அதிரை உள்ளாட்சித் தேர்தலும்... ! அதிரைநிருபரும் ! 31

“ஹலோ..”

“அஸ்ஸலாமு அலைக்கும்,”

“என்ன செய்தி சோஹமா இருக்கியளே?“

“ஊர்ல தேர்தல் நேரம், இப்போ என்ன நிலவரம்?“

“யாரு ஜெய்ப்பாங்கா?”

“முப்பது ஆண்டுகளாக பேரூராட்சி மன்றத்தை ஆண்ட காங்கிரஸ் தான் வரும் போல தெரியுது…”

“இல்லைப்பா திமுக தான் வரும் போல தெரியுது..”

“அதெல்லாம் இல்லைங்க ஆளும் கட்சி தான் வரும்…”

“ஏன் சுயட்சையாக நிற்க்கின்ற வக்கீல் அவர்கள் வந்தாலும் வரலாம் போல தெரியுது..”

“அட போப்பா பொலப்பில்லாதாளு… போறப்போக்க பார்த்தா நம்மாளுக யாரும் வரமாட்டாங்க போல தெரியுது…”

இது போன்ற சம்பாஷனைகளும், என்னற்ற கேள்விகளும், குழப்பமான வெறுப்பேற்றல்களும், நேர்முகமாகவோ அல்லது அலைப்பேசியினூடோ காதில் விழத்தான் செய்கிறது.

நிற்க… !

பெருமூச்சுவிடுங்க…! ஸ்ஸ்ஸ் யா அல்லாஹ்…!

அட! நீங்களும் ஆரம்பிச்சுட்டியளா என்று கேட்கத்தோன்றுகிறதா? இது உள்ளாட்சி மன்றங்களுகுக்கான தேர்தல் பற்றிய பதிவு அல்ல என்றாலும் அதிரைநிருபரின் இச்சூழலின் நிலைப்பாட்டை எடுத்துரைப்பதற்காக இந்த பதிவு.

அதிரைநிருபர் தளம் அதிரையில் நடைப்பெற இருக்கும் பேரூராட்சி மன்றத் தேர்தல் பற்றிய நிகழ்வுகளை அமைதியாக அவதானித்து வருகிறது ஆனால் அதற்கான ஊடகமாக செய்திகளில் கவனம் செலுத்தவில்லை, காரணம் அதிரையின் அனைத்து வலைத்தளங்களும் ஊர் செய்திகளை உடனுக்கு உடன் அவர்களுக்கு உரிய பாணியில் பகிர்ந்தளித்துக் கொண்டிருப்பதால் நாம் மட்டும் என்ன புதுசாவா கொடுக்க முடியும் என்ற அடிப்படையிலேயே. ஆனால், தனித் தன்மையுடன் கூடிய அனுகுமுறைக்கு வாய்ப்பு கிடைக்கும் பட்சத்தில் நிச்சயம் நம் வாசக நேசங்களுடன் பகிர்ந்துக்கொள்வோம். இந்த முறை நிறையவே விமர்சனத்திற்குள்ளாகியிருக்கும் இந்த உள்ளாட்சி தேர்தல் நிகழ்வுகளை அப்படி தள்ளி நின்றுதான் கவனிப்போமே.

அன்று முதல் இன்று வரை தொடர்ந்து தனித்தன்மையுடன் தனக்கென்று ஒரு தனி நெறியை உருவாக்கி கண்ணியத்துடன், மரியாதையுடன், நட்புடன், சகோதரத்துவத்துடன், சில நேரங்களில் நகைச்சுவை உணர்வுடன், பல நேரங்களில் பாசமிகு அனாமத்து பின்னூட்டக்காரர்களிடம் கண்டிப்புடன் வரைமுறைகளுக்கு உட்பட்டு இணையக்கடலில் மிதந்து நல்ல இதயங்களை இணைத்து மேலும் அவ்விதயங்களோடு தொடர்ந்து உறவாடி வருகிறது நம் அதிரைநிருபர் வளைத்தளம் என்பதை அதிரைநிருபர் பக்கம் தினசரி தட்டிக் கொடுத்துச் செல்லும் வாசக நேசங்களாகிய நீங்கள் நன்கு அறிவீர்கள்.

