இஸ்லாமியப் பொருளாதாரச் சிந்தனைகள்.... தொடர் - 2 22

தொடர் : இரண்டு

மதங்களும் பொருளாதார இயலும்

உலகில் பல்வேறு மதங்கள் தோன்றி  அழிந்து விட்டன; சில வாழ்ந்து வருகின்றன. ஒவ்வொரு மதங்களும் தங்களைத் தழுவிய மக்கள் சமுதாயத்துக்கு போதித்த கோட்பாடுகளில் பொருளாதாரக் கோட்பாடுகளும்  அடங்கும். இத்தகைய மதங்களையும் பொருளாதாரத்தையும் பொருத்திப் பார்க்கும் முன்பு மதம் அல்லது மார்க்கம் என்பதன் விளக்கங்களையும் பொருளாதாரம் என்றால் என்ன என்பதற்கு பல்வேறு அறிஞர்கள் அளித்திருக்கும் விளக்கங்கள் மற்றும் அந்த விளக்கங்களின் ஏற்புடைய தன்மைகள் ஆகியவைகளையும் பார்ப்போம். இவற்றுடன் இஸ்லாமியப்  பொருளாதாரத்தை ஒப்பிட்டும் பார்ப்போம்.

மதங்களைப் பற்றிய சாத்திர விற்பன்னர்களும்  (Theologians) சமூக அறிவியலார்களும் மதம் என்றால் என்ன என்பதற்கு பல்வேறு விளக்கங்களைத் தந்துள்ளார்கள். எடுத்துக்காட்டாக, பொருளாதாரம் தழுவிய இஸ்லாமிய நூல்களைத்  தந்த எம். அப்துல்லாஹ்  திராஜ் (M.A. Draz)  என்கிற வல்லுனர்  தனது அல்-தீன்  Al Din  (The Religion) என்கிற நூலில் பல மேற்கோள்களைச் சுட்டுகிறார். இவற்றுள் முக்கியமானவை Reveille,  Michael Mayer, New Webster’s Dictionary ஆகிய  ஆய்வுகளில் குறிப்பிடப்பட்டுள்ள கருத்துகளாகும். 

Reveille கூறுவது என்னவன்றால், மதம் என்பது  மனித இனத்தின் வாழ்வை  வடிவமைக்கிறது - மதம் என்பது சாதாரண மனிதனின் அந்தர ஆத்மாவுக்கும்  மிகவும் உயர்நிலையில் உள்ள அறியப்படாத சக்தி என்று நம்பப்படும் கருப்பொருளுக்கும் உள்ள பிரிக்க முடியாத பந்தம் என்ற கருத்தின் அடிப்படையானதுமாகும். (bond between the human soul and Mysterious Soul) இதைத்தான் ‘கண்டவர் விண்டிலர் விண்டவர் கண்டிலர்’ என்று கூறினார்களோ?

Michael Mayer, என்கிற வல்லுநர் விளக்குவது மதம் என்பது மனிதன் தனக்கு வழிகாட்டும் கடவுள் என்று கருதப்படுபவை அளித்த நம்பிக்கை மற்றும் தீர்க்கதரிசனங்களின் தொகுப்பு  என்பதாகும். (set of beliefs and percepts)

New Webster’s Dictionary மதம் என்பதற்குத் தரும் விளக்கம் அது மனிதனை பயபக்தியுடன் வணங்கவும் கீழ்ப்படியவும் வைக்கிற ஒரு சிறப்புக்குரிய சக்தியின் ஆளுமை என்பதாகும். ( entitled to obedience, reverence and worship).

மேற்கண்ட எல்லா விளக்கங்களையும் ஊன்றிப் படித்த பின்னர் நாம் உணரும்   பொதுவான சாராம்சம்  என்ன வென்றால்

மதம் என்பது மனித இனத்தின் ஒட்டுமொத்த ஆன்மீக, சமூக, தனி மனித வாழ்வின் மீதும் இதர படைப்பினங்களைப் பற்றிப் பேசியும்  தொடர்புபடுத்தியும் வரையறுக்கிறது என்பதும்  மனித இனத்தின் நம்பிக்கை, கடைப்பிடிப்பு, அர்ப்பணிப்பு ஆகிய செயல்பாடுகளின்மேல் ஒழுங்குபடுத்தும் வகையில் ஆதிக்கம் செலுத்தும் ஒரு தன்னிகரற்ற சக்தியுமே  மதம்  ஆகும் என்பதே. 

மதம் என்பதன்  விளக்கங்களை அறிந்த பிறகு பொருளாதாரம் என்பதன் சுருக்கமான விளக்கத்தையும் நாம் காண வேண்டி இருக்கிறது. பொருளியல் விளக்கங்கள் பல்வேறு வல்லுனர்களால் தரப்பட்டுள்ளதை விளக்கவும் விவரிக்கவும் விவாதம் செய்யவும் வேண்டியுள்ளது. மேலே கண்டபடி மதம் என்பது ஒட்டுமொத்த மனிதவாழ்வின் மீது ஆதிக்கம் செலுத்தும் சக்தி என்று குறிப்பிடும் நேரத்தில் பொருளாதாரம் என்பது ஒரு நாட்டின் செல்வங்கள், மூலவளங்கள், பணிகள், உற்பத்திப் பொருள்கள், வாழ்வின் தேவைகள்,  ஆகிய மனிதவாழ்வின் சில குறிப்பிட்ட பாகங்களின்  மீது மட்டும் தனது ஆதிக்கம் செய்யும்    ஒரு    தனித்துறையாகும்.

பொருளாதாரம் என்பதற்கு பல்வேறு பொருளியல் அறிஞர்கள் பல்வேறு மாறுபட்ட விளக்கங்களை அளித்திருக்கிறார்கள்.( L. Robins),  ஆர். ராபின்ஸ்,  பி . சாமுவேல்சன் ( P. Samuelson.) ஜெ. ஹார்வி ( J.Harvey)  ஆகியோருடைய அணுகுமுறைகள் மாறுபட்டாலும் ஒரு பொதுவான அம்சத்தில் ஒத்துப் போகின்றன.

அதாவது, மனிதனுடைய நடைமுறைப் பழக்கங்களில் அவன் வாழும் நாட்டில் கிடைக்கும் மூலவளங்களையும் அவற்றைக்கொண்டு உற்பத்தியாகும் பொருள்களையும் பணிகளையும் தனது உயர்ந்த பட்ச திருப்திக்கும், உபயோகத்துக்கும் ஏற்றபடி எப்படி நிர்வகித்துக் கொள்கிறான் அல்லது ஆள்கிறான் என்பதே ஆகும். 

நவீன கால பொருளாதாரக் கோட்பாடுகளைப் பற்றி ஆய்வு  செய்கிறவர்கள்  ஆடம் ஸ்மித் ( Adam Smith 1723- 1790 )என்கிற மந்திரப்பெயரை மறக்க முடியாது. இவர் தனித்தனிக் கோட்பாடுகளாக வந்துகொண்டிருந்த பொருளியல் கோட்பாடுகளை ஒன்று திரட்டி ஒரு வடிவமாகக் கொடுத்தவர் என்கிற பெருமைக்குச் சொந்தக்காரர்.   An enquiry into the Nature and Causes of Wealth of Nations என்கிற இவரது நூலே நவீன அரசியல் பொருளாதாரத்தின் தொடக்கமாகக் கருதப்படுகிறது. 

ஆல்பிரெட் மார்ஷல்  ( Alfred Marshal 1842- 1924) என்கிற மற்றொரு வல்லுநர் தனிமனிதனின் வாழ்க்கையில் காணப்படும் செல்வத்தை நோக்கிய செயல்பாடுகளின் கல்வியே பொருளாதாரம் என்று குறிப்பிட்டார். வாழ்வதற்குத் தேவையான வருமானத்தைத் தேடும் அல்லது  திரட்டும் வழிமுறைகளையும் அப்படித் தேடியவற்றை தேவைகளுக்குப் பயன்படுத்திக் கொள்ளும் வழிமுறைகளையும் பொருளாதாரம் சொல்லித்தரும் என்று சொன்னார்.

இருந்தாலும் லயனல் ராபின்ஸ் சுட்டிக்காட்டிய கோட்பாடு எல்லோராலும் ஏற்றுக் கொள்ளப்பட்டதாக அமைந்தது. கோட்பாட்டின் அடிப்படை மூன்று முக்கிய அம்சங்களைக் கொண்டதாகும். அவை :

மனிதனின் தேவைகள் அதிகம். (Countless Desires)

அந்தத்  தேவைகளை நிறைவேற்றும் பொருள்கள் அல்லது சேவைகள் பற்றாக்குறையானவை . (Scarce Means)

அவ்விதம் வரையறைக்குட்பட்ட பொருள்கள் மற்றும் சேவைகள்  மனிதனுக்கு ஒரே நேரத்தில் எழக்கூடிய மற்ற தேவைகளையும் நிறைவேற்றிக்கொள்ள மாற்றிப் பயன்படுத்தத் தக்கவை .  ( Alternative Uses)

(இந்தக் கருத்துக்களை நான் விளக்க ஆரம்பித்தால் நீங்கள் சற்று நிமிர்ந்து உட்காரலாம். சரியாத்தானய்யா சொல்லி இருக்கே! நல்லா யோசிச்சுத்தானே சொல்லி இருக்கே ! என்று சிலர் கூவவும் செய்யலாம்.)

முதலாவதாக மனிதனின் தேவைகள் அதிகம் என்பதைப் பார்க்கலாம். மனிதனுக்கு எல்லாமே தேவைதான். எதிலுமே ஆசைதான்.  மழை நாளில் வெயில்தேடும் மனிதன் வெயில் நாளில் மழை தேடுவான். ஆசைகளின் மூட்டை என்று மனிதனை வர்ணிக்கலாம். தேவைகள் இவனிடத்தில் தேங்கிக்கிடக்கின்றன. தேவைப்பட்டது அகப்பட்டதும்  அடுத்ததைத்  தேடுகிறான். குடிசையில் வாழ்பவனுக்கு மச்சு வீடு தேவை ; பாயில் படுத்துறங்குபவனுக்கு பஞ்சு மெத்தை தேவை; கஞ்சி கிடைத்தால் போதுமென்று நினைத்தவனுக்கு கவளச் சோறு தேவை ; நிற்க இடம் கிடைத்தால் போதுமென்று நினைத்தவனுக்கு உட்கார இடம்  தேவை; காலையில் காபி தேவை; பகலில் அறுசுவை உணவுதேவை; இடையில் தின்ன மசால் வடை தேவை; இரவில் குடிக்க பசும்பால் தேவை;   பிள்ளைகளுக்குப் படிப்புத்தேவை ; பெற்றவர்களுக்கு முதியோர் இல்லத்தில் இடம் தேவை; பெரிய வீட்டுக்கு மட்டுமல்ல சின்ன வீட்டுக்கும் சொந்தமாக சொத்துத் தேவை; ஏவல் செய்ய ஆள் தேவை ; இட்டதை முடிக்க பரிவாரங்கள் தேவை; இருக்கும் பணத்தை மறைத்துவைக்க சுவிஸ் வங்கியில் கணக்குத்தேவை என்பது வரை  மனிதனின் தேவைகள் சொல்லி மாளாதவை; மறையாதவை. சராசரி மனிதனை ஆசைதான் வாழ்வை நோக்கி இழுத்துச் செல்கிறது. ‘வேண்டும் என்கிற உள்ளம் விரிவடைந்து கொண்டே போகிறது. ‘போதும்’ என்ற மனம் சாகும் வரை வருவதில்லை. ஐம்பது காசு நாணயம் பூமியில் கிடந்து, ஒருவன் கைக்கு அது கிடைத்துவிட்டால், வழி நெடுக நாணயம் கிடைக்கும் என்று தேடிக்கொண்டே போகிறான். ஒரு விஷயம் கைக்குக் கிடைத்துவிட்டால் நூறு விஷயங்களை மனது வளர்த்துக்கொள்கிறது. எந்க கட்டத்திலும் ஆசையும் தேவையும்  பூர்த்தியடையவில்லை.‘இவ்வளவு போதும்’ என்று எண்ணுகின்ற நெஞ்சு, ‘அவ்வளவு’ கிடைத்ததும், அடுத்த கட்டத்திற்குத் தாண்டுகிறது. ஆகவே தேவைகள் எண்ணற்றவை.

