நேற்று ! இன்று ! நாளை ! - தொடர் - 10 16

அரசியலில் எம்ஜியாரை நாடோடியாக்கி விடலாம் என்று கருணாநிதி திட்டம் தீட்டி அவரை திமுகவில் இருந்து வெளியேற்றினார். ஆனால் எம்ஜியாரை மன்னனாக்க தமிழக மக்கள் தீர்மானம் பண்ணிவிட்டனர்.  அவசரமாகப் பிறந்த அதிமுக , திண்டுக்கல்லில் பெற்ற வெற்றியின் உற்சாகத்தில் 1977 ஆம் ஆண்டு நடந்த தமிழக சட்டமன்றத் தேர்தலில் அதிமுக தனிப்பெரும் மெஜாரிட்டியுடன் ஆட்சிக் கட்டிலில் ஏறியது. எம்ஜியார் முதலமைச்சராக தேர்ந்தெடுக்கப் பட்டார். தேர்தலுக்கு முன் ஒப்புக் கொள்ளப்பட்ட திரைப்படங்களை அவசரமாக முடித்துக் கொடுத்து விட்டு மக்கள் படை புடை சூழ திறந்த வெளியில் முதல்வராக பதவி ஏற்றுக் கொண்டார்.  மக்கள் கூட்டம் ‘பார் சிறுத்ததால் படை பெருத்தததோ படை பெருத்தலால் பார் சிறுத்தததோ’ என்று கலிங்கத்துப் பரணி பாடி சென்னையைக்  குலுங்க வைத்தது. 

தன்னுடைய பதவி ஏற்பு  உரையில், சுதந்திரம் பெற்று முப்பது ஆண்டுகளாகியும் இன்னும் கிராமங்களில் தண்ணீர்ப் பஞ்சம் தீர்க்கப் படவில்லை என்று குறைப்  பட்டுக் கொண்டார் இன்று அறுபத்தி ஐந்து ஆண்டுகளாகியும் கிராமங்களில் ஒன்றும் குற்றால அருவி கொட்டவில்லை என்பது வேறு விஷயம். “அடிக்கிற தண்ணிக்கு அங்கங்கே கடை இருக்கு குடிக்கிற தண்ணிருக்கோ குடமெல்லாம் தவமிருக்கு “ என்று ஒரு புதுக் கவிதைக் கவிஞன் புலம்புவது இன்னும் நிற்கவில்லைதான்.

ஆனாலும் எம்ஜியார் தன் ஆட்சியில் ஏழைகளுக்கு அத்தியாவசியமான அரிசி, மண்ணெண்ணெய் போன்ற பொருட்களின் விலை ஏறாமல் பார்த்துக் கொண்டார். காமராஜரின் மதிய  உணவுத் திட்டத்தை விரிவுபடுத்தி, சத்துணவுத் திட்டத்தை தனது கரங்களால் தொடங்கி வைத்தார்.  லஞ்சம் , ஊழல் ஆகியவற்றின் ஊற்றுக் கண் ஆகிவிடும் என்று கோப்புகளில் கை எழுத்து இடுவதை தாமதித்தார். இதனால் நிர்வாகம் நகராமல் அசைவு கொடுத்தது ஆட்டம் கண்டது. எம்ஜியாரை ஆட்சியை விட்டு நீக்க வேண்டுமென்று கருணாநிதியின் முயற்சிகள் அவ்வளவு சீக்கிரம் தமிழ்நாட்டில் பலிக்கவில்லை.

ஆனால் பாண்டிச்சேரியில் அதிமுக ஆட்சியை மிகச் சுலபமாக தூக்கி வீசினார் பாரூக் மரைக்காயர்.    தமிழகத் தேர்தலைத் தொடர்ந்து பாண்டிச்சேரியில் தேர்தல். எம்ஜியாரின் வலது கரமாக அன்று திகழ்ந்த எஸ் டி எஸ் என்கிற திரு சோமசுந்தரம் பெருப்பேற்று அதிமுகவை வெற்றி பெற வைத்து ஆட்சிப் பொறுப்பில் அமர்த்தினார். காரைக்காலைச் சேர்ந்த ராமசாமி என்பவர் அங்கு முதலமைச்சராக்கப் பட்டார். பாண்டிச் சேரியில் பாரூக் மரைக்காயர் குடும்பம் ஒரு பழம் பூனை. பலதொழில்கள் அவர்களின் கைகளில் இருந்தன. காங்கிரஸ் ஆட்சியிலும் முதல்வராக இருந்து பிறகு திமுகவுக்கு கட்சி மாறி முதல்வராக இருந்து அதிமுகவிடம் தோற்று எதிர்க் கட்சித்தலைவர் ஆனார். ஆனால் அவரது அரசியல் மற்றும் அரசு செல்வாக்கு அங்கு நிருபணம் ஆனது. 

