அமைதியற்ற உள்ளத்திற்கு அருமருந்து - 044 6

அளவற்ற அருளாளனும் நிகரற்ற அன்புடையோனுமாகிய

அல்லாஹ்வின் திருப்பெயரால். . .

அன்பார்ந்த சகோதர, சகோதரிகளே! அஸ்ஸலாமு அலைக்கும் (வரஹ்) குர்ஆனையும், நபி வழியையும் பின்பற்றினால்தான் மனம் அமைதி பெறும், நேர்வழியும் கிடைக்கும். குர்ஆனையும், நபி(ஸல்) அவர்களின் வாழ்க்கையையும் பின்பற்றி நடந்தால், உள்ளங்கள் அமைதி பெற்று இம்மை மறுமை வாழ்வில் வெற்றி பெறலாம் இன்ஷாஅல்லாஹ்!.

அதிகாரத்தை கேட்டுப் பெறுதல் கூடாது:

அல்லாஹ் கூறுகிறான்:

பூமியில்  ஆணவத்தையும், குழப்பத்தையும் விரும்பாதவர்களுக்காக அந்த மறுமை வாழ்வை ஏற்படுத்தியுள்ளோம்.  நல்ல முடிவு (இறைவனை) அஞ்சுவோர்க்கே.(அல்குர்ஆன்: 28:83)

''எனக்குப்பின் வசதியான நிலையும் நீங்கள் விரும்பாத பல செயல்களும் உண்டாகும்'' என்று நபி (ஸல்) கூறினார்கள். ''இறைத்தூதர் அவர்களே! அந்த நிலையை அடைந்து விட்ட எங்களில் ஒருவருக்கு என்ன கட்டளையிடுகிறீர்கள்?'' என்று கேட்டார்கள். ''உங்கள் மீதுள்ள கடமையை நீங்கள் நிறைவேற்றுங்கள். உங்களுக்குரியதை அல்லாஹ்விடம் கேளுங்கள் என நபி(ஸல்)  கூறினார்கள். (அறிவிப்பவர்: அப்துல்லா இப்னு மஸ்ஊத்(ரலி) அவர்கள் (புகாரி,முஸ்லிம்) (ரியாளுஸ்ஸாலிஹீன்: 670)

'இறைத்தூதர் அவர்களே!  எனக்கு நீங்கள் பொறுப்புத் தரக் கூடாதா? என்று நான் கேட்டேன். உடனே அவர்கள் என் தோள்பட்டை மீது என் கையை வைத்து விட்டு, ''அபூதர்ரே! நீர் பலவீனராக உள்ளீர். பொறுப்பு என்பதோ, அமானிதமாகும். அதை ஒருவன் அதன் உரிமையுடன் எடுத்து, அதை முறைப்படி நிறைவேற்றினாலே தவிர, மற்றவருக்கு அது மறுமை நாளில் இழிவும் கைசேதமும் தரும்'' என்று கூறினார்கள். (அறிவிப்பவர்: அபூதர் (ரலி) அவர்கள் (முஸ்லிம்) (ரியாளுஸ்ஸாலிஹீன்: 676)

'நீங்கள் தலைமைப் பொறுப்புக்கு ஆசை கொள்வீர்கள். மறுமை நாளில் பெரும் கவலையை அது ஏற்படுத்தும்'' என, நபி(ஸல்) கூறினார்கள். (அறிவிப்பவர்: அபூஹுரைரா (ரலி) அவர்கள் (புகாரி) (ரியாளுஸ்ஸாலிஹீன்: 677)

ஆட்சியாளர், நீதிபதி, மற்றும் பொறுப்பில் உள்ளவர்கள்:

அல்லாஹ் கூறுகிறான்:

உற்ற நண்பர்களாக இருந்தோரில் (இறைவனை) அஞ்சி, நமது வசனங்களை நம்பி முஸ்லிம்களாக இருந்தோரைத் தவிர(மற்றவர்கள்) அந்நாளில் ஒருவருக்கொருவர் பகைவர்களாக இருப்பார்கள். (அல்குர்ஆன்: 43:67)

'ஒரு தலைவருக்கு அல்லாஹ் நன்மையை நாடிவிட்டால், அவருக்கு உண்மையான அமைச்சரை அல்லாஹ் ஏற்படுத்துவான். தலைவர் மறந்து விட்டால், அவருக்கு நினைவூட்டுவார். அவர் கூறினால், அவருக்கு இவர் உதவி புரிவார். நன்மை அல்லாத ஒன்றை அல்லாஹ் நாடிவிட்டால் அவருக்குத் தீய மந்திரியை அல்லாஹ் ஏற்படுத்துவான். அவர் மறந்தால், அதை  நினைவு படுத்தமாட்டார். அவர் கூறினால், அவருக்கு உதவமாட்டார் என்று நபி(ஸல்)அவர்கள் கூறினார்கள்.  (அறிவிப்பவர்: அன்னை ஆயிஷா (ரலி) அவர்கள் (அபூதாவூது)   (ரியாளுஸ்ஸாலிஹீன்: 679)