எழுத்தாற்றல் மிக்க திறமைசாலிகளை கண்டறிந்து, அவர்களை ஊக்கப்படுத்தி, மேலும் வளரச்செய்து அதிரைநிருபரைவிட இன்னும் தரம்வாய்ந்த தளங்களில் அவர்களின் பங்களிப்பை செலுத்துவதற்கு வாய்ப்புகளை உருவாக்குகிறது என்பதற்கு நம் அதிரைநிருபரின் ஆஸ்தான கவி அவர்கள் ஓர் சிறப்பான உதாரணம். 

மற்ற இணையத்தளங்கள், செய்தி ஊடகங்களில் பங்கெடுத்தவர்கள் நம் அதிரைநிருபர் வாசக வட்டத்தின் ரசனையினை உணர்ந்து நமக்காக தன் பதிவுகளை பகிர்ந்தளிக்கிறார்கள் என்பதற்கு ஜெயா டிவி செய்தி வாசிப்பாளர் சகோதரர் புதுசுரபி ரபீக் அவர்கள் ஓர் எடுத்துக்காட்டு. அட! என்ன எங்களை எல்லாம் விட்டுட்டியலே என்று யாரோ முணுமுணுப்பது போல் தெரிகிறது. யாரையும் விட்டு விடவில்லை மறக்கவுமில்லை, நினைவுகளை விட்டு அகலாத அச்சாக என்றும் எங்கள் மனதில் இருக்கிறீர்கள் அத்துணை பங்களிப்பாளர்களும். பட்டியல் நீண்டுக்கொண்டே செல்லும் என்பதால் இந்த பதிவை வாசிக்கும் நீங்கள் அனைவரும் அதிரைநிருபர்கள் தான் என்பதற்கு இவர்களும் அதிரைநிருபர்களே என்ற பதிவே சாட்சி.

அதிரைநிருபர் வலைத்தளத்தின் பொறுப்பாளிகள் பற்றி தவறான கருத்துருவாக்கம் இன்னும் சில சகோதரர்களிடம் விலகாமல் உள்ளது என்பதை அந்தச் சகோதரர்களிடம் நேரில் சமீபத்தில் உரையாடியதில் உணர முடிகிறது, இது சற்றே வேதனை தரக்கூடியதாக இருப்பினும், மீண்டும் இங்கு பதிவு செய்கிறோம் அதிரைநிருபர் வலைத்தளமும் அதன் பங்களிப்பாளர்களும் அதிரையில் உள்ள எந்த ஒரு வலைதளத்திற்கும் எதிரானவர்கள் அல்ல. அனைத்து வலைத்தளங்களும் நம் சகோதர வலைதளங்கள் எனபதற்கு நம் அதிரைமணமே சாட்சி. எந்த ஒரு வலைதளத்தை பற்றியும் அதிரைநிருபரில் எங்கேனும் ஒரு பதிவு அல்லது அதிரைநிருபரின் பின்னூட்டம் கூட இதுவரை வெளிவரவில்லை. அதிரைநிருபர் வலைதளத்தின் அணுகுமுறையில் குறையோ அல்லது ஆலோசனைகளோ இருந்தால் சுட்டிக்காட்டுங்கள் நிச்சயம் கவனத்தில் கொள்கிறோம்.

அதிரைநிருபர் ஊர் செய்திகளை தருவதில்லையே, கட்டுரை, தொடர்கள், கவிதை, வாழ்வியல் என்றுதானே செல்கிறது இப்படியாகவும் சிலிர்த்துக் கொள்கிறார்கள் சில சகோதரர்கள். 

