இஸ்லாமியப் பொருளாதாரச் சிந்தனைகள் – தொடர் - 13 20

தொடர் : பதிமூன்று

படைத்தவன் படைத்தது பற்றாக்குறையா? தொடர்ச்சி...

பற்றாக்குறை , பஞ்சம் வறுமை ஆகிய சூழ்நிலைகளில் இஸ்லாம் கூறும் தீர்வு என்ன ? இருப்பதைப் பகிருங்கள். இருப்பவர்கள் இல்லாதோர்க்கு உதவிடுங்கள் பற்றாக்குறையும் பஞ்சமும் வறுமையும் பறந்தோடிவிடும் என்பதே வாழ்க்கை நெறியான இஸ்லாம் காட்டும் பொருளாதார வழி. இதை  சாதிப்பதும் நிலை நிறுத்துவதும் வன்முறையால் அல்ல ; அன்பாலும் ஆன்மீக உணர்வாலும் இறை அச்சத்தாலும் மறுமையின் தேட்டத்தாலுமே. 

அருள்மறை கூறுகிறது 

"தங்களுக்குத் தேவை இருந்தபோதிலும் சரி, தங்களைவிடப் பிறரையே அவர்கள் தேர்ந்தெடுத்துக் கொள்வார்கள்" ( அல் ஹஷ்ர்  59:9) . 

இந்தப் பண்பாட்டில் திளைத்த சஹபாக்கள் உடைய தியாக  வரலாறுகள் குவிந்து கிடக்கின்றன.  

வறுமை தாண்டவமாடிய ஒரு காலகட்டத்தில், ஒரு சஹாபிக்கு மற்றொருவர் ஒரு ஆட்டுத்தலையை அனுப்பிவைத்தார். அதைப் பார்த்த அந்த  சஹாபி  இந்த ஆட்டுத்தலை  என்னைவிட வறுமையில் வாடும்  இன்னொரு சஹாபிக்குப் போனால் உதவியாக இருக்கும் என்று அவரிடம் அனுப்பி வைத்தார். அந்த இன்னொருவர் அதேபோல் எண்ணி மற்றவருக்கு அனுப்பிவைத்தார். அந்த மற்றவரும் இன்னொரு ஏழை சஹாபிக்கு அனுப்பி வைத்தார். இப்படியே  ஏழுபேர்களிடம் சுற்றி சுற்றி சென்ற  அந்த ஆட்டுத்தலை முதலாவதாக அனுப்பட்ட சஹாபி இடமே திரும்பவும் வந்து சேர்ந்தது. 

விருந்தாளியாக வந்த வறுமை நிறைந்த ஒருவருக்கு உணவளிப்பதற்காக தனது குழந்தைகளை ஓர் இரவு பட்டினி இருக்கச் செய்துவிட்டு விரைவில்  விளக்கை அணைத்து அவர்களை உறங்க வைத்துவிட்டு ஏழை விருந்தாளியின் வயிறை நிரப்பி அனுப்பிய மற்றொரு நபித்தோழரின்  வரலாற்றையும் படித்து கண்ணீர் வடிக்கிறோம். 

பிறருக்காக தங்களது தற்காலிகத் துயரங்களைத் தாங்கிக்கொண்டு , இருப்பதைப் பகிர்ந்து கொள்ள வழிவகுக்கும் இஸ்லாமியப் பொருளாதாரத்தில் பற்றாக்குறை எங்கே வருகிறது?  படைத்தவனின் வழிகாட்டலில் வறுமை வந்த வழி சென்றுவிடுகிறது ; பற்றாக்குறை பறந்து போய்விடுகிறது. அல்ஹம்துலில்லாஹி  ஷுக்கூர் அகிலமெங்கும் முழங்குகிறது. 