இரண்டாவதாக இத்தகைய தேவைகளை மனிதன் நிறைவேற்றிக்  கொள்ள   உலகில் அவனுக்குக் கிடைத்திருக்கும் வாய்ப்புக்கள் என்றுமே பற்றாக்குறையானவை.  தேவைப்பட்டுக் கேட்பவனுக்கு கேட்பது தேவையை நிறைவேற்றுமளவுக்குக் கிடைக்காது. அது இருந்தா இது இல்லை; இது இருந்தால் அது இல்லை. நாயை கண்டால் கல்லை காணோம்; கல்லைக் கண்டால் நாயை காணோம். மண்ணிலிருந்து மண்ணெண்ணெய் வரை – அரிசியிலிருந்து பருப்புவரை – மின்சாரம் முதல் குடிநீர் வரை- கல்லூரி முதல் கல்லறை வரையும் கூட மனிதத்தேவைகள் அவனின் தேவைகளின் அளவுக்கு கிடைக்காமல் பற்றாக்குறையாகவே இருக்கின்றன. இத்தகைய பற்றாக்குறைகள்- தேவைகள் –அவசரத்தேவைகள்  விலைகளைக் கூட்டுகின்றன அல்லது குறைக்கின்றன.  ஆகவே கிடைப்பவை பற்றாக்குறையானவை.

மூன்றாவதாக, இப்படி தேவைக்கு  பற்றாக் குறையாக  கிடைக்கின்றவைகளைக் கூட மற்ற தேவைகளுக்கும் உபயோகப்படுத்திக்கொள்ள முடியும் என்பதாக அமைந்திருக்கின்றன. உதாரணமாக எனக்கு ஒரு சைக்கிள் தேவை .வீட்டுக்கு அரிசி தேவை. மகனுக்கு சட்டை தேவை. சமையலுக்கு ஒரு சட்டி தேவை. வீட்டுக்கு வாடகை கொடுக்க வேண்டும். அம்மாவை வைத்தியரிடம் கூட்டிச் செல்லவேண்டும். இப்படி பல தேவைகளுக்கும் உதவ என்னிடம் எண்ணூறு ரூபாய்தான் இருக்கின்றது. இந்த எண்ணூறு ரூபாயை வைத்து   நான் சைக்கிள் வாங்கவா? சட்டை வாங்கவா? வைத்தியம் பார்க்கவா? அரிசி வாங்கவா? வாடகை கொடுக்கவா? நான் எதை தேர்ந்தெடுப்பேன்? எதைத் தேர்ந்தெடுப்பது  எனக்கு மிகவும் பயனுள்ளதாக இருக்கும்? அரிசி வாங்க வைத்திருக்கும் பணத்தில் சட்டி மட்டும்  வாங்கினால் சரியாகுமா?  ஆகவே என்னிடம் பற்றாக்குறையாக இருக்கும் மூலவளத்தை நான் பல்வேறு தேவைகளுக்கும் பயன்படுத்தமுடியும். எதற்குப் பயன்படுத்தப் போகிறேன்? எதைத் தேர்ந்தேடுக்கப் போகிறேன்? எதைத் தேர்ந்தெடுப்பது எனக்கு உதவும்? என்பதே  பொருளாதாரம்.

இதுவே ராபின்ஸ் சொன்ன  “ A relationship between ends and scarce means that have alternative uses” என்கிற கோட்பாடாகும். அதிகமான தேவைகள் அல்லது எண்ணற்ற விருப்பங்கள்- பற்றாக்குறையான சாதனங்கள்- இருப்பவற்றுள் தேர்ந்தடுப்பது ஆகியவையே பொருளாதார நடவடிக்கைகளை எற்படுத்திகின்றன என்பதே இந்தக் கோட்பாட்டின் அடிப்படை. . மேலை நாடுகளின் பொருளாதார வல்லுனர்கள் பொதுவாக இந்தக் கோட்பாட்டை ஏற்றனர். நாமும் சற்று யோசித்துப் பார்த்தால்   இந்த அடிப்படையிலேயே ஆண்டி முதல் அரசன்வரை பொருளாதார நடவடிக்கைகளை  மேற்கொள்கின்றனர்   என்பதை    உணர முடியும். 

தாயின் வைத்தியத்தை அலட்சியம் செய்துவிட்டு சாராயக்கடைக்குப் போகிறவர்கள் – பள்ளிக் கூடத்துக்கு கட்ட வேண்டிய பணத்தைக் கொண்டு பட்டுப்புடவை வாங்குபவர்கள் – நிலமே  வாங்காமல் செங்கல் வாங்கி அடுக்குபவர்கள் – குடிதண்ணீருக்கு வழி செய்யாமல்  ஹோம் தியேட்டர் வாங்குபவர்கள் ஆகிய அவர்களை நமது வாழ்வின் வழிப் போக்கில் அன்றாடம் காணுகிறோம். இவர்களே பொருளாதாரம் அறியாத பேதைகள்.

இந்த அளவில் பொதுவான பொருளாதாரக் கோட்பாடுகளைப் பற்றி ஓரளவு விளங்கிய பிறகு இஸ்லாமியப் பொருளாதாரச்  சிந்தனைகள் பற்றி இனி விரிவாக விவாதிக்கலாம்.

இன்ஷா அல்லாஹ் தொடரும்

இபுராஹீம் அன்சாரி

Making Of "படிக்கட்டுகள்" 27

"படிக்கட்டுகள்" தலைப்பு வைக்கவே எனக்கு 18 பட்டி பஞ்சாயத்தின் விருப்பம் தேவைப்பட்டது. 'முன்னேற்றம், புறப்படு , விழித்தெழு" என்று நிறைய பேர் எழுதி முடித்து விட்டார்கள். இனிமேலும்  இப்படி எழுதினால் போய்ச்சேருமா என்ற சந்தேகம்தான்.

இன்னும் சொல்லப்போனால் நம் ஊர் சார்ந்த மக்கள் இன்றைக்கு அதிக அளவில் வலைப்பூக்கள் நடத்துவதில் அசத்திக்கொண்டிருக்கிறார்கள். நமது வலைப்பூக்களின் தரத்தை இன்னும் சில நல்ல விசயங்களை அறிமுகப்படுத்துவதன் மூலம் ஒரு முன்னேற்றத்துக்கு அழைத்துச்செல்ல வேண்டும் என்பது என் ஆசை. அதனால் நான் எழுத எடுத்த சப்ஜெக்ட் Personal Development.

எழுதிய பிறகு இருந்த வரவேற்பு என்னை அந்த தொடருடன் தொடர்பில் இருக்க வைத்தது. அந்த 24 தொடரிலும் நான் எழுதியது வெறும் தலைப்புதான்...இன்னும் ஆழமாக எழுத முடியும். ஆனால்  குழப்பம் வரும். இதை எல்லாம் ஒரு ஒர்க்ஷாப் ஷெசனில்  4 , 5 நாள் இருந்து கற்றுக்கொள்ள வேண்டிய விசயங்களே அதிகம்.

எனக்கும் அறிவுரை வழங்குவதில் உடன்பாடில்லை, If I can bring some awareness, that itself  can be worth my effort.

நம்மைச் சார்ந்த ஒருவன் நமக்கு தெரிந்த ஒருவன் இதுபோல் எழுத முடியும் என்று சிலர் நம்பத்தயாராக இல்லை. அது அவர்களின் ஜனநாயக உரிமையாதலால். அதற்கு நான் முக்கியத்துவம் கொடுக்கவில்லை.

நான் எழுத எனக்கு ஆதரவாக இருந்த விசயங்கள் நான் இதுவரை கற்றுக்கொண்ட சில பயிற்சிகள். அதில் சில ஒரு தீவுக்கு போய் சூரியன் உதிப்பதற்கு முன் செய்யும் சில தற்காப்பு கலையின் ஆரம்பக் கல்விகளும் / பயிற்சியும் அடங்கும். சில பயிற்சிகள் நமது தொழிலுக்கு நிச்சயம் உதவும். அவைகளில் மரம் ஏறத்தெரியாத எனக்கு ஒரு பெரிய அடுக்கு மாடி கட்டிடத்திலிருந்து செங்குத்தாக பூமியை நோக்கி முகம் வைத்து இறங்கும் பயிற்சியும் அடங்கும். [ஷேஃப்டி விசயங்கள் உண்டு].

இப்படியெல்லாம் செய்வதற்கும் வாழ்க்கையில்  முன்னேறுவதற்கும் எதுவும் தொடர்பு இருக்குமா என்று நான் அப்ரானியாக நினைத்தது உண்டு. உடலை சில தடைகளை கடக்க வைப்பதன் மூலம் வாழ்க்கையின் தடைகளை கடக்க பயிற்சிகள் கிடைக்கிறது என்பது பிறகுதான் புரிந்தது. இவை அனைத்தும் தொழிலில் team building  பயிற்சிகள்.

சமயங்களில் கமென்ட்ஸ் எழுதும் சகோதரர்களுக்கு பதில் எழுதும் நான் சாகுல் / இக்பால் / சபீர் ..இந்த மூவருக்கும் பதில் எழுதுவது இல்லை. காரணம் இந்த 3 பேரின் பெயரில் யாரையாவது நான் மைனஸ் செய்தால் என் வாழ்க்கையில் மிகப்பெரிய பகுதியை ஒழித்து எழுதியதாகிவிடும்

சாகுல்.. எல்லோருக்கும் கிடைப்பது அவரவர்கள் நட்புதான். எங்கள் இருவருக்கும் கிடைத்தது மூன்று தலைமுறை நட்பு.  எங்களின் இருவரின் பாட்டியிலிருந்து ஆரம்பித்த நட்பு, எங்கள் தந்தையினர் என்று ஆரம்பித்து இப்போது எங்கள் நட்பு என்று இருக்கிறது. சாகுல் சின்ன வயதிலிருந்தே தெரியும், ஆதலால் அவரின் வாழ்க்கையில் நடந்த ஒவ்வொரு விசயமும் எனக்கு தெரிந்தே நடந்தது.   வயதில் என்னைவிட குறைந்தவராக இருந்தாலும்  புத்திக்கூர்மையில் எனக்கு தெரிந்த மிகப்பெரிய அனுபவசாலிளை மிஞ்சக்கூடியவர்.