எப்படியென்றால் பாண்டிச்சேரியில், பட்ஜெட் கூட்டம் நடைபெறும் நாளில் முதலமைச்சர் ராமசாமி பட்ஜெட்டைப் படிக்க ஆரம்பித்தார். யாரும் எதிர்பாராமல் எழுந்த பாரூக்     மரைக்காயரின் கரங்களில் பட்ஜெட்டின் இன்னொரு பிரதி இருந்தது. முதலமைச்சரைப் பார்த்து பட்ஜெட்டை நீங்கள் படிக்க வேண்டாம் நானே படிக்கிறேன் என்று படிக்க ஆரம்பித்தார். அரசின் பட்ஜெட் வரிக்கு வரி அப்படியே இருந்தது. சட்டமன்றத்தில் அதிர்ச்சி! ஆச்சரியம்! திகைப்பு! முதலமைச்சர் ராமசாமி செய்வது அறியாது நின்றார். பட்ஜெட் இரகசியம் வெளியானதால் ஆட்சி கலைக்கப் பட்டு கவர்னர் ஆட்சி அமுலுக்கு வந்தது. திகைத்து நின்றார் எம்ஜியார். அரசியலில் தான் இன்னும் விழிப்புடன் இருக்க வேண்டுமென்ற எண்ணம் அவருக்கு உறுதியாக ஏற்பட்டது. பாண்டிச்சேரி அவருக்கு பாடம் படித்துத் தந்தது. 

இதற்கிடையில் ஆட்சியில் இருந்தவரை அதிகாரத்தை சுவைத்தவாறு கருணாநிதியுடன் இருந்த பலர் செத்த மாட்டில் இருந்து உன்னி இறங்குவது போல் கருணாநிதியிடம் இருந்து விலகி , அதிமுகவில் இணைய ஆரம்பித்தனர். இவர்களை தனக்கே உரிய பாணியில் “ அற்ற  குள்ளத்தின் அருநீர் பறவைகள் “ என்று கருணாநிதி வர்ணித்தார். திமுகவில் சுரண்டி வாழ்ந்த கூட்டம் அதிமுகவில் நுழைந்து தங்களின் கைகளின் அரிப்பை கட்டுப் படுத்த முடியாமல் ,  ஊழல பெருச்சாளிகள் அதிமுகவிலும் வளர ஆரம்பித்தன. 

மத்தியில் மொரார்ஜி தேசாய் தலைமையில் இருந்த ஜனதாக் கட்சியின் ஆட்சியுடன் திமுக கூட்டணி வைத்து இருந்தது. எம்ஜியார் , இந்திரா காங்கிரசுடன் கூட்டணி வைத்து இருந்தார். இந்த நேரத்தில்  1979-ல்  தஞ்சாவூர் பாராளுமன்ற தொகுதிக்கு இடைத்தேர்தல் வந்தது. காரணம் அதன் தேர்ந்தெடுக்கப் பட்ட உறுப்பினர் எஸ்.டி.சோமசுந்தரம் எம்ஜியார் அமைச்சரவையில் சேர்க்கப்பட்டதே.  பதவிகளை இழந்து பரிதாப நிலைக்குத்தள்ளப் பட்ட இந்திரா காந்தி எப்படியும் பாராளுமன்றத்துக்குள் நுழைந்துவிட வேண்டுமென்று தஞ்சாவூரில் நின்றால் எம்ஜியார் ஆதரவுடன் சுலபமாக வென்றுவிடலாம் என்கிற அரிய ஆலோசனையை தமிழக காங்கிரசார் இந்திராவிடம் கூறினர்.   இதற்கு இந்திராவுக்கும் சம்மதம்தான் ஆனால் இதை எம்ஜியார் அறிவிக்க வேண்டுமென்றார். இந்த நிலையில் மத்தியில் ஆட்சியில் இருந்த மொரார்ஜியிடம் இருந்து வந்த ஒரு தூதுவர் எம்ஜியாரை சந்தித்தார். என்ன சொன்னாரோ எந்த பைலைக் காட்டினாரோ தெரியாது எம்ஜியார் அலிபாபாவில் அடிப்பது போல் ஒரு அருமையான பல்டி அடித்தார். “ இந்திரா போட்டியிட்டால் அதிமுக ஆதரிக்கும் நிலை இருக்காது” என்று ஒரு அறிவிக்கை விடுத்தார். அதிர்ச்சியடைந்தார் இந்திரா. அரசியலில் உறவு என்றாலும் பகை  என்றாலும் அதில் உறுதியாக இருப்பவர் கருணாநிதிதான்  என்கிற எண்ணத்தின் விதை அவருக்குள் ஊன்றப் பட்டது.  

