கடன் வாங்கலாம் வாங்க - 1 29

அல்லாஹ்வின் திருப்பெயரால்...

அன்பார்ந்த சகோதர, சகோதரிகளே!  அஸ்ஸலாமு அலைக்கும் (வரஹ்)    - இறைவனின் சாந்தியும், சமாதானமும் தங்கள் மீது என்றென்றும் நிலவட்டுமாக!

தலைப்பை பார்த்து விட்டு அதிரைநிருபர் குழு கடன் வழங்கும் திட்டம் எதுவும் ஆரம்பித்திருக்கிறார்களா? என்ன? என்று கற்பனையில் இறங்கி விடாதீர்கள். (உலகத்தின் பெரிய வட்டி கடையான – உலக வங்கியால் மட்டும்தான் கடன் கொடுக்க முடியும்).

கடன் - என்ற சொல் இனிப்பா? கசப்பா? தெரிந்தவர்கள் சொல்லுங்கள். கடன் - இந்த வார்த்தையை கேட்காத நேரம் இல்லை, சொல்லாத மனிதர்களும் இல்லை. கடன் – நமது இரத்தத்தோடு கலந்து போய் உயிர்நாடியில் சங்கமம் ஆகிவிட்டது. கடன் - வாங்கியவருக்கு மகிழ்ச்சியைத்தரும். ஆனால் கொடுத்தவருக்கோ வேதனை அளிக்கும்.

நாம் வாங்கும் கடன்கள் நமது மார்க்கத்திற்கு உட்பட்டு எந்த வகையில் இருக்க வேண்டும் என்பதை ஆய்வு செய்வதே இந்த கட்டுரையின் நோக்கம். நமக்குள் கொடுத்து வாங்கும் கடன்களை பார்ப்பதற்கு முன் கடன் என்ற பெயரால் இந்த உலகத்தில் நடைமுறையில் நடைபெற்று வரும் கடன்களின் தரத்தை ஒவ்வொன்றாக அலசுவோம்.

நாடுகள் வாங்கும் கடன்:

இன்றைய நுகர்வு கலாச்சாரத்தில் கடன் வாங்குவது கௌரவமான செயல் என்பதுபோல் கருத்து பரவி வருகிறது. நமது இந்தியாவும் கடன் வாங்குவதில் முன்னோடியாக உள்ளது. பிறக்கும் இந்தியன் ஒவ்வொருவரின் கணக்கிலும் வாங்காத கடனுக்காக நம்மீது வலிந்து கடனாளி என்ற பெயர் திணிக்கப்பட்டுள்ளது. கடனுக்காக இந்தியாவை விற்றுவிடும் அவல நிலை எதிர்காலத்தில் வந்தாலும் வரலாம். உலகமயம், தாராளமயம் என்ற போர்வையில் மற்ற நாடுகளில் தானாக முன் வந்து உலக வங்கி கடன் கொடுத்து அடிமையாக்கி வருகிறது. மேலும் கடன் கொடுக்கும் உலக வங்கி (உலக ரவுடி வங்கி) நம் நாட்டில் எப்படி செயல்பட வேண்டும் என்பதையும் நமது ஆட்சியாளருக்கு கடும் கட்டளைகளை பிறப்பிக்கிறது. கடன் கிடைக்கவேண்டும் என்பதற்காக ஆள்வோரும் அப்படியே செயல்படுகிறார்கள். வாங்கிய கடன் சரியாக செலவழிக்கப்படுகிறதா? என்பது கேள்விக்குறியே! (அரசியல்வாதிகளும் சரி, மீடியாக்களும் சரி இந்தியா கடன் வாங்குகிறது என்று சொல்வதை கேள்விப்பட்டிருக்கிறீர்களா? ஜப்பான் நிதி வழங்கியது, உலக வங்கி நிதி வழங்கியது என்றுதான் சொல்வார்கள். கடன் வழங்கியது என்று சொல்லமாட்டார்கள். நிதியா??? கடனா??? நிறையபேர் நிதி என்றால் மற்றநாடுகள் உதவியாக தருகிறார்கள் என்றுதான் நினைக்கிறார்கள். மீடியாக்களுக்கும், அரசியல்வாதிகளுக்கும் பெரிய சங்கெடுத்து அவர்களின் காதில்  ஊதி இனிமேலாவது கடன் வழங்கியது, கடன் வாங்கினோம் என்று  அறிவிக்கச் சொல்லுங்கள்.).

மேலும் உலகமயம், தாராளமயம் என்ற போர்வையில் பன்னாட்டு கம்பெனிகளும் பலவிதமான கவர்ச்சி விளம்பரங்களுடனும் அதற்கு ஒத்துழைக்கும் மீடியாக்களுடனும், நம் இந்திய நாட்டின் வளங்கள் அனைத்தையும் வியாபாரம் என்ற பெயரில் கொள்ளையடித்து செல்ல ஆரம்பித்து ஆண்டுகள் பல ஆகிவிட்டது. இதை ஆள்பவர்களும் கண்டுகொள்வதில்லை. அவர்கள் ஒத்துழைப்புடன்தான் அனைத்தும் நடக்கிறது பிறகு எதற்கு கவலைப்பட வேண்டும்.

மக்கள் விழிப்புணர்வு பெறவேண்டும். நம்மை கடனாளி ஆக்குவதில் இந்த பன்னாட்டு முதலாளி (முதலை)களின் பங்கு முக்கியமாக இருக்கிறது. இன்று இவர்களின் செயல்பாடுகள் ஆக்டோபஸ் அளவுக்கு விரிவடைந்து வருகிறது. மக்கள் விழிப்புணர்வு பெறும்பொழுது இந்த கொள்ளை தடுத்து நிறுத்தப்படும். –

(தொடர் -1 ஆய்வு கட்டுரை)

இன்ஷாஅல்லாஹ் வளரும்..

-- Alaudeen.S.

கடன் வாங்கலாம் வாங்க முகப்பு                     கடன் வாங்கலாம் வாங்க 2 --->