இக்பால்... என் நெருங்கிய நண்பர்களில் இவனும் ஒருவன். அவனது வீட்டில் அவனுடைய பெற்றோர்கள் , கூடப்பிறந்தவர்கள் அனைவரும் எனக்கு கொடுக்கும் முக்கியத்துவம் கூட அவனுக்கு கொடுக்க மாட்டார்கள்.  அந்த அளவுக்கு நான் அவன் வீட்டில் முக்கியமானவன். நான் சொல்லும் எந்த விசயத்தையும் விவாதித்து சரி / தவறு என்பதற்கு காரணம் சொல்லி சண்டை போட்டு எப்போதும் என் மீது உள்ள அன்பில் மாறாத குணம் உடையவன். சின்ன வயதில் விவாதிப்பது என்பது சண்டை போடுவதல்ல. கருத்து பரிமாற்றம் என உணர வைத்தவன். மார்க்க விசயங்களில் நமக்கு கிடைத்த ஆன்லைன் ரெஃபரன்ஸ் இவன்.  உண்மையைச்சொல்ல யாராக இருந்தாலும் பயப்படமாட்டான். சிங்கப்பூர் கவர்ன்மென்ட் மாதிரி..தப்புனா தப்புதான்.

சபீர்.... ஸ்கூல் படிப்பு / கல்லூரி என்று தொடர்ந்தாலும் ஏனோ மெடிக்கல் ரிப்போர்ட் கூட ஒன்றாக தெரியும் ஒற்றுமை எங்களிடம். நண்பனாக இருப்பது என்பது வேறு. நண்பனாகவே ஆகிப்போவது என்பது வேறு. நாங்கள் 2 வது ரகம். எதிர்பார்ப்புகள் இல்லாத அன்பு = நட்பு என்பதின் அடையாளங்கள் நாங்கள். எங்கள் சின்னம்மாவின் [சபீரின் தாயார்] செல்லப்பிள்ளை நான். இரண்டு பேரும் ஒன்றாக கால்பந்தாட்டத்தில் அடிபட்டு வர எனக்கு முதலில் மருந்து கொடுத்த தாய். நிறைய பேர் நினைப்பது நாங்கள் இருவரும் சகோதரர்கள்... எனக்கு அதில் உடன்பாடில்லை.. நண்பனாய் இருப்பதில் அதிகம் சுதந்திரம் இருக்கிறது. என் தவறுகளை இவன் கண்டித்தால் மட்டும் கேட்டுக்கொள்வேன் சின்ன வயது தொடக்கம். என் வாழ்க்கையில் முக்கிய தருணங்கள் இவன் முடிவுக்காக காத்திருந்திருக்கிறது, அன்றும் இன்றும் எப்போதும்.

படிக்கட்டுகள் எழுத நிறைய நெறியாளுகை செய்திருக்கிறான். கால ஒட்டம் பல விசயங்களை மாற்றிப் போட்டிருக்கிறது. நாங்கள் இருவரும் அப்படியேதான் இன்னும் மாறாமல்.

படிக்கட்டுகள் எழுத முக்கிய காரணங்களில் ஒன்று , நம்மைச் சார்தவர்கள் யாரும் மிகவும் திறமை வாய்ந்தவர்கள் என்ற என் பாசிட்டிவ் அப்ரோச்தான். பெரும்பாலும் எழுதும்போது மற்றவர்களை திறமையற்றவர்களாகவும் , ஒன்றுக்கும் உதவாதவர்களாகவும் அட்வைஸ் அள்ளிக்கொட்டும் எந்திரமாக இருப்பதில் எனக்கு உடன்பாடு இல்லை. நம் பகுதியை சார்ந்த அனைவரும் மிகவும் கடின உழைப்பாளிகள். சரியான வாய்ப்புகள் , வழிகாட்டிகள் இல்லாததும் அவர்களின் பின் தங்கிய நிலைக்கு காரணம்.  May be எனக்கு கிடைத்த அந்த exposure மற்றவர்களுக்கு கிடைக்காமல் இருந்திருக்கலாம். அதை ஏன் நாம் பகிர்ந்து கொள்ளக்கூடாது என்று முதல் படிக்கட்டுகள் எழுதிய உடன் சகோதரர்கள் அபு இப்ராஹிம் / தாஜூதீன் இருவரும் தந்த ஆர்வம் தொடராக வெளிவர உதவியாக இருந்தது.   அபு இப்ராஹிமின் அர்ப்பணிப்பு உணர்வு போற்றத்தக்கது. வேலையிடத்தில் உள்ள டென்சன், மற்றும் பல வேலைகளுக்கிடையே தனது அதிரை நிருபருக்கான வேலையை தள்ளிப்போடாமல் செய்தது மிகவும் பாராட்டக்கூடியது.  தம்பி தாஜூதீன் அவர்களின் தன்னடக்கமான பண்பு போற்றத்தக்கது.

இதை எழுதுவதற்கு நான் எந்த புத்தகங்களையும் ரெஃபரன்சாக எடுக்கவில்லை. அப்படி எடுத்திருந்தால் அது நம் வழக்கம் / இனம் / மொழி சார்ந்த விசயங்களுடன் ஒத்துப்போகாது.

வெள்ளைக்காரர்களும், வெளிநாட்டினருக்கு மட்டும்தான் இதுபோன்ற விசயங்களை தொட்டு எழுத முடியும் என்ற விசயத்தில் உண்மைகள் இல்லை.

 

இந்திய தேசம் இதுவரை கணக்கில் அடங்காத ஞானிகளையும் , அறிவாளிகளையும் இதுவரை கொடுத்திருக்கிறது. ஆசியாவில் பிறந்தவர்கள் சொல்லாத பிசினஸ் சைக்காலஜியை மற்றவர்கள் சொல்லியிருப்பார்களா என்பதில் சந்தேகம்தான். மற்றும் வெள்ளைக்காரர்களின் அதிகமான அறிவுரைகள் ஒரு rat race போலத்தான் இருக்கும். ஜெயித்த பிறகு ஜீவன் செத்துப்போயிருக்கும்.

“சம்பாத்யம் புருச லட்சனம்”,” எவ்வளவுதான் வசதிகள் இருந்தாலும் மாதம் ஒரு வருமானம் இருக்க வேண்டும் உனக்கு" என்று சொன்ன  மர்ஹூம் சமது மாமா அவர்கள்.   [ இப்ராஹிம் அன்சாரி அண்ணனின் தந்தை ] ,  எந்த சுழ்நிலை வந்தாலும் தன்மானத்தை ஒரு சதவீதம் கூட விட்டுக் கொடுக்காமல் வாழ்ந்து காட்டு என்று எனக்கு அறிவுரை தந்த எங்கள் முகம்மது பாரூக் மாமா [சாகுலின் தந்தை] ,ஆம்பளையா பொறந்தா ஒரு 24 பேருக்கு உணவு கொடுக்கும் அளவுக்கு சம்பாதிக்க வேண்டும், அதே சமயம் அப்படி உணவளிக்கவும் வேண்டும் என்று சொன்ன எங்கள்  மாமா  [மர்ஹூம்] முஹம்மது யூனுஸ் அவர்கள். [சபீரின் தாய்மாமா].   “உழைக்க  துணிஞ்சவனுக்கு கஷ்டம் ரொம்ப நாள் இருக்காதுடா” என்று சொன்ன என் தாய். "மேயப்போற மாட்டுக்கு கொம்புலெ எதுக்கு புல்லு??" என கேட்ட படிக்காத என் பாட்டி [தந்தையின் தாய்]

இவர்கள் யாரும் எந்த யுனிவர்சிட்டியிலும் படிக்கவில்லை.இது போன்ற காகிதக்கல்வி படிக்காத மனிதர்களிடம் அதிகம் நடைமுறை அறிவை கற்றுக்கொள்ள முடியும் என்பது என் நம்பிக்கை.

 

இதுவரை இந்த தொடர் எழுத எனக்கு கமென்ட்ஸ்களின் வழி உற்சாகம் தந்த அனைவருக்கும் நன்றி.

அவர்களின் பெயரை இங்கு குறிப்பிடுகிறேன். 

இப்ராஹிம் அன்சாரி அண்ணன், ஜமீல் நானா, அதிரை அஹ்மது காக்கா ,  அண்ணன் N.A.S, [சமயங்களில் மணிக்கணக்கில் பேசிக்கொண்டிருக்கும் எல்லா ஸ்டேசனும் எடுக்கும் அறிவுஜீவி],   சகோதரர் கிரவுன் [சமயங்களில் டெலிபோனில் அழைத்துபேசுவார்] தம்பி யாசிர் [ஒரு அத்தியாயம் படித்து விட்டு டெலிபோனில் அழைத்து பேசினார்] சகோதரர் கவிஞர் அபுல்கலாம் [மறவாமல் எல்லா அத்யாயங்களிலும் இவரின் கவிதையான கருத்து இருக்கும் ]  

என் பாசமிகு சகோதரர்கள் நூருல் அமீன்.  அப்துல்வாஹித் அண்ணாவியார். அப்துக் ராஜிக், அப்துல் மாலிக் , எம் ஹெச் ஜஹபர் சாதிக், ZAEISA , Ara Ala , Naina [ AlKhobar ] B. Ahamed Ameen, Sister Ameena.A,  Abu Bakar [ amazan ] Abdul Malik , Alaudeen S. uroovaasi ,  Ahamed Irshad, MSM Naina Mohamed [இவரின் எழுத்துக்கு நான் ரசிகன் ],  புதுசுரபி,  LMS AbooBakar , Mohamed Buhari, SS Syed Ibrahim.A [ Dubai], அன்புடன் புகாரி , sekkana M.Nijam,  Hidaayathullah,  Adirai N.Safath,  Noor Mohamed [ My senior in school ] , Ashik Ahamed , N. fathhudeen, ஜாகிர் ஹுசைன் , நட்புடன் ஜமால் .... மற்றும் எனக்கு கல்வி தந்த SKM ஹாஜா முஹைதீன் சார் , வாவன்னா சார் , முஹம்மது அலியார் சார், திரு சீனிவாசன் சார் இன்னும் யாரையாவது எழுதாமல் விட்டிருப்பேன்.. மறதிதான்…. மன்னிக்கவும்.

 படிக்கட்டுகள் இது போன்ற நிறைய பேருடன் என்னை அழைத்துச்சென்று அன்பையும், சகோதரத்துவத்தையும், நட்பையும் எனக்கு பரிசாக தந்திருக்கிறது.

Wish You All the Best,  இறைவன் உதவியால் மீண்டும் சந்திப்போம்.

ZAKIR HUSSAIN

பாலியல் வன்முறை - ஓர் அறிவியல் பூர்வ தீர்வு 7

1. இந்தியாவில் எவ்வளவு பாலியல் குற்றங்கள் நிகழ்கின்றன?

தேசிய குற்றப்பதிவு துறை ஆய்வின் படி முறையாக பதிவு செய்யப்பட்ட பாலியல் வன்முறைகள் 2011 ஆம் ஆண்டு மட்டும் 24,206 ஆகும். பதிவு செய்யப்படாத உண்மையான குற்ற அளவு இதனை விட பல மடங்காக இருக்கக்கூடும். மேலும் மகாராஷ்ட்ர மாநிலத்தில் 2011 ஆம் ஆண்டு நடந்த ஒரு ஆய்வின் படி 9% பாலியல் குற்றங்கள் மட்டுமே நீதி மன்றங்களில் நிரூபிக்கப்படுவதாக தெரியவந்துள்ளது.

