவர்கள் கூறினார்கள்.(அறிவிப்பவர்:அபூ ஹுரைரா(ரலி) நூல்: புகாரி : 1903)

பாவ மன்னிப்பு:

'ரமளானில் நம்பிக்கையுடனும் நன்மையை எதிர்பார்த்தும் (தொழுது) வணங்குகிறவரின் முன்னர் செய்த பாவங்கள் மன்னிக்கப்படும்!' என்று நபி(ஸல்) அவர்கள் கூறினார்கள். (அறிவிப்பவர் : அபூ ஹுரைரா(ரலி) , நூல்: புகாரி : 2008)

'ரமளானில் நம்பிக்கையுடனும் நன்மையை எதிர்பார்த்ததும் நோன்பு நோற்கிறவர் (அதற்கு) முன் செய்த பாவங்கள் மன்னிக்கப்படும்! லைலத்துல் கத்ரில் நம்பிக்கையுடனும் நன்மையை எதிர்பார்த்தும் நின்று வணங்குகிறவரின்இ முன்னர் செய்த பாவங்கள் மன்னிக்கப்படும்!' என்று நபி(ஸல்) அவர்கள் கூறினார்கள்.(அறிவிப்பவர்:அபூஹுரைரா(ரலி),நூல்: புகாரி : 2014)

உம்ரா செய்தால் ஹஜ் நன்மை:

ரமலான் மாதத்தில் உம்ரா செய்வது ஹஜ் செய்த நன்மையை பெற்றுத் தரும்.

'ரமளான் மாதத்தில் உம்ரா செய்வது ஹஜ் (செய்த நன்மை) ஆகும்' என்று நபி (ஸல்) அவர்கள் கூறினார்கள்.அறிவிப்பவர்: இப்னு அப்பாஸ் (ரலி), நூல்: புகாரி : 1782)

கூடுதல் நன்மைகளை பெற்றுத் தரும் மாதம்:

மற்ற எந்த வணக்கத்தை விடவும் நோன்புக்குக் கூடுதல் கூலியை அல்லாஹ் வழங்குகிறான். இது நோன்புக்கு உள்ள தனிச் சிறப்பாகும். 'ஒவ்வொரு நன்மையான காரியத்திற்கும் பத்து முதல் எழுநுறு மடங்கு வரை கூலி வழங்கப்படுகிறது. ஆனால் நோன்பு எனக்கே உரியது. எனவே அதற்கு நானே கூலி வழங்குவேன்' என்று அல்லாஹ் கூறுவதாக நபிகள் நாயகம் (ஸல்) அவர்கள் கூறுகிறார்கள். (அறிவிப்பவர் அபூஹுரைரா (ரலி) நூல்: முஸ்லிம் 2119)

முன்னேற்பாடுகள்:

ரமளான் மாதத்தில் அதிகமதிகம் அமல்களுக்கு நேரம் ஒதுக்க வேண்டும் என்ற உறுதியான எண்ணத்துடன்: ஷாபான் மாதத்திலேயே நம்முடைய எல்லா தயாரிப்புகளையும் செய்து கொள்ள வேண்டும். நாம் செய்து முடிக்க வேண்டிய வேலைகள் எதையும் தாமதப்படுத்தாமல் செய்து விட வேண்டும். சகோதரிகள் ரமளான் மாதத்திற்கு தேவையான மளிகைகடை பொருட்கள் அனைத்தையும் வாங்கி வைத்துக்கொண்டு மசாலா, மாவுப்பொருட்களை தயார் செய்து வைத்துக்கொள்ளவேண்டும்.

வீட்டில் உள்ள அனைவருக்கும் பெருநாளைக்கு வேண்டிய துணிகளை இந்த மாதத்திலேயே எடுத்து வைத்துக்கொள்ளலாம். ரமளானில் வீண் அலைச்சல் இருக்காது.

சகோதரர்கள் நோன்பிற்கு வீட்டிற்கும், உறவினர்களுக்கும் பணம் அனுப்புவீர்கள் பணத்தை இந்த மாதத்திலேயே அனுப்பி நோன்புக்கு முன்பாகவே அனைவருக்கும் கிடைக்கும்படிச் செய்வது நல்லது. ஏனென்றால் நிறைய இடங்களில் பணம் எப்பொழுது வரும் என்ற சிரமத்தில் காத்திருப்பதை காணமுடிகிறது.

சகோதரிகள் கையில் பணம் கிடைத்தவுடன். நோன்பு நடுவில்தான் உறவினர்களுக்கு கொடுப்பேன் என்று பிடிவாதத்துடன் இருக்கிறார்கள். நோன்பு ஆரம்பிக்கும் முன்பே உறவினர்களுக்கு கொடுத்து விட்டால் அவர்கள் எதிர்பார்ப்பின்றி பட்ஜெட் போட்டு தேவையானதை வாங்கி வைத்துக்கொள்வார்கள்.

நோன்பு காலங்களில் செய்யவேண்டியவை:

ஸஹரில் உணவை தயாரிக்கிறேன் என்று சிரமம் எடுக்காமல் தூங்குவதற்கு முன்பாகவே உணவை தயாரித்து வைத்துக் கொண்டு ஸஹரில் சூடு காட்டி சாப்பிடலாம்.

தினமும் மாவு பொருட்களை (சப்பாத்தி, புரோட்டா) தயார் செய்யாமல் இரண்டு நாட்களுக்கு ஒரு தடவை தயார் செய்து பிரிட்ஜில் வைத்துக்கொள்ளலாம்.

நோன்புக் கஞ்சியை தினமும் தயாரிக்க வேண்டியதில்லை. இரண்டு நாளைக்கு தேவையானதை தயார் செய்து கொள்ளலாம்.

கடற்பாசி முக்கிய உணவாக இருக்கிறது. இதையும் இரண்டு நாளைக்குத் தேவையானதை தயார் செய்து கொள்ளலாம்.

சகோதரிகள் பிள்ளைகளை பள்ளிக்கூடம் அனுப்பிவிட்டு ஒரு தூக்கம் போட்டு விட்டு நோன்பு திறப்பதற்கு வேண்டிய அனைத்தையும் லுஹருக்கு முன்பாகவே தயார் செய்து வைத்து விட்டால் நோன்பு திறக்கும் நேரத்தில் பிரஷர் அதிகமாகி அவசர அவசரமாக சமைத்து படபடப்புடன் நோன்பு திறப்பதிலிருந்து பாதுகாப்பு பெறலாம். செய்து வைத்த உணவுகளை நோன்பு திறப்பதற்கு முன்பாக சூடு காட்டிக்கொள்ளலாம்.

நோன்பு வைத்துக்கொண்டு தொழாமல் பிள்ளைகள், பெரியவர்கள் சில இடங்களில் இருப்பதை காணமுடிகிறது. சகோதர, சகோதரிகள் கவனத்தில் கொண்டு அவர்களையும் தொழுபவர்களாக மாற்ற முயற்சி செய்ய வேண்டும்.