எமெர்ஜென்சி காலத்துக்குப் பிறகு இந்திராவும் கருணாநிதியும் பரம விரோதிகளாக ஒருவரை ஒருவர் பாவித்து வந்தனர். இந்திராவை திமுகவினர் திட்டுவதற்கெல்லாம் நாகரீகம் என்ற நூலில்  அர்த்தமே இல்லாமல் இருந்தது. புடவை கட்டிய ஹிட்லர் என்பதில் இருந்து இந்திராகாந்தி போன்ற விதவைகளுக்கு ஜீவனாம்சம் வரை தருவதாகக் இழிவான வார்த்தைகளை திமுகவினர் பேசினர். ஆனாலும் தஞ்சாவூர் பாராளுமன்றத் தேர்தல் வேட்பாளராக தன்னை அறிவிக்க எம்ஜியார் காட்டிய தயக்கம் அல்லது பயம் இந்திராவை சிந்திக்கத் தூண்டியது. ஒரு அரசியல் கோழையை விட ஒரு அரசியல் எதிரியே மேல்  என்று அவரது எண்ண ஓட்டம்  அவருக்கு ஏற்பட்டது. இந்திரா – கருணாநிதி இருவருமே பதவி இழந்தவர்கள். ‘உன் கதைதான் என் கதையும் என் கதைதான் உன் கதையும்’ என்கிற அரசியல் பல்லவி இருவரும் ஒரே படகில் இணைந்து பயணிப்பதற்கு  வழி வகுத்தது. 

இந்நிலையில், இந்தியாவை இதுபோல் திறமையாக யாரும் ஆண்டது இல்லை என்கிற பெயர் பெற்ற மொரார்ஜியின் அரசு,  ராஜ் நாராயணன் என்கிற அரசியல் கோமாளியால் கவிழ்க்கப் பட்டது, அதன்பின் ஆறு மாத காலம் ஜாட் இனத்தைச் சேர்ந்த – இன்றைய மத்திய அமைச்சர்  அஜித் சிங் உடைய தகப்பனார் சரன்சிங் தலைமையில் ஒரு பெயரளவு அரசு ஆண்டது. நித்திய கண்டம் பூரண ஆயுசு என்ற நிலையிலும் திரிசங்கு சொர்க்கம் என்ற அமைப்பிலும் இருந்த அந்த அரசும் கவிழ்ந்தது. பாராளுமன்றத்துக்கு மீண்டும் தேர்தல் அறிவிக்கப் பட்டது. 

இம்முறை கூட்டணிகள் இடம் மாறின. இந்திராவும் கருணாநிதியும் கூட்டு. இந்திராவைக் கொலை செய்ய முயன்றதாக பல திமுகவினர் மீது வழக்கு நடைபெற்றுக் கொண்டிருக்கும் போது இந்தக் கூட்டணி அறிவிக்கப் பட்டு தொகுதிகள் பங்கீடும்  செய்யப் பட்டன. இந்திராவோடு சேர்ந்து நடைபெற்ற சென்னைக் கூட்டத்தில் “நேருவின் மகளே வருக! நிலையான ஆட்சி தருக!” என்று கருணாநிதி முகாரி ராகத்திலிருந்து ஆனந்த பைரவி இராகத்துக்கு மாறிப் பேசினார்.  

