இஸ்லாமியப் பொருளாதாரச் சிந்தனைகள்... தொடர் - 9 25

தொடர் ஒன்பது

இசங்களும்  பொருளாதார இயலும்

சோசலிசம் :-

ரஷ்யப்புரட்சிக்குப் பிறகு உலகெங்கும் அதே பாணியில் பொதுவுடைமைக் கருத்துக்கள் கோலோச்சிய பொருளாதாரக் கோட்பாடுகள் உலக அரங்கில் செல்வாக்குப் பெற ஆரம்பித்தன.  ஓரளவுக்கு சுருக்கமாக  சொல்லப் போனால் கம்யூனிசத்தின் இந்திய எடிசன்தான் சோசலிஸம். இந்திய மதசார்பற்ற  சோஷலிச ஜனநாயகக் குடியரசு   ( SECULAR SOCILAIST DEMOCTATIC REPUBLIC OF INDIA ) என்பதுதான் இந்தியாவின் அரசியல் நிர்ணய சபை இந்தியாவுக்கு சூட்டிய பெயர்.  

ரஷ்யப் புரட்சியின் போது நடந்த வன்முறைகளை ஓரம்கட்டிவிட்டு நாட்டு மக்களுக்கு ஜனநாயக உரிமைகளைக் கொடுத்து – அந்த ஜனநாயக முறைகளின் பெயரால் சாத்வீக முறையில் தனியார் உடைமைகளை சமூகத்துக்கு சொந்தமாக எடுத்துக் கொண்டு திட்டமிடல், உற்பத்தி, விநியோகம் ஆகியவற்றை அரசே மேற்கொண்டு  செய்யும் பொருளாதார முறையே சோசலிசம் என்று சுருக்கமாக விவரிக்கலாம். மக்களுக்குள்ள உரிமைகளை மதிப்பது, ஏற்ற தாழ்வைக் குறைப்பது, வரிகள் தரும் வருமானங்கள் மூலம் நாட்டை ஆள்வது ஆகியவை சோசலிசத்தின் அம்சங்கள்.

A POLITICAL AND ECONOMIC THEORY OF THAT ADVOCATES THAT THE MEANS OF PRODUCTION, DISTRIBUTION & EXCHANGE SHOULD BE OWNED AND OR REGULATED  BY STATE. 

இத்தகைய முறைகளில் இந்தியாவில் சோஷலிச நடவடிக்கைகள் பண்டித ஜவர்ஹர்லால் நேரு பிரதமாக இருந்த காலம் தொட்டு  ஐந்தாண்டுத்த் திட்டங்கள் மூலம் ஆரம்பித்தனர். அரசின் முதலீட்டில் பெரும் தொழில்கள் தொடங்கப்பட்டன. அதைத்தொடர்ந்தும் வந்த பிரதமர்களால் ஜமீன்தாரி முறை ஒழிக்கப்பட்டது; முன்னாள் அரச குடும்பங்களுக்கு  வழங்கப்பட்ட இராஜ மானியம் நிறுத்தப் பட்டது;  நில உச்ச வரம்புச் சட்டங்கள் நிறைவேற்றப் பட்டன; பெரிய வங்கிகள் நாட்டுடைமையாக்கப்பட்டன; போக்குவரத்து நாட்டுடமையாக்கப்பட்டது. அனல் மின் நிலையங்கள், பாய்லர் தொழிற்சாலைகள், நிலக்கரி சுரங்கங்கள், இரயில்  பெட்டி  தொழிற்சாலைகள் போன்ற பெரும் தொழிற்சாலைகளை அரசே தனது மூலதனத்தில் நடத்திடத்தொடங்கியது.   

அரசே நடத்திய அலட்சிய நிர்வாகம் காரணமாக பல அரசுத் தொழில்கள் நஷ்டங்களை சந்தித்தன.  தொழிலாளர்களின் பொறுப்பற்ற தன்மையின் காரணமாக ‘மணியடித்தால் சாப்பாடு மாதம் முடிந்தால் சம்பளம்’ என்கிற மனப்  போக்கு காரணமாக உற்பத்திக் குறைவு ஏற்பட்டது. சோஷலிசம் என்பது பார்ப்பதற்கு ஒரு அலங்கார பொ ம்மையாகவும் பழகினால்  கையைக் கடிக்கும் கரடியாகவும் பொருளாதார ரீதியில் உணரப் பட்டது. 

இன்றும் கூட அரசின் நிறுவனங்கள் நஷ்டக்கணக்கைத்தான் காட்டிக் கொண்டிருக்கின்றன. ஆகவே   பொருளாதார ரீதியில் வெற்றிபெறாத ஒரு  கோட்பாடே சோஷலிசம். அதனால்தான் இன்றைய அரசு தனியார்துறைகளுக்குப் பல தொழில்களைப் பாட்டாப் போட்டுக் கொடுக்க ஆரம்பித்து இருக்கிறது.  

