தமிழகத்தில் சொத்து வைத்திருப்போர் கவனத்துக்கு..! 7

பத்திரப் பதிவு - அரசு வழிகாட்டி மதிப்புக்கான வரைவு திருத்தம்

தமிழ்நாட்டில் கடந்த 2007 ஆம் ஆண்டுக்கு பிறகு அரசு வழிகாட்டி மதிப்பு என்கிற கைடு லைன் வேல்யூ அதிகரிக்கப்படாமல் இருந்தது. புதிய அரசு, அதன் பல்வேறு திட்டங்களுக்கு நிதி பற்றாக்குறை வரவே... இப்போது சுறுசுறுப்பாக மாநிலம் முழுக்க உள்ள ஒரு கோடி சர்வே எண்களுக்கான புதிய வழிகாட்டி மதிப்பை நிர்ணயிக்கும் வேலையில் இறங்கி இருக்கிறது.  

மனை மற்றும் வீட்டை பத்திரப் பதிவு செய்பவர்கள் அதன் அரசு வழிகாட்டி மதிப்பில் (8 சதவிகிதம் முத்திரைத் தாள் கட்டணம், ஒரு சதவிகிதம் பதிவுக் கட்டணம்) 9 சதவிகிதத்தை கட்டணமாக செலுத்த வேண்டும். பெரும்பாலும் சந்தை மதிப்புக்கும் அரசு வழிகாட்டி மதிப்பும் இடையே வித்தியாசம் இருக்கும்.

தற்போது சந்தை மதிப்பு மற்றும் அரசு வழிக்காட்டி மதிப்பு இணையாக இருக்கும்படி அரசு புதிய வழிகாட்டி மதிப்பை நிர்ணயிக்கும் முயற்சியில் இறங்கி இருக்கிறது. பல இடங்களில் தற்போதுள்ள வழிகாட்டி மதிப்பை விட சுமார் 10 மடங்கு அதிகரிக்கப்பட்டிருக்கிறது. அதாவது இப்போது ஒருவர் பத்திரப் பதிவுக்காக 20 ஆயிரம் ரூபாய் செலவிட்டால், இனி 2 லட்ச ரூபாய் செலவிட வேண்டி வரும்..!

இதற்கான வரைவு வழிகாட்டி மதிப்பு, புத்தகமாக தயாரிக்கப்பட்டு தமிழகம் முழுக்க பத்திரப் பதிவு அலுவலகங்களில் பொதுமக்கள் பார்வைக்கு வைக்கப்படிருக்கிறது. மேலும், தமிழக அரசின் பதிவுத் துறை இணையத்தளத்திலும் வெளியிடப்பட்டிருக்கிறது. 

(இணைப்பு : http://www.tnreginet.net:80/DraftGuideline2011/gvaluemainpage2011.asp )

இதில், சந்தை மதிப்பை விட அதிகமாக அரசு வழிகாட்டி மதிப்பு நிர்ணயிக்கப்பட்டிருக்கிறது என்றால், அதை குறைக்கச் சொல்லி அரசுக்கு மனு கொடுக்கலாம். சாலை, குடிநீர், தெரு விளக்கு, பஸ் வசதி போன்ற உள்கட்டமைப்பு வசதிகள் இல்லாத இடத்துக்கு அதிகமாக மதிப்பு நிர்ணயிக்கப்பட்டிருந்தால் அரசு வழிகாட்டி மதிப்பை குறைக்க நடவடிக்கை எடுக்கப்படுகிறது. வரைவு வழிகாட்டி மதிப்பு டிசம்பர் 15 ஆம் தேதிக்குள் இறுதி செய்யப்பட இருக்கிறது.  

இந்த வழிகாட்டி மதிப்பை பார்த்து சரிதானா என்பதை உறுதிப்படுத்திக் கொள்வது சொத்து வைத்திருக்கும் மற்றும் விரைவில் வாங்கப் போகும் அனைவரின் கடமையும் கூட..!

ஏன் சரிபார்க்க வேண்டும் என்பதற்கான விளக்கம் சிறிய உதாரணமாக தருகிறேன்.  

ஒரு ஏரியாவுக்கு தவறுதலாக அரசு வழிகாட்டி மதிப்பு, மிக அதிகமாக நிர்ணயிக்கப்பட்டால் பாதிப்பு அந்த பகுதில் சொத்து வைத்திருக்கும் மற்றும் வாங்கப் போகிற இருவருக்கும்தான். எடுத்துக்காட்டாக ஒரு இடத்தின் அரசு வழிகாட்டி சதுர அடிக்கு 3,000 ரூபாயாக நிர்ணயிக்கப்பட்டிருக்கிறது. ஆனால், உள்கட்டமைப்பு வசதி எதுவும் இல்லாத அந்த இடத்தின் மார்க்கெட் விலை 1000 ரூபாய்தான். இந்த ஒரிஜினல் மதிப்புபடி 1,000 ச.அடி மனையின் விலை 10 லட்ச ரூபாய். இதற்கு முத்திரை மற்றும் பதிவு கட்டணம் 9% என்பது 90,000 ரூபாய். ஆனால், அரசு வழிகாட்டி மதிப்பு 3000 ரூபாய் என்கிற போது, 1000 ச.அடி. மனைவின் மதிப்பு 30 லட்ச ரூபாயாகிவிடுகிறது. இதற்கான பத்திரப் பதிவு செலவு 4.5 லட்ச ரூபாயாக இருக்கும். அதவாவது, 10 லட்ச ரூபாய் இடத்துக்கு 4.5 லட்ச ரூபாய் பதிவு கட்டணம் என்றால் என்ன செய்வது?

இடத்தை விற்பவர் கணிசமாக விலையை குறைத்து கொடுத்தால் மட்டுமே வாங்குவார்கள். அப்படி நடக்கவில்லை என்றால், கடைசி வரைக்கும் சொத்து கைமாறுவது என்பதே இருக்காது. எனவே, அரசு வழிகாட்டி மதிப்பு இறுதி செய்யப்படுவதற்குள், அனைவரும் அவர்களின் சர்வே எண் அல்லது தெருவுக்கு என மதிப்பு நிர்ணயிக்கப்பட்டிருக்கிறது என்பதை பார்த்து மறுப்பு தெரிவித்து சரிசெய்வதே செய்ய வேண்டிய காரியம்.

எனவே, மறந்தும் இருந்துவிடாதீர்கள். இருந்தும் மறந்துவிடாதீர்கள்..!

- சி.சரவணன்

நன்றி : நியூஸ் விகடன்

பரோட்டா பிரியர்களுக்கு ஓர் எச்சரிக்கை ! 43

தினமும் இரவு பரோட்டா சாப்பிட்டால்தான் சாப்பிட்ட திருப்தி கிடைக்கிறதா?

இன்று தமிழகம் முழுவதும் பரவலாக காணப்படுகிறது பரோட்டா கடை ,அந்த பரோட்டாவும் ஊருக்கு ஊர் வகை வகையாகவும், அளவிலும், சுவையிலும். எத்தனை வேறுபாடுகள் கொத்து பரோட்டா, சில்லி பரோட்டா, என்று பட்டியலிடும்போதே நாக்கில் எச்சில் ஊருமே!.

பரோட்டாவின் கதை என்ன தெரியுமா ?

பரோட்டா என்பது மைதாவிலிருந்து செய்யப்படும் ஒரு திட உணவாகும். இது தமிழகமெங்கும் எளிதில் கிடைக்கிறது. இரண்டாம் உலகப் போரின் போது ஏற்பட்ட கோதுமைப் பற்றாக்குறையால், மைதாமாவினால் செய்யப்பட்ட உணவுகள் தமிழகத்தில் பரவலாகப் பயன்படத் தொடங்கின, அதில் உருவான பரோட்டாவும் பிரபலமடைந்தது.

பரோட்டா பொதுவாக எப்படி செய்வார்கள்?

மைதாமாவில் உப்பு போட்டு, தண்ணிர் கலந்து அதனை கைகளால் பிசைந்து, அதன் பின்னர் எண்ணெயிட்டு, உருட்டி, ஒவ்வொரு உருண்டையையும் தட்டியெடுத்து, வீசி அடித்து, கைக்குட்டைபோல் பறக்க விட்டு, அதனை கழுவிய கைக்குட்டையை நீட்டி சுருட்டி மடிப்பதுபோல் அதை அப்படியே சுருட்டி, திரும்ப வட்ட வடிவில் உருட்டி, தட்டையாக இருக்கும் சூடான / தோசைக் கல்லில் போட்டு அதன் நிறம் சிவப்புக்கும் கறுப்புக்கும் இடையில் வரும் வரை புரட்டி எடுத்துப் போடுவார்கள்.

இப்போது பரோட்டாவின் மூலபொருளான மைதாவில்தான் பிரச்சனை துவங்குகிறது.

பரோட்டா மட்டும் இல்லாது இன்னும் பல வகை உணவு வகைகள் இந்த கொடிய மைதாவில் இருந்து தயாரிக்கப்படுகிறது ,நம் பிறந்த நாளுக்கு கொண்டாட வாங்கும் கேக் உட்பட .

மைதா என்றொரு மாவு எப்படி தயாரிக்கிறார்கள் ?

நன்றாக மாவாக அரைக்க பட்ட கோதுமை மாவு மஞ்சள் நிறத்தில் இருக்கும் அதை பென்ழோய்ல் பெராக்ஸைட் (benzoyl peroxide) என்னும் ரசாயனம் கொண்டு வெண்மை யாக்குகிறார்கள்,அதுவே மைதா .

Benzoyl peroxide நாம் முடியில் அடிக்கும் டை யில் உள்ள ரசாயனம் இந்த ரசாயனம் மாவில் உள்ள protein உடன் சேர்ந்து நிரழிவுக்கு காரணியாய் அமைகிறது .

இது தவிர Alloxan என்னும் ரா ரசாயனம் மாவை மிருதுவாக்க கலக்கப்படுகிறது மேலும் Artificial colors, Mineral oils, Taste Makers, Preservatives , Sugar, Saccarine , Ajinomotto  போன்ற உபபொருட்களும் சேர்க்க படுகிறது ,இது மைதாவை இன்னும் அபாயகரமாக்குகிறது .

இதில் Alloxan சோதனை கூடத்தில் எலிகளுக்கு நிரழிவு நோய் வரவைpபதற்கு பயன்படுகிறது ,ஆக பரோட்டாவில் உள்ள Alloxan மனிதனுக்கும் நிரழிவு வர துணை புரிகிறது .

மேலும் மைதாவில் செய்யும் பரோட்டா சீரணத்துக்கு உகந்தது அல்ல ,மைதாவில் நார் சத்து கிடையாது , நார் சத்து இல்லா உணவு நம் சிரண சக்தியை குறைத்து விடும் .

இதில் சத்துகள் எதுவும் இல்லை குழந்தைகளுக்கு இதனால் அதிக பாதிப்பு உள்ளது , எனவே குழந்தைகளை மைதா வினால் செய்த bakery பண்டங்களை உன்ன தவிர்பது நல்லது.

Europe union,UK,China  இந்த மைதா பொருட்கள் விற்க தடை விதித்துள்ளன .

மைதாவை நாம் உட்கொள்ளும் போது சிறுநீரக கல் ,இருதய கோளாறு ,நீரிழிவு போன்றவை வருவதற்கு பல வாய்ப்புகள் உண்டு .

நமது அண்டை மாநிலமான கேரளத்தில் பரோட்டாவின் தீமைகள் குறித்து இப்போதே பிரச்சாரம் செய்ய தொடங்கி விட்டனர்.மேலும் மைதாவை அதன் தீமைகள் குறித்து ஆராச்சி செய்து ஆய்வறிக்கையும் சமர்ப்பித்துள்ளனர்.

இப்போதே நாமும் விழித்து கொள்வோம் நம் தலைமுறையைக் காப்போம்.

வலைப்பூகளில் வாசித்ததை திரட்டி பயனுல்ல தகவலாக பதிந்திருக்கிறேன்.

- முஹம்மது யாசிர்

இன்று ஃபஜர் தொழுதீர்களா ? 11

அல்லாஹ்வின் திருப்பெயரால்.

