மதச் சின்னங்களும் அரசு அலுவலகங்களும் 18

அரசு என்பது அனைத்து தரப்பு மக்களுக்கும் பொதுவானதாகச் செயல்பட வேண்டும். கட்சியின் கொள்கையை அரசின் செயல்பாடுகளோடு கலந்து குழப்பக்கூடாது. ஒரு அரசில் அனைத்துக் கட்சியினரும் அங்கம் வகிப்பதால், அது சார்பற்றதாக செயல்பட வேண்டும். குறிப்பாக மதம் சார்ந்த விசயங்களில் அரசு மிகக் கவனமாகச் செயல்பட வேண்டும்.

நமது அரசியல் சாசணம் அரசும் ஆட்சியாளர்களும் குறிப்பிட்ட சமயச் சார்புள்ளவராக செயல்படக்கூடாது என்று வலியுறுத்துகிறது. அதேபோல், அரசு நிறுவனங்களில் சமயக் குறியீடுகளை முன்னிருத்துவதையும் தடைசெய்து நீதிமன்றங்களும் உத்தரவிட்டுள்ளன. அரசு சமயச் சார்பற்றதாக இருந்தாலும் ஆட்சியாளர்கள் தனி வாழ்க்கையில் அவ்வாறு இருப்பதை சட்டம் தடுக்கவில்லை. மத நம்பிக்கைகள் தனி மனிதர் சார்ந்தவை என்பதால் நாமும் அதை குறை கூற முடியாது.


செய்திகளை இணையத்தில் வாசித்துக் கொண்டிருந்தபோது "அரசினர் தோட்டத்தில் உள்ள விநாயகர் கோயில் இடமாற்றம் இல்லை: அரசு அறிவிப்பு!"என்ற செய்தி கவனத்தைக் ஈர்த்தது. புதிய தலைமைச் செயலகம் கட்டப்பட்டு, தற்போது பயன்படுத்தப்படாமல் இருக்கும் ஓமந்தூரார் அரசினர் தோட்டத்தில் இருந்த விநாயகர் கோயிலை இடமாற்றம் செய்ய முந்தைய அரசு முடிவு செய்திருந்ததாகவும் தற்போது அரசு அந்த முடிவை மாற்றிக் கொண்டு விட்டதாகவும் அங்கு குடமுழுக்கு செய்யப்படும் என்றும் தமிழக அரசு அறிவித்துள்ளதன் மூலம் தமிழக அரசின் சமயச் சார்பின்மையை சந்தேகிக்க வேண்டியுள்ளது.

அரசு ஊழியர்களிலும் சட்டமன்ற உறுப்பினர்களிலும் தெய்வபக்தி உள்ளவர்கள் இருக்கவே செய்கின்றனர். இது தவறும் இல்லை. ஆனால் அரசு இடம் ஒன்றில் ஒரு குறிப்பிட்ட மதத்தினரின் வழிபாட்டுத்தலம் மட்டும் செயல்பட அனுமதிப்பது இந்திய அரசியல் சாசனத்திற்கு எதிரானது.

ஓமந்தூரார் அரசினர் தோட்டம் மட்டுமின்றி, பெரும்பாலான அரசு அலுவலகங்கள், சில காவல் நிலையங்கள் உள்ளிட்ட இடங்கள் மற்றும் அரசுப் பேருந்துகள் போன்றவற்றில் இந்து மதத்தினர் கடவுள் என்று கருதுபவர்களின் படங்களை மாட்டி வைத்துள்ளனர். பல அரசு அலுவலகங்களில் இந்துக்களின் வழிபாடான ஆயுதபூஜையும் கொண்டாடப்பட்டு வருகிறது.

ஆங்காங்கே சாலைகளை ஆக்கிரமித்து திடீர் கோயில்கள் முளைக்கின்றன. உயர் நீதிமன்ற வாசல், எழும்பூர் ரயில் நிலையம், சென்ட்ரல் ரயில் நிலையம் எனப் பொது இடங்கள் பலவற்றிலும் சட்டத்துக்குப் புறம்பான வகையில் குறிப்பிட்ட மதத்தின் சின்னங்கள் உருவாக்கப்படுகின்றன.

இவற்றைத் தடுக்க வேண்டிய சமயச் சார்பற்ற கட்சிகள் எனக் கூறிக் கொள்ளும் திமுக, அதிமுக, காங்கிரஸ், கம்யூனிஸ்டு கட்சிகள், தேமுதிக, பாமக என எந்தவொரு கட்சியும் இதனைப் பிரச்சனை ஆக்குவதில்லை. மனிதநேய மக்கள் கட்சி இதுபோன்ற பிரச்சனைகளை சட்டமன்றத்தில் எழுப்பி சமயச் சின்னங்கள் அரசு அலுவலகங்களில் இடம் பெறுவதையும் அரசு அலுவலகங்களில் குறிப்பிட்ட மதத்தின் வழிபாட்டு நிகழ்ச்சிகள் நடத்தப்படுவதையும் நீக்கப் பாடுபட வேண்டும்.

அரசு மற்றும் அரசு அதிகாரிகளின் இத்தகைய சமயச் சார்பு நடவடிக்கைகளுக்கு எதிராகப் பொதுநல அமைப்புகளும் சமுதாய இயக்கங்களும் தடையாணை கோரி நீதிமன்றங்களில் வழக்குப்பதிவு செய்து, குறிப்பிட்ட மதத்தின் சின்னங்கள் அரசு அலுவலகங்களில் இடம் பெறுவதைக் களைய முயல வேண்டும்.

வாழ்க இந்தியா! வளர்க சமய நல்லிணக்கம்!

இதுதொடர்பான பதிவுகள்:

1. விடுதலை... http://viduthalaidaily.blogspot.com/2011/07/blog-post_12.html
2. சிந்திக்க உண்மைகள்: http://idhuthanunmai.blogspot.com/2008/06/blog-post_15.html

--அபூசுஹைமா