ஆரோக்கியமான கருத்துப்பரிமாற்றம் செய்து, ஒருவரை ஒருவர் பாராட்டி (முகஸ்துதி இல்லை), நட்புகளை வளர்த்துக் கொள்வதற்கும், அதிரைநிருபர் ஒரு அங்கமாக செயல்பட்டு வருகிறது என்பதை எங்கள் வாசக நேசங்கள் அனைவரும் அறிவீர்கள். அதிரைநிருபர் பின்னூட்டங்களை படிப்பதற்காகவே தனி வாசகர் வட்டம் உள்ளது என்பதை அதிரைநிருபர் தளம் நன்கு அறியும். இதற்காகவே தான் குழப்பங்களைத் தூண்டும் அனாமத்து பின்னூட்டங்களை அதிரைநிருபர் என்றுமே அனுமதிப்பதில்லை. மேலும் அனைத்து சகோதர சகோதரிகளின் கண்ணியத்தை காப்பதில் நம் அதிரைநிருபர் மிகவும் அக்கரையுடன் செயலாற்றி வருகிறது என்பதற்கு ஆரோக்கியமான பின்னூட்டங்களே சாட்சி. அல்லாஹ்வுக்கே எல்லா புகழும்.

உலகில் எந்த ஒரு ஊடமும் அனைத்தையும் ஒரே பங்களிப்பைத் தருவதில்லை, அவைகளில் செய்திப் பிரிவு, வர்த்தக நிகழ்வுகள், பல்சுவை நிகழ்வு என்று பலரின் ரசனைக்கு ஏற்ப செயல்படுகிறது. இது போலத்தான் அதிரைநிருபர் விழிப்புணர்வு கட்டுரைகள், தொடர்கள், கவிதை (இதுலையும் message இருக்கு), வாழ்வியல் கட்டுரைகள், கல்வித் தகவல்கள், மார்க்க அறிவுரைகள் என்று முன்னுரிமை தந்து ஒரு பரந்து விரிந்த வாசகர் வட்டத்தை தன் வசப்படுத்தியுள்ளது. அல்ஹம்துல்லில்லாஹ் !

அதிரைச் செய்திகளை உடனுக்குடன் நம் அதிரைநிருபரால் தரமுடியவில்லை என்றாலும் ஊர் செய்திகளை உடனுக்குடன் பகிர்ந்தளித்து இன்று எல்லோருடைய வரவேற்பை பெற்ற அதிரை வலைதளங்களின் ஒன்றான அதிரை பி.பி.சி. வலைத்தளத்தை கடந்த ஜூன் 27ம் தேதி நம் அதிரைநிருபரில் அறிமுகம் செய்து வைத்தோம், இந்த பதிவே இன்று நம் அதிரைநிருபரின் பிரபலமான முதல் பதிவு என்பதற்கு கீழ்கண்ட புள்ளி விபரங்ளகடங்கிய படமே சாட்சி.

அதிரை பி.பி.சி. வலைத்தளம் அறிமுகப் பதிவு பற்றி நம்மில் சிலருக்கு ஏதோ விரும்பத்தகாத செயலைச் செய்திட்டது போல் உணரப்பட்டது, என்பதை அதன் பின்னர் வந்த விமர்சனங்களில் கண்ட உண்மை. காரணம் ஏற்கனவே 40க்கு மேற்பட்ட வலைத்தளங்கள் உள்ளது இது போதாது என்று இன்னொன்றா? என்ற கேள்வி கணைகள் தொடுக்கப்பட்டு கடும் எதிர்ப்பும் கிளம்பி பின்னூட்ட மழை பொழிந்தது. 

அதிரையில் உள்ளவர்களால் தான் அதிரை செய்திகளை உடனுக்கு உடன் தரமுடியும் என்பதில் நாம் உறுதியாக இருந்ததால், துடிப்புடன் செயலாற்றிட வந்த சகோதரர்களின் வலைத்தளத்தை அறிமுகம் செய்தோம், இன்று இத்தளத்தில் வரும் ஊர்ச் செய்திகளும் காணொளிகளும் ஏனைய பிற அதிரை வலைத்தளங்களில் நன்றியுடன் வெளியிடப்படுவதை காணும் போது மகிழ்வைத் தருகிறது அல்ஹம்துலில்லாஹ். உண்மையிலேயே இது ஒரு ஆரோக்கியமான நிகழ்வு என்று சொன்னால் மிகையில்லை. மேலும் கடும் விமர்சனத்திற்குள்ளான அதிரை பி.பி.சி.யின் அறிமுக பதிவை அதிரைநிருபர் வலைத்தளம் அன்று (27.06.2011) பதிந்தது நன்மையை நாடியே என்று கடந்த சில வாரங்களாக மேலும் உறுதி செய்யப்பட்டுள்ளது. இது அதிரைநிருபரின் நிலைபாட்டிற்கு கிடைத்த அதுவும் சற்றே காலம் கடந்த வெற்றி என்று சொன்னாலும் பொருத்தமே.