கர்நாடக மாநில‌த்தில் 2011ல் பதிவான 636 பாலியல் வன்முறைகளில் வெறும் 4 வழக்குகளில் மட்டும் நீதிமன்றத்தில் குற்றம் நிரூபிக்கப்பட்டு தண்டனை பெற்றுத் தரப்பட்டுள்ள‌து. மீதம் 632 வழக்குகளில் குற்றவாளிகள் விடுதலை செய்யப்பட்டுள்ளனர்.

2. ஏன் இவ்வளவு குற்றங்கள்?

தனிமனித ஒழுக்கம், சமூக சூழல் ஆகியவற்றைத் தவிர்த்து பார்க்கும்பொழுது அதிகரிக்கும் குற்ற நிகழ்வுகளுக்குக் காரணம், பெரும்பான்மையான பாலியல் குற்றங்கள் நீதிமன்றத்தில் நிரூபிக்கப்படாமல் போய்விடுவதேயாகும். எடுத்துக்கட்டாக 20% பாலியல் குற்றங்கள் நிரூபிக்கப்படுவதாக கருதுவோமாயின், நீதிமன்றங்களில் குற்றம் நிரூபிக்கப்படாததானால் 80% குற்றவாளிகள் விடுதலை செயயப்படுகின்றனர். இவர்கள் மீண்டும் அடுத்த குற்றங்களை செய்யும் தொடர் குற்றவாளியாக(Habitual offender) மாறிவிடுகின்றனர்.

3. தொடர் குற்றவாளிகள் என்றல் என்ன?

மேற்கண்ட சுழற்சி ஒரு மோசமான சுழற்சியாகும் (vicious cycle). இந்த மோசமான சுழற்சியினால் தொடர் குற்றவாளிகள் (Habitual offender) உருவாகின்றனர்.

4. ஏன் குற்றம் நிரூபிக்கப்படுவதில்லை?

ஏனெனில் பாதிக்கப்படும் பெண் பெரும்பாலும் கொல்லப்படுகின்றனர் அல்லது இறந்து விடுகின்றனர். மேலும் குழந்தைகள் பாதிக்கப்படும்பொழுது அவர்கள் குற்றநிகழ்வு குறித்த விழிப்புணர்வு அற்ற நிலையில் இருப்பர். ஒருவேளை உயிர் பிழைத்தாலும் சமூக பிரச்சனை (Social stigma) காரணமாக தண்டனை பெற்றுத்தரும் அளவிற்கு சாட்சி கூற இயலாத சூழல் உருவாகின்றது.

5. பாலியல் வன்முறை குறித்த சட்டப் பிரிவுகளை (375,376) மரண தண்டனை வழங்குமாறு திருத்துவதன் மூலம் குற்றங்களை குறைக்க இயலுமா?

முடியாது. ஏன் எனில் சட்டங்களை எவ்வளவு கடுமையாக்கினாலும் குற்றம் நீதிமன்றங்களில் நிரூபிக்கப்படாமல் போகும்பொழுது ஒரு தண்டனையும் கிடைக்காது. எனவே பாலியல் குற்றங்களை நீதிமன்றங்களில் நிரூபிப்பதற்கான அறிவியல் பூர்வ வழிமுறைகளை உருவாக்குவதே சரியான தீர்வாக இருக்கும்.

6. பாலியல் குற்றங்களை நீதிமன்றங்களில் நிரூபிப்பதில் என்ன சிக்கல்?

பாலியல் குற்றங்கள் CrPC 53இன் கீழ் உதவி ஆய்வாளர் (Sub Inspector) அல்லது அதற்கு மேல் உள்ள அதிகாரிகளால் விசாரணை செய்யப்படுகின்றன. இவ்வாறு காவல் துறையால் செய்யப்படும் விசாரணை அறிவியல் பூர்வமானதல்ல. காவல் துறையின் விசாரணை அதிகாரிகள், சட்ட மருத்துவம் (Forensic Medicine) குறித்த விழிப்புணர்வு அற்றவர்களாக உள்ளனர். காவல் துறை, அரசின் மற்றும் ஒரு படை பிரிவே(Force) அன்றி அறிவியல் சார்ந்த துறை(Scientific Investigators) அல்ல

பாலியல் குற்றங்களை விசாரிக்கும் முழு பொறுப்பை காவல் துறையிடம் ஒப்படைப்பது சரியான வழி முறை அல்ல. பெரும்பாலும் காவல் துறையின் விசாரணை நேரில் கண்ட சாட்சியங்களைத் திரட்டுவது அல்லது சூழ்நிலை சாட்சியங்களைத் திரட்டுவதாகவே இருக்கும். பெரும்பாலும் பாதிக்கப்பட்ட பெண் இறந்துவிடுவதாலும் குழந்தையாக இருப்பதாலும் யாருமல்லாத இடங்களில் குற்றம் பெரும்பாலும் நிகழ்த்தப்படுவதாலும் குற்றம் நீதிமன்றங்களில் நிரூபிக்கப்படாமல் போகின்றது.

மேலும் அறிவியல் பூர்வமான சோதனைகளான பெண்ணுறுப்பின் எபிதிலியல் செல்களை ஆணுறுப்பில் கண்டுபிடிப்பது, நகங்களில் சிக்கிய தசைத் துணுக்குகளை ஆராய்வது, ஆடைகளில் உள்ள இரத்தம் மற்றும் விந்து மாதிரிகளைத் திரட்டுவது மற்றும் லோகர்ட் பரிமாற்ற விதியின்படி முடி மற்றும் மற்ற பொருட்களைத் திரட்டுவது போன்ற பல அறிவியல் பூர்வமான வழிமுறைகள் பெரும்பாலான வழக்குகளில் செய்யப்படுவதில்லை.

மேலும் இது தொடர்பான விழிப்புணர்வு மற்றும் முறையான வழிகாட்டுதல்கள் காவல் துறை அதிகாரிகளுக்கு இருப்பதில்லை. எனவே இவ்வகையான அறிவியல் பூர்வ ஆய்வுகள் (Forensic Investigations) உடனடியாக செய்யப்படாததினால் சாட்சியங்கள் திரட்ட இயலாமல் வழக்கில் குற்றவாளிகளுக்கு தண்டனை கிடைக்காமல் போய்விடுகிறது.

7. மருத்துவக் கல்லுரி / அரசு மருத்துவமனைகளில் சட்ட மருத்துவத் துறையின் பங்கு என்ன?

நீதிமன்ற ஆணையின் கீழ் குற்றவாளி அல்லது பாதிக்கப்பட்ட பெண் சட்ட மருத்துவக்குழுவால் ஆய்வுக்கு உட்படுத்தப்படுவார். மேற்ககூறிய பல அறிவியல் பூர்வமான சாட்சியங்களைத் திரட்டும் வேலையை இத்துறை செய்கிறது. ஆனால் குறைபாடு என்னவெனில் சட்ட மருத்துவத் துறையால் விசாரணையை தன்னிச்சையாக துவங்கவோ, நீதிமன்றங்களினால் ஆணையிடப்படும் பரிசோதனைகளைத் தவிர வேறு வகையான குற்ற விசாரணைகளில் (Forensic investigation) ஈடுபடவோ முடியாது.

எடுத்துக்காட்டாக பாதிக்கப்பட்ட பெண், நீதிமன்றத்தால் சட்ட மருத்துவத் துறைக்கு அனுப்பப்படும் சூழலில், சட்ட மருத்துவர் குற்றவாளியையும் ஆய்வுக்கு உட்படுத்த வேண்டும் என்று கருதினால் அதற்கான ஆணையை அவரால் பிறப்பிக்க இயலாது. இதனால் சட்ட மருத்துவத் துறை அவர்களுக்கு கொடுக்கப்படும் வேலையை மட்டும் செய்து மேற்கொண்டு தொடர இயலாமல் நின்று போகும் சூழல் உள்ளது.

8. தற்போதைய தேவை என்ன?

நீதிமன்றங்களில் பாலியல் குற்றங்களை நிரூபிக்கும் எண்ணிக்கையை அதிகப்படுத்தும் வழிமுறைகளை வகுக்காமல் குற்றங்களை குறைக்க இயலாது. எனவே பாலியல் குற்றங்களை தன்னிச்சையாக விசாரிக்கும் அதிகாரமுடைய, அறிவியல் பூர்வமான ஆதாரங்களைத் திரட்டும் அளவிற்கு பயிற்சி அளிக்கப்பட்ட ஓர் இடை நிலை அமைப்பை அரசு உருவாக்க வேண்டும்.

இக்குழுவில் இடம் பெறுவதற்கான இடைநிலை அதிகாரிகளாக‌ அறிவியல் மற்றும் மருத்துவத் துறையில் பட்டம் பெற்ற மாணவர்களைத் தேர்ந்தெடுத்து அவர்களுக்கான புதிய முதுநிலை படிப்பினை உருவாக்கி பயிற்சி அளிப்பதன் மூலமும், மேலும் வளர்ந்த நாடுகளின் குற்ற விசாரணை முறைகளை அவர்களை அறிந்து வரச் செய்வதன் மூலமும் இக்குழுவை சிறப்பான விசாரணை குழுவாக மாற்ற இயலும். மேலும் இக்குழுவினை சட்ட மருத்துவர், சட்ட வல்லுநர் மற்றும் பயிற்சி அளிக்கப்பட்ட விசாரணை அதிகாரி கொண்ட குழுவாக அமைக்க வேண்டும்.

இக்குழு ஏதேனும் ஒரு பாலியல் குற்றம் நடைபெறுமாயின் தன்னிச்சையாக விசாரணையைத் தொடங்கி, அறிவியல் பூர்வமான சாட்சியங்களைத் திரட்டுவதன் மூலம் நீதிமன்றங்களில் குற்றம் நிரூபிக்கப்படும் எண்ணிக்கையை கூட்டலாம்.

- மருத்துவர் ஜானகிராமன் (கைப்பேசி: 9600296098; மின்னஞ்சல்: medico.raman@gmail.)

- மருத்துவர் கபிலன் (கைப்பேசி: 9843508772; மின்னஞ்சல்: kabspaceway@yahoo.co)

நன்றி: கீற்று

பாலியல் குற்றங்களை குறைப்பதற்கு ஒரே வழி இஸ்லாம் கூறும் சட்டதிட்டங்கள் தான் என்பதில் மிகத் தெளிவு, இந்த பதிவில் அறிவியல் ஆய்வு தொடர்பான பயனுள்ள தகவல் உள்ளதால், இந்த பதிவை மருத்துவர் ஜானகிராமன் அவர்களின் அனுமதியுடன் இங்கு மீள்பதிவு செய்யப்படுகிறது.

டெல்லி பாலியல் தொடர்பான அதிரைநிருபரில் வெளியான முந்தைய பதிவை பார்வையிட இந்த சுட்டிக்கு செல்லவும் http://adirainirubar.blogspot.in/2012/12/blog-post_5117.html 

பரிந்துரை : அதிரைநிருபர் பதிப்பகம்

நபிமணியும் நகைச்சுவையும்...! 14

தொடர் : 17

அன்னை ஆய்ஷா சித்தீக்கா (ரலி)

ஒற்றை வார்த்தையில் உடனே உதிர்ந்த பதில்! "ஆய்ஷா".

அடுத்தார்ப்போல்.....ஆண்களில்?