ரமளான் மாதத்தில் சொர்க்கத்திற்கு செல்வதற்குரிய வழிவகைகள் நிறைய இருக்கின்றன. ஆகவே நாம் வருகின்ற ரமளான் மாதத்தின் நோன்பை முழுவதுமாக வைத்து வல்ல அல்லாஹ்வின் திருப்தியை பெற்றுக்கொள்வதற்கான காரியங்களில் ஈடுபடுவோம்.

நாம் சொர்க்கம் செல்வதற்குரிய வழியாக இந்த ரமளான் மாதத்தை மாற்றி நோன்பை வைப்பதற்கும், அமல்களை அதிகம் செய்வதற்கும், நம் அனைவருக்கும் வல்ல அல்லாஹ் அருள் புரியட்டும்!.

ரமலானின் சிறப்பைப்பற்றி விரிவாக தொடராக வரவேண்டியது. நேரமின்மையால் விரிவாக எழுதமுடியவில்லை.

S. அலாவுதீன்

நபிமணியும் நகைச்சுவையும் - ஃபேஸ்புக்கில் மதிப்புரை 6

ஜனரஞ்சக இணையதளமான அதிரை நிருபர்.இன் தளத்தின் இரண்டாவது வெளியீடான நபிமணியும் நகைச்சுவையும் புத்தகத்தை புத்தக வெளியீடுக்கு முன்பே நான் கேட்டுக்கொண்டதன் பேரில் எனக்கு சென்ற வாரம் அனுப்பி வைத்திருந்தனர்.

அதிரை நிருபர் தளத்தை தொடர்ந்து வாசிப்பவர்களுக்கு சகோ இக்பால் சாலிஹ் நன்கு பரிச்சயமாகியிருக்கக்கூடும். எனக்கு இப்புத்தகத்தில் தான் அவர் அறிமுகமானார். அதனால் தான் ஒருவித எதிர்பார்ப்பு இருந்துக்கொண்டே இருந்தது. ஒரு பத்து பதினைந்து ஹதீஸ்கள், அதை வைத்து சம்பவங்கள் தொகுத்து முடிஞ்சளவு பக்கத்தை நீட்டினாலும் 50-க்குள்ள வந்திருக்கும் சிறிய புத்தகம் என்ற அளவிலேயே கற்பனைக்குள் அடக்கி வைத்திருந்தது எவ்வளவு தவறென்று புத்தகத்தின் கனத்தை பார்த்த பின் தான் தெரிந்தது. அதுவே புத்தகத்தை வாசிக்கவும் வைத்தது. "ம்ம்ம் என்னத்தான் சொல்லியிருப்பார்?"

அவர் புத்தகத்தில் என்னன்ன சொல்லியிருப்பார் என்பதை விட அதனை சொன்ன விதம் தான் தொடர் வாசித்தல் உணர்வை கட்டாயமாக்கியது. ஓர் உதாரணம் , நபி ஸல் அவர்களை குறிப்பிட வந்த இடங்களில் எல்லாம் ஆசிரியரின் அழகுதமிழ் வர்ணனை புத்தக வாசிப்பின் சளிப்பை களையச்செய்தது. நபிகளாரை மட்டுமல்ல, நபர்களை மட்டுமல்ல, ஒவ்வொரு வரிகளையும் பார்த்து பார்த்து தான் செதுக்கியிருக்கிறார். ஒவ்வொரு சம்பவங்களையும் ரசித்து ரசித்து எழுதி ரசிக்க ரசிக்க வாசிக்க வைக்கிறார். இது புத்தகத்தின் முதல் வெற்றி என்றே சொல்வேன்.

நபி ஸல் அவர்களின் நகைச்சுவை எவ்வாறாக அமைந்தது என்பதில் இருந்து தொடங்குகிறது புத்தகம். அப்போது தான் தெரிந்தது இப்புத்தகம் நகைச்சுவை சம்பவங்களை அடுக்கி வைத்து நிரப்பப்பட்ட புத்தகமல்ல.. மாறாக ஒரு சாம்ராஜ்யத்தின் தலைவர், அல்லாஹ்வால் தேர்ந்தெடுக்கப்பட்டு சிறப்பிக்கப்பட்ட இறைத்தூதர், இறைவனின் வாக்குகளை மக்களுக்கு எடுத்துரைத்து நேர்வழிகாட்டும் ஆன்மீகத்தலைவர் எனும் அந்தஸ்தை பெற்றவரின் இயல்பான வாழ்வு எவ்வளவு ரசனையானது என்பதையும் அவரின் நகைச்சுவை உணர்வும் அதனுடன் இணைந்தே இருந்த அவரின் செயல்களையும் விவரிக்கும் புத்தகம் இது. அதற்காக சொல்லப்பட்ட ஒவ்வொரு விஷயமும் ஆசிரியரின் தேடலின் துல்லியத்தை மௌனமாக சொல்லிக்கொண்டே வந்தது.

ஆயிஷ், ஹுமைரா (சிகப்பழகே) என தன் மனைவியின் மீது அன்பை பொழிந்த நிகழ்வுகளாகட்டும்,

மனைவியுடன் ஓட்டப்பந்தயத்தில் ஈடுபட்டதாக இருக்கட்டும்

ஆயிஷா ரலி சவ்தா ரலிக்கு உணவு ஊட்டிவிட கை திசை மாறி சவ்தா ரலியின் முகத்தை உணவாக்கிய போது ஆயிஷா ரலியின் கையை பிடித்துக்கொண்ட நபி ஸல், சவ்தாவை நோக்கி ஆயிஷா முகத்தினை அப்படி செய்யும் படி சொல்லி அந்த தருணத்தை மூவருக்கும் இனிமையாக்கியதாகட்டும்..

சுப்ஹானல்லாஹ்... வாழ்வின் நிகழ்வுகளை விவரித்து நபிகளாரின் உண்மை குணாதிசயத்தை இயம்பியது. மார்க்கம் மார்க்கம் என்று கூறிக்கொண்டு எந்நேரமும் கஞ்சி போட்ட உள்ளத்தை கொண்டு விரைப்பாகவே நடந்துக்கொள்பவர்களுக்கு இந்த புத்தகத்தில் தொகுக்கப்பட்ட விஷயங்கள் சம்மட்டி அடி!

ரொம்பவே அலைய விடாமல் , ஒவ்வொரு அத்தியாயத்தின் முடிவிலும் ஆதாரங்கள் காட்டப்பட்டன. ஒவ்வொரு சம்பவத்தின் நம்பகத்தன்மையை அதிகரிக்கச்செய்தது. ஹதீஸ் கிரகந்தங்களிலிருந்து மட்டுமல்லாமல் இன்னும் பல பத்திரிக்கைகள், புத்தகங்கள், மேற்கோள்கள் என பலவற்றையும் சேர்த்து கொடுத்துள்ளார்.