செல்வத்தையும் சுகத்தையும் பங்கு போட்டு வாழ்வதுதான் உயரிய பொருளாதார வாழ்வு என்று எண்ணிக்  கொண்டு இருப்பவர்களுக்கு வறுமையையும் கஷ்டங்களையும் பங்கு போட்டுக் கொள்வதும்  இறைவனுக்குப் பொருத்தமான  பொருளாதார வாழ்வுதான்  என்பதை புரியும்படி சொல்லிக் கொடுக்கிறது இஸ்லாம்.  ஆன்மிகம் கலந்த, அனைவருக்கும் அனைத்தும் என்பதே  இஸ்லாம் தரும் பொருளாதாரம். பற்றாக்குறை நிலவும் சமூகத்தில் சட்டத்தினால் , வன்முறையால் சாதிக்க இயலாததை ஆன்மீகத்தால்,  சகிப்புத்தன்மையால்,  பகுத்துண்டு பல்லுயிர் ஓம்புவதால்   சாதிக்கலாம் என்று  சான்று பகரும் சரித்திரங்கள் பல நிரம்பியது இஸ்லாம். 

அதுமட்டுமல்ல. “உண்ணுங்கள் ! பருகுங்கள்!  வீண் விரயம் செய்யாதீர்கள்” என்று  அறிவுரை பகர்கிறது இஸ்லாம்.  உணவுப் பொருட்களை வீணாக்குவது இறைவனின் முன்  தண்டனைக்குரிய குற்றம் என்று கண்டிப்பது இஸ்லாம். சாப்பிடும்போது கீழே சிந்தாமல் சாப்பிடுவது- தட்டைகளில் இருப்பவற்றை  மிச்சம் வைக்காமல் தட்டையை வழித்தும் விரல்களை சூப்பியும் சாப்பிடுவது- நம்மால் சாப்பிட முடியாவிட்டால் ஒருவர் தட்டிலிருந்து அடுத்தவர் தட்டுக்கு மாற்றிக் கொள்வதும் தவறில்லை என்றும் சொல்லியும் வாழ்ந்தும் காட்டிய பெருமானார் போதித்த சுன்னத்துக்கள்  பற்றாக்குறை ஏற்படாமல் பாதுகாக்கும் பொருளாதாரமே அல்லாமல் வேறென்ன? அடுத்தவர் கை பட்ட உணவை தீட்டுப் பட்ட உணவு என்று கழிவுகள் ஓடும்  கால்வாயில் கொட்ட சாத்திரம் வகுத்திருக்கும் சமுதாயங்களுக்கு மத்தியில்  ஒரே தட்டில் உட்கார்ந்து பகிர்ந்துண்ணும் சகோதரத்துவத்தை சொல்லிக் கொடுத்திருப்பது இஸ்லாம். 

வீட்டில் சமைத்தது பிடிக்கவில்லை என்று விடுதிகளில்  சாப்பிடுவது – கோபம்  வந்தால் உணவுத் தட்டுக்களை உணவுடன் பறக்க விடுவது-  ஆடம்பரமான திருமண விருந்துகள்- அஜீரணம் ஏற்படுத்தும்  அறுபது வகை அயிட்டங்கள்- ஒரே நாளில் திட்டமிடாத பலர் வீட்டுத் திருமணங்கள்- விருந்துகள் -  கொடி மரம்  ஏற்றி அல்லது கொடி ஏற்றி, இறக்கி கூடைகளில் சோற்றை அள்ளி வீசும் செயல்கள்- இன்னபிற மனித இனத்தின் மூட ஆடம்பரச் செயல்களால்தான் பற்றாக்குறை ஏற்படுகிறது. இறைவனின் சாபமும் உண்டாகிறது.  

“நீங்கள் தினமும் சிதறவிடும் 

ஒவ்வொரு சோற்றுப் பருக்கையிலும் 

எங்களின் உயிர் 

இன்னும் சிலநாட்கள் 

இந்த பூமியில் சுவாசித்திருக்கும்”

என்று  ஒரு கவிஞன் கண்ணீர் வடிக்கிறான்.

சிந்திச் சிதறும் உணவுப் பருக்கைகளில் கூட இறைவனின் பரக்கத் விரவி இருப்பதாக அறிஞர்கள் கூறுகிறார்கள்.   

