டெலஸ்கோப் - தொலைநோக்கி ! 27

விண்வெளி ஆராய்ச்சிக்கு பயன்படக் கூடிய மிகவும் முக்கியமான கருவி இந்த டெலஸ்கோப். பூமியில் இருந்து இந்த டெலஸ்கோப் கருவியைப் பயன்படுத்தி விண்வெளியில் உள்ள கிரகங்கள் மற்றும் நட்ச்சத்திரங்களை  ஆராய்ச்சி செய்கின்றனர்.  தற்போது ஒருபடி மேலே போய் இந்த டெலஸ்கோப்பை பூமிக்கு மேலே 600 கிலோமீட்டர் தூரத்தில் பூமியை சுற்றி வலம் வரும் படி செய்து பல கிரகங்களையும் படம் எடுத்து அனுப்பும்படி  செய்து அதனை பூமியில் இருந்து கொண்டே ஆராய்ச்சி செய்கின்றனர். அது சரி இந்த டெலஸ்கோப்பை கண்டு பிடித்தவர் யார் தெரியுமா ? அட ! இதென்ன கேள்வி என்றுதானே கேட்கிறீர்கள், அவர்தான் கலிலியோ இருப்பினும் மேலும் விபரங்களை நம்ம விக்கி அங்கிளிடமே கேட்போமே.

"தொலைநோக்கி தொலைவில் இருக்கும் பொருட்களைத் தெளிவாக பார்க்கப் பயன்படும் கருவி ஆகும். குறிப்பாக வானியல் பொருட்களையும் நிகழ்வுகளையும் அவதானிக்க இது உதவுகிறது. கருவி ஒன்றில் பயன்படுத்தப்படுவதற்கான உருப்பெருக்கும் வில்லையொன்றை விபரிக்கும் முதல் ஒளியியல் ஆய்வு, ஈராக்கியரான இபின் அல்-ஹேதம் என்பவரால் எழுதப்பட்ட ஒளியியல் நூல் என்னும் நூலில் காணப்படுகின்றது. இவரது விபரங்கள், பிற்காலத்து, ஐரோப்பிய தொலைநோக்கித் தொழில்நுட்ப வளர்ச்சிக்கு அடிப்படைகளை அமைத்துக் கொடுத்தன எனலாம். அத்துடன், ஒளிமுறிவு, பரவளைவு ஆடிகள் போன்றவை தொடர்பான இவரது ஆய்வுகளும் அறிவியல் புரட்சிக்கு உதவின.

கலீலியோ கலிலி தான் மேம்படுத்திய தொலைநோக்கியைக் கொண்டு வானியல் நிகழ்வுகளை அவதானித்து சூரிய மையக் கோட்பாட்டை அறிவியல் நோக்கில் நிறுவினார். கிறிஸ்தவ சமய நிறுவனங்களின் எதிர்ப்புக்கு மத்தியில் நிகழ்ந்த இந்தத் திருப்பம் ஐரோப்பிய அறிவியற் புரட்சிக்கு வித்திட்டது.

தொடக்ககாலத் தொலை நோக்கிகள் லியோர்னாட் டிக்கெஸ், தாகி அல்-டின் போன்றோரால் 16 ஆம் நூற்றாண்டிலேயே விபரிக்கப்பட்டிருந்த போதும், நடைமுறையில் செயல்பட்ட தொலைநோக்கியை முதலில், 1608 ஆம் ஆண்டில் உருவாக்கியவர், ஜெர்மன்-ஒல்லாந்த கண்ணாடி வில்லை செய்வோரான ஹான்ஸ் லிப்பர்ஷே என்பவராவார். தொலைநோக்கி என்னும் பெயர் பொதுவாகக் கட்புலனாகும் ஒளியுடனேயே தொடர்புபடுத்தப்படினும், இது, மின்காந்த நிறமாலையின் பெரும்பகுதிகளை அவதானிக்க உதவும் பலவகைக் கருவிகளையும் குறிக்கப் பயன்படுகிறது."

