கல்வியின் அவசியம் - BY CROWN 20

பிஸ்மில்லாஹ் ஹிர்ரஹ்மான்னிர் ரஹீம்.

வாழ்வில் எந்த ஒரு விசயமாக இருப்பினும் நல்ல வழி காட்டுதல் இல்லாவிடின் பெறக்கூடிய நன்மைகளையும், பயன்களையும் பெற முடியாது. கடலில் சென்றவர்களுக்கு எப்படி கரையில் உள்ள கலங்கரை விளக்கு வழி காட்டி சரியான திசையை சொல்வது போல், சமுதாயத்தில் ஏற்றம் பெற சரியான வழி காட்டி அவசியம். மன்னர்களுக்கு அமைச்சர்கள் இருந்ததுபோல், அரசாங்கம் நடைபெற ஆலோசகர்கள் இருப்பதுபோல், சமுதாயத்தில் குறிப்பாக நல்ல கல்வியை தேர்ந்தெடுக்க அதை படித்து பயன் பெற ஆதரவுடன் கூடிய வழிகாட்டி அவசியம் அது நம் சமுதாயத்தில் சரிவர அமையாதது நம் துரதிஸ்டம். படிச்சி என்ன கிழிக்கப்போகிறான்? படித்தது போதும் பொழக்கிற வழியப்பாரு. பொம்பள புள்ள படிச்சி இன்ன ஆகப்போவுது இந்த நாட்டையா கட்டி ஆளப்போகிறாள்? கால, காலத்துல கல்யாணம் கட்டிகிட்டு குடும்பம் நடத்த போகிறவதானே? என்று மூத்தவர்களே நம் இளைய தலைமுறைக்கு தடை போடுகின்றதன் விளைவாக மாற்று மததில் படித்தவர்கள் அதிகமாகி, நமக்கு வர வேண்டிய உரிமைகளும், சலுகைகளும் கை மாறிவிடுவதுடன் எதற்கு எடுத்தாலும் மருத்துவர், வழக்கறிஞர், காவல் துறை அதிகாரி, கிராம அலுவலர் என்று பலரிடம் பல்லை காட்டி நிற்க வேண்டிய சூழ்நிலைகளும், சட்டம் ஒழுங்கு நமக்கெதிராய் மாற்றப்படுவதும் அன்றாடம் நடக்கும் அவலங்கள். இவையெல்லாம் களைய கல்வி அவசியம் அதுவும் நம் இஸ்லாம் வலியுறுத்திச் சொல்லி உள்ளன. பெருமானார் ரசூல் (ஸல்)அவர்களும் சொல்லியதுபோல் சீனத்து தேசம் சென்றேனும் கல்வி பயுலுங்கள் என்றதை ஆதார உதாரணமாக கொண்டு கல்வி கற்பது அவசியம் என கொள்வோமாக. அது ஏன் சீன தேசம்? அரபியா சீனத்துக்கு மிகத்தொலைவு ஆக, தூரா தேசம் சென்றாலும் கல்வி அவசியம் கற்க வேண்டியாதிவிடுகிறது! அதுவும் இஸ்லாம் போதிக்கும் வழியில் இஸ்லாத்துடன் கூடிய வகையில் நம் கல்வி அமைய வேண்டியது அவசியம். மேலும் சிறு பருவத்திலிருந்தே இஸ்லாம் நெறிகளுடன் கூடிய ஆரம்ப கல்வி அவசியம் என்பதே நம் கொள்கை எண்ணமாக இருக்க வேண்டும். கல்வி கற்று விட்டால் என்ன, நற்பண்புகள் நம் வாழ்வில் வரும் என்பதை ஆராய கீழே சில விளக்கங்கள்:

குழந்தைகள் குடும்ப அமைப்பைத் தழைக்கச் செய்யும் குலக்கொழுந்துகளாவார்கள். குடும்பக் கட்டுமானத்தின் வாரிசுகள் மட்டுமின்றி, சமுதாய, தேச சீரமைப்புகளுடைய வருங்காலச் சந்ததிகளாகத் திகழ்கின்றனர். அவர்களால்தான் மனித வாழ்வு இனிமை பெறுகிறது. அவர்கள் மீதே நம்பிக்கையும் எதிர்பார்ப்பும் ஏற்படுகிறது. மேற்கூறிய அனைத்தும் சிறந்த இஸ்லாமிய முறையிலான குழந்தை வளர்ப்பின் மூலமும் அவர்களுக்கு ஊட்டப் படும் இஸ்லாமிய ஆரம்பக் கல்வி மூலமும் தான் சாத்தியமாகும்.

