கால்பந்து இறுதிப்போட்டியில் அதிரை அணி அபார வெற்றி 15

Adirai Friends Football Association, AFFA கால்பந்து அணி இன்று மேலனத்தம் என்ற ஊரில் நடைப்பெற்ற கால்பந்தாட்ட இறுதிப் போட்டியில் பிச்சினிக்காடு (தஞ்சாவூர் வீரர்களை கொண்ட) அணியை வீழ்த்தி அபார வெற்றி பெற்று முதன் முறையாக இந்த வருடம் கோப்பையை வென்றது.

அதிரையை அடுத்துள்ள மதுக்கூருக்கு அருகில் உள்ள கிராமம் தான் மேலானத்தம். கடந்த 40 ஆண்டுகளாக கால்பந்து தொடர்ப்போட்டி வருடா வருடம் நடைப்பெற்று வருகிறது. கடந்த ஒரு வாரகாலமாக நடைப்பெற்றுவரும் ஆட்டங்களில் நமதூரைச் சேர்ந்த நம்பர் 1 கால்பந்து அணியான AFFA கடந்த சில தினங்களாக விளையாடி அதிரையிலும், மேலனத்தத்திலும் அதிக வரவேற்பை பெற்றது.

அதிரையில் உள்ள விளையாட்டு திடல்கள் தரத்திற்கு இல்லாவிட்டாலும், கால்பந்து விளையாட தகுதியான இடத்தில் தான் இறுதிப்போட்டி நடைப்பெற்றது. உள்ளூர் ரசிகர்களைவிட அதிரை கால்பந்தாட்ட ரசிகர்களே அரங்கத்தை சூழ்ந்திருந்தனர்.

இறுதி போட்டி என்பதால், முக்கியஸ்தர்கள் ஆட்டதை துவக்கிவைத்தனர். AFFA அணியில் முக்கிய வீரர்களான ஜமால், ஹைதர் அலி, அஸ்ரப், புகாரி ஆகியோர் களமிறங்கினர். போட்டி ஆரம்பித்தது முதல் அதிரை அணியின் ஆதிக்கமே அதிகமாக இருந்தது. ஆட்டம் ஆரம்பித்த 10வது நிமிடத்தில் அதிரை அணி தலைவர் அஸ்ரப் மிகச் சிறப்பான முறையில் தன் அணிக்கான முதல் கோலை அடித்தார். 12 வது நிமிடத்தில் பிச்சினிக்காடு அணியினர் பதிலுக்கு தங்களின் முதல் கோலை அடித்தனர். அதிரை ரசிகர்களிடையே ஒரே பரப்பரப்பு. அதிரை அணியின் சூப்பர் ஸ்டார் சீனியர் வீரர் ஹைதர் அலி தனக்கு கிடைத்த அருமையான FREE KICK வாய்ப்பை மிகச் சிறப்பாக பயன்படுத்தி அதிரை அணிக்காக இரண்டாவது கோலை போட்டதும் அதிரை ரசிகர்களின் உற்சாக சத்தம் மேலனத்தையே உலுக்கியது என்று சொல்லுமளவுக்கு இருந்தது. முதல் பகுதி நேர ஆட்டத்தின் முடிவில் அதிரை அணி 2-1 கோல் கணக்கில் முன்னனியில் இருந்தது.

இடைவேளை நேரத்தில் ஒரு சில முன்னால் அதிரை கால்பந்து விளையாட்டு வீரர்கள் தங்களின் ஆலோசனைகளை அதிரை AFFA அணி வீரர்களிடமும், பயிற்சியாளரிடமும் பகிர்ந்துக்கொண்டனர்.

இரண்டாம் பகுதிநேர ஆட்டத்தில் அதிரை AFFA அணியில் முழு ஆதிக்கமே மேலோங்கியிருந்தது. ஆட்டம் ஆரம்பித்த சில நிமிடங்களின் அதிரையின் ‘ரொனால்டோ’ சைபுதீன் மிக அற்புதமான ஒரு கோலை அடித்து தன் அணியின் வெற்றியை உறுதி செய்தார். பிச்சினிக்காடு அணியினர் ஒரு சில மாற்றங்கள் செய்தும் அவர்களால் மேலும் கோல்கள் எதுவும் போட முடியவில்லை. காரணம் அதிரை அணியில் DEFENCE PLAYERS 3 பேரும் மிக திறமையாக தங்களின் ஆட்டத்தை வெளிபடுத்தினார்கள். இளம் நட்சத்திர வீரர் முபீஸின் ஆட்டம் குறிப்பிட்டு சொல்லும்படியாக இருந்தது, அதிரை அணியின் சூப்பர் ஸ்டார் ஹைதர் அலிக்கு மேலும் கோல் போடுவதற்காக 3 எளிதான வாய்ப்புகள் கிடைத்தது ஆனால் பிச்சினிக்காடு அணியினார் தங்களின் DEFENCE திறமையால் தடுத்துவிட்டனர். இறுதியில் 3-1 என்ற கோல் கணக்கில் AFFA அதிரை அணி பிச்சினிக்காடு அணியினரை தோற்கடித்து வெற்றிக்கோப்பையை தட்டிச்சென்றது.

மொத்தத்தில் இன்றைய கால்பந்துப் போட்டி அதிரை AFFA அணியின் ஆளுமையே போட்டியில் இருந்ததால் இந்த வருடத்தின் முதல் கோப்பையை மேலனத்ததில் வென்றுள்ளனர். இந்த தொடர்போட்டியின் சிறந்த விளையாட்டு வீரராக அதிரை அணியின் தலைவர் அஸ்ரப் தேர்தெடுக்கப்பட்டு சிறப்பு பரிசும் வழங்கப்பட்டது.

விளையாட்டு போட்டி நடைப்பெறும் போதும் சரி, பரிசளிப்பு விழா நடைப்பெறும் போதும் சரி அதிரை விளையாட்டு ரசிகர்கள் மிகவும் கண்ணியமாக நடந்துக்கொண்டதை மேலனத்தம் ஊர்வாசிகள் வெகுவாக பாராட்டினார்கள். வெற்றியின் சந்தோசத்தில் ஏதாவது அசம்பாவிதம் நடைபெறாமல் இருக்கும் வண்ணம் அனைத்து அதிரை அணி வீரர்களும் ரசிகர்களும் ஊர் திரும்பும்வரை சில முன்னால் விளையாட்டுவீரர்கள் உடன் இருந்து எல்லோரையும் வழியனுப்பி வைத்தனர் என்பதை இங்கு குறிப்பிட்டு சொல்ல வேண்டும்.

வெற்றிபெற்ற அதிரை AFFA அணியினரை அதிரைநிருபர் குழு சார்பாக பாராட்டுகிறோம். எல்லா விளையாட்டும் விளையாடுங்க ஆனால் படிப்பை மட்டும் கோட்டை விட்டுடாதிய இளம் விளையாட்டு வீரர்களே என்ற வேண்டுகோள் செய்தியுடன் மீண்டும் ஒரு கால்பந்து விளையாட்டுக் கண்ணோட்டத்தில் சந்திக்கலாம்.

-- அதிரைநிருபர் குழு.

புகைப்படங்கள் இதோ...