அப்பாவுக்கு நேர்ந்த ஆபத்து...(உண்மைச்சம்பவம்) 35

வருடம் 1982ஆக இருக்குமென நினைக்கிறேன். அஃதொரு வறண்ட வெயில் காலம். ஊரின் குளங்களெல்லாம் மெல்ல மெல்ல வற்றி காய்ந்து தன் சேற்று மேனியில் கட்டம் போட்டு கடல்பாசி வெட்டிக்கொண்டிருந்த நேரம் அது. ஆழ்குழாய்க்கிணறுகள் எல்லாம் ஊரில் எங்கோ அங்கொன்றும் இங்கொன்றுமாக இருந்திருக்க வாய்ப்புண்டு.

ஈன்றெடுத்த ஒரே மகளும் தன் கணவனின் உத்யோகத்தாலும், வேண்டுதலாலும் பாசமிகு பெற்றோர்களை கவனிக்க வீட்டில் வேலைக்கு ஒரு பெண்ணை நியமித்து விட்டு மன இறுக்கத்துடன் மகளும் தன் குழந்தைகளுடன் திருச்சிக்கு இடம் பெயர நேர்ந்தது.

வீட்டு வேலை செய்யும் பெண்ணின் கவனிப்பிலும், வீட்டிற்கு மகன்களின் மற்றும் அவர்களின் துணைகளின் அடிக்கடி வருகையாலும் வயதான தாய், தந்தையின் வாழ்க்கை மெல்ல மெல்ல சிரமங்கள் பெரிதின்றி நகர்ந்து கொண்டிருந்தது. அக்கால இரவு நேர வீடுகளில் அரிக்கலாம்பும், முட்டை விளக்கும், குத்து விளக்கும் ஆட்சி செய்து வந்த நேரம். மண்ணெண்ணெய் இல்லாத வீடுகள் இருந்திருக்க வாய்ப்பில்லை.

பரந்த நீர் நிறைந்த குளத்தில் அங்கொன்றும் இங்கொன்றுமாக தாமரைப்பூ பூத்திருப்பது போல் ஊரில் அங்கொன்றும் இங்கொன்றுமாக ஓட்டு வீடுகள் சூழ நடுவே மாடி வீடுகள் ஒரு சில இருந்த சமயம் அது. பணங்காசுகள் எல்லோரிடமும் பற்றாக்குறையாகவே இருந்து வந்தாலும் பாசமும், நேசமும், அன்பும், பண்பும் அபரிமிதமாக இருந்து வந்த காலம் அது.

கடிதப்போக்குவரத்துகளெல்லாம் கொடி கட்டிப்பறந்து பாசங்கள் இங்குமங்குமாக பரிவர்த்தனைகள் செய்து கொண்டிருந்த நேரம்.

குதிரை வண்டிகளெல்லாம் அதன் அடிப்பக்கம் தொங்கும் சாக்கில் நிரப்பப்பட்ட புற்கள் காண்போருக்கு நிரை மாத கர்ப்பிணி போல் தோற்றமளித்து கொலுசுக்கு மாறாக சலங்கை ஒலி எழுப்பி குதூகலமாய் தெருதோரும் ஓடிக்கொண்டிருந்த காலம் அது.

எது எப்படியோ? தொழுகையின் நேரங்கள் ஒலி பெருக்கியில் பாங்காய் ஒலித்தாலும் அல்லது நகரா மூலம் முழங்கினாலும் பெரியவர் முதல் சிறியவர் வரை ஐங்கால தொழுகையை சங்கையுடன் நிறை வேற்றியே வந்தனர்.

பாச மகளைப்பிரிந்து வாழும் அந்த பெரியவரும் எது எப்பாடானாலும் தவறாது ஐங்கால தொழுகையை நிறைவேற்றி வருவதுடன் அதிகாலைத் தொழுகைக்கு முந்தைய தொழுகையான தஹஜ்ஜத் தொழுகையையும் சிறப்புடன் பல வருடங்கள் நிறைவேற்றி வரும் பழக்கமுடையவர்களாக இருந்து வந்தார்கள்.