குழந்தைகளை நல்லொழுக்கமுடையவர்களாக வளர்ப்பதில் பெற்றோரின் பங்கு மிக முக்கியமானதாகும். குழந்தைகளுக்கு மிகச்சிறந்த கல்வியளித்து, உயர் பட்டதாரிகளாக அவர்களை உருவாக்கி மகிழ்வதற்காகப் பெற்றோர் காலமெல்லாம் படாதபாடு படுகின்றனர். செல்வமும் கல்வியும் சேர்த்துக் கொடுத்தாலுங்கூட நல்லொழுக்கமில்லாவிட்டால் அதனால் எந்தப் பயனும் கிடைக்கப் போவதில்லை. நல்லொழுக்கம் என்னும் அடித்தளத்தின் மீது, கல்வி, செல்வம் முதலியவற்றை அமைத்துக் கொடுத்தல் வேண்டும். அப்போது தான் குழந்தைகள் மட்டுமின்றி குடும்பமும் சமுதாயமும் பெரும் பயன் பெறும். இன்ஷா அல்லாஹ்.

"ஒரு தந்தை தன் குழந்தைகளுக்கு நல்லொழுக்கத்தை விடச் சிறந்ததாக வேறு எதையும் விட்டுச் செல்வது கிடையாது" [அறிவிப்பாளர் : ஸயீத் பின் ஆஸ்(ரலி); நூல்: திர்மிதீ].

காணும் திசையெங்கும் இப்போது ஒழுங்கீனங்கள் மலிந்து காணப்படுகின்றன. இவை பள்ளிக் குழந்தைகளின் சின்னஞ்சிறு வயதிலேயே அவர்களுடைய மனதில் பதிந்து பெரும் பாதிப்பை ஏற்படுத்துகின்றன. சினிமா, டிவி, பத்திரிகைகள், விளம்பரங்கள் போன்ற கலாச்சாரச் சீரழிவு சக்திகளால் இக்காலக் குழந்தைகள் பெரிதும் கவரப்படுகின்றனர். இவற்றிலிருந்து பெற்றோர் தங்களைக் காத்துக் கொள்வதோடு, தம் குழந்தைகளையும் காத்து வளர்க்கக் கடமைப்பட்டுள்ளனர். இதற்கு இஸ்லாமிய அடிப்படைக்  கல்விதான் ஒரே தீர்வு. குழந்தைகளுக்குப் பிள்ளைப் பருவத்திலேயே தொழுகையைக் கடைப்பிடிக்கக் கட்டளையிடவேண்டும்.

"குழந்தை ஏழு வயதை எட்டி விடும்போது, தொழுமாறு ஏவுங்கள். பத்து வயதை அடைந்தும் தொழுகையைத் தவறவிட்டால், அடியுங்கள். மேலும், படுக்கையைத் தனித்து அமையுங்கள்" [அறிவிப்பாளர்: அபூஹுரைரா(ரலி); நூல்: முஸ்லிம்].

"நிச்சயமாகத் தொழுகையானது, மானக்கேடான, கேவலமான செயல்களிலிருந்து மனிதனைப் பாதுகாக்கின்றது" எனத் திருமறை குர்ஆன் (29:45) கூறுகின்றது.

நமக்கெல்லாம் பேரருளாக இறைவனால் வழங்கப் பட்டுள்ள திருமறை குர்ஆன் பற்றிய கல்வியையும் நபி(ஸல்) அவர்களின் நல்வாழ்க்கை பற்றிய வரலாற்று அறிவையும் குழந்தைகளின் மனதில் பதியுமாறு எடுத்துரைத்து, அவர்களை இளம் பருவத்திலேயே இஸ்லாமிய வார்ப்பில் வடித்தெடுக்க வேண்டியது பெற்றோரின் இன்றியமையாத கடமையாகும்.அவ்வாறு வார்தெடுத்த பிள்ளை என்றும் தீயவழியை நாடாது இன்சாஅல்லாஹ்.

- CROWN முஹம்மது தஸ்தகீர்