சிரிப்பதையும் நகைச்சுவையாய் பேசுவதையும் கூட ஹராம் என்ற அளவில் நினைக்கும் மார்க்கப்பற்று கொண்ட சராசரி மனிதர்களாகிய நமக்கான வழிகாட்டியாம் மாமனிதர் நபி ஸல் அவர்களின் வாழ்க்கையும் அதில் அவர் புகுத்திய இனிமையும் நமக்கு முன்மாதிரி. இதனை பலர் அறியாததால் தான் கரார் பேர்வழியாகவே உலாவுகிறார்கள். இப்புத்தகம் அனைவரும் வாசிக்க வேண்டியது. மட்டுமல்லாமல் படிப்பினை பெறக்கூடியது. வாளால் பரப்பட்ட மதம் என்றும் ரத்தக்கறை படிந்த மார்க்கம் என்றும் இஸ்லாத்தையும் அதன் தலைவரையும் வசைபாடுபவர்களுக்கு வாசிக்க கொடுக்க வேண்டிய புத்தகம். "பார் எங்கள் உத்தம நபியின் கருணையை, பார் எங்கள் கண்மணி நபி ஸல் அவர்களின் இனிய குணத்தை, பார் எங்கள் உயிரினும் மேலான மாமனிதரின் சுவாரசியமான வாழ்வை"

அருமையான புத்தகத்தை அறிமுகப்படுத்தியதற்கும் கிடைக்கச்செய்ததற்கும் சகோ AbuIbrahim Nainathambi அவர்களுக்கு மனமார்ந்த நன்றிகள். ஜஸக்கல்லஹ் ஹைர். 5000 பிரதிகள், அனைத்தும் விற்று விரைவில் அடுத்த எடிசன் வெளியிட என் பிரார்த்தனைகள். நீங்களும் துஆ செய்யுங்கள் சகோஸ்

புத்தகத்தின் பெயர் : நபிமணியும் நகைச்சுவையும்

ஆசிரியர் : இக்பால் எம். சாலிஹ்

பதிப்பகம் : அதிரை நிருபர்

விலை :150

பக்கம் :256

புத்தகம் வாங்க தொடர்புக்கு :

முஹம்மது அபூபக்கர் (மூனாகீனா) 9840549700

அதிரை அஹ்மது : 9894989230

ஜமீல் M ஸாலிஹ் : 9043727525

(கவனிக்க : இந்த புத்தக விற்பனையின் அனைத்து தொகையும் பிறமத சகோதரர்களுக்கு இஸ்லாத்தை எடுத்துச் சொல்லும் பணிக்கும் மற்றும் தாவா பணிக்குமாக முழுவதும் வழங்கப்படுகிறது... இதில் எவ்வித இலாப நோக்கமோ அல்லது புத்தகத்தின் விலை அடக்கமோ பதிப்பகத்தாருக்கு சேராது. )

ஆமினா முஹம்மது

நன்றி:டீக்கடை முகநூல் குழுமம்

அனைவருக்கும் பொதுவான அதிகாரம் 1

:::::: தொடர் - 27 ::::::

உலகளாவிய ஓர் இயக்கத்திற்குத் தேவையான தன்மைகளுள் இரண்டாவது, அதிகாரம் பெற்ற மேல்மட்ட நிர்வாக அமைப்பாகும்.  அந்த நிர்வாகத்திலிருந்தே அதன் கொள்கைகள் வகுக்கப்பட்டுப் பரப்பப்பட வேண்டும்.  அவற்றை மக்கள் நடைமுறையில் நடத்திக் காட்டவேண்டும்.  இந்த நடைமுறை, மூன்று தனிப் பிரிவுகளைக் கொண்டதாகும்.

சட்டத் துறை:  அனுமதிக்கப்பட்ட, மற்றும் தடை செய்யப்பட்ட விதிகளையும் உள்ளடக்கிய சட்டத் தொகுப்பு, அதைத் தொடர்ந்த வெகுமதிகளையும் தண்டனைகளையும் பற்றி விரிவான வழிகாட்டுதல்களைக் கொண்டிருக்க வேண்டும்.  இந்தச் சட்ட வழிகாட்டி, வாழ்க்கையின் அனைத்துத் தன்மைகளையும் உள்ளடக்கி, அச்சட்டத் தொகுப்பு உருவாக்கப்பட்ட நேரத்தில் இல்லாத புதிது புதிதாக உருவாகும் சூழ்நிலைகளுக்கு ஏற்ப, அவற்றில் அனுசரித்துப் போகக்கூடிய தன்மை இருக்க வேண்டும். 

நீதித் துறை:  சட்டத்தை நடைமுறைப் படுத்தி, சட்ட மீறுதல்களையும், கேள்விகளையும், அவற்றின் விளக்கங்களையும் உள்ளடக்கியதே இப்பிரிவாகும்.  இத்துறையானது, பல்வேறு சட்ட நுனுக்கங்களையும், அவை நவீன உலகில் மனித வாழ்வில் உண்டாக்கும் தாக்கங்களையும் பற்றித் தெளிவான புரிதலைக் கொண்டிருக்க வேண்டும்.  அப்போதுதான், ஒவ்வொரு நூற்றாண்டிலும் ஏற்படும் முன்னேற்றங்களின் அடிப்படையில் சட்டத்தை நடைமுறைப்படுத்த வாய்ப்பு உண்டாகும்.  காலம் மாறுபடும்போது அவ்வக்காலத்தின் மனிதர்களும் மாறுபடு கின்றார்கள்; அவர்களின் பழக்க வழக்கங்களும் மாறுபடுகின்றன அல்லவா?  

சட்டத்தை நடைமுறைப்படுத்தும் அமைப்பு:  சட்டத்தை மதிப்பவர் யார், அதை முறிப்பவர் யார் என்பதை விளக்கி, சட்டத்தை மதிப்பவர்களுக்கு ஆதரவாகவும், அதனை மீறுபவர்களுக்கு எதிராகவும் நடவடிக்கை எடுக்கும் பிறிவுதான் இம்மூன்றாவது அமைப்பாகும்.  பொதுவான ஒற்றுமை, பேரறிவு, ராஜதந்திரம், உறுதிப்பாடு போன்ற தன்மைகளைப் பெற்று, சட்டமின்மைக்கும் ஆனவத்திற்கும் இடையில் உள்ள குறுகிய வழியில் பயணம் செய்யும் விதத்தில் அமையப்பெற்றதே இந்த முன்னேற்றப் பாதையாகும்.

