MSM(n) அனுபவங்களின் பயணம் - தொடர்கிறது - 4 16

என்னுடைய நண்பன் பெயர் சையது கபீர். சொந்த ஊர் வேலூர். படித்தது என்னவோ பன்னிரண்டாம் வகுப்பு வரை தான். பிறகு ஐ.டி.ஐ. யில் படித்து டிப்ளமோ வாங்கியும் பிறகு பகுதி நேர படிப்பாக என்.டி.டீ. என்று சொல்லப்படும் (எக்ஸ்ரே) வெல்டிங் சம்மந்தப்பட்ட குறுகிய கால டிப்ளமோ படித்தும் நான் முன்பு சவுதி யான்புவில் பணிபுரிந்த ஸ்டீல் கம்பெனியில் தரக்கட்டுப்பாட்டு (க்யூ.சி) துறையில் புதியவனாக பணிக்கு வந்து சேர்ந்தான். நிறுவனத்திற்குள்ளேயே இரண்டு வருட குறைந்த பட்ச அனுபவம் அவனுக்கு வெல்டிங் பணியில் மெல்லமெல்ல கிடைத்தது. ஆங்கில அறிவு சொல்லிக்கொள்ளும் அளவுக்கு அவனிடம் இல்லை (நமக்கு மட்டும் என்னா கிழிக்கிதாம்? என்று நமக்கு நாமே கேட்டுக்கொள்வது வேறு விசயம்) பிறகு அராம்க்கோ போன்ற பெரிய எண்ணெய் நிறுவனங்களின் ப்ராஜக்ட்டில் பணி புரிய இது போன்ற துறைக்கு அமெரிக்க அல்லது இங்கிலாந்தின் அங்கீகரிக்கப்பட்ட நிறுவனங்கள் பிரத்யேகமாக நடத்தும் தேர்வில் தேர்ச்சி பெற்று சான்றிதழ் பெற வேண்டும்.

சில நிறுவனங்கள் தங்கள் பணியாளர்களுக்கு இந்த தேர்வு எழுத தேவையான அனைத்து வசதிகளை செய்து தந்தும் செலவுகளையும் தானே (தானே புயலல்ல) ஏற்றுக்கொள்ளும்.

அது போல் என் நண்பனுக்கு சென்னையில் உள்ள (அமெரிக்கன் வெல்டிங் சொசைட்டியின்) பிரத்யேக கிளையில் சென்று தேர்வு எழுத தேவையான அனைத்து வசதிகளை நான் பணிபுரியும் நிறுவனம் செய்து கொடுத்தும் அந்த தேர்வுக்கு மொத்தம் ஆகும் செலவு 1 லட்சம் ரூபாயும் முன்பே செலுத்தி ஊருக்கு அனுப்பி தேர்வு எழுத வைத்தது. என் நண்பனுக்கு ஆங்கிலம் அரைகுறையாக இருந்தாலும் எதையும் பொட்ட மனப்பாடம் செய்து மனதில் நிறுத்திக்கொள்ளும் திறமையுள்ளவன். அதுபோல் அவனும் தேர்வுக்கு தன்னை தயார் செய்து சென்னை சென்று முறையே எழுதியும் 2 மாதங்களுக்குப்பின் வந்த தேர்வு முடிவில் பாஸாகி விட்டான். மாஷா அல்லாஹ்.

அதனால் நான் பணிபுரியும் நிறுவனம் செய்த செலவு வீண் போகவில்லை. கம்பெனிக்கு பெரிய நிறுவனங்கள் நிர்ணயிக்கும் தேர்ச்சி பெற்ற ஒரு ஆள் கிடைத்த சந்தோசம். அவன் தேர்வில் தேர்ச்சி பெற்றதால் 2500 ரியால் சம்பளம் வாங்கிக்கொண்டிருந்த அவனுக்கு 500 ரியால் சம்பள உயர்வும் கிடைத்து சம்பளம் 3000 ரியால் ஆனது. கம்பெனியும் தன் செலவில் தேர்வு எழுத வைத்ததால் இரண்டு வருடம் நிறுவனத்தை விட்டு வெளியேறக்கூடாது என பாண்டு பேப்பரில் எழுதி வாங்கிக்கொண்டது. அவனும் அப்படியே அடக்கத்துடன் இரண்டு வருடங்கள் வேலை செய்து நாட்களை ஓட்டினான்.