அஸ்ஸலாமு அலைக்கும் வரஹ்...

அதிரைநிருபரில் கடந்த ஒரு வாரமாக தினமும் மார்க்க சொற்பொழிவு காணொளிகள் நேரலையாக தொடர்ந்து ஒளிபரப்பப்படுவதை அறிவீர்கள். இதன் தொடர்ச்சியாக ஃபஜர் தொழுகையின் முக்கியத்துவம் பற்றிய சொற்பொழிவை மீண்டும் காணொளியாக ஒளிபரப்ப வேண்டியும், இதன் ஆடியோவையும் தரவிறக்கம் செய்யும் வசதியை ஏற்படுத்துமாறும் ஏராளமான சகோதரர்கள் வேண்டுகோள் வைத்தார்கள். 


இதோ உங்கள் பார்வைக்காக அதன் காணொளியும், தரவிறக்கம் செய்வதற்காக ஒலிப்பேழையும் இங்கே பதிந்திருக்கிறோம். இந்த  சொற்பொழிவை செவியுற்று என்றும் நாம் ஐவேளை தொழுகைகளை ஜமாத்துடன் தொழுதிடும் தூய்மையான முஃமீனாக இருந்திடுவோம். இன்ஷா அல்லாஹ்.

இந்த சொற்பொழிவை தரவிறக்கம் (download) செய்ய இங்கு சொடுக்கவும் - CLICK HERE TO DOWNLOAD THIS BAYAN

இந்த சொற்பொழிவில் :-

•     ஃபஜர் தொழுகையின் முன் சுன்னத் தொழுகையின் சிறப்பு.
•   ஃபஜர் ஜமாத்துடன் தொழுவதால் என்ன சிறப்பு அதன் நன்மைகள்.
•     இஷா ஜமாத்துடன் தொழுவதால் என்ன நன்மை.
•   ஃபஜர் மற்றும் அசர் தொழுகையை தொழுபவர்கள் பற்றி நபி(ஸல்) அவர்கள் கூறியது என்ன?
•   ஃபஜர் மற்றும் அசர் தொழுகை யாருக்கு பாரமாக இருக்கும் என்று நபி(ஸல்) அவர்கள் கூறினார்கள்?
•    நபிகளார் காலத்தில் யார் ஜமாத்துடன் தொழவில்லை.

மற்றும் பயனுல்ல தகவல்கள் இந்த சொற்பொழிவில் உள்ளது. அனைவரும் கேட்டு, அவைகளை நம் வாழ்வின் இறுதி நாள் வரை தொழுகையை கவணமாக பேணி நரக நெருப்பிலிருந்து பாதுகாத்துக்கொள்வோம். இன்ஷா அல்லாஹ்.

தினமும் மார்க்க சொற்பொழிவை அதிரைநிருபர் நேரலை வலைக்காட்சியில் தொடர்ந்து காணுங்கள்.

- அதிரைநிருபர் குழு

கலிஃபா டவர் ! 33

உலகத்திலேயே

உயர்ந்த கட்டிடங்களுக்கெல்லாம்
உச்சமாக

உலோகத்திலேயே
உருக்கி வார்த்த
விருட்சமாக

உருகிக் கூரான
பனிமலையின் முகட்டைப் போல

அதிகாலை வெயிலில்
மேற்பாதி மட்டும்
பிரகாசிக்கும்
பனிச்சிகரம்போல

மழை பொழிவில்லாத
விண்ணுக்கெதிராய்
மண் பிடிக்கும்
வாளைப் போல

பூமிக்கு மேல்
கட்டி முடித்தது போலல்லாமல்
பூமியே
பெற்று எடுத்தது போல

தூரப் பார்வைக்கு
வானத் திரையில்
வரைந்து வைத்ததுபோல
கிட்டப் பார்வையிலோ
கட்டடம் முழுதும்
காட்சிக்குள் அடங்காத
கானகம்போல

வேர்விட்டு வளர்ந்த
நீர்குடிக்கும் மரம்போல
கூராய் நிற்கிறது

சாமான்யக் கட்டிடங்களின்
சராசரி உயரங்களைப்
பறந்து கடக்கும்
குருவி யொன்று
எத்தனை பறந்தும்
மொட்டை மாடியை
எட்ட முடியாததால்
பயணக் களைப்பில்
நின்று விட்டது
நூராவது மாடியில்

பறப்பதற்கு
இறக்கைகள் இல்லா மனிதன்
இறப்பதற்குள்
பறக்க விழைந்தே
படிப்படியாகவோ
மின் தூக்கி வழியாகவோ
மேலே பறக்கிறான்

எத்தனை உயரம்
பறக்க முயன்றாலும்
எந்தெந்த சிகரங்கள்
எட்ட முனைந்தாலும்
வா வென்று
வரவேற்க
வாய்ப்பதென்னவோ
பூமிக்குள் கட்டி வைக்கும்
செவ்வக அறைதான்.

- சபீர்

நீத்தார் பெருமையும் மூத்தோர் அருமையும் 10

சென்ற 14,15 ஜனவரி 2011 தேதிகளில் அதிராம்பட்டினத்தில் ‘கல்வி விழிப்புணர்வு மாநாடு’ ஒன்றை நடத்தினோம்.  அதன் இரண்டாவது நாள் நிகழ்ச்சியாக ‘கல்விக் கருத்தரங்கு’ ஒன்றையும் ஏற்பாடு செய்திருந்தோம்.  அதற்குத் தலைமை வகிக்கக் கல்வியாளராகவும் உள்ளூர்வாசியாகவும் இருக்கும் ஒருவர் அழைக்கப்பட வேண்டும் என்ற எனது கருத்தைச் சகோதரர்களிடம் பதிவு செய்தேன்.

அதற்குப் பொருத்தமான ஒருவரைத் தெரிந்தெடுக்கும் பொறுப்பை அவர்கள் என்னிடமே விட்டார்கள்.  நான் ஒருவரைப் பரிந்துரைத்தேன்.  அந்த அமர்வில் இருந்த எவருக்கும் அறிமுகமில்லாதவர் அவர்!  யாருக்கும் தெரியாதவர்; எனக்கு மட்டும் அறிமுகமானவர் என்பதால், என்னையே பொறுப்புச் சாட்டி, ‘ரிஸ்க்’ எடுக்கச் சொன்னார்கள்.  நான் ஆர்வத்தோடும் பெரு நம்பிக்கையோடும் களத்தில் இறங்கினேன்.

‘சலாம்’ எனும் முகமனோடு தொடங்கிய எனது அழைப்புக்குப் பின்னர், “அதிரை அஹ்மது பேசுகிறேன்” என்றேன்.  நலம் விசாரித்த பின்னர், அடுத்த முனையிலிருந்து அழகிய மறுமொழி, அழகிய தமிழில் நலம் விசாரிப்பு, ஊர் நடப்புகள் பற்றியெல்லாம் கேட்டுவிட்டு, “எப்போது?” என்றார் சென்னையில் வசித்த அந்த ‘அதிரை அறிஞர்’, ‘தமிழ்மாமணி’, புலவர், அல்ஹாஜ் அஹ்மது பஷீர் அவர்கள்.

நான் தேதிகளைச் சொன்னவுடன், “சரி, முதல் நாளே நானும் மகனும் வந்துவிடுகிறோம்” என்ற தேன்மொழியைத் தந்தார்கள்.  எப்படியும் வருவார்கள் என்ற நம்பிக்கை எனக்கு;  ஆனால், மற்ற சகோதரர்களோ, ‘வருவாரா?  பேசுவாரா? என்ன பேசுவார்?’ என்றெல்லாம் புதிரில் ஆழ்ந்திருந்தார்கள்.

வாக்களித்தபடி, முதல் நாளே வந்து சேர்ந்து முகமலர்ச்சியைத் தந்தார்கள்!  மெலிந்த உருவம், முதிர்ந்த வயது, தோளில் ஒரு துண்டு, தலையில் தொப்பி, கையில் ஒரு பை சகிதம் அரங்கினுள் நுழைந்து அகம் குளிரச்  செய்தார்கள் அந்த ‘அதிரை அறிஞர்’.  

முதல் நாள் நிகழ்ச்சி ஒரு பயிலரங்கு.  ‘உனக்குள் உன்னைத் தேடு’ எனும் தலைப்பிலும், ‘அறிமுகமில்லாத அறிய படிப்புகள்’ என்ற தலைப்பிலும் பேராசிரியர் முனைவர் ஆபிதீன் அவர்கள் நிகழ்த்திக் காட்டிய பயிலரங்கை நம் ‘தமிழ்மாமணி’யவர்கள் தம் மகனாருடன் கண்டு மகிழ்ந்தார்கள். 

முதல் நாள் நிகழ்ச்சி மாணவர்களுக்கு மட்டும் என்றிருந்தது.  அடுத்த நாள் தொடங்கிய ‘கல்விச் சிந்தனைக் கருத்தரங்கு’ எல்லாருக்கும் பொதுவானதாக அமைந்ததால், ‘சாரா அரங்கு’ கலை கட்டி நின்றது.  எனது அறிவிப்பழைப்பைத் தொடர்ந்து, ‘அதிரை அறிஞர்’ அவர்கள் கம்பீரமாக வந்து மேடையில் அமர்ந்தார்கள்.  அதுவரை, ‘இவர் என்ன பேசுவாரோ?’ என்று எண்ணிக்கொண்டிருந்த சகோதரர்களுக்கு, ஒரு நம்பிக்கை.  

புலவர் பஷீர் ஹாஜியாரின் செந்தமிழ்ப் பேச்சு சிந்தையைக் கவரும் ஆய்வுரையாக அமைந்ததை உணர்ந்த அவையினர், ‘இப்படியும் ஒருவரா இந்த அதிரையில்!’ என அயர்ந்து போயினர்.  ‘சரியான தலைமை’ என்று சகோதரர்கள் பாராட்டியபோது, நான் பூரிப்படைந்தேன்.  ‘அடுத்தடுத்தும் இவர்களை அழைத்துப் பேச வைக்க வேண்டும்’ என்று அவர்களைக் கூற வைத்தது அந்தத் தலைமையுரை.   

எமது அந்த மாநாட்டின் வெற்றிக்குக் கட்டியம் கூறுவதாக அமைந்தது அவ்வறிஞரின் பேச்சு.  அதைவிட, புலவர் அவர்கள் காட்டிய ஆர்வம் மாநாட்டு அமைப்பாளர்களை அகமகிழச் செய்தது.

மாநாட்டைத் தொடர்ந்து, உள்ளூரில் இயங்கும் தனியார் தொடக்கப் பள்ளியின் ஆண்டு விழாவிலும் சில மாதங்களுக்குப் பின்னர் சென்னையிலிருந்து வந்து கலந்துகொண்டு, சிறார்களை வாழ்த்திப் பேசினார்கள் அந்தக் கல்வியாளர்.  கல்வியாளரும் கவிஞரும் சிறுவர் இலக்கியச் செம்மலுமான அந்த ‘அதிரை அறிஞர்’,  தாய்மார்களே அதிகமாகக் கலந்துகொண்ட அக்கூட்டத்தில் பெண்மணிகளை மூக்கில் விரல் வைக்கச் செய்தார்கள்.  அன்று அவர்களிடத்தில் பரவியிருந்த ஆர்வத்தையும் அறிவாற்றலையும் கண்கூடாகக் கண்டேன் நான்.

அடுத்த கல்வி விழிப்புணர்வு மாநாடு நெருங்குகின்றது.  ஆனால், அவ்வறிஞரை அல்லாஹ் தன் பக்கம் அழைத்துக்கொண்டான்!  சென்ற செப்டம்பர் 26 ஆம் தேதியன்று பிற்பகல் மூன்றரை மணியளவில் அன்னாரின் புதல்வர் பேராசிரியர், அஃப்சலுல் உலமா,  அஹ்மது ஆரிப் M.Com., M.Phil அவர்களிடமிருந்து  வந்த தொலைபேசி அழைப்பு என்னை அதிர வைத்தது!   