மக்காவிலிருந்து மதீனாவுக்குப் புலம்பெயர்ந்து வந்த காலகட்டத்தில், ரசூலுல்லாஹ் (ஸல்) அவர்களின்முன் இருந்த மிகப்பெரிய பிரச்சினை, இனத்தாலும் மார்க்கத்தாலும் பல பிரிவுகளாக மதீனாவில் இருந்த மக்களுக்கும் ‘ஹிஜ்ரத்’ செய்து வந்தவர்களுக்குமான ஓர் இஸ்லாமிய நல்லாட்சியை மதீனாவில் நிறுவவேண்டும் என்ற நோக்கமேயாகும். முஸ்லிம்கள் ‘ஹிஜ்ரத்’ செய்து மதீனாவுக்கு வந்து சேர்ந்தபோது, அங்கிருந்த அரபுக் கோத்திரங்கள், ‘அவ்ஸ்’ – ‘கஸ்ரஜ்’ என்ற இரு பிரிவுகளாவர்.  இவர்களுள், அதுவரை இஸ்லாத்தைத் தழுவாதிருந்த அரபு இணைவைப்பாளர்களும் அடங்குவர்.  அத்துடன், மக்காவை விட்டு மதீனாவுக்கு வந்திருந்த ‘முஹாஜிர்’களும் புதிய சூழலில் பொறுப்புகளை வகிக்க ஆயத்தமாய் இருந்தனர்.  மதீனத்து யூதர்களும், ‘பனூநளீர்’, ‘பனூகைனுகா’, ‘பனூகுரைழா’ என்று மூன்று பிரிவினர்களாக இருந்தனர்.  

இத்தகைய கலப்புச் சமுதாயமாக இருந்த மதீனத்து மக்களுக்குச் சட்டபூர்வமாக அரசியல் அமைப்பு ஒன்று தேவைப்பட்டது.  உலக வரலாற்றில் முதன்முதலாக, பல்லினச் சமுதாயம் ஒன்றுக்கு நடுநிலையான நடப்புச் சட்டத்தை உருவாக்கினார்கள் இறைத்தூதர் (ஸல்) அவர்கள்.  

மக்காவிலிருந்து மதீனாவுக்குப் புலம் பெயர்ந்து வந்த ‘முஹாஜிர்’களுக்கும், மதீனத்து முஸ்லிம்களுக்கும், அதுவரை இஸ்லாத்தைத் தழுவாதிருந்த அரபு மக்களுக்கும், மதீனாவில் உரிமை கொண்டாட வந்து, பின்னர் அவ்வூரின் பிரஜைகளாகவே ஆகிவிட்டிருந்த யூதர்களுக்கும் இடையில் ஒரு சிறப்பான புரிந்துணர்வு ஒப்பந்தத்தை நபியவர்கள் உருவாக்கினார்கள். பின்னர், யூதர்கள் இந்த ஒப்பந்தத்தை மதிக்காமல் வாழ்ந்துவந்தனர். இதன் காரணமாக, சில ஆண்டுகளின்பின்  முஸ்லிம்களால் மதீனாவை விட்டுத் துரத்தப்பட்டார்கள்.

அந்த ஒப்பந்தம்தான் உலக வரலாற்றிலேயே முதலானதும், முழுமையானதுமான ஆட்சியின் சட்ட ஆவணமாகும். இந்தச் சட்ட ஆவணத்திற்கு யாரெல்லாம் தொடர்புடைய வர்களோ, அவர்கள் அனைவருக்கும் உரிய கடமைகளும் உரிமைகளும் இருந்தன.  அவர்கள் எந்த மார்க்கத்தையும், எந்த நம்பிக்கையையும் சார்ந்திருந்தாலும் சரியே. இஸ்லாம் மட்டுமே இது போன்ற சட்ட நிபந்தனைகளை வகுத்துக் கொடுக்க முடியும். ஏனெனில், உலக வரலாற்று அடிப்படையில், மக்களுக்கு வழிகாட்ட வந்த தூதர்கள் அனைவரும் போதித்த மார்க்கம் என்பது இஸ்லாம்தான். இஸ்லாத்தினால் மட்டுமே இத்தகைய வழிகாட்டுதல்களைக் காட்டிக் கொடுக்க முடியும்.

நபி வரலாற்றாசிரியர்களுள் ஒருவரான இப்னு இஸ்ஹாக் அவர்கள் மூலம் நமக்கு வந்துள்ள அந்த ஒப்பந்தத்தின் விதிமுறைகளை அடுத்த தலைப்பில் பார்ப்போம்.  

அதிரை அஹ்மது

நன்மைகளும் நம்பிக்கையாளரும் 3

நபிமணியும் நகைச்சுவையும் - தொடர் : 19

இஸ்லாம் என்பது இயற்கையான, மனிதத் தன்மையின் இயல்போடு இணைந்து செல்லும் ஒரு வாழ்க்கை நெறியாகும்.  அது அசுத்தங்களுக்கு அப்பாற்பட்டது! வல்லமையும் மாண்புக்கும் மிக்க அல்லாஹ் (ஜல்) தன் அருள்மறையிலே கூறுகின்றான்:

“(நபியே!) உம்முடைய முகத்தை, தூய (இஸ்லாமிய) மார்க்கத்தின் பக்கமே முற்றிலும் திருப்பி நிலைநிறுத்துவீராக! எ(ந்த மார்க்கத்)தில் அல்லாஹ் மனிதர்களைப் படைத்தானோ, அதுவே அவனுடைய (நிலையான) இயற்கை மார்க்கமாகும்; அல்லாஹ்வின் படைத்தலில் எத்தகைய மாற்றமும் இல்லை; இதுவே (சரியான) நிலையான மார்க்கமாகும். ஆனால் மனிதர்களில் பெரும்பாலோர் (இதனை) அறிந்து கொள்ள மாட்டார்கள்.” (1)

இத்தகைய இயற்கை வழியைப் பின்பற்றுகின்ற தன் அடியார்களின் தேவைகளை நிறைவேற்றித்தரும் பாரிய பொறுப்பை எடுத்துக் கொள்ளும் இரட்சகன், அந்த அடியார்களின் பிரார்த்தனை ஏற்றுக் கொள்ளப்படும்  எளிய வழிமுறையை இவ்வாறு இயம்புகின்றான்:

“என்னுடைய உயர்வுக்கு மதிப்பளித்து அதன் காரணமாக என்னைப் பணிந்து, எனது படைப்பினங்களிடம் கருணை கொண்டு, எனக்கெதிராகப் பாவம் செய்வதிலிருந்து விலகி இருந்து, என் நினைவிலேயே நாட்களைக் கழித்து ஏழைகளிடமும், பயணிகளிடமும், பலவீனமானவர்களிடமும் கஷ்டப்படுபவர்களிடமும் கருணை காட்டும் மனிதனின் துஆக்களை நான் (அப்படியே) ஏற்றுக் கொள்வேன்.” (2)

இத்தகைய நபித்தோழர்களுள் ஒருவர்தாம்  சலமா இப்னு அல்அக்வஉ (ரலி):

சலமா இப்னு  அல்அக்வஉ (ரலி) அவர்கள் கூறியதாவது:

நாங்கள் இறைவனின் இறுதித்  தூதர் (ஸல்) அவர்களுடன் ஹுதைபிய்யாவை நோக்கிச் சென்றோம். அப்போது நாங்கள் ஆயிரத்து நானூறு பேர் இருந்தோம். அங்கு தண்ணீர் குறைவாக இருந்ததால் எங்களுடைய ஐம்பது குர்பானி ஆடுகள் நீர் புகட்டப் படாமல் தாகத்துடன் இருந்தன.