பொதுவாக அமெரிக்கர்கள் அதிகம் வேலை செய்யும் எண்ணெய் & வாயு நிறுவனங்களில் அமெரிக்க நிறுவனங்கள் அங்கீகரிக்கும் தேர்வு முறைப்படி தேர்ச்சி பெற்றவர்களைப் பெறவே விரும்புவர். என் நண்பனுக்கு இந்த விசயத்தில் பிரச்சினை இல்லாமல் போனது. ஆனால் இங்கிலாந்து நாட்டவர்கள் அதிகம் வேலை செய்யும் எண்ணெய் & வாயு நிறுவனங்களில் அவர்கள் நாட்டு நிறுவனங்கள் அங்கீகரிக்கும் தேர்வு முறைப்படி தேர்ச்சி பெற்றவர்களைப் பெறவே விரும்புவர். இதிலும் சிக்கல் வந்து விடக்கூடாது என்றெண்ணிய என் நண்பன்  இங்கிலாந்து நாட்டின் அங்கீகாரம் பெற்ற நிறுவனம் நடத்தும் இதற்கான பிரத்யேக தேர்வையும் தன் சொந்த செலவில் எழுதி பாஸாகி விட்டான். மாஷா அல்லாஹ்.

பிறகென்ன இரண்டு வருடமும் கழிந்து நிறுவனம் வைத்திருந்த ஒரிஜினல் சர்ட்பிகேட்டையும் முறையே பெற்று வேறொரு நல்ல சம்பளத்துடன் கூடிய வேலைக்கு கத்தார் நாட்டிற்கு பறந்து விட்டான். பிறகு அங்கு குடும்பத்தை நாட்டிலிருந்து வரவழைத்து சில வருடங்கள் சந்தோசமாக இருந்தும் பிறகு அங்கிருந்து வேறொரு நல்ல வேலை கிடைத்ததென்று சொல்லி அபுதாபிக்கு மாற்றலாகி இன்று நல்ல நிலையில் கை நிறைய சம்பளத்துடன் இருந்து வருகிறான். அல்ஹம்துலில்லாஹ்.

செய்யும் தொழில்/பணியில் சிறப்படைய அதில் மென்மேலும் வளர்ச்சியடைய என்னன்னவெல்லாம் செய்ய வேண்டுமோ அதை முறையே செய்தும் நிறுவனங்கள் தனக்கு தர வேண்டிய சம்பளத்தை தானே தீர்மானிக்க வேண்டிய ஒரு நல்ல நிலையை ஏற்படுத்திக்கொண்டிருக்கிறான் உரிய தேர்வுகள் எழுதி தன்வசம் சான்றிதழ்கள் வைத்திருப்பதனால் (நாட்டில் வாகனங்களின் நம்பர் பிளேட் கலரை அடிக்கடி அரசு மாற்றுவதால் வேண்டிய எல்லாக்கலரிலும் முன்பே தயார் செய்து நம்பர் பிளேட்களை வைத்துக்கொண்டு போக்குவரத்து போலீசார் கேட்கும் பொழுது டக்குண்டு எடுத்து கொடுப்பது போல்). அவன் வேலை சம்மந்தமாக எந்த சர்ட்பிகேட் கேட்டாலும் அதை உடனே காண்பித்து நேர்முக தேர்வு நடத்துபவர்களை கதிகலங்கச்செய்ய வைத்து தான் கேட்பதை தர வைக்க முடிகிறது.

முல்லைப்பெரியாறு பார்ட்டிகள் ஆங்கிலத்தை அரைகுறையாக பேச/எழுத கற்றுக்கொண்டு என்னா அலப்பறை செய்கிறார்கள் அரபுநாடுகளில்?....நம்ம புள்ளையலுவோ என்னாண்டாக்கா மாஸ்ட்டர் டிகிரி படிச்சிட்டு வந்து வாயடைத்து நிற்பது வேதனையளிக்கிறது. ஒன்னுமே படிக்காமல் வெறும் பேச்சை வைத்தே எத்தனையோ பேர் காலத்தை கச்சிதமாக ஓட்டிக்கொண்டிருக்கிறார்கள் தெரியுமா? படித்த படிப்புகளெல்லாம் உள்ளத்தில் உள்ளதை முறையே வெளிக்கொண்டு வர தடையாக இருந்தால் என்னத்துக்கு இந்த படிப்பு?

