இன்று 19-OCT-2011 - தேர்தல் நாள் ! 12

அதிரைப்பட்டினத்தில் இன்று தேர்வு நிலை பேரூராட்சி மன்றத்திற்காக தேர்தல் நடைபெறும் நாள். ஆடி அடங்கியிருக்கும் பிரச்சாரத்தின் உச்சம் அதில் மச்சம் யாருக்கு என்று உரசிப் பார்க்கும் நாள். ஊரார் ஒன்று கூடியும் பற்பல பிரிவுகளாகவும் அவரவர் விருப்பு வெற்றுப்புகளின் அடிப்படையிலும் சமுதாய நல்லெண்ண நோக்கிலும் / சுயலாப அரசியல் சூழலை அலசி ஆராய்ந்து வாக்களிக்கும் நாள்.

இன்று மாலை ஐந்து மணியோடு அந்த தவிப்பும் அடங்கிடும் இனி யார் வெற்றியாளர் என்று முடிவு வரும் வரை அடுத்த பதற்றம் தொற்றும், அடுத்த நாள் அந்தப் பதற்றமும் பஞ்சாக பறந்திடும். வெற்றி பெற்றவர்கள் களிப்பிலும் தோற்றவர்கள் அசதியிலும் இருந்திடுவர் சரி எப்படியும் நிகழப்போவதாக இருந்திடட்டும்.

தேர்தல் அறிவித்த நாளிலிருந்து தனிப்பாதை வகுத்து ஆளாளுக்கு பிரிந்து ஒன்றுவிட்டவர்கள் எதிரும் புதிருமாகவும், நேசம் பாராட்டிய அடுத்ததடுத்த தெருக்காரர்கள் அடியாட்களைப் போல் குரூரப் பார்வை பார்த்தச் சூழலும் உருவானது நிஜமே.

சரி, நடந்தது நடந்ததாக இருக்கட்டும், வெற்றி பெற்றவர் நாம் விரும்பாதவராகவே இருந்திடட்டும், எல்லாப் புகழும் அல்லாஹ்வுக்கே என்ற உணர்வுகளுடன், ஆவேசம் கொள்ளாமல் அமைதி காத்திடுவோமென்றால் இழந்த மனங்களையும் மீண்டும் வெல்வோம் அவர்களின் மனதில் நிச்சயம் குடிகொள்வோம் நிரந்தரமாக. நாம் செய்வதாக வாக்களித்த பொதுப்பணிகளை அல்லாஹ் உங்களின் வாயிலாக நிறைவேற்ற வாய்ப்பளித்து இருக்கிறான் அதனைச் சிறப்புடன் செய்து நம் மக்களுக்கு நன்மை பயக்கும் காரியங்களை தொடர்ந்திடுங்கள் என்று வாழ்த்துவோம், அப்படிச் செய்வதற்கும் நாம் சலைத்தவர்களல்ல என்று நிருபிப்போம்.

இவைகள் எல்லாவற்றையும் விட, வெற்றியாளர்கள் நாம் விரும்பியவராக இருந்திருந்தால், ஆணவம் கொள்ளாமல், நிதானத்துடன் முதலில் அல்லாஹ்வுக்கு நன்றியுடையவர்களாக இருந்திடுவோம். வெற்றியை நமக்கென கிடைத்திட தோல்வியை தழுவியவர்கள் நம் சகோதரர்கள்தான் என்ற உரிமையில் அவர்கள்மீதான காழ்புணர்ச்சிகளை கலைந்து நட்பு பாராட்டுங்கள். அவர்களிடம் நேரில் சென்று உங்களால் என்ன பணிகள் ஊருக்கு செய்ய நினைத்திருந்தீர்களோ அதனை என்னிடம் எடுத்துரையுங்கள் நான் உங்களின் சார்பாக செய்கிறேன் என்ற உறுதியளியுங்கள் அவர்களுக்கும் நம்பிக்கையூட்டுங்கள். உங்களின் அனைத்து நற்பனிகளுக்கும் அவர்களைத் துணைக்கு அழையுங்கள்.

இது ஒன்றும் சாத்தியப்படாத நிகழ்வுகளல்ல ! தேர்தல் நேரத்தில் பிரச்சாரங்களில் அடுத்தவர்களின் மனம் நோகும்படி நிகழ்வுகள் நிழ்ந்திருந்தால் அந்தச் சகோதரரை சந்தித்து அவரிடம் மன்னிப்பு கேளுங்கள் அல்லது குறைந்த பட்சம் அவரை மேலும் நிந்திக்காமலிருந்திடுங்கள், அவைளுக்காக அல்லாஹ்விடம் மன்னிப்பு கேளுங்கள். தேர்தலில் கிடைத்த வெற்றியை விட அங்கே உங்களுக்கு கிடைக்கும் வெற்றி எல்லா வற்றையும் மிஞ்சும் வெற்றியாகும்.

22ம் தேதி அக்டோபர் 2011 முதல், அதே தெருவில் அதே உடையில், நடையில், கூடுமிடத்தில், தொழுமிடத்தில், விருந்தில் என்று ஒருவரையொருவர் சந்திப்புகள் தொடரும் அவைகள் எல்லாமே நமக்கிடையே நட்பையும் அன்பையும் பரிமாறிடும் களமாகத்தான் இருக்க வேண்டும் இன்ஷா அல்லாஹ்…

நாமும் சாதாரன மனிதர்கள் தானே, வீடுவிடாக வாக்கு சேகரிக்கச் செல்லும்போது உங்கள் வீட்டுப் பிள்ளை என்று சொல்லித்தானே வைத்தோம் ஆதலால் தோற்றவர்களும் நம் வீட்டுப் பிள்ளைகள் என்று அரவனைக்க கற்று கொடுக்கவும்தான் வேண்டுமா? வேண்டியவர் வேண்டதவர் என்று யாவரிடமும் வாக்கு கேட்டிட கெஞ்சிய மனம் தோற்றவர்கள் நமம்வர்கள்தானே என்று கொஞ்சிட மனம் இடம் தராதா ?! நிச்சயம் மனம் வைத்தால் மார்க்கம் (வழி) உண்டு !

மனம் விட்டு பேசுங்கள்….

- அதிரைநிருபர் குழு