அல்லாஹ்வின் அன்புத் தூதர் (ஸல்) அவர்கள் அங்கிருந்த கிணற்றின் சுற்றுச் சுவர்மீது அமர்ந்துகொண்டு பிரார்த்தித்தார்கள். உடனே கிணற்றில் நீர் மட்டம் உயர்ந்தது. உடனே நாங்கள் நீர் அருந்தினோம். எங்கள் கால் நடைகளுக்கும் நீர் புகட்டினோம்.

பின்னர், நம் நெஞ்சில் நிறைந்த நபிமணி (ஸல்) அவர்கள் அங்கிருந்த மரத்துக்குக் கீழே உறுதிமொழிப் பிரமாணம் (பைஅத்) வாங்குவதற்காக எங்களை அழைத்தார்கள். மக்கள் அனைவருக்கும் முன்பாக முதலில் நானே அவர்களிடம் சென்று உறுதிமொழி அளித்தேன். பிறகு ஒவ்வொருவராக வந்து உறுதிமொழி அளித்தனர்.

அப்போது என்னிடம் ஆயுதம் எதுவும் இல்லாமலிருப்பதை பெருமானார் (ஸல்) அவர்கள் கண்டார்கள். எனக்கு "சிறிய தோல் கேடயம்” ஒன்றை வள்ளல் நபி (ஸல்) அவர்கள் வழங்கினார்கள். பிறகு என்னிடம் உறுதிமொழி பெற்றார்கள்.

மக்களில் இறுதி நபரிடம் அவர்கள் உறுதிமொழி பெற்றுக்கொண்டு இருந்தபோது, "சலமா! என்னிடம் நீ உறுதிமொழி அளிக்கக் கூடாதா?" என்று கேட்டார்கள். நான், மக்கள் அனைவருக்கும் முன்பாகவும் மக்களில் பாதிப்பேராக இருக்கும்போதும்  தங்களிடம் உறுதிமொழி அளித்துவிட்டேனே, யா ரசூலல்லாஹ்" என்று சொன்னேன்.

"மீண்டும் ஒரு தடவை நீ உறுதிமொழி அளிப்பாயாக" என்றார்கள். நான் மூன்றாவது தடவையாக உறுதிமொழி அளித்தேன்.

பிறகு என்னிடம், "சலமா! உனக்கு நான் வழங்கிய உனது சிறிய தோல் கேடயம் எங்கே?" என்று கேட்டார்கள். நான், "அல்லாஹ்வின் அருமை நபியே! என் சிறிய தந்தை ஆமிர் (ரலி) அவர்கள் என்னைச் சந்தித்தார். அவரிடம் ஆயுதம் ஏதும் இல்லாமலிருப்பதை நான் கண்டேன். எனவே, அதை அவருக்குக் கொடுத்துவிட்டேன்" என்று சொன்னேன்.

அதைக் கேட்டு அல்லாஹ்வின் தூதரின் முகம், அவர்களின் பளிச்சிடும் சிரிப்பால்  ஒளிவீசும் முழுமதியாய்ப் பிரகாசித்தது! மேலும், "நீர் முற்காலத்தில் வாழ்ந்த ஒரு மனிதரைப் போன்றவர் ஆவீர். அவர் "இறைவா! எனக்காக ஒரு நண்பரைக் கிடைக்கச் செய்வாயாக! அவர் என் உயிரைவிட எனக்கு மிகவும் பிரியமானவராக இருக்க வேண்டும்" என்று பிரார்த்தித்தார். அவரைப் போன்றே நீரும் உம்மைவிட உம் தந்தையின் சகோதரருக்கு முன்னுரிமை அளித்துள்ளீர்" என்று கூறினார்கள். (3)

அண்ணல் நபியவர்கள், அல்லாஹ்வின்  கட்டளைப்படி அச்சமூட்டி மக்களை எச்சரிக்கும் அதே வேளையில், இப்படிப்பட்ட நல்லவர்களுக்குச்   சுவனம் பற்றிய  நற்செய்திகளைத் தொடர்ந்து சொல்லி,   மறுவுலக நம்பிக்கையையும் அது பற்றிய மகிழ்ச்சியையும்  அளித்துக்கொண்டே   இருந்தார்கள்.

சத்திய மார்க்கமென்ற சோலையின் மலர்களுள் ஒருவரான சுஹைப் (ரலி)  அறிவிப்பதாவது:

அல்லாஹ்வின் தூதர் (ஸல்), தோழர்கள் ஆகிய எங்களுடன் ஒருமுறை அமர்ந்திருந்தபோது சிரித்தார்கள். பின்பு, “ஏன் சிரித்தேன் எனத் தெரியுமா?” என்று கேட்டார்கள். “ ஏன் சிரித்தீர்கள், எங்கள் நபியே?” என்று வினவினோம். அதற்கு அறிவுசால் நபி (ஸல்) அவர்கள் “இறை நம்பிக்கையாளனின் நிலையைக் கண்டு நான் ஆச்சரியப்படுகின்றேன். ஏனெனில், அனைத்து அம்சங்களும் அவனுக்கு நன்மையாகவே அமைந்துவிடுகின்றன”. அவன் நேசிப்பது நிகழ்ந்துவிட்டால், உடனே தன் இறைவனை நினைத்து, அல்லாஹ்வைப் புகழ்ந்து நன்றி நவில்கின்றான். அது அவனுக்கு நன்மையாக அமைகின்றது. அவனுக்குப் பிடிக்காத ஓர் அம்சம் சம்பவித்தால் அவன் பொறுமையை மேற்கொள்கிறான். அதுவும் அவனுக்கு நன்மையாகவே ஆகிவிடுகின்றது.

ஆக, “அனைத்து அம்சங்களும் அவனுக்கு நன்மையாகவே அமைவது ஒரு முஃமினுக்கு அல்லாமல் வேறு யாருக்கும் இந்தப் பாக்கியம் கிடைப்பதில்லை! இதை எண்ணித்தான் நான் சிரித்தேன்” என்றார்கள்.(4)

முஃமின்களாகிய நாம்  எத்தகைய  பாக்கியம் பெற்றவர்கள் என எண்ணும்போது மெய் சிலிர்க்கிறது அல்லவா?