ஒரே பொருளை பல தினுசுகளில் வேலை வாங்குவதில் அவர்கள் (மேலை நாட்டினர்) பலே கில்லாடிகள் என்பது உண்மை. நாமும் இதில் சளைத்தவர்கள் அல்ல என்பதை இங்கு நாம் நிரூபித்து ஆகவேண்டும் உதாரணமாக இட்லிமா நாம் இட்லி மட்டும் அவிப்பதில்லை அதை தோசையாகவும் சுடுகின்றோம் ரோஸ்டாகவும் சுடுகின்றோம் அதே ரோஸ்ட்டுக்குள் பூரிக்கு வைக்கும் உருளைக் கிழங்கு மசாலாவை வைத்து மசால் தோசையாகவும் செய்கின்றோம் அவர்கள் விஞ்ஞானத்தில் வித்தியாசம் செய்கின்றார்கள், நாம் உணவில் வித்தியாசம் செய்கின்றோம். இதுதான் நமக்கும் அவர்களுக்கும் உள்ள வித்தியாசம். 

விசயத்திற்கு வருவோம், பூமிக்கு மேலே சுற்றி வரும் இந்த டெலஸ் கோப் எவ்வளவு தூரத்தில் உள்ள கோள்களை மற்றும் நட்சத்திரங்களைப் படம் எடுக்கும் என்று பார்ப்போம். இவை 14 பில்லியன் ஒளி ஆண்டு தூரம் வரை உள்ள கோள்களை மிக தெளிவாகப் படம் எடுக்கும். 

அது என்ன ஒளி ஆண்டு? நமக்கு தெரிந்தது எல்லாம் கால் ஆண்டு, அரையாண்டு, முழுஆண்டு, அதையும் தாண்டி கிமு, கிபி, மற்றும் ஹிஜ்ரி.

இப்போது ஒளி ஆண்டு பற்றி பார்ப்போம்.

ஓர் ஒளி ஆண்டு தூரம் என்றால் ஒளியானது ஒரு வருடத்தில் எவ்வளவு தூரம் பயணம் செய்யுமோ அதைத்தான் ஓர் ஒளி ஆண்டு என்று சொல்கின்றோம் ,ஒளி ஒரு வினாடியில் 1,86,000 மைல் (கிலோ மீட்டர் அல்ல) தூரம் பயணம் செய்யும். அப்படி என்றால் ஒரு நாளில் ஒளி எவ்வளவு தூரம் பயணம்செய்யும் என்று கணக்கிட்டு பார்த்துக்கொள்ளுங்கள். அதை அப்படியே (365 நாட்களில்) ஒரு வருடத்திற்கு பெருக்கிகொண்டால் அதுவே ஓர் ஒளி ஆண்டாகும்,

நம்மை நாம் மாற்றிக்கொள்வோமா! 

பல ஒளி ஆண்டுகள் தூரத்தில் உள்ளதை எல்லாம் நாம் அறிவியல் முன்னேற்றத்தால் மிக சாதுர்யமாக பார்த்துவிடுகின்றோம். அன்றாட வாழ்க்கையில் ஒரு சில விசயங்களை கோட்டை விட்டுவிடுகின்றோம்.

சமீபத்தில் நண்பர் ஒருவரை நீண்ட நாட்களுக்குப்பின் சந்திக்க நேர்ந்தது சலாம் சொல்லி பேச தொடங்கியபோது அந்த நண்பருக்கு சொந்தக்காரர் ஒருவர்  வந்து விட்டார். அவரைப் பார்த்ததும் ஹான்ட் பிரேக் போடாத கார் நகர்வதுபோல் என்னை விட்டு நகர்ந்து அவரிடம் (என்னை தனியே விட்டுவிட்டு )போய் பேசிக்கொண்டு இருந்தபோது நண்பருக்கு வேண்டிய இன்னொருவர் வந்துவிட்டார் அப்போது ஃபஸ்ட் கியர் போட்ட காரைப்போல் பேசிக்கொண்டு இருந்த இரண்டாவது ஆளையும் விட்டுவிட்டு நகர்ந்து மூன்றாவது ஆள் கூட போயே போய்விட்டார் !

இதை படிக்கும் சகோதரர்களுக்கு இப்படி ஒரு சூழ்நிலை வந்தால் பேசிக்கொண்டு இருப்பவரிடம் அனுமதியை நளினமாக சொல்லிவிட்டு நகர்ந்தால் கொஞ்சமாவது நம்மீது ஒரு மறியாதை எழும் அப்படியில்லை என்றால் நம்மீது அவருக்கு அநியாத்துக்கு கோபம்தான் வரும்.

- Sஹமீத்


வெட்டியது (cut) : விக்கிபீடியா அங்கிளிடம்
ஒட்டியது (paste) : 2,3 மற்றும் 4வது பத்திகளில்