கம்யூனிசம் அல்லது பொது உடைமைக் கொள்கை. :-

பார்ப்பதற்கு கம்யூனிசம் என்பது கிட்டத்தட்ட சோசலிசம் போலத்தோன்றும் ஆனால் அடிப்படையில் தனியாரிடம் இருக்கும் உடைமைகளை சாத்வீக முறையில் சட்டப்படி அரசு எடுப்பது சோசலிசம் ; அப்படி எடுக்கும்போது அதுவரை அந்த சொத்துக்களை வைத்து இருந்தவனுக்கு நாலு அடியைக் கொடுத்து அல்லது அவனை அழித்து ஒழித்துவிட்டு எடுத்துக் கொள்வது கம்யூனிசம். 

“இருப்பவன் தரமாட்டான் இல்லாதவன் விட மாட்டான்” என்பது புகழ்பெற்ற கம்யூனிச கோஷம். தனியாரிடம் இருந்த சொத்துக்களைப் பிடுங்கி நாட்டுக்கு சொந்தமாக்கி அவரவர் உழைப்புக்கன்றி  அவரவர் தேவைக்குத் தருவது – பங்கீடு செய்வது கம்யூனிசம். இதை சாந்தமாக செய்ய முடியாது என்பதால் அரசே வன்முறைகளை கையிலெடுத்து அடக்குமுறையால்- தனி மனித உரிமைகள் மற்றும் உணர்வுகளை அடக்கி ஒடுக்கி – ஆளும் கோட்பாடே கம்யூனிசம். 

ஒரு புகழ்பெற்ற நகைச்சுவை கேள்விப்பட்டதுண்டு. 

மூன்று நாய்கள் ஓரிடத்தில் சந்தித்தன. ஒன்று அமெரிக்க நாய்; மற்றது இந்திய நாய்; இன்னொன்று ரஷ்ய நாய். 

அமெரிக்க நாயை மற்ற நாய்கள் கேட்டன “ எங்கே இந்தப் பக்கம்?” 

அமெரிக்க நாய் சொன்னது “ எங்கள் நாட்டில் உணவு அதிகம். நான் நிறைய சாப்பிட்டு விட்டேன். சாப்பிட்ட உணவு செறிப்பதர்க்காக சற்று ஓடினால் நலமென்று தோன்றியது ஆனால் வழி தவறி இப்படி வந்துவிட்டேன் . ஆமாம் நீ எங்கே இந்தப் பக்கம் ?” என்று இந்திய நாயைக் கேட்டது.

இந்திய நாய் சொன்னது. “ எங்கள் நாட்டில் உணவுப் பஞ்சம் சாப்பிட ஒன்றும் கிடைக்கவில்லை . அதனால் ஏதாவது சாப்பிடக்கிடைக்குமா என்று தேடித் பார்த்துக் கொண்டே வந்தேன். ஆமாம் நீ எங்கே இந்தப் பக்கம்?” என்று ரஷ்ய நாயைக் கேட்டது.  என்றது.   

ரஷ்ய நாய் சொன்னது “ எனக்கு எதுவும் பிரச்னை இல்லை. அளவோடு சாப்பாடெல்லாம் கிடைக்கிறது. ஆனால் எங்கள் நாட்டில் வாய்விட்டு குரைக்கக் கூட முடியவில்லை . அதனால்தான் இவ்வளவு தூரம் ஓடி வந்தாவது ஆசை தீர லொள் லொள் என்று  குரைத்துவிட்டுப் போகலாமென்று வந்தேன் “ என்றதாம். கம்யூனிச நாடுகளில் தனிமனித சுதந்திர உணர்வுகள்  இந்தப்பாடுதான் பட்டன. 

கம்யூனிசம் என்கிற கோட்பாடு இனம், நிறம், நிலம், மொழி ஆகிய வேறுபாடுகளைக் களைந்து ஓர் சமுதாய அமைப்பை நிறுவிட உண்மையில் விரும்பியது. ஆனால் பிள்ளையார் பிடிக்கக் குரங்காக  முடிந்த கதையாக கம்யூனிசம் மனித இனத்தை மனித இனத்துக்குரிய இயல்புகளால் பிணைக்க இயலவில்லை. மாறாக, மனித இனத்தை வர்க்க பேதம் என்கிற கோட்பாட்டால் கூறு போட்டது. கம்யூனிசம் காலூன்ற வேண்டுமானால் இருப்பவரை இல்லாதார் வெறுக்க வேண்டுமென்ற தன்மை அவசியமானது. மனித இனத்தை, இருப்பவர், இல்லாதவர் என்ற இரண்டு பிளவுகளாகப் பிளந்து இல்லாதவரை ஏவி, இருப்பவர் மீது கோபமும் பொறாமையும் கொள்ளச்செய்து  கம்யூனிசம் தன்னைத் தக்க வைத்துக் கொள்ள வேண்டியதாயிற்று. மனிதர்களின் கீழான மிருக குணங்களை வளர்த்துவிட்டுத்தான் கம்யூனிச கோட்பாடு உயிர்வாழவேண்டி வந்தது. 