இங்கு சவுதி அரேபியாவில் சரிவர படிப்பறிவே இல்லாமல் வெறுமனே வந்து கஃபில் என்னும் தன்னைப்போன்று சரிவர படிப்பறிவு இல்லாமல் இருக்கும் சவுதி முதலாளியை பிடித்து (ஒரு சிறு தொகையை மாதாமாதம் அவர்களுக்கு கப்பம் கொடுத்து விட்டு) ஒரு நிறுவனத்தை பெரும் முதலின்றி தொடங்கி ஆங்காங்கே வேலை தேடிக்கொண்டிருக்கும் திறமையான மனிதவளங்களை ஒன்று திரட்டி தேவையான நிறுவனங்களுக்கு (மணிக்கு இவ்வளவு என) நல்ல விலைக்கு(விற்று)அளித்து பல கோடிகளைக்கண்டு அதில் புரளும் முல்லைப்பெரியாறு பார்ட்டிகள் வரவர இங்கு அதிகரித்து வருகிறார்கள். லேண்ட் ரோவர், மெர்சிடஸ், பி.எம்.டபுள்யூ, லக்ஸஸ் போன்ற விலையுயர்ந்த கார்களில் அவர்கள் பவனி வருவதை நாம் ஆங்காங்கே காண முடிகிறது.

இதைக்கண்டு மனித இயல்பான பொறாமை ஒருபுறம் இருந்தாலும் அவர்களின் விடா முயற்சியும், அசராத நம்பிக்கையும், இடர்களைக்கண்டு பயமற்ற மனோபாவமும் அவர்களை இந்த நல்ல நிலைக்கு கொண்டு வந்து நிப்பாட்டி விடுகிறது. முறையே படித்து பல்கலைக்கழக தேர்வில் முதல் மதிப்பெண் பெற்று தங்கப்பதக்கம் வென்று வந்தவனைக்கூட இவர்கள் முன் கை கட்டி நிற்க வைத்து விடுகிறது.

எல்லாம் முறையான கல்வி (பட்டம் மற்றும் பட்டயப்படிப்புகள்) செய்யும் வேலைகள். நல்ல பாடங்கள் நம்முடன் இருப்பவர்கள் மற்றும் சுற்று வட்டாரங்கள் மூலமே இறைவன் நடாத்திக்கொண்டிருக்கிறான். அதன் மூலம் படிப்பினை பெற நாம் தான் தயாராக வேண்டும்.

இவைகளெல்லாம் நான் இங்கு சுட்டிக்காட்டுவது படிக்கும் உங்களுக்காக மட்டுமல்ல எனக்காகவும் எழுதிக்கொண்டிருக்கிறேன். காரணம் நல்ல வாய்ப்புகளை நழுவ விட்டு விட்டால் பிறகு ஒரு நாள் அதே வாய்ப்புகள் அல்லது அதை விட சிறந்த வாய்ப்புகள் நம்மைத்தேடி வந்தாலும் நம் வயதும், ஆரோக்கியக்குறைவும் ஓரணியில் ஒன்று சேர்ந்து நமக்கு எதிராக ஒத்துழையாமை இயக்கத்தை ஆரம்பித்து நம்மை வாழ்வின் உச்சத்திற்கு செல்வதிலிருந்து தடுத்து ஓரங்கட்டி விடும்.

"இளமையில் கல்" என்ற பழமொழி இருப்பது போல் "உரிய வயதிற்குள் வேண்டியதை அடைந்து கொள்" என்பது வாழ்வில் சொல்லப்படாத ஒரு புதுமொழியாக இருக்கிறது. 

மேற்கண்டவைகளெல்லாம் ஒவ்வொருவர் வாழ்விலும் மாயாஜாலங்கள் மூலம் நடந்தேறுபவையல்ல. அவரவரின் அயராத முயற்சியும், தீராத தேட்டமும் அவர்களுக்கு இறைவன் விரும்பியவற்றை விரைவிலேயே தந்து விடுகிறான்.

அனுபவப்பயணம் இன்னும் தொடரும்....

- மு.செ.மு. நெய்னா முஹம்மது