இறைவனுடன் ஒப்பந்தம்:

அறிவின் வளமும் ஆத்மார்த்தத்தின் வனப்பும் கொண்ட அருள்மறை குர்ஆனின் குரலைக் கேட்போம்: “உம் இறைவன், ஆதமுடைய மக்களின் முதுகுகளிலிருந்து அவர்களுடைய சந்ததிகளை வெளியாக்கி, அவர்களைத் தங்களுக்கே சாட்சியாக வைத்து; “நான் உங்களுடைய இறைவன் அல்லவா?” என்று கேட்டதற்கு, அவர்கள் “மெய் தான்! நாங்கள் சாட்சி கூறுகிறோம்” என்று கூறியதை (அவர்களுக்கு) நினைவூட்டுவீராக;(ஏனெனில் இது நினைவூட்டப்படாததனால்) நிச்சயமாக இதனை (மறந்து) விட்டுப் பராமுகமாக இருந்து விட்டோம் என்று மறுமை நாளில் நீங்கள் (யாருமே) சொல்லாதிருக்கவும்;

அல்லது, “இணைவைத்தவர்கள் எல்லாம் எங்களுக்கு முன் இருந்த எங்கள் மூதாதையர்களே; நாங்களோ அவர்களுக்குப் பின் வந்த (அவர்களுடைய) சந்ததிகள் - அந்த வழிகெட்டோரின் செயலுக்காக நீ எங்களை அழித்து விடலாமா?” என்று கூறாதிருக்கவுமே! (இதனை நினைவூட்டுகிறோம் என்று நபியே! நீர் கூறுவீராக.)

அவர்கள் (பாவங்களிலிருந்து) விடுபட்டு (நம்மிடம்) திரும்புவதற்காக நாம் (நம்) வசனங்களை இவ்வாறு விளக்கிக் கூறுகின்றோம்.” (5)

இப்படி ஓர் உண்மை ஒப்பந்தத்தை இவ்வுலகில் பிறந்த ஒவ்வொரு மனிதரும்   ஏற்கனவே நம் இறைவனுடன்  செய்து வைத்திருக்கும்போது, கருணைக் கடலாம் காருண்ய இரட்சகனைக் குறை கூற எந்த ஒரு மனிதருக்கும் அருகதை  இல்லை! இல்லவே இல்லை!

தனக்கு இணைவைக்காமல் ஏகத்துவக் கொள்கையில் வாழும்  தன் அடியார்கள் மீது, அல்லாஹ்வின் கருணை எத்தகையது என்பதையும் மகிழ்ச்சியால் திக்குமுக்காடிப் போகும் அளவுக்கு  இந்த இறை நம்பிக்கையாளர் பெற்றுக் கொள்ளும்   வெகுமதியையும்  இப்போது நாம் காணலாம்.

எழில்மிகு பண்பினர் ஏந்தல் நபியவர்கள் சொர்க்கவாசிகள் மற்றும் நரகவாசிகளின் நிலை குறித்துப் பின்வருமாறு கூறினார்கள்:

சொர்க்கவாசிகளில் இறுதியாகச் சொர்க்கத்தில் நுழைபவர் யார் என்பதையும், நரகவாசிகளில் இறுதியாக நரகத்திலிருந்து வெளியேறுபவர் யார் என்பதையும் நான் நன்கறிவேன். மறுமை நாளில் ஒரு மனிதர் கொண்டுவரப்படுவார். அப்போது, "இவர் செய்த சிறு பாவங்களை இவருக்கு எடுத்துக் காட்டுங்கள்! இவர் புரிந்த பெரும்பாவங்களை இவரைவிட்டு நீக்கிவிடுங்கள்" என்று கூறப்படும். அவ்வாறே அவருக்கு அவர் புரிந்த சிறுபாவங்கள் எடுத்துக் காட்டப்பட்டு, "நீ இன்ன இன்ன நாளில் இன்ன இன்ன பாவத்தைச் செய்துள்ளாய்; மேலும், இன்ன இன்ன நாளில் இன்ன இன்ன பாவத்தைச் செய்துள்ளாய்" என்று கூறப்படும். அவரும் "ஆம்" என்று ஒப்புதல் கூறுவார்; அவரால் எதையும் மறுக்க முடியாது. தாம் புரிந்துவிட்டிருக்கும் பெரும் பாவங்கள் தம்மிடம் எடுத்துக் காட்டப்பட்டுவிடுமோ என்றும் அஞ்சிக்கொண்டிருப்பார். இந்நிலையில் அவரிடம், "நீ செய்த ஒவ்வொரு சிறு தவறுகளுக்கும் ஈடாக ஒரு நன்மை உனக்கு உண்டு" என்று கூறப்படும். அப்போது அவர், "இறைவா! நான் இன்னும் பல பெரும் பாவச்செயல்களைப் புரிந்திருந்தேனே! அவற்றையெல்லாம் இங்கு நான் காணவில்லையே!" என்று கேட்பார்.

இதைக் கூறும்போது, அல்லாஹ்வின் தூதர் (ஸல்) அவர்கள் தம் கடைவாய்ப் பற்கள் தெரியச் சிரித்ததை நான் பார்த்தேன். (6)

இத்தகு நற்பேற்றை நமக்குத் தந்த அல்லாஹ்வுக்கு வாழ்நாள் முழுதும் நன்றியை சுஜூதிலேயே கழித்தாலும் போதாதல்லவா? நலமிகும் இஸ்லாத்தை இந்த நானிலத்திற்கே எத்தி வைத்த நாயகம் (ஸல்) அவர்களின் அடிச்சுவடுகளை அப்படியே அடியொற்றி வாழக்கூடிய நற்பேற்றை  வல்ல இறைவன் நம் அனைவருக்கும் தந்தருள்வானாக!

ooooo 000 ooooo

ஆதாரங்கள்:

(1) அல்குர்ஆன்  30:30

(2) ஹதீத் குத்ஸீ

(3) ஸஹீஹ் முஸ்லிம் 3695 : சலமா பின் அல்அக்வஉ (ரலி)

(4) ஸஹீஹ் முஸ்லிம் 5726 : சுஹைப் பின் ஸினான் (ரலி)

(5) அல்குர்ஆன் 7:172

(6) ஸஹீஹ் முஸ்லிம் 314 : அபூதர் கிஃபாரி (ரலி)

தொடரும் இன்ஷா அல்லாஹ் …

இக்பால் M. ஸாலிஹ்

படிக்கட்டுகள் - 16 11

"ஒரு ஆணின் வெற்றிக்கு பின்னால் ஒரு பெண் நிச்சயம் இருப்பாள்"  என்று சொல்லக்கேள்வி. இது ஒரு ஆண் மட்டும் வெற்றி அடைந்துவிட்டதாக நான் நினைக்கவில்லை. ஒரு குடும்பம் வெற்றியடைய பெண்களின் பங்கு மிக மிக அவசியம். ஒரு குடும்பம் நல்ல பெயர் வாங்கவும் கெட்ட பெயர் வாங்க வைக்கவும் பெண்களால் நிச்சயம் முடியும்.

