பேறு பெற்ற பெண்மணிகள் - தொடர் - 3 7

மக்களுக்கேற்ற மார்க்கம்

"அல்லாஹு அக்பர்! அல்லாஹு அக்பர்! அல்லாஹு அக்பர்! கபீரா! லா இலாஹ இல்லல்லாஹு வல்லாஹு அக்பர்! வ லில்லாஹில் ஹம்து!"

இப்படி, மக்காவின் 'அரஃபாத்' பெருவெளியில் அனைத்துலகக் காப்பாளன் அல்லாஹ்வைப் பெருமைப் படுத்திப் புகழ்ந்தும் அவனது அருள்வேண்டி அபயக்குரல் எழுப்பியும் ஹஜ்ஜுப் பயணிகள் ஒரே குரலில், ஒரே மொழியில் எழுப்பிய ஓசை, மேலை நாட்டுச் சகோதரி ஒருவரின் இதயத்தை உருகச் செய்தது என்றால், அதன் காரணம் யாது?

"இறைவனின் இறுதித்தூதர்(ஸல்) அவர்களின் காலத்தை இது நினைவூட்டுகின்றது, ஹஜ் எனும் புனிதப் பயணத்தின் இறுதியும் உச்ச கட்டமுமாகிய 'அரஃபாத்'தில் அனைவரும் ஒன்று கூடும் இத்தருணத்தை விடப் பொருத்தமான வேறு அனைத்துலகச் சமாதான ஒன்றுகூடல் எங்கேனும் உண்டா ?"

"கருப்பர், வெள்ளையர், மஞ்சள் நிறத்தவர், மாநிறங் கொண்டோர், அரசர்கள், ஏழைகள், பணக்காரர்கள் - அனைவருமே ஒரே உடையில், ஒரே குரலில், ஒரே இறைவனைப் புகழ்ந்து இறைஞ்சும் புனிதக் கூட்டமைப்பன்றோ இது?!?

"மனிதர் அனைவரும் அமைதியை, சமாதானத்தை விரும்புகின்றனர். அது உண்மையில் இங்கல்லவா கிடைக்கின்றது?! இதைவிடப் பொருத்தமான தருணம் வேறு என்ன இருக்கிறது?"

இவைதாம், அப்போது பேறு பெற்ற பெண்மணியின் இதயக் குரல்கள்.

அது 1931ஆம் ஆண்டு, இங்கிலாந்தின் அரச் பதவி வகிக்கும் குடும்பத்தைச் சேர்ந்த செல்வி ஐரீன் ஜேன் வென்டவொர்த் ஃபிட்ஸ்வில்லியம், மதங்களின் ஒப்பீட்டுக் கல்வி (Study of Comparative Religions) பயில்வதற்காக எகிப்துக்குப் பயணமானார்.

அங்கே சென்று படிப்பைத் தொடங்கிய சில நாட்களிலேயே, இஸ்லாம் எனும் உண்மை மார்க்கம் இவரது இதயத்தை ஈர்த்தது. அதே ஆண்டிலேயே முஸ்லிமாக மாறி 'ஆயிஷா' என்ற பெயரைச் சூட்டிக் கொண்டார்!

1935ஆம் ஆண்டு ஹஜ்ஜுக் கடமையை நிறைவேற்றினார் ஆயிஷா, ஹஜ்ஜில் காணப்படும் அனைத்துலக ஒற்றுமை உணர்ச்சியைக் கண்டு வியந்து அடிக்கடி கூறுவார் ஆயிஷா. தன் தங்கை எவலினுக்கு இஸ்லாத்தை பற்றி எடுத்துரைத்து, அவரை இஸ்லாத்தை தழுவச் செய்தார்.

அண்ணல் பெருமானார்(ஸல்) அவர்களின் அழகான அறிவுப் பூர்வமான - துணிவான உண்மை மார்க்கப் பிரச்சாரத்தைப் பற்றி அடிக்கடி வியந்துரைப்பார் ஆயிஷா.

"எனது தாய்நாட்டு மக்களுக்குத் தேவையான அவர்கள் பின்பற்றத் தகுந்த துணிவு, நேர்மை, கழிவிரக்கம், அநீதியிழைத்தோரை அற்புதமாக மன்னிக்கும் தன்மை ஆகிய அனைத்தும் அப்பெருமகனாரிடம் குடிகொண்டிருந்தன. அவர்களிடம் இயல்பாக அமைந்திருந்த துணிவும், வல்ல இறைவன் மீது அசைக்க முடியாத நம்பிக்கையுமே, அவர்களை வெற்றிக் கொடி நாட்டச் செய்தன எனக் கூறினால், அது மிகையாது.

அந்த இறுதித் திருநபி அவர்கள்தாம் முதன்முதலாக எம் பெண்களின் சமூகத் தகுதியையும் மதிப்பையும் உயர்த்தியவர். இன்று கூடச் செஇல ஐரோப்பிய நாடுகளில் காணக் கிடைக்காத பெண்ணுரிமையினை 1400 ஆண்டுகளுக்கு முன் பெற்றுத் தந்தவர் இந்த நபியவர்கள்தாம்!

அயர்லாந்தின் அரச குடும்பக் கோட்டையைத் துணிவுடன் திறந்து வந்து, இஸ்லாமிய இன்பச் சோலையில் புகுந்த ஆயிஷா வென்டவொர்த் ஃபிட்ஸ்வில்லியம் பேறு பெற்ற பெண்மணிகளுள் ஒருவர்தானே!