தமிழ்மாமணிவர்கள் கல்வி விழிப்புணர்வு மாநாட்டில் ஆற்றிய தலைமையுரைக் காணொளியைக் கண்ட வெளிநாடுவாழ் அதிரைச் சகோதரர்கள் எங்களூர் வலைத்தளங்களில் அவர்களைப் பாராட்டிப் போற்றியதும், நேரில் சந்தித்து வாழ்த்துக் கூறியதும் இன்றும் பசுமையாக நிற்கின்றன.

தமிழ்மாமணி, புலவர் பஷீர் அவர்கள் அதிராம்பட்டினத்தில் பிறந்து வளர்ந்திருந்தாலும், தமது கல்வி முன்னேற்றத்தின் பின்னர், சென்னையில் பள்ளித் தமிழாசிரியராகப் பணியைத் தொடங்கி, அங்கேயே ‘செட்டில்’ ஆனவர்.  அதனால், ஊரிலிருக்கும் பெரும்பாலாருக்கு அவர்களைத் தெரியாது.  எங்கள் முதலாவது கல்வி விழிப்புணர்வு மாநாட்டின் மூலம் பலரும் அறிந்துகொண்ட பண்பாளராகிவிட்டார்கள்.

இஸ்லாமியத் தமிழிலக்கியத்திற்கும் மார்க்கத்திற்கும் அவர்கள் படைத்தளித்த நூல்கள்:

*  சிரி குழந்தாய் சிரி! (கவிதைகள்)  

*  முன்னேறு முன்னேறு மேலே மேலே (கவிதைகள்)

*  மறுவாழ்வு (சிறுவர் நாடகங்கள்)  

*  குழந்தை இலக்கியம் (திறனாய்வு)

*  இஸ்லாமியக் குழந்தை இலக்கியம் (திறனாய்வு)  

*  உமறுப் புலவர் கவித் திறன் 

*  முத்துக் குவியல் (சிறுவர் பாடல்கள்)  

*  கருணை நபி (ஸல்)

*  புது மலர்கள் (ஒன்பது தொகுதிகள் கொண்ட சிறார் பாட நூல்)  

*  பெற்றோரே!

*  படி... படி... படி... (வழிகாட்டி நூல்)  

*  சிரிக்கும் பூக்கள் (சிறுவர் பாடல்கள்)

நூல்கள் கிடைக்குமிடம்:

சிங்கைப் பதிப்பகம் (போன் : 0091 44 23772742)

270, கங்கை தெரு , சேக் அப்துல்லா நகர் 

ஆழ்வார்த் திருநகர், சென்னை 600 087  

- அதிரை அஹ்மது

அதிரையில் ஆம்புலன்ஸ் நிலை - தமுமுக விளக்கம் ! 10

அதிரை வலைப்பூக்களில் பதிவான ஒரு பதிவில் தமுமுக ஆம்புலன்ஸ் சேவை பற்றிய விமர்சனத்திற்கு - விளக்கம்:-

அஸ்ஸலாமு அலைக்கும்,

அதிரை வலைப்பூக்களில் த.மு.மு.க மற்றும் பைத்துல்மால் அவசர ஊர்தி சேவையில் உள்ள குறைகளை பற்றி கூறியதற்கு த.மு.மு.க வின் பதிலாக இங்கே சிலதை குறிப்பிட விரும்புகிறோம் .

த.மு.மு.க.வின் அவசர ஊர்திகென்று தனி கைபேசி எண்ணாக 97 50 50 50 94 இது த.மு.மு.க.வின் பொறுப்பாளர் நசுருதீன் என்பவரிடம் உள்ளது.

சம்பவம் நடந்த நள்ளிரவு 2:10 க்கு பின் 2:15 முதல் 2:25 வரை நசுருதீனின் சொந்த கைபேசி எண்ணான வேற எண்ணுக்கு 19 வது வார்டு கவுன்சிலரின் கணவர் சகோ அகமது ஹாஜா தொடர்பு கொண்டுள்ளார் ஆனால் அந்த 15 நிமிடம் வரை அந்த அழைப்பை நசுருதீன் அவர்கள் எடுக்கவில்லை காரணம் அவர் முதல் நாள் இஷா தொழுகைக்கு போகும்போது அமைதி நிலையில் அவரின் கைபேசியை வைத்தவர் மீண்டும் அதை செயல் நிலைக்கு கொண்டு வர மறந்து விட்டார். 

மேலும் சகோ அஹ்மத் ஹாஜா அவர்களும் அவசர ஊர்தி தொடர்பு எண் தன் கைப்பேசியில் பதிவில் இல்லை எனவே தனக்கு அந்த எண் நினைவில் இல்லை என்கிறார் அந்நிலையில் லெ.மு.செ.அபூபக்கரின் சகோதரர் சிராஜுதீன் அவரின் கைபேசியில் இருந்து 2:29 க்கு அவசர ஊர்தி எண்ணான 97 50 50 50 94 எண்ணுக்கு அழைப்பை விடுக்கிறார். 

இருமுறை அழைப்பு விடுக்கப்பட்டு அது பதில் அளிக்கப்படவில்லை உடனே அவர் த.மு.மு.க.வின் நகர செயலாளர் தையுப் அவர்களை தொடர்பு கொள்கிறார். அவர் சிராஜுதீனிடம் உடனே ஓட்டுனர் வீடு சுரைக்கா கொல்லையில் உள்ளது போய் உடனே எழுப்புங்கள் என்று சொல்லியுள்ளார். 

சிராஜுதீன் அங்கு சென்று ஓட்டுனர் வீடு சரியாக தெரியாத காரணத்தால் மீண்டும் அவசர எண்ணுக்கு தொடர்பு கொண்டபோது நசுருதீன் இப்பொழுது அழைப்பிற்கு பதில் அளித்துள்ளார் அப்பொழுது நேரம் 2:33. ஓட்டுனரின் வீட்டு முகவரியை தெளிவாக சொல்லியுள்ளார் அத்துடன் மூன்று நிமிடம் கழித்து ஓட்டுனருக்கும் பேசியுள்ளார்.

அப்பொழுது ஓட்டுனர் தானும் சிராஜுதீனும் அவசர ஊர்தி நிறுத்தி வைக்கப்பட்டுள்ள ஷிபா மருத்துவமனை நோக்கி செல்வதாக கூறியுள்ளார் அப்பொழுது நேரம் 2:36 இவை எல்லாம் கைபேசியில் பதிவாகிஉள்ள நேரம் பதிவில் குறிப்பிட்டது போல் ஓட்டுனரின் கைப்பேசி அணைத்து வைக்கப்படவில்லை அந்த அவசர எண் ஓட்டுனரிடம் இல்லை. 

அது பொறுப்பாளர் சகோ நசுருதீன் வசம் உள்ளது நாம் அதை ஓட்டுனர்கள் வசம் கொடுத்து வைத்தால் ஒருவேளை அவர்கள் எடுக்க வில்லை என்றால் என்ன நடக்கிறது என்பது நிர்வாகிகளான எங்களின் கவனத்திற்கு வராமலே போகலாம் எனவேதான் பொறுப்பாளர் ஒருவரை நியமித்து தகவல் வந்த உடன் அதை அவர் மறுபுறம் உறுதி செய்து ஓட்டுனருக்கு தகவல் தருவார். 

ஓட்டுனரிடம் அவசர எண்ணான 97 50 50 50 94 இந்த எண்ணிலிருந்து வருவதற்காகவே தனி இலக்கம் வைத்துள்ளார். இந்த இலக்கத்தை வேறு எந்த சுய உபயோகத்திற்கு அவர் பயன் படுத்துவதில்லை. 

அந்த பதிவில் பரிந்துரைப்பது போல் இரவு பகல் என இரு ஓட்டுனர்களை வைத்து கொள்வதற்கு த.மு.மு.க விடம பொருளாதார வசதியும் இல்லை குறைந்த சம்பளத்திற்கு சேவை மனப்பான்மை உள்ள ஓட்டுனர் கிடைப்பதில்லை அதுபோல அவசர ஊர்தி தினமும் ஓடுவதர்க்கான வாடகை வாகனமும் அல்ல நாங்கள் வசூலிக்கும் வாடகையில் இரு ஓட்டுவர்களை பணி அமர்த்துவது சாத்தியமும் இல்லை. 

தற்போதைய எங்களின் ஓட்டுனரை போல் நல்லுள்ளம் கொண்டவரை பார்ப்பது கடினம்.

அரசாங்கம் செய்துவரும் 108 போல் இரவு முழுவதும் விழித்திருந்து சேவை செய்து பலபேர் வைத்து நிர்வாகம் நடத்துமளவுக்கு த.மு.மு.கவிடம் பொருளாதார சக்தி இல்லை அன்று நடந்ததில் ஒரு தவறு நடந்துள்ளது நள்ளிரவு 2:29 க்கு சகோ சிராஜுதீன் தொடர்பு கொள்ளும் பொழுது அந்த பொறுப்பாளரான நசுருதீன் இரண்டு முறை பதில் அளிக்காமல் உறக்கத்தில் இருந்திருக்கிறார் அவரும் மனிதன் தான் (இறைவன் தனது வசனத்தில்) இரவை உங்களுக்கு இளைப்பாருவதருக்கும் உறங்குவதற்கும் படைத்திருக்கிறேன் என்று கூறுகிறான். 

நள்ளிரவு 2:30 மணிக்கெல்லாம் அழைப்பிற்கு சிலர் உடனே எழலாம் சிலர் சிறிது நேரம் கழித்து எழலாம் இது இறைவன் அவர்களுக்கு கொடுத்த சக்தியை பொறுத்து.

பதிவின் சுட்டிக்கட்டலான // இவ்வாக்கம் யாரையும் தூக்கி பிடிப்பதற்கோ அல்லது தரம் தாழ்த்துவதற்கோ எழுதப்பட்டதல்ல. ஊர் நடப்புகளை உங்களுக்கு தெரியப்படுத்தி சில அசொளகரியங்களை கலைவதற்காகத்தான் அன்றி வேறொன்றும் இல்லை.// என்பது.

5 நிமிட காலதாமதத்தை இவ்வளவு பெரிது படுத்தி எங்கள் தரப்பு விளக்கத்தை பெறாமல் அவர் ஊடகத்தின் வாயிலாக அதிவிரைவாக விமர்சித்திருப்பதை படைத்தவனே அறிவான்.

நல்ல விமர்சனம் எங்களை மேலும் நெறிபடுத்தட்டும் உள்நோக்கம் இருந்தால் எல்லாம் வல்ல அல்லாஹ் போதுமானவன்.

இப்படிக்கு,

செயலாளர் த.மு.மு.க ,

பொருளாளர் த.மு.மு.க ,

துணைத் தலைவர் த.மு.மு.க ,

துணை செயலாளர் த.மு.மு.க

அதிரை நகரம் 


குரிப்பு : நெறிப்படுத்தலுடன் பதியப்பட்டிருக்கிறது.
- நெறியாளார்

இஸ்லாம் vs கம்யூனிஸம் - ஒரு பறவை பார்வை 0

இஸ்லாம் மக்களுக்கு நல்லதையே செய்திட வேண்டும் என்று வாதாடுகின்றது. எல்லா காலங்களுக்கும், எல்லா சமுதாயங்களுக்கும் இஸ்லாம் ஒன்றேதான் வழிகட்ட வல்ல மார்க்கம். கடந்த நான்கு நூற்றாண்டுகளாக இஸ்லாமிய பொருளாதாரம் செயலிழந்து ஒருவித மந்த நிலையில் இருந்து வருவதால் இஸ்லாத்தின் பொருளாதாரச் சட்டங்களும் செயலற்றவைகளாக இருந்து விட்டன. 

அப்படியானால் ஏன் நாம் நமது ஆன்மாவை தூய்மைப்படுத்திட இஸ்லாத்தையும், நமது பொருளாதார பிரச்னைகளுக்கு தீர்வு கண்டிட கம்யூனிஸத்தையும் பின்பற்றக் கூடாது? 

அப்படி செய்வதனால் கம்யூனிஸம் நமது சமுதாய அமைப்பையோ அல்லது சமுதாய அமைப்பின் ஏதேனும் ஒரு பகுதியையோ பாதிக்காது. இதனால் நாம் நமது ஒழுக்கப்பண்புகள், நமது சமுதாய நடைமுறைகள், பழக்க வழக்கங்கள் ஆகியவற்றை பாதுகாக்கின்றவர்களாகவும், அதே நேரத்தில் நமது பொருளாதாரப் பிரச்சனைகளுக்கு தீர்வு கண்டிட மிகவும் நவீனமானதொரு கொள்கையும் கொண்டவர்களாக திகழலாம்.