இந்திரா கருணாநிதி கூட்டணி அமோக வெற்றி. எம்ஜியாருக்கு இரண்டே இரண்டு இடங்கள் மட்டுமே கிடைத்தன.  இந்த இடத்தில் கருணாநிதியின் அரசியல் ஆரூட  கணிப்பின்  சாதுர்யத்தை நாம் சுட்டிக் காட்டியே ஆகவேண்டும். மத்தியில் மொரார்ஜி ஆட்சிக்கு வருவார் என்று கணித்து அவருடன் சேர்ந்தார். அதன்பின் இந்திராதான் வருவார் என்று கணித்து அவருடன் சேர்ந்து வெற்றிக் கனியைச் சுவைத்தார். 

இந்த பாராளுமன்றத் தேர்தல் தோல்வி, எம்ஜியாருக்கு ஒரு பின்னடைவையும் கருணாநிதிக்கு ஒரு உத்வேகத்தையும் கொடுத்தது. கருணாநிதி இந்த சூட்டோடு சூடாக எம்ஜியருடைய ஆட்சியை  தமிழ்நாட்டில் கலைக்க வேண்டுமென்று இந்திராவுக்கு நெருக்கடி கொடுக்க ஆரம்பித்தார். இந்திராவுக்கும், எம்ஜியாரை  பழிதீர்க்க ஒரு சந்தர்ப்பம் என்று  எம்ஜியார் ஆட்சி வலுவான காரணங்கள்  இன்றி கலைக்கப்பட்டது. உடனே சூட்டோடு சூடாக மறு தேர்தலும் அறிவிக்கப் பட்டது. பாராளுமன்ற வெற்றி தந்த ருசியில் மீண்டும் இந்திராவும் கருணாநிதியும் சட்ட மன்றத்தேர்தலுக்கும் கூட்டணி அமைத்தனர். பாராளுமன்றத் தேர்தலைப்  போலவே சட்டமன்றத் தேர்தலிலும் மிகப் பெரும் வெற்றி  பெறலாம் என்று கருணாநிதி போட்ட கணக்குத் தப்புக் கணக்காயிற்று . கருணாநிதியின் அரசியல் சாணக்கியத்தனம் எம்ஜியாரின் புகழுக்கு முன் மண்டியிட்டது. முதலமைச்சராக பதவி ஏற்பதற்காக கருணாநிதி எடுத்து வைத்திருந்த பட்டு வேட்டியும், இருபுறமும் அமர  வள்ளி,  தெய்வானைகளுக்காக அவர் எடுத்து வைத்திருந்த பட்டுப் புடவைகளும் கருணாநிதியை பார்த்து சிரித்தன. கருணாநிதியின் திரைப் பட நிறுவனமான மேகலா பிக்சர்ஸ் தயாரித்த எங்கள் தங்கம் என்கிற திரைப் படத்தில் எம்ஜியார் ஒரு கதா காலட்சேபம் நடத்துவார். அதில் “ விதி வலியது” என்று கூறுவார். அது உண்மையானது.  180 இடங்கள் பெற்று மீண்டும் எம்ஜியார் முதல்வரானார்.   எம்ஜியார் இருக்கும்வரை முதல்வர் பதவி என்பது கருணாநிதிக்கு  கானல் நீரானது. 

ஆட்சிக் கட்டிலைப் பிடித்து அசத்திய எம்ஜியார்  திடீரென உடல் நலக்குறைவுக்கு ஆளானார். எம்ஜியாரின் உடல் நிலை பற்றி பல்வேறு கருத்துக்கள் வெளியிடப் பட்டன. எம்ஜியாரின் உடல் நிலை என்பதால் சாதாரண மக்கள் கூட அக்கறை காட்டினர். இதனால் கிட்னி என்றால் என்ன, அப்பல்லோ ஆஸ்பத்திரி என்றால் என்ன டயாலிஸ்  என்றால் என்ன என்பதெல்லாம் பட்டி தொட்டிகளில் கூட பரவ ஆரம்பித்தது. மக்கள் கூட்டம் அப்பலோ ஆஸ்பத்திரியில் அலை மோத ஆரம்பித்தது. ஒருவேளை அந்த ஆஸ்பத்திரியிலேயே  ஏதாவது நடக்கக் கூடாதது நடந்து இருந்தால் அப்பலோ ஆஸ்பத்திரியே அப்பலோ ராக்கெட்டில் விண்ணை நோக்கிப் பறந்து இருக்கும். இதனை உணர்ந்த அந்த நிர்வாகம், எம்ஜியாரை அமெரிக்காவுக்கு சிகிச்சைக்காக அனுப்பிவைக்க பரிந்துரைத்தது. எம்ஜியாருடைய ஒரு சிறு நீரகத்துக்கு மாற்று சிறுநீரகம் தருவதற்கு எம்ஜியாருடைய அண்ணன் சக்கரபாணியின் மகள் லீலாவதி முன் வந்தார்.  எம்ஜியார் அமெரிக்காவுக்கு சிகிச்சைக்காகப்  பறந்தார்.

