சுதந்திரமான சுதந்திரம் ! (இன்று ஆகஸ்ட் - 15) 15

இந்தியா சுதந்திரம் அடைந்த தினத்தை கடந்த அரை நூற்றாண்டுகளுக்கு மேலாக பள்ளியிலும் அரசு அலுவலகங்களிலும் கொடியேற்றியும் அன்றைய தினம் விடுமுறை என்பதால் சினிமாக்களுக்குச் செல்வதிலும், விடுமுறையை விரும்பிய விதத்தில் சுதந்திர தினத்தை கொண்டாடி அத்தினத்தை கழித்து வருகின்றனர்.

நம் இஸ்லாமிய முன்னோர்கள் மற்றவர்கள் செய்யத் துணியாத தியாகங்களை துச்செமென செய்தும், தலைமைக்கு கட்டுப்பட்டவர்களாவும் இருந்து மிகவும் அவதிக்குள்ளாகி எப்படியெல்லாம் சிரமப்பட்டு நம் இந்தியா சுதந்திரம் அடைய பின்னால் காரணிகளாக இருந்தார்கள், என்பதை நினவில் கொள்ளாமல் அப்படிப் பெற்ற இந்த சுதந்திரத்தினை பேணிக் காப்பதை தவிர்த்து விட்டு இவர்கள் இப்படியும் (தவறாக) பயன் படுத்தலாமோ !? என்று இன்றைய சூழலில் மண்ணின் மைந்தர்கள் சொல்லாமல் செய்வதை கிழே பார்ப்போம். 

எதற்காக பெற்றோம் இச்சுதந்திரத்தை என்பதும் தெரியாது, ஏன் இந்தச் சுதந்திரம் என்றும் தெரியாது, அப்படின்னா சுதந்திரம்னா என்னங்க ?

சமீபத்தில் கண்ணில் பட்ட இவர்களின் சுகாதார சுத்தம் கெட்ட சுதந்திரம் (சு.சு.சு. மாத்தியெல்லாம் யோசிக்கலைங்க !).

குற்றாலத்தில் இயற்கை கொடுத்த அருமையான சூழலில் பருவகால குளியலுக்கு வருபவர்கள் உடம்பு முழுக்க அருவருக்கத்தக்க (கோழி பொறித்த) எண்ணையை தேய்த்துக்கொண்டு  ஒருவித காட்டுக்கத்து (காடுகளை கண்டு கொண்டதை உறுதிப்படுத்திக் கொள்ள) கத்திக்கொண்டு காட்டு மாடுகள் போல் குளிக்குமிடத்திற்குள் நுழைவது.

பொது இடம் என்று கூட பார்க்காமல்  உச்சா (சிறுநீர்) போவதும் அதற்கு அடுத்த கட்ட செயலுக்கு முயற்சித்து அதிலும் வெற்றிகொடி கட்டி  திருப்தி அடைவது.

நிலக்கரி எஞ்சின் புகை (இன்னும் மறக்க முடியலையே கம்பன் படுத்தி எடுக்கிறானே) இடுவது போல் அடுத்தவர் முகத்துக்கு நேராக பீடியை / சிகரெட்டை பத்தவைத்து புகைப்பது புகையிட்டு  முடித்தவுடன் காற்று அடிக்கும் திசையை எதிர்த்து காரி துப்புவது. அடுத்தவர் யார் அருகில் இருக்கிறார்கள் என்ற சொரனையற்று இருப்பது.

வயத்து வலிக்கு டாக்டரிடம்  காட்ட பஸ்ஸில் போனால் வயத்துவலி போய் தலைவலி வந்து விடுகின்றது அந்த அளவுக்கு பஸ்ஸில் ஓட்டுநரின் சுதந்திரம் வைத்திடும் பாட்டு காட்டுச் சத்தம். 

பாயிண்ட் டு பாயிண்ட் (PP) பஸ்ஸில் ஏறிக்கொண்டு நிற்காத இடத்தில் நிறுத்த சொல்லி வம்பு பண்ணுவது. பஸ்ஸில் இடம் இருந்தும்   தூக்கனைங் குருவி கூடு போல படிக்கட்டில் தொங்கி வருவது.

பஸ்ஸின் உள்ளே உட்கார்ந்து கொண்டு வாய் நிறைய வெத்திலையை போட்டுக்கொண்டு பஸ் வேகமாக போகும்போது வெத்திலை-பாக்கு போட்டு அறைத்த எச்சிலை அனைவருக்கும் மழைத் தூறலின் சாரலாய் ஸ்ப்ரே செய்வது.

துப்பாக்கி தோட்டாவிற்கு வெடி மருந்து நிரப்புவதுபோல் மூக்கிற்குள் மூக்கு பொடியை நிரப்பிவிட்டு  கையில் ஒட்டி இருக்கும் மீதிப் பொடியை  அகம்பக்கத்தவருக்கு இலவசமாக காற்றில் பரவ விடுவது.