ஆண்கள் சம்பாதிக்காமல் வீணாக காலத்தை கழித்து அதை பார்த்த பெண்கள் குடும்ப பொறுப்பை சுமந்து கடை வைத்து, துணிமணிகள் விற்று தன் குடும்பத்தை ஒரு நல்ல நிலைக்கு நிறுத்தி இன்று அந்த குடும்பங்களை சார்ந்தவர்கள் சமுதாயத்தில் நல்ல மதிப்புடன் வாழ தன் வாழ்க்கையை தியாகம் செய்த பெண்களையும் நான் பார்த்திருக்கிறேன்.

அதே சமயம் தனக்கு எல்லாம் தெரியும் என்று "அட்டு லாயர்" மாதிரி பேசி குடும்பத்தில் பிரச்சினைகளை உருவாக்கி கடைசியில் எல்லோரும் வெறுப்படைகிற மாதிரி நடந்து கொள்வதும், வீட்டில் கணவன் எல்லா வசதிகள் செய்து கொடுத்தும் அதை முறையாக பயன்படுத்தாமல் கேவலங்களை வீட்டுக்கு கொண்டு வந்து சேர்த்து அந்த குடும்பத்தை சார்ந்தவர்கள் தலை குனிய வைத்த பெண்களையும் நான் பார்த்திருக்கிறேன்.

பாராட்டும்படி நடக்கும் பெண்கள் , மன சங்கடத்தை ஏற்படுத்தும் பெண்கள் எல்லா குடும்பத்திலும் இருக்கத்தான் செய்வார்கள். நாம் எதை தேர்ந்தெடுக்கிறோம் என்பதை வைத்தே நமது குடும்பத்தின் பயணம் இருக்கும் என்பது நிச்சயம். 

மற்றவர்கள் பேசுவதை கேட்டுப் பேசாமல் தன் கருத்தும் ,  சொல்லும் முதலிடம் பெற வேண்டும் என்று கத்திப்பேசும் பெண்களிடம்  பேச முயற்சிப்பது கிரிமினல் வேஸ்ட். இது ஆண்களுக்கும் பொருந்தும்.

இந்த நேரத்தில் சொல்ல வேண்டிய விசயம் டெலிவிசனின் ஆதிக்கம்.

அடிமைத்தனத்தில் மிகவும் கொடுமையானது நாம் எதற்கு அடிமையாக இருக்கிறோம் என்பது தெரியாமலே அடிமையாக இருப்பது அல்லது அடிமைத்தனம் பழகிப்போவது. ஒரு வருடத்தில் நீங்கள் டெலிவிசன் முன்னால் உட்கார்ந்து போக்கும் பொழுதை நீங்கள் கணக்கிட்டால்.. உங்கள் வாழ்க்கையின் மிகப்பெரிய காலப்பகுதி அனாவிசயமாக திருப்பி திருப்பி ஒளிபரப்ப பட்ட ஒரே காட்சிகளை  டி வி யில் பார்த்தே கரைந்து போயிருக்கும். இப்படி 'மாத்தி  மாத்தி' ஒளிபரப்பப்படும்   விசயங்கள் உங்களை அடிமைப்படுத்தி விட்டபிறகு நீங்கள் உண்மையான விழிப்புணர்வு பெரும் சூழலில் இந்த சமுதாயம் உங்களை விட்டு கண்ணுக்கு எட்டாத தூரத்தை தாண்டி முன்னேறியிருக்கும்.

நேரமும் உங்களுக்கு கிடைத்திருக்கும் செல்வம்தான் அதை முறையில்லாமல் செலவழித்தால் உங்கள் குடும்பத்தை யார் வந்து வழிநடத்தமுடியும்.

30 வருடத்துக்கு முன் இருந்த பெண்களுக்கும் இப்போது உள்ள பெண்களுக்கும் நடைமுறை என்று பார்த்தால் மிகப்பெரிய சவால் இன்று உள்ள பெண்களுக்குத்தான். பிள்ளைகள் பிறந்தால் அதை படிக்க அனுப்ப பள்ளிக்கூடம் , ஒதுவதற்கு பள்ளி / மதரசா என்று இருந்த காலம் போய், காலையில் பள்ளிக்கூடம் அனுப்புவதிலிருந்து ஹோம் வொர்க், பள்ளியில் ஒதுவதை வீட்டில் ஒத ப்ராக்டிஸ் கொடுப்பதுவரை வீட்டில் உள்ள பெண்களுக்கே முழுப்பொறுப்பு. இதில்  பிள்ளைகளுக்கு என்ன ஊட்டுகிறோம் என்பதில் கவனம் தேவை. வெறும் பாடம் சொல்லிக்கொடுப்பது மட்டுமில்லை வாழ்க்கை. அதன் எதிர்காலத்திட்டமும் சரியாக ஊட்டப்பட வேண்டும். "எனக்கு என்ன தெரியும், நான் என்ன வெளியில் போய் வரும் ஆண்பிள்ளையா.. அதை எல்லாம் தகப்பன் பார்த்துக்கொள்ளட்டும்' என இருந்தால் திசை தெரியாமல் பிள்ளைகளை வளர்க்கும் கொடுமைக்கு ஆளாகி விடுவோம்.

இன்றைய உலகம் போட்டிகள் நிறைந்தது.இன்று உங்கள் பிள்ளை 10 வயதானால் இன்னும் 20 வருடத்தில் [30 வயதில்] எப்படி தயாராக இருக்க வேண்டும் என்பதில் கவனம் தேவை. அந்த பிள்ளையை தயார் படுத்துவது பெண்களுக்கு மிகப்பெரிய பொறுப்பு இருப்பதே உண்மை. 

சின்ன வயதில் பிள்ளைகளுக்கு 'லாட்ஜ் ரூம் பாய்' மாதிரி எல்லாம் செய்து கொடுத்து விட்டு பிள்ளை வளர்ந்த பிறகு "பொறுப்புதான் வரமாட்டேங்குது" என புலம்பி புண்ணியமில்லை.

குடும்பத்துக்கும், எதிர்கால சந்ததியினருக்கும் மார்க்க அறிவும் உலக கல்வியும் சரியான விதத்தில் கலந்து தரும் டாக்டர் நீங்கள்தான்.

நம் ஊர் போன்ற இடங்களில் என்னதான் வாய்கிழிய பெண்ணுரிமை, மார்க்கம் எல்லாம் பேசினாலும் பெண்கள் தனது கல்வி , பணத்தேவைகளுக்கு இன்னும் ஆண்களையே சார்ந்து இருக்கிறார்கள். இன்றைக்கு நம் பெண்கள் பல்கலைக்கழகம் வரை படித்து விட்டதால் மட்டும் பணத்தேவைகளுக்கு தன் சொந்த முயற்சியின் வேலை / தொழில் என்று இதுவரை இறங்க முடிவதில்லை.