இப்படி ஒரு கருத்தை எடுத்து வைத்து முஸ்லிம்களிடையே சபலத்தை ஏற்படுத்துவது கம்யூனிஸ்டுகளின் நீண்ட கால சூழ்ச்சியின் நவீன கண்டுபிடிப்பாகும்.

முதலில் அவர்கள் கீழை நாடுகளில் வாழ்ந்த முஸ்லிம்களிடையே பல்வேறு சந்தேகங்களை ஏற்படுத்தி இஸ்லாத்தை எதிர்த்திட தலைப்பட்டனர். இதனால் முஸ்லிம்களிடம் இஸ்லாத்தின்பால் இருந்த பிடிப்பு அதிகரித்திடவே செய்தது. இதைக் கண்ட கம்யூனிஸ்ட்கள் தங்களுடைய தாக்குதலை பசப்பு வார்த்தைகளால் திசை திருப்புகிறார்கள்.

“கம்யூனிஸம் என்பது சமுதாயத்தில் நீதியை நிலை நாட்டுதல் என்பதன் மற்றொரு பெயரேயாகும். அரசு தனது குடிமக்களின் அத்தியாவசிய தேவைகளை பூர்த்தி செய்திட கடமைப்பட்டுள்ளது என்பதை கம்யூனிஸம் வலியுறுத்துகின்றது, இஸ்லாம் இவற்றையே அழுத்தம் திருத்தமாக எடுத்துச் சொல்லுகின்றது. ஆகவே கம்யூனிஸம் இஸ்லாத்தின் எதிரியல்ல.

இஸ்லாம் கம்யூஸத்தின் எதிரி என்று சொன்னால், இஸ்லாம் சமுதாயத்தில் நீதியை நிலைநாட்டிட விரும்பவில்லை என்று பொருளாகிவிடும். இப்படி யாராவது சொல்வார்களா? நிச்சயமாக சமூக நீதியை அடிப்படையாகக் கொண்ட எந்தக் கொள்கையையும் இஸ்லாம் எதிர்ப்பதில்லை.

இப்படி பசப்பு மொழி பேசி ஏமாற்ற முயற்சிக்கின்றார்கள் கம்யூனிஸ்ட்கள். இத்தகைய ‘சூழ்ச்சிவாதம்’ இதற்கு முன்னால் ஏகாதிபத்தியவாதிகளால் எடுத்து வைக்கப்பட்டதேயாகும். இந்த ஏகாதிபத்தியவாதிகளும், முதலில் இஸ்லாத்தின் மீது எதிர்ப்புக் கணைகளையே எடுத்து வீசினார். ஆனால் அவை முஸ்லிம்களை சலனப்படுத்தவில்லை.

மாறாக முஸ்லிம்கள் தங்களை இதுபோன்ற பிதற்றல் வாதங்களிலிருந்து பாதுகாத்துக் கொள்ளத் தலைப்பட்டனர். தங்களுடைய எதிர்ப்புவாதம் எடுபடாமல் போகவே அவர்கள் வேறு விதமாக சூழ்ச்சியைத் திருப்பினர். அப்போது அவர்கள் மேற்கொண்ட தந்திரவாதம் இதுதான்: “மேலை நாடுகள் கீழை நாடுகளில் சிறந்ததொரு கலாச்சாரத்தை பரப்பிடவே முனைகின்றன. இஸ்லாம் எவ்வாறு கலாச்சராத்தை – நல்ல பண்பாட்டை எதிர்க்கும்? அதுதான் பண்பாட்டின் பாசறையாயிற்றே” இதோடு அவர்கள் விடவில்லை.

“நீங்கள் இந்த மேலைநாட்டு நாகரிகத்தை கடைப்பிடியுங்கள். அதே நேரத்தில் நீங்கள் உங்கள் மதம் விரும்புவது போல் நோன்பிருங்கள், தொழுகையும் நிறைவேற்றுங்கள்” என்றும் சொன்னார்கள்.

ஒரு முறை இந்த முஸ்லிம்கள் மேலைநாட்டு நாகரிகத்தினுள் வந்துவிட்டார்களேயானால், அவர்கள் தங்களது மதத்தை மறக்க ஆரம்பித்துவிடுவார்கள். காலப்போக்கில் முஸ்லிம்கள் மேலைநாட்டு நாகரிகத்தில் மூழ்கி இஸ்லாத்தை மறந்துவிடுவார்கள் என்பதே அவர்களின் திட்டம். இதையே அவர்கள் நிறுபித்துக் காட்டினர்.

இதன் விளைவாக காலப்போக்கில் இஸ்லாம் என்றால் என்ன எனபதையே தெரியாத ஒரு தலைமுறை தோன்றியது. இவர்கள் இஸ்லாத்தைப் பற்றி அறியுமுன்னே, எந்தக் காரணமும் இல்லாமல் இஸ்லாத்தை வெறுக்க ஆரம்பித்தனர்.

ஏகாதிபத்தியவாதிகளின் இதே சூழ்ச்சி முறையைத்தான் கம்யூனிஸ்ட்கள் இன்று பின்பற்றிட முயற்சிக்கின்றனர். அவர்கள் சொல்லுகிறார்கள், முஸ்லிம்கள் முஸ்லிம்களாகவே இருக்கட்டும்; தொழுகைகையை நிறைவேற்றட்டும்; நோன்பிருக்கட்டும்; இன்னும் இது போன்ற கடமைகளை தடையின்றி நிறைவேற்றட்டும். கம்யூனிஸத்தை அவர்களின் பொருளாதாரக் கொள்கையாக மட்டும் ஏற்றுக் கொள்ளட்டும். ஏனெனில் கம்யூனிஸம் எந்த விதத்திலும் இஸ்லாத்திற்கு எதிரானது அல்ல. அப்படி இருக்க முஸ்லிம்கள் கம்யூனிஸத்தை ஏற்றுக்கொள்வதில் என்ன தயக்கம்?

முஸ்லிம்கள் ஒரு முறை கம்யூனிஸத்தை ஏற்றுக்கொள்வார்களேயானால், காலப்போக்கில் அவர்கள் கம்யூனிஸத்தால் ஆட்கொள்ளப்பட்டு விடுவர். அதன் மூலம் இஸ்லாத்தையும் இஸ்லாம் இந்த உலகில் சாதிக்க விரும்பும் இலட்சியத்தையும் மூட்டை கட்டிவைத்துவிடுவார்கள். ஏனெனில் நாம் வாழும் உலகம் விரைவான மாற்றங்களுக்கு ஆளாகிக் கொண்டிருக்கிறது. அதில் பெரிய மாற்றங்களுக்கு ஆளாகிக் கொண்டிருக்கிறது. அதில் பெரிய மாற்றங்களைக் கூடச் செய்வதற்கு சிறிதளவு காலமே போதுமானது.

இதைத் தெரிந்திருந்தும், சில முஸ்லிம்கள் தங்களை கம்யூனிஸத்திற்கு அடிமைப்படுத்திக் கொண்டார்கள். ஏனெனில் கம்யூனிஸத்தை ஏற்றுக் கொள்வதன் மூலம் அவர்கள் முஸ்லிம்கள் என்ற வகையில் நிறைவேற்ற வேண்டிய கடமைகளை தவிர்த்துக் கொள்ளலாம். தாங்கள் சிந்தனையில் ஈடுபடதேவை இல்லை. சில இலட்சியங்களை நோக்கி நடப்பதில் ஏற்படும் கஷ்டங்களுக்கு ஆளாவதிலிருந்து தவிர்ந்துக் கொள்ளலாம்.

இன்னும் இதுபோன்ற மனோ நிலையைக் கொண்ட முஸ்லிம்கள் ஒரு இடத்தில் உட்கார்ந்து கொண்டு கற்பனை உலகில் சஞ்சரிப்பதை நாடுகின்றனர். தாங்களே சிந்தித்து தங்களது வழியைத் தேர்ந்தெடுப்பதற்கு பதிலாக தங்களை அடுத்தவர்கள் வழி நடத்தட்டும் என்று வாளாக இருந்து விடுகின்றனர்.

இங்கே நாம் ஒன்றைக் கவனிக்கவேண்டும். அதாவது, இஸ்லாம், தனது கொள்கைகளுக்கு எதிராக இல்லாத கொள்கைகளை எதிர்ப்பதில்லை. உண்மை என்னவெனில் கம்யூனிஸம் இஸ்லாத்தின் கொள்கையை ஒத்ததல்ல. ஓரிரு விஷயங்களில் அது இஸ்லாத்தைப் போன்று காட்சியளித்தாலும், உண்மையில் அது இஸ்லாத்தைப் போன்ற ஒன்றல்ல.

தங்களிடம் ஏற்கனவே வலுவானதொரு கொள்கையை கொண்டிருக்கும் முஸ்லிம்கள், கம்யூனிஸத்தையோ அல்லது முதலாளித்துவத்தையோ அல்லது சோஷயலிசத்தையோ ஏற்றுக்கொள்ள தேவை இல்லை. இவைகள் ஓரிரு விஷயங்களில் இஸ்லாத்தைப்போல் காட்சியளிப்பினும் சரியே!

இறைவன் திருமறையில் கூறுகின்றான்:

“அல்லாஹ் இறக்கி வைத்ததைக் கொண்டு யார் தீர்ப்பளிக்கவில்லையோ, அவர்கள்தான் பாவிகளாவார்கள் (அல்குர்ஆன் 5:47)

நாம் உண்மையிலேயே கம்யூனிஸத்தை ஏற்றுக் கொள்ளலாமா? அப்படி அதை ஏற்றுக்கொண்ட பின்னரும் முஸ்லிம்களாக வாழலாமா? வாழ முடியுமா?

- ஹைதர் அலி

நன்றி: உம்மத் வலைதளம்

நமக்கென்று ஏன் வேண்டும் ஊடகம்? 8

இஸ்லாமியர்களுக்கென்று ஒரு ஊடகம் வேண்டும் என்ற கோஷம் பல்லாண்டுகளாக ஒலித்து வருகின்றது. அப்படி ஒலித்துக் கொண்டிருந்தாலும், இஸ்லாமியர்களுக்கென்றே பல்வேறு மாத இதழ்கள், வார இதழ்கள் வந்துகொண்டுதானிருக்கின்றன..

அவைகள் பெரும்பாலும் இயக்கங்கள் சார்ந்தவைகளாகவும், தத்தமது இயக்கங்களைப் பற்றிய செய்திகளையும், அவர்களது சேவைகளையும் மட்டும் முன்னிறுத்தி செய்திகளை வெளியிடுவதோடு பிற இயக்கங்களை சாடியும் செய்திகள் வெளியிடும் ஒரு குறுகிய போக்கையே சார்ந்திருக்கின்றன.

இயக்கம் சார்ந்திராத இஸ்லாமிய பத்திரிக்கைகள் - தமிழ்நாடு - மற்றும் இந்திய செய்திகளுக்கு முக்கியத்துவம் அளிப்பதை விடுத்தும், போஸ்னியா, பாலஸ்தீன், இரான், இராக் என்று சாதாரண மக்களுக்கு - புரியாத செய்திகளை விரிவாக தந்து - அவர்களை படிக்க ஆர்வமில்லாமல் செய்துவிடுகின்றன.

அந்த பத்திரிக்கைகள் கூட, இஸ்லாமிய மக்கள் பெரும்பான்மையாக வசிக்கும், மண்ணடி, திருவல்லிக்கேணி போன்ற பகுதிகளில் மட்டுமே விற்கப்படுவதாகவே தோன்றுகிறது.

இன்னும் சொல்வதென்றால், இஸ்லாமிய பத்திரிக்கைகள் ஒரு குறுகிய வட்டத்திற்குள்ளேயே இருப்பதனால் பெரும்பான்மையான மக்களை சென்றடைவதில்லை.