இடுப்பில் கட்டவேண்டிய வேஷ்டியை சாராயத்தை குடித்துவிட்டு போதையில் தலையில் கட்டிக்கொண்டு மதுக்கடை வாசலில் குப்புற / மல்லாக்க கிடப்பது. தமிழக அரசின் டாஸ்மார்க் கடைகளுக்கு இலவசமாக விளம்பரம் தேடிக் கொடுப்பது, இதனையே ஒரு சிறந்த விளம்பரமாக அரசாங்கமே சர்டிபிகேட் கொடுக்கலாம் (இதனைத்தானே எதிர்பார்த்து திறந்து வைத்திருக்கிறார்கள்).

இரவில் குடித்து விட்டு நடுரோட்டில் அலம்பல் செய்யும் பார்ட்டிகளை வாகனங்கள் உராய்ந்து கொண்டு போவதை  பொதுமக்கள் உற்சகமாக ரசித்து கண்டுகழிப்பதும்.

சாராயம் குடித்தவன் தான் நடுரோட்டில் அப்படி நடந்து போகின்றான் என்று நாம் அலுத்துக் கொண்டே சென்றாலும் மெய்யாலுமே குடிக்காத நற்குடிமகன்கள் அதை மிஞ்சும் விதமாக நடுரோட்டில்தான் சுதந்திரமாக நடந்து செல்கின்றானர்.

இரவு நேரத்தில் வாகன ஓட்டுனர்கள் படுத்தும் அல்லல் இருக்கே ஹெட்லைட்டை போட்டு அமத்துவதும் அப்படி படுத்தும்பாடு இருக்கே அவ்வகையான செயல்கள் அவர்களின் சுதந்திரமென்றும் நம் போன்ற ஸெல்ஃப் டிரைவிங் பார்ட்டி கண்களின் பார்வையை சுதந்திரமாக பறிப்பார்கள்.

அதி(ரையில்)காலை பத்து மணிக்கு (தூங்கி வழிந்து கொண்டு) கல்லூரிக்கு போகும் கோஎஜுகேசன் பார்ட்டிகள் ரோட்டை (ECR) அடைத்துக்கொண்டு நாங்கள் செம்மறி ஆட்டுக்கு சளைத்தவர்கள் அல்ல என்பதை நிருபிப்பதுபோல் சலசலத்துப் போவது.

இவர்கள் சிங்கப்பூர் / துபாய் அல்லது வேறு நாடுகளுக்கு  போனால்  அங்கு உள்ள சட்டதிட்டங்களை மதித்து நடந்து கொள்கின்றனர் ஆனால் நம் நாடென்று வந்திட்டால் நாட்டிலிருக்கும் சட்ட திட்டங்களை நாமே மீறி நடந்து கொண்டால் நம்மை பொது மக்கள் / நம் செயலைப் பார்ப்பவர்கள் ஒரு ஹீரோவாக (hero) பார்ப்பதாக எண்ணிக்கொண்டு ஜீரோ (zero) தனமான வேலைகளை செய்வதில் முன்னோடியாக இருக்கின்றனர்.

சமீபத்தில் நான், சகோ ஜாகிர், மற்றும் அவரது மகனும் மனோராவுக்கு சென்று இருந்தோம் அங்கே மனோராவில் எங்களை  ஏறிப்பார்க்க அனுமதிக்கவில்லை காரணம் வலுவிழந்து விட்டது(!?) என்று கூறிவிட்டனர்.  இது மட்டும் காரணமல்ல அங்கு வருகின்றவர்கள் ஆண்/பெண் இருவரும் அவரவர்களின் பெயர்களை அல்லது விரும்பிய செயலை அந்தச் சுவற்றில் கிறுக்கி அதன் புராதன தன்மையை நாசம் செய்து விடுகின்றனர். இப்படியான கிறுக்கல் சிற்பிகள் !? ஒன்றை புரிந்து கொள்ள வேண்டும் சரபோஜி மன்னர் அந்த காலத்தில் எவ்வித நவீன வசதிகள் இல்லாத நிலையில் அழகிய இந்த கோபுரத்தை கம்பீரமாக கட்டி அவர் பெயரை அதில் கல்வெட்டில் பதிந்துள்ளார் அதை பார்க்க வரும் இந்த சுதந்திர இந்தியாவின் சுற்றுலா பார்ட்டிகள் ஒரு செங்கல் எப்படி செய்வது என்று கூட  தெரியாத இவர்களால் தன் பெயரை சுதந்திரமாக கிறுக்கி வைப்பதுதான் இந்த சுதந்திரம் கொடுத்த உத்திரவாதம் இவர்களுக்கு !!??

மேலே கண்ட அனைத்தையும்  பாமரன் தான் / பட்டிக்காட்டான் தான் செய்கிறார்கள் என்றில்லை படித்த நன்கு விபரம் அறிந்த அறிவீளிகளும் தங்களுடைய சுதந்திரத்திற்காக எதனையும் கட்டுப் பாடற்று செய்கிறான் / சொல்கிறான் தாய் மண்ணே வணக்கம் என்கின்றான் !

இந்த மண்ணையும் மனிதனையும் அகில உலகையும் படைத்த இறைவனை வணங்க வேண்டும் என்பது ஏன் இன்னும் இவர்களுக்கு  விளங்கவில்லை ???

- Sஹமீத்