ஸஹீ ஹ் முஸ்லிம்  556 – வது ஹதீஸில் அப்துல்லாஹ் பின் அம்ரு மின் அல் ஆஸ் ( ரலி அல்லாஹு அன்ஹுமா) அவர்கள் அறிவிக்கிறார்கள் 

“எவர் இஸ்லாத்தை ஏற்றுக் கொண்டு தேவையின் அளவுக்கு வாழ்வாதரங்கள்  கொடுக்கப் பட்டு மற்றும் அவன்   கொடுத்ததைக் கொண்டு அல்லாஹ் எவரை திருப்தியடையச் செய்தானோ, அவர் நிச்சயமாக வெற்றி பெற்றுவிட்டார். “ 

ஸ்ஹீஹ் முஸ்லிம் 563 – வது ஹதீஸில் அபூஹுரைரா ( ரலி) அவர்கள் கீழ்க்கண்ட நபி மொழியை அறிவிக்கிறார்கள்., 

“உலக சுகபோகங்கள் அதிகமாகப் பெற்று இருப்பது சீமான தனமல்ல; போதுமென்ற மனமுடையவராக மனத்தால் சீமானாக இருப்பதுவே சீமான் தனமாகும்.”   போதுமென்ற மனமே பொன் செய்யும் மருந்து என்றுகூட கேட்டிருக்கிறோம்.  

உலகில் ஒரு புறம் பசியால் வரும் ஏப்பம்; மறு புறம்  அஜீரணத்தால் புளித்த ஏப்பம். வளமிக்க நாடுகளில் விளைச்சல் அதிகமாகி  உணவுப் பொருட்களை கடலில் கொட்டுகிறார்கள். மறு புறமோ பச்சிளங்குழந்தைகள் கூட பால் இன்றித் தவிக்கிறார்கள். எதியோப்பியா, சோமாலியா, செனகல், கென்யா  போன்ற நாடுகளில் உள்ளவர்கள் உணவின்றி ‘ எலும்பு தோல் போர்த்த உடம்பு’ என்பதற்கு இலக்கணமாகிறார்கள். பட்டினிச்சாவுகள் பரவலாகிவிட்ட செய்திகள் வருகின்றன. கடந்த அறுபது ஆண்டுகளில் இல்லாத அளவுக்கு தற்போது பஞ்சம் அதிகப் பட்டிருக்கிறது. அதேநேரம் வளமிக்க நாடுகளில் அல்லது செல்வமிக்க நாடுகளில் வீணடிக்கப் படும் உணவுப் பொருட்களை கணக்கிட முடியுமா?  சமைக்கப்பட்ட  உணவில் சாப்பிட்டது போக மிச்சப் பட்டுக்  குப்பைத்தொட்டியில் கொட்டப்படும் உணவு வகைகளுக்குக்  கணக்குண்டா?  ஐந்து நட்சத்திர விடுதிகளில் ஆடம்பர விருந்துகளில் கொறிக்கப் படுவது போக கொட்டப்படுவது எவ்வளவு?

சென்ற சில நூற்றாண்டுகளில் காலனிய ஆதிக்கம் செய்து வந்த இங்கிலாந்தில் மக்கள் தாங்கள் வாங்கும் உணவுப் பொருள்களில் மூன்றில் ஒரு பங்கை வீணாக்குகிறார்களாம். ஸ்வீடனிலும் தாங்கள் வாங்கும் உணவுப் பொருள்களில் நான்கில் ஒரு பங்கை வீணாக்குகிறார்களாம். புனிதமான நோன்பு மாதத்தில் கூட எண்ணெய் வளமிக்க வளைகுடா நாடுகளில் எவ்வளவு உணவுப் பொருட்கள் இறைவனின் கட்டளைக்கு  விரோதமாக வீணாக்கப்படுகின்றன? ஏழைகள் அதிகம் வசிக்கும் இந்தியாவில் , வறுமைக்கு ஒரு கோடு போட்டு அந்தக் கோட்டின் கீழே மக்களைக் கொட்டி வைத்திருக்கும் இந்தியாவில் வருடத்துக்கு 50, 000 கோடி ரூபாய் மதிப்புள்ள உணவு தானியங்கள் வீணாக்கப்படுகின்றன என்று புள்ளிவிபரம் சொல்கிறது.  இப்படி, வளரும் மற்றும்  வளர்ந்துவிட்ட நாடுகளில் வாழுபவர்களில் நிறையப் பேருக்கு உலகின் மற்ற பகுதிகளில் எவ்வளவு வறுமை இருக்கிறது என்பதைத் தெரிந்துகொள்ள நேரமும் இல்லை, ஆர்வமும் இல்லை.  தன் வயிறு நிரம்பினால் சரி என்கிற மனப்பான்மை ஓங்கி வளர்ந்துகொண்டிருக்கிறது. 