ஒன்றுக்கும் உதவாத, சினிமா செய்திகளை மட்டுமே தாங்கிவரும் ஆனந்த விகடன், குமுதம், மற்றும் அவை சார்ந்த - பரபரப்பு அரசியல் ஆபாச கட்டுரைகளை வெளியிடும் நக்கீரன், குமுதம் ரிப்போர்டர், ஜூனியர் விகடன் போன்றவைகள் மக்களை சுலபமாக சென்றடையும்போது, இஸ்லாமிய பத்திரிக்கைகள் அவ்வாறு மக்களின் ஆதரவை பெறாமல் இருப்பது ஏன்?

பெரும்பான்மையோர் சொல்லும் பதில், மக்கள் சினிமா செய்திகளைத்தான் விரும்புகிறார்கள். நம்மால் அத்தகைய செய்திகளை வழங்க முடியாது என்பதுதான்.இந்த வாதம் ஓரளவு ஏற்றுக்கொள்ளக்கூடியதுதான் என்றாலும், ஏறக்குறைய 40 ஆண்டுகளாக துக்ளக் என்ற வார இதழ் ஒரு நடிகரால் சினிமா இன்றி நடத்த முடிகிறபோது, நம்மால்  ஏன் ஜனரஞ்சகமான பத்திரிக்கைகளை தரமுடிவதில்லை..? 

குற்றவாளிகள் என்று உறுதி செய்யப்பட்ட ஆட்டோ சங்கர், சந்தனக்கடத்தல் வீரப்பன், ராஜிவ்காந்தியை கொன்ற விடுதலைப்புலிகள், அவர்களை ஆதரிக்கும் தேச துரோகிகளுக்கு ஆதரவாகத்தானே மேற்கண்ட ஆபாச பத்திரிக்கைகள் வெளிவந்து கொண்டிருக்கின்றன? இன்றுவரை குற்றபத்திரிக்கைகூட வழங்கப்படாமல் - ஜாமீனில் வெளிவரமுடியாமல் - கோயமுத்தூர் சிறைச்சாலைகளில் தவிக்கும் அப்பாவிகளுக்கு இந்த ஆபாச பத்திரிக்கைகள் ஏதாவது செய்ததுண்டா? 

மனிதர்களுக்கு தீங்கு விளைவிக்கும் செயல்களுக்கு பெரிதாக விளம்பரம் அளித்து செய்தி வழங்கும் பத்திரிக்கைகள் மட்டுமே இன்று ஜனரஞ்சக பத்திரிகைகள் என்ற அபாயகரமான போக்குக்கு யார் காரணம்?

கொலை, கற்பழிப்பு, வழிப்பறி, கள்ளக்காதல், காதலனோடு ஓடுவது, சாராயக்கடைகளில் குடித்துவிட்டு தகராறு செய்வது, நடிகர் நடிகைகளின் காதல், கல்யாணம் விவாகரத்து, கிசுகிசு போன்ற அருவருப்பான செய்திகள்தான் இன்றைய பத்திரிக்கைகளை ஆக்கிமித்துக் கொண்டிருக்கின்றன. சிறுவயதில் குமுதம் ஆனந்த விகடன் போன்ற பத்திரிக்கைகளை சற்று கர்வத்தோடு கைகளில் கொண்டு செல்வோம்.. ஆனால் இன்று அந்த பத்திரிக்கைகளை ஒரு குடும்பத்தினர் ஒன்றாக உட்கார்ந்து படிக்க முடியுமா? 

இன்று ப்ளாக் ஸ்பாட் என்றழைக்கப்படும் வலைத்தளங்கள் அதிகமதிகம் பயன்பாட்டில் உள்ளது. நமதூர் அதிராம்பட்டினத்தில் மட்டும் ஐம்பதுக்கும் மேற்ப்பட்ட வலைப்பூக்கள் பயன்பாட்டில் இருந்தாலும் அதில் சினிமா சிறிதும் கலக்காமல் உள்நாட்டிலும் வெளிநாட்டிலும் ஏராளமானோர் தினசரி பார்த்து படித்து, விமர்சித்து கருத்துக்களை பகிர்ந்து கொள்ளவில்லையா? 

கடந்த சட்டமன்ற, மற்றும் உள்ளாட்சி தேர்தல்களில், நமதூர் மக்களுக்கு செய்திகளை வழங்குவதில் அதிராம்பட்டினம் வலைத்தளங்கள் ஆற்றிய பணி வியக்கவைத்தது. அயல் நாட்டில் வசிக்கும் பெருமாபலான அதிராம்பட்டினம் சார்ந்த மக்களுக்கு அன்றாடம் வலைத்தளங்களை பார்ப்பது தினசரி டீ காபி அருந்துவது போன்றது என்று - சமீபத்தில் அதிரை எக்ஸ்பிரஸ் வலைத்தளம் நிறுத்தப்பட்டபோது நண்பர் ஒருவர் தொலைபேசியில் தெரிவித்திருந்தார்.

எந்த ஒரு வியாபார நோக்கமும் இன்றி, நமதூர் வலைத்தளங்கள் மக்களுக்கு தேவையான செய்திகளை ஆர்வமுடன் வழங்கி வரும்போது, நம்மால் ஏன் அதுபோன்ற தரமான பத்திரிக்கைகளை தரமுடியாது?

இன்று பயங்கரவாதிகள் அத்வானியின் ரத யாத்திரை நாடகம், மோடியின் உண்ணாவிரத நாடகம், சன்பரிவாரின் ஆசி பெற்ற அண்ணா ஹசாரே என்பவரின் போலி உண்ணாவிரதம் போன்றவைகள் கார்பொரேட் பத்திரிக்கைகளால் பெரிதும் விளம்பரப்படுத்தப்படுகிறது.

இந்தியாவுக்குள் அடைக்கலம் பெற்று நமது நாட்டில் பயங்கரவாத செயல்கள் புரிந்து, ராஜீவ் காந்தியை கொன்ற பயங்கரவாதிகளுக்கு ஆதரவு கொடுக்கும் நான்கு பேருக்கு கொடுக்கப்படும் விளம்பரம், வருஷக்கணக்கில் குற்றபத்திரிக்கை கூட வழங்கப்படாமல் கோவை சிறையில் அவதியுறும் அப்பாவிகளின் நியாங்களை எடுத்துக்கூற ஒரு ஊடகம் கூட முன்வராத அவலநிலை இருக்கிறதே..

அந்நிய நாட்டில் பயங்கரவாதிகள் மீது தாக்குதல் நடத்தியதால், ராஜபக்ஷேவை தூக்கிலிட கூக்குரலிடும் தேச துரோகிகள், இந்தியாவிலேய முஸ்லிம்களை கொன்று குவித்த நரேந்திர மோடி என்பவனை பற்றி ஏதும் சொல்வதில்லையே? 

ஒன்றுமில்லாத நிகழ்வுக்கேல்லாம் சாலை மறியல் பஸ் மறியல் என்று கூச்சலிடும் கூட்டத்தை படமெடுத்து செய்தியாக போடும் பத்திரிக்கைகளும் தொலைக்காட்சிகளும், நமது உரிமைப் போராட்டங்களை இருட்டடிப்பு செய்வதேன்? 

பாபர் மஸ்ஜித் வழக்கில் - குரங்கு ஆப்பத்தை பங்குபோட்ட கதைபோல தீர்ப்பு வழங்கிய "திரீ இடியட்ஸ்" களின் செய்திக்கு முக்கியத்துவம் அளித்த பத்திரிக்கைகள், அதைப்பற்றி வாரக்கணக்கில் விவாதம் செய்த பத்திரிக்கைகள், அந்த தீர்ப்பை தடை செய்து - "த்ரீ இடியட்ஸ்" களை சாடிய சுப்ரீம் கோர்ட்டின் தீர்ப்பை எவ்வளவு முக்கியத்துவம் கொடுத்தார்கள் என்று தெரியுமா?

வெடிகுண்டுகள் எங்கு வெடித்தாலும் - ஏதாவது ஒரு இஸ்லாமிய இயக்கம்தான் வைத்தது, ஈமெயில் வந்தது என்று அலறும் ஊடகங்கள், அந்த குண்டு வெடிப்புகளுக்கு சங்பரிவார் அமைப்புகள்தான் காரணம் என்று நிரூபணம் ஆகும்போது மட்டும் மௌனம் சாதிக்கும் நயவஞ்சகம் ஏன்? 

ஒரு ஆபாச சினிமா நடிகைக்கு ஒரு அவசரம் என்றால் எப்பேர்ப்பட்ட பதவியில் உள்ளவரையும் சந்தித்துவிடும் சூழல் இருக்கும் போது நியாயமான கோரிக்கைகளுக்காக கூட சாதாரண அதிகாரிகளைக்கூட நெருங்கமுடியாத நிலை நமக்கு எர்ப்பட்டிருப்பதர்க்கு காரணம் நம்மிடம் ஒற்றுமை இன்மையும் ஊடக பலம் இன்மையும்தான் என்பதுதான் நிதர்சனமான உண்மை. 

இந்த நிலை மாற நாம் என்னதான் செய்யவேண்டும்? சிறுதுளி பெருவெள்ளம் என்பதுபோல நமது சிறிய பங்களிப்பை இன்றே தொடர்ந்தால் இன்ஷா அல்லாஹ் - அல்லாஹ் நமக்கு வெற்றியை தருவான்.

நமதூர் சகோதரர்கள் தமது அறிய ஆக்கங்களை அதிரை எக்ஸ்பிரஸ் மற்றும் அதிரைநிருபர் வலைத்தளங்களில் ஆர்வமுடன் பங்களிப்பு செய்தால் அதை நமது வெள்ளிநிலா சிறந்த கட்டுரை செய்திகளை என்றும் வெளியிட ஆர்வமாக இருக்கிறது.. அதிராம்பட்டினத்தில் இன்னும் அறியப்படாத ஏராளமான எழுத்தாளர்கள் அறிஞர்கள் இருக்கிறார்கள். இன்னும் அவர்களது  முழுத் திறமைகள் வெளிவராமல் அல்லது வெளிக்கொண்டு வரப்படாமல் இருக்கின்றன .. அவர்களுக்கான ஒரு அறிமுகமாக வெள்ளிநிலா செயல்படும்..ஏற்கனவே வலைப்பதிவர்களுக்கான பத்திரிக்கையாகத்தான் வெள்ளிநிலா இலவச வெளியீடாக வந்து கொண்டிருக்கிறது..  அது நமதூர் சகோதர சகோதரிகளுக்கு பயன்பட்டால் இன்னும் மகிழ்ச்சி..

அனைவரது ஆதரவையும் அன்போடு வேண்டுகிறேன்..

- A. Nizar Ahamed

அதிரையில் ஆம்புலன்ஸ் நிலை !? 8

இன்று அதிகாலை (நடுநிசி)சுமார் 2:00 மணியளவில் எங்கள் உறவினர் வீட்டு பெண்மணிக்கு உடல் நலக்குறைவு ஏற்பட்டு இக்கட்டான நிலைமைக்கு போனதால் அந்நேரம் மருத்துவரிடம் அழைத்து செல்வதற்காக நமதூர் பைத்துல்மால் மற்றும் த.மு.மு.க வினரால் நமதூருக்காக அற்பணிக்கப்பட்டுள்ள ஆம்புலன்ஸிற்கு தொலைபேசியில் அழைத்தோம். ஆனால் ஓட்டுனர்களின் கைபேசி யாவும் அணைக்கப்பட்டிருந்தது. அதனால் வீட்டிலுள்ள சிலர் இருசக்கர வாகனத்தில் ஓட்டுனர்களின் வீடுகளைத்தேடி அலைமோதினர். 

நேரம் தாமதமாகி வருவதாலும் அந்த இக்கட்டான சூழ்நிலையை அறிந்த நமதூர் பேரூராட்சி மன்றத் தலைவர் அஸ்லம் அவர்கள் உடனே 21ம் வார்டு மெம்பர் இபுறாஹிமை தொடர்பு கொண்டு அதிரை பைத்துல்மால் ஆம்புலன்ஸ் சாவியை வாங்கி ஓட்டுனர் இல்லாத காரணத்தால் அவர்களே அந்த வாகனத்தை ஓட்டிச்சென்று ஹாஜா முஹைதீன் டாக்டரிடம் அழைத்துச்சென்று அவர்களின் பரிசோதனைக்குப்பிறகு அந்த உடல்நலம் குன்றிய பெண்மணி தஞ்சைக்கு அனுப்பி வைக்கப்பட்டார்.

