அது ஒரு பொற்காலம் 1977 - தொடர்கிறது.... 20

பகுதி - 4

அன்பார்ந்த அதிரைநிருபர் வலைத்தள வாசக அன்பர்களே!

அஸ்ஸலாமு அலைக்கும் 1977 மலரும் நினைவுகளோடு மறக்கவியலாத பவேறு விஷயங்களையும் சந்தோசமான கலகலப்பான விசயங்களையும் தங்களிடம் பகிர்ந்திருக்கிறேன். 

இன்றைய இளைஞர்கள் ஒவ்வொருவரும் ஆளுக்கு ஒரு இயக்கம் / கட்சி என்று தங்களை உட்படுத்தி பல பிரிவுகளாய் பிரிந்து கிடக்கிறார்கள் அண்ணன் ஒருபக்கம், தம்பி ஒருபக்கம், மச்சான் ஒரு இயக்கம், மச்சினன் ஓரு இயக்கம், இவ்வாறாக இயக்கங்களின் மயக்க கொள்கையால் ஊர் ஒற்றுமையை துறந்து சண்டை சச்சரவுகள் தொடர் கதையாகவே இருக்கிறது இதிலிருந்து அல்லஹ் பாதுகாப்பானாக.

என்னுடைய பால்ய நண்பர்களிடம் இப்பொழுது நடக்கும் விசயங்களை கவலைபட்டு பேசும் பொழுது சிறுவயதிலே (70 களில்) சமுதாயத்திற்காக நாம் செய்த நல்லவைகளுக்கு எந்த இயக்கங்களும் தேவைப்படவில்லை நற்சன்றிதழ் வாங்க மனமும் ஆசை கொள்ளவில்லை. ஊர் நல்லாயிருக்கனும் சமுதாயம் சீர்படனும் என்ற எண்ணம் மட்டும்தான் எங்களது மனதிலும் நிறைந்திருந்தது எந்த எதிர்பார்ப்பும் இல்லாமல் நற்காரியங்கள் நிறைய செய்திருக்கிறோம் - அல்ஹம்துலில்லாஹ்.

அவ்வாறான சுவையான சம்பவங்கள் சிலதை பட்டியலிடுகிறேன் செய்த நல்ல செயல்களை சொல்லிக் காட்டுவதால் நன்மை குறைந்து விடுமோ என்ற கவலையோடு (இன்றய இளைஞர்களுக்கு எடுத்துக்காட்டாய் அமையட்டுமே என்ற நல்ல நோக்கோடு) சொல்கிறேன்.

ஆலடிக் குளமும் பெண்களும்

============================

அன்றய அதிரையில் வீட்டிற்கொரு குளியலரை கிடையாது ஏன் தண்ணீர் வசதியுள்ள வீடுகளும் சொற்பம்தான் குடி தண்ணீர் தேவைகளுக்கு சில பெண்கள் தினமும் ஒரு குடம் மண்பானையில் கொண்டுவந்து தருவார்கள். மாதம் 30 பைசாவிற்கு (மண்ணப்பங் குளம் தண்ணீர் கொண்டு வந்து என்று தருவார்கள் 5 பைசா அதற்கு விலை அதிகம்)

சொல்ல வந்த விசயம் வேறு பெண்கள் குளிப்பதற்காக சுபுஹு பாங்கு சொல்வதற்கு முன்பே எழுந்தால்தான் வெளிச்சம் வருவதற்கு முன்பே குளித்துவிட்டு வீடு திரும்ப முடியும் பெண்கள். எந்த நேரமும் குளிக்க வசதியான இடம் மரைக்கா குளம் (சித்தீக் பள்ளியின் மேற்புறமாய் அமைந்திருக்கிறாது !!). அடுத்து ஆலடிக் குளத்தில் பெண்களுக்காக ஒதுக்கப்பட்ட கரையும் தான் (ஒரு கரையில் 'ப' வடிவில் சுவர் எழுப்பி மறைவு ஏற்படுத்தியிருப்பார்கள் இன்றும் அது கம்பீரமாக அத்தாட்சியாய் நிற்கிறது).

ஒரு சமயம் ஊரில் சலசலப்பு பள்ளி வாசல்களில் ஆண்கள் கூடிப் பேசிக் கொண்டிருந்தார்கள் இன்றைய பெண்களுக்கு வெட்கம் கிடையாது சுபுஹு தொழுது முடிந்ததும் கூட இன்னும் செக்கடிக் குளத்தில் குளித்துக் கொண்டிருக்கிறார்கள், ஊர் கெட்டுப் போச்சு, காலம் கெட்டுப் போச்சு, என்று ஆளாலுக்கு பேசுவதும் சில ஆண்கள் பெண்களிடமே வந்து சப்தம் போடுவதுமாக இருந்தார்கள்.