ஆண்களை பொருத்தவரை தன் மனைவி தனது குடும்பத்தை குழந்தைகளை தான் இல்லாத போதும் சரியாக வழி நடத்த முடியும் என்ற நம்பிக்கை வந்து விட்டாலே அவனால் வேறு எந்த தடங்களையும் எண்ணாமல் நல்லபடியாக சம்பாதிக்க முடியும்.

பெண்கள் எப்படி இருக்க வேண்டும் என்று சொல்லும் சமுதாயம் ஆண்கள் எப்படி இருக்க வேண்டும் என்று பெண்கள் சொன்னால் மட்டும் ஏற்றுக்கொள்வதில்லை.

மெட்டீரியலிஸ்டிக் வாழ்க்கை என்று சொல்லப்படும் "பொருள்களை வாங்கி குவிக்கும்" மனப்பாங்கு என்பது சின்ன பிள்ளைகள் மிட்டாய் கேட்டும் அழும் மனப்பாங்கு மாதிரி.  5 வயது பிள்ளை மிட்டாய்க்கு அழுவது இயற்கை. 25 வயது ஆள் மிட்டாய்க்கு அழுதால் அது மனநோய்.இதை நான் எழுத காரணம் நம் ஊர் பகுதியில் நான் பார்த்த சில பெண்கள் எப்போது பார்த்தாலும் ஏதாவது வாங்கிவர வெளியூர்பயணத்திலேயே இருக்கிறார்கள். [ இவர்களுக்கு அலுத்துபோகாதா என்று யாரும் கேட்ட மாதிரி தெரியவில்லை]

டி வி / மேகசினில் வரும் விளம்பரங்களை பார்த்த பிறகு எடு ஆட்டோவை, எடு காரை உடனே நான் போய் கடையில் இறங்கி அந்த பொருளை வாங்கி வந்து வீட்டில் வைத்தால்தான் மனம் லேசாகும் என அலையும் பெண்கள் வெகு சீக்கிரம் குடும்பத்தை ஒரு வழிக்கு கொண்டு வந்துவிடுவார்கள்.

இன்றைய தேதியில் அத்தியாவிசயமான பொருட்களை வாங்க ஆசைப்படுவதில் தவறில்லை. ஆசைப்படும் எல்லாப்பொருள்களும் அத்தியாவிசயம்தான் என்று வாதிடுவதில்தான் தவறு. பொருள்கள் வாங்க சரியான விதி '"தேவைப்படுவதை வாங்கு, ஆசைப்படுவதை வாங்க யோசி".

சில சமயங்களில் வீட்டில் உள்ள கணவரிடம் சொல்லி வாங்க சொன்ன பொருள்கள் உடனே வீடு வந்து சேராததற்கு அவரை எதிரி மாதிரி பார்க்காதீர்கள். இன்னும் வாழ்க்கையில் ஏற்படும் விவாதங்களுக்கும் கருத்து வேறுபாடுகளும் உங்கள் சந்தோச வாழ்க்கைக்கு வேட்டு வைக்காமல் பார்த்துக்கொள்ளுங்கள்.  உங்கள் கணவர் அடிப்படையில் நல்லவர்தானே என்ற எண்ணம் உங்களிடம் இருந்தால் பிரச்சினைகள் நீண்டு கொண்டே போகாது.  

மற்றவர்களின் பொருளாதார முன்னேற்றத்தை ஒப்பிட்டு உங்கள் கணவரை குறை சொல்லாதீர்கள். "நீங்களும் முன்னேறமுடியும்" என்ற நம்பிக்கை வார்த்தைகளை அவரின் மனதுக்குள் விதையுங்கள். "உங்களின் முன்னேற்ற பயணத்தில் எப்போதும் உங்களுடன் துணையிருப்பேன்" என்ற உண்மையை உங்கள் கணவரை உணரச்செய்யுங்கள்.

50 வருடத்துக்கு முன் உங்கள் பாட்டி சொன்ன "பால் கறி- இறால் ஆனம்" மட்டும்தான் எனக்கு செய்யத் தெரியும் என்று சமைத்துப்போட்டு வதைக்காதீர்கள்.  டி வி, புத்தகம், இன்டெர்னெட்டில் வரும் சின்ன சின்ன ரெசிப்பிகள் செய்வதன் மூலம் குடும்பத்தில் பெரிய மகிழ்ச்சிகள் காத்திருக்கிறது. [ஏதோ குடு குடுப்பைக்காரன் சொன்ன மாதிரி இல்லே!!].

அலுவல்களை முடித்து வரும் கணவரிடம் வந்து உட்காருமுன் பிரச்சினைகள கொட்டாதீர்கள்.

உங்கள் கணவர், கஷ்டப்படும் மனிதர்களுக்கு உதவி செய்யும்போது நீதமாக நடந்து கொள்ளுங்கள். உங்கள் வீட்டு ஆட்களுக்கு உதவி செய்யும்போது ஹீரோயினாகவும், கணவர் வீட்டு உறவுக்கு உதவி செய்யும்போது பொருளாதார நிபுணர் மாதிரி பேசுவதை தவிர்த்து விடுங்கள்

நோய் பற்றிய விழிப்புணர்வு நம் பெண்களிடம் மிகவும் குறைவு.

அதற்கு காரணம் நோய் - உடற்பயிற்சி இதுவெல்லாம் ஆண்கள் சமாச்சாரம் என்று பெண்கள் நினைப்பதுதான்.  அது தவறு என்பது வேறு விசயம். 

சரியான உடற்பயிற்சிகள் இல்லாமல் ' நான் தான் வீட்டு வேலை பார்க்கிறேனே" என்ற ஒரே பிடிவாதத்தில் இருப்பதால் இப்போதைக்கு நான் எந்த காலத்திலும் பார்த்திறாத அளவு நியூரோ பேசன்ட்களை பார்க்கிறேன். அந்த பெண்களும் நியுராலஜிஸ்ட்களை பார்த்து மருந்து சாப்பிடும்போது அதில் வரும் சைட் எஃபெக்ட் ஆன “தூக்க மாத்திரையில்லாமல் தூங்க முடியாத நிலை”க்கு தள்ளப்படுகிறார்கள்.  

கலோரி அளவு தெரிந்து செய்யும் உடற்பயிற்சி உங்களை எப்போதும் இளமையாக வைத்திருக்கும் என்பதை பெண்கள் மறந்து விடக்கூடாது.

நீங்கள் சரியாக இருந்தால்தானே குடும்பம் சரியாக இருக்கும்.

ZAKIR HUSSAIN