முன் குறிப்பு : சொல்லித் தெரிவதில்லை ! 22

அன்றொரு சமயத்தில் புதுக் கல்லூரியில் படித்துக் கொண்டிருக்கும் போது அன்றைய சூழலில் இன்றைய இயக்கங்களில் பெருந்தலைகளாக வலம் வருபவர்கள் எங்களோடு சுற்றி சுற்றி வந்தார்கள். எங்களையும் நல்ல சூழலுக்குள் சுழலவிட்டார்கள் நல்லெண்ணமே அன்று மேலோங்கியிருந்தது அவர்களிடம் இன்னும் இருக்கலாம் அல்லாஹ் நன்கறிவான்.

கல்லூரியில் இரண்டாம் ஆண்டு படித்துக் கொண்டிருக்கும்போது இந்தியாவின் தலைப்பகுதிக்கு எங்களை பயிற்சி முகாமுக்காக அழைத்துச் சென்றார்கள் அது ஒரு கணாக் காலம் அழகிய சூழல் அப்படித்தான் சென்றது. அங்கே நானும் மற்ற நண்பர்களும் காலார நடந்து கொண்டிருக்கும்போது ஓர் இடம் கண்டோம் அங்கே மனநல மருத்துவம் மற்றும் அதற்கான ஆராய்ச்சி மாணவர்களின் விடுதி இருந்தது அதன் பக்கதில் இருந்த காவலாளியிடம் பேசிக் கொண்டிருக்கும்போது நிறைய விஷயங்களை சொன்னார் ஆனால், கொஞ்சம் புரிந்தது நிறைய புரியவில்லை அப்போது அங்கே கண்ட ஆங்கில கேள்வித்தாளில் கண்டதை இப்போது நினைவு படுத்தி பார்க்கிறேன் அதனைத்தான் இங்கே பதிந்திருக்கேன்...

1. உங்களின் பாலினம் ?

2. உங்களை நண்பர்கள் எப்படி அழைப்பார்கள் ?

3. உங்கள் நண்பர்களை எப்படி அழைப்பீர்கள் ?

4. பிறந்த ஊர் ?

5. விருப்பத்திலிருக்கும் ஊர் ?

6. திருமணம் நடந்துவிட்டதா ? ஆம் என்றால் திருமணம் நடக்கும்போது அது உங்களின் திருமணம்தான்னு தெரியுமா ?

7. உங்களை முதலில் (வார்த்தைகளால்) காயப் படுத்தியவரிடம் எப்படி நடந்து கொண்டீர்கள் ?

8. யாரை அதிகம் காயப் படுத்தியிருக்கிறீர்கள் (வார்த்தைகளால்) ?

9. மாற்றுத் திறணாளியைக் கண்டால் உங்களுக்கு முதலில் என்ன தோன்றும் மனதில் ?

10. உங்களைவிட மற்றவர் தகுதியானவர்னு உங்களிடமே சொல்லப்பட்டால் என்ன செய்வீர்கள் ?

11. உங்களை விட்டுச் சென்றவைகளில் எதனை பேரிழப்பாக இன்னும் நினைக்கிறீர்கள் ?

பதில் சொல்லியே ஆகவேண்டும் என்பதில்லை, அதற்காக சொல்லாமிருக்கவும் தேவையில்லை, பட்டவர்கள், சுட்டவர்களையும், சூடுபட்டவர்களையும் நினைவுக்குள் கொண்டுவரலாம்தானே !?

ஆகவே மேலேயுள்ள கேள்விகள் யாவற்றிற்கு பதில் அளித்தால், இணையக் கடலில் உல்லாசப் பயணம் செல்ல இலவச ஏற்பாடு செய்து தரப்படும், அங்கே மூழ்கிட்டீங்கன்னா தேடி புடிக்க இந்திய கடலோரப் படையின் உதவி நாடப்படும் அதோடு இலங்கை கடற்படையை அங்கே நெருங்க விடாமல் பார்த்துக் கொள்ளப்படும்.

நடுக் குறிப்பு : நில்! கவனி! செல்!

நேற்று வேலை முடித்து காரில் வந்து கொண்டிருக்கும்போது, அமைதியாகத்தான் காரை ஒட்டி வந்தேன் ஆனால் எனக்குப் பக்கத்தில் காரை ஓட்டி கொண்டு வந்தவர் தொடர்ந்து ஹார்ன் அடித்து கொண்டே வந்தார் அந்த சத்தம் எனக்கில்லை என்று நானும் காணாது மாதிரியே தொடர்ந்தேன் அவர் எனக்கு முன்னாடிச் சென்று என்னை அப்படியே என்னை வழிமறித்து ஓரம் கட்டச் சொன்னார் நானும் என்னமோ ஏதோன்னு பதறிப்போய் ஓரமாக நிறுத்தினேன் இது வேற எங்குமில்லை ஷேக் ஜாயித் ரோட்டில்தான். இறங்கி வந்தவர் கோபமாக அரபியில் ஏதோ சொல்லிக் கொண்டு வந்தார் நானும் பேந்த பேந்த விழித்தேன் அப்புறம் அவரே அரைகுறை ஆங்கிலத்தில் ஆத்திரத்தைக் கொட்டினார் அதன் அழகே தனிதான்.

சரி, அவர் என்னதான் கேட்க நினைத்தாராம்னு நினைக்கிறீங்களா ? சாலிக்(salik)கை டோல் கேட்டைக் கடக்காமல் செல்ல எப்படிப் போகனும்னு கேட்கத்தான் எனக்கு ஹார்ன் அடித்து கேட்க பார்த்தாராம் அது என்னமோ அப்படியே என் மேல் குறிவைத்தே வந்துட்டார். அவரையும் பார்த்து விட்டு அப்படியே பக்கத்திலிருந்த அந்த TOLL GATEஐம் அன்னாந்து பார்த்தேன்... அட அரபியிலும் அங்கிலத்திலும் கோபத்தை காட்டிய சகோதரா அதத் தாண்டி வந்துதான் நாம் இங்கே காரை நிறுத்தியிருக்கோம் இப்போ எங்கு சென்றாலும் இழந்ததை இவனுங்க தரமாட்டானுங்கன்னு சொன்னதும் அவர் ஒரே வார்த்தைதான் - அல்ஹம்துலில்லாஹ் !

பின்குறிப்பு: மல்லாக்கப் படுக்கவில்லை!

- அபுஇபுறாஹீம்