சகோதரியே! - புதிய தொடர்... முன்னுரை ! 32

அல்லாஹ்வின் திருப்பெயரால்...

முன்னுரை..

அன்பார்ந்த சகோதர, சகோதரிகளே! (அஸ்ஸலாமு அலைக்கும் (வரஹ்) -(இறைவனின் சாந்தியும்,சமாதானமும் தாங்கள் அனைவர் மீதும் என்றென்றும் நிலவட்டுமாக!)

தாங்கள் அனைவரும் மிக ஆர்வமாகக் கேட்டுக்கொண்டு இருந்த இந்தத் தொடரை அனைவருக்கும் தெளிவாக புரியும்படி எழுத வேண்டும் என்பதாலும், மேலும் தொடருக்காக நிறைய விஷயங்கள் தேவைப்படுவதாலும் தாமதித்து வந்தேன். ஆனால் இந்த அவசர உலகத்தில் எல்லாவற்றையும் தயார் செய்து வைத்துக் கொண்டு  எழுத வேண்டும்  என்றால் தொடரைத் தொடங்கவே முடியாது என்பது என் மனதிற்கு தோன்றியதால் வல்ல அல்லாஹ்வின் மேல் நம்பிக்கை வைத்து அல்லாஹ்வின் திருப்பெயரால் தொடரைத் தொடங்குகிறேன்.

தொடரைத்  தொடங்குவதற்கு முன் என் வாழ்வில் நடந்த நிகழ்வுகள் பற்றி சில வரிகள்: (சொல்வதற்கு காரணம் இருக்கிறது): எனக்கு தலை (முதல் குழந்தை) மகள் பிறந்த செய்தி கேட்டு நான், என் மனைவி, என் குடும்பத்தார்கள், மனைவியின் குடும்பத்தார்கள் எல்லோரும் மிகுந்த மகிழ்ச்சி அடைந்தோம். அல்ஹம்துலில்லாஹ்!

என் மனைவியின் சகோதரிகளுக்கு ஆண் பிள்ளைகள் இருந்தும் மீண்டும் ஆண் பிள்ளைகளாகப் பிறந்ததால் ஒரு வித (ஆண் பிள்ளைகளின் மேல் எந்தக்காலத்திலும் தாய்மார்கள் வெறுப்பு அடைவதில்லை) சலிப்பு என் மனைவியின் மூத்த சகோதரிக்கு. இந்த நேரத்தில் என் மகள் வந்து பிறந்ததால் நர்ஸ்களுக்கு அன்பளிப்பாக பணம் கூட கொடுத்தார்களாம். (பெண் பிள்ளை பிறந்த செய்தி கேட்டு பணமும் கொடுப்பார்களா? என்ன? என்று கேட்கிறீர்களா?). 

இரண்டாவது குழந்தை, எல்லோருக்கும் ஆண் பிள்ளைதான் பெற வேண்டும் என்ற எதிர்பார்ப்பு, அனைவரும் துஆச் செய்தார்கள். வல்ல அல்லாஹ்வின் நாட்டப்படி பெண் குழந்தை பிறந்தது. எல்லோருக்கும் ஏமாற்றமே. தாயும், சேயும் நலமாக இருக்க வேண்டும், என்பதே என்னுடைய பிரார்த்தனையாக இருந்ததால் எனக்கு எந்தவொரு ஏமாற்றமும் இல்லை. மகிழ்ச்சியே! அல்ஹம்துலில்லாஹ்!

மூன்றாவது குழந்தை உருவானது. மீண்டும் குடும்பத்தார் அனைவரின் துஆ, ஆண் குழந்தை பெற வேண்டும் என்ற ஆவல். என் துணைவியாருக்கும் ஆண் பிள்ளை வேண்டும் என்ற ஆசையும் துஆவும். ஆண் பிள்ளைதான் பெறுவாய் என்று பார்த்த அனைவரும் சொன்னார்களாம். இந்த மூன்றாவது குழந்தை வயிற்றில் இருக்கும் பொழுது வல்ல அல்லாஹ்வின் அருளால் ரமலான் மாத நோன்பை முழுமையாக வைக்கும் பாக்கியம் கிடைத்ததில் மிகுந்த மகிழ்ச்சி என் துணைவியாருக்கு. நிமிடங்கள் நாட்களாகவும், நாட்கள் மாதங்களாகவும் நகர்ந்தன.

9 மாதங்கள் முடிந்து 10வது மாதம் நெருங்கியது. . .

இன்ஷாஅல்லாஹ் வளரும் ...

-S.அலாவுதீன்