நமது முக்கிய வேண்டுகோள் இங்கு என்னவெனில், ஆம்புலன்ஸ் தன் கட்டுப்பாட்டில் வைத்திருக்கக்கூடிய நமது அதிரை பைத்துல்மாலும், த.மு.மு.கவும் எந்நேரத்திலும் அவசர உதவியை மக்கள் பெற்றுக்கொள்ள ஆம்புலன்ஸ் ஓட்டுனர்களை காலை, இரவு ஊதியம் என பிரித்து வைத்துக்கொள்வதனாலும், ஓட்டுனர்கள் இருக்கும்(உறங்கும் இடம்) இடத்திலேயே அந்த வாகனங்கள் தயார் நிலையில் நிறுத்தப்பட ஏற்பாடு செய்வதனாலும் அவசர உதவி நாடி வரும் மக்களுக்கு அந்நேரத்தில் பெரும் இன்னல்களும், ஆம்புலன்ஸை தயார் படுத்த காலதாமதமாவதால் ஏற்படும் உயிர் இழப்புக்களையும் தவிர்த்து விடலாம் இறைவன் நாட்டத்தில்.

இவ்வாக்கம் யாரையும் தூக்கி பிடிப்பதற்கோ அல்லது தரம் தாழ்த்துவதற்கோ எழுதப்பட்டதல்ல. ஊர் நடப்புகளை உங்களுக்கு தெரியப்படுத்தி சில அசொளகரியங்களை கலைவதற்காகத்தான் அன்றி வேறொன்றும் இல்லை.

ஆம்புலன்ஸ்களை கட்டுப்பாட்டில் வைத்திருக்கும் சமூக அக்கறைகொண்டவர்கள் மேற்கண்ட வேண்டுகோளின் பேரில் துரித நடவடிக்கை எடுக்க முயற்சிப்பார்களா?

- லெ.மு.செ. அபுபக்கர்

தகவல் : மு.செ.மு.நெய்னா முஹம்மது


தற்போது கிடைத்த தகவல் : அதிரை த.மு.மு.க. நிர்வாகிகளை அதிரை BBC தொடர்பு கொண்டு விளக்கம் கேட்டபோது, டாக்டர் ஹாஜா முகைதீன் மருத்துவமனையிலிருந்து தஞ்சைக்கு அழைத்துச் சென்றது த.மு.மு.க. ஆம்புலன்ஸ்தான் என்றும் அதற்கான ஆதாரத்தையும் காட்டிள்ளனர்.

தினமும் ஒரு மார்க்க சொற்பொழிவில் இன்று ! 0

அஸ்ஸலாமு அலைக்கும் வரஹ்...

தினமும் ஒரு மார்க்க சொற்பொழிவு நிகழ்சியினை இலவச வலைக் காட்சியில் நேரலையாக இந்திய நேரம் இரவு 10:30மணி முதல் 11:30மணி வரை தொடர்ந்து ஒளிபரப்பி வருகிறோம் என்பதனை அறிவீர்கள்.

இன்று !

இலங்கையச் சேர்ந்த முபாரக் மஸ்வுத் மதனி அவர்கள் " நபிகளாரை அழவைத்த குர்ஆன் வசனங்கள்" என்ற தலைப்பில் நிகழ்த்திய உரையினை நேரலையாக காணலாம் இன்ஷா அல்லாஹ்..

ஏற்கனவே அறிவித்திருந்தபடி இந்த நேரலை நிகழ்ச்சிகள் அனைத்தும் ஓர் முன்னோட்டமே இதன் தொடர் நிகழ்ச்சிகளின் அடிப்படையில் பின்னுட்டங்களாகவும் தனி மின்னஞ்சல் வழியாகவும் கருத்துக்களை வழங்கிய சகோதரர்களின் மேலான கருத்துக்களையும் கவணத்தில் கொண்டு அதற்கான நேரங்கள் வகுக்கப்பட்டு முறையாக மேலும் நல்ல முறையில் செய்திட முயற்சி செய்வோம் இன்ஷா அல்லாஹ்.

தொடர்ந்து இணைந்திருங்கள்...

நேசமுடன்,

- அதிரைநிருபர் குழு

யார் செய்கிற கொடுமை ? 15

அன்பிற்குரிய சகோதர சகோதரிகளே!

தலைப்பைப் படித்ததும் மனசுக்கு படபடண்டு அடிக்குதா? வெடவெடண்டு உதறுதா ?

வேற ஒன்னுமில்லைங்க அது ஊருக்குள்ள "மின்சாரவலிப்பு"ன்னு ஒரு வியாதி பரவி கெடக்குதுன்னு வைத்தியர் சொன்னதாக எங்கேயாவது காணொளி பார்த்தீருப்பீங்க.

முதலில் மனசை கொஞ்சம் ரிலாக்ஸ் பண்ணுங்க. ஃபிரிட்ஜிலிருந்து சூடா ஸாரி ஆறிப்போன ஒரு டம்ளர் தண்ணீர் குடித்து விட்டு ஆசுவாசம் செய்து கொள்ளுங்க. விசயத்திற்கு வருகிறேன் கவனமா கண் வைத்து காது கொடுத்து கேளுங்க ஆனா இதெல்லாம் கரண்ட் நியூஸ்ங்க.

நம்ம ஆளுங்ககிட்ட வெறுமனே “என்ன ஆச்சு"ண்டு? கேட்டா…

உடனே "அம்மா ஆட்சி"ண்டு சொல்லுறாங்க !

அடுத்து வெவரமா “கரண்டு என்னாச்சு"ண்டு கேட்டா…

“அதுவா போச்சு"ண்டு நக்கலா சொல்லுறாங்க !

அதுவா எங்கே போச்சுன்னு யாருக்கும் சொல்லத் தெரியலை மின்சாரம் இருந்தாதான் ஷாக் அடிக்கும் என்பதெல்லாம் அந்தக்காலம் ஆனா நம்ம ஊருல மின்சாரமின்றியும் நிறைய விசயங்களிலும் ஷாக்காக இருக்குது போங்க…

காலையில் குளிப்பதற்கு மின்சார மோட்டார் பொத்தனை அழுத்தினால், வீர்ர்ர்ர்ர் கொண்டு எழுந்து ஆரவாரத்துடன் ஓட ஆரம்பிக்கும் மோட்டாரை. சில நிமிடங்களில் சீத்த ‘வெடி’ போல் வீரியத்தை இழக்க செய்கிறது இந்த மின்சா(ஜு)ரம்.

மீண்டும் மீண்டும் மின்சா(ஜு)ரம் வர (குணமடைவது எப்போதோ?) அந்த திட்டுமுட்டுகிடையில…

சமையல் அறையில் இருந்து ராத்தா, தங்கைமார்களின் சப்தமான குரல் ஓங்குகிறது 'கல்ச்சல்ல போவான் கரண்ட அமத்திட்டானுவோ' என்ற சப்தம் காதுலே வேகமாக ஊடுருவுது. இந்த ஊடுருவல் மட்டும் மின்சாரத் துறையின் காதுகளுக்கு போவதில்லை!

மீண்டும் மின்சா(ஜு)ரம் வர  (குணமடைய)

சரி சட்டையை அயர்ன் பன்னுவோம்ண்டு இஸ்திரி பெட்டிக்கு மின் இணைப்பு கொடுத்து டெம்ப்ரச்சர் ஏத்தி வச்சு அயர்ன் செய்யலாம்ண்டு இஸ்திரி பெட்டியை கையில் எடுத்தால். பெட்டியில் டெம்ப்ரச்சர் குறைய நம்ம மூளைக்குள் சூடு அதிகமாகிறது (டென்ஷன் டென்ஷன் ஒரே டென்ஷன்).

மீண்டும் மின்சா(ஜு)ரம் வர (குணமடைய)

'சரி'ண்டு சொல்லி கடைக்கு போய் கம்பூட்டருக்கு முன்னாடி அமர்ந்து (அ.நி) அமைதின் ஆளுமைக்கு வந்து அமைதி காப்போம்ண்டு வந்தால். சிறிது நேரத்தில் UPSஐ யாரோ கிள்ளிவுட்டுகிட்டு இருப்பது போல் விடாமல் தொடர்ந்து வீல் வீல்ண்டு கத்த விடுகிறது மின்சா(ஜு)ரம்.

இத்துடன் முடிந்ததுண்டு வெறுப்புடன் மனதை ஆறுதல் படுத்திக் கொள்கிறீர்களா?

மீண்டும் மின்சா(ஜு)ரம் வர (குணமடைய)

பாவம் பிஞ்சு குழந்தைகள் யாருக்கு என்ன துரோகம் செய்தது? ஆனா இந்த மின்சாரம் ராத்திரியிலே நமக்கு போட்டியா தூங்கச் செல்கிறது நம்மள காவ காக்கா வச்சுட்டு. அதுல பாருங்க டெண்டர் போட்டு காண்ட்ராக் எடுத்த மாதிரி இந்த ஈவு இறக்கம் இல்லாத கொசு நர்சுகளோ குழந்தைகள் கதற கதற ஊசிகள் போடுதுங்க!.

சிறுசுகள் கதறுவதால் பெருசுகளின் தூக்கமும் பறந்து விடுகிறது குழைந்தங்களை கடித்த கொசுக்களோடு!

இது யார் செய்கிற கொடுமைங்க ?

ஐயா செய்கிறாரா ? அல்லது அம்மா செய்கிறாங்களா ?

கேட்டாக்கா இது அதிரைக்கு மட்டுமல்ல அனைத்து தமிழகத்திலேயும் இருக்கும் மின்சார (மருந்து) தட்டுப்பாடு என்று சாக்கு சொல்லி அங்கும் ஷாக்கு அடிக்கின்றது (சொன்னாலும் ஆனாலும்!)

அதிரை பேரூராட்சிக்கு ஜெயித்த தலைவருக்கு போட்டியாக நின்று தோற்றதும் பின்னர் துணைக்கு நின்று ஜெயித்ததும் பதவிக்கு வந்ததும். ஆளுங்கட்சியான எங்களால்தான் எதையும் செய்ய முடியும்ண்டு, பரபரப்பாக பேட்டியோடு செயல் படுவதையும் காட்டிடும் மாநில ஆளுங்கட்சி சகோதரர்கள் அதிரையில் மலேரியாபோல் பரவிக்கிடக்கும் இந்த மின்சாரத்த ஊருக்குள்ளேயே கட்டிப் போடுங்களேன் அடிக்கடி வந்துட்டு வந்துட்டு ஓடி ஒளிஞ்சுபோயிடுது.. இப்படி வருவதும் வராததுமாக இருக்கும் மின்சார ஜுரத்தை ஆளுங்கட்சி மருத்துவர்களைக் கொண்டு முழுவதும் சரிசெய்ய முடியாவிட்டாலும் பாதிக்கு மேலயாவது முடியுமான்னு யோசிச்சு 'ஷாக்  அடிக்கிற மாதிரி ஒரு "action please !"

- லெ.மு.செ.அபுபக்கர்

'தீ'யது வேண்டாம் 'தீயணைப்பு வேண்டும் ! 24

சமீபத்தில் நடந்த திடீர் தீ விபத்து எல்லோரின் கவனத்திற்கும் வெகு விரைவாக எட்டியது. அதற்கு அதிரை வலைப்பூக்களின் மின்னல் வேக செயல்பாடுகளே முக்கிய காரணம். இது ஒரு பக்கம் இருக்க, ஏன் இதற்கு முன்னர் அதிரையில் தீ விபத்துக்களே நடந்ததில்லையா ? அந்த சூழல்களின் நாம் என்ன செய்திருந்தோம் அல்லது செய்யாமல் விட்டோம் என்று ஒரு பக்கம் வாதம் தொடர்ந்தாலும்.

சரி, இன்றையச் சூழலில் இனிமேலும் இதேபோல் ஏதும் அசம்பாவிதங்கள் நடக்காமல் இருந்திட என்னதான் வழி ?