தயங்காமல் வந்தது அடுத்த பதில்! "அவரின் தந்தை"

அண்ணல் நபி (ஸல்) யிடம் கேள்வி கேட்டு நின்ற அம்ர் இப்னு ஆஸ் (ரலி) அயர்ந்து போனார்!

அல்லாஹ்வின் தூதர், தன் பெயரைச் சொல்லமாட்டார்களா என்ற நப்பாசை அவருக்கு!

'தாத்துஸ் ஸுலாஸில்' என்ற ஒரு போர்ப் படைக்குத் தலைமை தாங்கி நிற்கும் வெறும் தளபதியாகிய தானும் அதே சமயத்தில் அல்லாஹ்வின் தூதருடைய இனிய நெஞ்சத்தில் தமக்கும் முன்னால் தனியிடம் பெற்று வீற்றிருப்பவர்களும் சமமல்ல! என்பது அப்போதுதான் அவருக்கு பலமாக உரைத்தது! (1)

கேள்வி என்னவென்றால் "மனிதர்களிலேயே உங்களுக்கு மிகப் பிரியமானவர் யார்?" அல்லாஹ்வின் மீது ஆணையாக, முதல் முக்கியத்துவம் பெற்றவராக பெண்ணினத்தின் பேரரசி, கற்புநெறியில் பனியின் வெண்மையும் தூய்மையும் கொண்ட மாதரசி " நம் அன்னை ஆய்ஷா (ரலி)" ஆகவே இருந்தார்கள்!

"உணவுகளிலேயே ஸரீத் என்னும் உணவு சிறந்து விளங்குவதைபோல பெண்களில் ஆய்ஷா சிறந்து விளங்குகிறார்" என்று செம்மல்  நபி (ஸல்) அவர்கள், இவரை சிறப்பித்தார்கள். (2)

"நான் உன்னைக் கனவில் கண்டேன். ஒரு வானவர் உன்னைப் பட்டுத்துணியால் போர்த்திக் கொண்டு வந்து இவர்தான் உன் மனைவி என்றார். முகத்தின் துணியை அகற்றிப் பார்த்தேன். அப்போது நீயாக இருந்தாய்! இது அல்லாஹ்வின் புறத்திலிருந்து வந்திருந்தால் அப்படியே நடக்கும் என்று கூறிக்கொண்டேன்" என்று ஏந்தல் நபியவர்கள் என்னிடம் கூறினார்கள். (3)

அறிவில் ஒளிவீசும் நம் அன்னை அவர்கள் அதில் ஒரு மாணிக்கமாக சிறுவயதிலேயே மின்னத் தொடங்கி விட்டார்கள். நம் அன்னை அவர்களின் அதீதமான ஞாபக சக்தியாலும் புத்திக் கூர்மையாலும் எந்தவொரு சிறு சம்பவத்தையும் உடனே நினைவுக்குக் கொண்டு வந்து தெளிவாக விளக்கும் தன்மைப் பெற்றிருந்தார்கள்.

'நபிமொழித்துறை'என்பது அண்ணலாருடன் கொண்டிருந்த நெருக்கமான பரிச்சயத்தைக் கொண்டுதான் தீர்மானிக்கப் படுகின்றது. அல்லாஹ்வின் தூதரோடு யார் யார் அந்த அளவிற்கு நெருக்கமும் அண்மையும் கொண்டிருந்தார்களோ அவர்கள் மட்டுமே அதில் சிறந்து விளங்க முடியும். இதனாற்றான் இவர்கள் மூலம் நமக்கு 2210 நபிமொழிகள் கிட்டியுள்ளன. அவை அனைத்தும் முக்கியமான மார்க்க சட்டதிட்டங்கள் பற்றியவை ஆகும். எனவேதான்அவனியெங்கும் புகழ் நிறைந்த அஹ்மது  நபி (ஸல்) அவர்கள், "நீங்கள் ஹுமைரா (ஆய்ஷா) விடமிருந்து மார்க்கத்தின் மூன்றில் ஒரு பங்கைப் பெற்றுக் கொள்ளுங்கள் என்று அருளினார்கள்.

அன்னை ஆய்ஷா (ரலி) அவர்களின் புத்திசாதுர்யமான அதே சமயத்தில் நகைச்சுவை நல்கும் ஒரு பதிலை நாம்  பார்ப்போம்:

அண்ணல் பெருமான் நபி (ஸல்) அவர்கள் ஒரு போரிலிருந்து திரும்பி வந்தார்கள். அப்போது காற்று பலமாக அடித்ததால் எனது அலமாரி திரை அகன்றது. நான் விளையாடும் பொம்மைகள் தெரிந்தன!

அண்ணலார் அவர்கள்: "இவை என்ன ஆய்ஷா?" என்று கேட்டார்கள்.

"என் விளையாட்டு பொம்மைகள்" என்றேன்.

"அதன் நடுவே இருப்பது என்ன?" என வினவினார்கள்..

"அது ஒரு குதிரை" என்றேன்.

"அதன் மீது இருப்பது என்ன?" என்றார்கள்.

நான் "இரு இறக்கைகள்" என்றேன்.

"ஓஹோ. குதிரைக்கு எங்காவது இறக்கைகள் இருக்குமா?" என்று கேட்டார்கள்.

அதற்கு "ஓ. இருக்குமே! சுலைமான் நபி அவர்களின் குதிரைக்கு இறக்கைகள் இருந்ததே!" என்று நான் தயங்காமல் பதில் சொன்னபோது,

அல்லாஹ்வின் தூதர் அவர்களுக்கு சிரிப்பு பொத்துக்கொண்டு வந்துவிட்டது! என் பதில் கேட்டு கடைவாய்ப்பற்கள் தெரியுமளவிற்கு சிரித்தார்கள்" (4)

இந்நிகழ்வில் அன்னை ஆய்ஷா (ரலி) அவர்களின் சமயோசிதமான புத்திசாலித்தனமும் மார்க்க அறிவும் விஷயத்தை உடனுக்குடன் புரிந்துகொள்ளும் பக்குவமும் பளிச்சிடுகின்றதல்லவா!

அன்னை ஆய்ஷா (ரலி) அவர்கள் விரைந்து வளரும் தன்மையுடைய பெண்களுள் ஒருவர். ஒன்பது வயதானபோதே ஒரு பெரிய பெண்மணியைப் போன்ற உருவத்திற்கு வந்துவிட்டார்கள்! 

ஹிஜ்ரீ முதலாண்டு ஷவ்வால் மாதம் அன்னை ஆய்ஷா (ரலி) அவர்கள் அண்ணல் நபி (ஸல்) அவர்களுடன் இனிய இல்லறத்தைத் துவங்கினார்கள்.

ஒருமுறை மாமதீனாவின் ஒளிசேர் மணியான மண்குடிலில் வாழ்ந்த மன்னர் நபி அவர்கள் தமது வீட்டில் செருப்புத் தைத்துக் கொண்டிருக்க, சங்கை மிகுந்த புனிதமான மங்கையர் திலகம் அன்னை ஆய்ஷா (ரலி) அவர்கள் ஓர் ஆடையை ராட்டினத்தில் நெய்து கொண்டிருந்தார்கள். அப்போது நபித்துவ ஒளி மிகுந்த நாயகத்தின் உடலில் இருந்து வியர்வை பூத்துக் கொண்டிருந்தது. உகப்பான உண்மைத்தூதரின் முகரேகைகள் ஒளியால் இலங்கிக்கொண்டிருந்தன! இந்த அதிசய நிகழ்வைக் கண்டு திடுக்கிட்டுப் போன அன்னை ஆய்ஷா (ரலி) அவர்கள், தன் அன்புக் கணவரின் எழில்முகம் அதை உற்று நோக்கினார். அது ஜெகஜ் ஜோதியாய் ஒளி விட்டுப் பிரகாசித்துக் கொண்டிருந்தது!

ராட்டை சுற்றிடும் சப்தம் திடீரென்று நின்றதும் அண்ணல் நபி (ஸல்) அவர்கள், ஆய்ஷா (ரலி) அவர்களை ஏறிட்டுப் பார்த்து, 'என்ன காரணம்' என்று வினவ, வைத்த கண் வாங்காது தன் அன்புக் கணவரையே ஆழ்ந்து பார்த்துக் கொண்டிருந்த ஆய்ஷா (ரலி) அவர்கள் "யூஸுஃப் நபியின் அழகை இமைகொட்டாது பார்த்துப் பழமென எண்ணிக் கை விரல்களை கத்தியால் நறுக்கிக் கொண்ட மிஸ்ர் நாட்டின் அரம்பையர், தங்களின் முக அழகை இப்போது காணின் அவர்களின் விரல்களை அல்ல, தங்கள் இதயத்தையே கத்தியால் வெட்டிக் கொள்வார்கள் என்று பொருள்படும் கவிதை அமுதமாய் அவர்கள் வாயிலிருந்தும் வெளிவந்தது!

இன்னும், அல்லாஹ்வின் மீது ஆணையாக, கவிவேந்தர் அபூகபீர் ஹுதலி தங்களை இப்போது சந்திப்பின்;

"அவரது முக ரேகைகளை நீங்கள் பார்த்தால், அவை மின்னும் நட்சத்திரங்களைப் போன்று இலங்குவதைக் காணலாம்"

என்ற பிரசித்திப் பெற்ற அவரின் கவி வரிகளுக்கு, பிறர் எவரையும்விட நீங்களே முற்றிலும் பொருத்தமானவர் என சத்தியம் செய்வார் என்று அன்னை ஆய்ஷா (ரலி) அவர்கள் இன்னும் வியப்பு மாறாமல் பேரழகர் பெருமானாரையே ரசித்து நின்றார்கள்! (5)

அன்னை ஆய்ஷா (ரலி) அவர்களின் சகோதரி மகன் உர்வா பின் ஸுபைர் (ரலி) அவர்கள் அறிவிக்கின்றார்:

"அல்லாஹ்வின் தூதர் (ஸல்) நோன்பு நோற்ற நிலையில், தம் துணைவியருள் ஒருவரை முத்தமிடுவார்கள்" என்று சொல்லிவிட்டு என் சிறிய அன்னை ஆய்ஷா (ரலி) அவர்கள் சிரித்தார்கள் என்றார். (6)

ஆண்-பெண் (கணவன்-மனைவி) இவர்களுக்கிடையே உள்ள உறவுகளும் தொடர்புகளும் அத்துடன் அண்ணல் நபியின் இனிய இல்லற வாழ்வு, அல்லாஹ்வின் தூதருடைய தனிப்பட்ட நெறிமிகுந்த வாழ்வொழுங்குகள் போன்றவை பற்றிய அன்னை ஆய்ஷா (ரலி) அவர்களின் பிரசித்திப் பெற்ற ஃபத்வாக்கள் சிறப்பிற்குரியனவாகும்.

மேலும், உர்வா பின் ஸுபைர் (ரலி) அவர்கள், ஹலால்-ஹராம், அறிவுப் புலமை, கவிதை, மருத்துவம் என அனைத்துத் துறைகளிலும் 'என் சிற்றன்னை ஆய்ஷா முத்தஹ்ஹரா அவர்களை விட சிறந்தவர் ஒருவரை நான் கண்டதில்லை' என்கின்றார். (7)

நான் மணிமொழிப் பேசும் மாண்பு நபி (ஸல்) அவர்களோடு ஒரு பயணத்தில் இருந்தேன். அப்போது நான் சிறியவளாக, சதைப்பற்று அதிகமில்லாதவளாக, கனத்த உடம்பு இல்லாதவளாக இருந்தேன். அப்போது மக்கள், "வாருங்கள். ஓட்டப்பந்தயம் வைக்கலாம்" என்றழைத்தனர். அனைவரும் ஓடினர்.

