எக்ஸ்க்யூஸ்மி.... ! 43

ஏதாவது அலுவலகத்தில் நாம் காத்திருக்கும்போது, காருக்கு பெட்ரோல் போடும்போது அது நிறையும் வரை, மார்க்கெட்டில் வீட்டுக்கு தேவையானது வாங்கி வந்த பிறகு "நான் சொன்னது இது இல்லே" என்று அதிமுக்கியத்துவம் கொடுத்து மனைவி சொன்ன பிறகு எருமை மாட்டில் மழை பெய்த மாதிரி நாம் சொல்லும் பதிலுக்கு பிறகு இருக்கும் அமைதிகளில் சில கேள்விகள் தோன்றும்..அவைகளின் தொகுப்பே இது. சிலர் இன்னும் சில கேள்விகள் இருக்கிறது என்று இன்னும் எழுதலாம். ‘இவ்வளவு பேசற நீ பதில் சொல்லேன்” என்று என்னிடம் கேட்கலாம், சாரி இந்த வாரம் எனக்கு கேள்வி கேட்கிற டூட்டி மட்டும்தான்.

1. எச்சில் மூலம் காச நோய் பரவும் என்று கண்டுபிடித்து குறைந்தது 70 வருடமாவது இருக்க வேண்டும். இன்னும் ஏன் 'படிக்கன் - எச்சில் துப்பும் பாத்திரம்" இதை நம் ஊரில் இன்னும் பயன்படுத்துகிறார்கள்?

2.  வெளிநாட்டுக்கு போக வீட்டில் உள்ள பிள்ளைகளுக்காக 3 லட்சம் 5 லட்சம் என்று ஏற்பாடு செய்து தரும் நம் வீட்டு பெண்கள், ஏன் உள்ளூரில் ஒரு மளிகைக்கடை வைக்கபோகிறேன் என்று கேட்டால் மட்டும் பஞ்சப்பாட்டு பாடுகிறார்கள்?

3.    டாய்லெட் பயன்படுத்துவது 100 ஆண்டுகளை தாண்டி இருந்தும் ஏன் சில இடங்களில் [ சில பள்ளிவாசளில் கூட ] டாய்லெட்டுக்கு பூட்டு போட்டு வைத்திருக்கிறார்கள்? ...அதை சரியாக பயன் படுத்த கற்றுக்கொள்ள  100 ஆண்டுகள் போதாதா?

4.   நம் ஊரில் உள்ள இளைஞர்கள் நன்றாக படித்து நிறைய வளைத்தளம் எல்லாம் வெற்றிகரமாக நடத்தி அதில் 'கந்தூரி கூடாது, வரதட்சணை ஒரு சமுதாயக்கேடு" என்று மாஞ்சி , மாஞ்சி எழுதுகிறார்கள் [ நானும் தான் ] ..அதை எல்லாம் "சம்பந்தபட்டவைங்க' படிப்பாப்லெயா?...எனக்கு நம்பிக்கையில்லே..உங்களுக்கு இருக்கா?

5. இந்த கம்பன் எக்ஸ்பிரஸ் மேட்டருக்கு இன்னும் உயிர் இருக்கா? இல்லை அதுவும் லெமுரியா கண்டம் மாதிரி சரித்திரப்புத்தகத்தில் எழுதப்பட்டு மறந்து போகுமா?

6.   சிலரின் வலைத்தளம் ஏன் ஆரம்பித்த சமயத்தில் இருந்த சுறுசுறுப்பு பிறகு காணாமல் போனது ?

7. ஊரில் உள்ளவர்களுக்கு சில உயர்தர சென்ட் கொடுக்கும்போது அதன் விலையை சொல்லி கொடுப்பது நல்லதா/ கெட்டதா?...ஏனெனில் அவர்கள் பயன்படுத்தும் அளவு அப்படி.

8.      டீன் ஏஜ் பசங்க கையில் 3ஜி , 4 ஜி போனை கொடுத்து விட்டு அவன் நல்ல விசயங்களை மட்டும்தான் பார்ப்பான் எனும் நம்பிக்கை.....எப்படி?

9. கடைசி வரை உழைக்க மாட்டேன் என்று அடம் பிடிப்பவர்களுக்கு  மட்டும் எந்த சுரப்பியில் ரோசம் சுரக்கிறது?

10. சன் டி வி செய்திகளில் வரும் தல செய்தியாளர்கள் எப்படி இந்த கொழுத்தும் வெயிலில் இவ்வளவு விலாவாரியாக செய்தியை விவரிக்கிறேன் என இப்படி 'ஆத்து ஆத்து'னு ஆத்துராய்ங்க?

11.  ஊரில் டிரைவர்கள் எப்படி ரைட் சிக்னல் போட்டால் பின்னால் வரும் காருக்கு வழி விடுவதாக கண்டுபிடித்து கடைபிடிக்கிறார்கள்? [ குறிப்பு: இது தவறு என்று எல்லோருக்கும் தெரிந்தாலும் சமீபத்தில் சென்னை போக்குவரத்து போலீஸ் கமிஷனர் 'மிகப்பெரிய தவறு' என்று பேட்டியளித்தார்.---- டூ லேட் பிரதர்.]

 

12.   அரசு மருத்துவமனைகளின் சேவைத்தரமும் , நம்பிக்கையும் ஏன் சிதைந்தது?.

13.   சேம்பிளுக்கு வெட்டித்தரும் மாம்பழத்தின் ருசி ஏன் காசு கொடுத்து வாங்கியபோது காணாமல் போகிறது? --யாராவது இது 'ஹைக்கூ மாதிரி இருக்குனு எழுதினா ஒரு டைகர்பாம்  பாட்டில் இலவசம்'-

14.   விமானம் தரையிறங்கி ஒடுபாதையில் ஒடி நிற்குமுன் எழுந்து நின்று பெட்டிகளை கேபினிலிருந்து எடுக்கும் பழக்கம் இந்தியர்களிடம் ஏன் அதிகம் காணப்படுகிறது?

 

15.   கைத்தொலைபேசியில் அழைத்து "எங்கே இருக்கிறே? ' எனும் கேள்வி எத்தனை பேருக்கு எவ்வளவு விதமான தர்ம சங்கடத்தை ஏற்படுத்தியிருக்கிறது?

…..இதை தந்திபோல் பாவித்து உடன் பதில்போடுமாறு கேட்டுக்கொள்கிறேன். [ஹாஸ்டலில் இருக்கும்போது பணம் கேட்டு வீட்டுக்கு எழுதும் வாசகம்...யாரும் மறந்து விடக்கூடாதல்லவா?]

-ZAKIR HUSSAIN

Note:  படமெல்லாம் பெருசு பெருசா இருக்கும்போதே தெரிந்திருக்குமே "பதிவு சொதப்பல்" னு