பெரும்பாலோரின் ஏகோபித்த கருத்தாக அதிரைக்கு என்று தனியாக தீயணைப்பு நிலையம் அவசியம் தேவை. இந்தக் கோரிக்கை கடந்த சட்டமன்ற தேர்தலிலேயே வலுப்பெற்றது. அதற்கான உறுதிமொழியையும் பட்டுக்கோட்டை சட்டமன்ற உறுப்பினர் அளித்திருந்தார்.

நேற்றைய ஒரு காணொளிப் பேட்டியில் அதிரை பேரூராட்சி மன்றத் தலைவரும் அதற்கான அனைத்து முயற்சிகள் எடுக்கப்படும் என்ற நம்பிக்கையை ஏற்படுத்தியிருக்கிறார் நாமும் அப்படியே ஆகட்டும் என்று காத்திருப்போமாக.

‘கத்தினால் குத்துவேன்’ ‘குத்தினால் கத்துவேன்’ என்ற போக்கினை தவிர்த்து, ‘கத்தாதே குத்த மாட்டேன்’ ‘குத்தாதே கத்த மாட்டேன்’ என்று மாற்றி சிந்திப்போமே.

“தீ” நாம் கண்டால் சுடாது தொட்டால்தானே சுடும் அப்படியிருக்க ஏன் அதனை அனைக்க வேண்டும் !?  ஆனால் தீ நம்மைத் தீண்டினால் தப்பிக்க வழியில்லை என்றால் அழித்திடும்.

தமிழக தீயணைப்பு மற்றும் மீட்புப் பணி துறையின் ஸ்லோகன் "WE SERVE TO SAVE" இதுதான் அவர்களின் குறிக்கோள்.

6698 பணியாளர்களுடன் 302 தீயனைப்பு மற்றும் இடர் மீட்பு சேவை நிலையங்கள், இடர் மீட்பு நிலையம் இரண்டும், 32 மாவட்டங்கள் முழுவதும் செயல்படுகிறார்கள்.

தஞ்சை மாவட்டத்திற்கு உட்பட்ட பகுதியைப் பொறுத்த வரை ஒன்பது தீயணைப்பு மற்றும் இடர் மீட்பு நிலையங்கள் உள்ளன அவைகள் முறையே:

கும்பகோணம் - (அவசர அழைப்பு எண் : 101)

ஒரத்தநாடு - (அவசர அழைப்பு எண் : 04372-33422)

பாப்பநாசம் - (அவசர அழைப்பு எண் : 04374-22101

பட்டுக்கோட்டை - (அவசர அழைப்பு எண் : 04373-52101)

பேராவூரனி - (அவசர அழைப்பு எண் : 04373-32401

தஞ்சாவூர் - (அவசர அழைப்பு எண் : 101)

திருவிடைமருதுர் - (அவசர அழைப்பு எண் : 04375-60101)

திருவையாறு - (அவசர அழைப்பு எண் : 04362-60101)

திருக்காட்டுப்பள்ளி - (அவசர அழைப்பு எண் : 04362-80401)

இவைகளையும் தாண்டி நமக்கு நாமே தற்காப்பு நடவடிக்கைகளையும் முன்னெச்சரிக்கைகளையும் செய்து கொள்வதில் தெளிவு இருக்க வேண்டும்.

சரி ஒருவேலை தீ என்ற இடர் ஏற்பட்டல் என்ன செய்வது ? அதற்கான தற்காப்பு செயல்களை எவ்வகையில் மேற்கொள்வது என்பதை தமிழக தீயணைப்பு படையினர் விளக்கியிருக்கிறார்கள் இதோ:-

மரம், காகிதம் அல்லது துணி இவைகளில் தீ பற்றிக் கொண்டால், தண்ணீரை வீசி அடித்தும், அல்லது கனமான சாக்கு போன்ற துணியினைக் கொண்டு மூடுவதும் சரியான முறையாகும்.

எண்ணெய், பொரியலிலிருந்து கிளம்பும் தீ பற்றிக் கொண்டால் சூடு ஏற்படுத்தும் காரணியை அணைக்க வேண்டும், பொரியல் சட்டியை மூடியையக் கொண்டு உடனணடியாக மூடிவிடவும்.

மின்சார கம்பிகள், மின்சார இணைப்புகள், மின்சாரம் சார்ந்த உபகரணங்களால் தீ பற்றிக் கொண்டால் முதலில் மின்சார இணைப்பின் தொகுப்பை (main) நிறுத்த வேண்டும், அதன் பின்னர் மண் அள்ளி அடர்த்தியாக வீசி அடிக்க வேண்டும்.

இதையெல்லாம் மீறி தீ பெரிதும் பரவி கூரைகள் அல்லது வீடுகள் அல்லது கடைகள் தீ பற்றிக் கொண்டால், அபாய சங்கு அல்லது அதற்கு நிகரான சத்தம் எழுப்ப வேண்டும், வீடுகளை விட்டு அல்லது இருப்பிடத்தை விட்டு உடனடியாக வெளியில் ஓட வேண்டும். சாதனங்களையோ அல்லது விலையுயர்ந்த பொருட்கள் உள்ளிருக்கிறதே என்று எடுத்துச் சென்றிடலாமே என்று தேடிக் கொண்டிருக்கக் கூடாது. கட்டிலுக்கு அடியிலோ அல்லது மறைவான இடத்திலே பதுங்கிடலாம் என்றும் உள்ளேயே இருந்திடலாகாது. உயர் அடுக்குமாடி கட்டிடங்களாக இருந்தால் படிகள் வழியாகத்தான் ஒட வேண்டும். எல்லாவற்றையும் விட அதி முக்கியமாக தீயனைப்பு நிலையத்திற்கு உடனடியாக தகவல் தெரிவிக்க வேண்டும்.

வீடுகளில் பாதுகாப்பு முறைகள்:-

- தீப்பெட்டிகளை உடல் மற்றும் ஆடைகளுக்கு அருகில் வைத்து தேய்த்து பற்ற வைக்கக் கூடாது.

- கேஸ் அடுப்பை திருப்புவதற்கு முன்னர் தீயைத் தயாராக வைத்திருக்க வேண்டும் அல்லது லைட்டர் போன்ற சூட்டரை பயன்படுத்த வேண்டும், கேஸை திறந்து வைத்து விட்டு தீப்பெட்டியை தேடக்கூடாது.

- கேஸ் அடுப்பினை உயரமான தட்டையான இடத்தில் வைக்க வேண்டும், தரையில் வைத்து பயன்படுத்தக் கூடாது.

- மின்சார இணைப்பிற்கு பிளக் (plug) போன்ற இணைப்புகளில் தொகுப்பாக (multi-plug) ஒன்றுக்கு மேல் பொருத்தக் கூடாது.

- சமையல் பொருட்கள் எண்ணெய் வகைகள் எளிதில் தீ க்கு பிடித்தமான பொருட்களை அடுப்பை விட்டு தள்ளியே வைத்திருக்க வேண்டும்.

- பிளாஸ்டிக் பொருட்களை அடுப்புக்கு அருகில் வைப்பதை தவிர்க்கவும்.

- குழந்தைகளை அடுக்களையில் விளையாட அனுமதிக்கக் கூடாது.

- கேஸ் சிலிண்டர் அல்லது அடுப்புக்கு அருகில் வேறு மண்ணெண்ணெய் அடுப்போ அல்லது வேறு எரிப்பூட்டானோ (igniters) வைக்க வேண்டாம்.

- அடுப்பு இயங்காத பட்சத்தில் ரெகுலேட்டரை மூடிவைப்பதே நல்லது.

- ரப்பர் குழாயை (hose pipe) அடிக்கடி மாற்ற வேண்டும்

- கேஸ் சிலிண்டரை சாய்த்தோ அல்லது கிடத்தியோ வைக்க கூடாது கண்டிப்பாக நிலையா நிமிர்த்து நிற்க வைக்க வேண்டும்.

* நல்ல வீடு, முறையாக சாதனங்களை அடுக்கி தேர்ந்தெடுத்த பொருட்கள் அந்தந்த இடத்தில் வைத்து அழகு பார்ப்பதும் பாதுகாப்பே.

- - LPG கேஸ் சிலிண்டரிலிருந்து கேஸ் வாடை ஏதும் வந்தால் அல்லது நீங்கள் உணர்ந்தால்:-

-- அந்த இடத்தில் எந்த எரியூட்டலோ (பற்ற வைத்தல் ) அல்லது தீ ஏற்படுத்தும் சூழலோ நிகழாமல் ஜாக்கிரதையாக இருக்க வேண்டும்.

-- மின்சாரத்தை இயக்க வேண்டாம், சுவிட்ச் போடவோ அல்லது பிளக் மாட்டவோ கூடாது.

-- எல்லா கதவுகளையும் திறந்து விட வேண்டும்

-- சிலிண்டரிலிருந்தே கசிவு இருந்தால் உடனடியாக அந்த சிலிண்டரை வெளியில் வெற்றிடத்திற்கு கொண்டு சென்று வைத்து விட்டு ஒதுங்கி விடவும்.

இப்படியாக பாதுகாப்பு முன்னெச்சரிக்கைகள் நிறைந்து இருந்தாலும், சுருக்கமாகத்தான் எடுத்து வைத்திருக்கிறோம்.

வீட்டின் அழகு அந்த அங்கேயிருப்பவர்களின் செயல்களிலே தெரியும், சுத்தம் என்றுமே உங்களை சுறுசுறுப்பாய் வைத்திடும்.

'தீ' வேண்டும் சமையலுக்கு, அதுவும் தீங்கினை தீண்டாத தீயும் வேண்டும்...!

- அபுஇபுறாஹிம்

வேண்டுகோள் ! 15

"வா...வரையும் சரித்திரச் சித்திரம்" தொடரின் ஆசிரியர் 'வாவன்னா சார்' அவர்கள் உடல்நலம் பாதிக்கப்பட்டு, தஞ்சை மருத்துமனையில் அனுமதிக்கப்பட்டுள்ளார்கள்.  அவர்கள் மேல் அன்பும் மரியாதையும் பாசமும் வைத்துள்ள சகோதரர்கள் அனைவரும், அவர்கள் விரைவில் நலம் பெற்றுத் திரும்பி வந்து, தமது எழுச்சியூட்டும் எழுத்துப் பணியைத் தொடர வேண்டி அல்லாஹ்விடம் இறைஞ்சுமாறு கேட்டுக்கொள்கின்றேன்.

- அதிரை அஹ்மது

நோக்கம் சிறந்தால் மார்க்கம் (வழி) பிறக்கும்..! 15

If there is will, there is a way !

நாம் யாவருக்கும் அல்லாஹ்வின் அருட்கொடையான உடலழகும் உண்டு அதனுள்ளே மனமும் உண்டு, மூளையும் உண்டு, இவைகளையும் மீறி அவைகளை உரிய முறையில் பயன்படுத்துவதை தவிர்த்து அதையும் இதையும் நினைத்து, அதன் அற்புதச் செயல்பாடுகளின் பலன்களை அடையாமல் கெடுத்துக் கொள்பவர்கள்தான் நம்மில் அதிகமதிகம். நமக்கு அந்தந்த தேவைகளுக்காக அவசியமான உறுப்புகளுடன் வல்ல நாயன் அல்லாஹ்வால் கொடுக்கப்பட்டதோ அதனை அந்தந்த நன்நோக்கத்துடன் உபயோகித்தால் பலனும் பயனும் உண்டு.

பெரும்பாலோர் ‘மிகக் கடினமாக உழைக்கிறேன் பேர்வழி’ என்று உடல் ஆரோக்கியத்தையும், மனதையும் கெடுத்துக் கொண்டு அவர்களே அதனைத் திரும்பிப் பார்த்தார்களேயானால் சாதித்தது சல்லிக்காசு பொருமானமுள்ளதாக இருக்காது. வேறு சிலரோ, அவர்கள் கச்சிதமாக குறைவாகவும், நேர்த்தியாக திட்டமிட்டு உழைப்பார்கள் (Work Smarter than Hard). அதுதான் அவர்களுக்கும் வெற்றியைக் கொடுக்கிறது, தான் அடைய வேண்டிய இலக்கை எளிதாக நெருங்கி விடுவார்கள். அதற்காக படித்தவன் / படிக்காதவன் என்ற வேறுபாடுகள் வைத்து பிரித்தாளத் தேவையில்லை.