உடன் பிறப்புகளுக்கு

"ஹாய்"

பதினாறு ஆண்டுகள் சவுதியில் முஸ்லிமாயிருந்து விட்டுத் தன் பெற்றோரையும் உறவினரையும் கண்டு மகிழ அமெரிக்காவுக்குச் சென்ற பாத்திமாவுக்குக் கிடைத்தது, இந்த வரவேற்புதான்!

அன்புடன் கூடி ஆரத் தழுவல் இல்லை! முகம் மலர்ந்த முத்தம் இல்லை! நாலைந்து பேர் கூடிய நல்விசாரனை இல்லை! காரணம்?

பதினாறு வயது பருவப் பெண்ணாயிருந்த போது, 1957ஆம் ஆண்டில், ஜெனரால் முஹம்மத் அமீன் என்னும் சவுதி விமானப் படை வீரரைக் கணவராகக் கைப்பிடித்து, ஜித்தாவில் இல்லற வாழ்வைத் தொடங்கினார் பாத்திமா.

அடுத்த பதினாறு ஆண்டுகள் சவுதியில் முஸ்லிம் பெண்ணாக வாழ்ந்துவிட்டுத்தான், தன் உறவினர்களைக் காண ஆவலும் அமெரிக்காவுக்கு வந்தார்.

ஆனால், அங்கு அவருக்குக் கிடைத்த வரவேற்பு, பெரிய ஏமாற்றத்தைக் கொடுத்தது.

ஆம்! நாகரிகத்தின் உச்சக்கட்டதில் இருக்கும் ஒரு சமுதாயத்தில் பிறந்து வளர்ந்துவிட்டு, அதற்கு மாற்றமான முஸ்லிம் பண்பாட்டில் முஸ்லிம் பெண்ணாக வாழ்ந்து, மீண்டும் தன் உறவினரை அந்த நாகரிகப் பண்பாட்டில் சென்று சந்திப்பது என்றால், அங்கிருக்கும் பலருக்கு அது வேடிக்கையாகவும் வெறுப்பாகவும்தானே இருக்கும்?

ஆனால், அந்த ஏமாற்றமான சூழ்நிலையிலும், பாத்திமா தன்னை ஆறுதல் படுத்திக் கொண்டு, தன் வீட்டாரிடம் இஸ்லாமிய அழைப்புப் பணியைத் தொடங்கினார்.

"ஏசு என்ற மனிதப் புனிதரை எப்படி உங்களால் கடவுளாக ஏற்றுக் கொள்ள முடிகிறது?" என்று கேட்டுவிட்டு, குர்ஆனில் இறைவன் கூறும் கீழ்காணும் வசனத்தை ஆங்கிலத்தில் படித்துக் காட்டினார் பாத்திமா. "அறிவார்ந்த ஆதாரமெல்லாம் அல்லாஹ்விடமே இருக்கின்றன. அவன் நாடியிருந்தால், உங்கள் அனைவரையும் திண்ணமாக நேர்வழியில் செலுத்தியிருப்பான் என்று (நபியே) கூறுவீராக!" வகையறியாது வாயடைத்துப் போன உறவினர்கள் மெளனமாக அவ்விடத்தை விட்டு அகன்றனர்.

சென்ற 1979 வரை தன் உறவினர்களுடன் தொடர்வு வைத்திருந்த பாத்திமா, தன்னுடன் பிறந்த ஒன்பது பேர்களுள் சகோதரி ஒருவரையும் சகோதரர் ஒருவரையும் மட்டும் முஸ்லிமாக மாற்ற முடிந்தது. சென்ற 46 ஆண்டுகளாக சவுதியில் வாழ்ந்து வருகின்றார்.

கடந்த சுமார் பத்தாண்டுகளாக இஸ்லாமியத்ட் தொண்டில் முழுமையாக தன்னை ஈடுபடுத்திக் கொண்டுள்ள பாத்திமா, தன் வீட்டில் வாரந்தோறும் புதிய முஸ்லிம்களை ஒன்று கூட்டி, அவர்களுக்கு இஸ்லாமியக் கல்வியறிவுடன் இஸ்லாமியப் பண்பாட்டினையும் பயிற்றுவிக்கின்றார்.

முஸ்லிமான ஒவ்வொருவரும் பெயரளவில் அன்றி, அன்றாட வாழ்க்கை நடைமுறையில் இஸ்லாமிய வாழ்க்கையை மேற்கொண்டு ஒழுகுவது பற்றிய பயிற்சியையும் அளிக்கிறார் பாத்திமா. குர்ஆனைத் 'தக்வீது' முறைப்படி ஓதும் பயிற்சியும் அவருடைய வீட்டில் நடத்தப் பெறுகின்றது!.

தொடரும்.. 

- அதிரை அஹ்மது

 ||| தொடர் - 1 ||| தொடர் - 2 |||

இந்த அருமையான புத்தகத்தை நம் அதிரைநிருபர் வலைத்தளத்தில் தொடராக பதிந்திட அனுமதி தந்த IFT நிறுவனத்தாருக்கு எங்கள் உளமார்ந்த நன்றியும் துஆவும் என்றும் நிலைத்திடும் இன்ஷா அல்லாஹ்...