நபி (ஸல்) என்னை அழைத்து, "நம் இருவருக்கும் பந்தயம் வைக்கலாம்" என்றார்கள். அவர்களோடு ஓடினேன். பந்தயத்தில் நான் அவர்களை முந்திவிட்டேன். நபி (ஸல்) அவர்கள், அமைதியானார்கள். பின்னர், சில காலத்தில் எனக்கு சதைபோட்டு உடல் கொஞ்சம் கனத்துவிட்டது.

நடந்த பந்தய நிகழ்ச்சியை நான் மறந்துவிட்டேன். இன்னொரு பயணம் எங்களுக்கு வாய்த்தது. மக்கள் ஓடினர். அண்ணல் நபி (ஸல்) என்னை அழைத்து, "உன்னோடு ஓடுகிறேன்" என்றார்கள். எனவே, நான் அவர்களோடு ஓட்டப்பந்தயத்தில் ஓடினேன். ஆனால் , இந்தமுறை என்னை முந்திவிட்டு, வையகம் போற்றிடும் வள்ளல் நபியவர்கள் வான்மதிபோல் பிரகாசமாய்ச் சிரித்தார்கள். "இது, அதற்கு முன்னால் உன்னிடம் தோற்றதற்கு சரியாகிவிட்டது" என்றார்கள்.

நினைவெல்லாம் தேடும் நம் நெஞ்சிலே வாழ்கின்ற அல்லாஹ்வின் தூதர் (ஸல்) அவர்கள், அன்னை ஆய்ஷா (ரலி) அவர்களின் மீது மிகுந்த அன்பு வைத்திருந்தார்கள். ஒரு பெருநாளின் போது , சூடான் நாட்டவர்கள் போர்க் கருவிகளையும் கேடயங்களையும் வைத்து மஸ்ஜித் நபவீயின் எல்லையில் வீர விளையாட்டு விளையாடினார்கள். அதை நான் பார்க்க விரும்புவதை அறிந்த அல்லாஹ்வின் தூதர் (ஸல்) அவர்கள், என்னை அவர்களுக்குப் பின்புறமாக என் கன்னம் அவர்களின் கன்னத்தில் படும் அளவில் என்னை நிற்க வைத்தார்கள். பிறகு, அவர்களை நோக்கி, "அர்பிதாவன் மக்களே, உங்கள் விளையாட்டைத் தொடருங்கள்" என்றார்கள்.நான் பார்த்து சலித்தபோது "உனக்கு பார்த்தது போதுமா?" என்று கேட்டார்கள். நான் ஆம்! என்றேன். "அப்படியானால் சரி. உள்ளே போ" என்று கூறினார்கள். (8)

நம்பிக்கையாளர்களின் அன்னை கதீஜா (ரலி) அவர்கள் மறைவிற்குப்பின், அன்னை ஸவ்தா (ரலி) அவர்களையும் அன்னை ஆய்ஷா (ரலி) அவர்களையும் அல்லாஹ்வின் தூதர் (ஸல்) அவர்கள் மணமுடித்து இருந்தார்கள். இரு அன்னையரும் மிகுந்த பாசத்துடன் இருப்பார்கள். சில சமயங்களில் கேளிக்கை செய்தும் சிரித்து மகிழ்வார்கள். 

அன்னை ஆய்ஷா (ரலி) அவர்கள் அன்றைய தினம் 'ஹரீராஹ்' என்ற ஒரு சிறப்பான உணவை வீட்டில் தயாரித்து இருந்தார்கள். நபிகளாருக்கு பரிமாறும் சமயத்தில் அன்னை ஸவ்தா அவர்களையும் உண்ண அழைத்தார்கள். ஆனால், அன்னை ஸவ்தா (ரலி) அவர்கள், தனக்கு வேண்டாம் என மறுத்துகொண்டிருந்தார்கள். 

அன்னை ஆய்ஷா (ரலி) அவர்களோ அப்போது மிகவும் இளமைத் துடிப்புள்ள ஒரு சிறுவயதாக இருந்ததால், தான் செய்த அந்த சிறப்பான உணவை கண்டிப்பாகச் சாப்பிட்டே ஆகவேண்டும் என்று அடம் பிடித்து, வலுக்கட்டாயமாக அன்னை ஸவ்தாவின் வாயில் ஊட்டிவிட முனைந்த அன்னை ஆய்ஷா (ரலி) அவர்களின் முயற்சியில் விளைவு என்னவாயிற்று  என்றால், அன்னை ஸவ்தா அவர்கள், வேண்டாம் என்று தலையை வேகமாக ஆட்டி மறுத்துகொண்டிருக்கும் நிலையில் வாயை நோக்கித் திணிக்கப்பட்ட உணவு திசைமாறி முகம் முழுதும் பூசப்பட்டு விட்டது. 

இந்தக் கேளிக்கையான நிகழ்ச்சி இரு அன்னையரையும் பார்த்துகொண்டிருந்த அண்ணலாருக்கு அன்னை ஸவ்தாவின் 'உணவுமுகம்' பெரிய சிரிப்பைக் கொண்டுவந்து சேர்த்தது!

உடனே, அண்ணலார் பாய்ந்து போய் அன்னை ஆய்ஷா (ரலி) அவர்களின் இரு கைகளையும் முதுகுப்பக்கம் நின்று பிடித்துக் கொண்டார்கள். சீக்கிரம் வா ஸவ்தா! இப்போது உன் முறை. இப்போது ஆய்ஷாவின் முகத்தில் நீ பூசிவிடு! என்று அன்னை ஸவ்தாவுக்கும் வாய்ப்பளித்தார்கள். சற்று நேரத்தில் அன்னை ஆய்ஷா (ரலி) அவர்களின் முகம் 'உணவுமுகமாக' மாறவே மீண்டும் மனைவியைப் பார்த்து நகைக்கத் தொடங்கிவிட்டார்கள் நபிகளார் அவர்கள்.

இவ்வாறு அன்னை ஆய்ஷா (ரலி) அவர்களின் வாழ்வு, மாறா அன்பின் பிறப்பிடமான மகிமை  நபி (ஸல்) அவர்களோடு மிக்க மகிழ்வுடன் இருந்தது. மிகச் சிறப்பாகவும் இருந்தது!

அன்னை ஆய்ஷா (ரலி) அவர்கள், தங்களின் தனிச்சிறப்புப் பற்றி பின்வருமாறு கூறியுள்ளார்கள்:

நான் ஒருத்தியே அண்ணல் நபி (ஸல்) அவர்கள் மணமுடித்ததில் கன்னிப் பெண்ணாவேன். என் பெற்றோரைவிட, வேறு யார் பெற்றோரும் இஸ்லாத்திற்காக 'ஹிஜ்ரத்' செய்யவில்லை. என்மீது அவதூறு சுமத்தப்பட்டபோது, என் தூய்மையை அல்லாஹ் (ஜல்) வஹீ மூலம் அறிவித்தான். (9)

என்னை மணமுடிக்குமுன் நான் அல்லாஹ்வின் தூதருக்குக் கனவில் காட்டப் பட்டேன். நானும் அண்ணல் நபியவர்களும் ஒரே தொட்டியில் குளித்துள்ளோம்.

நபிகளார் தொழும்போது அவர்கள் மனைவியரில் என்னை மட்டுமே உறங்க அனுமதித்தனர். என்னுடன் தங்கும்போது அண்ணல் நபியவர்களுக்கு வஹீ வருவது வழக்கமாக இருந்தது. என் நெஞ்சில் தலைவைத்தே அண்ணலார் உயிர் நீத்தனர்.

அன்று அவர்கள் என்னுடன் வாழும் தவணை நாளாகவே இருந்தது. அவர்கள் என்னுடைய இல்லத்திலேயே நல்லடக்கம் செய்யப்பட்டார்கள்.

நம் அன்னை ஆய்ஷா (ரலி) அவர்கள் அறிவிக்கிறார்கள்:

அல்லாஹ்வின் தூதர் (ஸல்) உறங்கிக் கொண்டிருந்தபோது, தமது படுக்கையில் சிரிக்கலானார்கள். பின்னர் விழித்தெழுந்தபோது நான், 'அல்லாஹ்வின் தூதரே. தாங்கள் உறங்கும்போது ஏன் சிரித்தீர்கள் எனக் கேட்டேன். அதற்கு முத்திரைத்தூதர்  அவர்கள் 'என் சமூகத்தினர் சிலர் இறையில்லம் ஹரமில் தஞ்சம் புகுந்துள்ள குறைஷியரில் ஒருவருக்காக, இறையில்லம் நோக்கி படையெடுத்து வருவார்கள். அவர்கள் 'பைதா' எனும் சமவெளியை அடையும்போது பூமிக்குள் புதைந்து போவார்கள்.

புதைந்த அவர்கள் பிற்பாடு பல்வேறு நிலைப்பாடு கொண்டவர்களாக எழுப்பப்படுவார்கள். அவர்களின் எண்ணங்களுக்கேற்ப அல்லாஹ் (ஜல்) மறுமையில் அவர்களை எழுப்புவான். இந்தக் காட்சியைக் கண்டுதான் நான் சிரித்தேன் என்றார்கள்.

நான், "அல்லாஹ்வின் நபியே! பல்வேறு நிலைப்பாடு கொண்டவர்களாக வந்திருக்கும் நிலையில், அவர்களின் எண்ணங்களுக்கேற்ப மாண்பும் வல்லமையும் மிக்க அல்லாஹ் எவ்வாறு மறுமையில் எழுப்புவான்?" என்று கேட்டேன்.

அதற்கு வையகம் போற்றும் அல்லாஹ்வின் தூதர்  (ஸல்) அவர்கள் "பார்வையாளர்கள், வழிப்போக்கர்கள், நிர்ப்பந்தமாக அழைத்து வரப்பட்டவர்கள் என பல்வேறு தரப்பட்ட மக்கள் சாலையில் திரண்டிருப்பர். அவர்கள் அனைவருமே ஒட்டுமொத்தமாக அழிந்து போவர். பின்னர், அவர்கள் அவரவர்களின் எண்ணங்களுக்கேற்ப எழுப்பப் படுவார்கள்." என்று பதிலளித்தார்கள். (10)

ஒருமுறை ஒருசிலர் அன்னையை சந்திக்க வந்தனர். உம்முல் முஃமினீன் அவர்களே, அண்ணலாரின் பண்பு நலன்களைப்பற்றி சற்று எங்களுக்குச் சொல்லுங்களேன் என்றார்கள்.

"நீங்கள் குர்ஆனை வாசிப்பதில்லையா? குர்ஆன் தான் மாசிலா மாமணியான மாண்பு நபியின்  ஒட்டுமொத்தப் பண்பு நலனாகத்திகழ்ந்தது' என்று பதிலளித்தார்கள்.