உலகில் உணவுப் பொருள்களின் விலை கூடியிருப்பதற்கும் பகிர்வு பரவலாக்கப்படாமலிருப்பதற்கும்  வீணாக்குவது மட்டும் காரணமில்லை. உணவுப் பொருள்கள் விளைவிக்கப் பயன்படுத்தப்படும் நிலங்களை எரிபொருள்களுக்கான தானியங்கள் விளைவிக்கப் பயன்படுத்தும் காரணத்தோடு பூமியின் சுற்றுச் சூழல் பாதிக்கப்பட்டு உலகின் பல நாடுகளில் வறட்சி ஏற்பட்டுத் தானியங்களின் உற்பத்தியும்  பாதிக்கப்பட்டிருக்கிறது. விளைந்து கொண்டிருக்கும் நிலங்கள் விதவைகளாக்கப்பட்டு நெல் விளைந்த பூமிகளில் கல்  விளைந்திருப்பது கண்கூடான காட்சி.    

இன்னொரு முக்கிய காரணம் உலக வர்த்தக அமைப்பின் (World Trade Organization) கொள்கைகளின்படி சில நாடுகள் சில சாமான்களை மற்ற நாடுகளிலிருந்து இறக்குமதி செய்ய வேண்டுமாம். இதன்படி ஜப்பான் நிறைய அரிசியை இறக்குமதி செய்து வைத்திருக்கிறதாம். ஆனால் அதை உபயோகிப்போர் இல்லையாம். அந்த அரிசி அப்படியே அவர்கள் கிடங்கில் கிடந்து மக்க ஆரம்பித்த பிறகு அதைக் கால்நடைகளுக்குக் கொடுக்கிறார்களாம்! இதை மற்ற நாடுகளுக்கு ஏற்றுமதி செய்ய உலக வர்த்தக அமைப்பின் அனுமதி தேவையாம்! இப்படி ஒரு கொடுமை! இஸ்லாத்தை அலட்சியப் படுத்தும்  அமெரிக்காவின் அதிகாரத்தின் கீழ் இயங்கும் உலக வர்த்தக அமைப்பு இயங்கும் லட்சணம்! யூத , கிருத்தவ அமைப்புகள் மற்றும் அவற்றின்  அரசியல்   பொருளாதாரம் உலகை ஆட்டுவிக்கும் இலட்சணத்தின் விளைவுகளே இவை. 

சோமாலியா போன்ற நாடுகளில் மனிதர்கள் பட்டினியால் இறக்கும் அளவிற்கு உணவுப் பற்றாக்குறை இருப்பதற்கு இந்த மேலை நாடுகளும் , செல்வச்செழிப்புள்ள நாடுகளும்  காரணமாக இருப்பதை ஒதுக்க முடியாது. இஸ்லாமிய நாடுகளிலும் கூட செல்வச்செழிப்பு காரணமாக கடல்கடந்து வரும் உணவுப் பொருள்கள் காலடியில் போட்டு நசுக்கப் படுவதையும் மறுப்பதற்கில்லை ; மறைப்பதற்கில்லை.  தொழில்நுட்பத்திலும் மற்ற துறைகளிலும் எத்தனையோ சாதனைகள் புரிந்து வரும் மனித இனம், இந்த இருபத்தோராம் நூற்றாண்டில் சிலர் உணவில்லாமல் உயிர் இழக்கிறார்கள் என்பதை உணர்ந்து தலை குனிய வேண்டும், அதை முழுவதுமாக ஒழிக்க முழு மனதோடு பாடுபட வேண்டும். 