குழாயைத்திறந்தால் படுக்கையறையிலேயே வெந்நீரும், குளிர்ந்த நீரும் பவ்வியமாய் அருவி போல் கொட்டும் இக்காலம் போல் அல்ல அக்காலம். தண்ணீர் தேவைகளுக்கு கொல்லைப்புறமுள்ள கிணற்றடிக்கே வந்தாக வேண்டும் அது எந்த நேரமாக இருந்தாலும் சரி.

அயர்ந்த உறக்கத்தை முறித்துக்கொண்டு அவரும் எழுந்து விட்டார் அதிகாலை 3 மணியளவில் அந்த அல்லாஹ்வை தொழுது நிற்க. காது கேளாத, வாய் பேச இயலாத வயதான மனைவியும் உறங்க, அவர்களுக்கு துணையாய் வேலை செய்யும் பெண்ணும் உறங்கிக்கொண்டிருக்க யாருமறியா வண்ணம் கொல்லை கதவை திறந்து வெளியே வந்து அங்கு மின் விளக்கின் வெளிச்சம் இருந்ததோ? இல்லை நிலா வெளிச்சம் தந்ததோ? தெரியவில்லை ஒழு செய்ய கிணற்றடிக்கு வந்து விட்டார் அந்த பெரியவரும்.

கிணற்றின் சுற்றுச்சுவரும் கொஞ்சம் உயரம் குறைவாகவே இருந்திருக்கிறது. வழக்கம் போல் கிணற்றிலிருந்து தண்ணீர் எடுக்க கயிற்றை பற்றிப்பிடித்தவர் கால் இடறி வழுக்கி யாருமறியா வண்ணம் கிணற்றுக்குள் விழுந்து விட்டார் அந்த பெரியவர். இறைவனின் கிருபையால் தன்னை வணங்க இவ்வளவு சிரத்தை எடுக்கும் அந்த வயதான பெரியவருக்கு கிணற்றுக்குள் நெஞ்சளவே இருக்குமாறு தண்ணீரை தேக்கி வைத்திருந்தான் இறைவன் அச்சமயம். இருண்ட கிணற்றுக்குள் அந்த இறைவனே துணையாய் இருந்திருப்பான் பெரியவருடன்.

கிணற்றுக்குள் விழும்பொழுது பக்கவாட்டு சுவர்கள் பெரியவரின் தலையை நன்கு பதம்பார்க்காமல் இருக்கவில்லை. நெஞ்சளவு நீரில் நிலைகுலைந்து செய்வதறியாது தவித்து நின்ற அப்பெரியவரின் தலையிலிருந்து ரத்தம் சொட்டிக்கொண்டே கிணற்று நீரின் நிறத்தை மெல்ல மெல்ல சிகப்பு நிறமாக மாற்றிக்கொண்டிருந்தது.

தாம் கிணற்றுக்குழ் விழுந்து கிடப்பது மெல்ல மெல்ல சுய நினைவுக்கு தெரிய வர பகல் பொழுதில் வெளியில் நின்று சப்தம் போட்டாலே காதுகேளாமல் அயர்ந்து தூங்கும் மக்களுக்கு மத்தியில் அதிகாலைக்கு முன் கிணற்றுக்குள் இருந்து சப்தமிட்டால் எவருக்கு கேட்டு விடப்போகிறது? (கொஞ்சம் சப்தம் குறைவாக டெலிபோனில் பேசினாலே கிணற்றுக்குள் இருந்து பேசுவது போல் விளங்குகிறது என்பார்கள் இக்காலத்தில்)

அந்த பெரியவரும் தன் முயற்சியை கைவிட வில்லை. பாவம் இடையிடையே கொஞ்சம் ஓய்வு எடுத்து உதவிக்கு யாரும் வரமாட்டார்களா? என்ற நம்பிக்கையில் வீட்டின் வேலை செய்யும் பெண் விழித்தெழுந்து காலை ஆறு மணிக்குப்பிறகு கொல்லையை சுத்தம் செய்ய வரும் வரை 'பாத்தும்மா, பாத்தும்மா' என்ற சப்தம் மட்டும் கிணற்றிலிருந்து வந்து கொண்டே தான் இருந்திருக்கிறது.