வேகவேகமாகக் குர் ஆனை வாசித்து முடித்துவிடுவதுதான் சிறந்தது. நன்மைகளைப் பெற்றுத் தரக் கூடியது என்று சிலர் ஒரே இரவில் குர்ஆனை  ஓதி முடிக்கிறார்களே அன்னையே! என்ற கேள்விக்கு;

"அவர்கள் ஓதுவதும் ஒன்றுதான். ஓதாமல் இருப்பதும் ஒன்றுதான்!" இரவு முழுவதும் சாந்திநபி அவர்கள்  நின்று தொழுது இருக்கிறார்கள். பார்த்தால், அல் பகரா , அந் நிஸா, ஆலு இம்ரான் அத்தியாயங்களைத் தவிர வேறு எதையும் ஓதி இருக்க மாட்டார்கள்.நற்செய்தி தாங்கிய வசனங்கள் வந்தால் திரும்பத் திரும்ப அதனையே ஓதுவார்கள். அல்லாஹ்விடம் துஆச் செய்வார்கள். இறைவேதனை, இறை சாபம் சுமந்த வசனங்களைக் கண்டால் இறைவனிடம் பாதுகாவல் தேடுவார்கள் என அன்னை ஆய்ஷா (ரலி) அவர்கள் பதிலளித்தார்கள் (11)

இறைவேதத்திற்கு உரை அளிக்கக்கூடிய தகுதியும் இறைத்தூதரின் நடைமுறையை விளக்கும் ஆற்றலும் இஸ்லாமிய மார்க்க சட்ட திட்டங்களைப் போதிக்கும் தீர்க்கமான அறிவும் பெற்ற திறமையாளராய் மிளிர்ந்த ஒரு நடமாடும் பல்கலைக் கழகமாகவே அன்னை ஆய்ஷா (ரலி) அவர்கள் அண்ணலாரின் மறைவுக்குப் பிறகு மீதி 46 ஆண்டுகள் மக்களுக்கு மார்க்க வழிகாட்டுதலிலேயே கழித்து அவர்தம் 67ஆம் வயதில் ஜன்னத்துல் பகீயில் நல்லடக்கம் செய்யப்பட்டார்கள்.

(ஆனால், அந்நாளில் தன் நல்லடியார்களிடம்) சாந்தியடைந்த ஆத்மாவே! நீ உன் இறைவன் பால் திருப்தி அடைந்த நிலையிலும் அவன் உன் மீது திருப்தி அடைந்த நிலையிலும் நீ மீளுவாயாக! நீ என் நல்லடியார்களுள் சேர்ந்து கொள்வாயாக. மேலும், நீ என் சுவர்க்கத்தில் பிரவேசிப்பாயாக (என்று இறைவன் கூறுவான். (அல் குர் ஆன் 89:27)

o o o 0 o o o

ஆதாரங்கள்:

(1) புகாரி 3662

(2) மனாகிப் ஆய்ஷா

(3) புகாரி 5125

(4) அபூதாவூத் 4284

(5) தஹ்தீப் தாரிக் திமிஷ்க்

(6) புகாரி 1928

(7) முஸ்தத்ரக் ஹாக்கிம்

(8) புகாரி 950

(9) அல்-குர்ஆன் 24:4-26

(10) முஸ்னத் அஹ்மத் 23595

(11) முஸ்னத் அஹ்மத்

இக்பால் M.ஸாலிஹ்

வளைகுடா விடுப்பு - பயணம் - 1 19

துபாயிலிருந்து விமானம் திருச்சியை நோக்கி வந்து கொண்டிருந்தது அதில் அதிரையைச் சேர்ந்த அஹமது (பயணத்தின் நாயகன்) மிக சந்தோசத்தோடு வரும் ஹஜ்ஜுப் பெருநாளை கொண்டாட 45 நாள் விடுப்பில் வந்து கொண்டிருந்தார்.

திருச்சி விமான நிலையம். அஹமதுவின் தம்பி மற்றும் மைத்துனர், மாமனார் ஆகியோர் சகிதம் ஆவலோடும் பரபரப்போடும் வெளியில் காத்திருந்தனர்.

அல்லாஹ்வின் உதவிகொண்டு விமானம் திருச்சி விமான நிலையத்தின் ஓடுதளத்தில் தரையிரங்கியது அதன் பின்னர் விமான நிலைய சட்டதிட்ட நடைமுறைகள் முடிந்து அஹமதுவும் விமான நிலையத்திலிருந்து வெளிவந்தார். அவரை அழைத்துச் செல்ல வந்திருந்த அனைவர்களது முகத்திலும் சந்தோசம் முசாஃபா செய்து கொண்டனர்.

தம்பி, காக்காவிடம் நலம் விசாரித்துவிட்டு "காக்கா சாம்சங் ஸ்கிரீன் டச் ஃபோன் வாங்கி வந்துயிருக்கிங்கதானே?" உரிமையோடும் ஆவளோடும் கேட்டான்.

சிரித்துக்கொண்டே "கொண்டு வந்திருக்கிறேன்டா தம்பி" என்றவர். அனைவரும் காருக்குள் ஏறினர். கார் அதிரையை நோக்கிச் சென்றது. ஊர் விசயங்களை ஒவ்வொன்றாய் ஒவ்வொருவரிடமும் கேட்டுக்கொண்டு வந்தார் அஹமது. இடையிடையே கார் ஓட்டுனரும் மற்றவர்கள் சொல்லவிட்டதை எடுத்து கொடுத்தார்.

மாமனாரை பார்த்து "ஆமினா (மனைவி) நல்லா இருக்கின்றதா?" என்று கேட்க... அவரும் "நல்லா இருக்கிறது, என்ன சுகரும் ப்ரசரும்தான் அடிக்கடி தொந்தரவு செய்கிறது." என்று சொல்லிக் கொண்டு வர, இடை யே ஓட்டுநர்(ஜமால்) அஹமதுவைப் பார்த்து "காக்கா தஞ்சாவூர் சென்றாலும் பட்டுக்கோட்டை சென்றாலும் ராத்தா என் காரில்தான் வருவார்கள் என்ன ஆஸ்பத்திரி வேலை மட்டும் தான் என்று சொல்லிவிட்டு எல்லா கடைகளிலும் ஏறி இறங்கி லேட் பன்னிட்டு வெயிட்டிங் சார்ஜ் மட்டும் தரவே மாட்டார்கள்" என்று சொல்ல, மாமனார் ஓட்டுனரை முரைத்துவிட்டு ரோட்ட பாத்து ஓட்டுப்பா என்று அதட்டினார்.

அதிரை மண்ணில் கால் பதித்தாகிவிட்டது உம்மாவிடம் சலாம் சொல்லி முசாஃபா செய்து தம்மை பார்க்க வந்தவர்களிடம் உடல் நலம் விசாரித்து அமானித சாமான்கள் கேட்டுவந்தவர்களிடம் மஃக்ரிபுக்கு பிறகு வரச் சொல்லியும் பரபரப்பாய் இருந்து கொண்டிருந்தார் அஹமது.

தன்னந்தனியாய் பாலைவனத்தில் காணாமல் போன ஒட்டகம் திரும்பக் கிடைத்த சந்தோசம் குருவிக் கூட்டுக்குள் இரை கொண்டு வந்த தாய்ப் பறவையை கண்ட பரவசம் 3 வருடம் ஒரே அறையில் சந்தோசமாய் படித்து படுத்து குதூகளித்து கல்லூரி படிப்பு முடிந்து பிரிந்த இரண்டு நண்பர்கள் நீண்ட இடைவேளைக்குப்பின் சந்தித்துக் கொண்ட மகிழ்ச்சி அனைத்தும் ஒன்று சேர்ந்த கலவை என்று கழிந்தது. 

அன்று இரவு 9 மணி கணவன் மனைவி சந்திப்பில் ஒருவர் ஒருவர் பார்த்துக் கொள்கின்றனர். பேச்சு வரவில்லை நான்கு கண்களும் ஏதேதோ பேசுகிறது. வாயில் புன்னகை வார்த்தைகளில் தடுமாற்றம் 2 வருட பிரிவிற்கு பின்னர் அல்லாஹ் தந்த அற்புத நேரம் ஆனந்தச் சூழல் அல்ஹம்துலில்லாஹ்..

தொடரும்

மு.செ.மு.சஃபீர் அஹமது

விமான பயணமும் விபரீதமும் :: பகுதி -2 நிறைவு 12

இரண்டு விஷயங்களை கவனத்தில் வைத்துக் கொள்ளவும், வணிக விமானங்கள் எடைக்கு இணையான எஞ்சின் திறனை மட்டுமே கொண்டிருக்கும், மேலும் இறக்கையின் மேல், கீழ் பயணிக்கும் காற்று மீண்டும் பின் பகுதியில் ஒன்றாக இணைய  வேண்டும்.

ஒரு விமானம் 35,000 அடி உயரத்தில் பறக்கின்றது, விமானம் முன்னோக்கி செல்லும் போது அதன் மையப்பகுதியான உடல் அதே பரப்பளவில் காற்றினை முன்னோக்கித் தள்ளும் எனவே விமானத்துக்கு சற்று முன்னதாக ஒரு காற்று  முகப்பு உருவாகும். இது விமானத்துக்கு மட்டும் அல்ல பஸ்ஸுக்கும் இப்படி ஒரு காற்று முகப்பு உருவாகும். அதே வேளையில் பக்கவாட்டில் காற்று தடையின்றி வேகமாக  இறக்கை வரை செல்ல  முடியும், அதுவே இறக்கை மீது மோதி மேலும், கீழும் இரண்டாக பிரிந்து சென்று அழுத்த மாறுப்பாட்டினை உருவாக்கி விமானம் பறக்க உதவுகிறது என்று பார்த்தோம். 

வளிமண்டலத்தில் காற்று ஓடைகள் உண்டு என்பதையும் பார்த்தோம். இதனால் விமானம் இயங்கும் வேகத்தினை விட வேகமாக காற்றில் முன்னோக்கி செல்லும் இதனை உண்மையான  காற்று வேகம் எனப்படும். விமான எஞ்சினால் கிடைக்கும் வேகத்தினை இயல்பான வேகம் எனப்படும். ஆகமொத்தம் இரண்டு விதங்களில்  வேகமாக விமானம் பறப்பதை நாம் கவனத்தில் கொள்ள வேண்டும் 

உண்மையான காற்றுவெளி வேகம் விமானியின் கட்டுப்பாட்டுக்கு அப்பாற்பட்டது, அது காற்றோடையின் தன்மைக்கு ஏற்ப மாறும். பயணிகள் விமானம்  காற்றில் ஒலியின் வேகத்தை விட குறைவான வேகத்தில் பயணிக்கும் விதமாகவே விமானம் வடிவமைக்கப்பட்டுள்ளது. பயணிகள் விமானத்தின் பாதுகாப்பான மேக் ஸ்பீட் மேக் 0.86 ஆகும். மேலும் எஞ்சின்களும் அப்படியே, இதனால் விமானத்தின் வேகம் எப்பொழுதும் ஒலியின் வேகத்தினை தாண்டாமல் பார்த்துக்கொள்ள வேண்டிய மிக பெரிய பொறுப்பு விமானிக்கு உண்டு.

விமானத்தை குறைவான வேகத்தில் (கட்டவண்டி போல்) ஓட்டினால் போதுமே அப்புறம் எதற்கு பயப்பட வேண்டும்  என்றுக் கேட்கலாம். ஆனால், காற்றோடை என்ற ஒன்று இருக்கே அது சென்னை போக வேண்டிய விமானத்தை இலங்கை பக்கம் இழுத்துக் கொண்டு போய் விட்டு விடும்  மேலும் அவ்வளவு உயரத்தில் காற்றின் அடர்த்தி குறைவாகவே இருக்கும், அதனை சமாளிக்க கண்டிப்பாக ஒரு குறைந்த பட்ச வேகம் அதாவது  மினிமம் ஸ்பீட்  இருக்க வேண்டும். அப்போதுதான் காற்று இறக்கையின் மீது வேகமாக மோதி அழுத்த வித்தியாசம் உருவாக்கி விமானத்தினை காற்றில் மிதக்க வைக்கும்.