இருக்கும் நாடுகள் இல்லாத ஏழை நாடுகளுக்கும் உதவும் எண்ணம் ஓங்கவேண்டுமானால் அடிப்படையில் நடைமுறையில் அவை இஸ்லாமியப் பொருளாதார சிந்தனைகளை  பின்பற்ற வேண்டும். உலகமெங்கும் ஒரே மொழி! உண்மை பேசும் மொழியாக இஸ்லாம் ஓங்கி நிற்கும்போது மட்டுமல்ல இறைவனின் கட்டளைகள் அமுல்படுத்தப் படும்போதுதான் இவை உண்மையில் நிறைவேறும் .

இறைவன் படைத்தளித்த உலகின் வளங்கள்,   ஒரு சிலர் அல்லது ஒரு சில நாடுகளின்  கைகளில் சிக்கி முறையான பகிர்வு இன்றிப் போகும்போது – இறைவனின் பொருளாதார  சட்டங்களுக்கு மாறாக மனித மனங்களில் மவுடீகம் மண்டி இருக்கும்போது பற்றாக்குறை! பற்றாக்குறை! என்று படைத்தவன் மேல்  பழி போட்டு பயன் இல்லை. உலகம் இஸ்லாத்தை ஏற்க வேண்டும். 

“ஒருவர் மற்றொருவருடைய பொருளை தவறான முறையில் உண்ணாதீர்கள் ; மேலும் பிற மனிதார்க்ளுடைய பொருள்களில் ஏதேனும் ஒரு பகுதியை அநீதியான முறையில் தின்பதற்காக – அது தவறு என்று நீங்கள் அறிந்திருந்தும் – அதற்குரிய வாய்ப்பைப் பெற அதிகாரிகளை அணுகாதீர்கள்" (அல் –பகரா 2: 188 ) 

என்கிற இறைவனின் அச்சுறுத்தல் , இலஞ்ச லாவண்யங்களைக் கண்டிக்கிறது. ஆனால் இவைகளை மீறி ஏழைகளுக்குரிய அரசு தரும் ரேஷன் அரிசிகளை கடத்திக் கொள்ளை இலாபம் அடிப்பவர்களை நாம் காணாமல் இருக்கிறோமா? நமக்கு அடுத்த வீட்டு அரிச்சந்திரர்கள்  அவர்கள்தானே?

ஆன்மிகத்தின் அடிப்படையில் அல்லாஹ் சொன்ன பொருளாதாரத்தை செயற்கைப் பற்றாக்குறையை உண்டாக்கும் ஆன்  லைன் பொருளாதாரம், ஆசைகளின் உச்சாணிக் கொம்பில் ஏறி  ஆக்கிரமித்ததாலும்  பஞ்சம், பசி, பட்டினிச் சாவுகள் பரவலாகின்றன.   பெற்றோர் சொல் கேளாத பிள்ளை உருப்படாது. படைத்தவன் விதித்த  கட்டளைகளை பின்பற்றாத  சமுதாயமும் மேன்மையடையாது. இஸ்லாம் சொல்லும் சிந்தனைகளை நடைமுறைப் படுத்த வேண்டும்.  இருப்பதை எல்லோருக்கும் எல்லா இடங்களுக்கும் பகிர வேண்டும். 

வரம்பு மீறியவர்கள் மற்றும் வழிகாட்டுதல்களைப் புறக்கணித்தவர்களை திருமறை இப்படி இடித்துரைக்கிறது . 

“இன்னும் அந்த உண்மை மனோ இச்சையைப் பின்பற்றி இருப்பின், நிச்சயமாக வானங்களும், பூமியும் அவற்றில் உள்ளோரும் குழப்பத்தில் ஆகியிருப்பர். மாறாக, அவர்களுக்கு ( குர் ஆன் எனும் ) நல்லுபதேசத்தையே கொடுத்தோம். ஆயினும் , அவர்கள் தங்களுடைய நல்லுபதேசத்தைப் புறக்கணிக்கக் கூடியவர்களாக இருக்கின்றனர்." (அல்-மூமிநூன் 23: 71).

வெல்லப் போவது யார் இறைவனின் சட்டங்களா ? பேராசை கொண்ட மனிதனின் திட்டங்களா?  

இன்ஷா அல்லாஹ் தொடரும்...

இபுராஹீம் அன்சாரி