'நானும், என் சிறிய தந்தையின் இரண்டு மகன்களும் நபி(ஸல்) அவர்களிடம் வந்தோம். அவ்விருவரில் ஒருவர், ''இறைத்தூதர் அவர்களே! அல்லாஹ் உங்களுக்கு அதிகாரம் வழங்கியுள்ள பகுதியில் எங்களை (அதிகாரியாக) நியமியுங்கள்'' என்று கேட்டார். இன்னொருவரும் இதே போல் கூறினார். அப்போது நபி(ஸல்)அவர்கள், ''நிச்சயமாக நாம், அல்லாஹ்வின் மீது சத்தியமாக, இப்பதவியை கேட்கின்ற எவருக்கும், இதை ஆசை கொள்கின்ற எவருக்கும் இந்த அதிகாரத்தை வழங்கிட மாட்டோம்'' என்று கூறினார்கள்

(அறிவிப்பவர்: அபூமூஸா அல்அஷ்அரீ (ரலி) அவர்கள் (புகாரி,முஸ்லிம்) (ரியாளுஸ்ஸாலிஹீன்: 680)

வெட்கப்படுதலின் சிறப்பு:

''நபி(ஸல்) அவர்கள் அன்சாரித் தோழர்களில் ஒருவரை கடந்து சென்றார்கள். அவர் தன் சகோதரருக்கு, ''வெட்கப்படுதல்'' பற்றி உபதேசம் செய்து கொண்டிருந்தார். அப்போது நபி(ஸல்) அவர்கள், ''அவரை விட்டு விடு! வெட்கம் என்பது, இறை நம்பிக்கையில் உள்ளதாகும்'' என்று கூறினார்கள். (அறிவிப்பவர்: இப்னு உமர்(ரலி) அவர்கள் (புகாரி,முஸ்லிம்) (ரியாளுஸ்ஸாலிஹீன்: 681)

'வெட்கம் என்பது,  நல்லதைத்தவிர வேறொன்றைக் கொண்டு வராது என நபி(ஸல்) கூறினார்கள்.  (புகாரி,முஸ்லிம்)  ''வெட்கம் அனைத்தும் நல்லதே'' என்று முஸ்லிமின் மற்றொரு அறிவிப்பில் உள்ளது. (அறிவிப்பவர்: இம்ரான் இப்னு ஹுஸைன் (ரலி) அவர்கள் (புகாரி,முஸ்லிம்) (ரியாளுஸ்ஸாலிஹீன்: 682)

'இறைநம்பிக்கை (ஈமான்), எழுபது அல்லது அறுபது சில்லரை கிளைகளாகும். அவற்றில் மிக மேலானது, ''லாயிலாஹ இல்லல்லாஹ்'' என்று கூறுவதாகும். அவற்றில் மிகத் தாழ்வானது, பாதையில் உள்ள இடையூறு தரக்கூடியதை நீக்குவதாகும். மேலும் வெட்கம் கொள்வது, இறை நம்பிக்கையின் ஒரு கிளையாகும்'' என்று நபி(ஸல்) கூறினார்கள். (அறிவிப்பவர்: அபூஹுரைரா (ரலி) அவர்கள் (புகாரி,முஸ்லிம்) (ரியாளுஸ்ஸாலிஹீன்: 683)

'கன்னிப் பெண் தன் அறையில் வெட்கப்பட்டுக் கொண்டிருப்பதை விட மிகக் கடுமையாக வெட்கம் கொள்பவர்களாக நபி(ஸல்) இருந்தார்கள்.  (அறிவிப்பவர்: அபூஸயீத் அல்குத்ரீ (ரலி) அவர்கள் (புகாரி,முஸ்லிம்) (ரியாளுஸ்ஸாலிஹீன்: 684)

''ஒவ்வொரு தூதரும்; அற்புதங்களுடன் அனுப்பப்பட்டனர். எனக்கு வழங்கப்பட்ட அற்புதம் திருக்குர்ஆன் – நபி (ஸல்) அவர்கள் ''. (நூல்: புகாரி, முஸ்லிம்)

தனது அடியாருக்கு அல்லாஹ் போதுமானவன் இல்லையா? அவனல்லாதோரைப் பற்றி அவர்கள் உம்மை அச்சுறுத்துகின்றனர். அல்லாஹ் யாரை வழி கேட்டில் விட்டானோ அவருக்கு நேர் வழி காட்டுபவன் இல்லை. (அல்குர்ஆன்: 39:36)

அல்லாஹ் யாருக்கு நேர் வழி காட்டுகிறானோ அவரை வழி கெடுப்பவன் இல்லை. (அல்குர்ஆன்: 39:37)

'' திருக்குர்ஆனைப் பொருளுணர்ந்து படியுங்கள் '' 

இன்ஷாஅல்லாஹ் வளரும்...

அலாவுதீன் S.