அதே நேரம் இந்திராகாந்தியும் தனது தனிப் பாதுகாப்புக்  காவலர் ஒருவரால் சுடப் பட்டு இறந்தார். ராஜீவ் காந்தி பிரதமரானார்.  இந்திரா இறந்த செய்தியைக் கூட எம்ஜியார் அறியா வண்ணம் பார்த்துக் கொண்டனர். 

இந்த நிலையில் முதமைச்சர் நோய்ப்படுக்கையில் கிடக்கும் போது இனி எம்ஜியாரால் இயங்க முடியாது எனவே தன்னை முதலமைச்சராக ஆக்க வேண்டுமென்று ராஜீவ் காந்திக்கு தனிப்பட, எம்ஜியாரின் பிரியத்துக் குரியவர்களில் ஒருவராக இருந்த ஜெயலலிதா  கடிதம் எழுதினார் என்று அதிகாரபூர்வமற்ற  ஒரு தகவல் கசிந்தது. முதலமைச்சரின் நிலையைப் பயன்படுத்தி பண்ருட்டி இராமச்சந்திரன், திருநாவுக்கரசு ஆகியோர் நிர்வாகத்தில் திருவிளையாடல்கள் செய்ததாகவும் செய்திகள் வந்தன. அத்துடன் இட ஒதுக்கீடு கேட்டு வன்னியர்கள்  போராட்டம் தீவிரமாக நடைபெற்று பல இடங்களில் காடுவெட்டிகள் மரம் வெட்டிகளாக மாறி, தீவிரமான போராட்டத்தால் பனிரெண்டு நாட்கள்  தமிழகம் சாலைப் போக்குவரத்து இல்லாமல் ஸ்தம்பித்தது.

இந்நிலையில் எம்ஜியாருக்கு     அமெரிக்காவில் வெற்றிகரமாக  அறுவை சிகிச்சை முடிந்து நலம் பெற்று மீண்டும்  வருகிறார் என்கிற செய்தி மக்களிடம் பரவியது.  சொல்லபோனால் சாதாரண மக்களுக்கு தேனாக இனித்தது ஆனால் தம்பி எப்போ சாவான் திண்ணை எப்போ காலியாகும் என்று எதிர்பார்த்த பலருக்கு தேள் கொட்டியது போல் இருந்தது. 

சென்னை விமான நிலையத்தில் அலை எனத் திரண்ட மக்கள் வெள்ளத்துக் கிடையில் அமெரிக்காவிலிருந்து மனைவி  ஜானகியுடன் அதே தொப்பி, துண்டு , கண்ணாடி அணிந்து  எம்ஜியார் வந்து இறங்கினார். தர்மம் தலைகாக்கும் என்ற கோஷம் விண்ணை அதிரச் செய்தது. காலத்தை வென்றவன் நீ ! காவியமானவன் நீ ! என்ற கானம் காதுகளைக் கிழித்தது. 

அதே நேரம்   போயஸ் தோட்டத்தில் அடிமைப் பெண் அமைதியின்றி குறுக்கும் நெடுக்குமாக நடந்து கொண்டிருந்தார். 

இனி என்ன நடந்தது? பார்க்கலாமே!

தொடரும். 

ஆக்கம்: P. முத்துப் பேட்டை  பகுருதீன் B.Sc;

உருவாக்கம் : இப்ராஹீம் அன்சாரி