அந்த பெண்மணியும் காலையில் எழுந்து நேரம் ஆகி வழக்கம் போல் கொல்லைப்புறம் வரும் சமயம் எங்கிருந்தோ வேதனையான ஒரு முணகல் சப்தம் கேட்கிறதே? அது எங்கிருந்து கேட்கிறது? என்று நாலாப்புறமும் சுற்றிப்பார்த்து மெல்ல மெல்ல கிணற்றின் பக்கம் வந்து அதற்குள் உற்றுப்பார்க்க செந்நீரின் நடுவே வீட்டுப்பெரியவரே உதவி கேட்டு அதற்குள் நிற்பது அறிந்து அதிர்ந்து போய் அப்படியே அவர்களை விட்டு விட்டு வெளியில் சென்று சில ஆண்களின் உதவி கேட்டு அவர்களை அழைத்து வந்து கிணற்று வாளியை இறக்கி  பெரியவரை அமரச்சொல்லி மெல்ல மெல்ல கயிற்றை மேலிழுத்து அவர்கள் வெளிக்கொண்டு வரப்பட்டார்கள்.

சுமார் அதிகாலை 3 மணியிலிருந்து காலை 7, 8 மணிவரை கிணற்றுக்குள் ரத்தக்கசிவுடன் வாழ்க்கைப்போராட்டத்தில் இருந்து வெளிக்கொண்டு வரப்பட்ட அந்தப்பெரியவர் பிறகு குடும்பத்தினர் உதவியுடன் முறையே சிகிச்சை அளிக்கப்பட்டு  இன்னும் சில காலம் உலகில் வாழ இறைவனால் அருளப்பட்டது.

பிறகு காயங்கள் மறைந்து தழும்புடன் நலம் பெற்ற பின் தன் மகளையும், பேரப்பிள்ளைகளையும் காண காய்,கறிகளுடன் திருச்சிக்கு வந்து சேர்ந்தார்கள். அவர்கள் அங்கு வந்த பின் தான் மகளுக்கே நடந்த சம்பவங்கள் தெரியவரும். ஒரு வேளை உடனே கேள்விப்பட்டு மன வேதனையடையாமலிருக்க சம்பவம் குடும்பத்தினரால் மறைக்கப்பட்டிருக்கலாம். தொலைத்தொடர்புகளும் அவ்வளவாக வளர்ந்திராத காலம் அது.

இதுவே என் அப்பாவிற்கு அவர்கள் வாழ்வில் நேர்ந்த பேராபத்து.

அவர்கள் தான் நமதூர் காதிர் முகைதீன் கல்லூரிக்கு எதிரே அமைந்துள்ள எம்.எஸ்.எம். நகரை உருவாக்கிய மர்ஹூம் ஹாஜி. மு.செ.மு. முஹம்மது அபுல்ஹசன் அப்பா ஆவார்கள்.

காலம் சென்ற அன்னாரின் அவர்களின் துணைவியாரின் இன்னும் காலம் சென்ற எத்தனையோ நம் குடும்ப, ஊர் பெரியவர் முதல் சிறியவர்கள் வரை அனைவரின் பாவங்களையும் மன்னித்து அவர்களின் கப்ருகளை சுவர்க்கத்தின் பூஞ்சோலையாக ஆக்கி வல்ல ரப்புல் ஆலமீன் அவர்களுக்கெல்லாம் நல்லருள் புரிவானாக....ஆமீன்.....

சொல்ல வந்த சேதி: எது வேண்டுமானாலும் எப்பொழுதும் சம்பவிக்கலாம் என்றிருக்கும் சூழ்நிலையில் வயதான தாய், தந்தையரை பெற்ற பிள்ளைகள் அல்லது அவர்களில் யாரேனும் ஒருவர் கடைசி வரை பொறுப்பேற்று உடனிருந்து கவனிப்பதே நல்லது. உடன் இருந்து கவனிக்க இயலாதவர்கள் அவர்களை அருகில் இருந்து கவனித்து வருபவர்களுக்கு வேண்டிய உதவிகளை தாராளமாக செய்ய கடமைப்பட்டுள்ளனர்.

பெற்றக்கடனுக்கு இது கூட செய்யவில்லை என்றால் எப்படி???

நெஞ்சம் நெகிழும் நினைவுகளுடன்....

-மு.செ.மு. நெய்னா முஹம்மது