போதுமான மிதப்பு விசை கிடைக்க வேகமாக இயக்க வேண்டும், என்பது ஒரு கட்டாயம்  ஆனால் ஒலியின் வேகத்தை எட்டிவிட கூடாது  என்பதே வணிக விமானங்களுக்கான வானவியல் கட்டுப்பாடு. அவ்வகை கட்டுப்பாடு ஏனென்றால்  ஒலியின் வேகத்தினை வணிக விமானங்கள் எட்டும்போது  இறக்கையின் மேல் பிரிந்து செல்லும் காற்று மீண்டும் பின்பகுதியில் இணையாமல் பிரிந்தே சென்றுவிடும் இதனால் தூக்கு விசையும் குறையும். தூக்கு விசை குறைத்தால் விமானம் நிலை தடுமாறி கிழே விழும் ஆபத்தும் அதில் நிறைய இருக்கு.

இது எதனால் ஏற்படுகிறது எனில், முன்பு   சொன்னது போல விமானத்தின் மைய உடல்பகுதி காற்றினை அதன் பரப்புக்கு முன் தள்ளி ஒரு காற்று முகப்பினை உருவாக்குவதால் பக்கவாட்டில் காற்று வேகமாக இறக்கையில் மோதும், இதுவே தேவையான மிதப்பு விசையினை தருகிறது. காற்று முகப்புக்கும் இறக்கைக்கும் இடையே காற்றின் வேகம் மாற்றம் அடைவதே அதற்கான காரணம்.

இப்போது விமானம் ஒலியின் வேகத்தில் பறக்கிறது எனில், காற்று முகப்பிற்கும், விமானத்தின் முகப்பு மூக்கிற்கும் இடையில் இடைவெளி இருக்காது. விமானம் வேகமாக சென்று முகப்பின் மீதே மோதும் இதனால் ஒரு நிலை தடுமாறி ஒரு  சீர்குலைவு காற்றில் ஏற்படும். இது இறக்கையின் மீது மோதும் காற்றின் வேகத்தினைக் குறைக்கும்.

இப்படிப்பட்ட நிலையில் விமானி என்ன செய்வார் எனில் இறக்கையில் மோதும் காற்றின் வேகத்தை அதிகரிக்க காற்று மோதும் கோணத்தினை உயர்த்துவார். இதனால் இறக்கையின் மீதாக கடக்கும் காற்றின் வேகம் கூடும். இது தேவையான அழுத்த வேறுப்பாட்டினைத் தரும் (எல்லா சங்கத்திற்கும் ) ஒரு எல்லை இருப்பதுபோல் இதற்கும் ஒரு எல்லை உண்டு. காற்று மோதும் கோணம் அதிகம் உயர்த்தப்பட்டால் பிரியும் காற்று மீண்டும் இணையாது இதனால் விமானம் கீழ் நோக்கி இறங்கும், சிறிது நேரத்தில் சரி செய்யவில்லை எனில் விமானம் செங்குத்தாக தரை நோக்கி டைவ் அடித்து விடும்.

இப்படி திடீர் என உயரம் குறைந்து கீழ் செல்லும் போது விமானத்திற்கு ஏற்படும் பாதிப்பு என்னவெனில், தரை மட்டத்தில் விமானத்தின் உள்ளும், புறமுமாக  ஒரே காற்று  அழுத்தம் இருக்கும். அதுவே 35,000 அடி உயரத்தில் வெளிப்புற காற்று அடர்த்திக் குறைவாக  இருப்பதால் உட்புறத்தை விட வெளியில் அழுத்தம்  குறைவாக இருக்கும். இந்த அழுத்த மாறுபாட்டால்  விமானம் சற்றே விரிவடையும். டேக் ஆப் ஆகும்  போது காது அடைப்பது   இதனால் தான். (இந்த காது  அடைப்பு விஷயத்தை நல்ல காதுலே போட்டு வச்சி கிடுங்கோ).

உயரம் திடீர் என குறைவதால்  விமானம் சுருங்கிக் கொண்டும் வரும். திடீர் என உயரம் குறைந்தால்  இதை   அழுத்த அதிர்ச்சி எனப்படும். இதனால் விமானக்கட்டுமான இணைப்புகளில் உடைசல் ஏற்படும்  மேலும் கட்டுப்பாட்டுக் கருவிகள் செயல் இழந்து போவதற்கான வாய்ப்புக்கள் அதிகம் இருக்க. மிக வேகமாக உயரம் குறையும் போது விமான இறக்கை அல்லது விமானத்தின் உடலே உடைந்து விடும். எனவே விமானம் மேல் எழும்புதல், இறங்குதல் என இரண்டும் மிகச் சீராகத்தான் நடக்க வேண்டும்.

எனவே விமானம் ஒலியின் வேகத்தினை தொடும் எல்லையை சவப்பெட்டி முனை (சந்தூக்கு முனை) என்பார்கள், காரணம் விமான வேக வரைப்படத்தில் ஒலி வேக எல்லை ஒரு முனையில் முடிவடையும்.

போதுமான அளவு காற்று வேகமாக மோத தேவையான விமான வேகத்தினை கிரிட்டிக்கல் ஸ்பீட் எனப்படும். இந்த வேகம் ஒலியின் வேகத்திற்கு மிக அருகில் இருக்க கூடாது. இந்த கிரிட்டிக்கல் ஸ்பீட் ஒவ்வொரு உயர மட்டம், காற்றின் அடர்த்திக்கும் ஏற்ப மாறுபடும். மிதமான உயரத்தில் குறைவான கிரிட்டிக்கல் ஸ்பீட் போதுமானதாகும் 

உயரம் அதிகரிக்க அதிகரிக்க காற்றின் அடர்த்தி குறையும், எனவே மிதப்பு விசையை நிலையாக வைத்திருக்க காற்றின் வேகத்தினை  அதிகரிக்க கிரிட்டிக்கல் ஸ்பீட் அதிகரிக்கப்படும். இதன் எல்லை ஒலியின் வேகம் ஆகும். (நம்ம ஊரில் இருக்கும் சங்கங்களின் எல்லைகளை தெரிந்து கொண்ட நாம் விமான வேகத்தின் எல்லைகளை புரிந்து கொள்வதில் சிரமம் இருக்காது என நினைக்கின்றேன்)  எனவே எப்பொழுதும் ஒலியின் வேகத்திற்கும், கிரிட்டிக்கல் ஸ்பீடுக்கும் (நல்லா பேரு வச்சி இருக்காங்க) தேவையான வித்தியாசம் இருக்க வேண்டும். அப்போதுதான் தேவைக்கு ஏற்ப வேகத்தை கூட்டியோ, குறைத்தோ சீராக விமானத்தை பறக்க வைக்க முடியும். ஆனால் 35,000 அடி உயரத்தில் கிரிட்டிக்கல் ஸ்பீடிற்கும், ஒலியின் வேகத்திற்கும் இடையே சுமார் 35 கி.மீ/மணி என்ற அளவே வேக இடைவெளி இருக்கிறது.

எதிர்ப்பாராத காரணங்களால் காற்றின் அடர்த்தி குறைந்தால் அதற்கு ஏற்ப விமானத்தின் வேகத்தினைக் கூட்டியோ, காற்று மோதும் கோணத்தை மாற்றவோ விமானியால் முடியாது அப்படி செய்தால் விமானம் மிதப்பு விசையை இழக்கும்.

மேலும் சில சமயங்களில் காற்று ஓடைகளை வேகமாக இழுத்து செல்லும் அப்போது சரியாக வேகத்தினைக்கட்டுப்படுத்த வேண்டும் இல்லை எனில் ஒலியின் வேகத்தினை தொடுவதால் விமானம் மிதப்புவிசையை இழக்க நேரிடும்.

பெரும்பாலும் பனிப்பொழிவு, இடி மின்னல் போன்றவை  டிராபோஸ்பியரில் இருந்தே கீழ் நோக்கிப்பாயும்  அதிலும் சிக்க வாய்ப்புள்ளது. இது  போன்ற சமயங்களில் கட்டுப்பாட்டுக் கருவிகள் செயலிழந்து போக நேரிடும். அதுவும் விபத்துக்கு வழி வகுக்கும். விமானங்களில் 50 கி.மீக்கு முன்னால் (இப்போ இன்னும் கூடுதல் தூரம் காட்டும் கருவிகள் வந்து விட்டன) உள்ள வானிலையை காட்டும் ரேடார் உண்டு. அவை இடி, மின்னல், பனிப்பொழிவினை சுட்டிக்காட்டும். சிறிது நேரம் அப்படிப்பட்ட சூழலில் ஊடாக பயணிப்பதில் பிரச்சினை இல்லை என்பதால் சமாளித்து விடலாம் என விமானிகள் நேராக அதனுள் பயணிப்பதும்  உண்டு. சில சமயங்களில் விபத்து நடக்க   இதுவும் ஒரு காரணமே.

35,000 அடி உயரத்தில் விமானம் பறப்பதில் இத்தகைய அபாயம் இருப்பது தெரிந்தே பல விமான நிறுவனங்கள் விமானத்தை அந்த உயரத்தில் பறக்க வைக்கின்றன. அதற்கு ஒரே காரணம் பணம் பணம் என்ற பேராசைதான்.

குறிப்பு 03 /01/13 அன்று அதிகாலை ஒரு மணிக்கு தமாமில் இருந்து நான் விமானப் பயணம் மேற்கொண்டு சென்னை. புறப்படுகின்றேன் இதில் உள்ள பயண அனுபவங்களையும் அதிரைநிருபர் வாசகர்களுடன் நலமுடன் திரும்பி வந்ததும் பகிர்ந்து கொள்கின்றேன் இன்ஷா அல்லாஹ் !

Sஹமீது

சிந்திக்கத் தூண்டும் சித்திரம் - தொடர்கிறது ! 19

சிந்திக்கத் தூண்டும் சித்திரம் தொடர் வரிசையில் கண்கவரும் அழகிய மற்றுமொரு புகைப்படம்.

தண்ணீரில் எழுத முயன்று அதனை அப்படியே வாசிக்க முயற்சித்தவர்களுக்கு அது ஒரு சுகமான அனுபவமே. வண்ணங்களை தூரிகை தொட்டு சித்திரம் வரைந்த கைகளுக்குத் தெரியும் அங்கே எண்ணங்களை கலந்த பின்னரே வண்ணங்களும் உயிரோட்டம் பெருகும் என்பது.

கண்களில் சிக்கிடும் காட்சிகளை கச்சிதமாக படமெடுப்பது ஒரு பொழுதுபோக்கு என்றால் அதனை ரசனை கொண்ட பார்வை சேர்க்கும் அழகோ அழகு !

மைதொட்டு வரைய வெண்மை படர்ந்த வானத்தை அன்னாந்து பார்க்கத் தேவையில்லை, வழியில் தேங்கிக் கிடக்கும் தண்ணீரே போதுமென்று சொல்லும் கண்ணாடிப் பார்வைச் சித்திரம்.

ஷஃபி அஹ்மது