ஜாஹிர் காக்கா ஒரு பதிவில் இட்ட கருத்தில் அவர்களின் பாட்டி சொன்னதாக சொல்லியிருந்ததை இங்கே நினைவுபடுத்துவது பொருத்தமாக இருக்குமென்று நினைக்கின்றேன் “நீ வேலை தேடுபவனாக இருப்பதை விட, 10 பேருக்கு வேலை கொடுப்பவனாக மாறு" இவ்வகையான நிலை சர்வ சாதரணமாக கிடைத்துவிடாது, சிறிய அதோடு உளப்பூர்வமான உழைப்பும் சரியான திட்டமிடுதலின் துணை கொண்டுதான் சாதிக்க முடியும்.

ஒரு ஆங்கிலப் பழமொழி சொல்வதைப்போல் - “If you fail to plan,you plan to fail “

அல்லாஹ் அளித்திருக்கும் அருட்கொடைகளில் ஒன்றான மூளையைச் சிலர் அதன் திறனை சரியாகப் பயன்படுத்தியதே கிடையாது. அதற்கு மாறாக உருளைக் கிழங்குகளை அவர்களின் தலையில் வைத்து இருந்தால் தயிர் சோற்றுக்குத் துணைக்கறியாக பொரிக்கவாவது பயன்பட்டிருக்கலாம்.

தமிழகத்தின் நெற்களஞ்சியமான தஞ்சை தரணியில் நெல் விளைவிக்கும் விவசாயமே பரம்பரையாக செய்து வந்த ஒரு வயதான விவசாயிக்கு அவரின் ஒரே மகன் அவரோடு இணைந்து அவரது விவசாயத்திற்கு உதவி செய்து வந்தான். அப்பன் சொல்லை அதிகம் கேளாத அவன் ஊரில் அடிதடியிலும்,பல விரும்பத்தகாதச் செயல்களிலும் ஈடுபட்டு முடிவில் போலிசில் சிக்கி சிறைவாசமே சிம்மாசனமாக கிடைத்தது அவனுக்கு.

அந்த தள்ளாத வயதான காலத்தில் துணைக்கு என்று இருந்த ஒரே மகனும் இல்லாமல் நிலத்தை உழுது விவசாயம் பயிர்செய்ய முடியவில்லை அவரால், மனம் கேட்காமல் சிறையிலிருக்கும் தனது மகனுக்கு ஒரு கடிதம் எழுதினார்

“மகனே நீ மட்டும் இந்நேரம் என்னுடன் இருந்திருந்தால், நம்முடைய நிலத்தில் உழுது ஏகபோகமாக பயிர் செய்ய பெரிதும் உதவியிருப்பாய், ஆனால் சிறையிலிருக்கும் உன்னால் என்னதான் செய்யமுடியும்" என்று உருக்கமாக எழுதியிருந்தார்.

மகனும் தந்தைக்கு உடனே பதில் அனுப்பினான் “தந்தையே அந்த விளை நிலத்தை உழவுக்கு பயன்படுத்தாதீர்கள், அதில்தான் நான் கள்ளத்தனமாக வாங்கிய விரும்பத்தகாத பொருட்களும் மற்றும் ஆயுதங்களையும் புதைத்து வைத்து இருக்கின்றேன்" என்று.

கடிதம் கிடத்த மறுநாள் விடியற்காலையில் 10 புலன் விசாரனை அதிகாரிகளும் 30 போலீசாரும் அந்த முதியவரின் விவசாய நிலத்தில் பொக்லைன் இயந்திரத்தோடு ஆஜராகி நிலத்தை கூறு போட்டு தோண்டினர் சல்லடையாக நிலத்தினை கிளறியெடுத்து புரட்டிப் போட்டனர் ,அவர்கள் தேடி வந்த ஆயுதங்களோ அல்லது விரும்பத்தகாத பொருட்களோ இல்லை அவர்களும் வந்த வழியே திரும்பியும் விட்டனர்.

அந்த வயதானவர் குழம்பியவராக, நடப்பது என்னவென்று தெரியாமல் மகனுக்கு மீண்டும் கடிதம் அனுப்பினார் ”இப்ப நான் என்ன செய்ய ?” என்று !

மீண்டும் மகன் பதில் அனுப்பினான் “புரட்டிப் போடப்பட்ட அந்த நிலத்தில் தண்ணி பாய்ச்சி நாற்று நடவுங்கள், ஒரு மகனாக சிறையிலிருந்து கொண்டு என்னால் செய்ய முடிந்த உதவி இதுதான் இப்போதைக்கு” என்றதும் அவருக்கு புரிந்தும் புரியாததுமாக தனது வேலையைத் துவங்கினார்.

ஐக்கிய அரபு அமீரகத்தில் உள்ள ராசல்கைமாவில் உள்ள மலைகளில் ஒருவித அசரீரிச் சத்தம் மாலை மற்றும் இரவு நேரங்களில் வருவதாகக் கூறி மக்கள் பயந்து அரசிடம் எடுத்துச் சொல்ல அரசும் பூகம்ப பயத்தில் மேலை நாடுகளில் இருந்து விஞ்ஞானிகளை (!!) இறக்குமதி (அமீரகத்தில் 99% இறக்குமதிதான்) செய்து, ஆராயச் சொன்னார்கள்.

புரியாத ஒலிச் சத்தம் வரும் தகவல் (செய்திச் சேனல்களில்) ஒலியின் வேகத்தைவிட அதிகமாக ஆங்காங்கே பரவ பலபகுதிகளிலிருந்தும் மக்கள் அச்சத்துடன் வரத்துவங்கி சுற்றுலாத் தளமாக அதனை பரபரப்பாக கண்டு வந்திட சென்று கொண்டிருக்க, அங்கே ஒரு 'சேட்டன்' மட்டும் அவருக்கே உரிய கைத்தொழிலான ஒரு மினி 'சாயாக் கடை' க்கு சாந்தமாக அடிக்கல் நாட்டினார், ஆஹா! அருமையாக சுறுசுறுப்பான வியாபாரம் செய்து கொண்டு இருந்தார். நிறைவில் அந்தப் பகுதியில் வெளியாகும் ஒலிச் சத்தம் ஒரு வித ஆந்தைகளின் அலறல்தான் என்று விஞ்ஞானிகள்(!!) உறுதி செய்ய, அரசும் அந்த விஞ்ஞானிகளுக்கு செலவழித்த பணத்திற்கு நிகராக, கல்லா கட்டிக்கொண்டு 'நம்ம சேட்டனும்' அவ்விடத்தை அதே சாந்தத்துடன் காலி செய்துவிட்டு அடுத்து என்ன செய்யலாம் என்ற சிந்தனையுடன் அகன்றார்.

நீதி: இம்மாதிரியான நிஜமான சம்பவங்களில் இருந்து என்ன அறிந்து கொள்ள முடிகிறது என்றால் “எங்கே இருக்கின்றோம் என்பது முக்கியமில்லை என்ன செய்கிறோம் என்பதுதான் முக்கியம்”

- முகமதுயாசிர்

- ,துபாய்

தினமும் மார்க்க சொற்பொழிவு - நேரலை 12

அல்லாஹ்வின் திருப்பெயரால்...

அன்பான வாசக நேசங்களே! அஸ்ஸலாமு அலைக்கும் வரஹ்...

அதிரைநிருபர் கடந்த ஒன்றறை ஆண்டுகளுக்கும் மேலாக நம் சமுதாய மக்களிடையே விழிப்புணர்வு ஏற்படுத்துவதற்காக அவ்வப்போது விழிப்புணர்வு பதிவுகளை பகிர்ந்தளித்து வருவதை நன்கு அறிவீர்கள். இதில் ஏராளமான அதிரை நேசங்கள் மட்டுமல்லாது இன்னும் பிற ஊர்களிலிருந்தும், கடல்கடந்தும் இருக்கும் நேசங்களும் அதனைக் கொண்டு பயனடைந்து வருகிறார்கள். இதன் தொடர்ச்சியாக அதிரைநிருபர் தினமும் இந்திய நேரம் இரவு 10:30 மணி முதல் 11:30 மணி வரை மார்க்க சொற்பொழிவு காணொளி நேரலை நிகழ்ச்சியாக ஏற்பாடு செய்யப்பட்டுள்ளது. இது ஒரு கன்னி முயற்சிதான், இதனை முதல் சோதனை ஓட்டமாக செய்கிறோம். அல்லாஹ் நாடினால் இந்த சிறிய முயற்சி நாளடைவில் வளர்ந்திடவும் அதன் பணிகள் தொடர்ந்து தொய்வின்றி செய்திட முயற்சி செய்கிறோம். இன்ஷா அல்லாஹ் !.

முதல் முயற்சியாக இன்று (13.11.2011) இந்திய நேரம் இரவு 10:30 – 11:30 வரை, ஐக்கிய அரபு அமீரக நேரம் இரவு 09:00 – 10:00 வரை, சவுதி நேரம் 08:00 – 09:00 வரை நேரலை செய்யப்படும்.

முதல் நிகழ்ச்சியின் தலைப்பு : முன் மாதிரி இஸ்லாமிய குடும்பம்

உரை: முஃப்தி உமர் ஷரீஃப் காஸிமி அவர்கள்

இதில் தமிழகம், இலங்கை மற்றும் உலகில் தமிழ் பேசும் நாடுகளிலிருந்து தலைச்சிறந்த மார்க்க சொற்பொழிவாளர்களின் காணொளிகள் தொடர்ந்து ஒரு மணி நேர நேரலையாக உங்களின் பார்வைக்கும் செவிக்கும் விருந்தாக்க உள்ளோம்.

நேரலை காணொளியில் இடம் பெரும் சொற்பொழிவுகள் அனைத்தும்  குர்ஆன், ஹதீஸ் தொடர்பானவைகளாக மட்டுமே இருக்கும். எந்த ஒரு இயக்கத்தையோ அல்லது எந்த ஒரு தனி நபர்களையோ முன்னிருத்தியோ / சார்ந்ததாகவோ / எதிராகவோ இருக்காது என்பதை தெளிவாக அறிவிக்கிறோம். நம் சமுதாய மக்களுக்கு மார்க்க விழிப்புணர்வு ஏற்படுத்தும் நன்நோக்கில் கையாளப்படும் இந்த சிறு முயற்சிக்கு அழைப்பு பணியில் அதிகமதிகம் ஈடுபடுத்தி வரும் நம் சகோதரர்கள் சிலர் மார்க்க சொற்பொழிவு குறுந்தகடுகளை அதிரைநிருபக்கு வழங்கிட முன்வந்துள்ளார்கள். இது பற்றிய முழு விபரங்கள் பின்னர் ஒரு பதிவில் வெளியிடுவோம் இன்ஷா அல்லாஹ்.

மார்க்க சொற்பொழிவுகளின் நேரலையை அனைத்து மக்களிடம் கொண்டு செல்லும் பொறுப்பு ஒவ்வொரு இஸ்லாமிய ஊடகத்தின் கடமை என்பதை உணர்ந்த நாம் இந்த சிறு முயற்சியாக நேரலையை யார் வேண்டுமானாலும் தாராளமாக உரிமையுடன் பகிர்ந்துக்கொள்ளலாம்.

வளர்ந்து வரும் தொழில்நுட்பத்தின் நுனுக்கங்களை கையாண்டு அதன் மூலம் இஸ்லாமிய அழைப்புப் பணியிலும் அதிரைநிருபர் வலைத்தளம் தன்னை ஈடுபடுத்திக்கொள்ள இருக்கும் இத்தருணத்தில் உங்கள் அனைவரின் மேலான கருத்துக்களை தொடர்ந்து பகிர்ந்து, எங்களின் நிறை குறைகளை சுட்டிக்காட்டி ஒத்துழைப்பையும் தருமாறு அன்புடன் கேட்டுக்கொள்கிறோம்.

-அதிரைநிருபர் குழு