நாங்களும் எங்கள் சொந்த பந்தங்களான பெண்களிடமும் இதுபற்றி சண்டையிட்டு இருக்கிறோம் அதற்கு அவர்கள்  கூறும் காரனங்கள் எங்கள் மனதில் ஒரு தாக்கத்தை உண்டு பன்னியது. ஆலடிக் குளத்தில் பெண்கள் கரையில் கால் வைக்க முடியாத அளவுக்கு களிமண் சேறும் அல்லிச் செடிகளும் நிறைந்து இருந்ததால் தான் அங்கே குளிக்காமல் அனைவரும் செக்கடிக் குளத்தையே நாடுவதால் இங்கே கூட்டம் அதிகமாகி சுபுஹு தொழுகை முடிந்த பின்னும் பெண்கள் குளிக்க காரணமாகிவிட்டது என்றார்கள்.

நண்பர்கள் சிலர் ஒன்று கூடினோம் தீர்க்கமாய் முடிவெடுத்தோம் எல்லோரும் சுபுஹு தொழுதுவிட்டு வீட்டில் உள்ள சட்டி கூடை மண் வெட்டிகளை எடுத்துக் கொண்டு ஆலடிக் குளத்தின் பெண்கள் கரையில் இறங்கி தூர்வார ஆரம்பித்தோம் 10 நாட்களுக்கு மேல் வேலைகளை தொடர்ந்தோம் அத்தோடு அந்தப் பிரச்சனை சுமூகமாக முடிந்தது.

செக்கடிக்குளம்

+++++++++++++++

புதுமனைத்தெரு நடுத்தெரு ஆலடித்தெரு நெசவு தெரு ஆகிய தெரு ஆண்களின் குளியலுக்கு செக்கடிக் குளம் முக்கியப் பங்காற்றியது இப்பொழுது தண்ணீரின்றி வற்றியிருப்பது போல் அப்போதெல்லாம் சுத்தமாக நீர் வற்றவே வற்றாது. மீண்கள் அதிகமாகி விட்டால் குளம் நாற்றம் எடுத்துவிடும் மீண் குத்தகை எடுத்தவர்கள் டீசல் பம்புசெட் வைத்து தண்ணீரை வெளியேற்றி விட்டு மீண்களை மட்டும் பிடித்துக் கொண்டு போய் விடுவார்கள். பிறகு குளத்தின் தண்ணீர் தேவைக்காக சி எம் பி வாய்காலில் வரும் தண்ணீரை இரவில் விழித்திருந்து செக்கடி குளத்திற்கு தண்ணீரை மடை திருப்பி விடுவோம். இதில் பக்கத்து ஊர் விவசாயிகளோடு பிரச்சனை வரும் அவைகளையெல்லாம் சமாளித்துதான் செக்கடிக்குளத்தை நிறப்புவோம்.

சலீம் பாய்

++++++++++

பழய பேப்பர் இரும்பு சாமான்களுக்கு நிலக் கடலை விற்கும் ஒரு நல்ல மனிதர் அவர் பெயர் ஞபகமில்லை பிற மதத்தவர் நாங்கள் விளையாடிக் கொண்டு இருக்கும் பொழுது எங்கள் அருகில் வந்து சிறிது நேரம் பேசிவிட்டுதான் செல்வார். பழகுவதற்கு ரொம்ப இனிமையானவர். அடிக்கடி இஸ்லாத்தைப் பற்றி நம்வூர் பழக்க வழக்கங்களைப் பற்றி நாங்கள் சொல்லக் கேட்பார்.

ஒரு சமயம் நாங்கள் அவரை விளையாட்டாக நீங்கள் இஸ்லத்தை ஏற்றுக் கொண்டால் என்ன என்று வினவினோம். அவரும் சட்டென ஒப்புக் கொள்ள உடனே ஆலிம்களை சந்தித்து விசயத்தை சொன்னோம். அவர்களும் இவரை அழைத்து வர சொன்னார்கள் அவரிடம் ஆலிம்கள் எல்லா விசயங்களையும் கேட்டு விட்டு கலிமா சொல்லிக் கொடுத்தார்கள் (அல்ஹம்துலில்லாஹ்). சிறிது காலத்திற்கு பிறகு நமதூரிலேயே குதிரை வண்டிக்காரர் மகளை திருமணம் முடித்து சந்தோசமாக சென்னையில் ஆட்டோ ஓட்டிக் கொண்டு இருந்தார். ஊர் வரும் போதெல்லம் எங்களோடு அன்பாய் இருப்பார் சலீம் பாய் நாங்கள் தான் அவருக்கு பெயரும் வைத்தோம் (காலம் சங்கர், சலீம், சைமன் ரிலீசான நேரமது).

மு.செ.மு.சபீர் அஹமது