மூடப்பழக்கம் மண்மூடிப்போகட்டும் - 1 15

அஸ்ஸலாமு அலைக்கும்.

காலங்கள் மாறுகிறது, விஞ்ஞானம் வளர்கிறது, மனிதன் நிலவில் கால் வைத்து விட்டான். வேறு எந்த கோள்களுக்குச் செல்லலாம் என்று ஆராய்ச்சியில் இருக்கிறான். இவ்வளவு இருந்தும் பிற மதமக்களிடம் இருக்கும் பல மூடபழக்கங்கள் மட்டும் நம்மவர்களிடமும் தொற்றுநோய் போல் இருந்துகொண்டுதான் இருக்கிறது. நம்மிடையே குடிகொண்டுள்ள சில தீய மூடபழக்கங்களில்  ஒன்றுதான் குறி கேட்பதும், அதற்கு பரிகாரம் என்ற பெயரில் ஷிர்க்கான (இணை வைக்கும்) காரியங்களை செய்து வருபவர்களைப்பற்றி பத்திரிக்கை தொலைக்காட்சிகளின் வாயிலாக நாம் பார்த்து வருகிறோம். இது பற்றிய விழிப்புணர்வுதான் இந்த ஆக்கம். நம் சமுதாய மக்கள் (மார்க்கம் அறியாமல்) செய்வதை மட்டும் நயவஞ்சக ஊடகங்கள் பெரிதுபடுத்திக் காட்டும் வேலையை நன்றாக செய்து வருகிறது. சமீபத்தில் மிகக்கொடூரமான சம்பவம் முஸ்லிம் (பெயர் தாங்கி) ஆணும், பெண்ணும் சேர்ந்து பச்சிளங்குழந்தையை அறுத்து பலியிட்ட செய்தி கேள்விப்பட்டு மிக வேதனையாக இருந்தது. இன்னும் பெயர்தாங்கி முஸ்லிமாக எத்தனை காலம் இருப்பார்கள். மார்க்கத்தை எப்பொழுது அறிந்து கொள்வார்கள். இன்னும் மார்க்கம் இவர்களிடம் சரியாக போய்ச்சேரவில்லையே  என்ற கவலை நமக்கு அதிகமாக இருந்து வருகிறது.

(தானகச்) செத்தது, இரத்தம், பன்றியின் இறைச்சி, அல்லாஹ் அல்லாததின் பெயர் அதன் மீது கூறப்பட்ட(அறுக்கப்பட்ட)தும், கழுத்து நெறித்துச் செத்ததும், அடிபட்டுச் செத்ததும், கீழே விழுந்து செத்ததும், கொம்பால் முட்டப் பட்டுச் செத்ததும், (கரடி, புலி போன்ற) விலங்குகள் கடித்(துச் செத்)தவையும் உங்கள் மீது ஹராமாக்கப் பட்டிருக்கின்றன. (அனுமதிக்கப்பட்டவற்றில்) எதை நீங்கள் (உயிரோடு பார்த்து, முறைப்படி) அறுத்தீர்களோ அதைத் தவிர (அதை உண்ணலாம். அன்றியும் பிற வணக்கம் செய்வதற்காகச்) சின்னங்கள் வைக்கப் பெற்ற இடங்களில் அறுக்கப்பட்டவையும்;, அம்புகள் மூலம் நீங்கள் குறி கேட்பதும் (உங்களுக்கு விலக்கப்பட்டுள்ளன) - இவையாவும் (பெரும்) பாவங்களாகும்;. ........  (அல்குர்ஆன் 5:3)

நம்பிக்கையாளர்களே! நிச்சயமாக மதுபானமும், சூதாட்டமும், கற்சிலைகளை வழிபடுதலும் , அம்புகள் எறிந்து குறி கேட்பதும் , ஷைத்தானின் அருவருக்கத்தக்க செயல்களிலுள்ளவையாகும். ஆகவே நீங்கள் இவற்றைத் தவிர்த்துக் கொள்ளுங்கள் - அதனால் நீங்கள் வெற்றியடைவீர்கள். (அல்குர்ஆன் 5:90)

யாரேனும் சோதிடனிடம் சென்று அவன் கூறுவதை நம்பினால் முஹம்மதுக்கு அருளப்பட்ட மார்க்கத்தை அவன் நிராகரித்து விட்டான் என்பதும் நபிமொழி . (அஹ்மத் 9171)


 இன்னொரு விஷயத்தையும் கவனிக்க வேண்டும். உலகத்துக்கெல்லாம் நல்ல நாள் கணித்துக் கூறக் கூடிய பூசாரிகள், சாமியார்கள், ஜோதிடர்களின் நிலைமையை கவனித்தால் அவை அனைத்தும் வயிற்றுப் பிழைப்புக்காக அவர்கள் நடத்தும் ஏமாற்று வித்தை என்பதை அறிந்து கொள்ளலாம்.

மற்றவர்களுக்கு நல்ல நேரத்தையும் நல்ல நாளையும் கணித்துக் கூறும் இவர்களுக்கு தங்களுக்கு என்று விஷேசமான நல்ல நாளைத் தேர்வு செய்து தங்கள் வாழ்வை வளப்படுத்திக் கொள்ள ஏன் முடியவில்லை? அவர்களைப் பொறுத்தவரை யாராவது அவர்களிடம் சென்று குறி கேட்கும் நேரம் தான் அவர்களுக்கு நல்ல நேரம். இல்லையெனில் அன்றைய சாப்பாட்டிற்கே அவர்களுக்குத் திண்டாட்டம் தான். இது ஒரு பித்தலாட்டம் என்பதை இதிலிருந்து தெளிவாக உணரலாம்.

இன்ஷா அல்லாஹ் தொடரும்....

-- கிரவுன்

மூடப்பழக்கம் மண்மூடிப்போகட்டும் 2