இந்த மிருக குணங்களின் தன்மைகளான உணவு, உடை , உறைவிடம், ஆகியவற்றையே இந்தக் கொள்கைகளைக் கொண்ட நாடுகளும் சமுதாயங்களும் பெரிதாகக் கருதின. இவற்றிற்கெல்லாம் அப்பால் மனிதனுக்குள் இருக்கும் புனிதமான நற்பண்புகளையும், ஆன்மீக நெறிகளையும், சிறந்த குணாதிசயங்களையும் பார்த்திடவோ அங்கீகரிக்கவோ இயலவில்லை. கம்யூனிச வரலாறு என்பது சோற்றுக்கு போடும் கூப்பாடு அல்லாமல் வேறொன்றுமில்லை என்று ஆகிவிட்டிருந்தது.  

கம்யூனிச சமுதாயம் இறை மறுப்பைக் கொண்ட சமுதாயம். இந்த உலகம் தானாகத் தோன்றியது அல்லது இயற்கையாகவே உருவானது என்று நம்பும் அல்லது நம்பவைக்கப்படும் சமுதாயமாகும். இதனால் இறை வழிபாட்டுத்தலங்கள் பூட்டிவைக்கப்பட்டன.  மனித வரலாறு என்பது பொருளாதார போராட்டத்தால் ஆனது என்பது கம்யூனிசத்தின் ஆணிவேர். உற்பத்தி செய்வதும் உற்பத்தியானதை பங்கிட்டு உண்டுவாழ்வது மட்டுமே வாழ்க்கை என்கிற உப்பு சப்பற்ற கொள்கையே கம்யூனிசம். விலங்கினங்களுக்கு எப்படி உணவும் உறைவிடமும் தேவையோ அவை இருந்தால் போதும் என நினைக்கவைக்கும் சித்தாந்தம். மக்கள்  தங்களின் தனித்தன்மையை ஒரு போதும் வெளிப்படுத்த இயலாத  , சொத்து சேர்க்க இயலாத, விரும்பும் தொழிலை தேர்ந்தெடுக்க இயலாத மனித இனத்துக்கு ஒரு இயந்திரத்தன  வாழ்வை கற்றுத்தரும் கோட்பாடே கம்யூனிசம். 

இவ்வளவு   மோசமான இந்த கம்யூனிசம் தான் தோன்றிய இடத்திலேயே  அழிந்தது. வீழ்ந்தது.  வரலாற்றின் ஏடுகளைப் புரட்டிப் பார்க்கும் யாரும் சில சம்பவங்களை மறந்துவிட இயலாது. சில கோட்பாடுகள் , சில மதங்கள் உலகில் ஒரு குறிப்பிட்ட பகுதிகளில் உருவாகும். ஆனால் நல்ல மாடாக இருந்தால் உள்ளூரிலேயே விலை போய்விடுமென்று சொல்வார்களே அப்படி உள்ளூரில் அந்த மதங்கள் அல்லது கோட்பாடுகள் வெற்றி பெற இயலாது போயின.  புத்த மதமும் ஜைன  மதமும் இந்தியாவில் உருவாயின. ஆனால் இந்தியாவில் இவை நிலை பெறவில்லை. அதே போல்தான் கம்யூனிசம்  ரஷ்யாவில் உருவாகி, சீனாவில் பரவி, உலகின் பல பாகங்களில் தனது வேர்களைப் பரப்பினாலும் இன்று தோன்றிய இடத்திலும் பரவிய இடத்திலும் அழிந்து ஒழிந்த சித்தாந்தமாக ஆகிவிட்டது. 

இன்றைய நிலையில் கம்யூனிஸ கோட்பாடுகள் என்பவை  நினைவுச்சின்னம் ஆகிவிட்ட ஒன்றாகிவிட்டது.  சிலர் போட்டுக்கொண்டு திரியும் சிவப்புத்துண்டுகளும் விரைவில் சாயம் போய்விடும். சித்தாந்தமே போய்விட்டது சிகப்புத்துண்டா நிலைக்கப் போகிறது?

அன்பானவர்களே! இதுவரை உலகில் தோன்றிய மதங்கள், பல கோட்பாடுகள் ஆகியவற்றின் பொருளாதார அம்சங்களை அறிமுகமாக விவாதித்தோம். 

இனி என்ன? இஸ்லாம்தான். வரும் வாரங்களில் இன்ஷா அல்லாஹ் இஸ்லாமியப் பொருளாதாரச் சிந்தனைகள் மற்றும் இதர  கோட்பாடுகளுடனான ஒப்பீடுகளை காண்போமாக.

இன்ஷா அல்லாஹ் தொடரும்...

இபுராஹீம் அன்சாரி