திறமையானவர்களை தட்டிக் கொடுக்கலாமே, தவறு செய்தால் அன்பாக தட்டிக் கேட்கலாமே, மேலும் அவர்கள் புரிந்துகொள்ளும் விதமாக அன்புடன் திருத்தலாமே, இதுவெல்லாம் சாத்தியமில்லை என்று வரும் போது மட்டும் கோபமே காட்டிடாமல் ஒதுக்கிவைத்து ஓரங்கட்டலாமே என்பது தான் அன்றும், இன்றும், என்றும் அதிரைநிருபர் தளத்தின் நிலைப்பாடு. இன்ஷா அல்லாஹ்.. இது என்றும் தொடரும்.. இணையத்தால் பல நல்ல இதயங்களை இணைக்க முடியும் என்பதற்கு அதிரைநிருபர் வலைத்தளம் ஒரு சிறந்த காட்டு.

அதிரைநிருபர் அதிக சொட்டுகள் (செல்ல குட்டுகள், hits) வாங்க வேண்டும் என்றில்லாமல், ஒரு நாளைக்கு ஒரு பதிவு என்று தன்னிலையில் தெளிவாக இருந்தும் அவசியங்கள் ஏற்படும்போது அடுத்த பதிவினையும் பதிந்திட்டும், அற்புதமான சிறந்த பங்களிப்பாளர்களை நீண்ட நாட்கள் சில சமயங்களில் வரிசையில் காக்க வைத்து விட்டுதான் பதிவுகள் வெளிவருகிறது. காரணம் அதிரைநிருபரில் வரும் பதிவுகள் தரமானதாக நல்ல ரசனையுடன் இருக்க வேண்டும் என்பதற்காகவும், அனைத்து மக்களும் படித்து கருத்திட வேண்டும் என்பதற்காவும் அதிரைநிருபர்-குழு சற்றே நேரம் எடுத்துக் கொள்கிறார்களே தவிர வேறு எந்த காரணங்களும் இல்லை. இதை நம் அனைத்து பங்களிப்பாளர்களும் நன்கு அறிவார்கள்.

அதிரைநிருபர் வலைத்தளம் மீது தவறான எண்ணம் கொண்டிருக்கும் சில அன்பு சகோதரர்களே, கடந்தகால மற்றும் புதிய பதிவுகளையும், பின்னூட்டங்களையும் படியுங்கள் பிரிவினை தூண்டும் எங்கேனும் ஒரு கருத்து இருந்தால் சுட்டிக்காட்டுங்கள் நெறிப்படுத்திக் கொள்கிறோம். இன்ஷா அல்லாஹ்.

அதிரையின் முன்னனி வலைதளங்களில் அதிரைநிருபரும் ஒன்று என்பதை வாசக நேசங்கள் அறிவீர்கள். அதிரைநிருபர் அதிரை வலைதளங்களில் முன்னனியில் இருக்க வேண்டும் என்பதைவிட, பக்குவபட்ட அனுகுமுறையுடன் முன்மாதிரியாக இருக்க வேண்டும் என்பதையே விரும்புகிறோம். இந்த நிலைபாட்டினை சிலர் விரும்பலாம் அல்லது விரும்பாமலும் போகலாம்.

எல்லாவற்றையும் அறிந்தவன் அல்லாஹ் ஒருவனே..

தொடர்ந்து இணைந்திருங்கள்..

-அதிரைநிருபர் குழு.